HEADLINES:
Tengnoupal leh Kangpokpi full-fledged Revenue district leng hon hiding
Chief Minister in Jiribam District thak tuni’n hong
Imphal, Dec-14: Manipur Chief Minister O. Ibobi in tuni’n helicopter zangin Jiribam district va pha a, huai bial teng district piching (full-fledged revenue district) hiding in honna vanei hi. Chief Minister in Chingdon Leikai a DC Office kilam thak leng Jiribam district mipi zat ding in pekhia hi. Chief Minister in a thugenna ah tuni a district piching thak hiding a kihong Jiribam district ah Government in vanzat poimawh (infrastructure) teng akin lam a koih ahih theihna ding a panla ding hi’n gen hi. Huailou in Borobekra sub-division ah Fire sub-station 1 leh Police Station 1 leng akintheilam ah honkhiat hiding chi’n gen hi. Thudang kiza danin Tengnoupal district leh Kangpokpi district leng Dec 15, 2016 in hon hiding chihthu om hi.
Jiribam District thak honna a Chief Minister in agenzel dan in Borobekra sub-division a student-te khualna in High School Leaving Certificate Examination Centre 1 hongkhiat theih hiding hiam chih a kisaipih thunei te’n enzui ding uh hi’n leng gen hi. Tuni a district thak honna ah Deputy CM Gaikhangam in a thugenna ah UNC te’n National Highway 2 a economic blockade a puan uh akinthei lam a khawlsak ding in ngen hi. Huai hun ah Revenue Minister I. Hemochandra, Commerce & Industry Minister Govindas Konthoujam, Jiribam bial MLA Th. Debendra, Chief Secretary O. Nabakishore leh mi poimawh tuamtuam tel uhi.
Manipur Government in Dec 8, 2016 nitak a district thak 7 a puankhiakte lakah tel Kangpokpi leh Tengnoupal leng district piching hiding in Chief Minister in Dec 15, 2016 in hong ding hi. Zinglam dak 10:00 in Chief Minister in district piching hiding in Tengnoupal district hong ding a, huai hun ah Dy. Chief Minister Gaikhangam, Revenue Minister I. Hemochandra, IFCD Minister Ngamthang Haokip, Health and FW Minister D. Korungthang leng tel ding hi. Huai zawh in Chief Minister in Kangpokpi bial leng district piching hiding in hong ding chih thu kiza hi. Dec 16, 2016 in Pherzawl leng district piching hiding in hong ding hi. Tuma in bel Pherzawl district tuni a hongkhiak ding a bikhiah hi a, himahleh huai mun ah helicopter tukna ding a lemchang nailou ziak in Dec 16, 2016 a district thak honna om dia bikhiah thak ahi hi. Noney leh Kamjong district leng Dec 16, 2016 a honkhiak ahih gingtak huai hi’n kigen hi.
TUALSUNG:
SIUM in hostel abawl honkhiak in om
Lamka, Dec- 14: Sangai International University, Manipur (SIUM) in student omna ding gina neiloute’ khualna in Zenhang Bazar sunga V. Hangkhanlian Plaza 2nd Floor ah hostel abawl uh tuni zinglam in honna om a, huai hun ah staff leh faculty-te ban ah inn neitu V. Hangkhanlian, Vice President, BJP Manipur Pradesh leh Lunkhomang Khongsai, Addl. SP (Law & Order) ban ah Kamsuanlun, Ex-EM, ADC/CCPur telin mi poimawh tuamtuam in uap uhi.
Pastor G. Sanglian, Local Pastor, NLBC, Elim Veng in hongkhia in Pathian kiang ah lan hi. V. Hangkhanlian in hiai building pen tuni akipan V. Hangkhanlian Plaza, Zenhang Bazar, Lamka chih minvuah hita ahihdan puangin, SIUM in gam adia laisiam leh heutu muanhuai tamtak abawlkhiak deihthu gen hi. Dr. Rousiem Pudaite, Exam Controller leh Dr. S. Chiru telin mi tuamtuam inleng thu gen uhi. SIUM ahihleh Manipur a om singtangmite'n laizilna dia gam tuam a naih ngai nawnlouh ding uh tupna in Manipur Cabinet theihpihna a dinkhiak hi a, tu’n Rengkai Road a VM Building First Floor pen City office dia luah in nipikal paisa in course tuamtuam panta uh a, admission bawl student 150 lak ah omna ding gina neiloute’ adia hostel abawl uh hi’n kigen hi. Huai hostel ah Free Wi-fi om ding ban ah tuisiang leh dawn ding tui suansou om gige dinga, dakkal 24 sung electric (meivak) piak ahih ding ban uah hosteller-te kiang ah mattress, lukham, lupna, almirah, table, chair telin poimawh bangkim piak hiding uhi. Tuaban ah, Gym facility leng om ding a, common room om in akim ah CCTV koihsuak ahih ding ban ah hosteller-te warden hoihtak etkaina nuai om ding ban uah TV leh thil bangkim leng koih hidin kigen hi.
Vung Minthang in BCD Learning Centre hong
Lamka, Dec- 14: EBCC Zenhang Lamka in naupang sunday school building dia abawl BCD Learning Centre kichi tuni’n Rev. S. Vung Minthang, Gen. Secretary, EBC in hongkhia in Pathian kiang ah lan hi. Huai hun ah saptuam Upate’ banah naupang heutute leh saptuam sunga nu-le-pa hunkhop kihel uhi.
Upa K. Nengchinlam, Secretary, Building Committee in report pia in, saptuam in aneihsa Rs.2 lakhs zangin nasep pan uh a, EBC Headquarters in Rs. 20 lakhs loan apiak banah Grant in Rs.3 lakhs penawn a, saptuam mipi’n kithawh khawm in abawlkhiak uh hi’n gen a, ground leveling bawlna ding Mahajon Thangnon, Special Contractor in JCB a zatsak ban ah atung (roof) ding Singngat MLA Ginsuanhau in Langva bundle 15 pia a, zawhsiang ahihtan in Rs. 42 Lakhs val bei hi’n gen hi. Tualsung Baptist Saptuam Upa Committee in building sub-committee dinkhia in May 17, 2014 in Zenhang Lamka hausa Letboi Valte in building mun ding ah suang phum in Pastor MT Khanlal, Local Pastor EBCC Zenhang Lamka in Pathian kiang ah ana latkhiat hi a, June, 2014 in nasep pan uh a, 2015 in Sunday School Classroom ding bawlzou in Rev. K. Kamchinkhup in Pathian kiang ah lan hi.
ADC te’n emergency meeting nei ding
Lamka, Dec-14: Dec. 15, 2016 zinglam dak 11:00 in Autonomous District Council, CCpur nuai a member te’n Tuibuong a District Council hall ah emergency meeting nei ding uh a, huai hun ah district thak kibawlkhiak tawh kisai telin Village recognition leh PMAY ban ah thu poimawh tuamtuam genkhawm ding uh hidan in Soiminlian Lengen, MCS CEO/ADC, CCpur in thusuah abawl in taklang hi.
PS a Vending Station ah recharge theih ding
Lamka, Dec-14: Police Station campus a Electric pre-paid recharge nang Vending Staton ah Dec.15, 2016 apan office hour sung in electric top-up/recharge theih ding hi’n MSPDCL/CCpur Divn. official-te a pan kiza hi. Huailou in MSPDCL Corporate office apan thuthak zak ahih kei leh Dec. 15, 2016 tan electric pre-paid recharge na ding in sumlui (Rs.1000/- leh Rs.500/-) lalai ding uh a, Dec.16, 2016 apan la nawnlou in sumthak-te kia zang in recharge theih ding hi. Police Station campus a electric pre-paid recharge (Vending station) bel zawhsiang himahleh MSPDCL te’n cease work strike aneih ziak un official a honkhiat louh a zat hiding in kigen hi.
Adviser, Health & FW, GOI in enkhia
Lamka, Dec-14: National Health Mission, State Health Mission, Dist. Hospital leh IGNOU pangkhawm in January 2017 apan Dist. Hospital ah kha 6 sung daihding General Nursing and Midwifery (GNM) 20 te’ ading in Bridge Course training kipan ding a, huai tawh kisai Dr. Dilip Singh Mairembam, Adviser, National Health System Resource Centre, National Health Mission, Ministry of Health & Family Welfare, Govt. of India in Lamka hongpha in Dist. Hospital hong enkhia hi. Huai hun ah Dr. J. Son Gokham Samte, Med. Supdt. Dist. Hospital leh Dr. T. Nengkhanmang, Dy. Med. Supdt. Hospital te’n apoimawh bangbang in kithuahpih uhi. Dr. Dilip bel Imphal apan official 3 in hon zui uh a, Lamka apan Thoubal Hospital ah kha 6 sung daihding Bridge Course training ding tawh kisai enkhe nawn hi. Manipur ah GNM-te ading a kha 6 sung daihding Bridge Course training ahihleh Dist. Hospital/CCpur leh Thoubal Hospital telkhiat a om hi’n kigen hi.
NFSA Antang hawm hiding
Lamka, Dec-14: National Food Security Act. (NFSA) tungtawna Dist. ading antang Dec.17, 2016 zing dak 7:00 apan zinglam dak 11:00 sung Pathianni (Sunday) leh Holiday chihlouh in hawmkhiat hiding a, Imphal apan antang puaktouh-te ani mah a hawmkhiat hiding a, ni 1 in Fair Price Shop (FPS) centre 25 tan bek hawmkhiat hiding hi. Rationing Agent te’n antang lakkhiatna ding Release Order (OR), antang manding Dealing Assistant kiang ah sum (new currency notes) pia a, concerned SDO/Village Chief apan Utilization Certicates leh Rationing Agents Identity Card tawi in Dec 15, 2016 apan office hour sung in laktheih ding hi’n DSO (CAF & PD)/CCpur in theisak hi. Antang hawmkhiat dingdan bel Henglep A/C ah FPS centre 56; CCpur A/C ah FPS centre 125; Saikot A/C ah FPS centre 98; Singngat A/C ah FPS centre 63; Thanlon A/C ah FPS centre 33 leh Tipaimukh (Parbung) A/C ah FPS centre 11 hiding hi.
Mi 4 in DGM len ding
Lamka, Dec-14: L.Priyokumar Singh, i/c Managing Director, MSPDCL (Electricity Deptt.) in Division 4 a officer te’n anasep uh ban ah Dy. General Manger (DGM) tawh lenkhawm ding in order suah a, CCpur Divn. ah Manager lenlel Vanlalhlun Hrangchal @ V. Hrangchal in DGM, Pherzawl Divn. tawh lenkhawm ding hi. Letkhomang Haokip, Manager, Moreh SD in DGM,Tengnoupal Divn. tawh lenkhawm ding a, Leimaram Dorendro Singh, i/c DGM (Enforcement) in DGM, Kamjong Divn. tawh lenkhawm in Y.Suresh Singh, Manager, Tamenglong SD in DGM, Noney Divn. tawh lenkhawm ding hi.
Addl. SP in i/c SP len
Lamka, Dec-14: Rakesh Balwal, IPS, SP/CCpur in Pherzawl Dist. honkhiatna a telding in zan in Pherzawl khua zuan a, ama omlouh sung Lunkhomang Khongsai, MPS, Addl.SP (L & O) in i/c SP tawh lenkhawm hi.
Gari lai (document) kimlou 44 man uh
Lamka, Dec-14: SP/CCpur thupiak bang in tuni’n Traffic Police te’n Tipaimukh road, Hiangtam Lamka ah Diesel Auto taituah-te special drive nei uh a, Diesel Auto document kimlou, licence renewal bawl lou mi 44 man uhi. Traffic Police te’n TR-5 receipt cut in Rs. 4,400/- mukhia uh a, tuni mah in receipt book leh summuh khiat teng Dist. Transport Office ah submit uhi.
Kimeltheih tuahna nei
Lamka, Dec-14: Tuni sun in CMO Mini-Conference Hall ah Dr. Kim Simte, CMO makaih in Dist. Program Management Unit Staff-te leh Block Program Management Unit Staff-te’n kimeltheih tuahna nei uh a, maban ah nasep dingdan leh panlak dingdan kikum uhi.
Minister T. Manga Vaiphei vualzawl ngetsakna om
Lamka, Dec- 14: Kangvai Village Authority makaih in tuni’n Kangvai community hall ah Vaiphei nam adia MLA omsun T. Manga Vaiphei, Minister PHED in kum nawn assembly election om ding ah lawchinna angah deihsakna in Pathian kiang ah vualzawl ngetsakna om a, khawsunga Saptuam Upa leh Pastor te’n vualzawla ngetsak uhi. T. Manga Vaiphei in agenna ah, hibang hun thupi leh poimawhtak kizat in MLA ahihma akipan deihsakna tawh midang ata banga nakoih leh enkol a om nawnlou Kangvai khua hausa phawksak chi hi. Hausapu in Namte’ thugen anial ngeilouh bangin khawsung mipi leng niallou a kithuak taktak apangkhawm uh kipahpih in MLA election ah leng 80% tunglam ah panpih gige ahih uh mangngilh lou ahihdan gen in, maban ah leng pankawm kinem lai hi’n gen hi.
Pherzawl District hon ding kisuan
Lamka, Dec-14: Manipur CM O. Ibobi Singh in tuni’n Pherzawl Dist. hongkhe ding chih himahleh zan in 2 vei hial helicopter in Pherzawl khua bohding in kisa in trail landing neimahleh bawhtheihlouh ziak in Dec.16, 2016 a honkhiat ding in ani kisuan hi. Pherzawl Dist. honna program uap ding in Lamka apan Lunminthang Haokip, IAS, DC/CCpur leh Rakesh Balwal, IPS, SP/CCpur makaih in Dist Level Officer-te leh Security Personnel tamtak banah Police Officer IG bangzah hiam leng Pherzawl khua tungkhin uhi. DC/CCpur in Pherzawl khua ah maban a MLA election ding tawh kisai in Systematic Voters Education & Electoral Participation (SVEEP) campaign nei ding hi’n kigen hi.
Mass awareness campaign
Lamka, Dec- 14: All Tribal Women Union (ATWU) makaih zan nitakin Bungmual Community hall ah Delhi zinna report-na tawh kithuah mass awareness campaign om a, huai hun ah mun tuamtuam akipan tamtak paikhawm uhi.
Programme sungin Kimzaching makaih in paikhawm te’n thumkhawmna aneih ban uah Manngaihkim makaih in slogun sam uh a, Nianglian, President, ATWU in Delhi zinna tawh kisai report pia hi. Huai hun ah 11th Manipur Assembly Election adia 58/CCpur a intending candidate Paukhansuan Khuptong, CT Lian Guite, DK Mang leh Thangbiaklian Hangzo te’n thugen uhi.
Manipur Idol Session-I promotional concert
Lamka, Dec-14: Manipur Idol Session-I pailel ah Top-8 teng in District tuamtuam ah concert nei uh a, Dec.15, 2016 nitaklam dak 4:00 in Hiangtam Lamka a YPA GHQ hall ah promotional concert neiding uh a, lasiam hunkhop telding uhi. January 14, 2016 in Bhagyachandra Open Air Theatre (BOAT), Imphal ah final neih hiding in kigen hi.
SUUNNA:
Zingzangai (80) d/o (late) Thualkam of Zion Veng, New Lamka tunitak dak 5:30 velin dipna in si a, Dec 15, 2016 in YPA hanmual, New Lamka ah kivui ding hi.
Tinzadawng (72) f/o Khamlianthang, Chief of B Munpi, Mualnuam Sub-Divn. zan nitaklam dak 4:30 velin zunkhum in si a, tuni’n S.Munnuam hanmual ah kivui hi.
Chingzachiin (63) mo Paumuanlal Guite of College veng, New Lamka tunitak dak 10:00 velin tuapna in si a, Dec 15, 2016 in YPA hanmual, New Lamka ah kivui ding.
STATE THUTHANG:
MHA a Special Secy (Internal Security) in Manipur dinmun hong enkhia
Imphal, Dec-14: Mahesh Kumar Singla, IPS, Special Secretary (Internal Security), Ministry of Home Affairs (MHA) in tuni’n Manipur dinmun enkhe kawm in Imphal hongpha a, Manipur Secretariat ah High Level Meeting om hi. Huai ah O. Nabakishore, IAS, Chief Secretary, L.M. Khaute, IPS, Director General of Police (DGP) Manipur, Army a GOC 57 Mountain Division, Assam Rifles a Inspector General Assam Rifle (IGAR) leh High Ranking Official tuamtuam tel uh a, Manipur dinmun tawh kisai banah UNC blockade tungtang suizui kawm in Manipur a thil omdan hong enkhia hi. Huai ah DGP Manipur in Manipur Security dinmun leh UNC economic blockade tawh kisai a security environment leh thil omdan detail in Special Secretary MHA theih ding in taklang a, National Highway Protection Force adi’n Centre govt. a diakin Ministry of Home Affairs (MHA) apan kithuahpihna poimawh kin ahihdan taklang hi.
Z. Kikhonbou Newmai MLA apan kitawp
Imphal, Dec-14: Tamei A/C akipan MLA telching a om Kikhonbou Newmai in tuni’n Assembly Speaker Th. Lokeshwore kiangah kitawpna pia a, aman Hill Area Committee Vice Chairman ahihna apan leng kitawp hi’n Hill Area Committee Chairman kiangah pia hi. Kikhonbou Newmai in Congress Primary Member hihna akipan leng kitawp ahihdan MPCC President kiangah pia hi.
Noney ah BJP office kihong
Imphal, Dec-14: Tamenglong district a BJP Scheduled Tribe Morcha leh Nungba Mandal a BJP office tuni’n Noney bazar ah honna om a, huai ah ‘One Day Political Party Meeting’ leng om hi. BJP Schedule Tribe Morcha Manipur Pradesh a President Michael Dangmei office thak hong hi. Huai hun ah MLA lui Salang Ibohal in a thugenna ah BJP in Christian leh Minority Community-te kalh in chik mah a panla lou ding hi’n gen a, mi kuapeuh in sahkhaw zalenna a neih chiat uh deih hi’n gen hi. Tulel a economic blockade omlel leng mipite khualna in akinthei lam a khawlsak dingin akisaipihte ngen hi.
CSIR-UGC NET exam om ding
Imphal, Dec-14: Manipur University a New Social Science Block ah Dec 18, 2016 in CSIR-UGC NET examination om ding hi’n thusuak in gen hi. Huai examna ding a Co-ordinator in Dr. A. Rajmani Singh in thusuah a bawl dungzui in CSIR-UGC NET examna India gamsung pumpi ah Centre 27 om ding a, huaiziak in examna a tel ding candidate te’n nawngkaina a tuah louhna ding un Dec 18, 2016 in bandh, general strike leh blockade kuaman bawl lou ding in ngen hi.
UNC working committee bawlkhia
Dec 15 in public rally om ding
Kangpokpi, Dec-14: Manipur government in Jiribam leh Sadar Hill telin district thak 7 a bawlkhiak banah Ministry of Home Affairs (MHA) in UNC-te economic blockade in dan kalh ahihdan thupuan a bawl nung in UNC saina in Senapati DHQ a Consultative meeting om a, huai hun ah NPF ex-MLA, ex-Minister, apex bodies, frontal organization, student leh women leader, village leader, human right activist, social activist, ex-UNC leader, scholar leh intellectual telin working committee bawlkhia uhi. Working Committee member ding-te background tuamtuam apan Senior Activist, Social worker leh tribe tawh kisai a siamna neite lakkhawm hi uh a, Manipur government in kivaipuakna hoih zaw leh lemtang zaw ding chih suanlam a Naga-te pu-pa gam khenzak a sawm uh mawhpaihna in Dec 15, 2016 in Naga inhabited District HQ teng ah rally sai ding sawm uh hi’n kigen hi.
Kituak tak a tengkhawm ding in ngetna bawl
Imphal, Dec-14: Rongmei Naga Council, Manipur (RNCM) te’n singtang leh phaizang bial a nam om teng muan leh bit banah kituak tak a teng khawm ding in ngetna bawl uhi. Huai tawh kisai RNCM te’n thusuah a bawlna uah Dec 12, 2016 nitak in Tamenglong district a NH-37 in a tawtkhak Awangkhul leh Rangkhung kikal ah meltheihlouh galvan tawi te’n truck driver leh handyman a kapliam uh tawh kisai in mawhpaih thupuang in dawilawk-te gamtatna hi a, hibang a gamtatna in a Manipur mipi lakah kihuatna leh kituahlouhna a diak in Rongmei leh Meitei community kalah tun chi uhi. Huai ziak in maban ah tua bang a gamtatna tawpsak ding in ngetna bawl uh a, huai ahih keileh kigolh khakna neite’n Rongmei community-te hehna a thuak ding uh chi hi. Truck-te thau a kapna tawh kisai meltheihlouh pawl khenkhat-te gamtatna hi a, Rongmei Community-te gamtatna ahih louh banah Sadar Hills thubai leh economic blockade tawh kisai kigolh khakna neilou uh a, kiphinna neite’n gari halsia, nautang-te soisak leh passenger-te a suklau ding uh hilou hi’n gen uhi. Rongmei Village authority te’n NH-37 a van tuamtuam pua gari-te subuai lou leh hihse lou ding in mipi thunun uh hi’n leng taklang uhi.
Court in ‘bail’ a khahkhe dia ngetna nawlkhin
Police custody ah om ding in thutan khum
Imphal, Dec-14: Court of Judicial Magistrate (CJM) Imphal East ah tuni’n UNC a President Gaidon Kamei (52) leh Info. & Pub. Secretary Shangkhel Stephen-te dinsak in om nawn uh a, tuni a hearing hun ah ‘bail’ a khahkhiak ding a ngetna a bawl uh nawlkhin sak in om hi. Court in mi 2-te Police custody ah ni 7 om ding in thutan khum in Dec 20, 2016 ni a Court ah kilak nawn ding in theisak uhi. Huailou in case dang tawh kisai a CJM Imphal East in UNC makai 2-te ni 17 sung Judicial custody ah om ding in thutan khum a, kum nawn Jan 2, 2017 ni a Court ah kilang nawn ding in order suah uhi.
Akigendan in UNC makai 2-te matkhiak nung in a tung uah case 2 - FIR No 3 (11)2016 of Tadubi Police Station under section (u/s) 147/149/427/ 124-A/120-B/506/153 of Indian Penal Code leh FIR No 3 (11)2016 of Tadubi Police Station under section (u/s) 147/148/427/124-A/120-B/506/ 153 A of IPC bulh khum in om hi. Case tungtang tawh kisai a Investigating officer in UNC volunteer te’n NH a blockade sung a gari suksiatna dia thupia mi 7 min taklang a, huaite UNC Vice President Warngam Anal (50) of Chandel HQ Zaphou Bazar; Gen. Secy. Milan Tangkhul (65) of Kamjong: Asst. Secy. Gabriel Mayon (43) of Chandel HQ Sina Dam; Fin. Secy. Kaikho Mao (65) of Senapati Taphou; Secy. (Arts & Culture) Rockson Shimray (45) of Ukhrul; Speaker Kho John Poumei (67) of Tungjoy Senapati leh Dy. Speaker-te Adon Pamei (55) of Tamenglong HQ hi uhi. Tuni a Court ah UNC makaite tungtang hearing om hun ah Court room ah Gaidon Kamei zi om a, Gaidon supporter Nupi pawlte Court pawlam ah kipun khawm uh a, hearing zawh in Police te’n UNC makai 2-te pawkhe pah uh hi’n leng kigen hi. Akigendan in UNC te’n blockade hun a NH-te ah van tuamtuam pua gari suksiatna tawh kisai in UNC makai 2-te tungah case om ziak a Nov 25, 2016 ni a mat hi uh a, Mao Police ah case om tawh kisai in Dec 8, 2016 in Court ah dinsak hi uhi. Tabudi Police a case dang om tawh kisai in UNC makai 2-te mat hinawn uh a, Manipur High Court thupiakna dungzui in UNC makai 2-te Senapati CJM ah dinsak sangin Imphal East CJM ah hearing om hi’n taklang uhi.
Congress tungah boycott zukkik
Kangpokpi, Dec-14: Joint Action Committee for Sadar Hills (JAC-SH) te’n Chief Minister O. Ibobi makaihna a state government in Kangpokpi district telin district thak 7 a bawlkhiak ziak a Congress party tungah mipi thangpaihna leh lungkim louhna a bei tawh kiton in Kangpokpi ah Congress party tungah boycott zukkik uh hi’n kigen hi. Huailou in Kuki Inpi Sadar Hills leh Civil Society Organization tuamtuam te’n O. Ibobi makaihna a Manipur govt. in Kangpokpi district min zang a Sadar Hills district a bawlkhiak uh tawh kisai in kipahthu gen uh a, Manipur govt., CM O. Ibobi leh a Cabinet Minister banah MLA-te a diakin Kangpokpi, Saitu leh Saikul MLA tungah ah akipahna uh lian a, Kuki Inpi Sadar Hills te’n Manipur mipi telin UCM, AMUCO leh pawl tuamtuam tungah kipahthu gen uhi.
Huailou in DC Complex, Kangpokpi ah Dec 15, 2016 ni in official a Kangpokpi district hongkhiat ding tawh kisai in ni 2/3 paisa apan District Council leh Town administration-te makaihna nuai a kisakkholhna om a, KYU leh KWC a volunteer te’n tuni’n DC Complex kim-leh kiangah telin district headquarter a lampi nawl teng hahsiang uhi. National Highway in a tawt khak Gamgiphai village ah banner ‘Welcome to Kangpokpi District Shro. O. Ibobi Singh, Hon’ble Chief Minister, Govt. of Manipur’ kitak a, district administration-te banner telin GUDUP member te’n leng lampi gei ah banner tak uh a, Kangpokpi district hongkhiat hun ah cultural dance tuamtuam om ding hi’n leng taklang uhi.
UNC tungah ‘ban’ puang ut
Imphal, Dec-14: Sagolband Nepra Major mun ah tuni zingsang in Nepra Major Pukhri Mapal Women’s Voluntary Association (NEMWOVA)-te office hongkhiakna om a, huai ah Chief Guest in Sagolband A/C MLA banah Manipur Pradesh Congress Committee a General Secretary RK Imo Singh pang hi. Huai hun ah Chief Guest in a thugenna ah Manipur pumpi a dia UNC-te mihing banglou a gamtatna ziak ua ‘ban’ ut hi’n gen a, mat a om UNC makaite leng gamsung ah dan tawh kituak a gawtna piak tuak hi uh, chi hi. District thak bawlkhiak tawh kisai leng chi-leh-kuang, nam leh sahkhua tawh kisai hilou a, kivaipuakna hoihzaw ding gelna hi a, mipite’n government thupukna a kipahpih ding uh hi a, Union Minister khat in UNC-te thupuangtu bang a district thak tungtang a gen a neihpen vangtah huai a, aman Manipur honphak hun ah local BJP leader-te pikhelh ziak himaithei a, State BJP khenkhat lakah Meinam Bhorot, ex-Minister C. Doungel te’n govt. panlakna kipahpih uh chi hi.
Aman agenzelna ah state BJP sung a thubuai leng tunung a state election a dia ticket tungtang puankhiak ahih zawh chiang in BJP-te hatlou ding uhi. Sagolband Constituency sung a community hall bawl leh lampi bawlhoih kia development hilou a, a term sungin a bial ah water pipe line khung ding ngaih poimawh pen in koih a, National Food Security Act zat ahih akipan a bial sung a tutan in kha 3 a ding rice quota hawmkhia a, Local Area Development Fund apan NEMWOVA office telin thil tuamtuam bawlkhia ahihdan leng taklang hi.
MNDF te’n candidate 40 vel nei ding
Imphal, Dec-14: Manipur ah regional party kibawl thak Manipur National Development Front (MNDF) te’n maban a 11th General Assembly Election hun ah candidate 40 val nei ding uh hi’n kigen hi. Huai tawh kisai in Babupara a MNDF office ah tuni’n press conference om a, huai ah member thak-te laklutna hun ah ex-Congressmen banah MNDF founder member Senior Vice President Bijoy Koijam in media-te tawh kimuhna hun ah muanna leh bitna tawh kizawi tawn in development agenda ngaih poimawh pen a koih ding uh a, Congress, JD(U) leh BJP nusia a MNDF party zomthak mi 12-te kipahpih thupuang hi’n gen uhi.
Sainik School te’n 42nd Annual Athletic meet hong
Imphal, Dec-14: Francis Marwein, Director, SAI, NERC in tuni’n Sainik School Imphal (SSI)-te 42nd Annual Athletic Meet hongkhia hi’n gen uhi. Huai tawh kisai in SSI a Senior Most Cadet te’n tuni zingsang in kum 1971 a SSI kiphut khiakna mun Imphal International Airport mun apan SSI tan Torch Flame rally nei uh hi’n kigen hi. Huai hun ah SAI Director in student-te khantouhna dia school ah games and sports a poimawh dan gen a, Sainik school a student te’n gin om leh kuhkaltak a athil tup uh tangtun sakna dia pang ding a hasuan hi’n gen uhi. Athletic meet hun ah March past leh gymnastic display om a, Dec 17, 2016 tan sports meet om ding hi’n leng taklang uhi.
Section khenkhat kisuan
Imphal, Dec-14: DIPR thusuak in Keishampat a DIPR office building tuni a honkhiat ahih tawh kiton in professional lakthak-te leh news, photo, video leh publication section-te huai building ground floor ah suan in om uhi. DIPR building thak bawl hinai keimahleh lou a, DIPR ah staff-te nasep dan lemtang zaw ding gelna a building honkhiak hi a, Dept. of Information Technology, Manipur State Wide Area Network (SWAN) te’n building thak ah internet service pia uh a, News section tel. phone No. 2450640 leh fax no. 2451164 leng building thak a kisuan hi’n leng taklang uhi.
TUNI THUPI:
“Bawngnou thau tak honla unla; gou un, i ne ding uh a, nopbawlin i om ding uh;”
– Luka 15:23
EDITORIAL:
Festival hunbi
Thudik ahi chi in 100% bel chingam khang, ahihziakin a gintak huai mahmah khat ahihleh, Lamka a market control-tu a theih vaite’n Saptuam tuamtuam te’n khawmpi lian a neih chiangin un van khawng mahmah uh chi uhi. CCpur district a saptuam tuamtuam te’n khawmpi aneih chiang un Mizoram telin state tuamtuam ah leng saptuam member hunkhop nei uh a, khawmpi neih ahih chiangin saptuam upa-te (palaite) hong paikhawm siausiau uh a, Christmas ading zi leh tate’ ading van chi tuamtuam hong leikawm sek uhi.
Tu hun pen Festival hunbi hi a, kitenna season leng ahi hi. Sabeng mite’ adingin sabet hun ahi a, ngabengmite’ adingin leng tulai a huntak ahi. Tangval leh nungakte’ kiten hun ahi a, maban ah dan siangthou leh a kiguk thawh a kiteng leng hong tam semsem laiding in gintak huai hi. Kumlui in hiai festival season pen zangtheilou khop in i om uh a, tu in bel zalen zawdeuh a zangthei ding dinmun ah i omta uh a, kipahhuai mahmah chih ding ahi. Kumlui bangloutak in tukum in Christmas ading leh kitenna van tuamtuam lei dingin mi hong tam pan nawnta uh a, hiai ‘wedding and Christmas shopping’ hunah mipi’ adingin leng pilvanna ding tam mahmah in i thei hi.
Amasapen in, Lamka khawpi ah drugs tuamtuam hih tam petmah a, tua ziakin guta leng pung deuhdeuh hi. Bazar kai mipi i kibehlap semsem leh amaute’ adingin chance/ advantage lian semsem hi. Lampi a i pai hunin i sakhau (pocket) apan sumbawm hon sawkkhiaksak theiding mi tamtak om a, ahihkeileh i van khailai tanpha thagum a hon suhsak ngamding khop a hiamgam mi tampi ki-omta hi. Diktatna lam ah leng kuapeuh i tasam uh a, eite adia ‘cheapest communication’ danin Diesel Auto i zang uhi. Koi munpeuh ah Auto a taitungta chihtheih in om a, huchikalah, Auto pu duhdak lou leh ginomlou mi tamtak om uhi. Tua ziak mah ahiding a, Auto pu khenkhat in numei-naupang tanpha pimang sawmleng om a, zukham leh khamtheih tuamtuam a gimnamlou hih kawm a Auto hek (driver) hunkhop leng om ahihdan haihual hilou hi.
Festival season hunah Auto pu ginalou leng hong kibehlap lai dingin gintak huai hi. Auto pu tengteng a sevek uh chi ihikei a, ahih ziakin naupang pimang sawm, gari sungah mobile/wallet leh adangdang sukkiak a omte pekik nawnlou, passenger te’n a van tuamtuam uh a mangngilh hun chiang ua piakkik sawm nawnlou a kitan mai mi hunkhop om a, driver ginom tamtakin bel Newspaper tungtawn tanpha in passenger-te’ thil sukmangte hon puangkhe zel uhi. Lampi a khe a pailai inleng thil isu mang theitham a, tuabang hunah a mutu te’n a neitute zonkhiak sawm a pan ilak uh deihhuai mahmah hi.
Kumlui 2015 genlouhin kum 4/5 paisate apan ettouhin tukum in bazaar kai mi i vang zawmah lai hi. A ziak hidinga gintak ahihleh, ‘demonetization’ thubuai (woes) ziak hidingin gintak huai hi. Unau singtanglam a omte’n leng sum-le-pai thu ah buaina liantak tuak uh a, phaijang bial a omte’n leng buaina thupitak tuak uh a, huchih lai in Manipur ah United Naga Council (UNC) in National Highway teng ah economic blockade abawl ziakun vanman khang hulhul mai hi. Rs 2,000 note nei mahle hang, Mahajon te’n sum nen akhenna ding uh neituanlou chih ahih ziakin, mipi’ ading haksatna genvuallouh tung lellel hi.
Ahitakin, en vengveng lehang, ATM booth hiam ahihkeileh zan khawvak a Bank mai a ki-line/ ki queue-te mi zawng leh gentheite ngen hi a, mi hausate a kivolh lam uh theih hilou hi. Bank khenkhat kisiamtan in a nak nuai kamsiam in mipi khemsawm mahle uh pomtheih vual ahituan kei! Hiai ATM queue ziakin mipi’ nitha tamtak mangban a, tualou in traffic tanpha hihbuai zou mahmah a, security-te adingin leng thapaih huai mahmah dingin gintak huai hi. Prime Minister Modi in black money leh corruption hihbei tupna ziak ahi chi’n kampau zangzang mah leh alehlam ah, khualzinmi (tourist) leh bazar kaiding hih tawmna ahi zaw diam chihtheih in om a, duhta lua-akta kilawhkhup kichi paunak bangleng hong dik thei mawkdiam? North East telin India gam state tuamtuam ah sum note thak a crore a sim matkhiak hisek ahihdan Newspaper-te ah imu a, amaute’n bangchibang hiai sum note thakte kua tungtawn a ana lakhia (withdraw) theisek uh adiam? A sung (Bank) asemte’ theihpihna lou in lah sum note thak huai zahzah lakhe theilou ding uh a, mi zawng leh gentheite’n Rs 2,000 lakkhiakna dingin kizan hahpih maimah zel hi.
Laisiangthou ah a zawngte zawng deuhdeuh ding, ahaute hau deuhdeuh ding chih kigelh pen hong dik toutou ding bang a, festival season hun a buaina tuamtuam i tuah hun chiangun kuapeuh buai himahleh, abuai diak kholte mizawng leh gentheite kihisek hi. India ah rural population 70% apan 80% kikal chih hi a, tuma deuh apan buhlak i kipan uh a, mi tamtakin buhlakni a annnek bawl chihte ihih zoukei uh a, tuilou nei tamtakte’n lakah buhpuakna dingin gari hire zoulou chih khawng hi maimah hi.
Himahleh, lungke kei peuhmah lehang i chi ut lai a, festival hunbi ahih kawm in khawmpi season leng ahi hi. Saptuam tuamtuam te’n khawmpi nei in, kum paisate sang mahin budget bang a khepkhep phial a pungin hon guang uh a, Pathian apan lametna sangtak i nei lai uh a, hiaite hih buchin ahihtheihna dingin saptuam mipi leng ginomtak a i om uh a, thilpiak tawh kisai naksem a i kisuk uh poimawh ding bang hi. Hiai hunbi pen hunbi poimawh leng ahi a, naupangte’ result suah hun leh admission bawl hun hong hipah dinga, school uniform leh a laibu dite uh lei hunleng hong hilai dinga, Christmas leh kumthak lopna dinga sum sen hun, moukhakna leh lopna dinga sum thawhkhiak hun leng hong hiding hi. A poimawh pen zaw la khatin ‘Bawi Aw, tukum Krismas zaw hon guiken aw…!” a chih penpen mahmah leng ahi.
Transfer & Posting
(MHS Doctors)
1. Dr. Sh. Mangol Singh, Sr. Specialist, District Hospital/Thoubal as CMO/Jiribam.
2. Dr. Th. Dineshwar Singh, Sr. Medical Officer, District Hospital/ Bishnupur as DIO/Jiribam
3. Dr. Kh. Gojen Singh, DMO, Imphal East as DMO/Jiribam as additional charge.
4. Dr. G. Sonachand Sharma, MO i/c, Community Health Centre/Jiribam as DTO/Jiribam as additional charge.
5. Dr. Liankhozam Guite, DMO/CCpur as CMO/Pherzawl
6. Dr. T. Vumchinpau, DFWO/CCpur as DIO/Pherzawl as additional charge.
7. Dr. Phirthanglien Buhril, DAO/CCpur as DMO/Pherzawl
8. Dr. T. Pumzathang, DTO/Tamenglong as DTO/Pherzawl as additional charge.
9. Dr. Edwin Golmei, DLO/Tamenglong as CMO/Noney
10. Dr. Sunil Kamei, DIO/Tamenglong as DIO/Noney as additional charge.
11. Dr. Zianthuilung Kamei, Sr. Medical Officer, District Hospital/Tamenglong as DMO/Noney
12. Dr. Guidaithui Kahmei, DTO/Tamenglong as DTONoney as additional charge.
13. Dr. Th. Surchandra Singh, Joint Director(MC)/Medical Directorate as CMO/ Kangpokpi
14. Dr. L. Joykumar Singh, Sr. Medical Officer, Primary Health Centre/Gamphazol as DTO/ Kangpokpi
15. Dr. T. Manihar Singh, Sr. Specialist, Dist Hospital/CCpur as CMO/ Kamjong
16. Dr. N.K. Ningreiwon, DMO/ Ukhrul as DMO/ Kamjong as additional charge.
17. Dr. A.S. Kapangring, DIO/Ukhrul as DIO/Kamjong as additional charge.
(MSDPDC Limited)
1.Leikhomang Haokip, Manager, Moreh Sub-division will look after the works of DGM, Tengnoupal division.
2. Leimaram Dorendro Singh, Manager to GM(EC-III) & incharge Dy General Manager(Enforcement) will look after the works of DGM, Kamjong division.
3.V. Hrangchal, Manager, CCpur sub-division will look after the works of DGM, Pherzawl -division
4. Y. Suresh Singhm Manager, Tamenglong sub-division will look after the works of DGM, Noney division.
(Medical Deptt)
1. Stephen Nengsonlian (EIN-066272), Pharmacist, District Hospital/ CCpur will be utilised at CMO office/Pherzol
2. T. Chingbiaklun (EIN-066263), Pharmacist, Primary Health Cenmtre/Sinzawl will be utilised at CMO office/Pherzol
3. Nemneilam Haokip (033446), LDC, Office Assistant-cum-Computer Operator at CMO office/ Imphal East will be utilised at CMP Pherzol
4. Kencha G. Samte (EIN-035680) Upper Division Clerk, Primary Health Centre/Saikot will be utilised at CMO office/Pherzol
5. Hauzathang (EIN-035705), Chowkidar, CMO office/CCpur will be utilised at CMO office/ Pherzol
6. A. Brajabidhu Singh, Peon-cum-Packer at CMO office, CCpur will be utilised at CMO office/Pherzol
7. Rochung, Driver, CMO office/ CCpur will be utilised at CMO office/Pherzol.
No comments:
Post a Comment