Manipur Express | December 20, 2016

HEADLINES:

Manipur phaizang leh singtang bial ah tuni’n gari 8 hal in om:

Imphal East district ah curfew paizom touzel, Imphal West district ah Night Curfew koih in om

Source: http://i.ndtvimg.com. (file photo)

Imphal, Dec-19: United Naga Council (UNC) in hunchiam omlou economic blockade a bawl uh lungkim louh ziak a phaizang bial a mipite’ kiphinna leng paizom touzel hi. Blockade supporter-te’n tuni’n NH-2 in a totkhak Imphal-Senapati lampi mun tuamtuam ah gari 4 hal uh a, zinglam in Counter-blockade bawlte’n Lamlai PS huamsung a Seijang area ah Bolero 1 leh Swift Car 1 hal nawn uhi. Tuni a blockade supporter-te’n Senapati district a gari a hal leh phaizang a counter blockade bawlte’n a gari hal teng uh Bus 1 tel in gari 8 pha a, State sung a zan leh tuni a gari kihal teng kigawm 30 pha hi’n kigen hi. 

State government in Sadar Hills district leh Jiribam district a bawlkhiak ding deihlouh ziakin UNC in apaisa Nov 1, 2016 apan in highway-te ah hunchiam omlou economic blockade bawl uhi. Huchihlai in State Cabinet in district thak 7 bawlkhia in district bawlkhiak thakte honna hun a vengbittu dia zat a om state security-te lak ah helte’n police 3 kaplum in 11 kapliam uhi. Huai phet in Phaizang bial mipi lungkimloute’n Counter blockade hatsak sem in state dinmun naktak in sousang hi.    

Counter blockade bawlte’n zan in Imphal-Ukhrul lampi Khurai area ah gari 22 vel a hal ziak un Imphal East District Magistrate in nitaklam dak 4 apan district pumpi ah curfew koih hi. Curfew hunsung tuzing dak 6 vel in counter blockade bawlte’n Lamlai PS huamsung a Seijang area ah Bolero 1 leh Swift Car 1 hal nawn uh a, curfew leng paizom touzel hi. Imphal West District Magistrate in curfew a puansa tuzing dak 4.00 apan nitak 6.30 sung khahkol in nitak in curfew paizom nawn a, December 20, 2016 zinglam dak 4.00 tan hiding hi’n tuni a District Magistrate in order a suah ah taklat in om hi.    

Tuabang kalah, National Highway-2 in a totkhak Imphal-Mao mun tuamtuam ah blockade supporter hidia gintakte’n Bus 1 leh vanpua truck 2 tel in gari 4 hal uh a, Imphal district huamsung Sekmai area ah Counter blockade bawlte’n Bolero tel in gari 2 hal nawn in a kigawm in NH-2 ah tuni’n gari 6 kihal hi. Thusuak in a taklat dan in van tamtak pua truck 2-te Senapati district sung Mao leh Makhan area ah zan nitak nung a hal in om uhi. Imphal leh Senapati kikal Senapati a Mt Everest College kiang ah tuzing dak 10.00 vel in Bus (MN01-1668) hal in om a, dak 10.45 am vel in Senapati district HQ ah Tata Sumo (MN05-5481) 1 leng hal a om hi’n gen uhi.  

Sekmai khua a tengte’ Bus kihal chihthu zak ziak in Sekmai khawsung mite leh a kiangnai khuate apan mipi tamtak kipunkhawm in NH-2 in a totkhak Sekmai khua ah counter blockade bawl uh a, police-te’n hawlzak mahle uh Sekmai Bottling Plant kiang ah mipi kipunkhawm nawn in Senapati zuan ding Bolero gari 2 hal uh hi’n thusuak in taklang hi. Tu dinmun ah Counter blockade bawlte’gari 26 leh Blockade supporter-te’gari hal 4 kigawm a vek in state sung ah gari 30 hal in omta hi.

Puerto Rico nungak in Miss World Lallukhu ngah

US a Maryland mun  a MGM National Harbor mun ah Miss World kitelna om a, tua ah Miss Puerto Rico in Miss World Lallukhu tangkha hi. Miss Puerto Rico Stephanie Del Valle in Dominican Republic leh Indonesia te top 3 ah zou in Miss World hihna la hi. India ai-oh a kihel Priyarshinu Chatterjee top 20 tan tung zou hamham hi.  Miss World 2015 Mireia Lalaguna Royo in kum 19 Miss Puerto Rico Stephanie kiangah lallukhu khusak hi. Puerto Rico ten Miss World nihvei alakna uh hita a,  1975 kum in Wilnelia Merced in ana lakha hi. Miss World bel Zee Café ah LIVE a khah in om hi. Stephanie Del Valle in Spanish, English leh French pau thei in siam a entertainment industry a lut ding hidan in gen hi. 

India ai-oh a kihel Priyadarshini Chatterjee bel top 20 tan tungpha hamham a, Beauty with a purpose ah top 5 tan tung mahleh la zou tuanlou hi. India in Miss World hihna alak nanungpen uh bel 1999 kum a Yukta Mookhey in alak hi a, tua nung khatvei mah leng lakha nawn nailou uhi. Pridarshini bel Northeast a Guwahati akipan hi a, Delhi mun ah khawsa a, Northeast mu Miss World a India ai-oh a tel masapen leng ahi.  2016 Miss World bel a 66na hi a, tua hunsung in Britain in 5vei ana lakha a, India in 5 leh US in evei, Jamaica, Iceland in 3vei tuak, Germany leh Australia in nihvei tuak ana lakha uhi.  Hiai kidemna a tel Miss Canada China a piang Anastasia Lin in bel press te mai ah dakkal 3 sung mahmah China in human rights a bawhsiat thu a gen in organizers te thangpaisak petmah hidan a gen in om hi.

TUALSUNG:

Internet line siat ziak in nasem theilou

Lamka, Dec- 19: India Prime Minister Narendra Modi makaih NDA makaih government in India sum note lian 2- Rs. 500/- leh Rs. 1000/- a sihsak nunga mipi’n haksatna tamtak atuah lai un, bank ah sum deposit leh withdrawal bawl-ut tamtak omlai in theih khawl louh in tuni’n transaction bawlna dia vanzat poimawhtak internet line asiat ziakin CCpur district a bank tuamtuam te’n nasem theilou in dinkhawl uh a, bank a sum koihlut leh lakhe ding tamtak thawn kik uhi.

Bank official-te apan kizadan in, theih khawl louh a internet line asiat ziakin tuni zinglam dak 11:00 vel akipan in transaction bawl theilou uh a, huchihlai in bank ah leng sum bei hi’n gen uhi. BSNL staff-te apan kizadan in, Manipur a bank tuamtuam te’n Shillong apan Internet Lease Line alakna asiat ziakin internet line pai theilou a, bawlhoih sawm in natakin panla uh a, asiatna mun hoihtak et ngai mahleh tuni mah a bawlzawh lam-et thu gen uhi.

Food safety registration bawl di’n theisak

Lamka, Dec- 19: Designated Officer Food Safety Administration, CCpur in thusuah abawlna ah district sunga dawr bawl te’n Food Safety nuai ah registration bawl ding leh license neisa te’n leng online tungtawn a registration bawlthak dingin theisak hi. Thusuah in ataklatna ah, Food Safety and Standards ACT 2006, Section 31 (1) dungzui in khawpi sunga nek-le-tak tawh kisai a dawr bawl- grocery stores, hotels, restaurant, canteen, bakeries, food manufacturing/processing unit, vegetable vendors, fruit seller, fish and meat seller dairy unit, packaged drinking water units, SSA nuai a mid-day-meal hawmte, school/college hostel bawlte leh a dangdang te’n a kinlam a food safety license bawl chiat ding in theisak a, license/registration neisa te’n leng online tungtawn a bawl thak ding in theisak hi. Food Safety License neilou matkhiak a om leh Food Safety and Standards ACT, 2006 section 63 pansan in mat hiding ua, kha 6 sung suangkulh (jail) atang ding banuah Rs. 5 lakhs liausak hiding uh hi’n  leng taklang hi.

Single apan DBC a khek theih

Lamka, Dec-19: M/S Bungmual Indane GV apan kizadan in, single cylinder apan DBC a khek (convert) ut-te adin quota tamlou om a, limited stock ahihziakin a ngaihtuah masa deihsakna piak hiding hi’n kigen a, a deihte’n a kinlam in ngaihven theih ding hi.

Dimapur leh Kangpokpi ah Lamka mi tamtak koltang

Lamka, Dec- 19: Manipur gam buaina ziakin khualzin mi tamtak in haksatna tuak uh chihthu kiza hi. UNC in hunchiam omlou economic blockade abawl in Moa Gate apan gari a paisuak sak louh ziakun tamtak tangden om a, gari khenkhat a pai ngam nawnlouh ziakun Dimapur ah kikulh hi. Huchihlai in, khawpi tuamtuam akipan innlam paiding tamtak in haksatna tuak uh a, huailak ah CCpur district zuan ding mi 30 vel telkha in nek-le-tak banah giahna ding tanpha buai uh chihthu kiza hi. Huchikal ah, Kangpokpi leh Motbung area ah leng mi 20 vel paisuak theilou a tangden om chihthu kiza hi. 

Lamkal a tangden-te ahihleh atangpi in student ngen hi uh a, a buaisiat takun Ell Simte, Huihkhi Admin  thuzak uh a, aman leng CT Lian Guite thuzak in panla pah uh a, Nagaland a civil society tuamtuam, Naga Students’ Federation  telin pawl tuamtuam Zomi Women Association, Dimapur-te tawh pangkhawm in buaipih uh hi’n kigen hi. Lamkal a tangden-te Dimapur a pawl tuamtuam in buaipih in nek leh tak ban ah poimawh bangkim ngaihtuahsak uh a, inn tan a paisuak theihna ding uh ngaihtuah lel uh chihthu kiza hi. Huchikal ah, ZWA, Dimapur in buaina tuakte panpihna din helpline number pia uh a, huai dingzui in Lalno- 07005831593, LC Neihsial- 9485182142, Hahau Hangzo- 08794486073 leh Rema- 09612922837 ah buaina neite’n thuzak theih dingin kigen hi. Hiaithu gelh ahihtan in koltang-te dinmun ngaihtuah lel uh a, inn tan paina ding bangtan ngaihtuahsak uh hiam chih theih hilou hi.

YVA GHQ makaih in PHED Minister inn hahsiang

Lamka, Dec- 19: Young Vaiphei Association (YVA) General Headquarter makaih in unit tuamtuam te’n tuni’n mass social work nei in Red Cross Road a T. Manga Vaiphei, PHED Minister tenna inn hahsiang uh a, huaihun ah YVA unit tuamtuam a member tamtak paikhawm uhi.

Vungminthang Vaiphei, President, YVA GHQ in a T. Manga Vaiphei pen MLA/Minster ahihziak hizawlou in, YVA kichi philanthropic organization khat ahih banah panpihngaite panpih dia pawl kibawl ahih dungzui in hibang phattuam ngaihna nasep aneih uh hizaw hi zaw dan in gen a, block leh unit tuamtuam akipan YVA member 1,000 vel paikhawm uhi. 

YVA member gari (Shaktiman) neite’n tawh in, paikhawm ten insung leh compound hahsiang uhi. PHED Minister T. Manga Vaiphei inn ahihleh Manipur Cabinet in August 31, 2016 a 3-bills a pass deihlou a kiphin mipi thangpaite’n ahalsiat uh hi a, huai innsung ah Henlalson Gangte kanglum kha hi.

Pethuel BYF in Christmas Carol nei

Lamka, Dec- 19: Pethuel Evangelical Baptist Convention Church nuai a Baptist Youth Fellowship (BYF) makaih in zan nitakin Lanva Junction ah street preaching & Christmas Carol nei uhi. Huai hun ah Pastor B. Khamkhansawm leh Pastor K. Pumsuanthang te'n Gospel message gen uhi. 

   Programme sungin Niangnemkim, Nianngaihlun leh Muansang Ngaihte te'n phatna la asak banuah Pethuel BYF te'n lapawl sa uh a, mipi paikhawm te’n lengkhawm la sa in lim mahmah uhi. Pethuel BYF in Year plan anei sepsuahna ahih banah hiai ding tawh kisai in saptuam tuailai te'n kipolhlimna leng nei ngei uh hi’n kigen hi.

Summer retreat 2016 om ding 

Lamka, Dec-19: Go Grace Mission in Dec. 20-22, 2016 sungin IB road a Synod hall ah ‘Return to Your Rest’ thupi anei in Winters Retreat, 2016 nei ding uhi. Zinglam dak 10:30 in Ricky Vanlallawm in thumna in hongkhe ding a, huai hun sungin thugentu in N. Thangkhansiam pang ding a, James Lalpu Hatzaw in worship team-te makaih ding hi. Kikhop hun tengin Ning Muanching, Grace Moi te’n special no. nei ding uh a, Ministry partner Lainat Ministry te’n leng presentation nei ding uhi. December 22, 2016 nitak dak 5:00 akipan in St. Paul’s Institute Campus ah Lamka worship night thupi minvuah in praise and worship om ding a, huai hun ah guest appearance in Rody Za Lein Sing leh Ningmuanching pang ding uh a, mi a tam theilam in uap din retreat sub-committee in chial uhi.

ATWU makaih in mass awareness om ding

Lamka, Dec- 19: All Tribal Women Union (ATWU) makaih in Dec. 20, 2016 nitak dak 5:30 in New Lamka YPA hall ah 2veina din Delhi zinna report tawh kithuah in mass awareness campaign om ding hi. Huai hun ah Nianglian, President, ATWU in Delhi zinna report peding a, 58- CCpur A/C a intending candidate Paukhansuan Khuptong, CT.  Lian Guite, DK Mang leh Thangbiaklian Hangzo te'n thugenna hun zang ding uhi. Niangzaman in hunzatna makaih ding a, T. Gouzavung makaih in mipi paikhawm te’n thumkhawmna nei ding ua, Manngaihkim makaih in slogun sam ding uhi.Gam leh leitang itna nei khempeuh huaihun ah kihel din ATWU in chial hi.

STATE THUTHANG:

CM in Police Station leh Power Sub-station hong

Imphal, Dec-19: Chief Minister O. Ibobi in tuni’n Arong Nongmaikhong Police Station, Hiyanglam Police Station, Wangoo a Police Station banah 33/11 Power Sub-Station hongkhia hi. Wangoo a Police Station hon hun ah CM in mipi kikhawmte ma ah Manipur a law & order hoih phot leh development nasepna nawngkaina bangmah omlou in lawhching tak a sepkhiat hiding in gen hi. Huai ah Dy. Chief Minister Gaikhangam, L.M. Khaute, IPS, DGP leh Police top official hunkhop  tel uhi.

Gari accident : mi 4 si, 6 liam

Tamenglong, Dec-19: Tamenglong district HQ akipan Bhalock khua zuan a passenger pua Tata Sumo khat tuni’n lampi akipan guam (gorge) ah kesuk in huai ah passenger 4 si a, mi 6 liam uhi. Tamenglong akipan thusuak in a gendan in tuni sunnung dak 2:30 velin passenger gari Tamenglong district HQ akipan Bhalock khua a tun ma deuh in guam feet 400 a thuk ah tuk khia hi. Accident na mun ah mi 3 si a, huaite lakah naupang kha 6 mi leh gari driver leng tel hi. Aliam mi 7 hospital zuan a puak ahihlai in lamkal ah ah 1 si a, a liam dang 6-te ahihleh Bhalock khawmi hi’n gen uhi.

Labourer 22 pimang; van-te uh laksak

Imphal, Dec-19: Ukhrul district ah meltheihlouh galvan tawite’n labourer 22 pimang in a mobile phone leh a sum-te uh  laksak nung in khahkhia uh hi’n kigen hi. Thusuak in Litan Police station in a huamkhak Paoi village ah zan nitaklam dak 4:00 velin inter-village road bawlna a nasem non-local leh phaijang mun tuamtuam apan labourer-te omna mun makeshift camp ah galvan tawi-te valut uh a, non-local-te nusia in labourer 22-te Ukhrul district a TM Kasom village ah tuni zinglam dak 9:00 tan hentang uh a, labourer-te mobile phone leh sum laksak nungin Ukhrul district a state security post gei lak ah va khahkhia uh hi’n kigen hi. Thiltung tawh kisai in pimang a om labourer te’n a genna uah mi pimang te’n bangmah kigelh lou lehkha ah suai kaisak uh a, NSCN(IM) cadre-te ding in gingta mahle uh Police te’n mi pimang-te helpawl hi uh hiam chih chetna bawl nailou uh hi’n kigen hi.

Helpawl a tel mankhia

Imphal, Dec-19: IGAR(S) thusuak in 28-sector nuai a 22-A/R leh Thoubal Police Commando te’n Serou mun ah helpawl gamtang om chih thuguk a muh dungzui in Dec 17, 2016 in Thoubal district a Serou Lamkhai ah joint operation a bawlna uah KNF(D) a active cadre 1 mankhia uhi. Mat a om Thangho Lal Kuki @ TL Kuki (Finance Secretary) (47) s/o Jamghou Gangte of Kilaitui village hi a, amah apan 9mm pistol 1, tang 4 leh demand letter 1 muhkhiak hi a, galvan muhkhiakte tawh Sugnu Police Station ah pekhia uhi.

Chavanphai village ah lecture sai 

Imphal, Dec-19: Chandel district a Chavanphai village ah 26-sector nuai a 11-A/R-te saina in ‘Drug Awareness Programme’ tawh kisai in lecture om a, huai hun ah student leh tuailai-te kiangah drug zatkhelh ahoih louh dan sinsak uhi. Lecture zawh in huai hun a tel te’n drug doudal ding in kichiamna nei uh hi’n leng kigen hi.

NEC ah Driver Vacancy om

Imphal, Dec-19: DIPR thusuak in Shillong a Nongrim Hills ah  Ministry of Development of North Eastern Region (DONER) nuai a  North Eastern Council (NEC) Secretariat ah deputation basis ding in Staff Car Driver (Ordinary Grade) vacancy post 2 om a, lunglutna neite’n NEC website http://necouncil.gov.in ah thuchian ettheih ding hi’n taklang uhi.

Training cum EVM demonstration om ding

Imphal, Dec-19: N. Krishnakumar Singh, Asst. Publicity Officer (Press), IPR in tuni a thusuah a bawlna ah Information Technology Commissioner in Dec 20, 2016 ni in Mantripukhri a IT Park ah press/media conference sai ding  bikhiah himahleh tulel a Manipur dinmun tawh kisai a conference ding cancel chi’n taklang hi. 

Huailou in Election Commission of India (ECI) lamkaihna a Chief Electoral office, Manipur saina in media-te a ding in Dec 22, 2016 zinglam dak 10:30 in Takyelpat a State Academy of Training mun ah ‘Electronic Voting Machine (EVMs) leh Voter Verifiable Paper Audit Trial (VVPATs) tawh kisai a Training-cum-demonstration om ding hi’n kigen hi.

State SVEEP Core Committee meeting om

Imphal, Dec-19: Old Secretariat a Conference Hall ah tuni zingsang in State Systematic Voters’ Education and Electoral Participation (SVEEP) Core Committee meeting om a, huai ah Vivek Kumar Dewangan makaihna in State Govt. Departments a Heads of State, DIPR Director leh stakeholder te’n maban State Assembly Election 2017 a SVEEP campaign tawh kisai a voter education, informed and ethical voting, campaign mode, message content, partnership with corporate bodies/NGOs/CSOs leh SVEEP core committee meeting nanung pen tawh kisai a panlakna-te ngenteltak a genkhawmna nei uh hi’n kigen hi.

Dimapur-Imphal passenger bus service khawlsak

Imphal, Dec-19: Dimapur-Imphal passenger bus service te’n Dec 18, 2016 ni a Imphal East a Khurai area ah mipi kipun khawm te’n gari 22 a halsiat uh tawh kisai in passenger service khawlsak uhi. Huai thu tawh kisai in Dimapur Counter a staff te’n a genna uah agency te’n thil deih huailou tungkhak ding lauhthawng na ziak a service khawlsak uh a, Imphal zuan ding passenger tamtak Dimapur ah tang uh hi’n kigen hi.

PHED te’n project thak tuamtuam pan

Imphal, Dec-19: Public Health Engineering Department (PHED) te’n mipi taksapna ngaihtuahna in Manipur a water supply project thak tuamtuam singtang leh phaizang bial ah pan in scheme nasep kipan-te leng hihlet ding panla uhi. Imphal khawpi a mi tamdan a khang ziak in tuisiang dawn ding taksapna niteng in khan hi. 2001 census dungzui in mihing tamdan 6.523 lakh hi a, kum 2031 tan a 8,705 tung dia gintak ahi hi. Tulel in tui poimawh zah 118.689 MLD hi a, kum 2031 tan in 152.141 MLD tung ding a, water supply zah tulel in 80 MLD ahi hi. PHED te’n kum 30 daih ding water supply infrastructure puahhoih nang in Rs. 1830.3613 crore bei ding bikhiah in DPR-“ Integrated Water Supply Project for Imphal Planning Area” bawl uh a, huai dungzui in Feb 2014 in JNNURM nuai a Phase-I a ding Rs. 98.54 sanction in om a, huai in Koirengei a WTP, Khumanlampak, Singda, Kangchup, Kangchup Extension, Chinga, Porompat, Minuthong leh Canchipur banah intake 6, WTP 6, water reservoir 5, master reservoir 3, pumping station 3, overhead tank leh emergency reservior bawlnang huam hi. Atal Mission for Rejuvenation and Urban Transformation (AMRUT) nuai a Phase-II a di’n Rs. 200 crore khahkhiak hi a, JICA fund nuai a Phase-III a ding in Rs. 1531.82 crore khiak hiding in gen uhi. National Rural Drinking Water Programme (NRDWP) nuai ah kum 2002-2016 sung in Rs. 24176.03 lakh bei in water supply in khua 1374 huamkha a, March 1, 2016 tan in district 9 ah khua 25-100% huamkha hi. Senapati district a kua 690 lakah 621 te’n water supply mu uh a, Thoubal district a khua 110 lakah 63 in water supply ngah uhi. India govt. flagship programme India-Swachh Bharat Mission (Gramin) nuai ah Oct 2, 2019 tan in rural individual household 4,31,378, Govt. school 3919, Anganwai 1201-te sanitary latrine piak hiding a, huai mission nuai ah Manipur a Anganwadi Centre teng ah sanitary latrine bawl hi a, sanitary complex 386 lakah 320-te zawh siang hi’n taklang uhi.

Sainik School ah Riding leh Polo Club hongkhia

Imphal, Dec-19: Civic Action Programme tungtawn in Red Shield Division leh Manipur Horse Riding and Polo Association (MHRPA)-te saina in tuni’n Sainik School Imphal ah Horse Riding and Polo Club hongkhiatna om hi. Huai ah Maj Gen. SS Mishra, VSM, GOC Red Shield Division in riding standard bawlphat ding leh Manipur traditional sports thangsak ding tupna a club phutkhiak hi’n gen a, cadet-te lakah player hoihtak om ding te’n state leh India a dia minthanna tun ding chi hi. Huai hun Brig. SKS. Chauhan, Dy. GOC leh high ranking officer, S. Buddhachandra, President, MHRPA te’n uap uhi. Huai ma in Maj. Gen. SS Mishra zi Rudrani Mishra in sungphuh honnna nei a, singnou suanna hun leng om hi. MHRPA President in Riding Arena hongkhia a, huai hun ah cadet te’n ponies march-past banah tent-pegging a siamna a neihte uh lakkhiakna nei uh hi’n kigen hi.

Good Will Mission kipan

Imphal, Dec-19: Manipur ah muanna leh bitna om nawn theihna dia organization tuamtuam te’n ‘Good Will Mission for Peaceful Co-existence’ pan uhi. Mission patna ding in Dec 21, 2016 in Khwairamband bazar ah public meeting om ding a, huai hun ah Manipur a community om teng a palai leh UNC telin stakeholder tuamtuam tel ding uhi. Nagaram ah tuni a meeting hun ah ‘Good Will Mission for Peaceful Co-existence’ bawlkhiak hi a, Convenor dia CIRCA a Ningthouja Lancha telkhiak in om hi. Mission ah Tangkhul People’s Organisation, Naga People’s Organisation, Zeliangrong Union, Ten Union Social Upliftment, Khurai, HERICON, LIPUN, Ima Keithel Mari palai, KOMREM Union, ICHAM, CIRCA, AMUCO, Manipur Muslim Welfare Organisation, Malem Kanba Lup, Nagaram Women Society leh KIMACS-te leng tel uhi. Mission Convenor Ningthouja Lancha in zan a Khurai Heikru Makhong a thiltung tawh kisai vantah huai chi a, security personnel-te mawhsak thugen a, tuni a meeting hun ah thupukna tuamtuam 7 bawlkhia uh hi’n leng kigen hi.

Election tawh kisai a gamtatna-te boycott

Imphal, Dec-19: Keishampat a International Peace & Social Advancement (IPSA) Office ah tuni’n press meet om a, huai ah Ima Leirik, President, Knaglei Apunba Meira Lup (KANGLAMEI) in CSO 4 in Manipur a political party teng tung ah election tawh kisai a gamtatna boycott puang uh chi hi. Economic blockade ziak a mipi’n gen vuallouh haksatna a tuah uh tawh kisai in mawhpaihna thu gen Political party khat mahleng omlou a, CSO te’n poll tawh kisai a activities khatpueh boycott puang uhi. Blockade tawh kisai a State government in emergency assembly session sam ding leh thutanna bawl in Central Government Authority ah pelut ding in ngetna bawl uh a, UNC leng outlaw organisation a puang ding ngen uhi. Press Meet hun ah International Peace & Social Advancement (IPSA) member, People’s action for National Democratic Movement (PANDM), Kanglei Ima Lup (KIL), Kangleipak Students’ Association (KSA), Chanura Lamchinglen Kangleipak (CLK) leh All Club Organization Association & Meira Lup (ACOAM-LUP)-te tel uhi.

TUNI THUPI:

 “Kisa un, piltakin amau i bawl ding uh; huchilou in zaw hong kibehlap lap ding uh a, kidouna bang hong om chiangin, i galte lamah a pang ding ua, eite a hondou kha ding uh, huchiin gam akipan amau i delh khe ding uh, achia.”

 – Eksodas 1:10

EDITORIAL:

Tualgal maw? Kidoupi 3-na…!

Bangziaka First World War hong kipan hiam chih ngenteltakin en lehang suituak tamtak om dinga, German te’n British-te a en (sappau in envy- hazat) ziak hipen diam chih theihin om hi. German-te sumdawnna lam ah masawn mahmah ua, tua hun in tuipi tung ah British te’n longpi hunkhop nei uh a, German kumpi Kaisar Willhelm-II in British-te a enna leh hazatna ziak apan hong kipan ahi chi pawl leng om hi. Eilawi theihdan in hiai Ist World War huai bel kum 1914 apan kum 1918 kikal pen Tuitaw galkap chi’n leng i na minlawh uhi. Huchi’n January 10, 1920 in League of Nation kichi hong kibawlkhia a, hiai hun a US President ahihleh Woodraw Wilson hi a, gam 24 in pangkhawm dingin thukimna nei uhi.

Kidoupi khatna thutuam hitaleh, a nungin kidoupi nihna kichi hong kipan nawn a, poi mahmah hi. 1st World War treaty (kilemna) ahihleh Versailles ah bawlin om a, hiai hunah German palaite bangmah gensak hilou uh a, tua in mipi sulungphawng mahmah a, kidou utna mipi’ lakah chi hon tuh chih theih in om hi. Leitung pumpi adia thunei mahmah a theih ahihleh British-te leh France-te ahi hi. Amau gam (colony) hunkhop nei uh a, amau zom in Italy-te hilai uhi. German ah Nazis-te ahat uh chih kuapeuh theihsa hi a, Italy ah Fascist-te ahi hi. Tualou in gam tuamtuam ah pawl hunkhop ahat leng om uhi. Huchi kalah, German lawm hoih mahmah Italy in enna leh kihazatna ziak (envy) mah in Poland hon douthu phut uh a, hiai tungtang ah Britain leh France-te lungkimlou in September 1, 1939 apan kidoupi nihna (Second World War) kipan chih ahi.

Hiai kidoupina khatna leh nihna ah naupang tagah – 9,000,000 bang om chih hi a, tualou in meithai (widow) kia leng leng 5,000,000 pha chi uh a, mi nautang (civilian) sizah 10,000,000 bang om zou a, military force si tengteng gawmkhawm in 10,000,000 pha chi uhi. Kidoupi nihna i chih sek uh Second World War hunin security personnel si 17,000,000 pha a, mi nautang si 43,000,000 banah mi 154,000,000 liam zou chi uhi. Hiai pen a figure dikchet hikei mahleh kinaih mahmah dinga tuat ahih ziakin kidoupi 3 na hong om ding lauhuai mahmah bangin kilang hi. 1914-1918 sunga kidoupi khatin leitung nakpitak in sukha a, azom in kidoupina nihna 1939-1945 in nakzaw semin khawvel anuai chih theihin om hi. Kidoupina hong omta leh sepaih thahatna hinawnlou dinga, khutzung khat lel a technology tawh kimawlna maimai hong bang ding a, second khat sungin leitung mihingte vaivut i suak ding uh chih chiang mahmah hi. Technology/ Nuclear power ngen a khawsa ihita uh a, i tunglam uah satellite in hon enkhe gige a, thil hiaitan kap ban (range) ding chih tawh kisai mite’ buaipih hita hi.

Khawvel thuthang tuamtuam i et vengveng chiangin kihazatna leh enna ngen hita hi. Gam khangtou pen leh khangtoulou pen te’n leng belhtheih ding zongin alanglang ah diang uh a, foreign policy ngen a kibeihna ngen hita hi. Kidoupi khatna leh nihna abeita a, kidoupi 3-na i maituah hun om ngei dingin i gingta hi. Christian view tawh kisai in hiai kidoupi 3 pen hun tawp ahi maidiam chih theihin om a, khut talkhat a mek a leitung puahzak sak ding khop a kidingta bangin kilang hi. A taktak a thil ituah chiangin kikhel ding a, mite’ siamna leh pilna eite’n kiban lou a, gam tuamtuam in khateng phial in satellite leh nuclear test chih neisek uh a, North Korea ngial bang tulai in hahpan mahmah uhi. Pathian nam tel chih a om Israelte leng kisakkholh mahmah uh a, gam neuchik himahle uh a sepaihte uh ‘fit’takin Gaza bialah om sak uhi. Alehlam ah, Muslim gam tuamtuam te’n a gam leh leitang uh humbit sawmin, gam awlawl in kek uh a, leitung luahsuak ding chih thukhun om ahihman in, sih-le-man i tuah leleng vangam kaiding chi uh a, huai kalah ei hon doupeuh mah i thahleh siamtansak in i om ding chih ginna nei uh a, i kalsuanna hon subuai gam leh pawlpi omte tawh ikidou leh hiai pen pathian deihdan ahi a, kidouna siangthou ‘Holy War’ chilai uhi.

Atung a i genpen khawvel thiltung hitaleh, ei Manipur sungthu et in tualgal thupitak hongpiang kheguih theidiam chih ahi. Nagate’n lah a thil nget (demand) uh nawlkhin a om ahi chi uh a, economic blockade khauhsak semsem ding ahi chi uh a, phaijangmi te’n counter blockade khauhsak thak mahmah uh a, zan inleng gari 22 val haltum in om hi. State Government adingin leng alung aphuai keiding chihna vual omlou hi. Centre government kigolh hileh veng mahmahta dinga, ahihziakin, centre government inleng kumnawn election a mitsuan ziakua hiai thu ah bangmah paukam zanglou uh ade aw chih theihin om hi. Centre in Naga-te khouhtheihna ding ‘chance’ lianpi nei a, ahihziakin, khoudai hita le uh term thakah Manipur ah BJP makaih government a dingkhe diam chih gen haksa mahmah hi. Centre adia thu buaihuai mahmah ahihleh, centre in Naga-te favour zawngin paukam zang leh phaijang mipi sousang mahmah ding uh a, phaijang mite panpih (favour) zawngin kampau zang le ulah Nagate thangpai zel ding uh chih ahi. Nagate’n panpihtu ding ahau uh a, Manipur phaijangbial mite’n leng panpihtu ahau mahmah ding a, ahihziakin a buaise pahding zaw ei mizawng leh gentheite ki hiveve ding hi.

Thil paidan i et vengveng chiangin, Bible in aphal hetlouh pasal leh pasal, numei leh numei kiten theih chihkhawng hita a, huai kalah, Muslim helpawl ISIS/ Al Qaeda/ Taliban leh adangdangte’ ziakin khawvel buai mahmah a, Manipur ah leng communal tension sang mahmah a, biakinn tanpha kisuksiat sak hita hi. Tuate ziakin kidoupi 3na hong piangding hia ahihkeileh eisung ah tualgal hong om ding hia chihte ngaihsun thamching mahmah hi. Himahleh, lemna bawl pen Pathian deihdan hi gige hi.