ZRA in petrol leh diesel Rs. 100 tunga zuaklou di’n theisak
 |
| File photo |
Lamka, Nov-14: Zomi Revolutionary Army (ZRA) a town commander in tuni sunnung in press/media-te kimuhpih in economic blockade om ziaka van man natak a khang tawh kisai mipi theih di’n thupuan bawl hi. Aman agenna ah, e-blockade ziakin dist. ah vanman adiak in thautui vang mahmah a, huaipen dawr bawlte’n hun lemtang a la a aman khangsaklou ding leh petrol Rs. 100/- leh diesel Rs. 70-/ tunglam a zuaklou ding banah nitak nektawm chi, chini, dal, anntang leh a dangdang leng rate a ngei mah a zuak di’n theisak hi.
Rs. 500/- leh Rs. 1,000/- note sihsak tawh kisai a dawr bawlte’n leng sumnen omlou paulap a dawr khak chihte om theilou ding a, Dec. 30, 2016 tan sum khek theihna hun kinei ahihman in customer-te tawh adjustment mipi khualna van leisak dingin ngen a, mun dang apan van hongtung himhim Imphal ah puaksawn phal hilou ding chi a, ZRA in hoihtak a enkai ding ahihman in kuapeuh pilvang ding inleng theisak hi. Hiai tawh kisai mipi khualna ahihman in kuapeuh in nungthuap dia ngen kawm in thupuan palsat omleh atung uah action khautak lak hiding inleng gen hi.
HEADLINES:
Hangsantak in PM thupukna NDA in gupthu puang
Nekgukna leh Black Money adi’n mun omlou : PM
New Delhi, Nov-14: Prime Minister Narendra Modi in Uttar Pradesh ah tuni’n Gazipur rail project tuamtuam hongkhia in public meeting hunzatna uap a, tax piaklouh sum(black money) leh nekgukna adi’n gamsung ah mun om nawnlou chi hi. Central government in diktatlouhna doudal dia thupukna poimawhtak alak lai in, Black money kemte leh amaute tawh kizom political party-te’n centre govt. minsiat sak sawm in huai thupukna kalh uh chi hi. New Delhi ah tuni’n NDA pawlin meeting nei uh a, nekgukna leh diktatlouhna doudal dia, Prime Minister in thupukna hangsantak a bawlte gupthu puang uhi.
Gamsung mipi’n ‘Demonitisation’ kithuahpih a govt. thupukna pomsiam dingin Prime Minister in ngen a, mizawng dopsangna dia lampi omsun hi’n leng gen hi. Black Money-te Indian economy a kaihlut ahihchiang in gamsung economy khangtou ding a, midangte sang in namniam leh khawtang a tuantual-te’n hamphat pih pen ding uh chi hi. Sum note Rs. 500 leh Rs. 1000 sihsak apan Bank staff-te’n nikhat in dakkal 20 sung nasem in pang uh a, mipi kianga sum piakkhiak ding ngaihtuah a akipiakna uh centre govt. in kipahpih mahmah hi’n puang a, black money zungkalhna dia mipi’n ni 50 sung ngaklai ding inleng ngen hi.
Centre govt. a vaihawm NDA nuaia kikhai khawm party makai-te’n New Delhi ah tunitaklam in meeting nei uh a, ‘Demonitisation’ tungtang a Prime Minister in thupukna hangsan leh khauhtak (bold decision) abawlte full support puang uhi. Tuni a meeting hunah Parliament Winter Session tungtang genkhawmna leng nei uh a, opposition pawlin Demonitisation zukkik dia ngetna abawlte nawlkhin uhi. Information and Broadcasting Minister Venkaiah Naidu in huai tawh kisai tunitaklam a agendan in, Opposition pawlin sum tungtang ngetna aneihte uh ngaihtuah thak poimawh lou a, India vaihawmna leh mipi adia thilhoih pen hidia lam-et ahihman in khek lamdang hilou ding chi hi.
LOCAL NEWS:
Chairman ADC/CCpur in ngen
Lamka, Nov-14: Langkhanpau Guite, Chairman, ADC/CCpur in Rs. 500/Rs. 1000 note leh economic blockade ziaka mipi haksatna thu Press tungtawn in ngetna (appeal) bawl hi. Aman agenna ah Rs.500/- leh Rs.1000 note thu ah India gamsung pumpi ah mipi buaina hi a, dawr/dukan te’n mi-le-sa khualna ziaka Rs.500 leh Rs.1000 note laksak ding in ngen hi. Bank-te’n leng mipi khualna a chitak, gin-omtaka Rs.500/- leh Rs.1000 note kheksak a, kuaman business a zanglou ding in ngen hi. UNC te’n ni 10 val NH-te ah economic blockade abawl ziak un Manipur ah nek-le-tak leh niteng poimawh tasam ta a, dawr/dukan leh mahajon te’n mahni mi-le-sa khualna ziaka nektawm zong leh niteng poimawh tuamtuam-te stock beimasiah aman (rate) akan avala hihkhanglou ding in ngen a, akan avala thilman hihkhang om a, office lam ah report om leh action kila bangbang kuamah khase theilou ding in theisak hi. Petrol leh diesel haksatna thupitak kituak a, azuaktute mahni mi-le-sa hehpihna tawh tui (water) tawh helkhawm lou a, a om bangbang siangthou taka zuak ding in ngetna (appeal) bawl hi.
SDPO 2 in hong join
Lamka, Nov-14: A.Ghanashyam Sharma, MPS in SDPO/Imphal West apan tuni’n SDPO/CCpur lending in join a, H. Basulal, MPS SDPO/CCpur lenlel SDPO/Mayang Imphal ah kisuan hi. Augustine Jangminthang Khongsai, MPS in training zawh in SDPO/Thanlon lending in join a, Sangboi Gangte, MPS SDPO/Thanlon in Asst. Commandant, 1st IRB HQ Veng lending hi.
Mi 10 in Police ah vanzat pekhia
Lamka, Nov-14: Dist. Magistrate/CCpur in Sec.133 (1) (a) of Code of Criminal Precedure 1973 dungzui in Khuga Dam ah Dynamo electrical machine high voltage leh poisonous chemical zang a ngasa (fish) beng/mat khamna Sept.19, 2016 in order suah hi. Huai sepsuahna in zan nitaklam in Inspector N. Thangzamuan, Officer i/c Lamka Police Station makaih in Police te’n Khuga Dam ah Dynamo zang a ngasa beng/man-te enzui uhi. Tuni zinglam in Dynamo zang a ngasa beng/man mi 10 te’n a vanzat uh Dynamo 6 Police Station ah pekhia in ki-surrender uhi.
Maban ah midang Dynamo zang a ngasa beng/man-te list Police te’n kemvek uh a, akipiakkhiat kei uleh vanzat teng tawh matkhawm vek hiding uh a, court thukhenna maituah ding uh hi’n Police apan kiza hi. Ngasa beng/man te’n dynamo 1 ah Rs. 3000/- vel a lei uh hi’n kigen hi.
Free diabetes screening test om
Lamka, Nov-14: Dist. Non-Communicable Disease (NCD) Clinic leh Dist. hospital a diabetes clinic-te kithuah in tuni’n hospital casualty ah world diabetes day zatna dan in free diabetes screening test om a, mun tuamtuam apan mi 20 test bawl uh hi’n kigen hi.
PTC/GHQ General Secretary kitawp
Lamka, Nov-14: Paite Tribe Council (PTC)/GHQ a Central Working Committee te’n tuzing in PTC/GHQ office, Hiangtam Lamka ah emergency meeting nei uh a, John K. Ngaihte, Gen. Secretary, PTC/GHQ in (late) Mrs. Pamsialching sihna thu ah aseppih-te kuamah donglou a ‘To Whom It May Concern’ chih certificate DC/CCpur kiang ah apiak thu ah hihkhial chi a moral ground ah kitawpna lai a piak genkhawm uhi. Huai thu hunsawttak agenkhawm nung un CWC in Gen. Secretary kitawpna pomsak uh a, ‘To Whom It May Concern note’ leng CWC in bangmahlou (null and void) a koih in, District Magistrate kiang ah certificate cancelled ahi chih lai pia uhi. PTC GHQ a Gen. Secretary akitawp ziak in PTC ki-ukna dan (11th Amendment 2013) Bung 5, Article XII Clause 48 (vi) pansan in H. Pauzalal, Secretary (Internal) in Gen. Secretary, PTC GHQ mawhpuakna lending in namkip uhi.
School tuamtuam in C-Day zang
Lamka, Nov-14: Headquarter, Belam Veng a Excel Foundation Academy in tuni’n Children’s Day tawh kithuah school kum 1 chinna zang uh a, Chief Guest in CT Lian Guite, MDC pang a, functional president in S. Thienlaljoy Gangte, MCS AC to DC/CCpur pang hi. Young Learners School in ‘reach out & touch project’ tungtawn in Children’s Day zang uh a, Nehru Marg a Destitute Childrens’ Home (Mercy Society) leh Lajangphai a ABC Home veh in home a om naupangte kiang ah blanket 1 chiat pia uhi.
YLS student te’n hiai dingin donation box ah Rs. 16,000/- val thawhkhawm in, silver jubilee year ahih tawh kiton in school inleng behlap uh a, Rs. 30,000 val man blanket lei uh, mercy society ah 35 leh ABC Home 14 pia uhi.
Ebenezer Academy inleng school campus ah C-Day zang uh a, huai hun zatna school managing committee-te telin mi poimawh tuamtuam in uap uhi. Prog. hunsung in school annual sports leh discipline tuamtuam a student ettontak telkhiakte kiang ah award a piak ban uah children home tuamtuam a naupangte panpihna dia student-ten donation box ah Rs. 21,720/- a koihkhawm uh, Amazing Grace leh Only Grace Children’s Home-te kiang ah akim tuakin pia uhi. Huai bang kal ah H.M School inleng Children’s day zatna tawh kithuah annual day cum Prize Distribution nei uh a, Chief Guest in Khaipao, MDC & SMC member pang hi. Aman HLSC 2016 school topper Ngaichullou Neihsial d/o Mr Kubgkhogou Neihsial of S Kunglal Veng kiang ah Rs. 5000/- pia hi. Ngulthang Haokip Social Worker in HLSC 2017 exam ah MIL topper teacher kiang ah Rs.1000/- piak chiam hi.School managing in examna a 80%, 70% leh 60% mute kiangah sum leh memento pia uh a, program sung in Literary award 260 leh sports award 250 hawmkhia uhi.
Petrol litre 1 ah Rs. 180-200/- in kizuak
Lamka, Nov-14: UNC te’n ni 14 paisa in NH-te ah economic blockade abawlziak un Manipur ah niteng thil poimmawh (essential commodities) kitasam a, mipi’n buaina thupitak tuak hi. CCpur Dist. ah leng niteng thil poimawh tuamtuam ban ah petrol leh diesel haksatna thupitak mipi’n tuak a, bazar ah black in petrol litre 1 ah Rs. 180-200/- kikal in kizuak a, diesel litre 1 ah Rs.90-100 kikal in kizuak hi.
Manipur Express’ Web-offset machine fitting zawh hidekta
Manipur Express sut (print) na ding web-offset colour machine fitting kizou dekdekta a, black pen zawh hi a, huai test-na dan in issue khenkhat hong kisuah masa phot ding hi. Colour lam fitting leh setting zawh hunhun in a honna leh latna programme om ding a, huchi’n akisuah ding bangin hong suak kheta ding hi.
1-Day BJP Political Conference
Lamka, Nov-14: 57-Henglep A/C nuai a Phouljang, Kangvai, S. Kotlian, Matijang leh Teijang Polling Stationte adi’n tuni’n Gothol Community Hall ah T. Thangzalam Haokip @ TT Haokip’ Election Campaign Committee saina in 1-Day BJP Political Conference om hi. Huai ah Mangiton Singh, Sr. BJP leader, Manipur; Salam Ibohal Singh, Sr. BJP leader, Manipur, M. Bhorot Singh, Former President BJP Manipur leh T. Thangzalam Haokip, Former Dy. Speaker in thugen hi.
TT Haokip in agenna ah mipi’n MLA hilelte i deihkei uleh khekkhiat ngai a, mipi khut ah kinga hi’n gen hi. BJP ticket leng mipi khut ah kingah hi’n gen a, Bill 3 tawh kisai govt in organisation tuamtuam thuzak hileh hiaitan tunglou ding leh Lamka ah mi 9 silou ding hi’n gen hi. Tutung in MLA telching hileh atenna inn kuaman halsaklou ding hi’n gen a, aziak bel Bill 3 in atunkhak teng hoihtaka study masalou signature pelou ding hi’n gen hi.
Rayburn H/S in school exhibition nei
Lamka, Nov-14: Rayburn High in tuni’n school campus ah ‘discover, develop, decorate’ thupi pansan in exhibition nei uh a, school khangthu a masapen hilai hi’n kigen hi. Huai hun zatna Langkhanpau Guite, Chairman ADC/CCpur in chief guest hihna tawh uap in hongkhia hi. Aman hibang talent hoih nei-te tungtawn in tunung chiah i gam bawlhoih a om ding lam-et thu gen hi. School exhibition ahihleh CBSE guideline nuai a co-curriculum activities khat hi a, photography, flower, arts & craft leh science exhibition hi a, student te’n amau khutsuak thil tuamtuam lahkhia uhi. Huchikal ah, Covenant school inleng covenant children’s home campus ah Children’s Day zang in exhibition nei uhi.
Healthy Baby Show category 3 in kikhen
Lamka, Nov-14: Child Health, NHM/CCpur saina in Nov.16, 2016 zinglam dak 10:00 in Dist. Hospital campus ah Healthy Baby show/competition, 2016 om ding a, category 1 ah 6 months- 11 months, category 2 ah 12 months- 23 months leh category 3 ah 24 months- 36 months hiding hi. Category teng ah kipahman 1st in Rs.3000/-, 2nd in Rs.2000/- leh 3rd in Rs.1000/- hiding a, transparency omnang in Health & FW employee tate competition ah teltheilou ding uh a, category teng a 1st te Nov.19, 2016 in State Level Healthy Baby show/competition ah CCpur Dist. ai-oh in kuan ding uhi. Healthy Baby show/competition a telding nu-le-pa te’n MCP Card/Immunisation card, Birth registration certificate leh Dist./Village Authority apan Residential Certificate tawingai ding hi.
CDLSA in home tuamtuam veh
Lamka, Nov-14: CCpur Dist. Legal Services Authority in Manipur State Legal Services Authority huhna in tuni’n Children’s Day zatna danin orphanage home tuamtuam Pearsonmun a Malsawm Ability Resource Centre; Nehru Marg a Destitute Children’s Home (Mercy society), New Mata a Chacha Nehru Bal Bhawan leh SA Road a Destitute Girl’s Home veh in naupangte tawh hun zangkhawm in thilpiak tuamtuam pia uhi.
N. Ginsianlal, Advocate in Children’s Day message agenna ah Pathian in mihingte ama kibatpih leh tup khat nei in bawl a, hih theihna tuamchiat kinei ahihman in lungkiakna ding omlou hi’n naupangte hasuan hi.
8th Seikam:
United Khawzim Brothers’ in champion la uh
Kholmun Youth Club saina a Kholmun playground a 8th Seikam Memorial Open Football Tournament-2016 final match kimawlna tuni in om a, hiai hun TN Haokip, President MPCC (I) in Chief Guest hihna tawh uap a, Functional President in Khaipao Haokip, ADC/CCpur pang a, Guest of Honour in Lunminthang Haokip, DC/CCpur pang in Special Invitees in Mr & Miss HSO, 2016 te pang uhi.
Hiai hun in DC/CCpur in sports i chih alternative means of employment hidan in gen a, CCpur ten ground hoih neihna ding a govt. akipan fund kiningching om hidan in gen a, Kholmun a gallery bawl hoih a sak dan gen hi. Khaipao Haokip in gallery bawl ding tawh kisai in MLA leh DC omlaitak hidan a gen in organisers leh youth club ten panlak hunlaitak hidan in gen hi. Chief Guest TN Haokip in kitaitehna ah khat in vualzawhna a tang teitei poimawh hidan in gen a, hiai tournament tungtawn a inter-district sung a kitanauna hon tut lamen ahihdan gen hi. Aman organisers te panpihna dingin Rs. 10,000/- pia hi.
Final match ah Ganggam SC leh United Khawzim Brothers’ (UKB) te kimawl ua, huai ah UKB ten Imran tungtawn in goal khum masa mahle uh half kuan mahmah in Ganggam ten Soiminlun Gangte tungtawn a goal khum in 1-1 in kidraw uhi. Half zawh inleng kibei thei mahmah ua, ahihziakin hun beikuan in UKB ten Peter tungtawn in goal khat khum in 2-1 in makai ua, Ganggam ten goal khum kik zou nawnlou in UKB ten 2-1 a zou in champion la uhi. Tutung SK tournament ah Ganggam SC striker Ginminthang in goal 9 khum in top-scorer hihna la a, L. Semol apan Satminlen in best player leh UKB keeper Jeson Vaiphei in best keeper award sang hi. Individual award te ahihleh cash prize Rs. 3,000+ certificate in zui hi. Champion team UKB ten cash award Rs. 70,000+ certificate + trophy sang ua, Ganggam SC ten Rs. 40,000 + trohy + certificate sang uhi.
Winners of SK Tournament :
1. 2008 MMT
2. 2009 Golngai Lom
3. 2010 SDMT
4. 2011 M. Songgel YC
5. 2012 Muvanlai FC
6. 2013 B. Aijalon SC
7. 2014 M. Songgel YC
8. 2016 UKB
SSPP FC palyer-te khakhia
The 9th North East Tamchon Memorial Football Tournament a telding SSPP FC player-te khakkhiakna leh thumsakna tuzing in Bungmual, Siloam Veng a SSPP Complex ah om a, Rev. S. Vung Minthang, Gen. Secy, EBC in hasotna thu gen in thumsak a, Langkhanpau Guite, Chairman ADC/CCpur in khakhia hi.
Tournament ahihleh Nov. 19, 2016 in New Delhi a Ambedkar stadium ah kipan ding a, NE state tuamtuam apan team 16 tel ding a, SSPP FC te bel Chandel, Exodus leh Nirvana Rhino te tawh omkhawm ua, Nov. 20 in Chandel FC maituah in Nov. 24 in Exodus FC maituah in match nanungpen ah Nirvana Rhino maituah ding uhi.
SUUNNA:
Nengkhovah Haokip (68) w/o L Helthang Haokip of Kholmun village, zan nitaklam in lungtangna in si a, tuni’n kivui hi.
Lianlaldin (2) s/o Soiminlun of Neihsial Veng, Lamka, Oct 31, 2016 a tuisa kibuakkha Shija Hospital ah etkol himahleh zan nitaklam dak 4:30 velin damzoulou in si a, tuni’n kivui hi.
IMPHAL NEWS:
Guv in Children’s Day zatna uap
Imphal, Nov-14: Canchipur a Catholic School ah tuni’n ‘Children’s Day’ zatna om a, Chief Guest in Manipur Governor Dr. Najma A. Heptulla pang a, student-te kiangah kipahman tuamtuam hawmkhia hi. Functional President in Rev. Dominic Lomon DD, Archbishop, Imphal banah Guest of Honour in Raymond D’ Souza, National Co-ordinator, India Catholic Youth Movement-te pang uhi. Huai hun ah Governor in a thugenna ah naupangte tawh Children Day zang khawk thei dia a om khak kipak a, naupang tawh kisai a khanglui thu kibat louh ziakin gam tuamtuam ah Children’s Day zat ni kibang lou a, India ah kum teng in Freedom fighter banah India Prime Minister masapen Pandit Jawaharlal Nehru piang champha pen ‘Children’s Day’ ni a zat ahi hi. Children Day zat in maban hun a gam pumpi a dia naupangte poimawh dan taklang chi hi.
Security venbitna tawh truck 299 kuan
Imphal, Nov-14: UNC in Nov 1, 2016 apan Manipur a NH-te ah Blockade in, Jiribam District Demand Committee inleng blockade amau demand area ah blockade puang uh a, Manipur adia niteng vanzat poimawhte laklutna buai in thautui taksapna liantak om hi. Huai tawh kisai Manipur govt. in panlakna in tuni zinglam dak 11:00 in Keithelmanbi akipan Oil tanker, LPG bullet telin truck 299 in LM Haokip, CO, 8th IRB makaihna security tamtak tawh Imphal nusia in vanzat poimawhte pawlut ding in kuankhia uhi. Tuni a truck 299 kuan khia-te lakah Oil tanker 46, LPG Bullet tanker 64, truck 188 leh ATF (Lenna thautui pua) tanker 1 tel uh a, Nov 15, 2016 ni a Jiribam tung dia gingtak hi’n gen uhi. CAF & PD thusuak in Assam mun tuamtuam apan niteng vanzat poimawh lak nung in security escort-te mah in Manipur honglut pih ding in taklang uhi. Huailou in Imphal area a mun tuamtuam ah counter blockade paitou zel a, Khuman Lampak a Ima Panthoibi Street Vendor Union (IPSVU) te’n Senapati district a ding van tuamtuam pua Winger (MN03W-0813) ah van omte lak sak uhi.
Nak sungah lit lakhia
Imphal, Nov-14: Dr. Niteshore Moirangthem, Consultant, ENT banah Skull Base Surgeon, Shija ENT Centre in Shija Hospital ah Nov 12, 2016 in Endoscopy tungtawn in Senapati a patient kum 25 a upa naksung apan liit lakhia hi’n gen uhi. Senapati akipan Patient in kal 1 paisai a Imphal area ah health center tuamtuam ah ki ensak mahleh a nak apan sisan pawt dam siang thei lou a, Shija hospital zotna lampi hoihlouh ziak in zuan keimahleh lampi dan om nawn louh tak in Shija hospital zuan ahihdan gen hi. Huai tawh kisai a Dr. Niteshore Moirangthem in lui leh dil a tui liau hun ah liitnou-te nak sung ah lut in sisan top in khang hulhul uh a, liit-te ke khia ahih keileh gawl sung leh tuap (lung) tan a tung leh husam (suffocate) ziak a sihna tanpha tun thei hi’n gen hi.
Press Club kong ah Sit-in-protest
Imphal, Nov-14: Manipur Press Club kong ah tuni’n Media tuamtuam apan news reporters, stringers leh correspondent te’n UNC-te economic blockade ziak a thautui haksat ziak leh state govt. in panla ding a phutna in sit-in-protest nei uh a, huai hun ah placard ‘No petrol, No reporting’, ’We have ran out of ink’, ‘be a responsible government’ chihte tawi uh uhi. Huai hun ah W. Shyamjai, President, All Manipur Working Journalists Union (AMWJU) in ni 15 paisa apan UNC-te economic blockade in media-te nasepna nawngkai sak a, media te’n 24x7 nasem in mun tuamtuam apan news kaikhawm uh a, himahleh tuni’n petrol litre 1 Rs. 300 in khangtou a, thautui man piak zawh louh banah thautui muhkhak hi’n gen hi. CAF & PD Minister leh Director kiangah media-te a dia thautui ngaihtuah sak dia ngetna piak himahleh ni 5/6 nung tanpha a govt. lam apan dawnna omlou a, economic blockade ziak a Manipur pumpi a dia nawngkaina tun UNC tungah action lading in leng phutna bawl uh chi’n taklang hi.
Transfer & Posting
1. G. Shantikumar Kabui, MCS, Addl DC/Senapati & Project Director, DRDA/Senapati as Deputy Secretary (Administrative Reforms) & Deputy Director (State Academy of Training) in addition
2. A. Shivadas Sharma, MCS, Deputy Secretary (Administrative Reforms ) & Deputy Director (State Academy of Training) in addition as ADC/Senapati & Project Director, DRDA/Senapati
3. Smt. Lalthazam, MCS, Asst Commissioner to DC, CCpur as Asst Commissioner to DC, CCpur & SDO/BDO Saikot, CCpur District.
TUNI THUPI:
“Toupan hichi’n a chi: Mi pil in a pilna suang kei henla, mi hatin a hatna suang sam kei henla, mi hauin a sum-le-pai suang sam kei heh.” – Jeremia 9:23
EDITORIAL:
Sumnen mah poimawh veve
Reserve Bank of India (RBI) in Rs 2,000 note thak hon suahkhia (issue) ua, ahih ziakin Rs 1,000 leh Rs 500 note omlou in kuaman Rs 2,000 baihlam takin zangthei mawklou uhi. Rs 2,000 zang a van lei hun ah a tamzaw hiam a tawmzawdeuh man hiam kilei hun ah a behlapna ding sumnen ahihkei leleng lehkik ngai a om hun adin Rs 1,000, Rs. 500 a omlouh banah tuni tan zat theih (sum hinglai) Rs. 100/- tanpha a kiching omlouh ziakin mipi vantang adin buaina lianzaw tun hi. Prime Minister Narendra Modi in RBI tawh kithutuak in thakhat thu a a Rs 500 leh Rs 1,000 note hon sihsak ziakun huai in mipi buaisak petmah a, sum haute’ adingin bel buaina lianzawsem tuntu bang hi.
Ahi a, mizawng leh genthei singrem kawma za nga note leh sangkhat note ana kem chenchente’ adingin buaihuai sawnsawn hi. Phaizang bialah Rs 500 leh Rs 1,000 note zat theih ahihkeileh singtangbial ah zat ngaihna omlou ahi chih theihsa ahi a, Rs 2,000 note a khenna dingin Rs 1,000, Rs 500, Rs 100,Rs 50, Rs. 20, Rs. 10 leh Rs. 5 tanpha a poimawhna beilou hi. Tu in Bazar ah bawngnawi ahihkeileh niteng nek-le-tak thil tuamtuam i leidek a, Rs 500/1,000/Rs 2,000 te i tawi leh zattheih hi tuanlou hi. Sum nen poimawh veve ahihdan kilang hi.
Report tuamtuam kingahdanin, Prime Minister Narendra Modi in sum za nga leh sangkhat note siding ahihdan thupuan a neih madeuhin West Bengal BJP te’n Rs 3 crore Party’ bank account (BJP) ah deposit (thunlut) uh chih hi a, Modi in November 9, 2016 in Rs 500 leh Rs 1,000 zat theih nawnlouh ding ahihdan puang hi. Tua kia hilou in Prime Minister Narendra Modi in hibang thupuan a neihma geih in savings account (No 554510034) khat Bharatiya Janata Party, West Bengal a Indian Bank, Central Avenue Branch, Kolkata ah Rs 40 lakhs kithunlut nawn chih ahi hi. Huchi ahihleh Prime Minister leh RBI kihouna leaked ahi diam chih ngaihdan om hi. Huai sum sihna (demonetisation process) tawh kisai Union Finance Ministry in hoihtaka a etkai uh leng deihhuai mahmah lai bang hi. A lamdang mahmah khat ahihleh, Punjab a BJP member khatin November 6, 2016 in Rs 2000 currency note hong piangkhe ding ahi, Rs 1,000 leh Rs 500 note na neihte uh khek un chithei ahi chih thu om a, huai ngaihtuah huai a, mipi’n bangmah theihna (aware) i neihma ua politician te ap aukhiak theih ua leh banghiam a kiphumgu om hidingin ginhuai hi.
Ei mi nautang (Ordinary people)-te ATM a sumla dingin in ikivual (queuing) ua, tualou in bank tuamtuam sum deposit leh lakhe dinga i kisak chiangin leng CCTV tungtawnin kap in i omlai ua, kuapeuh kivenna ahi a, kimawhsak ding leng omlou hi. Black money kichi hihbeina dinga Modi thiltup leng ahithei, ahih ziakin, sumnen ilak a hong lutlouh ziakin Bank-te telin mipi’n haksatna genvuallouh tuak hi. Ahausate mah in sum khal leh a nen nei ua, huchi kalah mizawng leh gentheite ibuai veve hi.
Modi in RBI tungtawna policy khawhkhial ahi diam chih bang leng alehlam ah piangthei hi. Modi in Black Money a chihchih pen hepsiangna dingin Rs 500 leh Rs 1,000 a phiat sawm in Mumbai pansan RBI adingin haksatna thupitak guan hi. Sum kichi Myanmar gama military Junta dana sihsakna demonetise) na ding thil baihlam hilou hi. Kuapeuhin ‘black money’ kichi i musit ua, gamdang mun tuamtuam apan sumlem bawltawm leh sum taktak hon thonlut a helpawlte tawsawntu hunkhop om ahihdan i mangngilh hetlouh uh gintak huai hi. Huchi kalah, thakhat thu a Prime Minister Modi in India sum Rs Note nih zattheih nawnlouh dia hon khambuk in ama hihna leh a party a hihse zaw khadiam chih ngaihdan liantak omthei mawk hi.
Bank transactions tawh kisai in bel BJP makaite abuaikei ding ua, himahleh, India mipi buai ahihdan kichian mahmah a, media person-te tanpha buai hi. Modi plan leh policy-te sia i chikei a, ahih ziakin gamsunga sum haute hong buaisiat chiangin mi zawng leh gentheite kibuai zawsem hi. Hoihtakin ngaihtuah lehang, i economy h Vaite (Non-Local) leh phaijangmite ah kingalian mahmah hi. Ei local (tualsung) a sum akizat (invest) dan suizuite’ adingin ngaihsuttham ching hi. Sammette, BRO employee, sik-se zongte, dawr bawl mite leh adangdang te’n amau tenna state chiat ua bank tungtawn in sum kithot hiauhiau lel uh a, ei sung ah leng sum leng(circulate) tawm mahmah hi. Huai kawm in Modi in Rs 500 leh Rs 1000 phiat-ta a, igam in sumnen poimawh veve hi.
No comments:
Post a Comment