The Zou Artiste Union (ZAU) HQ saina in tuni sunnung dak 1 in zogal memorial hall complex zoveng ah ZoFilm Company in abawl Zou Feature Film “ITNA TULLOU” kichi mipi ettheih dia zuak khiak ding in hongkhiakna om hi. Hiai hun ah itna tullou a tel actor, actress, part la kha teng ban ah ngaina tu mi tamtak in uap ua, N ibochao singh, special contractor in chief guest hihna toh uap in zou feature film itna tullou hongkhia hi. Hiai hun zatna Paul TK. Lal leh Bliss lhingboi ten makaih ua john haulamlian in thumna a hun hong in, M thanga zou, director zo film company in introduction leh welcome speech hunla in, Kaisuanlian President ZAU in thugenna hunzang a, khuallian te apan thugenna om in, zogam ronald lalpu lead hero itna tullou in vote of thanks gen in john zamkhomang in hun khakna nei hi. Program zat hun sungin lasiam tuamtuam in lasakna nei ua, program zatzoh in itna tullou film screening nei uhi. Itna tullou film ahihleh M. Thathang zou in a direct hi a, ngainuomching in a produce hin kigen hi.
Xxxx
Tuni sunnung dak 1:30 in district hospital a MS conference hall ah district non communicable disease NCD cell leh district hospital Churachandpur saina in WORLD diabetes day zatna om hi. Hiai hun Dr. P. Binata MS (Opthalmology) Joint Director (Health),& state nodal officer SNO (NPCDCS),Government of Manipur in chief guest hihna toh uap in, Dr. Kimngaihching Simte@ Dr. Kim Simte Chief Medical Officer/ District Mission Director, DHS ,Churachandpur leh Dr. J Son Gokham Samte, Medical Superintendent District Hospital Churachandpur leh vice chairman district non communicable disease NCD cell CCpur ten functional president leh chief host hihna toh uap uhi. Dr Y Premchandra Singh MD.Diabetologist incharge Diabetes clinic & district nodal officer DNO CCpur in welcome adress gen in, khuallian te apan thugenna om in, hiai hun ah chief guest Dr. P. Binata in Eye Care for Diabetes chih thupi pan san in ki-veng, etkol leh kikep dingdan genna nei in, DrTh Nirpendra MD .lncharge Day Care Chemotherapy Centre non communicable disease NCD,CCpur in vote of thanks gen in hun zang zou uhi. World Diabetes day ahihleh zan November 14 hi a, day zatna in Churachandpur District Hospital a Casualtybuilding ah Eyes on Diabetes chih thupi a zang in kum 30 tunglamte ading in free diabetes and hypertension screening camp nei ua, huai hun ah mi tamtak a free in kitest sak uhi.
Xxxx
New lamka elim veng tawna road aom khamtheih hih zongsang te etkolna leh kepna mun Gilead’s Balm Care Centre kiphut khiak nung akum 14 chin kum lopna tuni in amau CHAPEL ah nei uhi. Hiai hun The Gilead's Balm Care centre aom inmate sungkuan te leh centre deihsaktu te toh zang khawm ua, Thangkhosuanmuang guite executive member ADC CCpur in chief guest hihna toh uap hi. Hun zatna Bliss in makaih a, G. Pauthankam Director GBCC in welcime leh keynote address gen in, Pastor Dr. M. Gousuan in hasotna thu gen in care Center leh inmate te ading in pathian kiang ah thumsakna nei hi. H. Thuamson founder advisory member in thugenna nei a, chief guest Thangkhosuanmung giute apan thugenna om in, johnson in vote of thanks gen in, Upa K khupzathang in thumna in hun khak hi. Program zat hun sungin Gilead balm light choir leh inmate te apan special number ngaihkhiak in om a, Gilead’s balm care centre ahihleh november 15 2002 in khamtheih hih zongsak te olmohna liantak toh ana kipan khia in tuni tan mi 1700 val omta ua, huailak ah mi 200 vel in sihna tuak in, mitam tak khamtheih kol apan suakta uhi. Care Center apan suakta lak ah saptuam ah local chairman hihna len tanpha aom ban ah theology leh missionary hunkhop om in, state leh centre solkar ah sepna mu tamtak leng om hi. Gilead’s balm care centre ah manipur state sung sadar hill, chandel, singngat, thanlon, henglep, imphal ban ah Nagaland leh arunachal state apan inmate hunkhop om uhi. Tulel in Gilead’s balm care Center ah staff leh volunteer etkolna nuai ah inmate 58, omlel hi.
Xxxxxcc
Siamsinpawlpi SSPP GHQ in Siamsinpawlpi Foundation Day hun ah kum teng a kipezel bangin, Siamsinpawlpi General Headquarters in kum 2015 sunga Siamsinte’ lak ah lam tuamtuam a lohchinna tungtuan ana ngahte’ kiang ah Siamsin Award kum nawn janaury 13, 2017 in piak khiak sawm nawn uhi. Haii hun ah Siamsin Award tuamtuamte hawmkhia ding te ahihleh DONORS AWARDS ah Upa (L) Chinzagou Shoute Memorial Award For Excellency , (L) Zamtun Samte Memorial Meritorious Award, (L) UPA T. Thangthuam IPS Memorial Award, , (L) Tualkhothang Naulak Award, (L) h. Jelshyam IAS Award, YPA General Headquarters Award, PTC General Headquarters Award, (L) Mangzapau Swante Award, (L) Thangzamang Guite IPS Award, , (L ) Haukhopau Guite Memorial Award,, leh V.K. Tawna Award thum hi a, siamsinpawlpi SSPP GHQ Meritorious Awards HSLC OR EQUIVALENT EXAMINATION, HSSLC apat atung lam, Professional, M. Phil leh Doctorate Degree hiding a, Siamsinpawlpi General Headquarters honour Awards ah Distinguish Service In Education leh Civil Service And Allied Services hi ding hi. Hiai SIAMSIN AWARDS sang thei ding a chitna neite leh thuchian kimzaw SSPP Complex, Siloam Veng Bungmual ahihkei leh Email ID siamsinaward@siamsinpawlpi.org ah kanchet theiih ding a, application format omsa dungzui in November 30, 2016 tan in application form, boi data leh certificate marksheet te piaklut theih ding hi. application form muh theihna ding munte ahihleh SSPP Joint HQ, Blocks leh Branch Heutute’ kiang ah amuh theih ding ban ah website kipia ah leng dowmload theih ding a, SSPP Complex, Siloam veng, bungmual ah leng muh theih ding hi.
XXXXXXXXX
Chief election officer, Manipur in maban election ding toh kisia a Ethical voting and informed voter chih thupi pan san a District level ah open quiz leh slogan writing competition nei dia thu suah abawl toh kiton in, CEO ADC, SVEEP Chairman churachandpur in District sung a open quiz leh slogan writing competition neih hun ding leh amun ding order suah hi. huai dungzui in November 18 sunma dak 11 in lagecy faith academy leh young pillars college ah sun dak 12:30 in om ding a, November 21 sunma dak 11 in Bethesda nursing college, November 22 sunma dak 11 in don bosco higher secondary leh sun dak 12:30 in VK tawna college, November 23 sunma dak 11 in rengkai government higher secondary school leh sunnung dak 12:30 in Churachandpur government collge, November 28 sunma dak 11 in rayburn college leh December 1, sunma dak 11 in sielmat Christian higher sec school ah nei ding a, hiai toh kisai in zingchiang November 16 sunnung dak 1 in DC office chamber ah meeting om ding hi.
XXXX
MC mary kom, MP Rajya shaba in Saansak adarsh gram yojana SAGY nuai a Saidan village model village dia hongkhiakna aneih zoh toh kiton in zing chiang November 16 sunma dak 11:30 in BRGF Hall, DC office tuibong ah SAGY toh kisai gen khawmna om ding a, hiai toh kisai a District level empowered committee te hiai hun ah telkim chiat ding a theihsak hi uhi.
XXXXXX
United Naga Council UNC in Manipur hinna' lampi national highway nih te hun chiam omlou a economic blockage abawl uh toh kisai in, Churachandpur consumer club CCC in dawr kai te ading in theihsakna leh ngetna bawl hi. huai dungzui in CCC in district sung a dawr kai ten economic blockaDe suanlam a van man khangsaklou ding in theihsakna bawl ua, hiai toh kisai market dinmun CCC in enkai gige ding ua, vanman khengval leh diklou tak a zuak aom leh CCC in dan toh kituak in action la ding uh ahihdan uh taklang in, thusuah ah SN John president leh Justin Simte general secretary ten suai kai uhi.
XXXX
Imphal keisampat parking tungtang a buai na om ziak in, zan nov ni 14 apan in Lamka leh imphal kikal a passenger pua a tai CDMBTA nuai a direct bus te leh TRBOTCS kiran group nuai a line bus te a tai omlou in khawl uhi ..hiai toh kisai ahih leh CDMBTA in theih sakna ana bawl sa hi a, tua toh ki ton in direct bus leh line bus te a tai om lou uhi, zaan zing kal in TRBOTCS kiran group nuai a om bus 6 vel lamka hong lut in newbazar parking ah kidoh mah le uh CDMBTA in theih sakna abol sa dungzui un sawlkik ua, line bus 6 te leng passenger pawlou in kik uhi. CDMBTA President NL Zathang apan thutut kingah dan in lamka leh imphal kikal a passenger bus service khawl sak a om pen mipiten thei siam ding in nget na bawl hi. CDMBTA in ahihleh kum 1995 apan Registration no 03/ccpur ngah ua, TRBOTCS inleng kum 1999 a angah in, Manipur high court thupiak dung zui a Director Transport Addl SP Traffic DTO Imphal West te makaih a meeting ding achih hun ua bang ziak a high court thupiak zah taklou a meeting na a tellou nahi ua, huai ban ah Nov ni 24 ni a Imphal West OC in meeting asap ni a, bang ziak a ki theih moh bawl a hoh lou nahi uh hiam chiin dot Na bawl uhi, CDMBTA President in agen zelna ah news paper leh adangadang te ah kigengen hun hi non lou chi a, kimai tuah a ki hou ding in chial na bawl uh.
xxx
CEC YPA GHQ ten apaisa November 12 in YPA Lamka Block vaipawte tawpsak ahihdan thusuah bawl ua, huai tungtang ah tawpsak a omten hilhchetna bawl nawn uhi. Tawpsak a omten thusuah abawl uh kimudan in, Tuithapi leh Mualpi Unit vehna nei dia akisak kholh laitak un CEC YPA GHQ in tawpsak ahihdan taklang ua, huai thupukna in YPA ki-ukna danbupi kalh in, namsung a khentuamna omsak deih hizaw uhiam chi in dotna bawl uhi. Hiai thusuah ah YPA Lamka Block apan H. Chinsianmung, President; Nengzalian Tonsing, Secretary; T. Paubiaklun, Finance Secretary; Lianminthang, Assistant Secretary; G. Kamdinglian Treasurer; leh Singkhanlun Valte, Information secretary ten suaikai ua, Lamka block apan GHQ adia asawllut uh, Pu Khailianthang Tonsing, Pu Thathang Langel leh Pu Singnunsiam Ngaihte leng amawhpuakna uapan ki-awngsut ding in ngen uhi.
xxxx
No comments:
Post a Comment