CCpur SP Rakesh Balwal IPS thupiak dungzui in CCpur Civil police leh Traffic police ten tulai in khopi sung a taituah gari pei nih leh passenger pua a tai Diesel Auto te avangkim in check zel uhi. Hiai toh kiton in tuni in leng CCpur Civil police leh Traffic police ten hiangtam Lamka Tipaimuh Road a PTC GHQ Office lutna bul ah khopi sung a passenger pua a tai vial leh leh Diesel Auto te khamkhawl in Driver in gari hekthei na dia driving licence nei na hiam, gari lai pua kim hia chih te chek in, driving licence leh gari lai paw lou te TR 5 receipt cut in sum liau sak uhi. Tuni in CCpur Civil police leh Traffic police in diesel auto chek abawlna uah gari lai leh driving licence paw lou auto 44 makia in, asum in Rs. Sang 4 leh 400 mukhia in District Transport office ah submit uhi. CCpur Civil police leh Traffic police in ahihleh maban ah khopi sung mun tuamtuam ah avang kim in check bawl zel ding uhi.
xxxx
VM Building, Rengkai Road aom Sangai International University Manipur SIUM in apaisa December 9 a class apat uh toh kiton in tuni in student te omna ding Hostel honna leh latna zenhang Bazar Zenhang Lamka ah nei uhi. Hiai hun ah Sangai International University Manipur a mohpuakna nei ban ah lecturer, student leh deihsak tute tamtak te ua, hun zatna Miss Jamngaihching in makaih a, Pastor D Sanglian, Local Pastor NLBC, Elim Veng in Sangai International University Manipur SIUM hotel honna leh latna nei a, hall hun ah hunpi zang uhi. Hiai hun ah Miss Debola in welcome address gen in, V hangkhanlian Ex-minister ban ah Vice president, BJP Manipur in thugenna aneih ban ah Dr Rousiem leh Dr. S Chiru ten thugenna nei in Elder Vungzapum in hun khakna nei hi. Honkhiak aom Sangai International University Manipur SIUM hotel ah tuni apan in student ten admission bawl in om pan thei ta dung ua, hiai hostel ah electric leh tui kining ching om ding a, student te kiang ah metres, pillow, cot almirah reading table, chairman leh electric bulb chih te university in a thawn in pia ding a, gamy facilities aom ding ban ah wifi a free in zang theih ding uhi. Tuni a Sangai International University Manipur SIUM hotel honkhiakna hun ah V hangkhanlian Ex-minister leh Vice president, BJP Manipur in hiai bang hun a ngaina tak a chial aomna tung ah kipah thu gen in, Sangai International University Manipur SIUM in lamka khopi adia hotel changkhang mahmah khopi a hotel om te facility kibang hong hon khiak uh kipahpih mahmah ahihdan gen in, hiai hostel leh Sangai International University Manipur in gamsung adia kisak theihpih huai ding leh gam enkol tu ding laisiam tamtak hon sek khiak uh adeihsak thu gen hi. Aban agenna ah hiai building in min kichian tak nei lou a, tuni apan Hangkhanlian Plaza Zenhang Bazar chih a min vuah hita ding ahihdan gen hi.
XXX
Dr. Kim Simte in Chief medical officer CMO leh District Mission Director District Health society CCdur alet nung a Block Program Management Units BPMU leh District Program Management Units te toh a masa pen ding in tuni in CMO Mini Conference hall ah meeting nei uhi. Meeting ahihleh sunma dak 11 in kipan a, hiai hun ah Block block chih a BPM, BDM, BFM, HMIS ban ah District hospital a Accountant, Data entry operator te kimtak in tel ua, common review meeting nei uhi. Hiai hun ah Dr. Kim Simte Chief medical officer CMO leh Seiboi Mate Block Program manager BPM te’n BPMU leh DPMU te damtheihna toh kisai a mohpuakna liantak lakha uh ahihdan gen ua, nnasep dia piak aom te kuhkal leh chitak a semsuah tou zel a, maban panlakna dia ah kithu zak tuah a tuasang mah a panla thak ding in chialna bawl uhi. Meeting hun a PFMS, MCTS, ASHA database ban ah CHC, PHC leh PHSC a facility survey format toh kisai leh thu poimoh tuamtuam genkhawmna nei uhi.
XXX
Evengilical Baptist Covention EBC lamka north division nuai a om EBC Zenhang Lamka in naupang Sunday school leh Baptist Children Department BCD Learning Centre ding abawl uh zoh siang ahihtoh kiton in tuni sunnung dak 1 in honna leh pathian kiang ah latna nei uhi. Hiai hun ah EBC Zenhang lamka a saptuam makai ban ah septuam mipi leh Sunday school nuapang te tel ua, Pastor MT Khanlal Local Pastor EBC Zenhang Lamka in hunzatna makaih a, hall sung ah program zat ma in BCD Learning Centre honna om hi. Hiai hun ah Rev. S Vungminthang General Secretary, EBC in nuapang lamte ading a EBC zenhang lamka in BCD Learning Centre building abawl thak uh pathian min a honna nei in, mipi hall sung ah lut in Rev. S Vungminthang General Secretary, EBC in anaupang te manphat dan leh poimoh dan genna nei in, honkhiak aom BCD Learning Centre building thak pahtian kiang ah latna nei hi. Sunday school nuapang te makaih in mipi lasak khawmna nei ua, K Nengchinlian Secretary Building committee in BCD Learning Centre building lamna toh kisai report piakna nei a, Upa Luaikhothong Local Vie Chairman in kipahpihna thil piak piakkhiakna hun la in, upa Vungzapum Local Chairman in thumna in hun khakna nei hi. Tuni a BCD Learning Centre honkhiakna hun a K Nengchinlian in report apiakna ah EBC Zenhang lamka in nuapang Sunday school building ding awlmohna lian pi toh May 17 2014 kum in building lam patna ding in Local Pastor MT Khanlal in ground breaking in pathian kiang ah latkhia a, huai apan in saptuam mipi in Sunday school building ding lam pan ngal uh ahihdan gen a, building nuainung pen naupang te luah theih dia February 6, 2015 a zoh ahihtoh kiton in Rev K Kamchinkhup in honna leh latna nei a, building tungnung naupang devotion hall tukum a lam zoh ahihdan toh kiton a tuni a hon khiak aom ahi chi a, building tung leh nuai zoh ahihtan a Lakh 42 leh 920 bei ahihdan gen hi. EBC Zenhang lamka in naupang te Sunday school leh devotion hall ding a bawl sung un, naupang te VK Montesori school ah Sunday school kai uhi.
XXX
All Tribal Woem Union ATWU leh All Tribal Movement of Lamka te saina in zan nitak dak 5:30 in bungmual YPA Hall ah All Tribal Woem Union ATWU a pailai Delhi a hoh te apan report piakna leh Mass Awareness campaign nei uhi. Hiai hun ah bungmual khosung leh a sehvel apan mipi tamtak pai khawm ua, hun zatna Nu Ningkhanvung in makaih a, Nu Kimzaching in thumkhawmna hun pi in, Nu Nianglian, President, ATWU in delhi zinna report pia hi. Hiai hun ah kum nawn 2017 a, a 11 veina Manipur state assembly election hun a 58 ccpur assembly constituency a intending candidate te apan thugenna om a, amau ten mipi pailai dia candidate ding a ading na ziak uh leh leh tup leh ngim ban ah a paipih ding te uh genna nei uhi. Hiai hun ah Paukhansuan khuptong hohtheih lou ziak in Singkhanlal Guite in amah mun luah a, CT lian , DK Mang leh Thangbiaklian Hangzo ten thugenna nei ua, Manngaihkim in slogan saamna makaih in, toupa hon sinsak thumna in hun khak uhi. ATWU leh ATML in ahihleh khopi sung mun tuamtuam ah awareness campaign nei zel ua, student te final exam ziak a hun bangtan hiam akhol nung ua, zan nitak apan awareness campaign aneih nawn uh ahi.
XXX
Centre for Community initiative CCI in hongtung ding December 16, 2016 sunma dak 9:30 in The Malsawm Ability Resource centre MARC pearsonmun ah annual thanks giving nei ding ua, program zoh chiang in lamka khopi leh aseh vel ah Christmas carol pai ding uhi.
XXXX
District Supply Office DSO CCpur in National food security act NFSA antang lak ding toh kisai in thusuah bawl hi. Thusuak in ataklatna ah kha lui November kha akipan economic blockage aom ban ah district a FPS Centre ding bawl zoh ahihnai lou ziak in, NFSA antang hongtung ding December 17 zingkal dak 7 apn sunma dak 11 tan in kihawm ding hi. Hiai ding toh kisai in Ration agents ten a kisai khak pih dealing assistant te kiang ah rationing agents identity card leh utilization certificate tawi in antang manding new note thak tawi in release order la thei ding uhi. NFSA antang ahihleh assembly constituency wise in kihawm ding a, Henglep in 56 FPS Centre, Churachanpur in 125 FPS Centre, Saikot in 98 FPS Centre, Singngat in 63 FPS Centre, Thanlon in 33 FPS centre leh Tipaimukh in 11 FPS centres ten la ding uhi. uhi.
No comments:
Post a Comment