HEADLINES:
Pre-election poll tamzaw ah Hillary Clinton vualzou
58th Quadrennial US Presidential Election 2016 omding
 |
| http://images.financialexpress.com/ |
New York, Nov-7: United States gamsung pumpi ah zingchiang (Nov 8) in 58th quadrennial U.S. Presidential Election omding a, Electoral College a presidential elector ding mi 538 telkhiakna di’n gamsung mun tuamtuam ah vote khiakna om ding hi. US gamsung a Newspaper leh News Agency tuamtuam te’n pre-election poll abawlnate uah Democratic Presidential Candidate Hillary Clinton in point tamlou in akikhinpih Republican Candidate Donald Trump zou a, election om naikei mahleh Hillary Clinton kimuang hi’n gen uhi. Election Day hunma, tunitan in Hillary Clinton in amah gumtu electoral voter 274 vel kailut khinta a, President chin theihna dia vote 270 poimawhte khengtou hi. Donald Trump inleng electoral voter 170 vel neita a, President a chin theihna di’n voter dang 70 vel poimawh lai hi. Democratic candidate Hillary Clinton telching in omleh, US gamsunga numei President masapen hiding hi.
US ah indirect election paidan zuih in om a, state 50 apan gamsung mipite’n amau omna munchiat ah Electoral College (electors) telkhiakna di’n vote khia uhi. Electors dia telching a omte direct voter (electoral voter) hi uh a, amau-te’n President, Vice President leh makai tuamtuam telkhiakna di’n vote khe nawn uhi. Tutung election ah Democratic party apan Presidential candidate di’n Hillary Clinton in ticket ngah a, Tim Kaine in Vice President adi’n ngah hi. Republican Party ah Donald Trump in Presidential candidate ticket ngah a, Mike Pence in Vice President adi’n ngah hi. President leh Vice President adi’n major party dangte Libertarian Party, Green Party banah Independent apan candidate tamkhop om uh a, Democratic Party leh Republican Party loute bel genphak hilou uhi.
Tutung Election ah US President 45na leh Vice President 48na telkhiak hiding a, Presidential elector 538 omte lakah 270 tunglam ngah zou penpen in President tutphah luah ding hi. Tulel a US President Barack Obama in ‘2012 Presidential Election’ hunah vote 53% ngah a, himahleh electoral college ah 68% tungtou in telching in om hi. Tukum February apan US gamsunga state 50 lakah early voting kipan a, tunitan in state tamtak ah vote khiak zawh a omta hi’n leng kigen hi. Tutung election a electoral voter telching a omte’n amau state capital teng ah December sung in vote khe nawn ding uh a, January 2017 vela result puankhiak hiding a, January 20, 2017 in President thak in office luah ding hi.
MC Mary Kom in Saidan Model Village hong
Lamka, Nov-7: Olympic Bronze medalist & MP (Rajya Sabha) MC Mary Kom in tuni’n CCpur dist. hongpha in, Sansad Adarsh Gram Yojana (SAGY) nuai a model village dia telkhiak Saidan model village honna uap in chiamtehna suang hong hi. Huai hun ah Lunminthang Haokip, IAS DC/CCpur, MC Mary Kom pasal K. Onler Kom, Managing Dir., Mary Kom Regional Boxing Foundation leh Dist. Level Officer tuamtuam ban ah Saidan khua leh a sehvel a khua hausa hunkhawp banah Hmar nam sunga pawl tuamtuam makaite kihel uhi.
MC Mary Kom in a thugenna ah, politician hikei mahleh Prime Minister deihsakna ziakin Rajya Sabha MP dia guang a om in, Manipur police deptt. nuai a sepna piak himahleh gamsung adia na tamtak sepkhiak ding tupna in a sepna koihkhia hi’n gen hi. Boxing kimawlna leng kawlsan sawm nailou in 2018 commonwealth games ah kihel ding hi’n gen a, 2020 Olympics tanpha ah leng kihel sawmlai a panla hi’n gen hi. Gamsung a khantouhna tamsem om theihna dia panlak tum ahihna ah mipi’n kithuahpih dingin leng ngen hi.
DC/CCpur in boxing a tallang mahmah Mary Kom ziakin CCpur dist. in Member of Parliament (MP) 2 kinei in model village leng 2 kineita hi’n gen a, model village tungtawn a dev. tuamtuam omte deptt. tungtawn sepsuah hiding ahihna ah village authority te’n a kinlam a proposal pelut dingin theiska hi.
K. Onler Kom in Manipur a singtangmite lak ah azi banga minthang thei ding mi hunkhawp om ahihdan gen in, boxing foundation ah Jan. 2017 in session thak pat hiding a, a lunglut khempeuh teltheih dingin gen a, na puansilh lai kia tawh honglut lechin kou a dangteng ngaihtuah ding ka hi uh chi’n gen hi. Prog. hunsungin Saidan khua hausa Rohminglien telin mi tuamtuam inleng thugenna nei uh a, Saidan HYA Cultural Troupe te’n nam lam alah ban uah lasiam tuamtuam inleng uap uh a, huai zawhin Tuibuong a Public toilet ding kibawthak hong hi.
Maban a election ah guptuam omlou ding – ZC Chairman
ZC in vanzat tuamtuam a neihthakte latna om
Lamka, Nov-7: Zomi Council in Bolero, Laptop leh Printer a neihthak uh tuzing in Khominthanga Zomi Secretariat ah Pathian kianga latna om a, Rev. Harry Muanlal, Exe. Dir., EOC in lan hi. Huai ah ZC a kikhaikhawm tribe 9-te apan makaite leh frontal orgn. tuamtuam a makaite tel uhi.Tukum akipan Pawlpi fund teng Zomi Council khut a lutta ding a thupukna om dungzui in ZC nuai a hausate tungtawn in mipi lakah fund la uh a, mipi’n ZC fund dia a thawh khawmte zangin Bolero (second hand) Rs. 4.5 lakhs ban ah Laptop leh Printer Rs. 60,000/- lei uh hi’n kigen hi.
Tuzing in Dongzalian Simte, Chairman ZC in Press-te kiang ah Chairman a letkhakdan tawh kisai pulak a, Manipur govt. in 3-bills a passed ziakin singtanggam ah buaina nasatak piang in gam leh leitang humbitna din salpha 9-te’n hinna pia uh a, amaute zahna sangpen pia hi’n gen hi. Gamsung buana in ZC sung naktakin sukha a, tua ziakin LB Sona leh Vungsuanthang -te’ Chairman hihna apan kitawp uhi. ZC pukse thei ding dinmun a ompen Pawlpi ZRO) in ngaikhawk mahmah in tunding thak nawnna din tribe 9 apan makaite samkhawm uh a, Chairman ding lottery system a kitel in amah interim chairman dia tel in om chi hi. Tuanung sawtlou in constitution dungzui in election neih hi a, delegate paikhawmte’n mah telching uh a, huai apan ZC chairman lenkha hi’n gen hi.Bill 3 tawh kisai a kidinkhia JAC-AATB in leng ZC naktak a thuap in palai tanpha sawlin tunitan taisanlou hi’n gen a, thusuah kibawlte leng endorse ahih banah Pawlpi inleng naktak a kithuahpih hi’n gen hi.
Maban a Manipur assembly election om ding tawh kisai in Oct 15, 2016 in ZC Cabinet in free & fair election om theihna din candidate gutptuam neilou dia thupuk hi’n leng gen hi.
LOCAL NEWS:
DEO/DC makaih in live talk show om
Lamka, Nov-7: Dist. Election Officer Lunminthang Haokip, IAS makaih in tunitak in New Lamka a Dorcas Jubilee Guest house a mini-auditorium ah ‘electoral awareness campaign’ dan in EVM familiarization & mock poll tawh kisai live talk show om a, huai ah host in Chunglenmang, MCS, SDO/Henglep leh co-host in Priscilla Lalliensang pang uhi.
Huai hun ah election tawh kisai a mawhpuakna nei Sub-Divn HQ tenga SDO/ARO te ban ah election deptt-te tel uh a, election ding tawh a theihtuak omte mipi theih dingin kikumkhawm uhi.
Ni 24 nung in siluang tawhkhiat hiding
Lamka, Nov-7: W. Ibohal Singh, Addl. Dist. Magistrate/CCpur in Sector 176 (3) of Cr.PC 1973 tungtawn in Oct 14, 2016 zinglam asi Pamsialching (22) w/o Paukhawmlal of Thingkangphai village Nov. 8, 2016 zingsang dak 7:00 a kivuina han akipan tawhkhiak banah RIMS ah forensic expert te’n postmortem bawl dingin Police-te’ phalna pia hi. Huai ah Jangminlen Lupho, Executive Magistrate/CCpur in Police-te kithuahpih ding hi. Pamsialching’sihna tawh kisai apa Kamsongin of Palkhuang village in a tanu lupna gei ah awklum chihthu ah Oct 21, 2016 in Police ah complain bawl a, Police te’n UD Case No.6/CCP-PS/2016 U/S 174 Cr PC registered in siluang ni 24 nunga pholhkhiak hiding hi.
Thautui laktheih zah ding bikhiah
Lamka, Nov-7: National Highway-te ah economic blockade om ziak leh mipi’ apan complain om ziak in DSO, CAF & PD/CCpur in CCpur Dist. a Oil Pump-te ah thuthak om masiah thautui laktheih ding zah bikhiah a, Oil Pump a thautui hongtun hunhun in stock position leh thautui zuak zah niteng a report dingin theisak hi. Thautui laktheih ding zah-Heavy Truck/bus-te diesel litres 40, Light Vehicle (LV) Tractor leh LV 4-wheeler gari-te diesel litre 20, 3-wheeler gari-te petrol leh diesel litre 10 tuak, LV 4 wheeler gari-te petrol litre 20 leh LV 2-wheeler gari-te petrol litre 10 hiding hi.
Sajiwa Jail enkolte tung ah lungkimlou
Lamka, Nov-7: Khamchinpau Zou @ K. Zou, Advocate & Social worker in Sajiwa Central Jail ah police leh asemtute nekgukdan leh jail a omte a etkoldan uh mawhpaih hi. Huai tawh kisai thuneitute’n huai a semte gamtatdan enkai ding in deih a,huchi ahihkeileh Union Home Ministry ah jail enkol ding state danga police-te ngen ding hi’n gen hi.Manipur Bar Assn te kiang tanpha ah leng ngetna bawlsawm hi. Jail a omte singnuaimi (UG), India dan (law) kalh a tualthat, pawngsual leh adangdangte’ kikhumna hileleng a innkuante (family member) ut dandan a bawltheihna ding dan omlou hi’n leng gen hi.
Manipur Jail Police (MJ) te’n Advocate (Ukil) te tanpha bangmah in simlou uh a, singpi/kuwa haina ding ngen maimah uh a, Indian Jail manual dungzui in advocate te’n jail tangte a kimuhpihna ding uh Jail Supdt., in room a piak ding chih himahleh Sajiwa Central Jail saitu ten official in bangmah neilou uh hi’n taklang hi. Manipur ah nam tuamtuam a sepna neite’n asepna ua mawhpuakna leh hehpihna neilou a kuwa/singpi dawnna ding ngai a chihlai siah uh khantouhna om ngeilou ding hi’n gen hi.
Competition result puangkhia
Lamka, Nov-7: Sardar Vallabhai Patel pianni Oct 31 theihgigena dingin “Rashtriya Ekta Sapta” zat hi a, Nov. 5, 2016 in Phungkhothang govt. H/S ah ZEO/CCpur ah competition om a, a result puan in om hi. Essay kidemna Secondary Level (class IX-X) ah 1st in Ngamzalal Haokip of Phungkhothang govt. H/S, 2nd in T. Lunchungthang of Vimala Raina H/S leh 3rd in Dina Vaiphei of Vimala Raina H/S hi uhi. Story writing ah Sec. Level a 1st in Lamneihoi of Phungkhothang govt.H/S, 2nd in Kimkhohat of Phungkhothang govt H/S leh 3rd in Chingngaihlawm of Phungkhothang hi uhi.
Creative Slogan Sec. Level ah 1st in George Thangkhuol Gangte of Phungkhothang govt. H/S, 2nd in Thangminlien Singson of Phungkhothang govt. H/S leh 3rd in Lucy Nemlunching of Phungkhothang hi uhi. Painting Sec. Level ah 1st in Pausanglal of Phungkhothang govt. H/S, 2nd in Thangminlian of Vimala Raina H/S leh 3rd Ginmuanthang of Phungkhothang govt. H/S hi uhi. Elementary Level ah 1st in Letthamuan of Vimala Raina H/S, 2nd in Khailunmang of Phungkhothang govt. H/S leh Lianthianmuang of Vimala Raina H/S hi uhi.
Guta te’n gari gumang
Lamka, Nov-7: Police apan kizadan in gutate’n Lienlalsiem Vaiphei of Tangmual village gate hihsia in bolero gari Regn. No. (MN01K-8894) gumang uh a, gari neitu in Police ah report bawl a, Police te’n GD entry bawl in suizui uhi. Akigen dan in Lienlalsiem Vaiphei in midang kiang ah bolero gari leisawn a, alopna abawl zawh nung zan 1 leng kem manlou a gutate’n gukmangsak uh hi’n kigen hi.
Holkholun Lhungdim in Saikot ah candidate sawm
Lamka, Nov-7: Holkholun Lhungdim, ex-President, KIM in kum 2017 a MLA election ah 59-Saikot A/C ah candidate sawm a, tuni in Molnom Hausapa’ inn ah Molnom khawsuak Lhungdim tanu pasal neisa teng leh Molnom Hausapa’ tawh itna ankuang umkhawm in election tuh ding ahihdan puang hi. Huai hun ah Pastor Thenjang Hoakip, Molnom Christian Church in Lhungdim’ tanute, Hausapu leh Holkholun Lhungdim ading in Pathian kiang ah thumsak hi.
Holkholun Lhungdim’ in agenna ah Molnom Hausa (late) Thanghem, M.C (Millitary Cross) tapa neupen hi a, Saikot A/C apan BJP ticket a MLA tuhsawm hi’n gen hi. Party ticket angah keileh ticket ngah penpen panpih ding hi’n gen hi. Saikot A/C sung adiak in Sangang area ah lampi hoihloulua a, Sugnu area leng lampi hoihlouh ziak in Saikot A/C ah development omtheihna ding a candidate sawm hi’n gen hi. BJP ticket angah leng ki-lamen ahihdan gen a, huai ding in criteria tuamtuam leng hihbuchin sawm hi’n gen hi. BJP ticket ngah a, Saikot A/C ah MLA a candidate theih leh Lhungdim tanu Pasal neisa teng ban ah Saikot A/C mipi’n lauthong hetlou a mahni vote chiat khia leh panpih ding in ngen hi. MLA telching ahihleh Saikot A/C ah kikhekna omtheihna ding, gam leh nam ading a naktaka panla ding hi’n gen a, Lhungdim te’n Saikot A/C ah MLA term 3 ana pua hi’n gen hi. Tulel in 59-Saikot A/C ah intending candidate-Paolal Haokip, Jeseph Lalrothang, Holkholun Lhungdim leh D. Sonkhojang Haokip hi’n kigen hi.
DSWO makaih in meeting om
Lamka, Nov-7: Dec. 3, 2016 a Intl. Day of Persons with Disabilities 2016 zatna ding tawh kisai tuni’n Dist. Social Welfare Officer A. Umarani Devi makaih in ama office chamber ah a kisaipihte meeting pih a, huai ah Goukhomang, ZEO/CCpur; CCI, CDDU, Mercy Home/FCC leh PASS apan palaite tel uhi. Meeting paikhawmte’n disabled person te’n amau hihtheihna (talent) a lahkhiak theihna ding ua hun lemtang a huai ni zat din thupuk uh a, programme zat dingdan tawh kisai Nov. 5 in genkhawm nawn ding uhi.
Petrol litre 1 ah Rs. 65.72
Lamka, Nov-7: Indian Oil Corp (IOC) in Nov. 5 apan India gamsung ah petrol man litre ah 89 paise in pung sak in diesel leng litre ah 86 paise in pungsak hi. Petrol leh diesel man punsak ahihnung CCpur Dist. a Oil Pump-te ah petrol litre 1 ah Rs.65.72 leh diesel litre 1 ah Rs.54.92 in kizuak hi.
Mandal Office of 59-Saikot hong ding
Lamka, Nov-7: S. Molcham Machet, a SL Chavangphai village ah Nov. 8, 2016 zinglam dak 8:00 in Mandal office of 59-Saikot Mandal office hon hiding hi. K.Vungzalian, President, CCpur Dist. BJP in BJP flag kaipalh (hoisting) in office hong ding hi. Huai ah K.Vungzalian, H.Khaisei, Dist. Spokesman ban ah intending BJP candidate te’n thugen ding uh a, member teng telkimchiat ding in SL Haokip, Gen. Secy BJP 59-Saikot A/C in chial hi.
IMPHAL NEWS:
Union Minister in press conference nei
Imphal, Nov-7: Secretariat South Block a conference hall ah tuni’n Union Minister of Statistics and Programme Implementation D.V. Sadananda Gowda in media-te tawh kimuhna hun ah politics thubuai telin Manipur ah thubuai om teng tawh kisai hihveng theihna ding lampi omsun development hi a, akisaipih thuneite tawh scheme masawn dan, Support for Statistical Strengthening (SSS), MPLADA leh Indian Oil Corp. Ltd. (IOCL), Railways banah Central Public Works Dept. (CPWD) tungtawn a Central Sector Public Enterprises te’n Manipur ah infrastructure project a sepkhiak-te uh dinmun tawh kisai genkhawm hidan in gen hi. India govt. in SSS scheme adi’n funding pia a, Ministry of Statistics and Programme Implementation in Manipur ah statistical capacity puahna ding leh state statistical system hatsakna dia state govt. kiangah Rs. 20 crore pia uh a, Ministry in Imphal ah Administrative block, training facilities tawh kituah Directorate of Economics leh Statistics HQ bawlna ding in Rs. 15 crore khahkhia uh a, Auditorium leh Guest House zawhsiang hi’n gen hi.
Aman agenzelna ah full-fledged regional Office dia Imphal a National Sample Survey Office (NSSO) wing nuai a Sub-regional office (SRO) upgrade di’n Ministry in thupukna bawl uh a, Member of Parliament Local Area Development Scheme (MPLADS) zang a nasepkhiak-te review bawl hi a, Manipur a MP 3-te adia development work nasepna ding in Rs. 32.50 crore khahkhia uh a, March 2020 tan a Railway Project zawhsiang dia tup himahleh hun bikhiah sang a kha 3 a baih zaw a zawhsiang hiding in gen hi.
Sepna regularize sak din genkhawm
Imphal, Nov-7: Chief Minister Secretariat a Conference Hall ah CM O. Ibobi makaih in tuni nitaklam dak 4:00 velin Cabinet meeting om a, tua hun in AYUSH Directorate a Contractual employee-te sepna regularise sak ding, Health Dept. a Staff Nurse-te Nursing sister a promotion piak ding leh MOBC a tulel a semtute banah Dy. Director koih ding tungtang genkhawm uhi. Election Code of Conduct zat ahih ma in MOBC a Dy. Director post creation bawl ding lemsakpih ding in taklang uh a, Home dept. a Contract basis a Computer Operator-te sepna regularize sak dia gintak hi a, RD & PR Dept. a post creation thak 89 bawl in semtu 89-te sepna leng regularize ding leh Addl. Public Prosecutor leh Asst. Public Prosecutor-te sepna leng regularize ding lemsa uh hi’n kigen hi.
Reservation thu ah MoU kai
Imphal, Nov-7: Manipur University (MU) a Vice-Chancellor Prof. Adya Prasad Pandey makaihna in MU a Vice-Chancellor Conference Hall ah tunitak dak 5:30 velin MU thuneite, ATSUM, ANSAM, DESAM, KSO-GHQ leh MUTSU palai te’n MU a reservation thubuai tawh kisai ngenteltak a genkhawm nung in MoU suaikai uh hi’n kigen hi. MoU ah Oct 8, 2016 ni a Acadmic Council-te thupukna nawlkhin in Sept 1, 2015 ni a High Court of Manipur thupiak a kisaipih thuneite’n a koihkhiak masiah uh Nov 7, 2016 akipan Central Educational Institution (Reservation in Admission) 2006 a kibawl kum 2012 a kipuahphathak pen a kipuahthak masiah zuih ding, huai dungzui in MU a dept. teng a dia admission tawh kisai in ST-te adia reservation 31%, ST 2% leh OBC 17% hiding a, admission bawl theih hun last date leng Nov 14, 2016 tan adin ki suan hi. Academic Session 2016-17 adia ST seat 31% ahih theihna dia deficit list puangkhiak hipah ding a, himahleh student community-te khualna in Academic session 2016-17 adia admission process paisa-te cancel hilou ding chih-te tel hi’n gen uhi.
NDTV tungah ‘ban’ mawhpaih
Imphal, Nov-7: All Manipur Working Journalist Union (AMWJU) a member te’n govt. in Hindi channel NDTV India tungah ni 1 ‘ban’ a puang uh mawhpaihna in Manipur Press Club kong ah tuni zinglam dak 10:00 apan sun dak 1:00 tan sit-in-protest nei uh a, huai hun ah slogan ‘We condemn ban’, ‘Why single out NDTV’, ‘Don’t suppress freedom of expression’, ‘AMWJU stand against ban on NDTV’ chih-te tawi uh hi’n kigen hi. Akigendan in Union Ministry of Information and broadcasting (I&B) te’n NDTV tungah ‘ban’ a puan ziak un Press Club of India (PCI) leh Indian Women’s Press Corps-te telin India gamsung a Media fraternity te’n mawhpaihthu puang uhi.
TUNI THUPI:
“Na gam vuahtui uh a hun geihgeih in, vuahtui ke masa leh vuahtui ke nanung ka honpe ding a, huchi’n na buhte uh, na uain-te uh, a thaute uh na sek lut thei ding uh.” – Diu 11:14
EDITORIAL:
Thilteng ah Aadhaar Card !
Laisiangthou ah setan number chi a kigen 666 leh Aadhaar Card in kizopna a neikei mawngmawng chi’n senior politician hunkhop in gen mahle uh khawvel paidan i et chiangin hiai Aadhaar Card om zia nuamloupi suak a, office thil leh na tuamtuam kansuina ah na Aadhaar number bangzah ahia chih dotna om masa sek a, tuni chiangin aloutheilou leng hong suak mawk hi.
Ngentel zawsem in sut lehang i gam ah mobile phone honglutna a sawt naikei a kum 10 valzek hipanlel hi. Tua hunlai in incoming leh out going charge pai tuaktuak a, huchi in state pua ikan hun in incoming charge ah tampipi cut in om a, tuni chiangin ‘One India’ chih ziakin hibang thilte om nawnlou hi. Nidang in i sanggam-laina ahihkeileh i innkuan mi Delhi, Bangalore ahihkeileh India khawpi tuamtuam a omte sum i khak nop chiangin 5% sengin sum i khak uh a, himahleh tuni chiangin bank ah deposit in baihlamtakin amaute’n a omna mun uah ATM tungtawn in ana lakhe ziahziah uhi. Khawvel paidan i etchiang in ‘technology’ in i gam ah vaihawm touzel dingin kilang hi.
Huchi kalah Unique Identification Authority of India (UIDAI) in kum 2 vel paisa akipan in Aadhaar enrolment nasatak in bawl uh a, huai in Manipur state leng nakpitakin hon nawkta hi. Thil hong omzel ding i ngaihtuah chiangin Aadhaar enrolment tawh kisai Manipur ah leng alou theilou hong suakta a, huai paitou zel dingin gintak-huai hi.
Office tawh kisai leh thil tuamtuam ah Aadhaar card number hong poimawh vek mawk a, huai in Bible a kigen hong tangtungsak toutou hilou ding hiam chih ut-huai hi. Mizawng leh gentheite’ adia hongpai antang (BPL) lakna ding, Anganwadi nuai a naupangte’ nekding bawngnawi vui leh adangdang, Gas lakna ding, Bank Account honna ding leh adangdang adingin Aadhaar card gelhna ding om chetchet a, hiai dan a thil hong paitouh zel leh bazar a van i leina dingah leng Aadhaar number piak a ngaih hun hong om maimah leh kilawm bang hi. UIDAI in a tup-le-ngim bel India mi-le-sa hi taktak na hiam chih chetna leng ahikha ding a, himahleh tu dinmun tan lela thil paidan et mai in leng Aadhaar card number i poimawh sak mawk leh adiklou banghiam om thei dingin gintakhuai hi.
Manipur ah kum 2011 a census dungzui in mihing lakh 30 i phanai kei deuh uh a, huchih lai in Aadhaar card nei mi 15 lakh phial pha dingin gintakhuai hi. Registrar General & Census Commissioner, India (RG & CCI) in tuma a agendanin, UIDAI official-te tawh Nagaland, Manipur leh Mizoram apan top official te’n meeting nei ngeita uh a, Aadhaar card in gamsung mipi humbit ahihdan theihsiam hi uh chi uhi. Manipur ah tulel in ILP issue naktakin a buaipih pawl om a, Bangladeshi mite telin gamdang apan mi tamtak Manipur ah honglut uh chih ahi hi. Himahleh, tualsuak (Indigenous) te’ adi’n thil bangkim ah Aadhaar card number kidot hisek a, hichi lawmlawm a poimawh ahihna bang hiding hiam chih dotna lianpi omthei hi. Aadhaar enrolment tawh kisai a poimawh leh centre government in sai henla, state government nuai a sepna zonna hiam ahihkeileh thil bangbang hiam a hamphatna om thei dingte ah Aadhar number kidotna om nawn kei henla, a poimawh leh khawsung a vaihawm Village Authority-te’ theihpihna lehkha pen pom hi mai leh chih ngaihdan om thei hi.
Registrar General of India (RGI) kichi om a, huai thusuak bang khauh mahmah hi. RGI in biometric equipment leh machine khempeuh district administration in a etkol ding ahi chi hi. Dik leng adik ding a, ahi ding him leng ahi. Job card holder peuhmah a inn inn uah biometric tungtawnin alem uh lak hi a, tu in National Food Security Act nuaia beneficiary peuhmah leng a inn chiat uah lemlak hilai ding uhi. Hiai pen gamdangmite etkhiakna “infiltration and illegal immigration” tawh kisai a pomtak mah hiding hiam? Thilteng ah Aadhaar Card number kidot kawm a, biometric a lem kilak chih pen tualsuakmite’ dingin zong ninhuai mahmah hi. Electronics Corporation of India Limited (ECIL)-te’ bawlkhiak Aadhaar tawh kisai ahoihna tampi om mahleh, thil bangkim ah Aadhaar card chihchih pen zak ninhuai mahmah a, nikhattei state hunkhop in hon doudal ngeiding un leng gintak huai hi.
No comments:
Post a Comment