Letkhiatu: Pastor Rawna Kopsiam
Bible 50vei ka sim suakta hi. Genesis apan in ka ban sima, Huchi in Song of Solomon ka sim a, Awi Song of Solomon hichu Love story ahi mai. India mi leh sa ka hi na a Hindi in ka pau thei kei hi. Bible ka sim tou zela, New Testament ka hong tung tou a, Jesu kua hi hiam chih theih ka ut mahmah hi. Hiaiziakin ka sim thak zihzeh hi. Tanchin Hoih bu lite ka sim zawh in ka bedroom lam uah ka luta Jesu na nak thupi e khai. Kou mihingte kiang ah na hong pai a, na hong kithei chian sak a ka chi hi. Hun hong pai zela, Muslim a om ka ut nawnta kei hi. Hiai Pathian hi ka Pathian ding in ka pomta ding.
Nitak khat ka lum hak mahmah hi. Zan dak 12:30 – 01:00 vel in ka ann huan inn lam uah ka valut hi. Bible ka phen a Nasepte bung 9na, Tangval Saul pianthakna thu phensa in tuanglai ah ka koihsuk hi. Pathian kiang ah hiai bang in ka gen hi. En dih hiai mipa nak kihhuai e maw. Na mite tampi hon thah saka. Nang hi Pathian lamdangpi chu na hi. A kiang a kilak in na panpih zaw mah laia. Huchi in nang hon mu a, na sikha hong suak in Bible a laithawn tampite gelhtu in hong pang zaw mah hi. Na nna ka sem ding ka chihna bel ahi kei. Hilehleng en dih hiai Muslim innkuan apiang ka hi a, pathian ka theihsun chu Allah ahi. Amah lou ngal kuamah dang pathian ka thei kei hi. Nang Pathian hiai mi thulim loupa ( Saul ) na kimuh sak bang in kei leng nang mu ding in hon panpih in. Poisa mah leng leng nang kon muh masiah chu ka hon zui thei kei ding. Na kiang ah gen nop tampi ka nei lai hi.
Hiai bang a ka paupau lai in ka ann huan inn uh annhuan inn a bang nawnta kei. Thakhat in Ka ann huan inn uh vak thupi tak mai in a hon tuam hi. Hiai vak thupi dan chu ni vak tawh teh theih ding vual ahi kei. Vak thupi tak mai lai ah ka ding a. Annhuan inn himhim ka mu thei nawn ta kei. Pathian aw koi a om na hiam ka chi hi. Ka lungsim in mun kilawm leh nuam tak chu ahi ngei mai. Hilehleng Pathian koi a om a de aw ka chi a.
Thakhat in aw ngaih deuh mai tohlet lam apan in ka za hi. Pau ngaihna a thu kigen sang in leng ka aw zak a ging ngaih zaw hi. Hiai ka aw zak in Johan 1: 1 thu a hon gen hi. A tung in thu a om a, thu tuh Pathian kiang ah a om a thu tuh Pathian ahi. Nang a ding in hiai Bible chang bang pi leng ahi khawl kei mai thei. Kei ding in chu gen nei leh omzia nei tak ahi. Jesu Pathian hing tapa, Pathian ahi chi a pom ding chu thil hi thei lou ahih ziak in. Kou Muslim ten Pathian in ta nei chih pom thei ngeingei lou ka hi uh. Pathian in ta a neih leh chu zi leng a nei ding chihna ahi. Huchi ahih leh mihing khat tei ve mai ahi ding a, Pathian ahi thei kei ding.
Vak thupi tak leh aw ging ngaihtak in lungkimna a hon petuan kei. Pathian koi a om na hia chi in ka kikou khia nawn hi. Hun tomchik sung in ka mai ah hong ding hi. Paudang sang in English ka zangtam zaw a siam leng ka siam zaw hi. Ahihang hiai ka mai a hong ding Pathian kilawmna leh hoihna genkhiakna di English in leng thumal ka thei khia zou kei hi. A sang mahmaha, a etlawm mahmah hi. Hiai khovel gam tuamtuam ah ka hoh kha na a a kibatpih, a tehpih ding mi kuamah ka mu kha ngei kei.
Kum 30vel a upa ka hita na a, itna kichi bang hi hiam ka thei nai kei. Ka hon itlua ka kianga hon chi kuamah ka thei kha nai kei. Ka innkuante leh ka nu leh pa apan in leng hiai pau kam ka za kha ngei kei. Ka innkuante a dia nna ka sep sunte ahihleh ka mohpuak ahihziak leh seplouh theih louh ahihziak in ka sem mai hi. A kipah luatna ding uh a om tuan kei, innkuan a ka mohpuak om sem tei mai ka hi. Ka mai a ding Pathian in a itna mit in hon en a hon hip zou mahmah hi. A khutsung a om naungek bang in ka kimu hi.
Kum 12 ka hihlai a ka thiltuah khat a hong kilang khia hi. Ka hinkhua ka chimtak mahmaha, kithah mai louh a dang upai om in ka thei kei hi. Lui khat kiang ah zan khua mial leh khuasia nuai ah kei kia a ding in tui a tawmkhiak a kithah mai ka sawm hi. Huai laitak in lamdangtak in khut nih hong kilang in hon kai khia a kenbel sikha hi ding in ka gingta a lau mahmah in innlam ah ka tai kik vengveng hi. Huai hun lai hon muh sak zawh in Pathian in huai hun lai a hong kai khiatu kei ka hi a. Tu in na kiang ah ka hong om nawn hi hon chi hi.
Kum 28 ka hihlai a ka thil tuah khat hon mu sak nawn hi. Hiai hun in innsawng sangtak mai tung apan tawm khia a, kithah ka na sawm nawn hi. Midang kei bang a hin kichimtak leh beidong tak tampiten tua bang in a na hih khinta uhi. Tua bang din mun a ka omlai tak in lamdang tak in khut hong kilang nawn in hong kai khia nawn hi. Huai hun ka muh kik zawh in Pathian in huai hunlai a hong kai khia kei ka hi a, tu in na kiang ah ka hong pai nawn hi hon chi nawn hi. Ka din na mun ah ka khukdin suk a, Mikhial thumna nei ding kuamah panpihtu ding ka nei kei. Ka biang ah ka mittui a hong luang suk zungzung a, Nang ka Pathian na hi. Ka hinna na kiang ah ka hon lan khia hi. Tuban siah nang tawh tawn in ka pai gigeta ding chi in ka hinkhua a ding in thupukna ka bawlta hi. Hiai hi April 1985 kum ahi.
Karnih zawh in Baptisma ka tanga, hiai zawh karnih sung in haksatna namenlou ka damsung a ka tuah ngeilouh ka hon tuak tou hi. Hiai tuh Christian ka hih ziak a Christ min a ka thuakna ahi. Ka hinkhua a ka it pen leh hihlungkim louh khak ding ka lauh pen ka nu ahi. Ka nu ka kiang ah hong pai in Christian suakta na hi maw hong chi hi. Christian ka suah lam ka hilh ngei kei, himahleh ka mel lat dan ah Christian ka hi chih a thei mai hi. Christiante tawh leng om khawm ngeilou ka nun, Christiante bangchi bang ahi ua chih leng theilou pi in ka mel ah Jesu mel vak a mu ahi ngei ding. Singapore ah Christian i chih chiang in Roman Catholicte ahi mai uh. Protestant Saptuam a om kei. Ka nu kiang ah a gendan ding ka theituan kei a Hi nu Christian ka hi ka chi mai hi. Catholic ka hi hia Protestant ka hi hia ka thei kei.
Ka nun temta lian penpen annhuan inn apan hon lakhia in dawhkan tung a koih in, ka kiang ah hiai temta la inla hon that inla, hiai inn apan pawt khia in hon chi ta mai hi. Ken bel nu hiai bang thil ka hih thei kei ding ka chi hi. Na hih theih kei ding leh ken ka hih ding chi in temta la in kei thah hon sawmta mai hi. A temta suh sawm in ka buai mahmah hi. Huai ni in ka nu a hat mahmah mai hi. Hingtak na hi nawn kei a huaiziak in na sih ding ahi hon chi hi. Tem ka suhsak sawm na lam ah ka nih un ka liam kha tuak uhi. Bang hiha bang chi om ding ka hiam chih ka thei keia ka buai mahmah mai hi. Ka lawmte khat in hon hilh Jesu min sam in kikou khia lechin amah hong pai ding ahi chih ka thei suah phut hi. Ken leng kintak in Jesu ka hon poimawh hi chi in ka kikou khia hi. Jesu min ka sap tak in ka nu khua phawk lou in tuanglai ah a puk suk hi. Kintak in ka vante kaikhawm mengmeng in inn ka pawtsanta mai hi.
Nikhat thu in ka innkuante, ka lawmte. Ka minamte uh leh ka nek muhna ding a ka nnasep ka chan vek mai hi. MUIS – Majlis Ugama Islam Singapore ( Muslim council ) theih in misi ka hita chih puan khiak in a omta. Kum nih sung sepna ka nei thei nawn kei, Ka hihna tengteng thaisiat vek in a om a, teen theihna mun ka nei nawnta kei hi. Aziak chu kei kha a mau ngaihtuah dan a misi hita ka hi. Ka hihna ngei chih bel ka nnasep ngeite leh si hilou a hing ka hihna ka neih kik theihna ding in Ukilte panpihna lou in chu thil hi thei ahita kei.
Nidang leh hun dang ah, kiphatna hilou in haksatna ka phut khak hun in leng ka kap ngei kei, ka hih thei lua na ding chi in ka kinem zel hi. Ahihang Pathian ka muh nung kum nih sung chu niteng in ka kap kap mai hi. Aziak bel Pathian in ka mihinna kisathei takmai hinkhua kha hon suksiat sak vek ziak in. Ka mihinna sunglam a om khaatna, huatna, hehna, thangpaihna leh kisaktheihnate tengteng Pathian in a susia veka, Bang mah ka hi nawn ta kei a. Hihtheih bang mah nei nawn lou in zero in ka om a, ka kapkap mai sek hi. Kum nih sung chu Akpin a noute a etkawl bang in Pathian in hon enkawl ahi mai. Huchih sung in Mang bang ka nei zela, mengmuhna chih bel thil hong tung dingte theih khawlna bang ka nei hi.
Ka sanggam pasal nihte a upa nai kei ua, bang hih ding chih bang mah mumal leng athei kei uhi. A hihang in innkuan hangsan tak leh zahhuai ka hihna uh kepbitna ding in kei hon thah uh a poimawh hi. Hon thah theihna ding dan thil tampi a a ngaihtuah sek uhi. Ka sanggam pasal khat in a inn ua ann ne ding in hon chial hi. Ka sanggamten ka tung a bang hih sawm uh hiam chih Pathian in hon mu khawl sakkhin hi. Ka nek ding ann ah poison a hel ua, Pathian kiang ah bang ka chi dia ka chileh Pathian in ne in hon chi a, ken leng ka ne ding ka chi hi. Ka ann nek en nuam in leh ka sih ngei ding lamen in ka sanggamte ka kim ah a tu uhi. Ka nek zawh in bang mah ka chi kei, ka kipak chi in khut ka sil a ka pawt khiak san hi.
Hun dang khat ah ka nun ka inn ua va pai ding in hon chial nawn hi. Middle East a dawi siam mahmah a minthangte lak a khat kei sawisa ding in a na sam hi. Tua Dawisiampan kei hon muh tak in ka kiang a puan ngou silh a ding khat mu hi. Ka nu kiang ah kei leh ka lawmte kiang a thilhih theihna om sang in na tanu kiang a om pa thu neihna lian zaw in hat zaw hi. Huaiziak in bang mah ka sem thei kei chi in gen hi. Tuni a ka kipahna mahmah ahihleh hiai Pathian ka theihna mai hilou in amah tawh thumna tungtawn a kihou thei a ka om uh ahi. Hiai Pathian in ka kiang a thugen mai hilou in kei tawh ka kihou thei uhi. Ka kiang ah thugen in ka kiang ah hong pai zel hi. Kei tawh om khawm nuam a sa a, hon ngai mahmah hi.
Pathian in a nna sem dia hon saplai in kum 30 vel a upa ka hita a, Mosi mah bang in Pathian aw midang sam mai in ka upata ka chi hi. Himahleh Pathian in hon sam teitei a, full time in ka sem teita mai hi. Pathian in mitampi tak seppih ding hon piakte, hon panpihtute, leh hon hanthawn gigete ziak in ka kipak mahmah hi. Christian ka suah ziaka ka mansuah ka chihte tengteng Pathian in a leh za in hon pia kik vek hi. Tuni in khovel ah inn tampi ka nei a, lawm tampi ka neih ban ah ka sanggam numei ding leh ka sanggam pasal ding tampi tak hon pia hi. A za a sim mai hilou in a sanga sim in hon pia hi.
1993 kum in ka gilpi lam (Hysterectomy) at ngai ding ahi chih Doctor in hon hilh hi. Pathian aw hiai tawh kisai in nang planning hon bawl in. Nang planning ahihleh ka ki-at ding a, huchi ahih kei leh Pa aw nang mah in hong kem mai in ka chi hi. Ninih zawh chiang in at ngai lou in ka dam siang hi. Pathian in hon damsak hi. 2000 kum in Israel gam ah thumna tawh kisai a Makai ding in ka hoh dek hi. Ka kuan khiak dek in Doctor in na nawi lang nih ah cancer natna om a third stage hita ahi hon chi hi. Teel ding dang om kei, at ding na chih leh i at ding, ahihang Israel apan ka hong kik nawn chiang in hi hen chi in ka zin san hi.
Israel a hotel ka tunna apan in tanglai kumpi Solomon in Temple a lam kikhen sia a baang ding lai, tulai a kahna baang ( Wailing wall ) a chih mai uh kigal muh hi. Kumpi Solomon in Temple a lat lai a a thumna aw ka bilkha ah hong ging kik hi. Na mi Israelte hilou gamdang mi, gamlapi apan na min hanga hongpai mi thumna zong za in. Tua bang mi hong pai a hiai Temple lam nga a hong thum chiang in. Nang na teenna mun van apan in na za inla, tua gamdang min hon nget peuhpeuh hih sak in. ( 1 Kum. 8: 41 – 43 ) Ka tunna hotel tohlet bula ding in tua kahna baang lam nga in Pathian aw na hotdamta hi in, na ta hita mahleng leng Juda mi ka hi kei a, gamdang mi gentel mi ka hi. Ahihang nang Pathian ka hon gingta hi. Na khut in hon khoih inla hon damsak in chi in thumna ka nei hi. Nileng in ihmut nuam tak in hon ihmusak a, huai sung in Pathian in surgery na bawl in ka nawi langnih a om cancer natna a hon damsak hi. Singapore a ka kik nung in Doctor in hiai natna tawh kisai in hon at ka poimawh nawnta kei hi.
Mitampiten na testimony hi thupi in lamdang thei lua ahi hon chi sek uhi. Himahleh kei mimal tak ah bel mun tamtak ah Thoma bang mai ka hi. Chiamtehna leh a chetna ka ngiat seka, tuate lou in ka gingta ut kei sek hi. Tu in Thoma tungtang ah Jesu lungkim lou hi. Hon en inla, hon khoih inla, Pathian ka hih hon thei in. A thugen a zawhna ding in mulou a kei hon gingtate a hampha uh chi hi. I hinkhua uah Pathian in thil thupi tak hon hihsakte ziak chauh khawng a kipah thugen sek i hi uh hia?
Zingkar thoh hun chiang a i thou nawn thei mai khawng kipah thu na gen ngei hia? Ken chu ni vak hoihtak mai hon muh sak khawng, ann nek ding hon piak khawng, lawm polh ding hon piak khawng kipah thu ka gengen mai sek hi. A lian hileh a neu hileh ka tuah bangbang in kipah thu ka gen zel mai hi. Thil tengteng Pathian ziak a om ahi ngala. Ka vangphat deuh ni chauh hilou in ka vangsiat deuh ni in leng kipah thu ka gen mai hi. Aziak ahihleh haksat hun leh vangsia i kisak hun khawng thil tampi i zir suah hun, khalam a i khan hun khawng ahih sek ziak in.
1990 lak vel in kum 6 sung Madras tua Chennai kichita ah ka om hi. India a ka hoh hi missionary dan a hoh ka hi. India a ka om lai a ka testimony khat Pathian min thupina ding in ka gen nuam lai hi. Team khat bawl in Madras ah Crusade ka bawl uhi. Ka theih gige khat chu nitak khat ka teamte uh paikhiak nung un, Thugenna hun khat piak in ka om lai hi. Azingchiang in laidal Pathian thu kigelhna kholak a hawm in ka vak khia nawn uhi. Huai zan in kei kia in ka room sung ah ka om hi. Nupila khat a ta neuchik khat pom in ka kiang ah hong pai hi. Huai a naungek pom pen ahihleh a luguh phelnih kisuah, akhuakte kitheh dar nengnung in om hi.
Zan nitak na thugenna ah ka Pathian in thilhih theihlouh neilou ahi na chi a, Hiai ka naungek a ding in na Pathian in hihtheih a nei diam? A pasal zukham in huai a nau uh inn baang zepna a nei in naungek luguh kiphel dan ahi. Huai nupila hong kikhawm in ka thugen a na za hi ding dan ahi. Mulkimna nei hetlou in naungek ka khut a la in ka pom hi. Ka biang ah ka mittui kham vuallouh in a hong luang suk zawihzawih mai hi. Ka mit hak kawm in Pathian aw hiai nupi kei kiang hilou in nang kiang a hong pai ahi. Nang mah gingta leh muang in a hong pai hi. Na thuchiam na tang tunsak ngai ahi. Nang Pathian theihna bang mah hon nei kei mahleh ginna tawh hong pai hi. Tua bang a thumna ka neih lai in ka mit muh mahmah in khut kilawm tak mai khat hong kizan khia nawn in naungek lu hong kikhoih hi. Tua phet in ka mitmuh mahmah in naungek luguh hong kibawl hoih nawn a naungek dam kik hi. Hiai thil tun hi 1993 kum ahi.
A lamdang mahmah khat ahihleh Pathian a ding in thilhih theih louh a om kei i chi sekna ua, tua bang hih ding in i gingta zou kei nak uhi. Na gintak leh Pathian thupina na mu ding. Ka thumna ahihleh Pathian aw India, Jesu a ding in – Jesu, India ading in chih ahi.
(Note: Internet a hong kikhah khia Video a a thugen apan ka lehkhiak, a tom thei leh a mam thei bang pen dia bawl lem a Toupa thupina i muh leh zaktheih na uh ahih lamen a kon gelh khiak ahi.)
No comments:
Post a Comment