HEADLINES:
Mipi khatam kitheihmawhbawl MLA 16-te boycott hilai - JAC
Manipur singtangmite kiangah ngetna leh thupuan bawl
 |
| http://image.newsdog.today/ file photo |
Lamka, Nov-6: Joint Action Committee Against Anti-Tribal Bills (JACAATB) pawlin Manipur singtangmite kiangah ngetna leh thupuan bawl in, singtangmi MLA 16-te’n mipite kahtamte kitheih mawhbawl lai uh ahihdan taklang ua, amaute tunga boycott puan a omsate lakkhiak hinailou chi uhi.
JACAATB apan thusuakin agendan in, Manipur Assembly Special Session ah August 30, 2015 in Bill 3 passed a omding ahihlam ATSUM in thei uh a, huai hunah singtangmi MLA-te kihellou di’n ngetna bawl mahleh ngeingaihlou uh chi hi. Singtangmite adia haksatna tungsak ding Bill 3 passed ni a kihel MLA-te – 1) D Korungthang, 2) Victor Keishing, 3) MK Preshaw, 4) Yamthong Haokip, 5) Francis Ngajokpa, 6) Nemcha Kipgen, 7) Ngamthang Haokip, 8) Z.Kikhonbou Newmai, 9) Janghemlung Panmei, 10) Gaikhanngam, 11) Dr. Chaltonlien, 12) Vungzagin Valte, 13) T. Manga Vaiphei, 14) Phungzathang Tonsing, 15) T.N. Haokip leh 16) Ginsuanhau tunga Boycott kibawlte, July 18, 2016 in Hmar Inpui, Thadou Inpi Manipur, Mizo People Convention, United Naga Council leh Zomi Council kipawlkhawmna Outer Manipur Tribals’ Forum leh JACAATB te’n pomkip thak in tunitan zuih a omtou lai hi’n taklang uhi.
Saptuam leh pawl tuamtuam 10 valin Manipur Assembly Election 2017 siangthoutak a neih di’n ngetna bawl khinta uh a, huai bawhzuina in Nov 4, 2016 nitak a Salpha Pumbuk honkhiak thak hunah JAC in ngetna leh thupuan point 5 bawl uh hi’n taklang uhi. Huai ngetnate bel, meithal tawi singnuaimite leh pawl khatpeuh in Election Commission of India deihdan kalh a gamtatna, dankalh a gamtatna, nekgukna leh thil tuamtuam a kigolh lou ding, mitsiip-huaitak a gamta peuhmah in mipi hehna maituah dia mansa a a om ding uh, amau gamtatna ziaka buaina piang om leh mawh akipuak ding uh hi’n taklang uhi. Kitelna siangthou omtheihna dia michih in mawhpuakna nei ahihman in, ngaihtuahna siangthou tak zang kawm a, singtangmite hihna, gam leitang leh tanvoute humbitna ding a vote khiak ahihtheihna dia michih in panlak ding chi uhi. Huailou in kumkhat val singtangmite kahna aw ngaihsaklou, boycott a om singtangmi MLA-te adia vote piaklouh ding banah, michih in huai sepsuahna dia mawhpuakna nei in, huaithu puanzakna dia michih in mawhpua ahihdan leng taklang uhi.
British PM Theresa May in ni 3 sung India veh ding
New Delhi, Nov-6: British Prime Minister Theresa May in makai tuamtuam tawh bilateral talks nei di’n ni 3 India hongveh ding a, tunitakin New Delhi hongtung ding chihthu om hi. Theresa Mary May ahihleh UK a Conservative Party makai lianpen hi a, July 2016 apan Prime Minister dia mawhpuakna alak nung in, European Union pawlam a gamdang aveh masakna hiding hi.
PM Theresa May in New Delhi ah zingchiang in Prime Minister Narendra Modi kimuhpih ding a, gamnihte kizopna tungtang genkhawm ahihding banah Visa tungtang thubuai omte leng kikum ding uh a, kong tuamtuam ah kilemna bawl a om ding hi’n gen uhi. UK mipite’n Brexit tungtawn a European Union apawtkhiak nung in, gamdangmite kiang ah Visa tungtang khauhtak a paipih in om a, British gam a India mi omte’n haksatna tamtak tuak uhi. Official thusuakin agendan in, Prime Minister nihte’n Brexit ziaka thiltungte leh, haksatna omte etkai dingdan genkhawm sawm uh a, India leh United Kingdom kikala trade leh investment omte, Brexit om ma dan a paipih ahihtheihna di’n kilemna bawl sawm uhi.
British PM Theresa May in President Pranab Mukherjee leh Minister khenkhat leng kimuhpih ding a, makai tuamtuam akimuhpih khit chiang in, Department of Science and Technology leh Confederation of Indian Industry pawlte saina a kibawl ‘India UK Tech Summit’ hongkhe ding hi. Huai Summit bel India-UK kizopna ensaktu a ngaih ahihbanah, science & technology cooperation tawh kisai ah gamnihte kala kizopna thuktak om ahihdan langsaktu hiding hi’n official thusuakin gen hi. Summit hunah government official, business leader leh scientist poimawh tamtak kihel ding uh a, India leh UK govt. in bilateral business, trade & investment hatsak dia panlakna aneihte uh genkhawm ding uhi. Prime Minister Theresa May in Bengaluru leng pha ding hi’n kigen a, huai hunah Karnataka Chief Minister Siddaramaiah kimuhpih ding hi.
LOCAL NEWS:
ZC in vanzat tuamtuam landing
Lamka, Nov-6: Zomi Council in mipi kithuahpihna in Bolero, Laptop leh Printer leithak uh a, Nov. 7, 2016 zinglam 8:00 in Khawminthang a ZC office ah Rev. Harry Muanlal, Exe. Dir., EOC in Pathian kiang ah lan (dedicate) ding hi.
Huai hun Zomi Council Cabinet Committee, Zomi tribe teng apan President, Vice President leh Secretary-te ban ah frontal orgn. tuamtuam ZMA, ZSF, ZYA, ZCA, ZHRF, ZEPADA, ZOLLS, ZAA leh ZFC a makaite’n uap ding uh hidan in ZC Secretary apan kiza hi.
MHJU saina in Seminar omding
Lamka, Nov-6: Manipur Hill Journalists Union saina leh Classic Group of Hotels panpihna in Nov. 12, 2016 zinglam dak 11:00 in Sendra Resort ah One Day Seminar on "Role of Media for Development in the Hill Areas of Manipur" om ding hi. Chief Guest in CM O. Ibobi Singh leh Functional President in Gaikhangam, Dy. CM hiding hi. Special Guests in President, AMWJU leh President, Editors Guild Manipur hiding uhi. Resource persons in Dr. A. Ibomcha Sharma IIS, News Editor, AIR Imphal; Valleyrose Hungyo, Editor The Aja Daily; Sobhapati Sumom, Correspondent, The Assam Tribune hiding hi.
AR-te’n Playground pekhia
Lamka, Nov-6: Col. Aditya Verma, Commandant, 7th Assam Rifles in tuni nitaklam dak 3:00 in HQ veng khawkhung a playground kibawl thak hong (inaugurate) in HQ veng mipi adi’n pekhia (dedicate) a, huai chiamtehna in suangphuh leng hong a, Pastor V. Jamkhanthang, Immanuel EBC Church in lan hi. Huai zawhin, HQ veng Community Hall ah mipi kikhopna om a, Chief Guest in Col. Aditya Verma, Commandant 7th Assam Rifles pang a, Special Guest in Thangkhosuanmung Guite, Chief of Hiangtam Lamka & EM, ADC/CCpur leh Chief Host in S. Thienlaljoy Gangte, MCS AC to DC, CCpur pang uhi.
Chief Guest in a thugenna ah, HQ veng in playground neilou ahih a theih in ngaikhawk mahmah a, khawtang adia AR te’n a sep theih uh semsuah hi’n leng gen hi. Tuailaite khawlai a zu leh khamtheih banah thilhoihlou hih a omlouh a, playground a phatuam thei pen zang di’n ngen hi. Thangkhosuanmung Guite in HQ veng in khangnoute awlmawhna ziak a playground tan pha pekhia Col Aditya Verma tungah kipahthu gen a, amah omkhak hamphathuai ahihdan gen a, a bial mipi adia thil bangkim a taiselou a panla zel ding ahihdan gen hi. S. Thienlaljoy Gangte in Chief Guest ngetnate nungak leh tangval te’n semsuah di’n ngen a, thilhoihlou bawlna a thilpiak (gift) pen zanglou a, apetu deihna bang a zang chiat di’n mipi ngen hi. Huai hunzatna HQ veng Village Authority-te, Headquarter veng Youth Orgn (HYO) leh vengsung makai tuamtuam banah mipi hunkhop in uap uhi.
Team Shillong te’n prog zang
Lamka, Nov-6: Team Shillong te’n ‘Restoration Convention’ chih thupi zang in tuni sunnung in Dist. Hospital a Morgue ah mumei-te tawh program zang uhi. Huai ah Rev. Brian, Director All Tribes & Nations Assembly, USA leh Elder H. Chin Khenthang, IAS (retd) Chairman, Niang Hanghal Philanthropic Foundation te’n thu gen in Rev Brian in Pathian phatna lasa hi.
Elder Chinkhenthang in agenna ah i lampi (road) uh gari ataina tak, i khawpi uh tenna tak ahong hihtheihna ding leh kuapeuh in salam leh khalam ah Jesu Christ ah kibulhphuh thakna hong omtheihna ding a hong kalsuan uh hi’n gen hi.
Election hun ah RO 3, ERO 4 leh Nodal Officer 16
Lamka, Nov-6: Manipur a assembly election om hun ah CCpur dist. adin Returning Officer 3 om ding a, Lunminthang Haokip, DEO/DC in 58-CCpur A/C leh 59-Saikot A/C enkai ding hi. W. Ibohal Singh, Addl. DC/CCpur in 55-Tipaimukh A/C leh 56-Thanlon A/C enkai ding a, A. Alies, ADC/Pherzawl in 57-Henglep A/C leh 60-Singngat A/C enkai ding hi. Electoral Regn Officer 4 om ding a, huaite W.Ibohal Singh, Addl.DC/CCpur in 55-Tipaimukh A/C leh 56-Thanlon A/C enkai ding a, A. Alies, ADC/Pherzawl in 57-Henglep A/C leh 60-Singngat A/C enkai ding hi. Seiminthang Lenthang, SDO/CCpur in 58-CCpur A/C enkai ding a, James Doujapao Haokip, SDO/Tuibuong in 59-Saikot A/C enkai ding hi.
Huaibanah Nodal Officer 16 om ding a, amau atuamtuam enkai ding uhi. Amaute- Lalthanzam Fimate, BO (HQ) DC’ office; Sangremsiam, BO (Judicial) DC’s office; Lamkhosiem Khongsai, DTO; Hnunliansang, AE/DRDA; Joycy Lalrinpui, PO/MGNREGS, DRDA; Soiminlian Lengen, CEO; Michael Ginzasuan, DSO, CAF & PD; Ginzamang, Asst Prof. CCpur College; S. David Piaklian, Addl. SP (L&O); P. Lianzela, BDO/Samulamlan; Lalrawngbawl, Dy.Director, DIPR; Ghaneshore, DIO, NIC; T.S. Haokip, DIO, DIPR; Lhunpu Haokip, AE/DRDA; Lalthazam, AC to DC leh T. Goukhomang, ZEO hi uhi.
Police te’n khamtheih tamtak man
Lamka, Nov-6: Police te’n Moreh apan report angah dungzui un tuzing dak 6:00 velin Pearsonmun khua a om Luthoihkim (40) w/o (late) Ginzamuan mankhia uh a, khamtheih No.4 (heroin) gram 10 leh khamtheih WY kichi tang 713 mukhia uh a, bazar a zuak hileh atawmpen in Rs. 3 lakh vel hiding in kigen hi. Police-te’ gendan in Moreh apan Luthoihkim zannitak in Lamka hongtung a, WY tang 1000 hongpuak lak ah 713 kia om a, adangteng zuak beiman hi’n gen uhi. Police te’n CJM court ah Luthoihkim pawkhia uh a, court in Nov. 11, 2016 tan Police custody ah omding in phalsak a, Police te’n FIR No.54 (11) 2016 CCP-PS U/S 21/22 ND & PS Act registered uhi.
EBC Kumsim Khawmpi 68 veina
Lamka, Nov-6: New Lamka a Gospel Centenary Hall ah December 8-11, 2016 sung EBC Kumsim Khawpi 68 veina omding a, “Diktatna a kilamthakna” chih thupi zang in Rev. Dr. Paige Patterson, President, Southwestern Baptist Theological Seminary, Texas, USA leh Rev. Dr. Solomon Rongpi, Gen.Secy. Council of Baptist Churches in North East India in Pathian thugen ding hi. Bible Study ahihleh Rev. Kumam Suresh Singh, Asia Co-ordinator of Partners in Disciple International in makaih ding hi. Khawmpi sung in Khawmpi palai te’n Vaihawmna nei ding uh a, EBC Kumsim Khawmpi 69 veina a Ulian ding telding uhi.
TWWA te’n zu hunkhop mukhia
Lamka, Nov-6: Tuibuong Women Welfare Assn. (TWWA) te’n tunitak in Tuibuong khawsung, Tedim road zul ah innluah a om Mrs. Tombi leh Mrs. Nungsi Tombi apan local zu litre 25 vel mankhia in bua uhi. TWWA makai-te gendan in Tuibuong bazar sung ah zuzuakna-te timing kipia in huai zui uh a, timing beinung a, zu zuakte fine sak hi uh a, khawsung ah zuzuak kikham bikbek hi’n gen uhi. Mrs. Tombi leh Mrs. Nungsi Tombi-te’ apan zu akimatkhiat 2 veina hita a, inn luahthei nawnlou ding in a inn luahna uh leng khaksak uh hi’n gen uhi.
Examna ah student 193 tel uh
Lamka, Nov-6: ZEO/CCpur nuai a Science Superviser saina in tuni zinglam in Phungkhothang govt H/S ah exam 3 om a, student 193 present uhi. Class X simlel student te’n State Level Talent Search Examination nei uh a, candidate 54 present in mi 16 absent uhi. Class IX simlel te’n State Talent Search Examination 2016 nei uh a, student 113 present in 24 absent uh a, class VIII simlel te’n National Means-cum-Merit Scholarship exam uh a, mi 35 present in mi 9 absent uhi.
BYF Lamka South Divn. khawmpi
Lamka, Nov-6: Evangelical Baptist Convention nuai a BYF Lamka South Divn. khawmpi a 9 veina Nov 3-6, 2016 sung EBCC Dorcas Veng, New Lamka ah om hi. Huai ah‘Tuailai, Thutak leh Diktatna a kibulphuh thakna’chih thupi zang in Rev N. Pumsuanmung, Youth Coordinator, EBC in thu gen a, Seminar hun ah Lianding Guite, Child Coordinator, EBC in “Christian Ethics”chih thupi zang in sinsak hi. Khua/Veng tuamtuam a BYF te’n kidemna tuamtuam nei in phatna lapawl sa uh a, tunitak in kipahman tuamtuam hawmkhia uh a, Upa S. Lalngailian, Chairman, Divn.Working Committee, Lamka South Divn. in khawmpi khak hi.
Fin. Literacy awareness camp
Lamka, Nov-6: NABARD huhna zangin tuni’n Rural Enhancement Foundation (REF) in Lajangphai khua ah financial literacy camp sai uh a, Upa Holkhotong Haokip, Hobung Vice Chairman in thumna in hong hi. Lunkhongam, Asst. Manager, SBI/Tuibuong branch in ‘financial planning & budgeting family income, basic saving, credit, transfer concept’ thupi zangin power point presentation tungtawn in sinsak hi. Thangchinkhup Guite, DDM/NABARD in ‘RuPay KCC and RuPay debit cards, schemes of PMJDY, APY, PMSBY’ tawh kisai sinsak hi. 2nd session ah Joy Singh, LIC Expert in ‘Insurance-Importance of social security, schemes’ sinsak hi. Huai hun a paikhawmte’n question leh discussion nei in theihtuak poimawh omte kikum uhi.
Mokam ESC Church hongkhia
Lamka, Nov-6: Tripura state a Evangelical Synod Church (ECCI) Missionary te’n Pathian’ Lalgam keklian zel uh a, tuni’n Mokam, Tripura ah Rev. K. Siemlien, Director Mission and Evangelism, ESC (ECCI) in Biakinn thak hong in Pathian kiang ah lan hi. Huai hun ah Rev. L T Gangte, Field Superintendent, Hechuon, Member M & E dept. banah K. Laitui KKP mi 7 in uap uh a, Biakinn kihongthak ah mi 40 val kikhawm ding uh hi’n kigen hi.
SUUNNA:
Satkholal (82) f/o Neklian of Gangpimual, tuni nitaklam dak 3:00 velin kalna in si a, Nov. 7, 2016 in Gangpimual hanmual ah kivui ding hi.
IMPHAL NEWS:
Sora khua te’n thuak
Imphal, Nov-6: Union Minister of State (Independent charge) for Youth Affairs & Sports (YAS) Vijay Goel in Yaithibi Loukol a National Sports University (NSU) bawlna mun ding Nov 4, 2016 in va enkhia ua, huai hun ah NSU Campus ding Koutruk a suan himai thei chih a gen khak ziak un Thoubal district ah mipi sousang te’n zan apan Sora khua akipan-te Khongjom leh Kakching Lamkhai mun ah lamtan in a khua uah sawlkik uhi. Tuni zingsang in leng gari ah Sora khua-te tuang om uh hiam chih checking bawl uh a, a matkhiak-te uh sawlkik uh hi’n kigen hi.
Huailou in Kakching te’n leng Yaithibi Loukol mun ah NSU bawlkhiak ding gupna in tuni’n Kakching Lamkhai ah kipun khawm uh a, huai hun ah Sora khua akipan-te sawl kik uhi. Khongjom Circle Sports Development Orgn. te’n Union Minister in Koutruk ah NSU suan ding a gen tawh kisai mawhpaihna in Sit-in-protest nei uh a, huai hun ah NSU bawlkhiak ding hih buai sawm-te gam neitu ahihlouh ziak un a kigolh nang uh omlou a, mimal hamphatna ding ngaihtuahna leh mi khenkhat hasotna a Union Minister in inspection a bawl hun ah kiphinna bawl om hi’n gen uhi.
Sadar Hills tawh kisai in MLA-te leh Councillor-te samkhawm
Imphal, Nov-6: JAC Sadar Hills te’n Sadar Hills maban ding tawh kisai a thutanna bawl ding in Sadar Hills a MLA 3 leh Congress Councillor teng Nov 9, 2016 in Kangpokpi ah samkhawm uh a, huai tawh kisai in Paoboi, Gen. Secy., JAC Sadar Hills in Ibobi makaihna a Congress govt. in full-fledged district dia Sadar Hills a puangkhiak louh banah kikhemna a plaque ah ‘CM phalna leh lemsakna’ kigelh koih ziak in MLAs leh Councillor-te sam khawm uh chi a, huai hun ah MLAs leh Concillor teng a lou theilou in atel uh ngai a, Kuki Inpi Sadar Hills, SAHILCA, Thadou Inpi, KSO, KWU, TSA, TWA leh Constituent Unit teng banah Sadar Hills a CSO tuamtuam-te tel ding in theisak uhi.
JAC Sadar Hills te’n Nov 9, 2016 ni a meeting zawh nung in MLA 3 leh Congress Councillor teng telin Sadar Hills thubuai tawh kisai a maban panlak ding dan tawh kisai in public meeting nei ding uh hi’n kigen hi. Sadar Hills a mipi khenkhat te’n 2017 Assembly Election hun ah Congress party boycott ding deih uh a, khenkhat te’n Sadar Hills adia DC leh SP koih masiah Senapati a DC leh SP boycott ding deih uh a, JAC Sadar Hills-te’n bangchi panlak ding uh hiam chih Nov 9, 2016 chiang a meeting zawh nung a theih chet hiding in taklang uhi.
NH-37 ah economic blockade puang
Imphal, Nov-6: State govt. in Imphal East a Jiribam sub-division full-fledged district a upgrade ding tamvei tak a chiam nung in a tak a sepsuah louh mawhpaihna in Jiribam District Demand Committee (JDDC) te’n tunitak zankim akipan ni 5 sung NH-37 ah economic blockade puang uh hi’n kigen hi. Huai tawh kisai a JDDC te’n Economic blockade nung tanpha a govt. lam apan dawnna kichiantak a om keileh kiphinna khauhsak sem ding chi’n leng taklang uhi. Huailou in state govt. in full-fledged revenue district dia Sadar Hills leh Jiribam puangkhiak a sawm uh deihlou latsakna in UNC te’n Oct 31, 2016 zankim akipan economic blockade a bawl uh paizom zel hi’n gen uhi. Economic blockade kipat nitak a Mao gate leh NH-2 mun tuamtuam ah gari 300 val tang a, security escort na nuai ah zan nitak a Imphal tung uh hi’n kigen hi.
A/R a IG thak din charge la
Imphal, Nov-6: Major General Virendra Singh, VSM in HQ IGAR South ah zan in Inspector General of Assam Rifles (South) thak ding in Major Gen. VS Sreenivas, VSM** akipan charge la hi’n gen uhi. Major Gen. Virendra Singh in IG dia charge a lak ma in Tripura a 21-Sector Assam Rifles command a, Indian Army ah level tuamtuam a staff appointment leh a nasep hoih a chiamteh hi a, Officer dia chitna hoihtak a neih ziak in IG dia telkhiak a om hi’n gen uhi. Major Gen. VS Sreenivas leh Mrs. Laxmi Sreenivas te’n Mantripukhri a nutsiat ma un tuni’n IGAR(S) te’n farewell sai uh a, huai hun ah Major Gen. VS Sreenivas in muanna leh bitna ding panlakna ah Manipur mipite’n kithuahpih ding in ngetna bawl a, Civil administration, Manipur govt., media member leh mipi teng in a kithuahpih ziakun kipahthu gen uhi.
JCILPS te’n kiphinna panthak din vau
Imphal, Nov-6: JCILPS a students wing te’n Manipur ah ILPS zat ding phutna ahih leh huai tawh kibang a state govt. in Assembly ah bill a puaklut kei leh kiphinna panthak ding in vauna bawl uhi. Huai tawh kisai in Keishampat Sega Road ah tunitaklam in press conference om a, huai ah M. Lakshman, Convenor, Students’ Wing in media-te tawh kimuhna hun ah state govt. in Oct 7, 2016 ni a JCILPS kilemna a bawl uh a tak a semsuah ding in ngen a, bangziak a state govt. in a thilchiam uh semsuah lou uh hiam chih dotna bawl a, state govt. in election tawh kisai a thupuan om ma in special assembly session sam ding leh ILPS tawh kisai a bill pass din phut uhi.
Uripok ah tuni’n bomb puak
Imphal, Nov-6: Uripok Haobam Dewan Leikai ah tuni zingsang dak 5:00 velin meltheihlouh pawlkhat te’n hand grenade a paih uh puak a, huai ah si leh liam omlou hi’n kigen hi. Thusuak in a gendan in meltheihlouh pawlkhat paikhiak nung sawtlou in RK (O) Bishobanu dawr mai lakah bomb puak a, himehleh si leh liam be omlou a, Police te’n case chiamteh uhi. Bomb puah thu tawh kisai a kipuang khia omlou hi’n taklang uhi. Bomb puak mawhpaihna in Uripok Haobam Dewan Leikai te’n sit-in-protest nei uh hi’n kigen hi.
Politics suahlou din theisak
Imphal, Nov-6: Meeyamgi Thougalloi Manipiur (MTM) te’n NSU tungtang Congress leh BJP te’n politics suahlou din tuni’n theisak uh a, Manipur a NSU pen politics suah ziak in mawhpaihthu puang uhi. NSU ahihleh mimal, politician kuapeuh, political party leh Congress banah BJP makaite mimal thilneih ahih louh ziak in politics suah a sawm uh tawpsan ding in theisak uhi. Manipur a sportsperson-te hih hoih ziak leh a hahpanna ziak ua Manipur in NSU nei thei dinmun in om a, NSU bawlkhiakna ding suk zekai pen Congress leh BJP te’n Manipur mite a zahtak louhna uh latsakna hi’n ngawhna bawl uhi.
Admission bawlte tungah action la ding
Imphal, Nov-6: All Tribal Student Union Manipur (ATSUM) te’n Manipur University ah reservation tawh kisai a thubuai omlai a PG course tuamtuam adia admission bawl tribal student khenkhat om chihthu zak hi a, admission bawl teng in Nov 7, 2016 zingsang dak 9:00 tan a ATSUM office ah kilang ding in theihsakna bawl uh a, thupiak ngaihsak lou tribal student-te tungah a gamtatna uh tawh kituak a gawtna piak hiding in gen uhi. ATSUM te’n tribal-te lungsim hihna thei dia kimawlna a zang-te ngaih khawk in tribal society ah mun neilou uh a, thupiak zuilou student-te khahkhiak hilou ding banah a thilhih uh tawh kituak a gawtna piak hiding in gen uhi.
TUNI THUPI:
“Huchi’n, leitunga mi a bawlziakin Toupa a kisik a, lunggimna in a neihlawh hi.” – Genesis 6:6
EDITORIAL:
CM adin lunggim huai
Manipur Chief Minister O Ibobi adingin tulai in lunggimhuai thei ding kiphinna, buaina leh issue tuamtuam om hi. Aman kum 15 vingveng Chief Minister hihna alet nungin buaina tawpkhawk tamtak tuakkha ngei dingin lamet huai a, huaite palsuak a, term 4-na adia Chief Minister hihna a tuah (face) ngap pen mi thupitak leng ahihna khat hizel hi. Himahleh, Ibobi adingin tulai hun leng lunggim huaitak bangin ngaihsut theih hi. A ziak ahihleh, tu apan kha 3/4 nungin Manipur ah assembly election om ding a, huai ding tawh kisai in panlakdan ding bang hoihpen ding hiam chih khong a ngaihtuah taktak hun hita a, huchilou in issue lian leh haksa pipi in buaklai hi. Hiai issue-teO. Ibobi bangchibang in n a vengsak de aw chih lungzinhuai mahmah hi. Chief Minister O. Ibobi adin lunggimhuai thilte a van theihna ding in panlakdan siam ah kingalian mahmah dingin gintak-huai hi.A adviser te’n bangchibang in a kithuahpih ding uhiam ngaihtuah tham ching hi.
Amasa in Inner Line Permit (ILP) tawh kisai a thawm hong dai bang mahleh veng dek nailou hi. Manipur phaizangbial ah ILP zat teitei ding phutna ziakin JCILPS tanpha phuhkhiak hi a, security-te tawh kinawktuah in aliam le bai hunkhop om uhi. Alehlam ah, Manipur singtanggam ah ILP zat ahi thei keiding chi a doudalna khauhtak om hi. A nihna ah thil omdan i gel vengveng chiang in hiai Bill 3 te tawh kisai in salpha siluang 9-te vui ahi naikei a, government tawh hoihtaka kilemna piching bawl leng om naituanlou hi. Hiai thu in thil sautak denglai ding in kilang a, state govt a vaihawm Congress party adingin kalsuanna uh hihbuai ban mahmah dingin kilang hi.
Tua kia hilou, ST status ngetna tawh kisai Manipur phaizangmi hunkhop in Manipuri-te leng Scheduled TribeST) a koih ngai ahi chi’n kiphinna nasatak nei ua, himahleh, amaute’n ST status a ngahtheihna ding uh omlou ahi chi a nial pawl leng om zel hi. Singtangmite’n quota/ reservation tawh kisai 31% a neih uh etlahna ziak maimai ahi chihsan in om a, Manipur singtangmite’n leng hiai ngetna nakpitakin doudal ahi hi.
Manipur University(MU) ah ST population ratio zah sanga leng tawmzaw 31% lel seat reservation bikhiah a om leng lumlet in 7.1% lel ahih deih in phaijangmite banah SC,OBC a tel phaijangmite mah in naktak in 31% seat reservation doudal nawn uhi. Tu in ATSUM, MUTSU, ANSAM, KSO leh pawltuamtuam in 31% mah zat touh ahihmasiah tawplou ding in kiphinna paipih lel uh a,Nov 5, 2016 in CM tawh a kihou ziakun bandh pailel pen khahkol phot uh a, Nov 7, 2016 in CM makaihna mah in govt leh ATSUM makaite’n Manipur University a Vice Chandellor telin kihou nawn ding uhi. Manipur University a Executive Council in University Grant Commission (UGC) Guidelines zuilou uh chi a ngawhna liantak om a, MU a academic council in a utdandan in MU paiding dan bawluh chi chih ahi hi. Manipur ah phaizangmi (General) te tampen uh chih thudik hi a, azom in singtangmi(Scheduled Tribe) te hi uhi. UGC paidan in mihing(population) tamdan tawh kituak in ST te’ adingin 31 % ahih teitei poimawh a, 7.5% reservation kipiak sawmna in singtangmi khangthakte’ maban sautak khaktan ban ding chih theihsa ahi hi.
Indo-Naga Peace talks tawh kisai leng gen in om a, tua ziakin phaizangbiala issue om neuhneuhte dai dide phot ahi de aw chih bang ngaihsut theih hi. Ahih ziakin, Sadar Hills issue genlouh theihlouh khat hinawn hi. Senapati District sunga om Sadar Hills bial teng district piching a puankhiak taktak ahi ding hiam, ahihkeileh puankhiaklouh a koihdap mai ding ahi diam? chih kalah CM lung-am mahmah ding in ginbtak huai hi. Imphal East District a om Jiribam sub-division leng CM Ibobi in full fledge dist a puankhiak ding chih genpih ngei mah leh Naga lam in naktaka adal ziakun tuni dong official a bawlkhiak hilou hi. Nagate duh-am mahmah leng ahithei a, huchi kalah, Chief Minister Ibobi in kum 15 sunga nasepkhiak dia a chiamte a hihbuchin (fulfil) pahpah louh ziaka hiai teng tung leng hithei a, election kuan ahih chiang in code of conduct in gakkha pah ding in gintak-huai hi.Adiakin Sadar Hills tungtang ah eimi kichithei singtangmite adin bel District piching ahih poimawhsakna lianpi om a,a gamgi(boundary area) tungtang buai ahih leleng tulela Sadar Hills Autonomous District Council leng om ahihman in huai in a huamkhakna teng mah district piching a puankhiak bang a siatna omtuan ding ahiam chih ngaihdan omthei hi,
CM in Ukhrul aphak hunin nakpitakin dal hi a,bomb leh thauging in Ibobi ana vaidawn hi. Hiai thu CM in pawna mahmah ding chih a chiangsa ahi. Huchih lai in tu in, National Sports University bawlna ding mun tungtang ah leng CM in a home district Thoubal ah mite kiphin uhi. Naithibi Loukon a thiltungin Ibobi maban ding election hun ah bangtanin buaisak ban diam? Bangtenghileh Ibobi adin ulel a Manipur dinmun lunggimhuai mahmah ding hi’n kilang hi.
No comments:
Post a Comment