HEADLINES:
Congress party tawh kizopna tatsak di’n thutawp pia
 |
| Source: http://www.e-paolive.net/ (file photo) |
Imphal, Nov-16: Kangpokpi ah Joint Action Committee for Sadar Hills (JAC-SH) leh Kuki Inpi Sadar hills, SAHILCA, Thadou Inpi Sadar Hills telin Sadar Hills bial a CSOs te’n tuni’n joint meeting nei uhi. Huai hunah JAC-SH te’n Sadar Hills a Congress Councilor te’n Nov 17, 2016 sun dak 1:00 ma ngei a Congress party ah kitawpna peding in thutawp pia uh a, huai ni mah nitaklam dak 5:00 ma a JAC-SH kianga kitawpna lekha copy 1 pelut di’n leng theisak uhi. Huai banah Sadar hills a district leh block level Congress worker leh member tengin Congress party apan kitawpna pia a, a zekai pen a Nov 18, 2016 tan a newspaper-te ah suahkhe ding inleng theisak uhi.
JAC-SH te’n Nov 20, 2016 tan a state govt in full-fledged district dinga Sadar Hills a puankhiak keileh Sadar hills sung a NH-te ah indefinite blockade telin kiphinna khauhtak pan ding uh a, thutawp piakna tawh kisai Nov 9, 2016 ni a mipi thupukna delhzuina hi’n gen uh a, Congress Councilor leh district banah member-te telin block Congress worker te’n JAC-SH thupiak a zuih kei uleh Sadar Hills a ADC office banah district leh block Congress committee-te office khaksak ding uh hi’n gen uhi. State govt. in JAC-SH-te lungkim louh taklatna in kiphinna khat zawh in khat pan ding uh a, Nov 20, 2016 tan a state govt. in a ngetna a ngaihsak keileh alou theihlou in kiphinna tuamtuam om dingte puangkhe ding hi’n gen uhi. JAC-SH te’n Manipur Congress govt. leh khawvel pumpi theih ding a district a puangkhiakna ding plaque kigelh khin mahleh district piching hidia puangkhiak hilou hi’n leng gen uhi.
Tuni’n Parliament Winter Session kipan
Oppn in sum sihsak ding thuguk thehzak suizui di’n ngen
New Delhi, Nov-16: Indian Parliament ah tuni’n Winter Session kipan a, Opposition te’n sum note sihsakna (Demonetisation) ding tawh kisai ruling party sungah thuguk thehzak a om masa hi’n ngawh uh a, PM Narendra Modi in thupuan abawlma in Minister leh ruling official-te’n huai tawh kisai atheih masak ziakun Joint Parliamentary Committee khut a suizuina piakkhiak ding in ngetna bawl uhi.
Tuni a Session masa ah opposition pawlte sousang mahmah uh a, sum note tawh kisai a PM Narendra Modi in Centre govt. apaipihdan lungkim lou in, zingchiang in Rajya Sabha a session om nawn hunah thil omdan genkhawm dia PM kihel ding in ngen uhi. Lok Sabha a session kipat nung sawtlou in Trinamool Congress MP Renuka Sinha suunna neih in om a, zingchiang a sutzop nawn di’n Speaker Sumitra Mahajan in khak hi.
Rajya Sabha ah Congress telin opposition party tuamtuam te’n Rs. 500 leh Rs. 1000 thubuai tawh kisai tangkoupih uh a, ruling party apan minister-te’n hilhchian in, national interest a kibawl hi’n dawnna pia uh a, corruption leh black money doudalna dia lampi omsun hi’n leng taklang uhi. Opposition pawlin ngawhna abawldan un, PM in sum tungtang thupuan abawlma in, party dangte theihlouh di’n ruling party sung ah huai thugukte thehzak in om a, ‘selective leakage’ tawh kisai thuchian puangkhe ding in govt. kiangah ngen uhi.
Discussion hunah JD(U) apan Sharad Yadav in tutunga thupukna kibawl pen mizawng leh gentheite adia haksatna behlaptu hi’n gen a, CPI(M) apan Sitaram Yechury inleng mivantangte haksatna tawh kisai suizui poimawh chi in, sum note kidaihlouh sung in bank note luite zat theih dia phalsak ding in ngen hi. Opposition leader Ghulam Nabi Azad leh BSP chief Mayawati te’n Rajya Sabha ah zingchiang in Prime Minister Narendra Modi akihel ding hi’n gen uh a, sum sihsakna dia thupuan bawltu, PM tellou in discussion piching omtheilou ding chi uhi.
Union Minister Venkaiah Naidu in opposition lungkimloute kiangah debate piching leh omzia neitak a kampau zang ding in ngen a, sum note nihte tawh kisai black money doudalna ding ahihman in, thildang ah kaihlut louh poimawh chi hi. Naidu in agenzelna ah Demonetisation tungtawn in Terrorist, Maoist, Separatist leh Smuggler te’n buaina tuak ding uh chi a, tunung sawtlou in govt. panlakna gahsuahte muhtheih ding chi hi.
LOCAL NEWS:
SVEEP campaign 2nd phase
Lamka, Nov-16: Dist. Election Officer/CCpur Lunminthang Haokip, IAS makaih tuni sunnung in SVEEP core committee te’n ama office chamber ah SVEEP campaign 2nd phase neih dingdan tawh kisai in meeting nei uh a, maban panlak dingdan kikumkhawm uhi. Second phase ah Ethical Voting leh Informed Voters a zat dia thupuan dungzui in khawpi sung mun tuamtuam ah hoarding, banner, poster takkhe ta uh a, maban ah road show neih ding, panel discussion, youth icon-te tungtawn in special show neih ding ban ah pensioner, SHG, niteng nektawm zongte tawh interaction neihding in thupuk uhi.
Nov. 2016 sungin college tuamtuam ah quiz leh essay writing competition neih ding, Dec. 2016 sunga SVEEP musical concert cum Christmas carol neih din DEO in gen hi.
YPA makaite kimukhawm uh
Lamka, Nov-16: Young Paite Assn (YPA) Gen. HQ makaih tuni’n Hiangtam Lamka a YPA GHQ hall ah block leh unit tuamtuam a makaite’n kithuahkhawmna nei uh a, maban panlak dingdan tawh kisai genkhawm uhi. Huai hun ah YPA GHQ a Adviser leh CWC member-te ban ah Lamka block, New Lamka block leh Singngat block a makaite ban ah unit tuamtuam a makaite kihel uhi.
Huai hun ah Chin Ngaih Pau, Chairman, CEC leh V. Khankhup Guite, Member CEC leh Block leh unit tuamtuam a makaite’n thu agen ban uah Lianmuanthang Valte, Gen. Secy, YPA GHQ in report pia hi.
M. Luahkhanchin, Vice President, YPA GHQ makaih in khawtang bawlhoih didan tawh kisai kikumkhawm uh a, maban ah blood donation camp neih ding, khawsak haksa diak-te’n Christmas nuamtak a zat ding uh deihna in huhna piak ding leh khawpi sung kep siangthou dingdan genkhawm uhi.
KSO/CCpur in ngen
Lamka, Nov-16: KSO/CCpur in thusuah abawlna ah, khawpi sunga school khenkhat in Rs. 500 leh 1,000 note lui-te a lak nawnlouh ziakun nu leh pate’n tuition fee piak ding tawh kisai in haksatna tuak uh hi’n taklang hi. Sum note luite Dec. 30 tan a khentheih ahihman in school te’n naupangte khualna in tuition fee a piaksiang theihna ding un sum note lui-te pomsak lai ding in ngen uhi.
CCC in vanman enkai
Lamka, Nov-16: CCpur Consumers’ Club in e-blockade suanlam anei in dawr/dukan bawlte’n vanman khangsaklou dia thusuah abawl uh bawhzuina in tuni’n Lamka khawpi sunga dawr/dukan tuamtuam pha in enkhia uh a, vanman khengval a zuak bel matkhiak neilou uhi. Huchikal ah, hotel bawlte’n singpi leh sang man khangsak uh a, rate ngeimah a zuak nawn dia atheihsak ban uah, maban ah enkai tou ding ahihna uah vanman khangsak teitei om leh dan tawh kituak in action lak hiding hi’n thusuah abawl un taklang hi.
Van lei te’n receipt/cash memo ladia theisak in, buaina nei te’n contact no. 9612403672 or 8014270280 ah thuzak theih ding hi’n leng taklang uhi.
Angels’ Vision in DAS licensed ngah
Lamka, Nov-16: Ministry of Information & Broadcasting (MIB) Govt. of India nuai ah Angels’ Vision in Digitalized apatnung Multi System Operator hihna dia ngetna a piaklut nungun Nov. 15, 2016 in (DAS licensed) theihpihna pia hi. MIB in Angels’ Vision laithon akhakna ah MSO leh affidavit a piaklut velchet ahihnung in Cable Television Network (Amendment) Rules 2012 a Rule 11E pansan in CCpur dist. ah Digitalized Addressable System (DAS) licensed ngah a, huai pansan in channel pekhe thei ding in phalsak hi.
EBC makai te’n PTC GHQ office pha
Lamka, Nov-16: Rev. S. Vung Minthang, General Secy. EBC makaih in Rev. Ginmalsawm, Director, Social Development leh Rev. Paukhanmang Guite, Director of Missions te’n tuni sunnung in Hiangtam Lamka a PTC GHQ office pha uhi.
Rev S. Vung Minthang in PTC/GHQ a Secretary thak H. Pauzalal, K. Chinkhansuan, Vice Chairman, CWC, PTC/GHQ, G. Nengdouthang, Secretary (external) PTC/GHQ leh visitor bangzah hiam-te Pathian kiang ah thumsak hi. Hiai bang a saptuam heutu te’n awlmawhna liantak nei a PTC GHQ office pha a, thumsakna a neihna tung uah H. Pauzalal, General Secretary, PTC/GHQ in EBC heutu-te tung ah kipahthu gen hi.
ZRA makaih in thautui hawm
Lamka, Nov-16: UNC te’n NH-te ah hunchiam omlou Economic blockade abawl ziak un Manipur ah niteng poimawh (essential commodities) taksapna lianpi tung a, Lamka khawsung ah petrol leh diesel mantam tak in kizuak hi. Huai thu ah Zomi Revolutionary Army (ZRA) in petrol litre ah Rs. 100/-leh diesel litre ah Rs. 70/- tunglam a zuaklou dingin theisakna bawl uh a, Mizoram apan thautui pua Pick-up 4 mantang in tuni zingsang in PT Sports Complex, New Lamka ah ZRA makaih in mipi lak ah petrol litre 1 ah Rs. 100/- a zuakkhiat in om hi. Thautui la mi tam mahmah a, zinglam in mi 1 in thautui (petrol) litre 20 zel lathei uh a, thautui zuaktute’n Rs. 1000/- leh Rs. 500/- note luite alaklouh ziak un thautui leiding te’n haksatna tamtak tuak uh hi’n kigen hi. ZRA lam apan kizadan in khawpi sung ah black a petrol litre 1 ah Rs. 100/- leh diesel litre 1 ah Rs. 70 tunglam azuak om leh kuapeuh in contact No. 9774284749 ah theisak ding in ngen uhi.
Saihenjang ECA Church honna leh lopna
Lamka, Nov-16: Saihenjang khua ah ECA Church kibawlthak zohsiang hita a, Nov.20, 2016 zinglam dak 9:00 in Rev. L.B. Angam, Executive Director, ECA (ECCI) in honna leh Pathian kiang ah latna neiding hi. Khawsung mipi’n Biakinn thak lopna neiding uh a, Rev. L.B. Angam in Pathian thugen ding hi. Saihenjang khua bel Henkholun Doungel @ H. Doungel, Dist Youth Co-ordinator, NYK/CCpur hauhsakna khua ahi.
Oct. 2016 sungin dist. hospital ah naungek 208 piang
Lamka, Nov-16: Dist. hospital a ward tuamtuam in Oct. 2016 report suahkhia uh a, huai dungzui in OPD ah ki-ensak 10,743 val om ban ah naupiang 208 leh blood bank ah sisan unit 37 omlel hi. Maternity ward ah numei naupai 219 admit lak ah naupiang 208 (Pasal 97 leh numei 111) lak ah IUD (nu gilsung apan sisa a lakkhiak) 5, nau-phik 4 leh still birth 5 om a, referral leh piantung si omlou a, khabei tan in mi 205 te’n hospital pawtsan uhi.
Children Ward ah naupang 195 (pasal 101 leh numei 82) admit lak ah 3 si a, Neonate ward ah mi 64 (pasal 31 leh numei 25) admit lak ah 4 (pasal 3 leh numei 1) dam zoulou uhi.
Surgical ward ah mi 147 (pasal 82 leh numei 65) admit lak ah Imphal ah 9 refer uh a, khabei tan in 131 in hospital pawtsan uhi. Ortho ward ah mi 58 (pasal 33 leh numei 25) admit lak ah 44 damsuah in Imphal ah 1 refer uhi. ENT ward ah 12 (pasal 9 leh numei 3) admit lak ah kha bei tan in mi 11 damsuah in tun mi 1 enkol lel uh a, Medicine ward ah damlou 229 (pasal 124 leh numei 105) admit lak ah kha beitan in 158 te’n hospital pawtsan uh a, 17 (pasal 9 leh numei 8) bel si in, Imphal ah mi 30 refer hi uhi.
Blood bank in voluntary donor-te apan sisan unit 29 leh replacement tungtawn in unit 103 kaikhawm in unit 132 mah pekhia uh a, huailak ah a thawn in unit 5 piak ban ah dikkiklouh unit 9 om hi’n kigen hi. Tu’n ‘A’ group unit 12, ‘B’ group unit 5, ‘AB’ group unit 11 leh ‘O’ group unit 9 om hi.
Hospital ah Healthy Baby Show om
Lamka, Nov-16: Dr. Kimngaihching @ Dr. Kim Simte, CMO/CCpur in tuni zinglam in Dist. Hospital campus ah Healthy Baby show/competition, 2016 hong a, tua ah naungek tamtak tel uh a, Nurse te’n adinsan dan, kg. phazah tel in thil tuamtuam ahihfel zawh nung un Doctor te’n medical check-up neisak uh a, tunitak khawmial nung in result zou uhi.
Category 1 (6 -11 months,) ah 1st in M. Joseph Liankhankhual s/o M. Chinzading of Bungmual; 2nd in Chingbuang d/o Thanghminglian of New Bazar leh 3rd in Esther Mannunsiam d/o K. Thanglunpiang of Mission Veng hi uhi. Category 2 (12-23 months) ah 1st in Matilda Lalthlamuanpui s/o Robert Lalsanhim of New Bazar, 2nd in Grace Lalmalsawm s/o Herbert of Saidan leh 3rd in Lalliensang Gangte s/o L. Sylvan of Hill Town hi uhi. Category 3 (24 -36 months) ah 1st in Thiemnunhoih d/o Khaithianmoi of Torbung, 2nd in Khupmuanding s/o Liankhansuan of Headquarter Veng leh 3rd in Goumungson Naulak s/o Thangkhansiam of Sahei Road, New Lamka hi uhi. Category teng ah kipahman 1st in Rs. 3000/-, 2nd in Rs. 2000/-leh 3rd in Rs. 1000/-hiding a, Nov.17, 2016 sunnung dak 1:00 in DFWO office, Dist. Hospital campus ah hawmkhiat hiding a, Category teng a1st te Nov.19, 2016 in State Level Healthy Baby show/competition ah CCpur Dist. ai-oh in kuan ding uhi.
Activa gari kigumang
Lamka, Nov-16: Jangkholen Lupheng of Phailian zatlai Activa (red colour) Reg. No. MN02A-7756, engine No. JF50E80108256, chesis No. ME4JF501CD8108905 tuni sunnung dak 12:30 velin Phailian ah gutate’n gumang uhi. Gari’ neitu in Police ah report bawl a, Police te’n muhkik ahihna di’n suizui uhi.
SUUNNA:
Ngurlienthang @ Ngura (84) s/o (late) Ngursanghlei of Zenhang Lamka zannitak in teknat in si a, tuni’n Zenhang Lamka hanmual ah kivui hi.
Zoukhum (73) s/o (late) Vungdam of New Lamka (G) tuni nitaklam dak 3:30 velin cancer in si a, Nov. 17, 2016 in YPA hanmual, New Lamka ah kivui ding hi.
Pumlianthang (38) s/o H. Damzachin of Vaalveng, Nghathal, tuzing baihtak in BP stroke in si a, YPA hanmual, New Lamka ah kivui hi.
IMPHAL NEWS:
National Press Day zatna om
Imphal, Nov-16: 1st Bn Manipur Rifle Banquet Hall ah tuni zinglam dak 10:00 in DIPR saina in ‘National Press Day’ cum One day workshop on ‘Reporting from Conflict Area, a Challenge to the Media’ chih om a, huai ah Manipur Chief Guest in Governor Dr. Najma A. Heptulla pang hi. Functional President in Chief Minister O. Ibobi pang a, Guest of Honour in IPR Commissioner K. Radhakumar Singh, IAS pang hi. Workshop hun ah Resource person in W. Shyamjai, President, AMWJU leh Y. Rupachandra, Editor-in-Chief, Impact TV-te pang uhi. Governor in a thugenna ah Journalist te’n deihsak tuam neilou leh thudik khek lamdang lou a puang ding in theisak a, Journalist-te thudik puangtu ahih uh dungzui in thiltung tawh kisai a thudik kimtak a suahkhiak leh buaina a kiam sak ding uh ahi chi hi. CM in media te’n lauh neilou a thudik puang ding in ngetna bawl a, media-te thusuah dan in khawtang omdan taklang a, thil hoihlou tupna a news/thiltung suahkhiak ahihleh khawvel pumpi in huai thudik louh ziak in khawtang hoihlou leh huham in muding uh chi hi.
National press day tawh kisai in Governor in Journalist 7-te kiangah Awards 2016 hawmkhia hi. Ranjit Oinamcha, Editor (Paojel) in Best Editor for National Integration and Communal Harmony; Km. Babycha, Staff Reporter (Hueiyen Lanpao) in Reporting on Science and Technology; Kshetri Meghajit, Sub- Editor (Naharolgi Thoudang) in Parliamentary Reporting; Km. Nomita Khongbantabam, Reporter (Hueiyen Lanpao) in Reporting on Art and Culture; Ibomcha Yumnam, Staff Reporter (Poknapham) in Rural Reporting; Naorem Gyanand, Special Correspondent (Hueiyen Lanpao) in Reporting on Special reference to Women and Child leh B. D. Sharma , Staff Reporter (Poknapham) in Reporting on Health and Hygiene tawh kisai award sang uhi.
Van pua truck 101 hongtung
Imphal, Nov-16: Imphal-Jiribam lampi tawn in tuni’n IRB, Manipur Rifles leh Police Commando telin security khauhtak vengbitna nuai ah Manipur a ding van poimawh tuamtuam pua truck 101-te tunitak a Imphal hongtung uhi. Tunitak a truck hongtungte lakah Petrol tanker 24, Diesel tanker 1, LPG Bullet 8, Cement truck 15, Food Corp. of India (FCI)-te anntang pua truck 29 leh van tuamtuam pua truck 33 hi’n gen uhi.
Niteng vanzat puaklut ding a poimawh pen a koih hiding – CM
Imphal, Nov-16: CM O. Ibobi in tuni a National press Day zawh in media-te tawh kimuhna hun ah Manipur poimawh niteng vanzat tuamtuam-te puaklut ding a poimawh masapen a koih hi’n gen hi. Centre govt. in UNC tawh kihou dia chialna tawh kisai dotna a dawnna ah UNC tawh kihouna kipat ding kuan a theisak pan uh a, Delhi mun gamla ahihziak a kihouna lapman dia tung theih hilou chi a, himahleh full-fledged district dia Sadar Hills puangkhiak ding phutna leh UNC-te dalna tungtang bangmah gen khalou hi.
SBI Manager mat tawh kisai thuzuau hi’n gen
Imphal, Nov-16: Mahatma Gandhi (MG) Avenue a State Bank of India (SBI) Head Office ah Manager in sum Rs. 15 crore (black money) a kheng ziak a CBI te’n man uh chi’n Social media-te ah thuthang tawh kisai thuzuau hi’n gen uhi. Huai thu tawh kisai in SBI Imphal Branch a Asst. GM Swapan Kumar Sarkar in social media ah thuthang dan in thiltung omlou leh tung ngeilou ding chi a, SBI branch suk minsiat sawmna a mimal khenkhat gamtatna hiding in gen hi. Aman a genzelna ah customer-te lemtanna din emergency service ngaihtuah uh a, himahleh a khen chiang a nasep tuamluat ziak in customer-te adia nawngkai hun om a, customer-te ngaihtuahna ziak in innkuante mundang a om ahihlouh leh damdawi inn ah ki enkol sak a om emergency customer te’n SBI land line phone tungtawn a bank thuneite thuzak thei uh chi’n leng taklang hi.
Imphal East ah Combing operation
Imphal, Nov-16: B. Lunthang Vaiphei, OC, I/E Commando leh SDPO/Porompat makaihna a I/E Police Commando leh Women Police kithuah te’n tuni zingsang dak 5:00 apan dak 6:30 kikal Palace Compound ah search operation bawl uh a, huai hun ah I-Card kichian tak neih louh ziak in chet di’n mi khat Police Station tun uh a, Sangai Festival hunah buaina tung ding venna a mun tuamtuam ah operation bawl ding uh hi’n taklang uhi.
Eric Martin in Concert nei ding
Imphal, Nov-16: Mr. Big band-te Front man Eric Martin in Imphal a Manipur Film Development Corp. ah Nov 17, 2016 nitak dak 6:00 akipan Concert nei ding hi’n gen uhi. Huai tawh kisai a Concert saitute’n concert kipat ma zek in ticket lei nuam-te khualna in Concert mun ah ticket tamlou koih ding uh a, Rs. 500 leh Rs. 1000 note luite zat theih ding a, himahleh Zika Restaurant leh Hotel Imphal ah Nov 17, 2016 nitaklam tan ticket lei thei ding hi’n taklang uhi. Nov 17, 2016 zinglam in Guwahati apan Eric Martin hongtung ding hi’n gen uhi.
Van man khan ziakin rally nei
Imphal, Nov-16: DESAM leh AIMS a volunteer te’n tuni’n Nityaipat Chuthek a BJP office leh BT Road a MPCC office luh uh a, huai hunah UNC te’n full-fledged revenue district a Sadar Hills puangkhiak ding mawhpaihna a ni 16 paisa apan NH-te ah economic blockade a bawl uh khawlsakna thubuai suveng ding a phutna in memorandum pia uhi. Memorandum ah blockade/bandh-te apan National Highway leh State Road-te suahtakna dia panla ding, personnel 5000 om theihna ding Highway Protection Force/ State Road Protection Force bawlkhe ding, Imphal-Jiribam road bawlhoih ding banah e-blockade leh Counter blockade beisakna ding a dan bawlkhiak ding, a tawmpen a kha 4 sung daih ding thautui koih ding, e-blockade hun ah thuak kha driver leh handyman-te kilawm huntawk compensation piak ding, school van-te thautui piak ding chihte tel hi.
Transfer & Posting
(IAS and MCS officers)
1. O. Nabakishore Singh, IAS, Chief Secretary & Secretary (Cabinet), Chief Vigilance Commissioner, Manipur as Chief Secretary & Secretary (Cabinet/ Forest & Environmental), Chief Vigilance Commissioner, Manipur
2. Shambhu Singh, IAS, Addl Chief Secretary (Forest & Environment) as Addl Chief Secretary (AR) & DG/SAT
3. Dr. Suhel Akhtar, IAS, Addl Chief Secretary (AR/ Labour) & DG/ SAT as Addl Chief Secretary (Labour)
4. Shyam Lal Poonia, IAS, Secretary, MPSC as Secretary, MPSC & Joint Secretary (Tourism)
5. Pawan Yadav, IAS on return from training as OSD (Tourism)
6. Ravinder Singh, IAS on return from training as OSD (Tourism)
7. Ms Yumnam Robita, MCS, Deputy Secretary (DP/ Vigilance) as Deputy Secretary (DP/ Vigilance) & i/c Director (Printing & Stationary)
8. L. Radhakanta Singh, MCS, Under Secretary (SW) as AC to DC, Chandel
9. Dereck Khobung, MCS, AC to DC/ Tamenglong as AC to DC/ Bishnupur.
TUNI THUPI:
Aman, hiai lam hon naih ken: na khepek akipan na khedapte suah in, na dinna mun lah lei siangthou ahi ngala, a chi a.”
– Eksodas 3:5
EDITORIAL:
National Press Day
India gamsung pumpi ah kumteng in November 16 pen National Press Day a zatin om gige hi. Tuni inleng Imphal ah hiai ni poimawh zatin om hi. National Press Day in Media-te’ adia mawhpuakna tuamtuam kipete leh zalentaka nna asep theihdan uh taklat leh puanzakin om zel a, India gamsung ah media-te’n zalenna leh mawhpuakna (free and responsible) liantak nei uh ahihdan pressmen leh mipi nautang in a theihding un gen in om sek hi.
India a media-te enkoltu lianpen Press Council of India (PCI) kiphuhkhiakni leng hi a, gim-le-tawl khawksa lou a mipi’ kianga thuthak puaktu hihsawm a kipei (media)-te’ poimawhna taklat utna leng ahi hi. PCI in ahihleh media-te’ gamtatna ahihkeileh soisak a omna khenkhat banah amaute khualtu (moral watchdog) danin om uh a, media-te’n thudik leh thutang mipi’ kiangah a thehzak ding uh ahi chi uhi. Leitung pumpi ah Press ahihkeileh Media Council tampi petmah om a, himahleh, Press Council of India kichi in chituamna (unique entity) nei uh a, tua ahihleh, Press-te’ zalenna sukbuai ahihleh PCI in nungthuap ding chih hi bilbel a, hiai (independence of the press) pen PCI in lenkip tinten uh a, media-te’n banghiam buaina a neih ngeingei uleh kigolh pah geihgeih uhi.
Bulsut zek zual lehang, kum 1956 in journalism tawh kisai kepbitna dingin Press commission tutkhawmna ana om a, media-te’n leng a ‘professional ethics’ uh alet tang/kip ding uh ahihdan gen inleng ana om hi. Hiai thu pen ngaihkhawk mahmah in om a, tua ziakin Press Council of India (PCI) kichi November 16, 1966 in phuhkhiakin ana om hi. Huai akipan India gamsung pumpi ah media-te’ poimawhna mipi’n awlawl a hon thei toutou pan uh a diam chih theihin om hi.
Ei sungah gen zual lehang, mi tamtakte’n media-te’ poimawhna theilou in chiamnuihna bangin zangsek uh a, amaute’ kianga thuthak puaktu ahihlam theilou uhi. Climate change, health tawh kisai, development tuamtuam, connectivity, transport & communication banah i gam leh gamdang a thiltung tuamtuamte, thiltungsa, thiltung lel leh thil hongtung dingte mipi’ kianga puangzaktu media-te ahihlam theipha mawngmawng lou uhi. Bangzahhiamte in lah Newspaper a kigelh khialkha, ahihkeileh spelling mistake khenkhat ahihkeileh complaint-na ding tuamtuam zong uh a, mite’n sun nitum a thuthak zonga tai a, nitak zan dak 12 tantan nasem uh ahihlam theihpih hetlou uhi. Mihing hihna ah a bukim (perfect) ki-omlou a, hihkhelh, sepkhelh, gelhkhelh kichi om thei mah ahihdan theihsiam poimawh mahmah hi.
Zingkal baihtaka mipi’ sim ding a NEWS puakkhiak kichi thil baihlam hilou a, man power leh sum-le-pai kigolh nak mahmah ahihdan newspaper simtute’n leng i theihsiam uh poimawh hi. Adiktak genin, India adingin Jammu and Kashmir leh Manipur state a Journalist-te’n haksatna kituak mun mahmah hi. A langkhatah security force lam apan nuaisiahna om a, akhat lam ah helpawl lam apan nawkna banah grenade tanpha kikoihkhum a vauna ngah nasa mahmah hi. Helpawl lam ah faction hong om chiangin group khatin ana suah un hon chi uh a, group dangkhat-te’n lah na suah ngeingei uleh na office uh bomb a hon deng ding chih tanpha inleng vauna om zeuhzeuh lai hi. Tua chauh hilouin, government lam apanin leng banghiam thilsuah khelh leh court maituah ding chih hipah geihgeih mai a, tuipi tunga khau neuchik kizan zui apai tawh kibanga om hun tam mahmah hi. Tua ziakin media-te’ haksatna leng National Press Day ahihtawh kitonin theihsiampih ni chi a kingen kawm leng ihi hi.
Media kichi thil na mai ahikei a, sih-le-hin kikal a nnasem ki hi ahi. Tulai diakdiak ngial i lak ah thautui haksatna thupitak om a, himahleh aloutheilou in mun tuamtuam taikual a News kaihkhop poimawh hi. Theihtawp suaha nasem media person-te’n lawh muhna ding chauh hilou in mipi khualna ziak liauliau a a zu-aham thuak a kal ana suansam uh ahihdan kuapeuhin i theih thak uh deihhuai mahmah hi.
No comments:
Post a Comment