Manipur Express | December 12, 2016

HEADLINES:

CM O. Ibobi in Highway a di’n sumtam sem sanction ding in ngen

Union Minister in Rs. 1,152 crore bei ding project 17 patna di’n hong

Imphal, Dec-11: Union Minister (Road, Transport, Highways & Shipping) Nitin Gadkari in Jiribam leh Imphal ah Rs. 1,152 crore bei a lampi leh lei kibawl ding project tuamtuam 17 tuni’n nasep patna ding in hong hi. Imphal a 1st Bn Manipur Rifle Parade Ground ah tuni zinglam dak 11:00 velin lamlian bawlna ding Project-te nasep patna ding a honna hun ah Union Minister Gadkari in a gendan in Centre government in Manipur ah special status pia a, huai dungzui in tuban kum 3 akipan kum 4 sung in Manipur a lampi leh lei bawlhoihna ding in Rs. 22 crore val package piak ding in thukim hi’n gen hi. 

Tuni a Nitin Gadkari in lampi leh lei bawlna ding project tuamtuam 17 bawl ahih hun ah lampi teng a saudan kilometer 493 hiding a, huai nasepna ah Rs. 1152 crore bei ding hi. Project-te lakah khenkhat National Highway Infrastructure Development Corporation Limited in bawl ding a, Project khenkhat Manipur government a Public Work Department in sem ding chi’n gen hi. Tuni a Union Minister in project tuamtuam nasep patna ding a honna ah Union Minister of Human Resource Development banah BJP Manipur Pradesh in-charge Prakash Javadekar leng tel hi. Huai hun ah Dy. CM. Gaikhangam; Works & CAF & PD Minister Ksh. Biren; Commerce & Industry Minister Gonvindas Konthoujam; IFCD Minster Ngamthang Haokip; PHED Minister T. Manga Vaiphei; Education Minister Dr. Kh. Ratan Kumar Singh; Social Welfare Minister AK Mirabai Devi; Parliamentary Secy. M. Prithiviraj Singh; Parliamentary Secy. Vungzagin Valte; T. Meinya, MP Lok Sabha; Thangso Baite, MP, Lok Sabha; Abdul Salam, MP, Rajya Sabha; MC Mary Kom, MP Rajya Sabha leh MLA tamtak tel uhi.  

Huai hun a tel Manipur Chief Minister O. Ibobi in a thugenna ah National Highway-te India government a ding gou (assets) hi a, huai ah Economic blockade hiam nasepna leh Highway lamlian kizatna kuaman ahih buai theihlouh ding in Supreme Court in thutanna bawl hi’n leng gen hi. Aman a genzelna ah tulel a UNC in economic blockade a bawl uh Union Home Minister Rajnath Singh kimuhpih in blockade thu ah Centre a kinlam a kigolh ding a ngen ahihdan gen a, himahleh tutan Centre in pan a lak lam theih hilou chi’n gen hi. CM in a genzel dan in UNC kichi NSCN-IM in a tawsawn pawl hi a, a lehlam ah Centre leh NSCN-IM kalah peace talk pailel hi’n gen hi. Huai ziakin Centre a BJP makaihna NDA government in hiai tungtang thu ah lungsim siangthou tak zang in UNC bandh beina ding a kigolh ding in ngen hi’n gen hi.  

Programme kipatma in Union Minister tuni zinglam dak 9:00 velin Imphal hongtung a, huai apan Helicopter zang in zinglam dak 9:30 in Jiribam vapha a, Jiribam Hr. Sec. School Playground ah National Highway-37 (Imphal-Jiribam road) a Barak leh Makru lei (bridges) 2 Rs. 141 crore bei a kibawl ding nasep patna ding in hong hi. Huai hun a Union Minister in a thugenna ah Imphal-Jiribam lampi kum 3 sung a bawlhoih hiding a, lei 2-te kha 32-34 sung a bawl zawh ding banah project dang tuamtuam 22 leng kum 2018 tan a zawhsiang hiding in gen hi. Hiai hun BJP Manipur in-Charge Prahlad Singh Patel, BJP Manipur Pradesh President Ksh. Bhabananda leh Chief Secretary O. Nabakishore te’n uap hi’n kigen hi.   

Union Minister in tuni a project tuamtuam 17 nasep patna ding a honna (foundation stone laying ceremony) a neihte a nuai a bang ahi.

(A) NHIDCL PROJECT

NH No. Name of Road Length (km) Cost Rs.(Cr.)

37 Construction of Barak and Makru bridge 0.276 141

102A Ukhrul-Toloi-Tadubi (5 project) 115 64

102B CCpur-Singngat-Singngat-Sinzawl-Tuivai (3 Project) 162 168

137 Tamenglong-Khongsang 40 19

(B) MOREH PROJECT THROUGH PWD

NH No. Name of Road Length (km) Cost Rs.(Cr.)

39 Mao Gate to Imphal City (3 project) 90 451.2

150 Tipaimukh-Imphal-Ukhrul-Jessami section (3 Project) 71 288

137A Khambong-Nambol-Mayang Imphal-Kakching-Lamkai section   15 20,9

TUALSUNG:

Dist. hospital in MO 33 leh nurse 17 tasam

Lamka, Dec- 11: District hospital, CCpur in tulel in staff kiching neilou in medical officer 33 leh nurse 17 tasam hi’n medical superintendent Dr. J. Son Goukham Samte in gen hi. Aman agenbehna ah, hospital ah lupna 133 ban ah special ward room 2 (single bed -1 & doubled bed- 2) om a, damlou tamhun ah lupna kidaihlou in varanda/corridor tanpha zat hisek a, lupna 200-bedded a upgrade ding himahleh building puahthakna pailel ziakin hithei nailou chi hi. Hospital in sanction post omzah staff a ngahlouh ziakin tamtak tasam a, a diakin medical officer sanction post 42 lak ah 9 lel nei in 33 tasam chi a, staff nurse 49 om ding lak ah 29 nei in, huailak ah FHW Training School adia 2 utilize hizaw mah hi’n gen a, specialist doctor ahihleh sanction post sa tamzaw in 30 val nei thepthup hi’n gen hi. 

LDC post 6 ding lak ah 1, UDC 2 ding lak ah 1 leh head clerk 1 nei hi’n leng gen hi. Maban ah naungek piangtung-te etkolna ding Sick Newborn Care Unit (SNCU) kichi honkhiak hiding chi a, tulel in vanzat leh a sem dingte’ training piak masak poimawh ban ah room leng zawhsiang hinailou hi’n gen hi. OPD leh Birth & Death Certificate lakna tawh kisai maban ah computerize hihsak sawm uh a, room bawlzou in vanzat leng koihta mahle uh token (ticket) ading software poimawh lai hi’n gen hi. Huchikal ah, semtu adiak in nurse kidaihlouh ziakin mundang a nurse zilkhin bangzahhiamte experience course zilsak hi uh a, amau te’n thadawn tuan mahmah uh chi hi. ISO certified hospital ahihna ah siangthouna ban ah paitent-te etkolna tawh kisai naktak a kepbit poimawh ahihdan gen hi.

NH-102B-Guite road bawlna in ma sawnzel

Lamka, Dec-11: Bhartia Infra Projects Ltd. te’n National Highway-102B, Guite road abawl uh masawn zel in Singngat khua apan Mualnuam khua kikal lampi hoihlou leh akuakna diakte ah suang sung uhi. Central govt apan thupiak bang in lampi siatna deuh Mualnuam-Thuangtam gam apan Suangdoh gamsung Zampi Camp kikal ah suang leh leisan sung uh a, road roller zang in gawimai zawh in water tanker zang in tui buak uh a, lampi nuam mahmah ta hi’n kigen hi. Guite road bawlhoihma in bolero gari zanga dakkal 6 taina leng tu’n dakkal 3 a kitungzou hi’n khualzin mi khenkhat apan kiza hi. Bhartia Infra Projects Ltd te’n Guite road ah suang leh leisan asun zawhnate uh Lamka khawpi sung a Rengkai road, Nehru Marg suk leh IB road tou sang ahoihzaw leh nuamzaw hi’n kigen hi.

A khut in holy bible gelhsuak

Lamka, Dec- 11: B. Choilalfel d/o (L) Sonkhanlien of Headquarters Veng in Vaiphei holy bible ni 267 sungin akhut in gelhsuak a, tuni’n a tenna inn uah Pastor SL Minlun Neihsial, Local Pastor, EOC Central Church, Hill Town in hongin Pathian kiang ah lan hi.

Choilalfel in ahihleh March 2, 2016 apan in November 24, 2016 in gelhzou a, ni 267 sung lut chihna suak hi. Pathian in 2016 sunga holy bible akhut a gelhsuak ding alungsim a kihoupihna aneih tungtawn in gelh hi’n gen hi. Amah, ICICI Bank, CCpur branch a semlel ahih ban ah EOC Zion Church a tuailai member poimawh hi’n leng kigen hi.

EU & EGF Golden Jubilee lawm

Lamka, Dec-11: People Health Foundation, Gangpimual ah zan apan Evangelical Union & Evangelical Graduate Fellowship (EU & EGF) Golden Jubilee lawm uh a, Dr. Rev Enn Za Sian in Golden Jubilee lopna hongkhia in Moatoshi Imsong, State Secretary, Union of Evangelical Students of India, NE in Pathian thugen hi. Tuzing biakna hun ah Dr. B. Kam Za Mung in Jubilee suang hong a, Bro. Poudikhon Pamei in Pathian kiang ah thumna in lan in Jubilee dakpi 50 vei khen ging uhi. Rayburn Hr. Sec. Evangelical Union (EU) leh CCpur College EU te’n Pathian phatna la sa uh a, Dr. David Jamzathang in Jubilee Souvenir hong hi. Aman agenna ah EU & EGF kiphuh khiat tung a member hunkhop in Thupina gam hon zotsan uh a, amau te’n Golden Jubilee program zang nuam ding in gen hi. Tuhun tan in college leh Higher Secondary tamtak omta a, EU & EGF keklet poimawh hi’n gen hi.

Pastor 6 leh Upa 50 ordination pia

Lamka, Dec-11: New Lamka a EBC Gospel Centenary Hall ah December 8, 2016 nitak apan ‘Diktatna a Kilamthakna’ chih thupi zang in Evangelical Baptist Convention Kumsim Khawmpi 68 veina pailel ah tuzing biakna hun ah Upa Dr. G. Chinkholian, Chairman, CEC in mi 31-te kiang ah Upa Pahtakna Lai pia a, Upa M. Ginzalian in mi 6 kiang ah Semtu Pahtakman (Meritorious Service Cetificate) pia hi. Sunnung a Ordination kikhop hun ah Rev S. Vung Minthang, General Secretary in Pastor 6 leh Upa 50-te Odination pia a, Upa M. Ginzalian in Certificate pekhia hi. Tunitak in Rev S. Vung Minthang in EBC Kumsim Khawmpi 69 veina, 2017 a Ulian ding te nagotna (commissioning) nei hi.

Khawmpi sung in Rev. Dr. Solomon Rongpi, General Secretary, Council of Baptist Churches in North East India in Pathian thugen a, Rev. Kumam Suresh Singh, Asia Co-ordinator of Partners in Disciple International in Bible Study makaih hi. Tunitak biakna program zawh in Upa Lalthanghlun Guite, Khawmpi Vice Chairman in  Khawmpi, 2016 khak hi.

Ni 41 sungin oil pump-te kia 1vei kihong

Lamka, Dec-11: UNC in Sadar Hills leh Jiribam district piching apuan ding deihlouh ziakin Nov.1, 2016 akipan NH-2 ah economic blockade abawl un Manipur ah mipi’ thautui telin niteng poimawh naktak in tasamsak a, blockade khakhat valta mahleh  lakkhiak hinailou hi. Security khauhtak venbitna in thautui pua telin gari tamtak pilut himaleh singtang bial ading allocation piak hilou hi’n kigen a, Nov. 23 a kihong chihlouh CCpur district ah oil pump-te tunitan kikhaklai a, ni 41 sunga 1vei kihong chihna suak hi. Allocation piak pah ahihkei leh district in thautui ah haksatna atuah uang semsem dingin kilang a, khenkhat in Aizawl apan thautui alaklut-te uh khawpi sung mun tuamtuam ah Rs. 110-/- in zuak uhi. Hiai tawh kisai district administration lam in theitawp suah mahle uh lawhsam hi’n kigen hi. 

Student Leader te’n kipahpihna nei

Lamka, Dec-11: HSA GHQ, HSA NC Hills & Karbi Anglong Jt. HQ leh NC Hills Indigenous Students Forum te’n zan nitak in Haflong Circuit House ah ICI General Assembly, Muolhoi a program zang ding a hoh Dr. Chaltonlien Amo, MLA & Chairman, Hills Area Committee, Manipur kipahpihna nei uhi.Student leader te’n Pherzawl District piankhiatna ding a, naktaka panla Dr Chaltonlien Amo’ tung ah kipahthu gen in Thangsuahpuan silhsak uhi.

Dr NC Khup in vanzat leithak 

Lamka, Dec-11: Eye Specialist Dr Nengchinkhup Munsong @ Dr NC Khup in mit (eye) tawh kisai etna tulai khawvel tawh kituakin (latest technology) thak bangzahhiam leithak a, amah leng tuni in  Lamka hongtung a, Seppatni (December 12, 2016) apan a tenna mun Bungmual, Lamlian veng ah avan thakte tawh mi et pan ding a, operation ngaite leng a poimawhdan in operation nei ding hi.

SUUNNA:

Zel Kho Zam (76) of New Lamka (G) tuzing in teknat in si a, nitaklam in CYA hanmual ah kivui hi.

Khaikhohau @ Haucha (75) h/o Sangchong of Hill Town, Lamka tuzing baihtak dak 2:30 velin BP stroke in si a, tuni’n kivui hi.

G. Khamzalian (71) h/o Roujam of AIR Colony, Lamphelpat, Imphal tunitaklam dak 12:10 in Cancer natna ziakin si a, Dec 13, 2016 in Christian Cemetery, Chingmeirong ah kivui ding hi.

STATE THUTHANG:

Nupi Lal Day 2016 kizang ding 

Imphal, Dec-11: Manipur Govt. inntekna in Dec 12, 2016 zinglam dak 9:00 in Imphal a Nupi Lal Memorial Complex ah ‘Nupi Lal Day 2016’ kizang ding hi. Huai ah Chief Guest in O. Ibobi pang ding a, Functional President in Gaikhangam, Deputy Chief Minister pang ding hi. Huai hun ah Nupi Lal movement hunlai a freedom fighter hinna pia-te zahna piak hiding a, Chief Guest leh Functional President in thu a gen zawh un DC/Imphal West in kipahthu genna hun zang ding hi. Hiai tawh kisai a Chief Minister O. Ibobi in leng deihsak thukhah bawl hi’n leng taklang uhi.

Jainson Haokip piak di’n thukim

Imphal, Dec-11: BJP Henglep Mandal Committee, CCpur pawl in Dec 18, 2016 in meeting nei uh a, Manipur ah Assembly Election om hun in 57-Henglep A/C ah BJP ticket Dr. Jainson Haokip, ex-Minister  piak ding in BJP State Council Member, Henglep Mandal-cum-BJP Permanent Executive Member, Manipur Pradesh-te thukim uhi. Mandal Committee meeting te’n BJP President Manipur Pradesh leh BJP Central Leader-te kiangah Dr. Jainson Haokip BJP ticket piak din recommend na lekha thon uhi.

CM in 33/11 KV sub-station leh Community hall hong

Imphal, Dec-11: Chief Minister O. Ibobi in tuni zinglam dak 9:00 velin Kakching Mahadeva ah Ministry of Power a  Restructured Accelerated Power Development and Reforms Programme (R-APDRP) scheme nuai a kibawl 33/11 KV-Sub-Station hongkhia a, huai nung in Kakching mah ah Managing Committee Turel Wangma Community saina in programme om a, huai ah khuallian Chief Minister O. Ibobi in Community hall hongkhia hi.  Chief Minister in sub-station hongkhiat hun in a thugenna ah district thak 7 bawlkhiak leh maban Assembly Election ding in kisai khakna a neih louh banah mipi’n district Headquarter mun-te baihsam tak in aphak uh deihna hi a, project zawhkhit louh hunkhop om ziak a govt. in district thak-te puangkhe pah theilou chi hi. Government in district thak bawlkhiak ma a stake holder-te thuzak lou a ngawhna tungtang nial a, tua bang thilte public forum ah thupukna bawl hi ngei lou a, kivaipuakna hoih leh lemtang zaw ding banah singtang leh phaizang gamte a kituak a development tangtung sakna ding hi a, singtang leh phaizang gam-te kituak a khantouhna a om chiang in muanna leh bitna om ding hi’n gen hi.

ZUF te’n Manipur govt. kiang ah dotna bawl

Imphal, Dec-11: Zeliangrong United Front (ZUF) te’n state govt. in stakeholder teng lemsak pihna lalou in piltak a minthak bawl a Kangpokpi leh Noney (Longmai) telin district thak 7 bawlkhiak tawh kisai dotna bawl uh a, Manipur government in mipi a khemna ‘zu lui pen bottle thak ah sunglut tawh kibang a, a diak in Zeliangrong mipi leh Naga te’n ‘district min’ buaipih lou in pu-pa gam tawh kikhenna ngaih khawk uh chi’n gen uhi. Manipur government in a kintheipen a Noney, Jiribam leh Kangpokpi district-te a jurisdiction/boundary tawh kisai ‘white paper’ a luikhiak ding uh phut a, district kibawl thak Kangpokpi leh Jiribam in Zeliangrong-te pu-pa gam a sukkhak leh mipi vaiphawmna tawh kituak lou a thutanna bawl Manipur govt. in agu a thuak ding uh chi hi. Manipur govt. in district thak tungtang ah kivaipuakna hoih zaw leh lemtang zaw ding in gen mahleh uh mipi’n kintak a thutanna bawl ahihbanah maban Assembly Election etna ahihdan thei uhi. Manipur govt. in boundary tawh kisai a ‘white paper’ luikhiak ding a lawhsap ua leh ZUF te’n Zeliangrong inhabited area ah Congress Party nasep khawlsak ding uh a, Zeliangrong gam inch 1 leng piak lou ding banah govt. thutanna naktak a doudal ding leh pu-pa gam humbit ding a Zeliangrong mipi kigingsa a om ding hi’n leng theihsakna bawl uhi.

Party supporter te’n BJP office luh sawm

Imphal, Dec-11: Manipur Assembly Election ding tawh kisai a political convention hun ah BJP Manipur Pradesh makaih-te a kilat louh ziak un constituency 2 apan BJP supporter thangpai te’n BJP office luh sawm uh a, police te’n BJP supporter-te khawl khiakna ding in chiang pum zat banah tear gas tanpha kapkhum uh a, Police khat in theih kholh lou a tear gas a kapkhak ziak in a gei a Police dang khat in liamna tuak hi’n gen uhi. Akigendan in Patsoi A/C apan Sapam Kunjakishore leh Heinang A/C apan Sharat (ex-Minister) te’n BJP ticket tungtawn in Election tuh sawm uh a, intending candidate 2 te’n party political convention sai uh a, huai hun ah BJP makaih te’n Union Minister Nitin Gadkari tawh vatel ding uh ahih dan theisak uhi. 

Political Convention zatna ding mun ah constituency 2 apan BJP supporter te’n hun sawttak BJP Manipur Pradesh makaite a ngak nung ua, mipi thangpai te’n nitaklam dak 4:30 velin Nityaipat Chuthek a BJP office ah BJP makaite’n a kilat tou ziak uh puang ding in phut mahleh uh huai tungtang theihsakna bawl kuamah omlou ziak in mipi thangpai te’n BJP office luh sawm uhi. Huai kim a om police te’n kiphinna neite kham daih sawm in panla uh a, kiphinna neite’n van tuamtuam suksiat a sawm ziak un police te’n chiampum leh teargas kap khum uh a, huai ah hospital tanpha ah tut dia liamna tuak omlou hi’n gen uhi. Thusuak in a taklat dan in state leader tallang khat in BJP National leh state leader-te kiangah akidempih intending candidate-te political convention hun ah tellou dia party tanpha nusia ding a vauna a bawl ziak a tellou hi’n gen uhi.

Speaker in Community Hall hongkhia

Imphal, Dec-10: Pukham Laipham ah tuni’n Pukhao Laipham Multipurpose Community Hall hong khiatna om a, huai ah khuallian Th. Lokeshwar Singh in community hall hongkhia hi’n gen uhi. Huai ah Functional President in W Shyamkesho, Member Dolaithabi Zila Parishad pang a, Guest of Honour in Pradhan Pukhao Gram Panchayat N. Bimota Devi leh Pradhan Haraorou Tangam Gram Panchayat Hemapati-te pang uhi. Speaker in a thugenna ah government in kivaipuakna hoih zaw ding gelna a district thak bawlkhia uh chi a, Union Minister Prakash Javadekar in district bawlkhiak tungtang state govt. divide and rule policy hi dan a agen vangtah huai a, BJP te’n vaihawmna a let khak ding uh tawh kisai a mipi pilvang ding in theisak hi. G. Robindro Sharma, Chief Engineer, Irrigation and Flood Control Department in a gendan in Dolaithabi Project ahihleh January 2017 in zat theih hiding a, project bawlna ah tutan in nasep 94% zawh hi a, tuma in December 2016 sung a zawh ding bikhiah himahleh economic blockade leh demonetization ziak a zekai hi’n leng taklang hi.

11-A/R te’n meikang phel mitna ah panpih

Imphal, Dec-11: Chandel a Moreh town ah Dec 9, 2016 zankim in furniture bawlna mun ah meikang om a, thiltung theihphet in 26-sector nuai a 11-A/R te’n meikang phelhmit theihna ding in va panpih uhi. Assam Rifles a Quick Reaction Team a mi 4, Police leh fire brigade personnel-te meikang omna mun ah tung masa pawl in va pang uh a, Officer 2 makaihna nuai a Assam Rifle te’n fire extinguisher, water bowser of 7500 liter capacity leh firefighting equipment zang in meikang phelmitna ding a dakkal 2 ½ sual uh a, 11-A/R-te panlakna ziak a meikang in mun dang a peh man louh banah liamna tuak omlou hi’n taklang uhi.

Leimakhong ah Ex-servicemen rally om 

Imphal, Dec-11: Red Shield Division saina in zan leh tuni’n Leimakhong Military Garrison ah Ex-servicemen (ESM) rally om hi. Huai ah Major General SS Mishra, VSM GOC Red Shield Division in ESM, Veer Naris leh World War-II veteran-te hamphatpih dingte ngaih poimawh pen a koih ding chi a, ESM-te adia Central/State/Army welfare scheme tuamtuam omte taklang hi. Maj. Gen. SS Mishra leh Maj. Gen. Virendra Singh te’n Ex-servicemen-te hamphatna dia Government in welfare scheme tuamtuam a bawlkhiak uh tawh kisai  booklet hongkhia uh a, gamsung puahna ah World War II veteran 2, Chakra Awardee 2, Veer Naris 15 leh Widows 104-te tungah zahtakna latsakna in hun zat pih uh a, hiai tungtang ah Senior most Ex-servicemen Veteran of Manipur Col JS Rajkumar in kipahthu banah Ex-Servicemen Rally a hamphatpih dan taklang hi. Rally hun ah Red Shield Division leh state administration te’n ESM-te a ding in stall 46 hongkhia uh a, Project ‘Suvigya’ a ki register na dia platform a koih banuah Delhi pansan a NGO Flag of Honour Foundation te’n ESAM telkhiak tuam-te kiangah panpihna in cheque pia uh a, hiai hun ESM, Veer Naris, Widow leh naupang hunkhop te’n uap uh hi’n kigen hi.

Commission for Women in foundation day zang

Imphal, Dec-11: Raj Bhavan a Durbar Hall ah tuni’n ‘The 10th Foundation Day Celebration of Manipur State Commission for Women (MSCW) and Prize Distribution to the Winner of Essay Competition on the theme ‘Crime Against Women in Manipur’’ zatna om a, huai ah Chief Guest in Vandana Karki, IPS, DIG (Hq/Admn) leh Functional President in Dr. K. Sobita Devi, Chairperson, MSCW-te pang uhi. Chief Guest in a thugenna ah numeite deihna vengbitna ding a September 15, 2006 in MSCW Act 2006 deihzuina in state level statutory body ding in Manipur State Commission for Women bawlkhiak hi a, women development aspect teng huamkha hi. 

MSCW sepding ahihleh numei-te lunglutna vengbit leh khangsak ding hi a, Commission in a hunhun in Commission theihsiam semna ding in awareness, workshop leh seminar sai uh a, numei tungah sualna douna ding in police department tawh kithuzak thuah poimawh a, Women helpline bawlkhiak pah ding leh numei kuapeuh thuakgimna banah sualna tuak te’n huai helpline thuzak thei ding uh chi hi. K. Sobita Devi in Commission thil saite leh a sepkhiak-te uh tungtang gen a, Social Welfare department tawh pangkhawm in tukha sung in Central Jail a numeite a ding in vocational guidance sai ding uh a, school leh college level tan ah ‘protection of women for better future’ chih thupi zang in Commission in legal awareness programme sai ding uh hi’n gen hi. Foundation day zatna tawh kisai in Chief Guest in MSCW Newsletter honkhiatna banah Essay Competition tawh kisai a prize hawmkhia hi’n leng taklang uhi.

Transfer & Posting

MHS Doctors

1. Dr. N. Upen Singh, Specialist (Anaesthesiology), CHC Moirang & utilized at Dist. Hospital Bishnupur (under transfer to Dist. Hospital Chandel) as Specialist (Anaesthesiology) Moreh Hospital, Moreh.

2. Dr. Chinglaiphaba Chongtham, Medical Officer (MS/Surgery), Dist. Hospital Ukhrul as Medical Officer (Surgery), Casualty & Trauma Centre, Dist. Hospital Thoubal.

3. Dr. Bedana Lairenmayung, Medical Officer, Dist. Hospital Senapati as Medical Officer, CMO Imphal East Pool.

4. Dr. O. Jotinkumar Singh, Medical Officer, CMO Pool, Churachandpur as Medical Officer, PHC, Sagang.

5. Dr. Y. Gopalkrishna Singh, Medical Superintendent, Dist. Hospital Chandel (under transfer as Medical Superintendent, TB Hospital, Keirao Wangkhem) as Medical Superintendent, Dist. Hospital Chandel.

6. Dr. Dihe Mao, Medical Superintendent, TB Hospital, Keirao Wangkhem (under transfer as Medical Superintendent, Dist. Hospital Ukhrul) as Medical Superintendent TB Hospital, Keirao Wangkhem.

7. Dr. Deborah Sangi Joute, Dental Surgeon, CHC Parbung as Dental Surgeon, Dist. Hospital Churachandpur.

8. Dr. Menaka Yumnam, Medical Officer, PHC, Oinam (under transfer to PHC Thanga) as Medical Officer, PHC Oinam.

9. Dr. Ch. Joyprakash Singh, Sr. Medical Officer, CHC, Nambol (under transfer to PHC Kumbi) as Sr. Medical Officer, PHC, Leimapokpam.

TUNI THUPI:

 “Huchiin, Belamchingpa pen a honglat chiangin, thupina lallukhu tul theilou na mu ding uhi.” 

– I Peter 5:4

EDITORIAL:

Thaunilhna tang - Saptuam heutu!

Kumlui 2015 in Christmas leh New Year 2016 zang theilou tukin i om uh a, tuni dong Biakinn tamzaw ah Biakinn dak a ging naikei hi. Himahleh, khawvel kiheidan hong chituam tou zelin Christmas 2016 leh kumthak 2017 lawmthei ding dinmun ah i om uh a, saptuam tuamtuam inleng program bawlta in, nektak committee kichi mun tamtak ah dinkhiakin om a, lamzangtak a i zat theih ngei uleng lam-en hang.

3-Bills tawh kisai a buaina kipatna (epicentre) dan a ngaihsut a om CCpur district ah kumlui ngialin buai chihtakin i buai uh a, saptuam tuamtuam inleng kumsim khawmpi a neihsek uh cancelled hial uh a, CCpur adia saptuam lianpen banga ngaihsut Evangelical Baptist Convention (EBC) nuaia Tuailai khawmpi lian leng om ding tawh kisai a kisakkholhna nasatak a om leng a hun kuanin hihtawp hithet in om hi. Tua kia hilou in, saptuam tuamtuam dangte’n leng khawmpi (annual conference) aneih ding uh hih tom uh a, ni 1 lel khawng a minpu in zang uhi.

Pathian in a mi siangthoute leh amah gingtute taisanlou ahi ngeiding a, tukum in bel ngeina bangin Christmas leh Kumthak program-te zat theih dingin om a, kipahhuai mahmah chih ding ahi. Tualou in India gamsung ah sum-le-pai a haksatna thupitak a omlai in saptuam tuamtuam te’n khawmpilian neitou zelthei in kumnawn sumzat ding (budget) bang leng kumdang tawh kibang lou in tampipi passed thei uh a, kipahpih huai mahmah hi. Nidang hunin budget ceiling tawh kisai in a lakh a sim gen himahleh, tuni chiangin a crore a sim ngen getbat ahihtak ziakin Pathian in migenthei leh zawngkhalte leng nakpitaka hon domsang ahihdan theihtheih in om hi. Tua kai hilou in, tukum a saptuam khawmpi lian tuamtuamte i muhdan in hun paisa sangin khangtou zaw a, adiakin tuailai pawl apan lasa (Choir) te’ lasakdan leh omdan, a kisawidan uh, lapute’ pidan banah a movement tuamtuamte uh khangtou mahmahta a, kipahpih huai mahmah hi. Nidang hunin bel la pawlsakna hun ah nervous na ziaka pawng nuihnuih mawk, ahihkeileh, pum a apum ling chihkhawng kitam mahmah a, tu in bel tuate om nawn lou in, lasate hi’n thugente hita leh gen ngamlouh-sak ngamlouh chihte om nawnlou in ‘free and frank’ ngen hita a, a ngaikhetute’ adingin leng nuam mahmah hi.

Huai bangkalah, tuni in mipi leh simtute’ theih leh zak dinga i gelhkhiak ut khat ahihleh, Thaunilhna tang- Saptuam heutu! chih tungtang ahi. Adiakin CCpur district context en lehang 99% phial Christianity sahkhua zui hidingin gintakhuai hi. Christian ngen i kichih hangin, doctrine vai tawh kisai in i kibang hetkei a, Christian sapsap lakah biakna chi tuamtuam 20 phial mahmah leng ki-om dingin gintakhuai hi. Hiai saptuamte’ ginna a dik leh hoihpen ahi chih sawm ihi kei a, ahihziakin, mimal ginna mah poimawh pen a, saptuam in Vangam hon tunding in leng ngaihsuthuai thahahlou hi. I ginna (faith) tungtawn mah a Vangam kaiding leng ana himaithei a, huai kawmin sahkhaw dangte leng va simmawh ding leng hituanlou hi.

Pathian in mihingte’ tungah bangchibang in hon vaihawm khum (judge) dia chih bel gen ngam khang, himahleh, mi chihin i khelhnate mawh i kipuak tek ding chihbel genngai lou a kuapeuh theihsa ahi hi. Christian kichi chiat ahihziakin i gindan (doctrine) kibatlou ziakin saptuam tuamtuam ah i om khiukheu uhi. Thil hithei him leng ahi ichi hi. Christian te’n i biak uh Van a om Pa Pathian ahi a, a laulou kuamah i om kei uhi. Tua ziak mahleng ahiding a, saptuam makai ding kitelna (election) i neih chiangun leng a siangthou theibang pen in i neisek uh a, amaute thaunilhna piak hisek uhi.

Christian-te’ laka mi nautang chi mai leng, laymen-te sangin thaunilhna tang-Saptuam heutute’ adingin pilvanna ding tamzaw dingin gintak huai hi. Pastor ahihkeileh Upa dinga kichiamna kiptak la, siangthoutak leh muanhuai huntawk a ordination la a, Pastor leh Upa tuamtuamte’ thumsakna dong zawmah, himahleh, a khawnung a pukpah kichi mi tamtak om uhi. Pastor hizenpi angkawm kawm mai, Saptuam Upa hizenpi angkawm, zu dawn, khamtheih leh a tuamtuam a kibual chihte tuni dong mit a muhtheih ding mi hunkhop om hi.

Angkawmna leh Zu leh khamtheihte thutuam chi lai lehang, Saptuam Upa/Pastor hizenpi, nekguk-takgukna a kibual, gam kekkek mai, innsak-innkhang, tanau-laina tawh kise den ahihkeileh, sum pung hawm, leiba ngaihsaklou, saptuam sum su thelthang, mi sihtheihna ding khop a plan leh policy bawl, mahni adia kilawmlou Hausa hihna va tuh chih bang mi hunkhop om a, i ordained na leh i sianthouna (sanctity) hon subuah kha hilou ding hiam chih uthuai hi. Pastor hiam Upa hiam ihih leh i sianthouna i kepbit (maintained) a, thaunilhna i tan pen i zahtak a, Vangam i tunchianga Pathian apan kipahman i san ding pen gal-et zek leng hoih dingin gintakhuai hi. I lutung a Pathian mi zat-te’ hon thumsakna bangmah lou i suah khakding lauhuai mahmah a, denchianga i kisikna ding ahih khak ding leng pilvanhuai mahmah dingin gintak huai hi.