Numei 2 auto apan tawmkhia
 |
| http://static.dnaindia.com/ |
Lamka, Nov-26: Tunitaklam dak 4:45 velin numei naupang 2 Headquater Veng a paisawm te’n Police Station khang Tedim Road ah Diesel Auto (No. MN02A-3498) kham in tuang uhi. Amau Red Cross Road junction, New Bazar ah auto kham uh a, himahleh auto khawllou in speed in New Lamka lam manawh in taipih a, numei naupang 2-te’ lauthawng in Grace Photo Studio gei, New Lamka (G) ah auto sung apan tawmkhia uhi. Amau bel liam uh a, phatuam ngaite’n Hospital ah pawlut uhi. Auto taisuak mahleh phatuamngaite’n delhzui in auto leh driver mankhia uh a, ZRA te’n Auto driver Jeptha Famhoite (22) s/o Lalremruot Famhoite of Saikot, Kanan Veng pawkhia in Police-te’ khut ah auto leh driver pekhia uh a, Police te’n kem uhi.
HQ Belam Veng a om leh Young Pillar College a class XI simlel numei naupang kum 17 leh HQ Belam Veng mah a om Vimala Raina H/S ah class IX simlel kum 16-te gendan in Tuitengjang (Sangaikot area) a om apaneu uh buh khen a kuan hi uh a, Lamka tan DI gari a hong tuang in, Police station gei a auto man uh hi’n gen uhi.
HEADLINES:
Quarter teng ah state chih in compensation ngah ding
Centre Govt in ‘Draft GST compensation law’ tuni’n puang
New Delhi, Nov-26: Kumnawn apan Goods and Services Tax (GST) zat ding tawh kisai in, State govt. kianga Compensation piak ding zah tuni a puankhiak in omta hi. Union Finance Minister Arun Jaitley gendan in, centre apan state chih in, kumkhat in quarter teng ah compensation ngah ding uh a, kha 3 hal zel in compensation khahkhiak hiding chi hi.
GST Compensation Law (Draft) puankhiak a om pen December 2-3, 2016 sung in GST Council makai-te’n genkhawm ding uh a, khek lamdang omlou in ahibang bang a paisuak ding hi’n kigen hi. Revenue Secretary, Hasmukh Adhia in huai tawh kisai agenna ah GST tax rate paiding dan seh 4 a khenzak hiding a, tuma a GST Council thupukna dungzui in 5% , 12% , 18% leh 28 % hiding chi hi. Tax rate sangpen dingte Luxury goods leh tobacco product hi a, GST zat hun apan Central govt. vuak in tax la thei ding hi’n leng gen hi. GST Law tungtawn in State govt. adia summuhna omte khaktan hiding a, huai hunchiang in state economy puksiat louhna di’n central government in compensation pe ding a, India a state leh UT govt. chih in a ngah ding un Rs. 50,000 crore val kholkhawm in omta chi hi.
GST Council apan thusuakin agendan in kumkhat sunga compensation piakkhiak ding zah thutanna bawl hinailou a, Comptroller and Auditor General (CAG) pawlin audit abawlkhit chiang un puankhiak hiding chi hi. State govt. kianga compensation piak a om dingte ‘GST Compensation Cess’ in a huamkhak, Luxury item leh tobacco hi a, kum 5 sung in ‘GST Compensation Fund’ apan piakkhiak hiding hi. Central govt. in mipi muhtheih di’n Revised Draft Model GST Law, leh Draft IGST Law leng khahkhia hi’n kigen hi.
LOCAL NEWS:
CDLSA in tuni’n Law day zang
Lamka, Nov-26: CCpur Dist. Legal Services Authority (CDLSA), CCpur in tuni sunnung in Rengkai Road a Lalhmasuon Joute Memorial Hall, Life Cafe ah ‘Law Day’ zang uh a, huai hun ah CCpur Dist. Bar Assn-te ban ah Civil Police a Rank Officer-te kitel uhi.
Letkho Kipgen, CJM/CCpur in Law day kizatpat dan pulak a, Law Day (Samvidhan Divas) ahihleh India danbupi (constitution) bawlkhetu Dr. BR Ambedkar theihgigena dia 2015 apan Nov. 26 in zat hi a, India khua-le-tui hihna neite kingakna constitution kipsak semding tupna a kizang hi’n gen hi.
Resource person in David Piaklian, MPS Addl. SP (Law) pang a, aman dan leh police kikhen theilou ahihdan gen a, hibang programme kisaipen Police-te adi’n dan theihbehna ahihman in phatuam mahmah ding hi’n gen hi.
Ngabeng akuan tuahsia
Lamka, Nov-26: H. Thangzakap @ Kappu (46) h/o Manngaih of Khominthang, New Lamka alawmte mi 2 tawh Tuivai ah ngabeng akuan tuni sunnung in tuahsia in tuikawm ah tummang a, alawmte’n zawng mahle mukhe zoulou uhi. Alawm te’n H. Thangzakap pa’ omna Phaitong khua ah thil omdan hilh uh a, Nov 27 in mipi’n zong nawnding uh hi’n kigen hi. H.Thangzakap bel azi leh tate tawh Khominthang, New Lamka ah omlel uh a, apianna pa Khupgou leh anu te bel Phaitong khua ah om uhi.
KSO te’n student curfew puang
Lamka, Nov-26: Kuki Students’ Orgn. CCpur Dist. te’n H/S leh Hr Sec. School final exam pailel ah tunitak apan student-te’ exam zawhma nitak dak 5:00 apan zing dak 6:00 kikal student’curfew puang uhi. Student curfew hunsung student-te khawlai ah pawtkhe lou a, laisim ding leh curfew bawhsia te action lak hiding uh a, nu-le-pa, guardian te’n KSO volunteer-te kithuahpih ding in ngen uhi.
Guta 1 Police ah pekhia uh
Lamka, Nov-26: Kawnpui Defence Force (KDF) te’n tuni sunnung in gari gu Pauminthang @ Joy (31) s/o Kailam of Mata Mualtam mankhia in Police ah pekhia uhi. Thusuak kingahdan in Lalngurliana Sailo of Thingkangphai in aleithak leh inn a koih Karisma bike (No. MZ01E-6876) Nov 21, 2016 zankim vel in gutate’n gukmangsak uhi. Gari neitute leh KDF te’n sun 1 leh zankhat abuaipih nung un tuni zinglam in gari neitute workshop, Hmui Veng ah bike a mangsak hongtai lai mu in delh uh a, KDF te tawh pangkhawm in BCM mual ah pha in mankhia uhi. Guta pan agari guk Rs. 5000 in zuaka, gari leitute’n Rs. 2000 pia in adangteng ba uh hi’n kigen hi. Gari’ leitute tungtawn in guta Pauminthang matkhiat a om hi’n kigen a, gari bel aneitu Lalngurliana in kem hi. Police te’n Pauminthang’ apan Activa (MN01Q-7796) RC book, Driving Licence J. David Hmar kichi 1, Activa gari chabi 1 leh temta 1 mukhia uhi. Pauminthang bel khamtheih hih zongsang hi’n kigen hi.
SVEEP Consultant in PwDs music video hong
Lamka, Nov-26: Rajiv Aggarwal, IAS, Jt. Secy, Election Commission of India leh azi Dr. Aarti Aggarwal, SVEEP Consultant, ECI-te’ tuni’n Lamka hongpha in, B. Vengnom community hall ah vualbanloute tawh kithuah khawmna uap uh a, Dist. Election Officer, CCpur in vualbanloute tawh kisai a music video abawl uh Aarti Aggarwal in hong hi. Jt. Secy ahihleh Ravi, Section Officer (NE Div) leh Arun Kumar, Asst. SO te’n leng honzui uhi.
Huai hun zatna ah CCpur Dist. Disable Union (CDDU) te’n intekna la in, vualbanlou hunkhop akihel ban uah SP/CCpur Rakesh Balwal, IPS telin mi poimawh tuamtuam in uap uhi. Rajiv Aggarwal in a genna ah, kum 20 val election ah kihelta mahleh hibang hindan leh ngaihdan phuahtawm theihna lunggel nei mi tuakkha nailou ahihdan gen a, ECI in tutung election pen festival of democracy chia a minvuah atak in muhtheih chi hi.
Aarti Aggarwal in tuailaite election ah kihel luat ding ahihdan gen in, 100% vote kikhia om theikei mahleh vote a tam theilam khiak ahih theihna dia kuapeuh in panla dingin ngen a, tutung election omding pen maban ding bawlna dia kalbi poimawhtak ahihman in gam bawlhoihna dia kuapeuh kisa dingin ngen hi. Hiai hun in Election Youth Icon lak a teldin Sianmuanthang, CDDU President guang a om ahihdan SVEEEP consultant in puang hi.
MEMCOS in Golden Jubilee zang
Lamka, Nov-26: Manipur Ex-Servicemen MPCS Ltd (MEMCOS) in kiphutkhiat nung kum 50 (Golden Jubilee) chin lopna tuni’n Ngulthong Bazar a office ah zang uh a, Chief Guest in Langkhanpau Guite, Chairman ADC/CCpur pang in suangphuh hong a, Rev. T. Songkhanthang, Local Pastor EBCC Vengnuam in lan hi. Huai hun ah Guest of Honour in M. Gouzamang Guite, EM/ADCC pang hi.
Chief Guest in agenna ah gam adia thahat hunsung zangbei ex-servicemen-te zahtakna pekawm in a piak zawhna uh phat-huai chi hi. Demonetization tawh kisai a CCpur dist. a sumdawng leh bank-te tawh kikal a mipi’ kitheisiam tuah ding leh Dec. 2016 tanbek sumlui-te ki pomsak lai dingin kuapeuh ngen hi.
Guest of honour in sepaih kichi a service hunsung uah kuhkaltak in sepna mun ah om in a sepna uh ngaisang uh hi’n gen a, govt. service sepna ngaisanglou tamtak omte golden jubilee ahih tawh kiton in society in mi 50 tanbek kiang ah awareness bawl thei dia panla dingin ngen hi. Hiai society ah tulel in board of director 9 leh managing director 1 telin member 140 vel om hi’n kigen hi.
TRVM in RTI Helpline hong
Lamka, Nov-26: Tribal Rights Vigil Manipur (TRVM) JHQ Lamka in Right to Information (RTI) tawh kisai Helpline abawlkhiak uh tuni zinglam in Mini Auditorium, Dorcas Hall ah Lalthazam, MCS, AC to DC & SDO/Saikot in hong a, Rev. Lian Benson, Exe. Dir, EELC in lan hi. Huai hun Dist. Level Officer bangzahhiam telin mi poimawh tuamtuam in uap uhi.
Thangbiaklian Hangzo, Chief Moderator in gam bawl hoihna leh tungdin thak ding tawh kisai a kalsuanna ah khawtang (social community) kia hilou in, saptuam inleng pan alak poimawh hi’n gen hi.
Lalthazam, MCS in India constitution in honpiak right to freedom of expression izat theih taktakna din govt. sunga bangteng om hiam theih masak ngai ahihman govt. in 2005 kum in RTA pankhia hi’n gen a, khawtang hoihna dia kuapeuh in panlak poimawh hi’n gen hi. RTI bawl ding dan tawh kisai a buaina neite’n TRVM JHQ Lamka Helpline No: 8131927576, 9612902246, 9856909994, 8729852824 leh 8413028501 ah contact theih ding hi’n kigen hi.
MPYF te’n seminar nei uh
Lamka, Nov-26: Manipur Presbyterian Church Synod (ECI) nuai a Manipur Presbyterian Youth Fellowship (MPYF) te’n tuni zinglam in Synod Hall, IB Road ah Christian Youth, Law & Order and Social Life seminar nei uh a, Rev Vanmawia, Moderator, MPCS in hongkhia hi. Seminar hun ah ‘Christian Youth and Law & Order’ chin pansan in H.Balram, MPS, Addl.SP (Ops) leh David Biaklian, MPS, Addl SP (L &O) te’n sinsak uh a, ‘Christian Youth and Social Life’ chih pansan in SHALOM te’n sinsak uhi.
'Financial Literacy Awareness camp
Lamka, Nov-26: Rural Enhancement Foundation leh NABARD-te saina in Kholmun village a Youth Club Hall ah tuni zinglam dak 11:00 apan nitaklam dak 2:30 tan ‘One Day Financial Literacy Awareness Camp’ om a, huai hun ah Lalboi Kipgen, DO, LIC/CCpur in ‘Financial Planning & Budgeting Family Income, Basic Saving, Credit, Transfer concept leh thu tuamtuam gen banah budgeting family income leng kal teng, kha teng banah kum teng adia bawl ding a poimawh dan gen hi.
Joy Singh, LIC Expert in Importance of Social Security telin scheme tuamtuam banah Joshua Khumlianlal, Asst. DDM/NABARD in PMJDY, APY, PMSBY tawh kisai a scheme tungtang gen hi. Huai hun ah participant mi 50 banah khawsung mite’n uap uhi.
SUUNNA:
Thangkhoman (84) m/o Hauginlian of Bethel veng, New Lamka tunitak dak 7:30 velin teknat in si a, Nov 27, 2016 in Vaiphei Christian Cemetery, Pangzawl ah kivui ding hi.
H. Nengzasuan (46) s/o (late) H. Vungzagin of Vengnuam South, New Lamka tuzing dak 8:30 velin Lamka damdawi inn ah sinna in si a, sunnung in YPA hanmual, New Lamka ah kivui hi.
Laltingen Vaiphei (50) s/o Kailet Vaiphei, Chief of S. Kanan Village, Sadar Hills tulel a Delhi Police ah Havildar sem, RIMS hospital ah damlou etkol aom tuni’n si a, akhua uah vui ding in kipua hi.
IMPHAL NEWS:
CM in Ambulance 11 khahkhia
Imphal, Nov-26: Chief Minister Secretariat thusuak in Power Grid Corporation of India (PGCI) te’n Corporate Social Responsibility (CSR) tungtawn in Manipur Health Dept. adia Ambulance 11 a piakkhiak-te uh Chief Minister O. Ibobi in Kangla mun ah tuni’n khahkhia hi. Bolero Ambulance-te emergency hun a life support tawh kithuah PHC tuamtuam – Khoupum, Oinamlong, Nunga, Noney, Tengnoupal, Tadubi, Khumbong leh Tamenglong district hospital, Jiribam Sub district hospital, Thoubal District hospital leh Bishnupur hospital-te ah zat hiding in gen uhi. Hiai hun Dy. CM Gaikhangam, D. Korungthang, Minister (Health), Chief Secy. O. Nabakishore, Vineet Joshi, Commissioner (Power), P.K. Singh, Commissioner (Health), Health Dept. leh PGCI official te’n uap uhi.
Police custody ah ni 14 sung om ding
Imphal, Nov-26: Chief Minister O. Ibobi in Kangla a Ambulance khahkhiak zawh in media-te tawh kimuhna hun ah UNC President Gaidon Kamei leh Info. & Pub. Secy. Sankhui Stephan-te tungah dan tawh kituak a action lakna dia process kipan a, thunung thu ma omlou a mi 2-te khahkhiak ding gen khak hilou chi hi. NH-te ah blockade bawl a ngawh a om UNC member dangte matkhiakna dia panlak hi a, govt. in UNC leader-te kia hilou in blocakde bawlna a mimal kigolh-te tungah leng action la ding a, anti-social organization gum utlou himahleh lauhna ziak a gum kha-te hihnat khak theih ziak in NH-2 in a tawt khak Imphal-Dimapur lampi ah security khauhsakna di’n govt. in panla ngeilou a, Centre tawh kithuzak in NH-37 a Jiribam tawh in Imphal-Silchar lampi tungtawn a van tuamtuam laklutna dia panla uh hi’n leng taklang hi.
Huailou in Imphal West Police te’n Pheidinga mun ah zan in UNC President leh Info & Pub. Secy. a matkhiak uh sawtlou nungin Imphal a Judicial Magistrate First Class ah dinsak hi uh a, huai hun ah Court in Police custody ah ni 14 sung om ding in thutan khum a, Dec 8, 2016 in mi 2-te Senapati CJM mai ah kilang nawn ding uhi.
Bandh in hindan nawngkaisak
Imphal, Nov-26: UNC makai-te mat a om mawhpaihna leh khahkhiak ding phutna in Naga bial district 4 –Senapati, Tamenglong, Chandel leh Ukhrul ah zan nitaklam dak 4:00 apan UNC leh Naga Civil orgn. tuamtuam te’n dakkal 24 sung bandh a puang un hindan nawngkai sak a, education institution telin dukan, dawr, sumsinna inn leh govt. office-te kikhak vek hi. Bandh supporter te’n Noney Bazar, Nungba Bazar, Tamei bazar, Tamenglong bazar, Khongshang, Lukhambi, Haochongetc telin muntuamtuam ah tyre hal banah sing leh suangtum zangin lampi khak uhi. Mao bazar a truck tang te’n bandh supporter-te lauh ziakin Kohima lam ah kik uh a, bandh supporter te’n Imphal zuan Electric transformer pua truck 2 a taisuak ding kham uh a, District HQ 4-te ah bandh sung in buaina thupi lua omlou hi’n gen uhi.
Huailou in Senapati HQ ah UNC, District Apex Orgn., Tribe Hohos, ANSAM, NWU, NPMHR(S), NPLF(M) leh regional frontal orgn. te’n tuni’n joint emergency meeting nei uh a, huai hun ah tunitaklam dak 4:00 apan dakkal 48 sung a thunung thu ma omlou a UNC a President leh Info. & Public Secy. khahkhiak ding thutawp pia uh a, khah khiak louh ziak a thil deih huailou a tun leh O. Ibobi govt. in mawh akipuak ding, Nov 10, 2016 ni a UNC President Council Meeting leh Nov 25, 2016 ni a meeting hun ah thutanna pomkip din theisak thak uhi.
Ambush ah para commando 5 liam: PLA-te kipuang uh
Imphal, Nov-26: Sajik Tampak gei a Indo-Myanmar gamgi ah tuni’n helpawl hiding a gintak te’n patrolling a pai Para Commando-te ambush na uah commando 5 liam uhi. Akigendan in tuni zinglam dak 9:50 velin helpawl te’n Sajik Tampak a Aishi village gei a Indo-Myanmar gamgi a border pillar No. 51 lakah Para Commando-te patrolling pailai in IED bomb hihpuak in thau hoihtak tawh kap uh a, huai ah para commando 5 liam uhi. Para Commando leh helpawl-te minute bangzahhiam kikaptuah in security force tunbeh nung in helpawl-te gamlak ah kihemmang uhi.
A liamte Naik Rakesh Thakur, Lance Naib Vikram Salunke, Lance Naib Pankaj Singh, Subedar Balwan leh Lance Naib Loyang Seru-te Army Helicopter zang in Army hospital tut hi uh a, Lance Naib dinmun lauhthawng huai hi’n gen uhi. Thiltung tawh kisai in RPF-te kipuang uh a, CorCom in RPF armed wing PLA nuai a ‘252 Mobile Battalion’ te gamtatna hi’n taklang uhi.
JNIMS OPD Ward ah grenade kikoih
Imphal, Nov-26: Porompat a JNIMS hospital ah tuni zinglam dak 9:30 velin OPD ward a elevator gei ah polythene bag sung a handgrenade kikoih muhkhiak in om hi. Police-te theihsak ahih dungzui in Porompat Police leh Bomb expert te’n grenade vala khia uhi.
Thiltung tawh kisai a JNIMS Director Laishram Deban in mipi vaulau sang in Director office ah thil omdan gen zaw ding in theisak hi.
SH tawh kisai in govt. nawh sawm
Sadar Hills, Nov-26: Sadar Hills Democratic Party (SHDP) te’n Kangpokpi a LNC Hotel ah amasapen ding in tuni’n joint meeting nei uh a, huai hun ah SHDP te’n akintheipen a full-fledged district a Sadar Hills puankhiakna dia state govt. nawh ding leh Poudel Basti ah Nov 16, 2015 ni a Nepali-te tenna inn halsiat a om mawhpaih din thupukna bawl uhi. Huai tawh kisai a SHDP thupuangtu Lunthang Haokip in Nov 2, 2016 in Sadar Hills thubuai tawh kisai a Sadar Hills ADC member lounge a meeting hun ah thupukna pomkip uh a, state govt. in kimualphou sakna leh kikhemna khawlsak in tangtun dia chiam dungzui in a Sadar Hills full-fledged district a puang din theisak uhi. Sadar Hills Autonomous District Council sung a community teng in nam tawh kisai a gamtatna ah kigolh lou ding in leng ngetna bawl hi. Akigendan in Nov 18, 2016 ni a Congress Councillor 20 te’n Congress apan kitawp zawh nungun Sadar Hills Democratic Party phutkhia uhi.
Youth Gospel Music Festival kipan
Sadar Hills, Nov-26: Kangpokpi a KBC Centre Church mun ah Youth Dept., KBC-te saina in ‘Mission through Music’ chih thupi a zang in Nov 27, 2016 tan daih ding Youth Gospel Music Festival (YOGOMUF) kipan a, Rev. Y. Haokip, Chairman, Theological Board, KBC in zan in hong hi. YOGOMUF sung in Gospel music competition, Zaithem competition banah mi tuamtuam te’n thugenna nei ding uh a, Nov 27, 2016 ni a YOGOMUF khakna hun ah Chief Guest in Heshi Haokip pang ding a, Functioal President in Boishi Haokip, Women President KBC leh Guest of Honour in Juliana Dougel, Lamkholhai Haokip, Joicy Hangshing-te pang ding uhi.
Numei 1 telin helpawl a tel mi 3 man
Imphal, Nov-26: Imphal East District Police Commando leh Assam Rifle Combine team te’n Koirengei area ah tuni’n frisking leh checking a bawlna uah KNF(N) a member hidia gintak Kimboilhing Kipgen @ Senu (28) w/o Letkholen Kipgen @ Lelen of Bongbal Khullen village man uh hi’n a, Combine team mahin tuni zingsang dak 7:00 velin C. Zoulen Village a search operation a bawlna uah KNF(N) a active worker 1 man uh a, amah apan demand letter print na a kizang Computer set 1 leh document ginlelh huai hunkhop mukhia uhi. Huailou in Imphal East Police Commando leh 45-A/R combine team te’n Mantripukhri-Ahallup road ah ZUF a active member Taluatpou Kamei @ Johnpou (35) of Jeilatjang Village mankhia uhi.
TUNI THUPI:
“Thubuaite leng a ngaihtuah ding uh ahi; ka ngaihtuah bang zelin a ngaihtuah ding uh: -Ezekiel 44:24a
EDITORIAL:
UNC President mat tawh kisai
United Naga Council (UNC) President Gaidon Kamei leh Information & Publicity Secretary Sankhui Stephen matna tungtang ah gen-le-sak ding tamtak om hi. UNC in Sadar Hills leh Jiribam pen full fledge district suah ding chih state government in thuchiam aneih ziakun UNC-te’n ngaithei lou in valhtheih lou uhi. UNC makai mi 2-te zanin Manipur Police commando te’n Senapati zuanlai a tuanna gari uh Bolero tawh mankhawm uh chih ahi.
United Naga Council in Manipur state lutding National Highway omte ah economic blockade a bawlkhum uh tuni chiangin ni 26 chingta hi. Huchi kalah, UNC Chief Gaidon Kamei leh mi poimawh Chandel mi Stephen mat a om in hiai bouruak susang mahmah a, meikuang laka khawvaktui va buahbeh tawh kibang in om a, Nagate’n dakkal 24 sung amau bial ah total shutdown neih beh lai uhi. Manipur a Naga-dominated area i chih chiangin lian huntawk mahmah a, Chandel, Tamenglong, Ukhrul leh Senapati huam a, Manipur phaijang lutna ding bial teng huam khavek mawk a, phaijang a omte gelgawt theihna neikha mawk uhi. Economic blockade aneih uh hunchiam omlou hi a, totol shutdown aneih ubel tuni nitaklam dak 4:30 pm a beiding chih ahi. Amaute’n economic blockade abawl ziakun mipi’n haksatna gen vuallouh tuak uh a, total shut down aneih uh dakkal 24 sungin bel Manipur mipi bangmah chi tuanlou ding uhi.
UNC Chief Gaidon Kamei leh Sankhui Stephen matin bang impact hon nei ding hiam chi hi thei naikei ahih ziakin Government in ahihding him ahi hi. Tutung a Sadar Hills leh Jiribam issue tawh kisai a UNC in hunchiam omlou ‘economic blockade’ hon bawl un banglam kawm sawm ahidia chih theih in om hi. UNC inleng hihkhial kha maithei a, Sadar Hills District ngen pawlin lah economic blockade bawlding a chih uh khawlsanta a, huchi kala UNC in naktak a Manipur phaijang bial hon bawlkhum uh a ziak om dingin gintak huai hi. Manipur Chief Minister leh Dy CM in Ukhrul a building thak tuamtuam kibawl omte honkhiak ding a chih uh dal uh a, Nagate’ khauhpaina ziak banghiam om dingin kilang hi. Th Muivah in Manipur state hong sik ding phallouh ziakin Mao gate ah Manipur police commando te’n student 2 a kaplup a om tawh kisai thukkikna om tou den hiam chih uthuai hi.
State Government in UNC Chief leh Information Secy amat pen ahih ding him uleng ahi a, hih haklua uleng himaithei uhi. State government a zoina ziaka nam chih leh sa chih in ngapthawh gawp leng hikha maithei hi. Manipur state sungah security force kiningching mahmah om a, Jiribam line leh Dimapur ah security kikhungdim dingin leng kiningching om hi. Kawl apan suang hon khukkhum ding uh chih lauhna ziak lel a security personnel duty ngamlou om leh tuate pen a sepna uah chinlouh chih theihin om hi. Security personnel Police/ IRB/BSF/ CRPF/ Assam Rifles leh adangdang a tampi om a, UNC leh civil society organisation tuamtuam in National Highway ut-le-dah a a control uh state adingin zakdah huai mahmah hi. Hiai pen government a ding inleng minsiatna tawp hi a, kintaka state govt, UNC leh Centre govt palaite’n kihoulemna a neihkim uh deihhuai a, huai ahihkeileh mipi’n state govt buluh dingin kilangta mai hi.
All Naga Students’ Association Manipur (ANSAM) telin Naga sunga social organisation tuamtuam te’n UNC makaite matna a mawhpaih uh chih i thei hi. Tua chauh hilou in, National Highway- Jiribam line leh Dimapur line ah zanhak zekin UNC volunteer-te duty den uh chih ahi. Hiai dan a thil hongpai leh hong hoih hetlou dinga, nam thil (communal line) ah hong om dinga, thunuam loupi hong om khak ding lauhuai mahmah hi. State Government in leng UNC makaite khahkhe mai uhenla, Centre government theihpihna tawh kihouna pichingtak nei mai le uh chih deihhuai hi. Bangteng hileh, Manipur state lutding National Highway peuhmah singtangmite’ khutnuai ah om veve ahihdan leng state government leh phaijang mite’n atheih uh deihhuai mahmah hi.
No comments:
Post a Comment