HEADLINES:
April 1, 2016 apan India pumpi ah GST zat hiding
GST rate dingin 5%, 12%, 18% leh 28% pomkip hita
 |
| http://img.etimg.com/ |
New Delhi, Nov-3: Central leh State apan GST Council member-te’n New Delhi ah tuni’n meeting poimawhtak nei uh a, kumnawn April 1 apan gamsung pumpi a zat di’n GST rate 5% , 12% , 18% leh 28% pomkip uhi. Gamsung mipite adia niteng poimawh (mass consumption item) ah 5% tax lak hiding a, GST Act zat hun chiang in state government in tax tuam latheilou ding a, revenue amansuahte ditkikna di’n centre apan compensation ngah ding uhi.
GST council meeting zawhsiang hun ah Finance Minister Arun Jaitley in thuthaksaite kimuhpih a, state government kianga compensation piakna di’n Rs. 50,000 crore poimawh ding chi hi. Mizawng leh gentheite khualna ziakin state leh centre govt. in tax tuam la nawnlou ding uh a, Consumer Price Index basket nuaia foodgrain omte ah tax lak hilou ding a, GST tungtawn in vanman khang etkai baihlam mahmah ta ding chi hi. High-end car leh tobacco product banah dawntheih(aerate drink) ah Tax rate sangpen ding a, tulel a tax rate 31% lak a omte leng GST zat hunchiang in 28% hiding a, vanmantam (luxurious item) khenkhat leng 18% tax bracket ah omding hi’n Finance Minister in gen hi.
Zingchiang tan daih ding GST Council Meeting hun ah state government kianga compensation piak dingdan leng genkhawm in om a, kum 5 sung in GST Council deihna bang a paisak hiding hi. Ni nih sung Council Meeting huna thupukna kibawlte, tunung in Parliament ah pomna bawl di’n Finance Minister in pawlut ding a, Parliament in pomna aneihkhit chian gin State Assembly teng inleng pomna abawl uh ngai ding a, huai pomna bawlte’n April 1, 2017 apan GST Act zang theita ding uhi.
LOCAL NEWS:
DEO/DC makaih in live talk show
Lamka, Nov-3: Dist. Election Officer Lunminthang Haokip, IAS makaih in Nov. 7, 2016 nitak dak 6:00 in New Lamka a Dorcas Hall Mini- Auditorium, ah ‘electoral awareness campaign’ dan in EVM familiarization & mock poll tawh kisai live talk show om ding a, huai ah host in Chunglenmang, MCS, SDO/Henglep leh co-host in Priscilla Lalliensang pang ding uhi.
Lieutenant apan Captain in kaisang
Lamka, Nov-3: P. Esther Vungngailun Zou d/o (L) P. Kapchinlam of Kamdou veng in INS, Kasturi, Lonavla, Pune a Military Nursing Services (MNS) a sem zan in Lieutenant rank apan in Captain kaisang chihthu kiza hi.
One day legal awareness campaign
Lamka, Nov-3: CCpur Dist. Legal Services Authority in National Legal Services Authority thupiak dungzui in Manipur State Legal Services Authority sensakna in Mass Door-to-Door campaign aneih uh zou in tuni sunnung in Tuibuong a Dist. & Session Judge ah VDF leh Police Personnel-te adia one day legal awareness tawh thuah in khakna nei uh a, huai hun ah Basulal, MPS, SDPO/CCPur leh CJM/CCpur Letkho Kipgen te’n uap in thugen uhi. Mass door-to-door campaign in ahihleh khawsak haksa diakte’n dik leh tanga vaihawmna a ngah ding ban uah legal service-te apan athawn a legal aid ngah theih ahihdan theihsakna dia asai uh hi’n kigen hi.
Saidan Model Village hon hiding
Lamka, Nov-3: Saidan Community Hall ah Nov. 7, 2016 zinglam dak 10:30 in MC Mary Kom, MP (Rajya Sabha) in Sansad Adarsh Gram Yojana (SAGY) nuai ah Saidan Model Village hong ding hi. Huai ah MC. Mary Kom, MP, K. Onler Kom, Managing Director, Mary Kom Regional Boxing Foundation, National Game Village, Imphal leh Rohminglien, Chief of Saidan te’n thugenna nei ding uh a, Saidan HYA Cultural Troupe te’n cultural dance show ding ban uah Saidan Various Artists apan Special No. omding hi.
Singing Festival-cum-Seminar, 2016
Lamka, Nov-3: Young Christian Org (EOC) saina in Nov 4- 6, 2016 sung Hill Town a EOC Central Church ah Singing Festival-cum-Seminar, 2016 omding a, seminar ah Rev. Dr. Kh. Khaizakham leh Mrs. Tracy Kipgen in sinsak ding uhi. Program sung in Rev. Harry Muanlal, Executive Director, EOC; Pastor SL Minlun; Rev. L.Khupboi Vaiphei, Director Ministerial; Rev.Dr. Kh. Khaizakham leh Rev. Dr Th.Lamboi Vaiphei te’n Pathian thugen ding uhi. Khaw tuamtuam akipan Pathian phatna leh Choreography om ding a, Nov. 6, 2016 nitak in Rev. Lamkhogin Khaute in program khak ding hi.
Salphate’ zahna pumbuk hong ding
Lamka, Nov-3: JAC-AATB makaih in Nov. 4, 2016 nitak dak 6:00 in Hiangtam Lamka a Salphate’ Zahna Pumpuk (Martyrs’ Shed) kilamthak honna om ding a, Joseph Lalrothang, President, Hmar Inpui in ribbon cutting nei in Rev. Lalhmuoklien President, Christian Goodwill Council in hasotna thugen in lan ding hi.
Salpha innkuan-te makaih in pak piakna om ding a, Hiangtam Lamka V/A- te apan thu genna om ding ban ah H. Mangchinkhup, Chief Convenor, JAC-AATB in declaration bawl ding hi. James YT Thadou, President, Thadou Inpi, Manipur; Joseph Lalrothang, President, Hmar Inpui; Lalrinliana, President, Mizo People Convention leh B. Dongzalian Simte, Chairman, Zomi Council te’n thugen ding uhi. Nitak dak 6:00 akipan inn mahni innkong chiat ah salphate’ zahna in candle de dingin JAC-AATB in ngetna bawl uh a, pumpuk honna ah tamtheipen paikhawm dingin chial uhi. Salphate’ Zahna Pumpuk bel Oct. 8, 2016 zingsang baihtakin pawlkhat in a haltum uh ahi.
HSA in CMO thak kipahpih
Lamka, Nov-3: Hmar Students’ Assn (HSA) JHQ/CCpur makaite’n tuni’n CCpur dist. adia numei CMO masapen Dr. Kim Simte a office ah kimuhpih in kipahpihna in Thangsuo puan silhsak uhi. Jr. Amo, Secy (Info & Pub) in kipahpih uh ahihdan gen in, maban ah na tamtak a sepkhiak deihthu gen a, Lalthanzau, President leh Jeffery, Secy te’n puan silhsak uh a, huai hun ah HSA CCpur College unit makaite leng tel uhi.
Henglep SDO in panlakdan taklang
Lamka, Nov-3: Chunglenmang Kipgen, MCS SDO/Henglep in Bijang a SDO/Henglep office camp a ama office chamber ah tuni’n election ding tawh kisai special summary revision a sepkhiakte pulak hi. Henglep Sub-divn huamsung a polling station 29 ah electoral roll bawldikna din form 954 hawmkhia uh a, Form 6 (addition) la 679, Form 7 (deletion) la 60, Form 8 (correction) la 184 leh Form 8 (A) (transposition) la mi 34 om hi’n gen a, Form 7 (deletion) late’ adin Nov. 4, 2016 tan in hearing neih hidin gen hi. ERMS software tungtawn in data entry pailel in Nov. 18, 2016 tan a zawhsiang hiding in gen a, Oct. 27 & 28 in SSR tawh kisai general hearing neikhinta uh hi’n leng gen hi.
Guta te’n Bolero gari gumang
Lamka, Nov-3: Police apan kizadan in tuzing baihtak dak 3:30 velin gutate’n Samu Singh of Hmarveng’ zatlai bolero gari (saloon colour) Reg. No. (MN02A-3176), chasis No. Y2M71507, engine No. ENDX82922 gu uhi. Akigendan in gutate’n inn kongkhak apawlam ah kalh uh a, inn neitute’n gari gin azak un delh mahle uh inn kongkhak kikalh ziakin delh suak theilou uh a, gutate’ gari in taimang uh hi’n kigen hi. Gari’ neitu in Police ah report bawl a, Police te’n General Diary (GD) entry bawl in suizui uhi.
EEVFAM team te’n Lamka hongpha
Lamka, Nov-3: Babloo Loitongbam, Human Rights Activist makaih in Extra Judicial Executions Victims Families Assn. Manipur (EEVFAM) team te’n tuni zinglam in Lamka hongpha uh a, Sielmat a RWUS office ah RWUS makaite leh EEVFAM family-te’ kimuhpih uhi. Huai ah Supreme Court in EEVFAM v/s GoI writ petition (Cri) 129 of 2012 a case omte kansui uh a, EEVFAM in case 34 lak ah case 12 document kimtak kaikhawm uh a, EEVFAM family, civil society-te leh NOG te’n case document kimloute Nov. 15, 2016 tan in CCpur Dist. Coordinator Mary Beth (8974748864) leh Ronica (8452868517) thuzak ding in ngen uhi.
Block Level Neighbourhood Youth Parliament
Lamka, Nov-3: Nehru Yuva Kendra (NYK)/CCpur panpihna leh Bijang Youth Club saina in Bijang Community Hall ah Nov. 5, 2016 zinglam dak 10:00 in ‘Capacity Building & Ethical Voting’ chih thupi zang in Block Level Neighbourhood Youth Parliament omding hi. Huai ah James Doujapao Haokip, SDO/BDO Tuibong leh Jangminlen Lupho, SDC, DC’s office in thu gen ding hi.
SLPYF Meet-2016 nei ding
Lamka, Nov-3: South Lamka Presbyterian Youth Fellowship (SLPYF) Meet-2016 hongtung ding Nov. 4-6, 2016 sung Mualtam ah om ding hi. Hiai hun in Pastor K. Muankim, Pastor G. Vungsangmung leh Intern Pastor TK Shyam Valte te’n "Pathian adia mi Siangthou leh mi Hangsan" chih thupi a nei in thutak genna nei ding uhi.
Kha 1 sung in positive 8 mukhia
Lamka, Nov-3: Dist. Malaria deptt. te’n Oct. 2016 khasung in damlou mi 1639 sisan test uh a, malaria positive 8 mukhia in huai lak ah malaria PF 6 om hi.
REDP training pailel
Lamka, Nov-3: Bijang a SBI-RSETI temporary office ah REDP tawh kisai in ni 12 sung daihding free short term course pailel a, mun tuamtuam apan mi 16 tel uhi. Training ahihleh Oct. 28, 2016 in pan uh a, CT Lian Guite, Faculty, SBI-RSETI in sumdawn dingdan tawh kisai theihtuak omte sinsak in Nov. 10, 2016 in zou ding uhi. November 2016 sungin kum 18-45 kikalte adin beauty parlour management leh basic photography & videography lunglutte a dingin free short term course om ding a, Lhainunnem in beauty parlour, Lalboi Samte in photography leh Letthang Doungel in videography tawh kisai sinsak ding uhi.
SUUNNA:
Goihman (90) m/o Upa T. Vumchinpau of Lennuam veng, Bungmual zan nitak dak 11:00 velin teknat in si a, tuni’n Bungmual hanmual ah kivui hi.
Niangkhochiin (85) w/o (late) Upa Chinzakhai of Daijang village tunitak 6:30 in teknat in si a, Nov.4 in Daijang hanmual ah kivui ding hi.
Ramhlunsang (31) s/o Raldotawn of Serhmun a sanggamnu tawh Oct 29, 2016 a Parbung a hawh, Tuibum lui ah kia a, mipi’n zong in zan sunnung in Sitam khawkiang ah aluang kimu hi. Akiakna mun apan km 7 vela gamla ah kimu hi’n kigen hi.
Pauliankhup (3) s/o Khamsuankap of Tangpizol, Singngat sub-divn. tuni zinglam in akhua uah Shaktiman gari a tuanglai kia a, Singngat PHC ah puak himahleh damzoulou in lampi ah si hi.
IMPHAL NEWS:
Manipur ah RCS scheme zatna ding in MoU kai
Imphal, Nov-3: Manipur ah Regional Connectivity Scheme (RCS) zat ahihna ding in Chief Minister Secretariat a CM Office Chamber ah tuni’n Chief Minister O. Ibobi leh Union Minister of Civil Aviation Ashok Gajapathi Raju Pusapati maiah Ministry of Civil Aviation (MoCA) a Jt. Secy, Manipur a Transport Dept. a Commissioner leh Airport Authority of India (AAI) Chairman te’n MoU suaikai uh hi’n kigen hi. Huai scheme tup pipen ahihleh mi vantang te’n air connectivity a zat theih ding uh leh a lemtanna dia Central govt., State govt. leh Airport Operator te’n regional route-te ah airline operate man concession a bawl ding uh, airline operation man leh revenue muh ding zah a tung keileh Viability Gap Funding (VGF) a om ding chihte tel hi. Akigendan in India govt. nuai a MoCA in National Civil Aviation Policy 2016 (NCAP) pan uh a, huai tungtawn in fiscal support leh infrastructure development tungtawn a regional connectivity khansak ding, integrated eco-system patkhiak in Civil Aviation Sector leh tourism a khangsak ding banah employment tamsak ding a, huai in akituak a regional growth tun ding a, huai tawh kisai a MoCA in India ah Regional Connectivity Scheme pankhia uh hi’n kigen hi. Hiai hun Dy CM. Gaikhangam; Chief Secy. O. Nabakishore; Dr. Kh. Ratankumar Singh, Minister (Transport) leh official tuamtuam te’n uap uh hi’n kigen hi.
Jiribam ah Nupa sisa mukhia
Imphal, Nov-3: Imphal East district a Jiribam Sub-Division sung a Chapanagar village ah Jiribam Police Station ah posting a om police numei khat leh a pasal a tenna inn uah sisa a muhkhiak in om uhi. Police numei ahihleh Chirom Ningol Sanjita (30) @ Thoibisana Devi leh a pasal Langpoklam Boyai Singh (35) s/o Kunjamohan Singh hi a, nupa te’n tanu kum 2 ding khat nei uh hi’n kigen hi. Thusuak in a gendan in Boyai Singh in a zi a thah nungin room sung ah amah kikhai lum hiding in ngaihdan kigen a, bangziak a nupa-te kithat uh hiam leh bang hun a thiltung hiam chih theih chet hilou hi’n taklang uhi. Nupa-te innkuan te’n zingsang a duty dia Thoibisana kuan gige himahleh nibang zahhiam paisa apan a muh nawn louh ziak un police-te theisak uh a, nupa-te inn a sunglam ah kikalh hong uh a, lupna tung ah Thoibisana sisa leh a pasal kikhai lum sa in mukhia uh a, thiltung tawh kisai in Jiribam Police te’n case chiamteh uh a, misi-te Imphal ah postmortem bawl ding in pawkhia uh hi’n kigen hi.
Manipur telin mun khenkhat ah Cyclone storm om thei
Imphal, Nov-3: Regina Hongray, Dy. Secy. (Relief & DM), Govt. of Manipur in tuni a thusuah a bawlna ah MHA a Control Room Office (COMA) in Observation nunung pen leh Satellite imagery report tungtawn in Manipur, Mizoram, Tripura leh mun khenkhat ah Nov 5 & 6, 2016 in vuahpi banah Cyclone storm omthei chih theihsakna bawl a, huai dungzui in district teng a Dept. Committee te’n amau bial enkai leh thutak lakhawm ding banah kivenna dia panla ding in theisak hi. Huai tawh kisai a thuthak leh thukin diak-te State EOC Ph. No. 0385 – 2450301, 2443441, 2444470 leh Fax No. 2452383 ah theihsak ding chi’n taklang hi.
Mi 200 vel food poisoning
Imphal, Nov-3: Bishnupur district a Thanga area ah mi 200 vel ding-te Oct 31, 2016 ni a community feast nung in a nek-te uh gui (food poisoning) uh a, Thanga Primary Health Centre ah semtu banah medical facilities kiching om kei mahleh huai mun ah etkol in om uhi. Huai tawh kisai a H. Kulachandra, Secy., Thanga Kendra Development Committee in media-te tawh kimuhna hun ah Oct 31, 2016 ni a community fest zawh nung a nitak in numei leh naupang telin mi 200 vel ding te’n luna leh chi sa nei in a thil nekte uh law khia ua, state govt. in ‘adulterated food item’ a etkai louh ziak in food poisoning thuakte panpihna leh compensation a piak ding uh chi hi. Thanga Primary Health Centre ah medical facility a kimlouh ziak in damlou te’n amau kingaih tuah in Imphal a RIMS, JNIMS leh private hospital khenkhat ah ki enkol sak uhi.
Petrol pump-te ah mi tam
Imphal, Nov-3: IOC in ‘Expression of Interest’ tender a suah uh mawhpaihna a AMPPTA-te indefinite strike banah United Naga Council (UNC) te’n Nov 1, 2016 akipan NH-te ah economic blockade puang in Oct 1 & 2, 2016 in petrol pump teng kikhak ziak in Manipur ah thautui kitasam a, Imphal ah tuni zingsang apan petrol pump-te kihong in thautui la ding gari tamtak kivual in mun khenkhat ah traffic jam hi. Pump khenkhat te’n ‘Petrol nil’ kigelh tak in diesel kia zuak uh a, pump khenkhat te’n dakkal bangzahhiam thautui a zuak nung un pump khak uhi. Huailou in Economic blockade ziak in NH-2 in a tawtkhak Mao gate leh NH-37 a mun khenkhat ah gari tang om a, Mao gate ah Oct 30, 2016 zankim a blockade kipat hun apan van tuamtuam pua gari 212 val tang a, NH-37 ah lampi hoihlouh ziak in Leingangpokpi ah gari 18 tang hi’n gen uhi.
State Congress te’n kiphinna nei
Imphal, Nov-3: Manipur Pradesh Youth Congress Committee (MPYCC), Manipur Pradesh Mahila Congress Committee (MPMCC) leh national Students’ Union of India te’n BT road a Congress Bhavan kong ah tuni’n kiphinna nei uhi. Huai tawh kisai a media-te tawh kimuhna hun ah Tilotama, President , MPMCC in a genna ah Ex-Serviceman Ram Krishan Garwal in One Rank One Post (OROP) pension scheme zat ding a phutna in amah kithat a, Congress Vice President Rahul Gandhi leh Senior Leader khenkhat te’n zan a Ram Manohar Loya Hospital ah Krishan innkuante veh a sawm hun uah Mandir House Police Station te’n a hentang uh mawhpaihna a kiphinna nei uh chi a, Centre ah Modi govt. thupiakna hentang uh chi’n ngawhna bawl hi. Mandir House Police Station ah Rahul Gandhi minute 70 val hentang in om a, huai ah Ram innkuante leng lentang a om uh chi’n gen hi.
Mat a omte bial in khahkhia
Imphal, Nov-3: Imphal East Police Commando te’n Oct 27, 2016 ni a Thangkhul Avenue a Fairy Land mun ah NSCN-IM cadre dia muangmawh mi 4 man in Lamphel Police Station ah pekhia uh a, Court of Judicial Magistrate 1st Class ah tunitaklam in mi 4 – Ningkhanngam Muivah (37) s/o M. Vareishim; Ramthem Muivah (35) s/o (late) Ronand Muivah; C. Phungshok (33) s/o (late) N. Phungshok leh Vivian Ruivah (40) s/o Tongsing Ruivah-te ding nawn uh a, huai hun ah mi 4-te Counsel Advocate H. Bisheshwari leh Advocate Mayonkui Ngalung-te ngetna Judge N. Lanleima in pomsak in bail Rs. 50,000 banah surety ding bikhiah in mi 4-te bail a khahkhiak hi’n gen uhi. Akigendan in mi 4-te Oct 28, 2016 ni in Court ah dinsak in om uh a, Court ah tuni’n a 2vei di’n ding nawn uhi. A innkuante un mi 4-te gospel singer leh musician hi uh a, Imphal ah la khum dia kuan uh hi’n gen uhi.
‘Run against Corruption’ om
Imphal, Nov-3: State Bank of India (SBI) te’n Oct 31-Nov 5, 2016 tan a ‘Vigilance Awareness Week’ a zat ding uh tawh kizawi tawn in tuni zingsang in ‘Run against Corruption’ campaign sai uh hi’n kigen hi. Akigendan in Chief Secretary O. Nabakishore in tuni zingsang in THAU ground ah run campaign khahkhia a, Khuyathong, North AOC leh Chingmeirong tawn in THAU ground tung kik nawn uhi.
TUNI THUPI:
“Aigupta gam akipan a honpi khepa Mosi lah a tanchin ka thei nawnta kei ua, chi’n, a lungtang uh Aigupta gam lam ah a nga nawnta hi.”
– Nasepte 7:40
EDITORIAL:
Banga i kinepna tuanding?
Kumnawn 2017 bullam in Manipur state ah assembly election om dinga, hiai ding tawh kisai in Iron Lady chih minvuah a om Sharmila telin politician hunkhop kisingsa mahmah uhi. Irom Sharmila makaih regional party in aw (voice) thupitak hon suah mahle uleng Manipur government thak adinkhiak ding uh thil gintak haksa mahmah dingin kilang a, national party Congress versus BJP mah hi veve di’n gintakhuai hi.
Manipur a regional political party minthang mahmah Manipur People’s Party (MPP) kichite O Joy in apawtsan apan ek kiatin kia uh chih theihin om a, tua chauh hilou in MPP ah leadership crisis nasatak om in, mi tamlou chik hong kikhenzak maimah uhi. Maban hun sawtlou ah state assembly election i maituah ding chih chiangsa ahi a, Election Commission official te’n election omna ding state 5-te khat-khit-khat in hong veh zihzehta uh a, election saitu dite’ lakah training tuamtuam hong pia uh a, dan leh thupiak dinmun telin official thil tuamtuam hun chihin etkai panta uhi.
Centre a vaihawmna lenlel BJP leh opposition Congress-te’n tuapan kum 3 nunga Lok Sabha election om ding mitsuan mahmah ding uh chih a chiangsa ahi hi. Prime Minister Narendra Modi’ government in bangchibang in development thil tawh kisai na asem a, gamsung humbitna dingin bang asemkhia a chihte mipil leh siamte’ etzui det ahi hi. Zanin Modi makaihin security tawh kisai adiakin Indo-Pakistan border a civilian mi hunkhop kaplupna tawh kisai leh zalentaka civilian-te Pakistani forces te’n a target-na thu uh kikupkhawmna om a, thupukna alakte uh mipi theihdingin puankhiak hikei mahleh, BJP government bel khauh pai mahmah dingin kilang hi.
Science & Technology, education, health, road & communication banah gamgi humbitna, phaijang bial leh singtangbial a khantouhna a kibang a om ding, China leh Myanmar apan North East state-te humbit ding chihte centre avaihawmna len BJP lungtup mah ahi a, huaite sepsuahna dingin nakpitakin kalsuan uhi. Hiai issue tuamtuamte chauh hilou in BJP in program leh policy tamtak abawlte uh hon semsuah laiding ua gintak hi a, BJP makaih NDA govt vaihawmna leng a ni ani in kiam tultul mai a, General election enkawm a state assembly election om theiliai dite amit suan uh poimawh hi.
Himahleh, Manipur state in chituamna mahmah neizel hi. Mipi’n Chief Minister Ibobi Singh makaih Congress ministry chimtak mahmah leng hikhathei a, ahih ziakin, BJP lam i etchiangin a khawn bawl upate uh mi thak lua om tuanlou hi. Chief Ministerial candidate theituk a dinmun nei Th Chaoba ahihleh MP lui himahleh boycott in ana om khinta a, mi lun dang Y. Irabot, N Biren, Francis Ngajokpa, N Loken ahihkeileh anungzui uh mi tuamtuam leh tallangte lah Ibobi Ministry nuaia khawsa den hi uh a, sapte’ thupil in ‘Old wine in a new bottle’ a chih utawh akibang thou diam?
Ibobi ministry in na tamtak semkhial a, corruption ah nasataka kigolhkha i chih leh, Ibobi nuai a semkhate mahin BJP ministry hon bawlkhe le uleng Congress ministry tawh dinmun kikhat hong hi thouthou ding uam chih ngaihtuahna ah piangthei khat om mawk hi. Assam state ah kum tamtak chief minister ana len Tarun Gogoi makaih Congress ministry khetkhiak hi a, Union Minister hihna apan Assam Chief Minister len dingin Sarbananda Sonawal mawhpuakna piakin om hi. A cabinet-te’ lakah Tarun Gogoi nuaia om kha makai poimawh 1/2 om mahleh atamzaw 90% te melthak ngen hi uhi.
Manipur BJP dinmun i et chiangin senior politician ngen makaihna hong hi a, BJP in vaihawmna hon len le uleng mipi adingin hamphatna bangteng hong lut tuandia chihtheih dinmun ah om mawk hi. BJP Manipur a President thak K Bhabananda bel mi lar hilou a, aman bangchi banga Th Chaoba Singh apan President hon lathei mawk hiam chih leng om lai hi. Tua ziakin BJP leh Congress in ‘strategy leh assessment’ abawldan uh hong nalh tuak mahmah ding bang hi. Term thak ah Congress hia, ahihkeileh BJP in vaihawmna len le uleng banga mipi’ adia i kinepna ding om tuak chih ngaihdan mi tamtakin nei uhi.
No comments:
Post a Comment