Manipur Express | December 3, 2016

SBI/CCpur ah sum Rs. 20 crore hongtung

Sum taksapna lian mahmah lai; dak 12 vel apan ‘Queue’ pawl omta

Express bureau:

SBI Ccpur Branch Currency Chest ading Rs. 20 crore tuni’n Imphal apan hongtung a, SBI in linked bank teng kianga ahawmkhiak banah ATM teng ah leng koih a, sunnung a ATM booth kihong in nitak tanpha in mi kivualdim  uhi. Sum hongtungte lakah Rs. 500 note bangzah hiam telzek mahleh a tamzaw Rs. 2000 note hi a, ATM-te re-calibrate/update nailouh ziakin Rs. 500 note thak koih theih hinailou hi’n kigen hi. SBI Ccpur branch tawh kizom SBI Pearsonmun, SBI Tuibuong, HDFC, Axis Bank, Canara Bank, ICICI, Central Bank, UCO leh Vijaya Bank in sum a ngah dungzui un zingchiang in hawmkhe ding uh chihthu kiza hi.

Centre solkal in Rs 500 note leh Rs 1000 note luite a sihsak (demonetise) ziakin gamsung pumpi ah genvuallouh haksatna tungin, Lamka ah leng azawng-ahau in huai haksatnate thuak kha uhi. Lamka khawpi asum taksapna liantak om ziakin bank apan sum lakkhiak sawm in mi khenkhat te’n zankim dak 12 vel apan bank naih in kivual(queue) maimah uhi. CCpur dist. ah SBI leh UBI telin bank branch tuamtuam 12 vel om a, bank in a huamkhak sung a omte’n sum apoimawh mahmah lai un, bank tawh kigamlasingtang khuate ah mipi haksatna uang diak hi’n gen uhi.

Solkar in sum si hia apuante zattheih nawnlou ding chih ahihnungin, Lamka a bank-te adingin in bangzah vei hiamtak sum hongtung mahleh kidaih taka hawmkhiak dia kiningching lou hi’n kigen a, tua ziak mah in ATM a koih ding sum omlou a, tuni tawh sim in ni 7 val bang khak ahihnung tuni sunnung in kihong mahleh Rs. 2,000/- note kia koih hi a, ATM booth-te re-calibrate/upgrade ahih masiah Rs. 500/- note koihtheih hinailou ding chih ahi. ATM-te caliberate bawl ding tungtang ah technician-te sap hilel uh hi’n a kisaipihte apan thutut kingah hi. ATM booth akihon chiangin debit card 1 ah nikhat adi’n Rs. 2,000/- tan lakkhiak theih a, bank counter ah bel nipikal khat in Rs. 24,000/- tan lakkhiak theih chih ahi. 

Nov. 12 apan tunitan in SBI CCpur ah Rs. 53 crore hongtungta a, himahleh sum kining ching nailouh man in bank a sum lakhe ut mi a tam mahmah ziakin, sum tankhak teitei ding tupna ziakin khenkhat zankim dak 12 vel apan kivualpan hial uh ahihdan leng zak in om hi. Express in athuzakna khenkhatte gendan in zinglam dak 2 velin mi 20 bang dingta uh hidan in gen uhi.

Sum khekte hi in, mahni account apan lak khiak sawmte hitaleh a lakkhiak theih ding uh solkal leh bank te’n a bikhiak sak ziakun phalbi hun pen sungtangmite programme bawl hun ahihman in khenkhatte buaina pen huaise mahmah hi’n kigen hi. Sum haksatna ziak mah in vai kilei tuah ding haksa mahmah a, ADC memberte panlakna ziakin niteng nektawm zuakte lakah hiai sum lading in theihsakna bawl hi a, himahleh khenkhat te’n amau vanlakna mun ah sum luite zat theihlouh ahihman in amau ading in nawngkai mahmah ahi chi’n gen leuleu uhi. Tuabanah, miteng in azat mobile recharge outlet pawl inleng hun bangtan hiam hiai sum luite lazel mahle uh ni bangzah hiam paita apan sumlui la nawnlou uh hidan in leng kigen hi.

Tulai in khawpi sung ah Rs 100 leh Rs 50 note vang mahmah a, sum note lui (Rs 1,000 leh Rs. 500) zatkhiak leng haksa hiaihiai a amanphatna bei ding kuan hita a, Rs. 2,000 note omzekta mahleh sumnen kidaihlouh ziakin mipi’n haksatna tuak veve uhi. ADC/CCpur Chairman makaih Executive Members, Traders leh Pharmacist te’n joint meeting aneih hun ua local adjustment bawldi’n thukim mahle uh azuilou tamtak leng om hi’n thu kiza hi.Thukizadan in ADC/CCpur Chairman makaih Executive Members te’n Traders leh Pharmacist te’n ni bangzah hiam paita in joint meeting nei uh a, huai hun ua local adjustment bawldin thukim mahle uh azuilou tamtak leng om hi’n thu kiza leuleu hi.Imphal-CCpur passenger service, adiakin Winger leh Bus te’n sum note tawh kisai in haksatna liantak tuak uh a, counter ah passenger-te apan Rs 1,000 & 500 note luite la-ut  mahle uh garipu (driver) te’n thau thuna in zangthei nawnlou ua, counter ah leng sum luite lathei nawnlou uh a, ‘Demonetisation’ ziakin khawpi sungah mipi laka mangbatna thupitak om hi’n kigen hi.

Haksatna apan mipi suahtakna ding ni 60 kia omta: T. Chaoba

Lamka, Dec-2: Sim Veng a Simte Inn ah tuni’n BJP 58-Mandal in Booth Level Conference-cum-Mass Enrolment nei uh a, Th. Chaoba Singh, Convenor, Election Management, BJP Manipur Pradesh leh 58-CCpur A/C a BJP Intending Candidate Paukhansuan Khuptong telin party makai tuamtuam kihel uh a, tamtak in min khumlut uhi. K. Vungzalian, President, BJP CCpur Dist. in vaidawnna thugen in, intending candidate leh makai tuamtuam te’n leng thugen uhi. Th. Chaoba in Manipur mipi’n tui, lampi leh nek-le-tak a kum 15 sung haksatna a tuah a palgalkaina ding ni 60 lel in samta hi’n gen a, Manipur a dia khawpi 2na (CCpur) leng planning hoihtak bawl a model town suahsakna dia puahthak hiding in gen hi.  Congress govt. in Manipur ah term 3 (kum 15) vai a hawm sungin project liantak tak abawlte zattheih ding omlou a, adiak in crore tamtak lut a kibawl Khuga Dam, Singda leh Thoubal project-te mipi kingakna tham chinglou a, Congress govt. naktak a corrupt ahihdan langsak hi’n gen hi. Tunitan in thil kiningching muh ding om nailou in, hibang gentheihna apan suahtakna di’n mipi’n a hihtheih hihtheih maban election ah BJP party support ahi chi’n gen hi.

Congress govt. in BJP party pen anti-Christian leh Muslim dan a, a ngawh uh thildiklou hi a, sahkhua ah khentuam neilou ahihdan gen in, Congress party leng secularism dan in kigen mahleh a lem (pseudo-secularism) mai hizaw chi hi. 

Narendra Modi in mizawng leh genthei (weaker section)-te ngai poimawh a, 2022 tan in inteng ah tape water omsak ding, gamsung naktak a khantouhsak tum ahihdan gen in, nekgukna naktak a doudal kawm in sum tellou a tuailai laisiamte’n sepna amuh ding uh BJP thiltup lak a khat hi’n gen hi.

Paukhansuan in gam leh leitang adia hinna pia Martyr 9-te banah aliamte zahna pia ahihdan gen a, amaute lungtup sepsuah utna ziak a hibang a kalsuan ahihdan gen hi. I gam humbitna di’n a poimawh bang a panla touzel ding leh taiselou ding hi’n gen hi.

TUALSUNG:

Singngat Feeder ah shutdown om nawn ding

Lamka, Dec-2: Electric deptt./MSPDCL, CCpur Divn.te’n Tedim road, Hmar Veng ah electric pre-paid a zat ding Aerial Bundled (AB) cable kaih ding ziak leh High tension khuam khending ziakin December 4, 2016 (Sunday) zingkal dak 7:00 apan nitaklam dak 4:00 tan Khengjang power house apan Singngat 11-KV feeder shutdown la uhi. Huai sung in Singngat feeder in electric mei a piak khakna teng pailou ding a, nasep zawhbaih leh zawhhak dungzui in shutdown hunsung kikheng thei hi’n Electricity Deptt/CCpur Divn. lam apan kiza hi. Shutdown hunsung  Singngat feeder in electric  mei a piakna veng/khua/transformer te: Tuithapi, Peace Ground, Laizon Veng, Zion Veng, Kamdou  Veng, Hmar Veng, Circuit House, Zouveng, New Zouveng, Hiangzou, Zoumunnuam, Police Station, Zenhang Lamka PCI Colony, Peace Lane, Nehru Marg, Apollo Veng, Beaulahlane, Khumujamba, Bible Hill, Rengkai, Neihsial Veng, Muolvaiphei to Daizang (along Sugnu road), etc. hiding hi. Gari tai-tuah tawmdeuh ding leh nasep lamzang zaw ding ngimna in Pathianni a shutdown la uha hihna ah mipi/consumer te'n theisiam ding in Electricity Deptt/CCpur Divn.te’n ngen uhi.

School 3 a program uap di’n zinkhe ding

Lamka, Dec-2: Langkhanpau Guite, Chairman, ADC/CCpur in school 3 a Farewell-cum-Annual Prize Distribution Program ah Chief Guest hihna tawh uap di’n Dec 3, 2016 in Lamka apan zingkhe ding hi. Aman Dec 3, 2016 in Thuangtam khua a Elbether Convention English School ah Chief Guest a pang in program uap ding a, student-te lak ah kipahman tuamtuam hawmkhe ding hi. Dec 5, 2016 in Songtal Govt High School ah program uap nawn ding a, Songtal Siamsin Award Committee saina in award tuamtuam pekhe ding hi. Songtal khua a Hearing imparement camp neih hun a Hearing Aid ngah ding a select a omte kiang ah hearing aid hawmkhe ding hi. Dec 6, 2016 in Lungthul (L) khua a Midle School ah Farewell-cum- Annual Prize Distribution program ah Chief Guest hihna tawh kipahman tuamtuam hawmkhe ding hi.

Court ah Jeptha’puakkhiat in om

Case dang ah mat in om nawn

Lamka, Dec-2: Police-te’n Tuibuong a Chief Judical Magistrate court ah Jeptha Famhoite (22) s/o Lalremruot Famhoite of Saikot, Kavan Veng pawkhia uh a, court in Legal Aid Counsel tutding in thutankhum hi. Himahleh Police te’n FIR No.50 (10) 2016 CCP-PS U/S 365 IPC tungtawn in man nawn uh a, court in Dec 5, 2016 tan Police custody ah om ding in phalsak hi. 

Jeptha Famhoite bel Diesel Auto (No.MN 02A-3498) driver hi a, Nov 26, 2016 nitaklam in Headquarter Veng a paisawm numei naupang 2 a puakte Grace Photo Studio gei, New Lamka ah a tawmkhiat ziak un New Lamka khawsung mah ah phatuam ngaite’n matkhiat in om a, Police te’ lak ah piakkhiat a om in FIR No.57(11)2016 CCP-PS U/S 365/511 IPC registered uhi.

Huailou in,  Oct 13, 2016 nitaklam in Red Cross road apan Auto a tuang kumchinglou student 3-te driver in kidnap sawm in Tuibuong lam ah taipih a, student-te’auto apan tawmkhia uhi. Police-te’n auto driver matkhiat sawm in Diesel Auto driver 600 val lemla in huaite lak ah Jeptha Famhoite telkha hi’n kigen hi. Numei 3 pimang sawmthu ah Police te’n tuni’n Jeptha Famhoite mannawn uh a, FIR No.50 (10) 2016 CCP-PS U/S 365 IPC registered uhi.

Tuithaphai Presbytery in ‘69th Vaihawmna Khawmpi’ nei

Lamka, Dec-2: IB Road a Presbyterian Biakinn ah Tuithaphai Presbytery in vaihawmna Khawmpi 69-veina zan nitak apan nei uh a, Pastor bial tuamtuam apan paikhawm palaite’n tuni in vaihawmna nei in agenda tuamtuam genkhawm uh a, December 4, 2016 in zou ding uhi.

Tuithaphai Presbytery nuai ah Pastor bial 7–Lamka Presbytery, Kawnpui Presbytery, Saikawt Presbytery, Imphal Presbytery, Raengzeng Presbytery, Koirengei Presbytery leh Leimaram Presbytery om a, palai 200 val paikhawm te’n 2016-17 sung a budget dia kiguang Rs. 2.95 crores val pom in December 3, 2016 in sunzom nawn ding uhi. 

December 4, 2016 zinglam dak 10:00 in Ordination service om ding a, Rev. Lalthantluanga, Moderator in mi 6 Ordination peding hi. Sunnung dak 1:00 Moderator makaih in sacrament service om ding hi. Mipi kikhawp hunte ah Upa PH Lalrinthang, Upa Lalthankhuma leh Upa Lalramhluna te’n thugen ding uhi.

‘Rationalization of PS’ thu ah meeting

Lamka, Dec-2: DC’s office a BRGF Resource Centre ah Churachandpur District a Rationalizing of Polling Station thu in December 3, 2016 zinglam dak 11:00 in meeting om ding hi. Huai ah recognized Political Party-te, SDO/AERO-te, Minister/MLA hong hawh theilou-te’ sik-le-tang representative-te telding uhi.

       Rationalization of Polling Station thu ah Churachandpur District apan Polling Station 18 kibehlap thak a, Polling Station teng 318 pha hi. Polling Station kibehlap thakte-55-Tipaimukh A/C ah Polling Station (PS) 5: 55/4-Henchungpunji Bengali,55/8-Muolkhangthoi, 55/11-Phaibokhmunte, 55/13-Savomphai leh 55/17-Thingkaldor kibehlap hi. 57-Henglep A/C ah PS 2: 57/9-Phaiba leh 57/41-Laikamualsau kibehlap hi. 58-CCpur A/C ah PS 5-58/66- Khominthang (New Lamka), 58/67- Kanaan Veng (New Lamka), 58/68- Khumujamba, 58/69- Khuga Tampak leh 58/70-Mata Mualtam kibehlap hi. 59-Saikot A/C ah PS 5: 59/3-Thingchom, 59/5-Vajing, 59/9- Kholmun (B), 59/21-Siden Changpikot (B) leh 59/54- Tuinom kibehlap hi. 60-Singngat A/C ah 60/10-MT. Galtam kibehlap hi.Kum 2017 MLA election neih hun in Polling Station 318 ah SDO/AERO 10 etkaina in election duty ding mi 1590 pha ding hi’n kigen hi. SDO/AERO 5 kibehlap thakte-Vangai, Mualnuam, Kangvai, Tuibuong leh Sangaikot hi’n thusuak kingah hi.

Malaria positive 11 mukhia

Lamka, Dec 2: Malaria Deptt./CCpur te’n November 2016 sung in damlou mi 1973 sisan test uh a, malaria positive 11 mukhia in huai lak ah malaria PF 8 pha a, malaria ziak a si bel official report omlou hi’n kigen hi.

NE Idol ah Grand Finale tung

Lamka, Dec 2: Classic Entertainment-te saina in Jyotichitrabon, Kahilipara, Guwahati, Assam ah North East IDOL kidemna pailel a, Miss Jenny Thawmte, Grand Finale tan tung hi. Kidemna ah 50% voting leh 50% Judge-te apan North East Idol ding telkhiat hiding a, Dec 3, 2016 in Lamka ah voting ticket 1 ah Rs.10 in zuakkhiat hiding hi.

Kum 50 chinna lawm ding

Lamka, Dec-2: Chin Baptist Assn (CBA), Lanva Local Church in December 21, 2016 in a biakinn uah kum 50 chin lopna nei ding uh a, hunbi 3 in programme khen ding uhi. Zinglam dak 11:00 in Rev. Dr. JM Ngul Khan Pau, Senior Consultant, DAI in Golden Jubilee Suang hong in lan ding a, teltuam mi 50-te’n Jubilee dak tum ding uhi. Sun dak 12:00 in hunbi 2na om in, Rev. Dr. Sut Khan Thang, Chairman, LCC in Jubilee Souvenir hong ding a, Pastor Palet Thuomngell, Lamka Khawk Sia makaih in member sisa-te sunna om ding a, Lanva CBWS te’n Jubilee drama show ding uhi. 

Nitak dak 5:00 in hunbi 3na ah mipi kikhawm in Pastor DS Pau Swante, Moreh Pawlpi Sia in Jubilee khak ding hi. Mipi kikhop tengin Rev. Dr. JM Ngul Khan Pau in Jubilee message gen ding a, December 20,2016 nitakin CBYF leh CBWS-te makaih in kipolhkhawmna om ding a, huai ah item tuamtuam om ding uhi.

Bike zang in HIV/AIDS awareness nei uh 

Lamka, Dec-2: Churachandpur Royal Riders te’n zan in Chiengkon apan Kangvai kikal ah World AIDS Day zatna in Bike in tai uh a, Mangcha Thangzom in flag off hi. Huai ah kithuahpihna pia Col.Sanjay Kumar CO.25 A/R,Col.Vijay Hooda CO of Khuga Bn., Dr Phirthanglien leh District Aids Control Officer-te tung ah Sonlal Gangte, Chief, Churachandpur Royal Riders in kipahthu gen hi. Amau loudspeaker zang in HIV AIDS Awareness nei uh a, mipi lak ah condoms, pamphlets leh booklet hawm uhi.

Vending station ding zawhphial hita 

Lamka, Dec-2: Police Station campus a Electric deptt-te’ counter zat halsiat a hihnung in bawlthak in om a, nasemtute’n atung langva khuhzou in abang (wall),  atuang, rong nuh leh rack tuamtuam zou uh a, electric fit ding in samlel hi. Electric fitting zawh chiang in  electric pre-paid recharge na Vending Station a zat hiding a, kalnawn sung in honkhiat leh zat hiding hi’n kigen hi.

Muanching’ omna kitheilou

Lamka, Dec-2: Muanching (14) d/o (late) Khualpu of HQ Veng a paisa Nov 29, 2016 nitaklam dak 4:30 vel a inn apan pawtkhia tunitan a omna kitheilou a, a sungkuan te’n tuni’n Police ah report bawl uhi. Muanching in Mobile simcard No.8415853666 tawi a, himahleh phone theilouh a om hi’n kigen hi.

KHUALTAI:

Melody Chinsiamhoih (1.7 month) d/o Zamlalmuan of Mata village khawsik ziak in tuni sunnung dak 3:30 velin si a, December 3, 2016 in Mata hanmual ah kivui ding hi.

Kaikhopau Guite (76) b/o Khaizasong Guite @ K.Guite of Gouchinkhup Veng, New Lamka tuni sunnung dak 1:30 velin lungtangna in si a, December 3, 2016 in YPA hanmual, New Lamka ah kivui ding hi.

IMPHAL NEWS:

Security venbitna in Mao gate a tangte Imphal tung

Imphal, Dec-2: United Naga Council (UNC) te’n indefinite economic blockade ziak a Nov 1, 2016 apan Imphal-Dimapur lampi (NH-2) in a tawt khak Mao gate a van tuamtuam pua gari 221 tang-te security khauhtak vengbitna in tuni sun dak 12:00 velin Imphal hongtung uhi. Thusuak in a gendan in, C. Doungel, Additional Director General of Police makaih in Clay Khongsai, IGP (Zone 1), Kailun, IGP (Zone 2), Dr. S. Ibocha, IGP (Adm), SPs leh IRB commandant-te telin in combine security team venbitna nuai ah tuni zingsang in Mao gate a gari tangte pikhia uh a, NH-2 in a totkhak mun tuamtuam ah UNC supporter-te’n a sukbuai louhna ding un Assam Rifle-te ROP pai uh a, Senapati police-te leng mun tuamtuam ah koih a om in gari tangte pikhiak hun in lamkal ah thiltung bangmah omlou in Imphal hongtung uh hi’n kigen hi. State govt. in highway vengbitna a zat ding in Union ministry of home affairs ah Central Security force company 60 ngen uh a, huai lakah highway vengbitna ah CRPF company 2 kizangta hi’n gen uhi. Huai banah Mao gate a gari va pikhia security escort-te Imphal a tun uh tawh kiton in Jiribam a NH-37 ah Oil tanker telin van tuamtuam pua gari 300 velte pikhe dia security escort sawlkhiak pah hiding in gen uhi. 

Huailou in UNC supporter leh volunteer te’n Noney gei a van tuamtuam pua gari-te van puak a kaih khiak uh tawh kisai in Jiribam ah leng tunitaklam in counter blockade kipan a, Golathon mun ah counter blockade bawl te’n Tamenglong zuan ding gari-te vanpuak khaihsak banah suksiat sak uhi. Khumbong area ah zan a Tata Sumo hal ziak in Imphal leh Tamenglong district HQ kikal ah passenger service khawlsak a om hi’n leng gen uhi.

Governor in ‘Kaushal and Job Mela’ hong

Imphal, Dec-2: Ministry of Skill Development & Entrepreneurship (MSDE) leh National Skill Development Corporation (NSDC) saina in Hotel Imphal ah tuni’n Pradhan Mantri Kaushal Vikash Yojana (PMKVY) nuai a Kaushal and Job Mela om a, huai ah khuallian Governor Dr. Najma A. Heptulla in Mela hongkhia hi’n gen uhi. Functional President in Chief Minister O. Ibobi pang a, Guest of Honour in T. Manga Vaiphei, Minister (Labour and Employment)te pang uh hi’n kigen hi. Governor in a thugenna ah tourism leh hotel industry lam a ding in scope hoihtak kinei a, Manipur ah natural beauty, biodiversity, water bodies, Loktak Lake banah thil tuamtuam ziak in eco-tourism dia Manipur hoihpen ahih dan gam sung leh leitung pumpi theihsak ngai a, tuailate sepna piakna theihna dia sector hoih dingte beauty, wellness leh health sector chi hi. Aman a genzelna ah health leh ancillary industry sector lam ah mi tamsem training piak ding a poimawh dan taklang hi.

 Chief Minister O. Ibobi in Manipur a entrepreneurship puahna dia Start Up Policy koih hoih ding hiam chih state govt. in state dang a policy kizangte suilel uh a, huai policy tungtawn a government in consultant-te zang in sepna neilou tuailaite skill training piak banah industry a patkhiakna ding ua panpih ding chi a, tuailaite sepna piak ding dan ngaih poimawh pen a koih hiding chi hi. Union Government panlakna a diak in tuailaite sepna piakna ding tawh kisai a state govt. in kithuahpih ding a, sepna ding a tam zawh peuh leh muanna leh bitna in zui ding a, khantouhna tun ding hi’n gen hi.PMKVY ahihleh Ministry of Skill Development & Entrepreneurship nuai a flagship scheme hi a, tuni a programme ah Governor leh Chief Minister in PMKVY nuai a Linemen training zou surrendered insurgent 15-te kiangah PMKVY certificate, candidate 5 kiang ah job offer letter, candidate 15 kiang ah RPL certification leh weaver 3-te kiang ah Skill competition prize pekhia uh hi’n kigen hi.

NPF-te ‘anti-Naga party’ a puan hidi’n vau

Imphal, Dec-2: Zeliangrong Baudi (ZB) Tamenglongte’n maban a Manipur Legislative Assembly Election ah Naga People’s Front (NPF) te’n hill district a elected MLA 20 lakah khatpeuh kiangah party ticket a piak ua leh ‘Anti-Naga political party’ a puan hiding in vau uhi. Huai tawh kisai a ZB Tamenglong te’n Tamenglong district a ruling Congress MLA khat in maban election hun a NPF ticket a tuh sawm chih thuguk theikhia uh a, NPF Senapati a Yaikongpao mun ah Oct 5, 2016 a, a meeting thupukna uh NPF-te theisak thak uh a, tribal MLA-te ticket piaklouh ding in gen uhi. Tamenglong a MLA 3 -Gaikhangam, Janghemlung Panmei leh Kikhonbou-te ‘anti Naga’ leh ‘Anti-tribal leader’ hi uh a, Manipur Assembly ah ‘Anti tribal bill’ pass theihna dia suai a kaih ziak un mipite’n kitawp ding in theisak mahle uh kitawp tuanlou uh a, UNC, AMOTF leh ATSUM te’n leng MLA 30-te tungah boycott puang uh hi’n leng taklang uhi.

State govt’ dinmun kichiantak taklang di’n deih 

Imphal, Dec-2: All Manipur United Club orgn. (AMUCO) te’n National Highway-te ah UNC economic blockade leh huai ziak a phaizang mun khenkhat ah counter blockade bawl a om tawh kisai in state govt. in Sadar Hill leh Jiribam district demand thubuai tawh kisai a thutanna kichiantak a bawl louh ziak uh ahi chi’n mawhsak thu gen uh a, thubuai ziak a nam kal buaina tanpha a pianma a state govt. in district puan leh puanlouh ding tawh kisai in a dimun kichiantak a taklat ding deih uhi. AMUCO office ah tuni’n hiai thu ah press conference om a, huai ah Ph. Devan Sharma, President, AMUCO in district demand thubuai tawh kisai a state govt. in a dinmun kichiantak a ataklat hun lawta a, huai ahih keileh namkal buaina tanpha tun thei ding chi hi. Aman a genzelna ah, govt. in full fledged district a Sadar Hills leh Jiribam puankhiak ding pomkip in anung a thupukna a khek lamdang nawn in Naga leh Kuki community-te thangpai sak a, govt. in Sadar Hills leh Jiribam-te district a puan leh puanlouh ding tungtang a thutanna kichiantak a taklat ding uh hun tung a, Manipur ah namkal buaina a tunnawn leh state govt. banah BJP te’n mawh akipuak ding uh chi hi. AMUCO te’n UNC economic blockade leh counter blockade lemsak pihlou uh a, himahleh blockade zukkik ding ngenlou ding uh a, a ziak ahihleh Naga area/Kuki area/Meitei area a kikhenna om sang in Manipur khat a om ding deihzaw uh chi’n taklang hi.

Speaker in Multipurpose Community hall hongkhia

Imphal, Dec-2: Pangei a ‘Ibudhou Tangja Lilha Pakhangba Pangei Yangdong Multipurpose Community Hall’ tuni’n honkhiatna om a, huai ah Chief Guest in Th. Lokeshwar pang hi. Functional President in Dr. Chaltonlien Amo, Chairman, Hill Area Committee pang a, Guest of Honour in Y. Surchandra, Kakching A/C -te pang uhi. Huai ah Th. Lokeshwar in nam tawh kisai leh a pawl a kikhenna-te ziak in Manipur ah masawnna dal in om a, huaiziak mah in Manipur a society-te khanglian theilou a, Manipur pen Mini India hi a, nam tuamtuam tenkhawmna ahihziak in nam tawh kisai leh a pawl a kikhenna a omlouh ding ahi chi hi.  Hun poimawh dan theiloute’n Manipur a bandh leh blockade-te gum uh a, nam tuamtuam sukha ding thilte sai nawn lou ding in leng ngen hi. Hiai hun Yamthong Haokip, Saikul A/C MLA, Ratan, Social Worker leh mi tuamtuam te’n uap uh hi’n kigen hi.

Senapati Chairman in Lai PHC hongkhia

Sadar hills, Dec-2: ML Markson, Chairman, ADC/Senapati in tuni’n Laii Circle-te a ding in Primary Health Centre hongkhia a, hiai hun David Khrasi, EM, ADC/Senapati, Chief Medical Officer Dr. Loli Mao, Laii Circle Union Leaders, Laii village leader leh Church leader  te’n uap uh hi’n kigen hi. Huai hun ah ML Markson in Mao A/C sung a khua lian pen-te Laii circle village hi a, hun sawt pek apan Health Centre a phut uh tuni a PHC honkhiak pen vualzawlna leh hamphatna chi a, kuapueh in PHC zuun leh kemhoih ding in leng ngetna bawl hi. CMO Loli in khaw mipi te’n vaccination lam ngai poimawh ding in ngen a, village leader te’n leng PHC a doctor leh nurse-te enkai ding leh PHC tawh kisai a thubai a om leh akisaipih thuneite kiangah tut ding in leng theisak hi. 

‘Green Senapati Campaign’

Sadar Hills,Dec-2: SBI Senapati Branch saina in SBI campus ah tuni’n ‘Green Senapati’ campaign om a, huai ah PVSLN Murty, Chief Genera Manager (CGM) SBI, LHO, Guwahati in campaign hong hi. Huai hun ah CGM in digital leh cashless transaction tawh kisai a poimawh dan gen a, SBI branch-te ah mi tamtak kivual tawh kisai in Senapati town ah SBI branch khat hongkhiat ding leh Ambulance 2 chiam hi. Kohima apan Imphal hong pai hun in Mao gate ah local leader leh SBI official-te tawh kihou khawmna nei uh a, huai hun ah garbage disposal vehicle leh SBI Mao branch ah akintheipen a staff koih beh ding chiam hi. Rajeev Arora, DGM (In-charge of SBI Manipur and Meghalaya) in thuleng ziak a customer-te patau lou ding in ngen a, a hunhun a sum supply hiding a, customer te’n leng internet banking leh SBI buddy poimawh dan theiding in ngen hi. Tuni a campaign tawh kisai in ML. Markson, Chairman, ADC/Senapati; C. Arthur, IAS, DC/Senapati; K. Kabib, IPS, SP/Senapati; Rajeev Arora, Dy. General Manager (B & O), SBI official leh Imphal banah Senapati apan Manager leh staff te’n SBI campus sung ah singnou suan uh hi’n leng kigen hi. 

Mi 28 in MES Grade-III ngah

Manipur Public Service Commission(MPSC)  in a recommend dungzui in Manipur Secretariat  Education (S) Department in Education Department a Senior Officer 28 tumazek in Manipur Education Service (MES) Grade –III (pay scale 9,300 – 34,800 + 4,300 GP) ding in promotion pia a, MES officer thakte posting  mun ding tunung in order suak ding hi. MES officer thakte anuai abang hi uhi.

Sl. No. Name Category

1 Meeni Sinam General

2 Mayanglambam Rakesh Singh SC

3 Naorem Pakasana Singh General

4 Sairem Mangi Meitei General

5 Namoijam Khogendro Meetei General

6 Thoudam Brojen Singh OBC(M)

7 Maisnam Birmangol Singh General

8 Gurumayum Bhawandev Sharma OBC(M)/ HI

9 Atom Dhanamanjuri Devi General

10 Nehkholun D. Haokip ST

11 Yendrembam Lokendro Singh SC

12 Dimonang Pamei ST

13 Moirangthem Nabachandra Singh      General

14 Khetrimayum Biswajit Singh General

15 Toijam Vikram Singh General

16 L. Henboi Misao ST

17 Takhellambam Priyokumar Singh OBC (M)

18 Khumukcham Anil Singh General

19 Laishram Sharat Singh General

20 M. Phalneichong Haokip ST

21 Kadi Rongmei ST

22 Lhingthinneng Singsit ST

23 Shokholun Baite ST

24 Pauzachin ST

25 L. Solomon ST

26 K. Khangam ST

27 A. Abonpou Christopher ST

28 Demkhosei Haokip ST

TUNI THUPI:

 “Huchiin, na nek uhiam na dawn uhiam, na hih peuhmah uah leng, Pathian thupina ding ngen in hih un” 

– I Korinth-te 10:31

EDITORIAL:

Hornbill Festival

Zanzek in Manipur state in thupitakin Sangai Festival zang ua, Myanmar’ Chin state Chief Minister telin mi poimawh tamtakin hong uap uhi. Hiai festival tawh kisai editorial ah ngaihdan tuamtuam ineihte uh itaklangta ua, tu in Nagaland in zana ahonkhiak uh Hornbill festival tungtang genkhawm nawnle i chi hi. 

Singtangmi chiatchiat ihihna uh a kibatna mahmah ahihleh Nagaland te’n Hornbill (Vaphual) thupi ngaih mahmah ua, Vaphual humbit dingdan tawh kisai in leng naktakin panla uhi. Tuamah bangin eilawi in leng Vaphual ipi bawl ua pawlpi hunkhop in ‘Logo’ dingin leng i zang uhi. Bangziaka Vaphual/Phualva hichi hahzat ihi hiam i chih leh, ganhingte lakah ki-itna tuam biik (Uniqueness) nei uh hi’n kigen hi. Vaphual nupa (kop) te’ laka apa(male) pen in a tate itna leh khualna ziakin ann zongding in kuan a, phalbi leh khawlum hunin leng a koppih leh a tate/anoute khualna ziakin ann zongding in kuanden chih ahi. Tua chauh hilou in, apa hiam ahihkeileh a nu uhiam in vangsiat thu a sihna atuah leh khatpen huihkhua sangtak ah kikhawh touin leilak ah kia in sihpih mai kichi hi. Tua ziakin Vaphual kop leh sungkuante’ ki-itna thupi mahmah chih ahi.

Tuabang kalah, mi tamtak-te’n letter hiam khawng a logo agelh chiangun, Vaphual lem khat chauh taak-khe sek ua, a khen-te’n lah Vaphual nih kinung ngatsak uhi. Upa lam-te’n agendan un, Vaphual lem i gelh hiam ahihkeileh copy paste i bawl leleng a kimaingat ngeingei ding ahi chi uhi. Hiai in amaute’ kingaihnatna sulang ahi chi uhi. 

Vaphualte’ ki-itna tungtang igen kawmkawmin thudang simpi genkhawm ut huai isa hi. Nagaland state adingin ‘Hornbill Festival’ kichi athupi pen ahi. Manipur adingin Sangai Festival hi a, CCpur adingin ‘Mithun Festival’ hikha mawhlou ding hi. Nagaland mipi-te’n Hornbill Festival akipahpih kawmkawm un, mi tamtak ngaihtuahna ah Government in athawn in sum tampi mansuah hilou hiam chipawl leng om hi. Economy thil ah Nagaland state kichi kitoudelh zoulua hilou a, mi hausa sangin azawng leh genthei tam zaw thouthou hi. Festival khat adia sum a crore a simphial seen a om gige pen mi zawngte’ adingin na(pain) mahmah dingin gintakhuai mahleng ahi a, mi zawng tamtakin hibang ngaihdan aput batlouh lai un lehkhasiam leh maban thil sautak mute’n thupitak leh sum lakh tampi seng a hiai festival zatveu hoihtou zelding uhiam chih ngaihdan piangsak uhi.

Rights to Information Act (RTI) tungtawna mikhat in dotna abawlna ah, 2010-2014 sungin Hornbill Festival zatna ah state government in Rs. 12 crore phial zangbei uh chih ahi. Tutung in bangzah hon zangbei ding ua chih theih hilou a, tulai ngialin ‘demonetization’ ziakin India gamsung koimun peuh ah sum-le-pai ah haksatna thupitak tunga, economy dinmun niamban mahmah hi. Nagaland state sung mun tuamtuam ah Lamka khawpi mahbang in bank a sum lakhe ut mipi zan khawvakin ki vual ua, huai in festival (nopbawlna pawi) leng sukha ban mahmah dia gintak hilai hi.

Nagaland state sung district tuamtuam, singtangdawn ate tanpha hiai festival uap dingin kisingsa ua, Ni 10 sung program neihna hunah ki suklimna leh item tuamtuam om ding hi. State government in bel khualzinmi (tourist) te’ mit hip nang leh tourist a kibehlap touhzel ding tupna kawma thupitak a a sai uleng himaithei a, ahihziakin, state adia economy kiakniamna banah mizawng leh gentheite’ adia lungsim natna vungvung ding ahihleh bel huaisang a zangkhai zawdeuh a programme saidan a ngaihsut uh a poimawh diam chih theih phial hi. Nagaland a milip tamzawte singtanglou bawla kivaak hi ua, singtang gam mun keen taktak-te ah tuilou bawlin buh chiing ua, tualou in lengthei, apple, grape, zawngtah leh adangdangte tuhin lui gamlapipi apan tuila in thei/singte a pichin theihna dingin panla uhi.

Tuni in a festival uh i kipahpih kei chihna hilou in, program adia sum a crore a sim asensek pen uh hihkiam a, genthei, tagah leh meithaite kankuahna dia zat hizaw leh bang achi dia chih hon ngaihtuahsak hi. Manipur in Sangai Festival adia asen uhiam eilawi in Mithun festival adia i sen-te uh tamlou himahleh, mi tamtakin pammaih ana sa mahmah khamawh lou lai ding hi.

Pupa tawndan tawh kisai lahkhiakna (cultural display) poimawh mah a, gamdang te’n hon theihpih uh ideihna ziakleng hipen mah hi. Festival ahihkeileh, program/khawmpi tuamtuam i neih chiangin leng expensive lawlou a thilsaidan banghiam om dingin gintakhuai hi. Tua ziakin kuapeuh adingin pilvan poimawh mahmah kha maithei hi.