HEADLINES:
District thak 7 laka 3-te official a honkhiak hita:
CM Ibobi Singh in tuni’n Kangpokpi District leh Tengnoupal district hongkhia
Imphal, Dec-15: Sadar Hills district leh Jiribam district bawlkhiak ding deihlou a United Naga Council (UNC) in apaisa Nov.1, 2016 apan kiphinna nei in State sung a National Highway-te ah economic blockade a bawl banah Naga mite tenna bial teng ah rally neih in om mahleh Manipur cabinet in district 7 bawlkhe thak uhi. District bawlkhiak thak a omte lak ah zan a Jiribam district honkhiak ahihnung in tuni’n Kangpokpi district leh Tengnoupal district-te Chief Minister O. Ibobi Singh in official in hongkhia hi.
Tengnoupal DHQ ah tuni a Chief Minister Ibobi Singh in district honna hun a thugenna ah district thak honkhiak ding ziak in state police commando khenkhat si mahle uh administration lemtangzaw ding tupna government in a bawlkhiak ahihdan gen a, state police-te beih a om tawh kisai naktak in mawhpaih thu taklang masa hi. CM in a genna ah, police-te beih a kaplup in bangmah gahkhe saklou ding hi’n gen a, issue omte kihouna pansan a hihveng ding hizaw chi hi. District honkhiak zawh in cultural programe tuamtuam in zui a, huaizawh in CM leh a team-te’n helicopter in Kangpokpi zuan uhi.
Kangpokpi district honkhiakna ding tawh kisai in tuni zingsang tung apan in DC Complex ah Sadar Hills district mipi paikhawm uh a, Tengnoupal apan IAF Chopper a tuang in sunnung dak 1.30 in CM leh a team-te’n Kangpokpi Helipad a bawh hun un mipi sang tamtak in ana dawn uhi. DC/Kangpokpi in DC complex ah Kangpokpi district apan MLA 3-te : IFCD Minister Ngamthang Haokip, MLA Yamthong Haokip leh MLA Nemcha Kipgen tel in mipi sang tamtak in kipahna husa tawh na dawn uhi.
Chief Minister in Kangpokpi district chiamtehna dia kibawl (districthood plaque) hongkhia a, huaizawh in DC/Kangpokpi office honna di’n ribbon cut nawn hi. District leh DC office honkhiak zawh in Kuki Cultural Troupe, Nepali Cultural Troupe leh Meetei Cultural Troupe namlam lahna om a, Nepali community in leng traditional item hun zang uhi. CM in a thugenna ah community khat deihna hiam ahihkeileh community khat kalh a district kibawlkhia hilou in vaihawmna lemtangzaw ding tupna a bawlkhiak ahihdan gen a, district sung a teng nam tuamtuamte’ a ding ahi chi hi. Kangpokpi district mipi’n tuni a honkhiak a om district pen Christmas leh New Year gift a pom di’n leng ngen hi.
Dy CM Gaikhangam in society ah hiamgamna in mun neilou a, Manipur mipi’n “Violence Free” state delh a anti-social element tuamtuam beisak poimawh ahi chi hi. Kangpokpi district honna a Naga cultural troupe pawl melmuh ahih louh poi a sakthu leng gen hi. Mihingte’a dia thuak theihval thil om thei ahihna ah government in leng mihing hihna ziak a thuak theihval om thei tham a, hileleng Kangpokpi mipi’n government a muanna nei a kum hizahpi a ngakzawhna tung uah kipahpihthu gen hi. Revenue Minister, I.Hemochandra Singh in Manipur ah ethnic group tuamtuam a tenkhawm ziak in mun kilawmtak suak a, Kangpokpi district leng community tamtak tengkhawm te’n kilawm sak ahihthu gen hi.
Chief Minister Ibobi in zan in Jiribam district hongkhia a, district thak 7 bawlkhiak a omte lak a official a kihong masapen suak a, tuni a honkhiak a omte tawh district 7 lak ah official in 3 honkhiak hita hi. CM in tuni a Tengnoupal leh Kangpokpi district honkhiakna a neihna hun ah Dy CM Gaikhangam, Revenue Revenue, Forest & Environment Minister, I. Hemochandra Singh; Commerce & Industries Minister, Govindas Konthoujam banah CM’ zi Landhoni, MLA in leng Chief Minister zui uhi.
TUALSUNG:
District khenzak naktak in mawhpaih
Lamka leh Tuibong dist. bawlkhiak di’n thupuk
Lamka, Dec- 15: Langkhanpau Guite, Chairman, ADC/CCpur makaih in tuni’n Member of District Council te’n District Council hall ah emergency meeting nei uh a, CCpur district khenzak tawh kisai telin thu tuamtuam genkhawm uhi. Emergency sitting ah MDC 26 omlak ah member 20 paikhawm uh a, K. Hnunliansang, AE/DRDA in PMAY scheme tawh kisai a guideline tuamtuam omte pulak hi.
Member paikhawm te’n village recognition dia ngetna piaklut-te genkhawm uh a, DC/CCpur tungtawn in village recognition ngen khaw 8 lak ah 6 pomsak (approved) uhi. Khua 8-te ahihleh Henglep Sub-Division akipan Vongmol Village, Singngat Sub-Division akipan C. Tuiveljang leh Tuiboung Sub-Division akipan S. Hengcham, N. Molsophai, Bethlehem Village, S. Bualkot Village, B. Phaicham Village leh K. Munhoih (West) Village hi a, huailak ah Vongmol leh C. Tuiveljang chihlouh khaw 6-te member paikhawm te’n pomsak (approved) uhi. Vongmol ahihleh concern MDC omlouh ziaka pending hi a, S. Tuiveljang ahihleh concern MDC in objection abawl ziakin member te’n pending in koih uhi.
CCpur district khenzak a Pherzawl district bawlkhiat tawh kisai a Manipur Cabinet in Hill Areas Committee (HAC) leh stakeholder tuamtuamte a theihsaklouh tawh kisai poisa in Article 371-C palsat/kalh ahihman in naktak in mawhpaihthu puang uh a, khantouhna leh kivaipuakna nuamzaw om ding ngimna a Pherzawl district bawlkhiak kipahpih mahle uh Thanlon Sub-Division pen khenzak theih hilou ding a, Sub-division 2-te gawmkhawm dingin thukim uhi.
Khantouhna leh kivaipuakna nuamzaw om theihna din Singngat A/C leh CCpur A/C gawmkhawm in Lamka district a bawlkhiak ding ban ah Henglep A/C leh Saikot A/C gawm in Tuibuong district bawlkhiak ding thupuk uh a, thupukna ahileh cabinet meeting a genkhawm/puaklut dia state government kiang ah move/put-up din thupuk uhi.
Tuaban ah, maban a Hill district tawh kisai toh kisai a thupukna lak ding a om himhim chiang in grassroot level government MDC-te theihsak masak hitaleh a deihthu gen uh a, council sitting a thupukna omteng cabinet a puaklut ahih theihna dia naktak a panlak hiding in gen uhi.
Police te’n Jail ah koih uh
Lamka, Dec-15: Singngat Police te’n tuni’n CJM court ah Nanggoutuang (59) s/o (late) Nauliankham of Tedim, Myanmar leh atapa Khamtelkapsing(24) pawkhia uh a, court thupiak bang in Imphal a Jail ah koih uhi. Nanggoutuang leh atapa bel Dec 9, 2016 zing dak 5:00 vel in border pillar 36 kimlak ah Suangdai khua zuanding bike (duke) Myanmar Registation Engine No.2-905-31612) atai lai 26-Assam Rifles te’n galvan MA-16 rifles 4; M-3 carbine 2; AK 56 rifles 4; Magazine (empty) 12 ban ah Myanmarese currency Kyat 10 lakh tawh mankhia uh a, Singngat Police-te khut ah piakkhiat nung FIR No.7 (12) 2016 SGP-PS U/S 25 (1 (a) (d)1-C) Arms Act. registered in om hi.
Training of Trainers on Cashless Transaction
Lamka, Dec-15: Nehru Yuva Kendra,CCpur saina in NYK/CCpur office ah tuni sunnung in ‘Training on Trainers on Cashless Transaction’ om a, National Youth Volunteer-te leh Youth Club Leader-te tel uhi. H .Doungel, Youth Co-ordinator, NYK/CCpur in khawvel ah khantouhna pailel a, eileng khantouhna mun a ki-om ahihziak in khawvel khantouh dungzui a ikikhek uh poimawh chi hi. India Prime Minister in sumlui Rs.1000/-leh Rs.500/- note asihsak tawh kisai bangchi a panlak ding hiam chih ngaihtuah ngai a, govt. in cashless transaction hong pat hunhun a zangthei ding a kuapeuh kigingkholh leh kizil poimawh hi’n gen hi. NYK/CCpur nuai a NYV (Volunteer) te’n Dec 16 apan Christmas ma teitei a Youth Club/Church level ah 2vei bek cashless transaction awareness program neih pih a, photo tawh submit ding in mohpuakna guan hi.
Technical hun ah Peter G. Biaklian, Dist. Manager, e-Governance/CCpur leh Michael Paul Haokip, Dist. Manager, e-Governance/CCpur te’n sinsak uhi. Amau agenna uah khawvel a gam khangtou (developed country) te’n kum 30/40 paisa in cashless transaction zang khinta uh a, India ah leng March 2018 apat cashless transaction leh e-property kizat sawm a, doudal theihlouh ahihziakin huai zangsiam ding a kisakkholh leh apoimawh tuamtuam-te theih masak ngai hi’n gen uhi. CCpur Dist. ah e-Governance nuai ah Common Service Centre 104 omlak ah 10 kia function lel a, aveka zattheih hileh India gamsung pumpi ah sumlui Rs. 1000/- leh Rs. 500/- sihsakna tawh kisai CCpur Dist. mipi’n phattuampih mahmah ding hi’n gen uhi.
SPS in annual thanksgiving cum prize distribution nei
Lamka, Dec- 15: Gangte Veng a Saviour’s Public School in tuni’n Annual Thanksgiving leh Prize Distribution Programme zang uh a, Dr. T. Shoute, Proprietor, Nazereth Nursing Home leh M. Darneingam, Chairman, School Managing Board te’n Special Guest hihna tawh uap in hasotna thu gen uhi. Programme sungin student leh nu-le-pa paikhawm te’n kipahthu genna in thumkhawmna nei uh a, academic attendance leh annual sports a kipahman tuamtuamte hawmkhia uhi.
Khousabung Cluster leh IVR hongkhia
Lamka, Dec-15: Rural Community Development Services (RCDS), Partner NGO-NERCORMP-III saina in zan zinglam in Khousabung khua ah Khousabung Cluster leh IVR honna om a, Special Guest in N.Sukajit, Project Manager, NERCORMP-III/CCpur leh Seilenmang Khongsai, MDC (Khousabung) pang hi. Huai hun a NERCORMP Partner NGO- Sahai Foundation, Rural Aids Service leh Social Transmission Agency makai-te tel uhi.
N.Sukajit in Laikamualsau, Khousabung, Bunglon, Khoirentak Khunou, Khoirentak Khuman leh New Ningthiching khua ading weaving machine & fishery, juice & squash machine, box culvert, tent & catering service items, IVR, Tanky, poultry farm leh banana plantation hong hi. Seilenmang Khongsai in Leisanbung, Kangathei, Bunglon leh Harmontlang khua a ding weaving machine, cane & bamboo machine, fishery, tanky, box culvert leh IVR hong hi.
Special Guest te’n govt. apan fund hongpai-te ahi ding bangtaka zang a, NERCORMP Project nuai a NGO te’n na asepkhiat-te uh mipi’n kithuahpih leh kembit ding in ngen uh a, na aki hoih sep leh govt in fund hong pezel ding hi’n gen uhi. Maban ah NERCORMP Project nuai a NGO te’n mipi’ ading thil hoih atamsem semkhe ding in chial uh a, NERCORMP omsung in atamthei pen khua puah in khantouh sak sawm chiat ding in ngen uhi.
New Lamka (G) a om N. Ginlalmuan’ inn kangtum
Lamka, Dec-15: CYA Road, New Lamka (G) a Electric pre-paid recharge na Vending Station a Genesis Pharmacy neitu Ginlalmuan Vaiphei s/o N. Siaka tenna inn tuzing baihtak dak 12:30 velin akipatna theihlouh mei in kang a, inn kim leh kiang te ban ah Fire Brigade te’n inn dang pehmanlou in phelhmit uhi. Inn kang ah innsung vanzat lakkhiat man omlou in kangtum dimdem hi.
Inn neitu’ Ginlalmuan in inn mai ah concrete bawllel a, inn nung lam ah atung langva, anuai singpek leh abang (wall) buan a kizut ah azi leh tanu tawh teng lel uh a, zannitak dak 12:30 velin avek ua ihmulai khanglou in thil ginghuhu azaktak in, azi kiang ah enkhe ding in sawl a, azi in atenna inn uh mei akang ahihdan atheih in inn nung lam a pucca fencing ah gate lianlou kibawl pansan in azi leh atanu taikhe sak a, aman inn sung ah computer laptop lakkhiat sawm mahleh inn sungteng ah meikhua azam dim ziak in azatlai uh gas cylinder lakhe theilel hi’n gen hi. Laptop back lakhe man hileh asung ah Rs.80,000/- val om hi’n gen a, under wear kia tawh taikhe manlel a, inn kim leh kiangte piak puansilh leh khekol tenglel hi’n gen hi. Meikuang kipatna diktak theilou ahihdan gen a, common room ah azi leh tanu tawh meiphu awi uh a, amit zoh in lum pan uh hi’n gen a, common room lam apan meikuang kipan hi’n gen hi. Inn sung vanzat tuamtuam kangtum lak ah TV LED (Sonny)1, Refrigarator 1, Steel Almirah 2, Wooden Almirah 1, Gas Cylinder 3, gas stove, lupna 2, desktop computer 1, laptop 1, washing machine, sewing machine 1, blanket 6 leh vanzat tuamtuam hi a, inn kangtum teng hisap in Rs.13,06,400/- value tungzou hi’n kigen hi.
Ginlalmuan Vaiphei’ inn kangtum chih theih in zingkal in phatuam ngai te ban ah MDC te’n delh in panpihna tuamtuam pia uhi. YVA GHQ makaih in New Lamka (G) Village Authority leh Philantrophic Organization tuamtuam te’n social work nei uh a, PHED Minister T. Manga Vaiphei in inntung khuhna ding langva pia a, YVA GHQ in van poimawh tuamtuam kaikhawm in inntek-te’ luahtheih ding bukta khat bawlsak uhi.
Mi hunkhop in recharge bawl
Lamka, Dec-15: Manipur State Power Distribution Company Ltd. (MSPDCL)/CCpur Divn. te’n tuni zinglam in Police Station campus a Electric pre-paid recharge nang Vending Station thak ah electric pre-paid recharge leh post paid bill piakna pan uh a, consumer hunkhop in recharge bawl uhi. Vending station thak ah counter 4 om a, counter 3 ah electric pre-paid recharge theih ban ah counter 1 ah post-paid bill biaktheih hi. Thuthak ommasiah huai mun pansan in electric pre-paid recharge leh post paid bill piaktheih ding hi’n kigen hi.
Suangdoh Sub Divn. nuai a Hausa te’n meeting nei
Lamka, Dec-15: Tunai zeka Suangdoh Sub-Divn. kibawlkhe thak nuai a Hausa te’n tuni’n G. Suanchinpau, MDC (Lungthul) inn, Dorcas Veng (New Lamka) ah 1st meeting nei uh a, Sub-Divn. thak kipahpih thu, kuapeuh in nam, pau leh ham vai a laklouh ding in genkhawm uh a, thupukna 3 bawl uhi. Manipur govt. in Suangdoh Sub-Divn. bawlkhiat ziak in kipahthu puang in khantouhna thupitak ahon tut lam-etthu puang uhi. Govt of Manipur kiang ah akinthei lam a Suangdoh Sub-Divn. function sak ding in ngen uh a, CCpur Dist. a Sub-Divn. list lak ah Suangdoh Sub-Divn. leng telsak ding in ngen uhi.
ADC in Jenny kipahpih
Lamka, Dec- 15: Autonomous District Council Member, CCpur te’n tuni sunnung in District Council hall ah Advent Christmas tawh kithuah in North East Idol a 1st Runners-up Jenny Zawnkhanhoih @ Jenny Thomte d/o Themlhai of Vengnuam, New Lamka kipahpihna leh vaidawnna nei uh a, huai hun ah District Council Member leh staff-te ban ah Jenny deihsak leh ngainatu hunkhop kihel uhi.
District Council member te’n district minhoih saktu ahihna ah kipahpih in pahtawina in pakkhi a awh-sak ban uah pahtawinna thil piak leng pia uhi. Langkhanpau Guite, Chairman, ADC/CCpur in Christmas Message gen a, Lal leh hondampa michih lungtang a hong piang theih taktakna dingin kiniamkhiakna poimawh a, huai dia kuapeuh kisa dingin ngen hi. Programme sungin Jenny apan lasak ngaihkhiakna om hi.
ARESA annual conference cum get-together nei
Lamka, Dec- 15: Assam Rifles Ex-Servicemen Association (ARESA) in tuni zinglam in a office uh Nehru Marg ah annual conference cum get-together nei uh a, maban panlak dingdan telin thu poimawh tuamtuam genkhawm uhi. Member paikhawm te’n 2017 a registration fee leh membership fee khansak ding thu agenkhawm ban uah Assam Rifles in Ex-Servicemen-te adia hamphatna tuamtuam a bawlte enkhawm uhi.
Assam Rifles panglui te’n vangsiat atuah hun un panpihna Rs. 12,000/- tan sangthei in, Assam Rifles Ex-servicemen sihna tuak sungkuan naipen in vuina programme a zat din Rs. 12,000/- tan sangthei ding ua, kum 1 sungin medical Aid in Rs. 90,000/- asang theih ding ban ah Ex-Servicemen kum 75 tunglam te’n one time old age grant dan in Rs. 25,000 tan sangthei ding hi’n kigen hi. Meeting hunsung in member te’n haksatna tuamtuam aneihte uh genkhawm in, buaina nei himhim in ARESA Office tut masak ding in leng member paikhawm te’n thupuk uhi.
AR-te’n gari kai khia
Lamka, Dec-15: Tedim road in a totkhak Kaprang khua a culvert ah zan zinglam in Car khat taikhia in guam sung kidenna hi. Tuni zinglam in C.T. Lian Guite leh 25 Assam Rifle-te kithuah in lakhia uh a, Assam Rifle a town commander Pankaj Giri in awlmawh in apanlakna tung ah CT Lian Guite in kipahthu gen hi. Accident kichi pumpelh theih hikei mahleh suk tawm theih ahihna ah kuapeuh pilvang ding inleng ngen hi.
SUUNNA:
Upa T. Tunzathon (70) h/o Vungngaihniang of Vengnuam South, New Lamka tunitak dak 8:00 in RIMS, Imphal ah Guillain Barre Syndrome (GBS) ziakin si a, Dec 16, 2016 in YPA hanmual, New Lamka ah kivui ding hi.
P. Gingoulian (44) s/o (late) P. Damsuan of Dorcas Veng, New Lamka tuzing baihtak dak 12:20 velin cancer in si a, tuni’n YPA hanmual, New Lamka ah kivui hi. Aman Dorcas Hall kong ah ‘Eimi Sana Bawlna’ dawr bawltu ahi.
T. Liankhansiam (64) h/o Lalremruot of Nghathal, tuzing dak 8:15 velin sungna in si a, nitaklam in Nghathal hanmual ah kivui hi.
STATE THUTHANG:
Ambush ah police 3 si; 11 liam
Guv leh CM in mawhpaih
Imphal, Dec-15: Tengnoupal district thak hongkhiatna ding tawh kisai a Imphal-Moreh lampi (NH-102) ah Road Opening Party (ROP) a pai security personnel te mun 2 ah meltheihlouh galvantawi-te’n ambush uh a, huai ah police 3 si in 11 liam uh hi’n kigen hi. Police te’n thiltung tawh kisai in NSCN(IM)-te gamtatna hiding in gingta uh a, himahleh tutan helpawl kipuang om nailou hi. Police Official te’n Moreh apan km 21 vel a gamla Lokchao bridge gei ah tuni zingsang dak 6:30 velin Moreh Police Station apan 407 Tata Truck a ROP duty a om Police Commando convoy te’n ambushna tuak in security personnel 2 si in midang 7 liam uhi. Huai nung zingsang dak 8:00 velin Chief Minister in district thak a hongkhiakna ding mun Tengnoupal district HQ phak ding kuan km 15 vel a gamla Bongyang area ah security personnel te’n ambush 2na tuak uh a, huai ah security personnel 1 si in mi dang 4 liam uh hi’n kigen hi. Helpawl-te ambushna ah si security personnel-te Constable Lungrei Taranga Maring, Chandel, Constable Md. Ayub Khan (35) of Yairipok Ningthounai, Moreh PS leh 2nd IRB a Havildar Y. Jeevan hi uh a, liamna ziak a Imphal a hospital tuamtuam ah etkol a om Sub-Inspector Pratap, Sub-Inspector P. Sharat, Head Constable Md. Basir, Head Constable Lankholun, Head Constable H. Sharat, Constable Luxman, Constable M. Somorendro, Driver Jangminthang hi uh a, dinmun lauhthawng huaite Shija hospital ah puaklut in om uhi. Police thusuak in ambush zawh nung phet in Assam Rifles leh Police Commando te’n ambush na munte umkual in search operation bawl uh a, himahleh matkhiak neilou uhi. Huailou in L.M. Khaute, IPS, DGP leh Clay Khongsai, IG (Range-I) te’n ambushna munte etkhiakna va nei uh hi’n leng kigen hi.
Thiltung tawh kisai in Governor Dr. Najma A. Heptulla leh Chief Minister O. Ibobi in mawhpaih thupuang in dawilawk leh mihing banglou a gamtatna hi’n gen uhi. Governor Dr. Najma A. Heptulla in thusuah a bawlna ah helpawl-te ambush na a police personnel 3 leh personnel dang 11 in liamna a tuah uh lungphawng leh thuakgim huai hi’n gen a, tualthatna in kuamah lunglutna sepkhiak louh ziak in akisaikhakpih te’n tuabang a thagum suahna tawpsan ding in ngetna bawl a, thubuai om teng kihouna tungtawn a suk veng ding leh sihna tuak innkuante thuakpih thu puang hi. Chief Minister in ambush na ah si security personnel-te innkuan naipen-te kiangah Rs. 5 lakh leh govt. sepna piak ding banah liamna tuak-te ki etkolna man teng government in seng ding chi hi. Government in kigolh khakna neite gawtna piakna dia matkhiak ding in panla ding a, tunitak a Cabinet meeting hun ah maban panlak ding dan tawh kisai genkhawmna nei ding uh hi’n leng kigen hi.
Hill district 4 ah rally om
Imphal, Dec-15: Manipur government in district thak 7 a bawlkhiak uh mawhpaihna leh United Naga Council (UNC) President Gaidon Kamei leh Info. & Pub. Secy. SK Stephen-te thunung-thuma omlou a khahkhiak ding phutna in UNC makaihna in Naga inhabited area – Senapati, Chandel, Ukhrul leh Tamenglong district Head Quarter-te ah tuni’n rally om hi. Rally ahihleh zinglam dak 11:00 in kipan a, huai hun ah rally paite’n placard ‘Don’t play with people’s land and future for political mileage’, ‘People and land are not separable’ chihte tawI uh a, Manipur ah President Rule koih ding leh Indo-Naga peace Process a kintheipen a thutawpna bawl ding phut uhi. Rally tawpna ding in Governor kiangah piak ding in Senapati, Chandel, Ukhrul leh Tamenglong a Deputy Commissioner kiangah memorandum pia uhi. Rally hun in Chief Minister O. Ibobi Singh lim hal uh hi’n leng kigen hi.
1st MR ah Security personnel 3-te zahna pia
Imphal, Dec-15: Tengnoupal district a tuni zingsang a NH-102 (Imphal-Moreh) in a tawtkhak Lokchao leh Bongyang area ah NSCN-IM-te hidia gintak te’n mun 2 ah security personnel-te ambushna uah security personnel 3 si ua, JNIMS a post mortem bawl zawh nung in tunitaklam in 1st MR Parade ground ah full state honour piak in om uhi. Huai hun ah Chief Minister O. Ibobi Singh, Dy. CM Gaikhangam, Cabinet Ministers, MLAs, L.M. Khaute, IPS, DGP, leh State Police Dept. a high ranking official te’n zahtakna latsakna in pak pia uh a, 1st Manipur Rifle te’n gun salute a bawl uhi. Huai nung in a innkuante kiang uah siluang piak khiak hi uhi. Security personnel 3-te Yengkhom Jeeven (51) s/o (late) Y. Angou of Leishangthem Awang Leikei, Md. Ayub Khan (35) s/o Salauddin of Yairipok Nongthoumanai leh L.S. Lenghir Charanga (35) s/o (late) Lengrin of Kharam Khunou hi uhi.
Kikaptuahna ah police 3 liam
Imphal, Dec-15: Tamenglong district a Noney mun ah tunitak in galvan tawi helpawlte tawh kikaptuahna ah Police a Sub-Inspector khat telin police personnel 3 liam uhi. Thusuak in Chief Minister in Noney district a hongkhiakna ding mun public ground ah police commando omte tunitak dak 6:20 velin helpawl te’n va bukap uh a, huai ah kikaptuahna piang in Police a Sub-Inspector Thingbaijam Vebekananda leh IRB personnel 2 liam uh a, mi 3-te Noney Primary Health Centre ah first aid piak zawh in Imphal ah etkol dia puak in om uhi.
Lilong Nungei ah inn 5 hal in om
Imphal, Dec-15: Lilong Nungei ah zan nitak a khaw 2 kalah kinawktuahna tawh kisai in Nungei Mayai Leikai ah tuni’n Honda Activa khat halsiat banah security dinmun sukkhauh a om hi’n gen uhi. Akigendan in Lilong Nungei ah khaw 2 kalah buaina ziak in tenna inn 5 halsiat banah meltheihlouh te’n Grocery shop khat luh uh a, Thongam Shyam fish farm a water pump suksiat banah nga tamtak gukmang a om hi’n leng gen uhi. Nungei Muslim Khul apan mi 4 velin zan nitaklam dak 4:00 vel a Nungei Meitei village-te thau akap khum ziak un buaina kipan a, tenna inn halsiat a omte Laishram Mukta, Laishram Ganga, Laishram Ibomcha leh Irungbam Dinesh-te hi uhi. Thiltung tawh kisai zakphet in Lilong Police leh Imphal West District Police te’n buaina mun delh pah mahle uh Nungei Muslim village te’n lampi a khak ziak un nitaklam dak 5:30 velin buaina mun tung uh a, tear gas zang in buaina bawlte hawlkhia uh hi’n kigen hi. Huailou in Manipur Khadi and Village Industry Board a Vice-Chairman banah Wangoi A/C a Congress aspiring candidate S. Achouba in buaina thuak-te omna ding in Iramsiphai Mamang Community hall ah relief camp bawl hi’n gen uhi.
Madrassa Teacher lakna tawh kisai dikloutak a sai hiding gingta
Imphal, Dec-15: Muslim Council Manipur (MCM) te’n Prime Minister N. Modi programme nuai a Wakf Board Manipur (WBM) etkaina nuai a Madrassa teacher 150 lakna tawh kisai diklou tak a sai hiding in gingtakna nei uh hi’n kigen hi. Huai tawh kisai a Haji Arafat, Gen. Secy., MCM in Wakf Board Manipur a Madrassa modernization na dia English, Mathematics, Science, Social Science leh Computer Science adia teacher lakna ah dikloutak a sai thil tamtak muhkhiak hi a, MCM te’n hiai tungtang ngaikhawk in teacher dia guang a om te’n chitna nei uh hiam chih suizuina pan ding uh chi hi. MCM te’n post apply na dia teacher te’n lampi dik zui uh hiam ahih keileh qualification tawh kisai a Manipur Education Dept.-te approved certificate-te zang uh hiam chih suizui hiding a, diklouna muhkhiak ahihleh corrupt zone a Wakf Board Manipur puang ding uh hi’n leng taklang hi.
Molcham Primary School ah medical camp om
Imphal, Dec-15: IGAR(S) thusuak in 26 Sector nuai a 4-Assam Regiment-te saina in Dec 13, 2016 in naupangte a ding in Chandel district a Molcham Primary School ah medical camp om hi’n gen uhi. Huai hun ah 4-Assam Regiment a Medical Officer makaihna in medical team te’n naupang 30 val en in vaccination leng kap uh a, hiai tungtang ah school thuneite leh Village authority te’n Assam Regiment-te tungah kipah thupuang uhi.
MDPF candidate in Heingang A/C ah election tuh ding
Imphal, Dec-15: Manipur Democratic People Front (MDPF) te’n maban 11th Manipur Legislative Assembly Election hun ah 2-Heingang Assembly Constituency ah election tuh ding in Dr. G. Tonsana sep uh hi’n kigen hi. Huai tawh kisai a MDPF te’n Heingang A/C a party motto ding in ‘peace, harmony, united and integrated, a solid strong Manipur; dignity and self respect, equality, fraternity and liberty; poverty free industries, hard working, cooperative society; healthy and non polluted/noncorrupted environment free state; zang ding uh hi’n kigen hi.
CC Meet :
NEROCA in DM Rao zou; FC Zalen pang ding
AMFA saina a Imphal Mapal Kangjeibung mun a 60th Sir Churachand Singh, KCSI, CBE, Memorial Football Tournament quarter-final match tuni in kipan a, tua ah Durand Cup finalist NEROCA FC leh 2016 Winner’s Cup champion DM Rao, Sekmai te kimawl ua, NEROCA in 4-0 tak in zou hi. Hiai match ah half ma minute 25 in NEROCA apan Kallen Varney in goal khat khum in 1-0 in makai ua, tua zawh half nungin Ejio Chenedu Emmanuel in goal nih khum in Sushil Kumar in goal khat khum in 4-0 tak in NEROCA vualzou uh a, semi-final lut uhi. Dec. 16, 2016 in FC Zalen leh Baarhoongka AC, Kokrajhar, Assam ten quarter-final match nei nawn ding uhi. Hiai match a vualzou penpen in semi-final a NEROCA te kimawlpih ding uhi. Match kimawlna bel nitaklam dak 1:30 in kipan zel hi.
TUNI THUPI:
“Nangong na hamsiat ding ah kei, mittaw ma ah pukna na koih ding ahi sam kei, na Pathian laudan na siam ding ahi: Kei Toupa ka hi hi.”
– Levitikas 19:14
EDITORIAL:
Cabinet in a thupukna a enthak diam?
Manipur state assembly election 2017 kumbul a a om dek ziak hiam ahihkeileh bang thuguk kiphumgu om ziaka Manipur state cabinet in zankhat thu a district 7 hon bawlthak uh a de aw chih ngaihtuahna neitheite’ adingin ‘thought’ piaktuak mahmah hi. Chief Minister Ibobi Singh in term thakah Congress in vaihawmna lendinga a kigintak nawnlouh ziaka amah deihsaktu deuh hi a atheihte kiangah Christmas gift dan a abawl adiam ahihkeileh district bawlthak a omte’ tungtawn a ‘sympathy vote’ a etna azaw diam chih kal bukkak (comparison) thamching mahmah ‘issue’ ahi. State govt in Ukhrul district ah project tuamtuam a honkhiak dek hun un thau leh bomb ging ngaih mahmah a, tuni in Chandel district ah police personnel-4 si nawn uh a, Manipur maban ding lunzinhuai mahmah chih i gen masa ut hi.
Ibobi makaih Congress Party in kum 15 vingveng Manipur Chief Minister hihna ana len a, hiai hunsung in buaina tuamtuam ziakin a khuaksatna leng thupi mahmah dingin gintakhuai hi. Manipur ah thubuai-labuai tam mahmah a, niteng phialin strike, total shutdown, bandh, pen down strike, student protest, rally leh economic blockade chihte omtou den hi. India in state 29 aneihna lakah Manipur in thubuai tuamtuam ziaka haksatna atuah utawh kisai ‘record break’ ngahzou mahmah dingin gintakhuai hi.
State Government in thakhat thu a district 7 hon bawlkhiak guihna in mipi tamzaw kiguihsak mahmah a, Prime Minister Narendra Modi in Rs 500 note leh Rs 1,000 note hon sihsak guih ziaka mipi lungphawngtak a a om utawh akibatna tan leng om a theih ahi. Aziak ahihleh, mipi a kipak leh a kipaklou kal om tuak a, himahleh, government in khatvei decision (thupukna) alak guihpen uh a advisor-te uh tungtawn a hun sawtpi apan ana hisap uleng hikha thei hi. Huchih lai in tu in national Capital New Delhi pansan a om Naga civil society tuamtuamte’ kigawmna Joint Naga Students’ Union (JNSU), Delhi in district 7 bawlkhiak a om pen naktakin mawhpaih uh a, Nagate’ gam tampi suk hek sawmna leh Nagate pen Manipur ah minority suahsak utna ahi chi bilbel uhi. District bawlthak a om Jiribam, Kakching, Kamjong, Kangpokpi, Noney, Pherzawl leh Tengnoupal district te’n district thak tungtawnin Nagate khenzak tupna leng hikha mahmah ahi chi uhi.
Huchikawm kalah, Thanlon MDC Th. Jamchinthang leh Ngazam MDC T. Paukhanlian te’n Chief Minister kiangah lehkha pelut in, Pherjawl district headquarters pen Thanlon hihen chi uhi. District tuamtuam puankhiak a om pen kipahpih huai ahih kawmin amun leh mual thu et in Thanlon pen district headquarters ahihding ahi chi uh a, hiai dan a apaitouh ding leh constituency mipi lungkimlou ding uh chih taklang uhi. District thak bawlkhiakna tawh kisai in a kipak leng tam a, alungkimlou leng hunkhop om a, hiai tungtang ah state cabinet in a thupukna uh a enthak ding uam chih gen haksa mahmah hi.
Alehlam ah, Jiribam district thak sunga Hmar khua 13 lutsak a omte Pherzawl district ah lutsak hizaw hen chi pawl leng om nawn ua, Pherjawl district nuaiah khaw 13-te a om uh deihzaw uh ahihdan gen uhi. Huai kawmin, Kangpokpi district mipi’n bel state cabinet thupukna kipahpih mahmah kawmin, Chief Minister leh a khawnbawl upate’ tungah kipahthugen uh a, Joint Action Committee for Sadar Hills in Congress party tunga boycott apuan uleng zukkik ngal uhi. Kangpokpi leh Sadar Hills kichi kibang hi a, Sadar hills district chih hileleng a headquarters ding pen Kangpokpi mah hi veve a, government thil ‘play’ dan nalh mahmah khat om hi. Pherjawl district mipi’n cabinet thupukna kipahpih mahmah uh chih ahi.
Ahi a, Sadar Hills/ Kangpokpi district bawlkhiakna ding vai ah kibeihna sang mahmah in kha 2 phial mahmah economic blockade omta a, mipi’n haksatna leh gentheihna gen vuallouh tuak uhi. Hiai tungtang ah, Ministry of Home Affairs (MHA) Internal Security Secretary MK Singla hong lenglut hial a, Union Home Minister Rajnath Singh tawh bang thutanna hon la ding uam chih theih hilou hi. UNC-te lah khauhpai semsem ding un kilang a, a President uleh Information Secy-te January 2, 2016 tan dong police custody ah om ding chih hilai a, hiai thu ziakin tuni inleng Naga area tengah public rally nasatak neihin om hi. State government in security thahatna tawh National highway a gari tangte pikhiak gige ding chih thil hithei vual hilou a, state inleng sum neidaih senglou ding hi. Tua ziakin, centre leh state govt adingin thupukna lakding dan leng haksa mahmah ding hihtuak hi.
Akoi abang hileh, state cabinet inleng Hill areas tawh kisai a banghiam thupukna alak dek chiangun stake holders ahihkeileh Hill Areas Committee (HAC)te athudot zelsam uh poimawh hi. Hun paisa a thiltung tuamtuamte zaw thutuam hitaleh, 3-bills tungtang ah leng HAC ngaihdan dot hilou a, second tamlou sungin passed in om chih ahi. District-7 bawlthakna ding tawh kisai leng cabinet in HAC thuzaklou uh chih ngawhna om nawn a, HAC Vice-Chairman Z Kikhonbou inleng kitawpna pelut a, phetlou in MLA ahihna leh Congress membership ahihna nusia hial chihthu om nawn hi.
State cabinet in athupukna enthak le lah, Gazette order pawt hita, amau leh amau kisuzahlak ding uh a, enthak keile ulah a lungkimlou pawlin buaina bawlzel ding uh a, hiai district thak 7 bawlkhiak te’n Congress party adingin maban election ah bangtan ahoihlam hi’n ahoihlou lam hita leh ‘impact’ ahon neide aw chih mi tamtak bildawhna ahi hi. Pawl tuamtuam in tu in Manipur ah President Rule koih dingin ngetna nei mahle uh election kuan ahih ziakin phualpi solkar in leng PR hon koih (impose) dingin bel gintak haksa mahmah a, hiai buaina tuamtuam omte leng centre avaihawmna leen NDA govt adingin advantage hikha maithei hi! Kuan i thei a…???
No comments:
Post a Comment