Chingmuan’ sisa in kimukhia
Lamka, Nov-4: Chingmuan (44) w/o Langlam Ngaihte of Singngat apaisa Nov 1, 2016 zinglam dak 10:00 velin dukan a thil leiding akuan a omna kitheilou a, Singngat V/A leh ZYA makaih in khawsung a pawl tuamtuam leh mipi’n khawkim khawkiang azon nung un tuni zinglam in Singngat- Sumchinvum Paldai lui ah awklumsa in kimu hi. A’ luang tuni mah in Singngat hanmual ah kivui hi.
HEADLINES:
Dual Control Issue ah Nov 24-25 sung Meeting omnawn ding
GST Council palai-te’n kilemna piching bawltheilou
New Delhi, Nov-4: Goods & Services Tax (GST) Council palai-te’n New Delhi ah zan apan meeting nei uh a, huai hunsung in thupoimawh tuamtuam 10 vel saifel in om mahleh, kilemna piching bawltheilou uhi. Tutung a saifel louh a omte November 24-25 a GST Council Meeting om nawn hunah kikum khawm ding uh a, huai hunma, Nov 20 in State Finance Minister te’n GST tungtang ah meeting neikhawm ding uhi.
Finance Minister, Arun Jaitley in GST Council Meeting tawh kisai agendan in ‘dual control issue’ ah centre leh state palaite’ deihdan kibang theilou chi a, taxation officer-te’n tax tawh kisai a etkai uh poimawh a, huai sepsuahna di’n guideline kichiantak bawlkhiak poimawh lai ding chi hi. GST a state palai-te’ deihdan zuih theilouh ding hi’n leng Finance Minister in gen a, indirect tax regime enkai di’n thuneitu nih omtheilou ding chi a, state leh centre palai-te’ kalah huai tungtang a kituahlouhna liantak om hi’n gen hi. GST nuaia tax exemption limit Rs. 20 lakhs hiding a, tunung in draft 4 vel genkhawm dia bikhiah a omlai hi’n gen hi.
GST draft rate omlai teng, state government kiangah akisaipih Finance Minister tungtawn in thonkhiak hiding a, amaute’n November 24 & 25 a genkhawmna aneihkhit chiang un, GST Council ah draft pekik ding uhi. Industry leh Tax petute etkaina di’n ‘tax assessment software’ zat hiding a, November 16 a Parliament Winter Session om chiang in GST legislation passed a om ding ahihdan Finance Minister in gen hi. Zan a GST Council Meeting kipatni in Centre leh state palai-te’n tax rate 5%, 12%, 18% leh 28% in kilemna bawlthei uh a, mass comsumption item-te ah 5% tax lak ding, packaged consumer goods ah 28% lak ding in pomkip uhi.
LOCAL NEWS:
DC in beneficiary-te sawlkhe ding
Lamka, Nov-4: Lunminthang Haokip, IAS, DC/CCpur & Chairman Dist. Health Society/CCpur in Nov.5, 2016 zingsang dak 6:00 in CCpur College nung a Youth Hostel ah Khumanlampak Main Stadium, Imphal a Grand Free Hearing Aids distribution a telding CCpur Dist. apan beneficiary-te sawlkhe ding hi. Huai hun ah Dr. Kim Simte, CMO/CCpur leh Dr. J. Songoukham Samte, Med Supdt. Dist. Hospital te’n leng gari bangzah hiam flag-off ding uh a, beneficiary leh official a hawh ding teng gari 10 val hi’n kigen a, DC, CMO leh Med Supdt. te’n Imphal ah beneficiary 466-te makaih ding uhi.
Convention Book House kum 50 ching
Lamka, Nov-4:Evangelical Baptist Convention (EBC) adia kahiang poimawh mahmah ‘Convention Book House’ kichi kum 50 chinna tuzing in Dorcas Jubilee Guest House a Mini Auditorium hall ah zat hi a, huai ah EBC saptuam sunga makai tuamtuam tel uhi. Rev. S. Vung Minthang, Gen. Secy, EBC in golden jubilee souvenir hong in Pathian kiang ah lan a, Upa L. Vungzamuan, Manager in book house tawh kisai pulak in hiaitan tunna dia panla tuamtuamte memento pia in staff te’n lapawl sa uhi.
EBC saptuam in kum 1964 in printing press adin committee bawl a, kum 1966 in Kolkata apan Khawl-ha ten thawh lei uhi. Kum 1995 in Evangelical Book House in khek uh a, kum 2000 in Computer leh Offset Printer in lei uhi. Kum 2015 in Evangelical Book House leh Convention Press pen koihkhawm in amin Convention Book House in khek uh hi’n kigen hi.
Auto driver-te enchian nawn
Lamka, Nov-4: Lamka Police station ah tuni zinglam akipan Zion Veng-Pethuel, New Lamka line a Diesel Auto driver-te’ enchian uhi. Diesel Auto driver khat in Oct 13, 2016 in student numei naupang 3 puakmang a sawm thu ah Police te’n kansui in CCpur Dist.Diesel Auto Owner’s Assn.(CDDAOA) makaite tawh pangkhawm in Diesel Auto driver-te a etchet nung un Diesel Auto line tuamtuam a taite leng enchian zel uhi.
Kha 1 sung in gari 137 kibehlap
Lamka, Nov-4: Dist. Transport office ah Oct. 2016 sung in gari chi tuamtuam 137 registration kibawl a, huaite truck (heavy) 2, truck (LGV) 1, bus 1, van 2, car 8, jeep 4, maxi cab 1, auto 13, 2-wheeler 103 leh adang 2 tel hi. April-Oct. 2016 sung in gari 842 registation kibawl a, truck (heavy) 3, truck (LGV) 44, bus 1, van 23, car 80, jeep 27, maxi cab 2, auto 54, 2-wheeler 602 leh adangdang 6 om hi. Huailou in Oct. 2016 in revenue Rs. 8,16,223/- mu uh a, April-Oct. 2016 sung in Rs. 53,38,465/- mu uhi.
Annual Day Cum cultural meet
Lamka, Nov-4: Nghathal a SSPP Residential School campus ah tuni’n ‘Annual School Day cum Cultural Meet 2016’ zang uh a, student te’n special item tuamtuam a lahban uah annual sport a kipahman hawmkhia uhi. Huai hun ah President, SSPP GHQ leh Chairman, School Managing Board te’n hasotna thugen uhi. Amau student te’n kuhkal taka laisim dingin deihsakthu gen uhi. SSPP Residential School in tukum apan Preparatory Class pan in Nov. 3, 2016 in Prep leh Class A-te adin admission hong uh a, seat 50 tuak lak hiding a, deihsak tuam omlou in mi 50 a chin hunhun in admission khak hiding in Headmistress apan kiza hi.
Lamka-Behiang Bus service flag-off
Lamka, Nov-4: Behiang leh akim a khaw tuamtuam in hun sawtpi apan Lamka-Behiang passenger service a neihlouh nungun Behiang Transport Co-op Society Ltd. panlakna in Bus thak lei uh a, tuzing in Behiang Centre kong ah latna leh honkhiakna om a, Pastor Muan Khup, BCM in lan hi. Bialtu MDC M. Hausuanthang, 24-Singngat MDC in flag-off a, tuni’n service pah uhi. Bus thak ahihleh ABS Company in abawl Mahajon Rangpu in a leikhiak hi a, ‘Force Traveler’ minvuah hi a, passenger 17 tut theihna hi’n kigen hi.
Fin. literacy awareness campaign
Lamka, Nov-4: NABARD akipan huhna zangin tuni’n Manipur Rural Bank, CCpur branch in Cambridge School ah financial literacy awareness campaign’ nei uh a, huai ah teaching & non-teaching staff ban ah Class VII-X student-te tel uhi. Muanthang Guite, Branch Manager, MRB in banking poimawh leh sum koihching leh kepbitna dia hoih ahihdan gen hi. Vigilance Awareness Week zatna dan in nekgukna sukbeina dia Central Vigilance Commission in kichiamna (pledge) a bawl student leh teacher te’n gen uhi. Khupkhansuan Hangzo, Financial Literacy Counselor, MRB in student-te adia bank zat phattuam dan leh bank paidan tawh kisai sinsak a, Thangchinkhup Guite, AGM, DDM/NABARD in student-te adia bank tungtawn a hamphatna omte pulak hi.
Restoration Convention om ding
Lamka, Nov-4: Team Shillong-te saina in Nov 5 & 6, 2016 in Hiangtam Lamka a YPA GHQ Hall ah ‘Restoration Convention’ om ding hi. Huai ding in Team Shillong apan Rev. Brian, Director All Tribes & Nations Assembly, USA; Elder H. Chin Khenthang, IAS (retd) Chairman Niang Hanghal Philanthropic Foundation; T. John Simte, Secy Gospel for Indian, Shillong hongzin uhi. Nov 5, zinglam dak 10:00 apan Rev. Brian leh H. Chin Khenthang te’n Pathian thu gending uh a, Nov 6 sunnung dak 1:00 apan Rev Brian in Pathian thu gen ding a, H. Chin Khenthang in Govt. Service v/s Honesty (diktatna) chih pansan in ama’ experience gending hi. Team Shillong te’n Lamka khawpi a mipi’ salam leh khalam ah Jesu Christ kiang ah kitun ding thaknawn ding leh Saptuam-te Jesu Christ ah kigawmkhawm vekding poimawh sak ziak a Restoration Convention neihsawm uh hi’n gen uh a, kuapeuh telchiat ding in chial uhi.
Singngat khawlai ah truck accident
Lamka, Nov-4: Singngat khawlai Hausa Veng ah zan nitak dak 12:00 velin singkhuah (fire wood) pua TC truck 1 accident in kipuk a, aliam kuamah omlou hi’n kigen hi.Tuzing khawvak in SYC makaih in mipi’n JCB zang in gari phong uh a, gari sung a singkhuah omteng leng hemkhia uhi. Gari neitu kitheilou in driver leng kihemkhia hi’n kigen a, singtangmi’ gari hilou hi’n kigen hi.
Salphate pumbuk thak hong
Lamka, Nov-4: JAC-AATB makaihna in tunitak dak 6:00 in Hiangtam Lamka a Salphate Pumbuk kibawl thak honna om hi. Joseph Lalrothang, President Hmar Inpui in ribbon cutting nei in hong hi. Aman a genna ah, hiai bang a pumbuk haltum a om tungding nawn in salphate zahna langsak a, singtangmite pankhawmna ziakin bill 3 te tunitan hentang a omlai hidan in gen hi. Manipur CM Ibobi makaih in term 3 vaihawmna len uh a, tua hunsung in singtang leh phaijang naktak a khentuam in om a, huai phutkekna ding a maban election a singtangmite pankhawm poimawh hidan in gen hi. JAC Convenor H. Mangchinkhup in tunitan panlakna phathuai sakthu gen in thilphut muh chiang a salphate thupitak a vuiliam chiangin martyrs taktak hiding un hidan in gen hi. Hiai hun zatna ah Vanlalrinlian, President MPC leh B. Dongzalian Simte, Chairman Zomi Council te’n thugenna nei uhi.
Student te’n competition neiding
Lamka, Nov-4: Phungkhothang govt. H/S, Hiangtam Lamka ah Nov. 5, 2016 zinglam dak 11:00 in ZEO/CCpur saina in Sardar Vallabhbhai Patel pianni Oct 31,1875 theih gigena ding in “Rashtriya Ekta Sapta” zat hiding a, Phungkhothang govt H/S leh Vimala Raina H/S student te’n competition neiding uhi. ‘Relevance and Importance of Sardar Vallabhbhai Patel in today’s India’ chih thupi zang in essay competition omding a, ‘Unity’ chih zang in slogan competition neiding uhi. Class IX & X te’n contribution of local freedom fighter of the region’ chih thupi zang in story writing competition leh ‘Unity’ chih thupi zang in Class IX & X ban ah classVI-VIII te’n painting competition neiding uhi.
Mi 446 in hearing aid ngah ding
Lamka, Nov-4: State Health Society leh National Programme for Protection & Control of Deafness kithuah in Nov. 5, 2016 in Imphal a Khuman Lampak ah Hearing aid hawmna om ding tawh kisai in tuni’n CCpur dist. a beneficiary-te Lamka hongtung in CCpur College nunga Youth hostel ah ki-camp uhi.Nov 5,2016 zingsang dak 5:30 in Dr. Kim Simte, CMO/CCpur in flag-off ding hi. Manipur ah dakkal 8 sungin hearing aid mi 6,500 kiang ah piak hiding a, CCpur dist. ah mi 466 in ngah ding uhi.
Kim Joe kikhak ding
Lamka, No- 4: Ministry of Home Affairs (MHA) in Deputy Secretary (Relief & Disaster Management) Govt. of Manipur kiang ah Nov. 5 & 6, 2016 in Manipur, Mizoram leh Tripura mun khenkhat ah huihpi leh vuahpi kithuah ding chih theihsak ziak in Nov. 5, 2016 in M/S Kim Joe Gas Service kikhak ding hi.
8th Seikam:
B. Aijalon leh Tuibuong-te vualzou; UKB leh FC Khanglai pang ding
8th Seikam memorial open football tournament pre-quarter final match kimawlna pailel ah tuni a match nih kimawlna om ah B. Aijalon SC leh Tuibuong Civilized Club te vualzou uhi. Match masa ah B. Aijalon leh LSC te kimawl ua, huai ah B. Aijalon in 3-2 in zou hi. Hiai match a minute 4 in LSC apan Immanuel in goal khat khum in 1-0 in makai pah ua, minute 20 in B. Aijalon captain Jangkholen in penalty peklut in 1-1 in kidraw uhi. Tua zawh phet minute 23 in B. Aijalon striker Johnson in nalhtak in khat khum in 2-1 in ma leh kaih daih uhi. Half zawh in B. Aijalon keeper hihkhelh ziakin LSC ten Nangminlun tungtawn in goal khum in 2-2 in kidraw ua, tua zawh phet in B. Aijalon apan Lalsiem Fimate in goal khat khum in 3-2 in vualzou ua, quarter-final lut uhi. Match nihna ah kumlui a finalist Tuibuong Civilized Club leh semi-finalist Zoheisa FC te kimawl ua, huai ah TCC ten 3-2 a zou in quarter-final lut uhi. Hiai match ah minute 3 paipan in TCC apan Zozom in goal khat khum in 1-0 in makai ua, tua zawh minute 12 in Zoheisa apan Thangminlun in goal khat khum in 1-1 in kidraw ua, minute 20 in Zoheisa in Lunneu tungtawn in 2-1 in ma leh kaih daih uhi. Half zawh in TCC ten Moi-a leh Gugun te goal in 3-2 in makai nawn ua, Zoheisa ten goal khum kik zoulou in TCC ten 3-2 in zou uhi. Hiai match ah Zoheisa apan Michael leh Paominlen ten yellow card mu ua, TCC apan Naotum in yellow card mu hi.
Nov. 5 (Kiginni) in pre-quarter final match tawpna om ding a, huai ah United Khawzim Brothers’ (UKB) leh 2014 a semi-finalist S. Nabil Khanglai Lompi (SNKL) te kimawl ding ua, tua zawh in FC Khanglai leh S. Haijang te kimawl ding uhi. Tunitan a final lut ding a gintak ahihleh UKB te hi ua, SNKL te leng maimai lou ua, UKB ten a mawkna in zou tuanlou ding ua gintak ahi. UKB ten knock-out ah kuamah gintak hetlouh dingin DHYO te 7-0 tak in zou uhi.
Nov. 5 Fixtures:
1. UKB v S. Nabil KL 12noon
2. FC Khanglai v S. Haijang AY 2:00pm
SUUNNA:
Langgoukap (63) h/o Palchhung of New Lamka (G) tuni nitaklam in BP Stroke in si a, Nov 5, 2016 in YPA hanmual, New Lamka ah kivui ding hi.
Lhaikhochong Chongloi (60) sister of Ngamsei Chongloi of New Lambulane, tuzing baihtak in diabetis in si a, tuni’n kivui hi.
IMPHAL NEWS:
CM leh Union Minister te’n enkhia
Imphal, Nov-4: Union Minister of State (Independent charge) for Youth Affairs & Sports (YAS) Vijay Goel, CM O. Ibobi leh state official te’n Thoubal district ah tuni sunnung dak 12:30 velin state govt. in National Sports University (NSU) bawlna ding a piakna mun uh Yaithibi Loukon mun enkhia uh a, huai banah Imphal West district a Koutruk mun ah huai University mah bawlna dia proposal mun enkhia uh hi’n kigen hi. Hiai hun ah Chief Secy. O. Nabakishore Singh; Rajvir Singh, Union Jt. Secy (Sports Devlopment); H. Deleep Singh, State Commissioner, YAS; N. Ashok Kumar, Secy. to Chief Minister; Dr. Harmit Singh Pahuja, Director, YAS leh YAS a official tuamtuam te’n zui uh hi’n kigen hi.
Huailou in Inspection team-te Yaithibi Loukon mun a tung ma un Serou leh a kim a khua te’n Yaithibi Loukon mun ah NSU bawlkhiak ding deihlou lahsakna in Serou village mun ah kiphinna in lampi khak uh a, police te’n kiphinna neite hawlkhiakna dia tear gas a kapna uah mi 20 vel liam in RIMS hospital ah mi 10 etkol in om uhi. Inspection team-te a tung un kiphinna neite om nawnlou uh hi’n kigen hi.
Loktak Lake enkai ding bawlkhia
Imphal, Nov-4: Union Ministry of Environment, Forest & Climate Change (MoEFCC) te’n North East India a freshwater lake lianpen Manipur a Loktak Lake manglou leh selou ding a kepna enkai ding in mi 4 telna team bawlkhia uh a, Loktak Lake kepna tawh kisai in tulel a panlakna leh UNSECO World Heritage site ah telsak ding a panla ding uh hi’n kigen hi. Huai tawh kisai in Union Ministry in a kintheipen a team te’n report pelut dingin theisak uh a, Centre in Loktak Lake kepna dia huhna sum a piak-te uh tawh kisai a work kisemte suikikna leh tourist khangsakna din panla ding uhi. Loktak Lake kepbitna enkai dia team ah telte Dr. R. Dalwani, Adviser to MoEFCC; Vshisht, SP, DIG (WL), MoEFCC; Dr. HK. Badhola, GB Pant National Institute of Himalayan Env. & Sustainable Development, Sikkim Unit in-charge leh Chandan Singh, Dy. Director, National River Conservation banah NCRD a Brijesh Sikka Adviser-te hi uh a, amau Nov 7-9, 2016 in Loktak Lake enkhia in state govt., akisaipih agency leh stake holder teng tawh meeting nei ding uh a, Ministry ah Nov 15, 2016 tan in report pelut ding uh hi’n kigen hi.
Huailou in D.V. Sadananda Gowda, Union Minister of Statistics & Programme Implementation, Govt. of India in Secretariat South Block a Conferece Hall ah Nov 7, 2016 nitaklam dak 4:00 in press conference nei ding hi.
SU bawl ahihleh sum tam bei zaw ding – Union MoS YAS
Imphal, Nov-4: Union Minister of State for Youth Affairs & Sports (Union MoS YAS) Vijay Goel leh Chief Minister O. Ibobi makaihna nuai a inspection team te’n 44-Yaithabi Loukon leh Kouthruk mun ah National Sports University (NSU) bawlkhiakna mun ding etkhiakna a neih zawh nung un Khurai a Ima Laikhurembi Shanglen mun ah tunitaklam in public meeting om a, huai ah Union MoS YAS in a thugenna ah Yaithabi Loukon ah NSU bawl ding kichi mahleh Kouthruk mun ah suan ding chih theihchian hi keimahleh Kouthruk area ah survey bawl ding a Sports Ministry apan expert team-te hiding chi hi. Yaithibi Loukon ahihleh mun niamna ahihziak in lei vukna ding leh leveling bawl ngai ding a, sum bikhiah sangin tam bei zaw ding hi. Manipur ah NSU bawlkhiak ding Prime Minister Modi thilchiam hi a, Manipur a ding kia hilou in India gam pumpi a ding chi hi. Insepction team a tel Civil Aviation Minister Pusapati Ashok Gajapati Raju in Tulihal International Airport ah terminal thak ding kum 3 sung a zawhsiang hiding a, maban hun in Manipur ah cargo telin helicopter service pat hiding chi hi.
Blockade call off di'n ngen
Imphal, Nov-4: UNC te’n tribal pawl tuamtuam a tamzaw-te deihtelna leh kituahna ding ngaihtuahna in indefinite economic blockade leh National project a ‘ban’ uh call off ding in All Tribal Students’ Union Manipur (ATSUM) te’n ngetna bawl uh a, nam lian leh neu khentuam neilou in khawtang kibulphuhna leh political tawh kisai a lam etna-te zahtak uh a, huai dungzui in muang leh bit a khawsak khawm banah kizopna sukhatna dia mi teng kizahtak tuah ding in ngen uhi. ATSUM te’n Manipur University a reservation thubuai tawh kisai a tribal students’ orgn. tuamtuam-te thupukna dungzui in Oct 27, 2016 akipan NH teng ah economic blockade leh National project-te ‘ban’ a puang uh paitou zel a, himahleh UNC-te kiphinna hun tawh a kituah khak ziak in thubuai sukveng ding zekai himaithei a, Court in thutanna bawl mahleh tribal student te’n MU hostel a pawtsan uh tawh kisai a thubuai suk veng hinailou chi’n leng taklang uhi.
CM kiangah thutawp pia
Imphal, Nov-4: Congress govt. in full-fledged district a Sadar Hills a puangkhiak louh uh tawh kisai in JAC for Sadar Hills leh Kuki Inpi Sadar Hills, Sadar Hills Chiefs’ Assn (SAHILCA), Social Worker banah Kuki Inpi Manipur-te telin CSO tuamtuam te’n Kangpokpi Town Committee office ah tuni’n joint meeting om hi. Huai hun ah Congress govt. in Sahar Hills district puangkhiakna dia Monolith koih nung a kikhemna ziak in CM O. Ibobi leh Sadar Hills a MLA 3 te’n Nov 9, 2016 tan a Sadar Hills mipite kiangah pupa ngeina dan a ngaihdam a nget ding uh chi’n thupukna bawl uhi. CSO Sadar Hills te’n Ibobi makaihna a Congress govt. muang in MP 1, MLA 3 leh Congress party apan District Councillor-te telching uh a, himahleh tuni’n Sadar Hills mipite’n Congress govt. theichian ta a, kum 1971 a Parliament Act tungtawn a Sadar Hills bawlkhiak banah Deputy Commissioner leh SP kia in sam a, huai ziak in Sadar Hills thu tawh kisai in ‘Creation and Revenue district’ kichi doudal uhi. Huailou in JAC Sadar hills telin CSO Sadar Hills te’n Sadar Hills district maban ding tawh kisai a thutanna bawl ding in Sadar Hills MLA 3 leh district Councillor-te Nov 9, 2016 ni a sam uh hi’n kigen hi.
Dakkal 72 sung bandh kipan
Imphal, Nov-4: Thoubal district a 44-Yaithabi Loukon mun ah National Sports University (NSU) bawl ding deih lou a Affected Land Owner Assn. (ALOA) te’n kiphinna a neih uh a, State govt. in security force-te zang in kiphinna a kham daih uh mawhpaihna in 44-Yaithabi Loukon ALOA te’n tuni zankim akipan NH-102 (Imphal-Moreh) ah total bandh puang uh hi’n kigen hi. Akigendan in CM leh Union MoS Youth Affairs & Sports (IC) Vijay Goel te’n NSU bawlna mun ding a etkhiak ding uh deihlou a kiphinna hun a police-te gamtatna ah nupi 3 telin mi 20 val liam uhi. Huai tawh kisai a Nazimuddin, Assn., ALOA in press meet hun ah kum 2 paisa apan gam thubuai omna mun ah NSU bawlkhiak ding nial uh a, a ziak ahihleh state govt. in thubuai omna mun ah gam omte a ngah uh hilou a, CM O. Ibobi leh a tanaute banah Brojen, MLA te’n gam a leikhiak ziak uh chi a, huai mun ah NSU bawl khiak ahihleh tuilou nei mi 600-te thuak kha ding chi hi. Akigendan in Union Ministry of Youth Affairs & sports in Manipur a NSU bawlna dia gam acre 200 a lian poimawh ding chi uh a, himahleh state govt. in gam bikhiah sang a acre 136.93 lian zaw, gam acre 336.36 a lian Union Minister of YAS kiangah pekhia uh hi’n kigen hi.
TUNI THUPI:
“Kitaitehte avek un a tai ua, himahleh khat kia in kipahman a muzel chih na theikei ua hia? Nou leng na muh theihna ding un huchi mah bangin tai un.” 1-Korinth 9:24
EDITORIAL:
Indian Super League
Kimawlna kichi chi tampi a om a, tuate lakah, leitung pumpi ngaihsangpen ‘Football’ kimawlna hideuh hi. Football kimawlna tawh kisai ah India leng pil panpan bangin kilanga, tuni chiangin kimawlna lam displine tuamtuam leng ngai poimawh zawdeuh theita in kilang hi. Telsuimite gendanin kimawlna (sports) kichi leng politics chikhat hi a, hiai ISL pen India in a ngaihsangpen cricket kichi nelhsiah sawmna ahi chipawl leng om hi.
Leitung pumpi’n kimawlna laka a thupi ngaihpen uh i gensa bangin Football hi a, tua ziak mahin Federation of International Football Association (FIFA) in thuneihna liantak nei uhi. Tu in Hero Indian Super League(ISL) kichi football kimawlna thupitak pailel a, India malsuahbial (Northeast India) akipan kimawlsiam mi hunkhop tel hi. Hiai ‘professional football league tungtawn in India gam in Northeast India a kimawlmite maimai hilou ahihdan taklang hi. Kimawlna (Sports) kichi nekzonna tak ching ahihdan tutung ISL tungtawn in leng kithei chian mahmah hi.
Tutung a league om pe’n official takin ‘Hero Indian Super League’ chih hi a, October 2016 akipan December, 2016 tan kimawlna omtou ding a, FIFA guidelines-te zui in kimawlna om hi. India kia genlouh in Asia gam buppi apan entu tam mahmah a, hiai football kimawlna in India gamah cricket ngaihsang na keniamsak zou ding khop a ngaihtuahna omta hi.
Indian Super League (ISL) bel kum 2013 in kipan a, India ah hiai kimawlna pen top sport dinga bawlkhiak sawmna om a, leitung pumpi ah India leng kilang ban leh chih tupna om chih ahi hi. Tulelin ISL ah team 8 kihel uh a, huai in India gam pumpi huam in population basis ah leng et in om a, India gam a mihing tamnape’n state 5 akipan team 5 la uh a, team dang 3te ahihleh India malsuahbial telin football kimawlna a siam tungtuan state dang 3 akipan ahi uhi.
Hun paisa enkik lehang December 9, 2010 in All India Football Federation in kum 15 sung daihding Rs 700 crore deal kichi Reliance Industries leh International Management Group of the United States (IMG-Reliance) tawh ana bawl uhi. Huai kilemna tungtawnin IMG-Reliance exclusive commercial rights in sponsorship, advertising, broadcasting, merchandising, video, franchising leh football league a bawlthei ding uh chih ahi hi. Huaima kum 10 paisa in AIFF in Zee Sports tawh leng kilemna bawl uh a, huai abei tawh kiton in Reliance company tawh kilemna bawl uhi. Hiai pen a sungthu liauliau ahi.
Huchi kalah, Indian Super League kichi October 21, 2013 in IMG–Reliance, STAR Sports leh AIFF official te’n launching program nei uh a, huai apan ISL awl-awl a hong kipantou in gamdang akipan kimawlmite hongtel thei ding uh chih leh guidelines tuamtuam bawlkhiak in hong om a, Indian Super League ah team 8 suak sek uhi. Kum tamtak paisa in India in Cricket kia kimawlna om bangin ngaihsutna ana nei ua, leitung pumpi in a ngaihsang pen Football kimawlna ahihdan ngaihsun lou uhi. Tu in bel Hero Indian Super League ah Bollywood star tuamtuam, mi hausa leh celebrity hunkhop in club 8-te sponsore uhi. Bangalore, Delhi, Goa, Guwahati, Kochi, Kolkata, Mumbai leh Pune ah kimawlna om a, a uaptu mipi tam mahmah a, India khangthu adin record break hi.
Football kimawlna kichi nekzonna hoihtak suakta a, leitung pumpi a minthanna hiban hi. Tutung ISL ah singtangmi Robert Lalthlamuana, Lalrindika Ralte, Jerry Lalrinzuala, Siam Hanghal, Jeje Lalpekhlua, Daminel Lalhlimpui, Lalchhawnkima, Lalruatthara, Thongkhosiem Haokip, Lalhmangngaihsanga Ralte, Boithang Haokip, David Lalrinmuana, Fanai Lalrempuia, Lallianzuala Chhangte leh Jerry Mawihminthanga-te minthang mahmah uh a, sum lakh bangzah a leikhiak ahi ding ua chih ngaihtuahtham ching a, khang kikhek hatlua ahih chiangin amaute sulnung zuiding khangthakte’ lakah football siam bangzah i om de aw. Boxing ah MC Mary Kom om a, tualou in sports displine tuamtuam ah leng mi minthang NE akipan a piangkhia omta a, tua ziakin khangthakte’n lehkha thei in theikei lehang leng i talent pholhsuah hunta hi.
No comments:
Post a Comment