Manipur Express | December 19, 2016

Aug 29, 2016 apan Singtang bial ah Electric Shutdown om

Khengjang apan Thanlon kikal ah 132/KV Tower 242 bawlna pailel

Lamka, Dec-18: Thanlon khua a 132-KV Power Sub-Station a meivak laklutna di’n Manipur State Power Company Limited (MSPCL) pawlin Khengjang leh Thanlon kikalah 132 KV Transmission Line tower 242 bawlna di’n nasep pan uh a, zan nitak in Chongchin tan ah Tower bawlzawh a omta chihthu kiza hi. Thanlon ah tulelin 33KV zat hi a, meivak kiningching zaw omtheihna di’n August 29, 2016 apan 132-KV tower bawl hun in 33KV power supply teng lakkhiak(shutdown) phot hi a, mun tamtak ah 132-KV power line leh 33KV line ki-hettuah khak ziakin Shutdown a om hi a, nasep zawhsiang hunhun in singtang bial ah electric piakkhiak hinawn ding chi uhi. MSPCL pawlin 132KV zawhsiangma a 33KV pen a vak theihna ding inleng lampi ngaihtuah in gamlak ah ki-camp uh chihthu om hi. Singtanggam ah tulel in electric fee lak hinailou a, contractor te’n huai nasepna azawhsiang hun ua MSPCL kianga thuneihna apiakkhiak chiang un electric fee omta ding hi’n kigen hi.

MSPCL official-te apan kizadan in, Thanlon a 132KV Line pen in huai bial ah meivak a piakkhiak ding banah, Parbung, Pherzawl leh Sinzawl a 33KV leng supply ding hi. Thanlon a 132KV line in Khengjang apan Thanlon kikal km 62.39 tan ah gammang 145.6 hectares tawn kha ding a, Kaihlam Wildlife Sanctuary, Eco-Sensitive Zone, leh Forest area a hihsiat khak ding ziakin January 1, 2016 in State Board of Wildlife, Manpur leh Chief Wildlife Warden Manipur tawh meeting hunah huai tungtang saifel hi a, huainung in nasep taktak kipan thei hi’n gen uhi. 

Ccpur district a power supply omte ahihleh Ningthoukhong  apan laklut hi a, buaina om hun in Kakching apan laksawn a om hi’n kigen hi.  Manipur a 132KV kizatna bel Ningthoukhong, Kakching, Yumrembam, Khuman Lampak, Karong leh Kongba lel hi’n kigen a, tulelin Thanlon, Thoubal leh Tipaimukh ah 132KV line bawlna omlel hi’n gen uhi.  

Manipur mipi’n meivak a ngah suak theihna ding un Census 2011 pansan in Rural Electrification scheme sepkhiak hi a, singtang khua 2379 om lakah March 31, 2016 tan in electric ngahlou 201  om a, April 1, 2016 apan November 30, 2016 kikalin khua 110 ah meivak piak in omta a, khua 91 in ngah nailou hi. Rural electrification nuaiah innkuan lakh 3.35 om in March 31, 2015 tan in APL leh BPL innkuan 1.08 lakhs in electric ngahlou uhi.  

Tulelin Deendayal Upadhyaya Gram Jyoti Yojana (DDUGJY) nuaia Rs. 54.96 crore zang in project 3 nasepna om a, huaite bel Rural Household Electrification adi’n Rs. 54.01 crore, Sansad Adarsh Gram Yojana (SAGY) adi’n Rs 0.68 crores, Project Management Agency (PMA) charge adi’n Rs 0.27 crore sanction in om hi. Huai project nuaiah IE Village 182, SAGY village 3 om hi’n leng kigen hi. 

Electricity Act 2003 tungtawn a Manipur state Electricity Reforms Transfer Scheme 2013 dungzui in, February 1, 2014 apan Manipur a meivak piakkhiaknate Manipur State Power Company Ltd. (MSPCL) leh Manipur State Power Distribution Company Ltd. (MSPDCL) in enkai uh a, MSPCL in electricity transmission leh State Transmission Utility (STU) a etkai banah State govt. adia Power Sector lam a investment enkaitu in pang uh a, meivak piakkhiakna lamte MSPDCL in enkai hi.

HEADLINES:

Imphal East leh Imphal West District pumpi ah Curfew kipuang

Blockade leh helpawlte gamtatna deih louh ziakin buaina om; Bus 2 telin gari 22 halsia

Imphal, Dec-18: Tuni’n United Naga Council (UNC) in National Highway ah hunchiam omlou Economic blockade a bawl banuah NSCN-IM hidia gintak helpawlte’n Security Force-te a khoih uh lungkimlouh taklatna in phaijang bial a mipite’n lampi khaktan in mun tuamtuam ah counter blockade khauhtak in bawl uh a, mun khenkhat ah gari halsia uhi. Hiai tawh kisai in, Manipur gam a buaina thupi sem a tutlouh ding deihna in Manipur Cabinet in District 9 ah Curfew puang a, District tuamtuam a District Magistrate te’n leng a kul leh poimawh bang a panla ding in thukim uhi. Huchih dungzui in Imphal East district Magistrate in tuni nitaklam dak 4:00 akipan thuthak om nawn masiah Imphal East district pumpi ah 144 CrPC Sub-section 2na dungzui in Curfew puang a, Imphal West district Magistrate in leng tuni nitak dak 6:30 akipan in December 19, 2016 zingsang dak 4:00 tan Imphal West district pumpi ah Curfew puang hi. Huai banah, tuni nitak nungin Mobile Service provider khenkhat ah internet service lakkhiak inleng om hi.

Tuni a District Magistrate, Imphal East in a thusuahna ah 144 CrPC Sub-section 2na dungzui in Imphal East district sung pumpi ah kuamah inn apan pawtkhe lou ding in thupia a, himahleh kitenna (marriage party) leh misi vuina tawh kisai thilte ahihleh akisaipih thuneite kiang a phalna lak masak ding in puang hi. Curfew sungin Law & Order tawh kisai a duty Government Agency-te, essential service-te leh accredited media person-te khahkol hiding chi hi. Imphal West District Magistrate inleng Curfew a puanna ah curfew om sung in kuamah inn apan pawt khe lou ding in mipi-te theisak hi.

Tuni zinglam in Imphal East district sung Imphal-Ukhrul lampi a Lamlong Keithel leh huai kim lak a lampi phaijang mipite’n khaktan uh a, gari pai ding himhim a kham banuah lampi khaktan in tyre tanpha hal uhi. Huai bial a bazar leh dukan teng leng kikhak a, Imphal-Ukhrul road ah passenger bus 3 tel in passenger pua gari 22 vel Counter blockade bawlte’n  hihsia uh a, gari khenkhat a halte uh lak ah state security force-te zat leng telkha hi’n gen uhi. Police in tuni a mipi kipunkhawmte hawlzakna ding a bangzahvei hiam thau a kap ban uah teargas leng kap uh a, numei 1 tel in mi 4 liam uh hi’n leng kigen hi. Ukhrul zotna parking lak a gari tuangte’n Christmas hunpi zang dia a khua chiat ua paisawm leh UNC policy tawh kisaikhakna omlou hi’n gen uh kichi hi. Imphal West a Sagolband area ah leng counter blockade supporter-te’n singtang zuan ding gari-te ah van kiguangsate lakhia in hal uh a, police-te tunma in tamtak hihse man uh hi’n kigen hi. 

Tuabang kalah, United Committee Manipur (UCM) in Imphal khawpi sung mun tuamtuam a singtangmite bitna piak hiding in puang uh a, UCM president Elangbam Johnson in social media tungtawn in society tuamtuam a mi kuapeuh mawk patauhlou ding leh zuau thuthang kithehzakte lak a kiveng di’n ngen hi. Tuni a Imphal leh a sehvel a thiltung ziak in Nagaland Chief Minister T.R Zeliang in Union Home Minister Rajnath Singh kiang ah lai khak a, Imphal khawpi apan amau tenna khua chiat zuan theilou ding a dal leh a hinna uh lauthawnghuai a omte humbit dia Central government in panla ding in ngen hi. Nagaland state sung a Manipur phaijang mi khualzin pailaite leh state sung a tengte bitna ding a Nagaland state government  in a poimawh bangkim panla ahihdan leng Union Home Minister a laikhakna ah T.R.Zeliang in taklang hi’n kigen hi.

Newspaper a ding  vanzat haksa hiaihiai

Lamka, Dec-18: UNC in NH 2 leh Economic blockade a bawl banuah Phaizang bial a counter blockade sousang tak a om ziak in Manipur maban dinmun ding theih chian haksa mahmah a, Newspaper a ding van zat tuamtuam paper (roll), ink, plate leh chemical tuamtuam pua gari tamtak Senapati lam leh Jiribam lam ah leng tang (stranded) uhi. Hibang vanzat poimawhte puaklut kin ahih keileh Newspaper tulel a pek 8 kisuah leng hun bang tan hiam a pek hong kiam banah colour leng bangtan hiam sung suah hong haksat khak ding gintak huai hi.

TUALSUNG:

‘Awja Paupu Lenlai’ honkhiak in om

Lamka, Dec- 18: Zotal Film Company in ZYO GHQ Ambulance project sepsuahna dia abawl 'Awja Paupu Lenlai' kichi tuni’n Zouveng a Zogal Memorial hall ah honkhiak in om hi. Huai hun ah Chief Guest in Paokholal Haokip, Social Worker pangin hongkhia a, Guest of Honour in  Paukhansuan Khuptong, intending MLA candidate 58-CCpur A/C pang a, Functional President in T. Goukhomang, ZEO/CCpur leh Chief Host in Chinlunthang, President UZO pang hi.

Chief Guestin athugenna ah, Paupu Film akipan Zou pau minthang deuhdeuh ahi chi a, Zotal film in project thupitakapatkhiakte lawhching tou zel ding in deihsak hi 

     Awja Paupu Lenlai ahihleh Zotal Film Company adia movie 7na hita a, tutung a pen ZYO GHQ in Ambulance project aneih sepsuahna dia abawl uh hi'n kigen hi. DVD copy khat ah Rs. 200/- in zuak uh a, tuni mah in Lanva, New Bazar, Axis Bank, Old Bazar leh Tuibuong ah road show nei in tamtak zuakkhe ngal uhi.

SSPP saina in Mini Marathon om ding

Lamka, Dec-18: Siamsinpawlpi Jt Hqtrs Lamka saina in December 21, 2016 (Nilaini) zinglam dak 5:30 apan Mini Marathon (Marathon For A Cause) om ding hi. Huai marathon ahihleh SSPP HQ Ofice, SSPP Tower, Hiangtam Lamka ah kipan ding a, Pastor Kamchinmang, Local Pastor, EBCC Hiangtam Lamka in Marathon a kihel dingte thumsana nei ding a, Ricky Vanlallawm Guite, Chairman, Standing Committee, SSPP GHQ in Flag-Off ding hi. Kumthak 2017 a Class-X exam dingte awlmawhna tawh siamsin khangthakte khualna a mipi kuapeuh in huai Marathon a kihel ding in SSPP Jt. Hqtrs pawlin chialna bawl uhi.

Biakinn tamkhop in nekkhawmna neilou ding

Lamka, Dec-18: Tukum Christmas ding ni 6 lel in samta a, biakinn tuamtuam ah Toupa Jesu Christ hong pian kipahpihna zang ding in kisakkholhna pailel hi. Prime Minister Narendra Modi in Nov 8 zankim apan ‘Demonetisation’ minvuah a sum note Rs. 500 leh Rs 1000 a sihsak ziakin Lamka khawpi ah leng saptuam mipite’n haksatna liantak tuak uh a, tutung Christmas ah sum lam a buaina omte ziakin saptuam tamkhop in nekkhomna bawllou ding uh chihthu kiza hi. Ccpur district a bank omte’n Rs 2000 note hawmkhe mahle uh sum note dangte akidaihlouh ziakin haksatna lian mahmah lai a, Bazar ah leng Rs 2000 note zat haksa mahmah lai hi’n kigen hi.

Henglep a Sigal dia kuante tuahsia

Lamka, Dec-18: Tuni sunnung dak 1:30 velin Henglep biala Mualdak leh S.Munlui kikalah Mahindra Pickup khat tuahsia in asunga tuang mi 22 lakah mi 7 liam uh a, district hospital puaktun nung in Nemvung (54) w/o Khaiminlian, Zenhang Lamka admit in om hi. Thutut kingahdan in lamtouhna munah gari joint cross siat ziaka taitheilou in khoubang aphukhak nung in khatvei kilep hi. Hospital puaktung a omte bel Pauthianlal(50) s/o Pauthianlam of K. Kotlian, Chongthiem (50) w/o Pauthianlam, Paugen (72) h/o Neia of Suangpha,Henglep, Nemvung (54) w/o Khaiminlian of Zenhang Lamka, Hoikim (40) w/o Pauthianmang of Gangpimual, Thianngaihnem (55) w/o (L)  Pauneu of K. Kotlian leh Roslyn (36) w/o Kh. Benlian of Gangpimual hi uh a, midangte a serious louh ziakua pawtkhiak sak a om in Nemvung bel admit uhi. Amaute ahihleh Henglep biala Suangphah a sigal dek hi uh a, tuahsiat ziakin akimkhat velin sigalna mun zuan mahle uh aliamte Lamka ah hongkik uhi. 

Mun tamkhop ah Solar Street light vaklou

Lamka, Dec-18: Manipur Renewable Energy Development Agency (MANIREDA) pawlin Lamka khawpi sung ah tukum bullam in Solar Street Light tamkhop koih uh a, huainung in Tedim Road leh khawpi sung noptuan mahmah hi. Hun bangtan hiam apan Central Lamka a Tedim Road zulah Street Light tamkhop vak nawnlou chihthu kiza a, aziak ding theihchet hikei huai street light te gukmang ahihlouh ziakin asunglam ah banghiam asiatna om hidi’n gingta uhi.

Eben-Ezer Male Voice te’n album hong

Lamka, Dec-18:Ebenezer Male Voice in abawl ‘I Gam Lungsiet Um Ah- Lalpa Isu Hung Leng Hen’ kichi gospel music video album tuni sunnung in D. Phailien a Ebenezer Church Campus ah S. Siempee Gangte in hongkhia a, Upa Henkhosoi, Chairman LCC in Pathian kiang ah lan hi.Huai hun ah Chief Guest inS. Siempee Gangte pang a,Guest of Honour in Dr. LS Gangte, Functional President in Mangcha Thangzawm leh Chief Host in T. Sholet pang uhi. Programme sungin Ebenezer Choir, MPCS Centenary Church, ECA Choir ban ah Sangthiem te’n phatna la sa uh a, huai album vocalist in SL. Son Gangte, B. Zomuon, H.  Kailalmuon leh H. Paulalmuon pang uhi.

Gospel Album hong

Lamka, Dec-18: Baptist Dorcas Fellowship (BDF), Zenhang Lamka, EBCC adia Gospel Music Video Album masapen 'Vaihawmna Ni Thupi' kichi tuni sunnung in BCD Learning Centre, Zenhang Lamka ah honkhiak in om hi. 

Rev. G. Paukhanmang, Director of Ministries, EBC in huai Album hongkhia in Pathian kiang ah lan hi. Music Convenor Lianlunching in album tawh kisai pulak in, Nute'n Pathian gam nasepna leh khangsawn te'n tununga Nute' panlakna atheih ua, Pathian gam nasepna kalbi dia azat theihna ding uleh,gou manpha ahih ding tupna tawh kibawlkhia hi'n gen hi.

Album sung ah la 8 om in, Dorcas leh Saptuam sunga mikiphal tuamtuam te'n a sponsored uh hi a, March 2016 akipan Nov. 2016 kala zawhsiang ahihbanah Green Recording studio ah recording bawl in Uptown Media in videography leh editing abawl hi'n kigen hi.

Phaitong saptuam in Centenary lawm

Lamka, Dec-19: Thanlon sub-divn sunga om Phaitong khua ah tuni apan zingchiang tan daih ding Saptuam Centenary lopna kipan a, tuni sunma dak 10:30 in Rev. S. Vung Minthang, Gen. Secy. EBC in Biakinn thak honna leh latna nei hi. Huai hun ah Upa M. Thangkhansiam, Chairman,TBSUC in vaidawn thu gen a, EBCC Phaitong leh EBC Central Choir te’n phatna lapawl sa uhi. Nitak kikhop hunah Upa G. Thangchinlian in Pathian thu gen a, zingchiang zing biakna kikhop ah Rev. L. Khaikhansong,Divnl.Supdt. EBC Thanlon Divn. in Pathian thu gen ding hi.

Musical Sunday zang

Lamka, Dec-18:  Moria EBCC Pearsonmun a BCD pawlin tuni sunnung in ‘Musical Sunday Worship Service’ zang uh a, huai hunah CBA Gouchinkhup Veng apan lasiam te’n naupang-te tawh hunzang khawm uhi. Musical Sunday hunah Pathian laa chituam leh action song tuam zilsakna om a, huai hun zang ding in naupang tamtak paikhawm uhi. Sunnung lam in kum 2017-19 sunga Naupang Sinsaktu dia mawhpuakna piak a omte’n kitelna nei uh a, Suptd, Vice Suptd, Finance Secy, leh Treasurer ding telkhia uh hi’n kigen hi.

Graduation Day zang

Lamka, Dec-18: Tuni sunnung dak 1:00 in EBCC Pethuel ah BCD Naupang pawlin Graduation Sunday Service masapen zang uhi. Huai hunah BCD Superintendent Htp. Khupzabiak in Piching kaithak-te Local saptuam kianga pekhia in, local Pastor K. Pumsuanthang in thumsakna nei a, pastor leh BYF Chairman K. Kungbiaklian in amaute hasotna thu gen uhi. Tukum in BCD Pethuel apan Senior pawl a naupang 24 piching kaithak uh a, amaute khakkhiakna hunah lukhu khuksak a om in, nitaklam annkuang umkhawm uhi.

STATE THUTHANG:

CM in thil tuamtuam hong

Imphal, Dec-18: Chief Minister O. Ibobi in tuni’n Bishnupur district a Moirang ah Sub-Treasury office, Phougakchao Ikhai Police Station, Keibul Lamjao Police Station leh Chingnu Moirang Thangjing Guest House hongkhia hi. Huai hun ah Chief Minister in a thugenna ah Moirang constituency a mipi’n buaina a tuah uh kiamsakna dia government institution-te puah uh a, police station koih ziak in dan kalh a sualna akiam ding banah huai area ah law & order enkai ding chi hi. Moirang a Sub-Treasury office honkhiak tawh kiton in Moirang area a upa lam te’ pension tawh kisai thilte amau area mah ah sai thei ding uhi. Manipur ah Moirang leng tourist hot spot ahih dungzui in Loktak Lake, Keibul Lamjao leh Sendra veh ding tourist hunkhop om a, tourist-te tun na dia private hotel a ki daih louh ziak a gam leh mun tuamtuam apan Tourist-te tun theihna dia Chingnu Moirang Thangjing Guest House bawlkhiak hi’n taklang hi. Hiai hun Dy. CM Gaikhangam, Commerce & Industries Minister Govindas Konthoujam, PHED Minister Manga Vaiphei, M. Prithiviraj, Moirang A/C MLA, S. Bira Singh, Kumbi A/C MLA, Th. Mangibabu Singh, Thang A/C MLA, DGP L.M. Khaute, IPS leh DC/Bishnupur te’n uap uhi.

Manipur Assembly Session a om poimawh – Dr. Nara

Imphal, Dec-18: CPI Manipur State Council Secretary Dr. M. Nara in tulel a Manipur dinmun gen khawm ding in Assembly Session sap poimawh chi’n gen hi. Aman a genna ah tulaitak a Manipur dinmun emergency dinmun tawh kibang geih ahi a, singtang leh phaizang gam a buaina omte ngenteltak a genkhawm a ngaih ziak in Manipur Assembly Session sap poimawh chi’n gen hi. Assembly Session kichi kum 1 sung in ni 50 sang a tawm zaw a om louh ding chih hi a, Assembly session om chiang in leng agenda omlou chih ziak in minute 45 lel a tut khawm hun om hi’n gen hi.

Hibang thil poitak hi a, tulai dinmun en kawm in Manipur Governor in Assembly Session a kinlam a sam ding in ngetna bawl hi. Aman a genzelna ah Manipur ah Congress leh BJP in Assembly Election tawh kisai a suanlam hoih neih theihna lampi zong uh ahihziak in Assembly Session leng zekai hi’n gen hi.

Ni 7 sung Internet pailou ding 

Imphal, Dec-18: Dr. J. Suresh Babu, Addl. Chief Secretary (Home) in Manipur Police Department apan mobile data platform whatsapp, Facebook, Hike, Messenger, Viber-te tungtawn in Manipur a buaina sousang saktheih dia thuzuau leh thu bawltawm theh zak om chih report a muh dungzui in Manipur a muanna leh bitna kepbitna ding banah law & order etkai theihna dia tuni zinglam dak 10:00 akipan Manipur pumpi ah ni 7 sung mobile Internet/data paisak lou ding a thupia hi’n gen uhi.

District celebration cum political awareness

Kangpokpi, Dec-18: Kangpokpi District HQ a Brig. Thomas Ground ah Dec 20, 2016 in Kangpokpi Districthood celebration-cum-Political Awareness program om ding a, huai ah Special guest in Kangpokpi A/C MLA, 50-Kangpokpi A/C a MDC teng, T. Ranjit Singh, IAS, DC/Kangpokpi, Col. GV. Raghavan, C.O. 38-A/R, Jwalamukhi, Lairouching leh H. Balram Singh, MPS, SP/Kangpokpi-te pang ding uhi. Huai hun ah districthood movement hun a si Seikeng Haokip (1981), Lhingdei Khongsai (1998), Lamminlen Sitlhou (2008), Krishna Maya (2011), Hari Maya (2011) leh Yaireiphy Lungleng (2011)-te zahna piak hiding uhi. Noon session in appreciation, presentation leh congratulation hun hiding a, evening session in lasiam tuamtuam Benny Khongsai, Jeff Akai, Lovejoy, Esther Sitlhou, Lamneilhing Haokip, Paoboi Touthang, James Arjun leh Imphan apan Anggu Singh it Band te’n concert nei ding uhi. District Headquarter Women Wing te’n district muhtheihna dia local MLA, ADC Sadar Hills Chairman leh JAC Convener-te panlakna uh theihpihna in ‘Talai’ kichi zang in zawng ding uh a, mass traditional circle dance ‘Lamkol’ kichi leng om ding a, official a chetna om kei mahleh MANIWOOD a singer leh actor te’n district lawpna hun uap maithei uh a, organizing committee te’n 50-Kangpokpi A/C a village chief leh mipite’n huai hun uap dia chialna bawl uh hi’n leng kigen hi.

Paona bazar kikhak

Imphal, Dec-18: Paona bazar ah tuni’n dawr tamzaw kikhak a, tulel a Manipur ah blockade leh counter blockade banah demonetization ziak a haksatna tuamtuam omte ziak a dawr khak uh hi’n kigen hi. Paona bazar ah shop owner association te’n dawr khak ding tungtang thupuan bawl lou in haksatna tuamtuam-te ziak a dawr khak uh a, Paona leh Thangal bazar a dawr luah te’n business lam ah manna tuak uh a, dawr luah man leng pe zou lou hunkhop om a, sum lam ah taksapna ziak a dawr neitu tamzaw te’n dawr khak uhi.

Sadar Hills martyr-te zahna pia

Kangpokpi, Dec-18: Kuki Inpi Sadar Hills te’n districthood muhna dia kum 10 paisa apan movement pen Nov 8, 2016 zankim a bawlkhiak leh Dec 15, 2016 ni in official a Kangpokpi district honkhiat ahih tawh kiton in Kangpokpi mipi sik leh tang in Sadar hill movement tawh kisai a Martyr-te zahna sangpen pe kawm in mipi panlakna tawh kisai in leng kipahthu puang uh a, district bawlthak tawh kisai a Government thupukna kipahpih thupuang uhi. N. Sehjalien Gangte, Gen. Secy., Kuki inpi Sadar Hills in Chief Minister O. Ibobi, Dy. CM Gaikhangam leh Manipur a SPF Congress government a Cabinet Minister te’n hun sawtpek apan mipi lametna a tangtun sak uh tawh kisai in kipahthu puang a, local MLA 3–IFCD Minister Ngamthang Haokip, Yamthong Haokip, Saitu A/C MLA leh Nemcha Kipgen, Kangpokpi A/C MLA-te panlakna tawh kisai in leng kipahthu puang uhi. Huai banah ADC Sadar Hills a MDC teng leh a diak in Haokholal Hangshing makaihna a Congress Councillor, Thangjakam Misao makaihna a Congress Leader leh Worker-te banah Inpi, JAC leh Sadar hills CSOs-te tungah leng kipahthu gen uhi. Sadar Hills mipite’n districthood muhtheihna dia hinna ana pia Martyr innkuan-te thuakpihthu puang uh a, amaute tungah zahna sangpen pia uhi. Sadar Hills tua Kangpokpi kichi a Church leader, kum 2011 a hunger strike bawlte, village chief, youth club, women orgn., local bodies, ni 125 sung kiphinna hun a panla-te leh Dec 15, 2016 ni a district hongkhiak theihna dia panla DC, SDC, SDOs, DLO leh security personnel teng tungah kipahthu puang uh hi’n leng kigen hi.

KNA bawlkhia; office bearer ding tel 

Kangpokpi, Dec-18: Kangpokpi district a Sapormeina ah Dec 15, 2016 in political party Kuki National Assembly (KNA) kibawlkhia hi. KNA phutkhiak ahih tawh kiton in mipi theih dia party thiltup puankhiak hi keimahleh Rev. Mangpithang Haokip, Pastor KBC No. 4 in Officer bearer telching a om te kichiam sak a, President len dia Mangboi Haokip telkhia hi a, Thangjang Haokip in General Secretary, Mamang Guite in Treasurer len ding a, member dia Kaigin Haokip, Paongam, John Haokip, Onmang leh Lalboi Guite-te telkhiak hi uhi.

Jiri-Parking ah Counter blockade kipan

Imphal, Dec-18: UNC-te economic blockade thuk kikna in phaizang gam a mun tuamtuam ah counter blockade paizom zel a, Sagolband area ah nupi leh tuailai mi 150 vel ding te’n lampi khak in Sagolband Moirang Leirak area ah gari-te checking bawl uh hi’n kigen hi. Counter blockade supporter te’n Imphal-Jiribam lampi tawn a hill district a paiding van tuamtuam pua gari leh autorickshaw te’n meh a puakte uh kaih khiaksak in lamlai ah susia uh a, himahleh huai hun ah liam om louh banah gari suksiat omlou hi’n leng gen uhi. Huai nung in Police-te’n counter blockade bawl-te hawlkhia uhi. United Committee Manipur (UCM) a President Elangbam Johnson in Imphal area a mun tuamtuam ah tribal a diak in Naga-te bit ding uh chi’n chiam a, kuamah patau lou ding leh thu phuahtawm thehzak-te apan pilvang dingin theisak uhi.

BJP intending candidate gari suksiat in om

Imphal, Dec-18: Meltheihlouh pawl khat in Lamlong area ah zan nitak dak 9:30 velin Ukhrul Assembly Constituency a BJP intending candidate Asai Ngakuimiza gari suksiat sak uh hi’n kigen hi. Huai tawh kisai a Asai in a genna ah Khwairamband Keithel Nupi te’n dakkal 14 sung Manipur pumpi ah bandh a puang uh a bei nung in Manipur University a Assistant Professor 2, Ukhrul khaw mi 2 tawh Ukhrul zuan uh a, Lamlong area ah meitheihlouh pawl khat te’n a gari suksiat sak uh a, thiltung na mun gei ah Police personnel duty om te’n ngaih sak lou uh a, hiai tungtang DGP kiangah complain bawl hi’n gen hi.

Helpawl hidia gintakte’n thau kapkhum

Imphal, Dec-18: Helpawl hidia gintak te’n tuni zingsang dak 8:00 velin Litan Police Station in a huamkhak Bongyang village thau in va kapkhum uh hi’n kigen hi. Thusuak in a gendan in NSCN(IM) dia gintak te’n gam lak apan minute 10 sung ding Bongyang village thau kapkhum uh a, thiltung hun ah khaw mi tamzaw-te Biakinn ah kikhopna nei uh a, si leh liam omlou hi’n taklang uhi. 

MPPDU in mawhsa

Imphal, Dec-18: Manipur Proletariat Peoples’ Democratic Union (MPPDU) te’n Manipur a UNC-te economic blockade ziak a mipi’n gen vual louh haksatna a tuah uh tawh kisai a state government in panlak neilou chi’n mawhsak thu puang uhi.

CC Meet:

AMFA saina a Imphal Mapal Kangjeibung mun a 60th Sir Churachand Singh, KCSI, CBE, memorial football tournmanent quarter-final match kimawlna tuni a om ah  NISA, Thangmeiband leh Assam Regimental Central, Shillong te kimawl ua, tua ah ARC, Shillong in penalty a zou in semi-final lut uhi.  Hiai match ah team nihte normal time in goal kikhum zou omlou in 0-0 in kidraw ua, penalty peksak hi ua, penalty ah ARC, Shillong in 5-4 a zou in semi-final lut uhi. ARC, Shillong apan J/5 L. Rosendro Singh, J/12 Y. Randhan Meitei , J/7 Francis Zonuntluanga, J/20 S Sanaton Singh  leh J/8 H. Vijay Singh ten goal khum vek ua, NISA apan J/2 S. Rojen Singh  in khumlou a, adangte ahihleh J/14 L. Milan Singh , J/17 Shahhabay, J/3 O. Premeshor leh J/10 Kh. Naoton ten khum vek uhi. ARC, Shillong te semi-final a lut uh tawh kiton in semi-final ah SSU, Singjamei te tawh kimawl ding uhi. Dec. 19, 2016 in semi-final match kimawlna kipan ding a, tua ah FC Zalen, Sadar Hills leh NEROCA FC, Sangakpham te kimawl ding uhi. (Min Taitom)

TUNI THUPI:

 “Gilead a singnai damdawi omlou hia? Huai ah hihdammi a om ka hia? bangdia ka mite, ka tanu damtheilou ahia?”

 – Jeremia 8:22

EDITORIAL:

Ambulance kineih siak!

Ambulance i chih chiangin damlou hiam ahihkeileh misi tuamtuam puakna gari a theih in om hi. Munkhat apan mundang, ahihkeileh hospital lianzaw zotpihna dinga gari kizang sek ahi hi. Hiai Ambulance sungah atangpi in damlou gimte’ adingin Oxygen (O2) koih in om sek hi. India khawpi tuamtuam abiktakin National highway poimawh tengah Ambulance leh Emergency Services gari tuamtuam highway kim ah khawlsakin om den a, kuahiam gari in buaina atuah leh panpih dia kimansa a dinsakin om den uhi. Ambulance poimawhna ahihleh, gari accident ziak kia hilou in, gari sungah kuahiam in damlouhna leh thil haksa tuamtuam tuakthei a, a poimawh hun a kin-le-buang a damdawi inn tut pen poimawh mahmah hi. 

Eilak ah leng Ambulance leh Emergency Services hun a gari zat ding poimawh mahmah hi. I gam ah khantouhna (development) hong om zelin tuahsiatna chi tuamtuam leng om tou zel a, hiai pen Pathian lemgel mah hiding adiam chih uthuai hi. I gengen taksa bang un eilawi lom paite ihi uhi. Kuahiam in blood bank awlmawh huai, ahihkeileh ambulance gari poimawh a chih leh anei leh neilou khentuanlou a sum kidongte ihi. A poimawh kei ichi kei. Ahihziakin ngaihtuahna piak det-det a poimawh diam chihthu ahi hi. I lak a Philanthropic organisation om tengin Ambulance kineihsiak mai diam maw? Ahihkeileh government hospital a Ambulance kiningching koihna dinga pangkhawm zawlou ding maw chih hon ngaihtuah sak hi. Tribe base organisation level a i kineih chiat sawm mawk leh thil hoih sangin hoihlou piangzaw ding hi.

Pau-le-ham thu ah neuchik a kaih kibatlouhna ziakin kideidanna ana om kha a, ilak ah phatuamngai pawlpi (philanthropic organisation) tuamtuam om in, tawndan leh pau kitheihtuahte’ kalah phatuam ngai pawlpi tuamtuam phuhkhiakin om a, himahleh, khat ngen ihi hi. Tu in Joint Philanthropic Organisation (JPO) chih tanpha hong om a, nikhat ni chiangin Joint pen paihkhiak hong hithei diam chih ngaihdan om a, pau kithei tuah, pupa-tawndan kibang ahihkeileh, unau khat kalah Joint chih chih bang ahia a poimawhna om chih hun hong tung ngei dingin lamen hi. Tulel a i kivaipuakdan uh kalh leh gensia ihi zenzen kei a, Ambulance, Oxygen leh emergency services tuamtuam tribe wise a ineih tek sawm un a pawlam thil ah hoihna lam nawt mahleh a sunggil lam ah hoihpen khollou maithei hi. I neihzawh leh kipahhuai! Nam thil, behthil ahihkeileh Innkuan thil banah mimal bangin leng Ambulance nei theileng hoih mahmah ding hi. Eilawi i gengen sa bangin lompaite ihi a, kuahiam in damlouh hitan ahihkeileh thukin-lakin thil om hun a Ambulance Gari nei uh ahihleh, eilawi inleng i neih uh hunta ahi chi a kichou phur-te ide aw chih in om hi.

Ambulance i chih chiangin damlou-te puakna dinga kizang gari ahi hi. India a mi poimawh ‘VIP’ chi mai lehang, warning lights leh sirens banah flag post tanpha a gari ua koihtheihte zahtak ahi hi. Thukin leh poimawh a zat Ambulance om a, thukin lawlou a zat Ambulance leng om a, hiai pen driver-te adingin pilvan huai mahmah hi. Mi tamtakin i theih siamlouh uh ahihleh Ambulance kichi bang chihna hiam chih hi a, gari mai ah Ambulance akigelh nak leh ama ua tai garite’n side glass apan amuhtheihna ding ua kileh gelh ahi hi. Hiai term pen Latin word “ambulare” apan kipan hi a, “khe in na paidiam ahihkeileh bangchi maisawn ding” chih ahi hi.

Gamdang mite’n Ambulance gari himhim zahtak mahmah uh a, India mite’n leng naktakin zahtak uhi. Huchi kalah, zan in Manipur ah Nupi pawlin dakkal 24 sung statewide general strike nei uh a, Lamka apan Imphal hoh dia kisa gari hunkhop Ningthoukhong apan hon sawlkik uhi. Amaute’n a gari mai uah ‘Wedding/Marriage Party’ chih tak mahle uh amai ua tai damlou pua Ambulance gari-te tanpha leng paisuak sak theilou in hon sawlkik uh chihthu kiza hi. Bandh leh general strike om hun himhim ah Media/water services/ electricity/fire brigade leh medical-te khahkol hisek mahleh tutung a bangziaka nupi pawlin medical khahkol lou uh hiam chih dotna liantak om hi.

Bandh bawlte’n a ut uleh Pathian biakna mun Biakinn khoihta ve uh, huai pen sahkhaw thil ahi. Himahleh, ambulance a damlou gim kipaw ngoihngoih lehkik sak a om pen thil hamsiat huai hi a, akta mangkuan kitutu leng i hi khadiam chih uthuai hi. Eilawi igam tatdante uh mawl huai leh haihuai thei mahmah hi’n gintak huai hi. Kuahiam lampi a gari a hong tai kikou khum, suang a denglai chih khawngte ihi a, mite’ gari lampi nawl a khawl maimai a glass va suksiat sak khemkhem chihkhawng a khawsa-te ihi uh a, i khomkhom in kipilsak le hang leng bangmah ihih louhdan i gamtat khawhei in hon genchian mahmah hi.

Mite’n Ambulance gari pen zahtak mahmah in fly-car ahihkeileh Quick Response Vehicle chi hial uh a, a ma ua tai gari te’n awn ziahziah uhi. Himahleh, eilakah Ambulance gari chih ziakin lampi ot chihte om vetlou in ut dandan in lampi kizuimai hi. Ambulance in apuaktheih damlou pen damlou gim leh awlmawh huai hitangpi a, tuate i ngaihsak kei leh a ngong zaw ei mah kihi kha ding hi. Ahi a, eisung kia genin, private/local ambulance leng i tam ta a, bandh ni khua leh adangdang ah ambulance ahihna uh ‘advantage’ dan a la a Airport a ‘pick & drop’ hiam ahihkeileh passenger gari dan a atai ding uh deihhuai hetlou hi. Tua in ahihna uh bangmah lou suah ding hi. Eilak a bel Ambulance tawh kisai in kigakna thupilua om kei mah leh United States bangin Ambulance tungtang ah Type I, Type II, Type III and Type IV kichi dan bukim nei uh a, ‘Advanced Life Support and rescue work’ adia mansa a a om gige ding uh chih ahi. Gari ka nei, Ambulance dingin ka zangding chi a, Medical Suptd. hiam ahihkeileh DTO a va ki-registered pawng mawkin banghiam i tuahsiatni khua in hon humbit tuanlou ding hi. Tribe chih in Ambulance gari leh emergency services tuamtuam (oxygen) telin kineih siak hi, hoih mahmah… ahih ziakin govt in district hospital a Ambulance leh medical equipment bukim hon koihtheihna dingun panla khawm zawle bang a chi dia? Government leh private hospitalte’ mawhpuakna ding eilawi in sem toutou idiam chih leng theikhang, ahih ziakin, phattuam ngaihna chikhat zaw hi veve hi.