HEADLINES:
UNC in Naga mite tenna bial teng ah Total Shutdown puang
Police Commando-te’n UNC President leh Info. Secy. man
Imphal, Nov-25: Imphal West Police Commando te’n Pheidinga khua ah tuni sunma dak 11:15 velin United National Council (UNC) President Gaidon Kamei leh Info & Publicity Secretary Sankhui Stephen man uh a, amaute kintaka khahkhiak ding phutna in Senapati, Tamenglong, Chandel leh Ukhrul district ah tunitaklam dak 4:00 apan dakkal 24 sung UNC in Total Shutdown puang hi. Manipur Govt. in district piching hidia Sadar Hills leh Jiribam apuansawm tungtang ah Naga mite thudot a omlou chih ziakin, UNC in October 31, 2016 apan hunchiam omlou ding Economic Blockade puang uh a, blockade khauhtak omlai in Police venbitna tawh gari tamkhop Imphal tunpih himahleh UNC volunteer te’n Nov 21 in NH-2 huamsung Tadubi area ah truck haltum uhi. Truck haltumna tawh kisai in Senapati PS ah UNC makaite tunga case bulhkhum hi a, tuni a makai nih matna leng huai case tawh kizom dingin gingta uhi.
UNC President Gaidon Kamei (52) s/o (late) Landou Kamei of Noney Part-I leh Sankhui Stephen (36) s/o (late) Sankhui Thamnok of Komsen Village (Chandel) te’n Senapati a UNC Head office phaksawm chihthu om ziakin Addl. SP (Imphal West) Dr. Sarangthem Ibomcha leh Imphal West Dist. Commando OC Thangngampao makaih in Commando team khat in tang uh a, NH-2 in a totkhak Pheidinga khua ah minihte tuanna Bolero (NL 07C-1642) khamkhawl in mankhia uh hi’n kigen hi. Gaidon Kamei leh asungkuante bel Imphal a Damdulong ah khawsa uh a, ni 3 vel apan in Leimakhong Khunkhu village Chairman, Thomas Liangmei inn ah va giak a, tuni sunma in huaimun apan apawtkhiak nung ua Commando-te’n man uh hi’n leng kigen hi.
UNC pawlin Manipur a Naga mite omna bial ah tunitaklam apan dakkal 24 sung Total Shutdown puang uh a, huai hunsunga makai nihte khahkhiak ahihkeileh kiphinna khauhtak in zui ding chi uhi. Naga pawlpi tuamtuam-te’n amau omna chiat ah Shutdown enkai(enforce) ding uh a, Tamenglong dist ah Zeliangrong Baudi, Senapati ah Naga People’s Organization (NPO) leh Senapati District Students’ Association (SDSA), Ukhrul ah Tangkhul Naga Long (TNL) leh Chandel ah Chandel Naga People’s Organization (CNPO) te’n leng UNC Total Shutdown gupthu puang uhi.
Gaidon Kamei leh Sankhui Stephen matna tawh kisai in, Dewlahland(Imphal) ah tunitaklam in ANSAM makai-te’n Press Conference sam uh a, thunung-thuma leh thukhun (condition) omlou a khahkhe dia govt. theisak in, ngetna abawlte uh lawhchinsak ahih masiah khauhsem a kiphinna omding hi’n gen uhi. ANSAM president Seth Shatsang in huai huna agendan in, Central leh State govt. tawh Naga mite tungthu genkhawmna omlai a UNC makai nih mat a om hi a, UNC leh ANSAM in Jiribam leh Sadar Hills dist. piching deihlou kei mahle uh, huai tungtang ah akisaipih, Naga-te thudot ahihlouh ziak ua lungkimlou uh hizaw ahihdan gen hi. Aman agenzelna ah, Blockade ziaka Naga-te telin Manipur mipi adia haksatna omte leng theihpih uh chi a, lampi dang omlou ahihman in blockade bawl in om chi hi. Naga mite leh Manipur govt. in Sadar Hills tungtang a kilemna abawlsate uh zuausan a om hi’n leng ANSA President in gen a, tutunga Blockade kibawlte politics tawh kisaikha ahihman in, political dialogue tungtawn in saifel theih lel ding chi a, kihouna neihsang a UNC makaite mat tungtawn a asaifel sawmna pen thil lauhuaipi ahi chi in, govt. leh mipi’n man(price) tamtak apiak uh ngai ding chi hi.
Naga namsung a Civil Society makai-te’n tunitaklam a Emergency Meeting nei in thupukna tuamtuam bawl uh a, huaite lakah, UNC President leh Info Secy kintak a khahkhiak ding, District bawlkhiakna ding tawh kisai theihtawp suah a doudal ding, huai thubuai saifel dia Centre akigolh ding, ngetna omte lawhchin masiah total shutdown puan ding chihte telkha hi. Zingchiang sunma dak 10:00 in Senapati khua ah Naga namsunga CSO, Student, Church Leader leh Village Chief te’n manan panlak dingdan genkhawm nawn ding uh chihthu kiza hi.
UNC Economic Blockade tuni’n ni 25 chingta a, huai hunsung in vanzat pua truck 2 halsiat in om a, Manipur lut din gari tamtak koltang uhi. UNC makai nih mat ziaka buaina omthei chih ziakin Mao gate a truck 11 omte tunitaklam in Kohima ah kik uhi. Manipur High Court in UNC Blockade tawh kisai in tuni'n thusuah bawl a, Manipur mipi adia nektak leh vanzat poimawh laklut ahihtheihna di'n National Highway nihte ah security kiningching koih di'n DGP leh Chief Secretary kiangah theisak hi. Huai ding tawh kisai in Police leh Paramilitary force tamsem in NH nihte vengbit ding uh a, security escort tungtawn in Imphal ah gari tamsem tunpih hiding hi’n kigen hi. Blockade ziakin Imphal leh dist hq tuamtuam ah vanman naktakin khang a, Imphal ah black market in Petrol Rs. 300 / litre in kizuak hi. Blockade huna mipi-te’n haksatna thupitak atuah nung un, Silchar (Assam) leh Jiribam tawn a vanzat puaklut di’n state govt. in thupiak bawl a, security venbitna tawh tuzinglam in thautui pua 126 telin gari 390 vel Imphal tunpih in om nawn hi.
Sadar Hills ahihleh Manipur a ADC 6 omte laka khat hi a, Kuki, Nepali leh Naga banah tribe tuamtuam tengkhawm uhi. Huai bialsung ah Sub-Division 3 om a, Sq.km 1698 vela lian ahihbanah khua 628 om in milip 1,56,513 vel om uhi. Manipur singtangmite humbitna di’n Parliament ah Manipur (Hill Areas) Autonomous District Council Act, 1971 passed in om a, huai tungtawn in Sadar Hills Demand pawlin state piching ngen uhi.
Khamtheih naktak a doudal hiding;
Election ding tawh kisai kisakkholhna pailel: SP/CCpur
Lamka, Nov-25: SP/CCpur Rakesh Balwal, IPS in tuni sunnung in ama office chamber ah press/media-te kimuhpih in maban election ding tawh kisai a kisakkholhna leh tulai a khawpi sung ah zu leh khamtheih drive tawh kisai a panlakna pulak hi. Aman Jan. 2017 khasung in election neihman gintakthu gen in, kisakkholhna pailel a, CCpur dist. a polling station 318 om lak ah 60% val ah mobile network omlouh ziakin satellite phone 35 zat hiding a, Hengkot, Singngat leh Vangai ah kithuzak tuahna ding repeater station koihbeh hidingin gen hi.
Tuibuong Peace Ground pen dedicated helipad a zat hiding a, Jiribam, Senvon, Pherjawl, Thanlon, Henglep, Kangrengdor, Lungchin, Parbung, Sinzawl, Leijangphai leh Mualhoichiang ah helipad bawl hiding a, polling station tuamtuam a duty ding women police company 1 telin Central Armed Police Force Company 76 (personnel 7000) vel zat hiding in gen a, State apan MR leh IRB apan Company 14 in kithuahpih ding chi hi.
Election ding tawh kisai in Kangvai, S. Kholian, Sinzawl, Senvon, Sibapurikhal, Sangaikot, Sagang, Singngat leh Behiang ah police check post koih hi a, huaimun-te ah CCTV thuah hiding in gen a, huai ah Sector Police Officer 30 om ding a, officer 1 in polling station 10 zel enkai ding hi’n gen hi.
Khamtheih ziakin hou chikchik in buaina piangthei ahihna ah drive neih hi a, naktak a paipih hiding chi a, zudawn bel kham hikei mahleh a mun a dawn chihte kham bikbek hiding a, matkhiak om leh dan tawh kituak in gawtna piak hiding in gen hi. Hiai tawh kisai mipi’n kithuahpih dia ngen kawm in pharmacy te’n leng doctor in agelh louh khamtheih chi himhim damdawi pekhelou di’n ngen hi.
LOCAL NEWS:
ECI NE Divn te’n Lamka phading
Lamka, Nov-25: Election Commission of India, NE Divn a official 2- Ravi, Section Officer leh Arun Kumar, Asst Section Officer te’n Nov. 26, 2016 in Lamka hongpha ding uh a, Hrisikesh Modak, IAS, Jt. CEO/Manipur inleng honzui ding hi. Amau zinglam dak 9:30 velin Lamka hongtung ding uh a, DC office ah DC/CEO, SDO/AERO leh Election Deptt-te meeting pih ding uh a, meeting zawh in Lamka apan Bishnupur Dist. manawh Imphal ah kik ding uhi.
S.K Oil lakna mun ding bikhiah
Lamka, Nov-25: DC/CCpur in CCpur Dist. a S.K Oil Sub-Dealer te’n Oct. & Nov. 2016 quota lakna ding mun bikhiah a, Sub-Dealer te’n Identity Card tawi ngai ding hi. Kumdang in Dist. quota kha 1 in 152 KL himahleh state quota akiam (decrease) ziakin CCpur Dist. quota leng Oct & Nov. in 72 KL tuak lel hongpai hi’n taklang hi.
Thautui lakkhiatna ding munte 55- Parbung A/C te’n M/s Pudaite Traders ah la ding uh a, 56-Thanlon A/C te’n M/s Pudaite Traders, 57-Henglep A/C te’n M/s Z.T & Co., 58-CCpur A/C te’n M/s Z.T & Co.,59-Saikot A/C te’n B.B & Co. leh M/s. Paite leh 60-Singngat A/C te’n M/s JHK Agency ah la ding uhi.
Saving A/C neite’n ATM apply theih
Lamka, Nov-25: Tuibuong Post Office ah Saving Bank Account (A/C) neite’n ATM apply theih a, Aadhar Card xerox copy 1 leh passport copy 1 tawi in application form fill-up theih ding hi. CCpur Dist. ading ATM card 200 kia hongtung a, huai ATM zang in Imphal a Post Office ah sum draw thei ding hi’n kigen hi. Saving A/C neite kiang ah ATM card hawm zawh chiang in Tuibuong a Post Office ah ATM installed hiding in kigen hi.
NTBCA Annual cum Missions Conference 67veina kipan
Lamka, Nov-25: New Testament Baptist Churches Assn (NTBCA) saina in Garlow Memorial Chapel, NTBCA Campus, Bible Hill, Rengkai ah Nov. 27, 2016 tan om ding Annual cum Missions Conference 67veina tuni’n kipan a, Rev. K. Hangnung, Exe. Secy, NTBCA in hong hi.
Rev. Dr. Ginnei Thang Ngaihte, Dir. of Asian Cross-Cultural Training Institute, Singapore leh leh a zi Ningkhan Ching Ngaihte makaih in seminar om a, huai hun ah Ginnei Thang in ‘Trends in the World of Missions’ leh ‘God’s Equipment for Mission’ thupi zangin sinsak a, a zi’n ‘A Healthy Missionary Family’ thupi pansan in sinsak hi. Hiai hunsung in Rev. Dr. Ginnei Thang Ngaihte thugentu in pang ding hi. Nov. 29 leh 30, 2016 in business session om ding a, budget leh year plan tawh kisai genkhawm ding uhi.
Inspector in kaisang
Lamka, Nov-25: Centre Custom & Excise, Govt. of India, Mumbai branch a sem N. Thangzamang s/o N. Khamkhotuan of Bungmual leh T. Thangsuanmung s/o T. Hrangkhum of Hiangtam Lamka, senior tax assistant apan inspector in kaisang uhi.
MEMCOS Diamond Jubilee suang hong ding
Lamka, Nov-25: Manipur Ex-Servicemen MPCS Ltd (MEMCOS) kiphutkhiat nung kum 50 chin Golden Jubilee lopna Nov 26, 2016 sunnung dak 2:00 in MEMCOS office, Ngulthong Bazar ah zang ding uh a, Langkhanpau Guite, Chairman ADC/CCpur in Jubilee suang hong ding hi.
2017 apan No Due Certificate piak hilou ding-MSPDCL
Lamka, Nov-25: Managing Director, Manipur State Power Distribution Company Ltd (MSPDCL) theihsakna bang in CCpur Dist. a govt. employee-te’ kiang ah December 2016 tan electric No Due Certificate piak hiding uh a, 2017 apan Online/One-Time No Due Certificate zat hiding hi. Huai thu ah CCpur Dist. a govt. employee te’n Bijang a MSPDCL office ah Dy. Manager (IT), MSPDCL/CCpur Divn. kimuhpih a, prescribed format ah One Time No Due Certificate submit/update ding in LK Hatzaw, Dy. General Manager, MSPDCL CCpur Divn. in theisak hi. Govt employee te’n One Time No Due Certificate tawh kisai http://www.powernodue.com ah check thei ding uh a, prepaid consumer-te internet ah post paid consumer a uploaded te’n prepaid consumer ID leh meter box No. hihfel ngai ding hi. Adiklou leh akimlou-te data/detail reject hiding a, khaloh lakna ding zekai ding ahihziak in MSPDCL/CCpur Divn. in mawhpawlou ding leh kuaman mawhsa theilou ding hi’n Dy Gen. Manger, MSPDCL/CCpur Divn. in taklang hi.
ATWU te’n khual zinna report pia
Lamka, Nov-25: All tribal Women Union (ATWU) a President Nianglian leh Kimzaching, Asst. Secy-te 6th schedule tawh kisai a mi poimawh tuamtuam kimuhpih dia Nov. 12, 2016 a zin Nov. 23 in hongtung kik uh a, tuni sunnung in morgue ah khualzinna report pia uhi.
President in agenna ah, makai 2-te’n India President Pranab Mukherjee telin Rajya Sabha MP 5 - P. Chidambram, Chairman of House Committee, Biswajit Diamary, Conrad Sangma, D. Raja leh Majeed Memon ban ah Lok Sabha MP 4 - Dr. (Prof) Kirit Premjibhai Solanki, Chairperson, Parliamentary Standing Committee on Welfare of Schedule Caste & Schedule Tribe, Choudhary Mehbood Ali Kaisar, Neiphiu Rio leh Dr. A Sampath ban ah Kiren Rijiju, MOS (Home) leh Satender Garg, Jt. Secy, North East kimuhpih in 6th schedule tawh kisai a panlakpih din va ngen uh a, parliament winter session ah Manipur singtangmite constitutional rights leh demand tawh kisai a special mention/short duration discuss dia puaklutsak dingin leng va ngen uhi.
Dr. D. Raja makaih in President of India kimuhpih in memorandum pia uh a, President in Union Home Minister kiang ah leng pedia a sawl ban ah Cabinet Secy-te samkhawm in haksatna tawh kisai genkhawm ding ahihdan theisak hi’n gen hi.
Free Medical Health Camp omding
Lamka, Nov-25: Diocesan Social Service Society (DSSS) leh Zou Youth Orgn. (ZYO) Kamdou Veng Unit saina in Nov 26, 2016 zinglam dak 9:00 apan P. Kamdou Veng ah "Free Medical Health Camp"omding hi. Huai hun ah Doctor leh Nurse te’n Kamdou Veng mipi damloute ending uh a, amanbei in damdawi pe ding uhi.
SMDC te’n order lakngai
Lamka, Nov-25: Manipur ah Assembly Election 2017 ding tawh kisai CCpur dist. a school 86-te Polling Station a zat ding ziak in Electricity deptt/ MSPDCL. CCpur divn. te’n electric fit zouta uh a, election zawhsiang masiah SMDC-te kiang ah etkaina pekhia uhi. School 86 a SMDC te’n ZEO kiang ah order lading leh thuchian kimzaw kanding in ZEO/Dist. Project Officer, SSA-RTE/CCpur in theisak hi.
IMPHAL NEWS:
Governor in SW Minister kimuhpih
Imphal, Nov-25: Raj Bhavan Imphal a Governor Secretariat thusuak in a taklatna ah Governor Dr. Najma A. Heptulla in tuni’n Manipur a Social Welfare Minister AK. Mirabai Devi kimuhpih a, huai hun ah Mirabai Dept. nuai a schemes/program tuamtuam-te khawsak haksa diak-te hamphatpih ding a sepkhiat dan tungtang genkhawm uhi. Governor in khawtang dopsangna dia nasepna leh entrepreneurship om sak ding banah nupi leh tuailaite Skill training piak ding a poimawh dan gen pih a, Social Welfare Minister in a dept. nuai ah Skill Development om ahihdan leh nupi banah tuailai te’n scheme/program tuamtuam a phattuampihna ding un panpih a, Centre govt. apan huhna leh kithuahpihna tamsem ngahna dia Governor in panpih din ngen hi.
Huailou in Union Minister of Textile Smriti Zubin Irani in Nov. 27, 2016 in Manipur hongpha ding a, zinglam dak 11:30 in Lamboikhongnangkhong ah ‘Apparel and Garment Making Centre’ hongkhe ding hi’n gen uhi.
Thoubal ah Industrial Estate hong
Imphal, Nov-25: Chief Minister O. Ibobi in Ministry of Micro Small and Medium Enterprise (MSME) leh North Eastern Council (NEC) panpihna a Commerce & Industries Dept., Govt. of Manipur nuai a Thoubal district ah Kuraopokpi Industrial Estate kibawl thak tuni’n hongkhia a, huai hun ah CM in Manipur a tuailai lehkha siam sepna neilou teng sepna piak ding hithei lou a, Entrepreneur-te panpihna tawh state govt. in Private Public Partnership (PPP) tungtawn in tuailai-te sepna pia uh a, Thoubal mipi khawsak dan dopkang na dia Industrial Estate a hamphatna tuamtuam om ding chi’n gen hi. CM in ‘The 5th international Tourism Mart 2016’ ding tawh kisai a invitation card ah ‘Sanjenthong’ chih ding ‘Home Church Lane’ kichi pen Tourism Ministry-te hihkhelh hi’n gen hi. Tuni a hunzatna ahihleh Dy. CM Gaikhangam; K. Meghachandra, Parliamentary Secy.; K. Ranjit, MLA; Y. Surachandra, MLA; T. Brojen, MLA; M. Fajur Rahim banah official tuamtuam te’n uap uhi.
Vanpua gari tamtak hongtung
Imphal, Nov-25: 7th IRB leh Manipur Police Commando te escort na nuai ah Imphal-Jiribam lampi tawn in van tuamtuam pua truck/gari 440 tuni’n Imphal hongtung uhi. Tuate, petrol tanker 33, Diesel tanker 58, SK Oil tanker 4, ATF Fuel tanker 3, FCI antang pua truck 99, Cement truck 86 leh niteng vanzat leh nek ding pua 144 hi uhi. Huai banah tunitak nung leh zingchiang n bangzahhiam hongtung beh lai ding hidan in kigen hi.
NE bial a NH project 4 lemsakpih
Imphal, Nov-26: PIB (Defence Wing) thusuahna ah Ministry of Road Transport & Highway, Govt. in India in North East bial a Rs. 1173.98 crore bei a Highway Project 4 a vek a gawm in km 112.88 a sau bawl ding lemsakpih a, Manipur ah project 2 banah Nagaland leh Arunachal Pradesh ah project 1 tuak hi’n gen uhi. Manipur a project-te ahihleh NH-39 tua NH-2 in a tawt khak Imphal-Mao kikal a lampi km 47.67 a sau 2-lane pavement omsa puah hoih leh pavement shoulder bawlna dia Rs. 230.46 crore banah NH-2 (Mao-Imphal ) mah ah km 27 a sau 2-lane pavement puahhoih leh paved shoulder bawlna dia Rs. 139.87 crore bikhiah banah project 2-te adia gam omsa hi’n gen uhi. Arunachal Pradesh a NH-415 in a tawtkhak Itanagar leh Banderdewa kal a lampi km 10,9 a sau 4-lane a bawlna ding in Rs. 341.83 crore bikhiah banah state govt. in project a di’n 30/40 m ROW a thawn in pia a, Nagaland a NH-2 in a tawt khak Dimapur-Kohima kikal a lampi 27.3 km puahna dia Rs. 461.82 crore bikhiah banah huai dia gam ngahkhin hi’n leng taklang uhi.
Tamei Battalion te’n Rs. 44 lakh man
Imphal, Nov-25: Tamei Battalion te’n Tamenglong dist a Wairangba II Village ah zan in Mahindra Scorpio (No. MN01G-6531) a checkna uah Rs. 500 leh Rs. 1000 note a vek a gawm in Rs. 44 lakh mukhia uh a, huai tawh kisai in gari a tuang numei 1 leh pasal 2 man uh hi’n kigen hi. Mat a om Joyson Kamei s/o Kandai Kamei of Nungba, Tamenglong; Stephen Gongmei s/o Dinrei Gongmei of Gaidimjang, Tamenglong leh Romancy d/o Chittaranjan of Lairikyengbam Leikai, Imphal East hi uh a, sum muhkhiak-te tawh Imphal a Police thuneite kiangah pekhia uh hi’n kigen hi.
Asian Theatre festival kipan
Imphal, Nov-25: Sangai Festival 2016 tawh kizawi tawn in NT Theatre saina in tuni’n Changangei Ucheckon a Hongmengshang NT Theatre Playhouse mun ah Asian Theatre Festival hongkhiatna om a, huai ah Chief Guest in Dr. RK. Nimai Singh, retd. IAS, Consultant to the Govt. of Manipur pang hi. Functional President in N. Ashok Kumar, IAS, Special Secy. (Tourism) leh Guest of Honour in Dr. Naorem Khagendra Singh, Vice Chancellor, Manipur University-te pang uhi. Huai hun ah (late) Heishnam Kanhailal in a bawl ‘Kalakshetra’s Dak Ghar lahkhiakna om hi.
Van mat-te mipi lakah zuak
Imphal, Nov-25: UNC te’n Nov 1, 2016 apan NH-te ah indefinite economic blockade a puang uh ziak a Imphal area ah van man khang tawh kisai enkaitu dia IPSA leh KSA te’n a phuhkhiak uh Kangleipak Commercial Affairs Assn. (KCAA) te’n tuni’n mun tuamtuam ah drive bawl uhi. Huai hun ah KCAA volunteer te’n Thangal bazar a Kali Mandir gei a dawr khat in phulun ngou (garlic) bikhiah sang a tamzaw a zuak ziak in dawr leh godown a phulun ngou bag hunkhop matsak uh a, Khwairamband a Samumakhong mun ah man bikhiah zah in mipi lakah zuak khiak sak uh hi’n kigen hi. Huai thu tawh kisai in KCAA volunteer te’n economic blockade suanlam a bazar leh vengsung a dawr leh dukan neite’n van tuamtuam man khangsak lou ding in theisak uh a, thupiak zuilou a van matkhiak-te aman diktak a mipi lakah zuak khiak sak ding in taklang uhi.
State League Final:
NEROCA in penalty in AIM zou
AMFA saina a 11th Manipur State League-2016 fina match kimawlna tuni in Khuman Lampak Main Stadium ah om a, tua ah defending champion AIM leh NEROCA kimawl ua, normal time in goal kikhum omlou in 0-0 in kidraw ua, tua zawh in penalty pek ua, NEROCA in 4-3 a zou in champion la uhi. NEROCA apan Md. Sahail Shah, David Lalbiakzara, Th. Johnson leh M. Ashok Singh ten peklut ua, Ch. Kishan Singh in khumlou a, AIM apan O. Romtan Singh, E. Abocha Singh leh S, Dinesh Singh ten peklut ua, ahihziakin W. Angousana leh S. Thomas Singh ten khumlou ua, NEROCA in 4-3 a zou in champion la ua, cash prize Rs. 2 lakhs sang ua, AIM te Rs. 1 lakhs a lungkim uh ngai mai hi.
11th Manipur State League-2016 ah NEROCA goalkeeper Lalit Thapa in Player of the Tournament award sang a, Khumukcham Ingocha Singh Memorial Trust in Jemsun Khumukcham min in cash prize Rs. 20,000 leh trophy a donate uh sang hi. Top-scorer ahihleh AIM apan N. Pritam leh NACO apan Th. Modhumangol ten goal 13 tuak khum in la uhi. Amau Dr. Kh. Lokeswor Singh in a tapa (L) Martin Khumukcham theihgigena ding a donate cash prize Rs. 20,000 leh trophy sang uhi. Huai banah runners-up AIM ten Fair Play award sang ua, Khumukcham Ingocha Singh Memorial Trust in Daniel Khumukcham min a donate uh cash prize Rs. 20,000/- sang uhi. NEROCA ten champion alak uh tawh kiton in State League ah nihvei champion lata uhi. (Taitom)
TUNI THUPI:
“Pathian aw, hon humbit in: nang mah ah ka ginna ka koih ngala.”
– Sam 16:1
EDITORIAL:
Manipur kichi Dry state maw?
Lamka khawpi sungah tulai in Police te’n zu tawh kisai in drive nasatak nei uh a, mipi’n kipahpih mahmah a, khamtheih tawh kisai leng hon drive touhzel uh gintakhuai hi. Zu kia hilou in gari mang tawh kisai leng drive nasatakin hon bawl lai le uh chih mipi kinepna ahi hi. Huai banah, ‘Alcohol prohibition in India’ dan zui a na hon septouh uleng gintakhuai in kilang hi. India malsuahbial a state tamzaw a zu zalentaka zuak ahihlai in Manipur state pen Dry state ah koihin om a, Mizoram state ah zalentakin zu zuak theih in omta hi.
‘Alcohol prohibition’ tawh kisai Gujarat, Kerala, Bihar, Nagaland leh Manipur banah Union Territory ‘Lakshadweep’-te ah zu khamna nasatak om mahleh India state mundang teng ah zalentakin zu zuak hi veve hi. India state leh union territory khat le nihin zuzuak khawlsak mah le uh zu duh mite adingin a lampi om thouthou hi. Khamtheih chi tuamtuamte aguk in zuaktheih a, zu pen a duh mite’ adingin a poimawh hunin kihuan theih a, kham vual ding hilou hi.
Manipur state kichi Dry state dan in puanin ana om a, a buai masapen Nagate mah ahi hi. Ahih ziakin amaute’n Khatkhati (Assam) apan zalentakin zu lathei uh a, huai apan Nagaland tawnin district tuamtuam ah supply bawlthei uhi. Mizoram in nidang hunin a gamsung uah zuzuak leh supply himhim YMA tawh pangkhawm in kham uh a, himahleh, zu ziaka si mi atam deuhdeuh chiangin zu siang zuak poimawh ahi chi uh a, state govt deihna bangin tu in zu zuakna mun bawl hita hi. Zu siang dawnding, a piakkhiak dan control neih ding chih pen hoih mahmah hi.
Lamka Police te’n zu mun tuamtuam aluh uh thildik ahi a, dan leh thupiak etkolna banah a mawhpuakna him uleng ahi hi. Himahleh chih om thouthou hi. Nidang hunin drugs cell kichi ana om a, tua nungin code name tuamtuam vuahin om hi. Zu i chih mi upa tamtakin zingsang baihtakin dawn uh a, suunnung inleng dawn nawn uhi. Suun leh nitak nunga dawn leng mi hunkhop omkha ding hi. Manipur i chih dry state ahi ngut a, police te’n power neitak in pan ala thei uhi. Ahihziakin, police te’n vendor-te lakah siah (tax) ala kei himhim uh a chi ngam kua police officer a om dia le?
India gamsung ah pubs/vendor ahihkeileh club tuamtuam ah zinglam dak 2/3 tan kihonna om tham a, police te’ adia hiai munte summuhna (side) hi a, Lamka khawpi a police officer 1/2 in nitaklam dak 2/3 a side a zonna ziak ua zu dawn mite’ buaina in police station kangsak kha nawn thei mawk hi. Dry state Manipur chi ihih ngal leh kuaman zu zuak nawn kei henla, police te’n leng zuzuakte apan sum nenawn kei uhenla, helpawlte’n leng kuamah apan sum la nawnkei le uh chih deihhuai hi. Sial in a chilchil kawmkawmin nek in nek thuahthuah maw?
Dry state ah zuzuak phal hilou a, ahihziakin Imphal ah a dim-aha in zuzuak pumdim a, police te’n ni khat in sawmkhat/sawmnih a ‘side’ ding un va lasek uhi. Tua mah bangin Lamka leng ahithou. Himahleh, Naga bial abel police-te gamtang ngam vetlou uhi. Dry state pen ‘wet state’ a khenkhiak hihenla, zu dawnte lah khamzawh vual ding hilou ahihlouh man in ‘tax’ alak uleh la uhenla a, zudawn hun ‘timing’ kichian tak pezaw le uh mi kipak zaw ding un gintak huai hi. Lamka khawpi ah mi piching 30% bangin zu dawn ding uh a, naupang (student) telin 7.5% in zu dawnding in gintakhuai hi.
Gujarat, Maharashtra leh state tuamtuam in a state uh dry state danin puang mahle uh kham zou tuanlou a, a economy un niamlawh hi. Thagum in kuamah akam uah zu kitulh hilou a, a ut te’n dawn ding, a utlou te’n dawnlouh ding chih hilel hi. Kuamah kimawhsa ding omlou hi. Andhra Pradesh, Haryana, Mizoram leh Tamil Nadu te’n zu khamna a neih uh etthakna nei in, revenue circulation chauh hilou a mihing damtheihna adia hoihzaw ding chih khualna ziakin Zu a hoihmah zuakding (quality) etchetding chih phu uh a, tua ziakin zuak theihna permit su hing (revoke) nawn uhi. Eilawi tawh kisai ahihleh police te’n zu inn mun tuamtuam raid/drive bawl vet ahih uleh a guk a sum a na ne (tax) la-te leng mankhe vet le uh deihhuai hi. Underground leh Police-te’ sum muhna Manipur a Alcohol vendor-te nuihzat huailua a, Dry state ki chihchih ding leng zumhuai hi.
No comments:
Post a Comment