Project Sunrise FHI360-Shalom saina in HL Daka Memorial Hall, HSA campus rengkai ah December 16 leh 17 2016 ninih sungdaih ding Training of TI-NGO on Hepatitis B & C and Overdose Management kichi tuni in kipan hi. Hiai hun ah Shalom, LRRC leh PPO apan Peer Educator te tel ua, sunma dak 10:30 in traning pan uhi. Training hun sung in Nengkhozam Advocacy officer, Shalom, Vungngaihkim Nurse, Shalom, Chinghauniang, Nurse, Shalom, Dr. V. Ralte, Esther PM Shalom, Baby Saithangpui, leh Paukhansang District Mentor, Project Sunrise te’n Hepatitis B leh C toh kisai ban ah khamtheih adiak a a kikap thoh te a overdose hun ua, a hutkhiak ding dan leh etkol ding dan toh kisai in sinsak ding uhi. Two Days Training of TI NGO on Hepatitis B & C and Overdose Management in atup pipen ahihleh churachandpur district sung a kham theih kikap toh People With injecting Drug ten baihsam tak a Hepatitis B leh C screening muhtheih ding ban ah overdose hun a etkol ding chih hi a, training hun sung in Shalom, PPO leh LRRC apan Peer Educator (PE) te tel ding uhi.
xxxxx
Newlamka youth club NLYC inn tek na a newlamka meet 2016 asai dek uh ahong tung ding dec ni......in New lamka a om PT Sport complex ah ahon khiak na program neih in om ding hi, hiai hun ah N Ginzakham in makaih ding a, Upa N Tawna in thumna in hunte latna nei ding hi, newlamka meet donors te apan leh functional president S Chinzalam Chief adviser te apan in newlamka meet toh kisai pulakna leh suunna zatna neih in om ding hi, Chief guest M Gouzamang guite EM ADCC in Newlamka meet 2016 honkhiak na nei in thugenna nei ding a, NLYC sports department te makaih na in newlamka meet a kihel club/team chih a captain ten kichiam na nei ding ua G Nengdouthang in kipah thugenna nei in thumna in hun khakna nei ding hi.
XXXXX
Presbyterian Church in India (Reformed) in December 15-18 sung Rayburn Presbyterian Church ah Krist itna in asawl teitei gingtu chih thupi zang in a 33-veina General Assembly Cum Joint Mission Conference aneih uh tuni in vaihawmna hun zang uhi. Vaihawmna ahihleh zingkal dak 7 in kipan a, hiai hun ah Presbytery 4, Thanlon, Singngat, Lamka leh South Lamka ban ah Lucknow Presbytery, Anugraha Presbytery leh Tedim Synod apan palai 196 paikhawm ua, Elder Langkhanpau Guite, Moderator, Rev. TS Thangta, Vice Moderator, Elder L Hangthanmang, Secretary leh Elder V Nunlian Assistant Secretary ten vaihawmna hun makaih ua, vaihawmna hun patma in saptuam member sihna tuakte sunna leh 2016 a saptuam Pastor leh Upa thakte mellahna leh khawmpi palai dia pomlutna nei uhi. A 33-veina General Assembly Cum Joint Mission Conference ahihleh zan nitak mipi kikhop hun ah Elder Langkhanpau Guite, Moderator, General Assembly in hongkhia a, khawmpi hunsung in Rev. S Nengzakhup Executive director, north east centre for training and research (NECTAR) thugen pi in pang ding a, December 18 nitak kikhop hun ah Rev. Retired TS Thangta Vice Moderator General Assembly in khawmpi khak ding hi. a 33-veina general assembly cum joint mission conference in ahihleh Missions Nasepna poimoh dan phawkthakna, Misions nasepna a mimal hihtheihna muhsuahna, mission field thak neihtheihna ding lampi zonna leh thumtu leh petu banah missionary tamsem muhsuahna chih te tup leh ngim in nei hi. Presbyterian Church in India (Reformed) nuai ah Lucknow Prebytery leh Anugraha Presbytery te tel in, Lamka Presbytery, Lamka south Presbytery, Singngat Presbytery leh Thanlon Presbytery, apan biakinn 143 om hi. tunia vaihawm na hun ah, kum 2017 a co ordinator ding kitelna a neih na uah, rev H Chinthiansong, rev M Khamlianmang, Pastor T Liankholal te telching ua, superintendent ding in pastor M Thangkhanmuan , pastor K zamkhansuan , pastor Goukhansiam guite leh Pastor G Kamchinthang te telcing uhi. general assembly 2017 a moderator ding in elder langkhanpau guite, vice moderator ding in rev TS Thangta, secy elder V Nunlian, leh asst secy ding in Pastor H Thiankhanmuan te telcing in om ua, general assembly working committee GAWC, 2017 a moderator ding in elder N Thangzamawi, vice moderator Elder T Khupzadou, leh chief coordinator ding in rev khenpi tombing te telching in om ua, telching a om te dec 18 nitak biakna kikhop hun ah commissioning service nei ding uhi. hiai khawmpi sung mah in pastor ding in ordination mi 4 kiang ah piak na nei ua, amaute H Thiankhanmuan, TK Siam valte, S Kamdoumang ngaihte leh KH Johan singh te hi un thusuak in taklang hi.
XXXXXXx
Diocesan Social Society DSSS/Peace Initiative in Noerth Eastern India PINEI saina in tuni sunma dak 11 in Apollo Veng ah gamsung muanna, bitna leh gamsung siat gawpna toh kisai in networking meeting nei uhi. Meeting hun ah District sung a pawl tuamtuam, NGO’s, Community Based Organisation, Farmer Based Organisation, Civil Society Leader ban ah Opinion Leaders apan makai te paikhawm ua, Vincent Community Mobiliser in meeting makaih in, Vevian Zou Coordinator Peace Activist DSSS in networking meeting neina ziak genna nei in, paikhawm palai ten houlim khawmna nei uhi. Hiai hun ah khamtheih chi tuamtuam ziak a gamsung ah siatna uang mahmah a, adiak in high school leh college student te lak ah khamtheih luahhuai WY kithang mahmah ahihdan mu suah ua, tunung a gamsung enkoltu ding student naupang khahkhah te khamtheih sal ah atang uh poi asak thu uh gen khawm uhi.
XXX
Centre for Community initiative CCI in tuni sunma dak 9:30 in The Malsawm Ability Resource Centre MARC Pearsonmun ah Annual Thanksgiving nei ua, program zoh chiang in lamka khopi leh aseh vel ah Christmas Carol nei uhi. Thanksgiving Day zatna hun ah, Niangngaihmang Deputy Director in Welcome Address leh mellahna hun la in, Pauzagin Tonsing, Executive Director in 2016 project activist te highlight a, parent te apan thanksgiving toh kisai thugenna nei ua, Pastor T Tunson Area Pastor BCC EBC in CCI, MARC leh TMI a ding in pathian kiang ah thumsakna nei in, TMI student ten lamka khopi leh a sehvel ah carol nei zui ngal uhi. Tuni a MARC pearsonmun a Thanksgiving day zatna hun ah Pauzagin Tonsing, Pauzagin Tonsing, Executive Director in 2016 project activist report apiakna ah Pathian in kum bul apan tuni School a dia tukum sung a ni nanung pen, Annual Thanksgiving Day (December 16, 2016) tan hon muhsak man in atung ah kipahthu gen a, tuni tan a sepnate uh semzom theizel ding in Pathian in hon pi a, huhtu leh panpihtu diingte Pathian in a hon piakzel ziakin kipahna lian mahmah chia agen banah hiai tan I tung theihna I khosung leh khopua a awlmohtu mimal, pawl tuamtuam leh saptuamte ziak ahi chin gen hi. Aban a genna ah tukum apan in Hebron Hair Cutting neitu D Suanhau in ei naupangte amah kiang a sam met peuhmah a thawn in hon na metsak a, Elvee Entreprise in Banner leh Flex print diing I neite uh percent tampi kiam in hon na hihsak banah India a online marketing lian pen Snapdeal in ei a ding in platform khat hon bawlsak in van thoh utte thoh theihna diing a hon bawlsak ahihdan gen in, tukum sungin United Nations Develeopment Programme (UNV) & United Nations Volunteers (UNV), Perkins Voice and Vision India, Christofell Blindenmission (CBM), National Foundation for India (NFI), Salwan Media, DDRS, Deptt of Disability Affairs, Govt of India, Snapdeal, North Eastern Region Community Resources Management Project (NERCORMP), Ministry of DONER & NEC, Lalpuithluaii Foundation School, Ample Drinking Water, Pearsonmun, Hebron Hair Cutting, New Lamka, Elvee Entreprise, New Lamka ten huhna hongpiak banah Government department kisai khakpih Social Welfare Department, Medical Department, SSA leh District Administration te toh naktak a panlak aom ahihdan gen hi. Aban agenna ah tukum sung mah in, The Malsawm Initiaitive ah naupang 30 kai ua, kumdang sang in educator kidaih zaw a, regular class lak theih louh hun ading in Early Intervention Unit kihong in, tulel in mi 6 om lel chi a, naupang a lian lamte ading in pre-vocational kipat pih in, Vocational Unit bawlkhiak in om nawn a, hiai nuai ah Handloom nih kikoih in, tulel in Speech Impaired khat in enkai in, kum nawn in batch khat ah trainee 3 bang la thei diing a sawm aom ahihdan gen hi. Malsawm Ability Resource Centre huang sung teng accessible hihsak sawmna in pan kila a, mi tuamtuamte huhna toh Accessible Toilet kibawl khia a, tulel in hiai sang a campus sung accessible zawk diing sawm in pan kila lel chi hi. Aban agenna ah tukum in Northeast State 5 apan NGO 12 kipawl khawm in Regional Action on Inclusive Education (RAISE) kichi project thak kipan a, hiai project nuai a nna sep taktak chiang in I district sung ua Government school 5 toh kithuah in nna kisem a, I district ah zingliing in nawk ek ziak in, Emergency Relief chi in CBM huhna toh P Molding, Leimakhong ah innkuan 29 kiang ah nek-le-tak, silh-le-ten leh tenna diing inn bawlsak aom ahihdan gen hi. North Eastern Region Community Resources Management Project (NERCORMP), Ministry of Doner kuithuahpihna toh Bukpi kim a khua li leh Henglep & Samulamlan TD Block nuai a kho 20 ah nna kisem pan lellel a, District sung a nongnawite lak a siamsinna hanthawnna diing in Ginmalsawm Tonsing Award chih kum teng a piakkhiak ding kipankhia a, hiai pen I District sung a Class X leh Class XII a songnawi naupangte lak a sang pen a piak ahi, hiai award pen Rs 5000 leh Citation toh kizui sak hi. project pailel Village Based Rehabilitation (VBR) kichi pen Thanlon Sub-Division sung a kho 20 a lohching tak a sep touh in om a, himahleh kum nawn 2017 sung hiai project on-hold (khawlsak) hiding a, tulel in International consultant khat CPA Services kichi in CCI capacity building hon bawlpih in, hand-hold support hon pia ua, Governance, Legal Complainces, Finance management chihte ah lampi hon kawkmuh ua, hiai pen tua kipai lellel a, Pathian in vehtu (visitor) diing hon pe den a, ahunhun a vehtu diing hon piak in thumsaktu diing Pathian in hon pe den a Pathian tung ah kipah thu gen hi. thanksgiving day program zatzoh in TMI Staff leh Student te’n lamka khopi leh aseh vel ah Christmas Carol nei uhi. Christmas Carol ahihleh MARC Pearsonmun apan kipan khia in, Tipaimukh Road tawn in, Chiengkhawn Bazar ah hun zatna nei uhi. Hiai apan Tipaimukh Road zui in, Police Station ah Tedim Road man in Sumkuang Bazar, Tuibong hun zang nawn ua, huai apan Lamka lam manoh in kik nawn ua, Kangkap Centre, Rengkai Bazar leh Rayburn College ah hun zang in, Malsawm Ability Resource Centre MARC Pearsonmun ah zou uhi.
XXXXXX
Paite Tribe Council PTC GHQ, Hiangtam Lamka in tuni sunnung dak 3 in amau Conference Hall ah Press leh media te kimuh pihna in, State Government in zankhat thu a hilhkholna leh kizaksakna bangmah om lou a, district thak 7 abawl khiakna tung ah mohpaihna sangpen pia in, kivaihawmna leh khantouhna om ding ngimna a Churachandpur District apan District thak Pherzaw District abawl khiak kipahpih kawmkawm in, District dang nih Lamka District leh Tuibong District bawl khiak ahih theihna dia ADC CCpur in thupukna alak uh nungthuap uh ahihdan gen uhi. Hiai hun ah PTC GHQ
PRESS RELEASE
Hiangtam Lamka, the 16th December, 2016
No.1/PTC-GHQ/EC-3/2014: PTC/GHQ Executive Committee meeting (35veina) Resolution No. 1 Dated 16th December, 2016 dungzui in Manipur Government in District thak 7(Sagih) Jeribam, Kangpokpi, Kakching, Kamjong, Tengnoupal, Pherzawl leh Noney te zankhat thu a District Piching (Full Fledge District) (vide. Notification No. 16/20/2016-R. Dated 8th December, 2016) Gazette Order hon suah toh kisai Paite Tribe Council General Headquarters (PTC/GHQ) Hiangtam Lamka ngaihdan hiai bang a suah khiak ahi.
1. Tulel a Manipur Government len (Congress) in District Thak 7(Sagih) ahon bawl khiak guih pen Manipur Singtangmite a dia khantouhna (Development) chi khat himahleh akisaipih MLA, HAC, ADC leh Civil Society (Stake Holder) kuamah donglou a zankhat thu a Gazette order (Vide Notification No. 16/20/2016-R. Dated 8th December, 2016) hon suahkhiak lamdang kisa in naktak in kimawhpaih hi.
2. Hiai Gazette order (Creation of new 7 districts) in a tup, Manipur Singtangmite khenzakna, khendalhna leh bawl gentheih tupna ahihmanin PTC/GHQ in theihsiam haksa sa in pomsiam thei lou hi.
3. Churachandpur District khenzak a Pherzawl ADC omsa full fledge district a bawl khiak kipahpihhuai mahleh Thanlon Sub-Division pen Pherzawl District a alut poi kisa in Churachandpur district mah a aom det PTC/GHQ deihdan ahi a, Thanlon Area Chief Association te panlakna kipahpih ahi.
4. Dated 11th December, 2016 ni a PTC/GHQ Conference Hall a Paite Intellectual Consultative meeting na a member paikhawm atamzaw-te deihna leh PTC/GHQ Executive Committee meeting Resolution No. 1 Dated 16th December, 2016 dungzui in tulel a ADCC te panlakna, Lamka leh Tuibong District bawlkhiak dia thupukna a lak uh kipahpih mahmah kawm in PTC/GHQ in naktak in kigum ding a, apoimoh bangkim a panpih dia mansa in ki om gige ding hi.
XXXXX
Zingchiang Dec ni 17 nitak dak 5:30 in Vengnuam united soccer club VENUS te intekna in PT Sport complex ah ahong tungding kumnawn 2017 Chiang a 58 A/C huap sung a MLA candidate ding te toh public meeting nei Khawm ding uhi, hiai hun ah Candidate ten amau a tupleh ngim aneih bangbang uh genkhiak na leh pulak na nei ding ua, hiai hun ah Pastor M Ginzatun Local Pastor EBC V Munhoih in thumna in hun honna nei ding a, Lalmuanlian Phaipi President VENUS in vaidawnna thu gen ding hi, Jamsuanlian Anchor in Discussion hun makaih in, Pastor T Songkhanthang Local Pastor EBC Vengnuam in candidate te a ding in thumsakna nei ding hi, T Nengbiaksang General Secretary VENUS in kipah thugenna nei in, VENUS lam apan in maban paiding dan genna nei ding hi, Pastor Dr M Gousuan local pastor EBC Khominthang in thumna in hunte khak na nei ding hi.Hiai hun a veng sung mipi ban ah kua peuh mah in uap chiat ding in leng VENUS in chial na bawl uhi.
Xxxx
A Hongtung ding december ni 20, zinglam dak 11:00 in CMO Mini confrerence hall ah Reproductive Maternal Newborn Child Health and Adolescent (RMNCH+A) toh kisai review meeting om ding hi. Dr. Kim Simte, CMO/CCPur apan lai kimu dan in meeting hun ah Diatrict Hospital a Medical Superintendent, District Family Welfare Officer (DFWO/DIO), PMSMA LEH RBSK a District Nodal Officer te, CHC/PHC a Medical Officers incharge teng ban ah Blick Programme Management Unit, BPMU te pellou in atel uh ngai ding a Block Program Manager teng in amau block te nnasep dan te presentation nei ding uh hidan in taklang hi. Meeting hun ah State RMNCH +A Co-ordinator leng tel ding hi.
Xxxxx
WATCH VIDEO
No comments:
Post a Comment