HEADLINES:
India in haksatna a tuahte ni 50 nungin zangkhai tading: PM Modi
Moradabad, Dec-3: Prime Minister Narendra Modi in sum note Rs. 500 leh Rs. 1000 sihsak nung a haksatna omte tunung ni 50 tan in kiam thei ding ahihdan tuni’n gen hi. Uttar Pradesh state sung Moradabad a ‘BJP Parivartan rally’ ah tuni’n PM Modi in Demonetization tungtang pulak in mipi haksatna leng theihpih ahihdan gen a, Nov 8 zankim apan haksatna kipante tunung ni 50 nung in zangkhai theita ding chi hi.
Prime Minister Modi in huai huna agenn ah, govt. panlakna pen gamsung a zawnna, siatgawpna, nekguk-takgukna leh black money hihbei tupna ziak hizaw chi a, Black money a lomlom a koihtu-te’n haksatna lianzaw tuak lai ding uh ahihdan leng gen hi. Aguktak a black money koihte, tuhun in mizawng leh gentheite’ innkong a kivual in, amaute bank account zatsak theih dingdan ngaihtuah uh a, huchihlai in sumhaute lakah leng ginomna tawh khawsa-te’n Bank leh ATM naih ngam uh chi hi. PM in a thugenna ah ‘demonetization’ ziak a gamsung mipite haksatna government in theichian a, tuhun a haksatak a kivolhpen tunung a kivolhna haksazaw tamtak hihbeina ding a panlakna hizaw hi’n gen hi.
Bank leh ATM mai a ginomtak leh haksatak a kivual mipite zahna sangpen pia ahihdan leng Prime Minister in gen a, tuhun in haksatna tuamtuam om mahleh kiam hiaihiai ding a, black money neite’n ahihleh tunung in haksatna lianzaw tuak ding uh chi hi. India a siatgawpna leh nekguk-takgukna omte tangtak a dou touzel ding ahihdan leh huai kalhtu te’n bangteng gen-le-sak nei mahle uh government tolhlou ding hi’n taklang hi.
Gamsung a siatgawpna omsate bulhkalhkhiak poimawh hilou hiam chi’n leng Modi in mipite kiang ah gen a, siatgawpna pen haksatna chiteng kibulphuhna hizaw a, huai doudalna dia government panlakna bang ziak a mi tamtak in soisel ngam uh hiam chih tanpha in dotna bawl hi. Gamsung a zawnna omte hihbei poimawh ta a, zawnna piangsaktu, siatgawpna i chih amah leh amah a hong bei ding hilou ahi chi hi. Zawnna hihbeina di’n state lianzawte ah pat masak poimawh a, huaite lak a Uttar Pradesh, Bihar leh Maharashtra khawng ah patkhiak poimawh ding chi hi. Demonetization ziak in, gamsung khantouhna ding lametna khawvak kipanta a, huchihlai in gamsung kilkawi khenkhat ah electric khuam tanpha kimuhlouhna omlai chi hi. Tuabang mun a tengte kumzabi 18na hunlai a khawsa tawh kibang hi uh a, amaute a dia electric khuam puaktun poimawh hizaw chi’n gen hi.
Rev S. Vung Minthang in Manipur Express sutna
ding Web-offset Colour machine thak hong
Lamka, Dec-3: Rev S. Vungminthang, General Secretary, Evangelical Baptist Convention (EBC) in tuni nitak tung in PKT Street, Central Lamka ah Manipur Express sutna ding Web-offset colour machine thak honna leh Pathian kianga latna nei hi. Aman a thugenna ah Pathian laukawma diktatna tawh kibulphuh panlaknate lawhchinna manphahisek a, gam-le-nam adia kingakna thamching huaite hi’n gen hi. Pathian deihdan hinkhua leh nasepna banah diktatna, taimakna leh kuhkalna tawh thutak lenkip ngam mi tamsem tulai hun a poimawh hi’n gen hi. Aman a thugen zawh in Web-offset colour machine thak Pathian kianga latna leh a semtute adia thumsakna hun zang hi.
Manipur Express Editor in a genna ah tulai Manipur bouruak nawngkai ziakin Web-offset Colour machine thak honna leh latna hun ding programme pichingtak sai dinga kisakkholhna sawn mahleh khawlsak hiphot a, himahleh Pathian kianga latna bel alou theilou a ngai ahihdan gen hi. May 30, 2017 in Web-offset Colour machine thak leh Anniversary lopna kithuah banah Pathian kianga kipahthu genna hun a zang ding a kisakkholh hiding in gen hi.
‘Intl. Day of Persons with Disabilities’ zatna om
Lamka, Dec-3: IB Road a Synod hall ah tuni’n DSWO, NYK, CDLSA, ZEO/SSA, CCI, Mercy Home, Parent Associations leh CDDU saina in ‘International Days of person with Disabilities’ (IDPD 2016) zatna om a, Chief Guest in DC/CCpur Lunminthang Haokip, IAS pang hi. Functional President in SP/CCpur Rakesh Balwal, IPS leh Chief host in A. Umarani Devi, DSWO/CCpur; T. Goukhomang, ZEO/CCpur leh H. Doungel, Youth Co-ordinator, NYK/CCpur pang uhi.
T. Sianmuanthang, President, CDDU in United Nations in 1976 kum in General Assembly ah 1981 pen International Year of Disabled Persons a puang in, 1983 apan 1992 sung pen Decade of Disabled Persons puang a, huai hunsung in vual phaloute dawpsang dingdan tawh kisai naktak in buaipih hi. Dec. 3, 1992 apan International Day of Disabled Persons chih minvuah in kumteng a zat hi a, 2007 apan International Day of Persons with Disabilities a khek in om chi hi. Vualbanloute dinmun leh haksatna kuapeuh in a theihpih ua, a dikna leh tanvoute deidanna omlou a, a ngah ding uh a tuppen ahih ban ah tukum in ‘Achieving 17 goals for the future we want’ chih thupi pansan in kizang hi’n gen hi.
Chief Guest in a genna ah, vualpha loute amau deihtelna ziak a hibang dinmun tangkha hilou uh ahihdan gen in, Pathian in Amah thupina lahkhiakna dia abawl hizaw a, taksa piandan ah kibang kei mahle kuapeuh Pathian ma ah kibang ahihdan theithak dingin kuapeuh ngen hi. Election Commission of India inleng vualpha loute ngai poimawh in, kum nawn a election ah atuam liauliau in guideline bawlsak a, vualpha loute mahni vote khe ding khempeuh ki-line (queue) ngailou dia dan a bawlsak ban ah haksatna atuah louhna ding un zuih ding dan tamtak bawl hi’n gen hi.DC/CCpur in vualpha loute ai-awh in Youth Icon dia a guan T. Sianmuanthang, President, CDDU kiang ah certificate pia hi.
A. Umarani Devi in Class X pass leh a tunglamte kiang ah financial assistance to disabled person om ban ah, zi leh pasal neite kiang ah marriage incentive award Rs. 30,000 leng piak hi a, tukum in hiai scheme tuamtuam apply mi 103 vel om in application teng leng thon khin uh hi’n gen hi. T. Goukhomang in vualpha loute Pathian in a thupina latsakna dia a bawl ahih dungzui in a kemkha nu-le-pa te’n inn ah pawng khum bichilhlou a, amau a thilhih theihna tuam a neihte uh zonkhiaksak pen Pathian thilup chi a, hiaithu midangte kiang ah thehzak di’n paikhawmte ngen hi.
TUALSUNG:
Zan khawvak a ngakte’n nitaklam in sum la
Lamka, Dec-3: India Prime Minister Narendra Modi in Rs. 1000/- leh 500/- note zat theihlouh ding a November 8, 2016 zankim a thupuan a neih apan India gamsung pumpi ah mipi’n haksatna thupitak tuak hi. Manipur ah leng mipi’n haksatna thupitak tuak a, Lamka a bank omte ah sum om hun in sum lakhe ding mi tam petmah hi. SBI/CCpur branch ah tuni a sum lakhe ding in mi bangzahhiamte zan nitak dak 9:00 in SBI/CCpur Branch mai ah kivual in phalbi khawvot nuai ah zan giak hial uhi. Huaite lak ah mi khenkhat-te damlouhna ziak a state dang apan a sungkuante un sum a khak lakkhiat teitei ngaih ziak a zanhak zen a ngak hi uh a, tuni sunnung dak 1:00 in bank apan sum lakhe thei phet uhi. Aziak ahihleh zanhal a token kipekhin sa, himahleh office hour sung a sum draw manloute tuni a sum a piak masak ziak un zan nitak a zanhakte’n sunnung in sum lakhe thei pan uh hi’n thusuak kingah hi.
Kangvai ‘emergency shutdown’ om ding
Lamka, Dec-3: Thanlon-Khengjang power house kikal 132-KV line bawl ding ziakin Electricity Deptt/MSPDCL/CCpur Divn. in December 4, 2016 (Pathianni) zingsang dak 6:00 apan nitaklam dak 5:00 kikal Kangvai Feeder ‘emergency shutdown’ la uhi. Huai hun sung Kangvai feeder in electric meivak a piakna khua- Khomawi/Bethel apan Kangvai area kikal ah electric meivak pailou ding hi’n Electricity Deptt/MSPDCL,CCpur Divn. apan kiza hi.
KSO/CCpur in ngen
Lamka, Dec-3: Kuki Students Orgn (KSO), CCpur in district sung a sinlai naupangte dinmun enkhia in a haksatna uh buaipih lel hidan in tuni a information Secretary in thusuah a bawl in taklang hi. Huai tawn kiton in maban ah nu-le-pate’ tawh sinlai naupangte dinmun genkhawm in public meeting neihsawm uh a, huai hun ah admission tungtang, RTE, Compulsory study telin thil tuamtuam kikumkhawm ding uhi. Huai tawh kisai a ngaihdan pe utte’n December 5-7 sung in KSO/CCpur, Information Centre, Sumkong Kaimun a suggestion box ahihkeileh ksoccpur@gmail.com ah ngaihdan piak theih ding hi’n taklang uhi.
Meeting ah TN Haokip tel
Lamka, Dec-3: DC’ office a BRGF Resource Centre ah tuni zinglam in S. Thienlaljoy Gangte, AC to DC & OSD (election) makaih in Churachandpur District a Rationalizing of Polling Station thu ah meeting om a, T.N. Haokip, MLA (Saikot A/C) banah Minister/MLA leh MP-te sik-le-tang in palai (representative) te, BJP leh Indian National Congress palaite leh Election Deptt/CCpur te tel uhi. Churachandpur District ah Polling Station 18 kibehlap thakte lak ah govt official record leh khaw mipi deihna bang a khawmin (village name) kibanglou zek om a, huaite khaw mipi’ deihna bang a bawldik thak ding thu kikum uhi. SDO/AERO te’n Imphal ah election tawh kisai exam a neih ziak un meeting hun ah tel manlou uhi.
Police-te Lamka hongtung uh
Lamka, Dec-3: UNC pawl in NH-te ah Nov.1, 2016 apan Economic Blockade a bawl ziak un Mao gate ah gari tamtak paisuak theilou in tang uh a, Manipur ah niteng poimawh (essential commodities) taksapna liantak tung hi. Mao gate ah gari paisuak theiloute pikhe di’n H. Balram Singh, MPS, Addl. SP/CCpur (Ops) makaih in CCpur District apan Police leh VDF personel kigawm 100 kuankhete zan nitak in Lamka hongtung uhi.
ZPCS te’n 13th Session nei
Lamka, Dec-3: Lailam Veng a Presbyterian Church ah Zou Presbyterian Church Synod (ZPCS) te’n Dec 1, 2016 apan 13th Session nei uh a, ‘Mangpa tawh zawh khawm’ (Gen. 5:22) chih thupi pansan in Rev Kaimuanlal, Rev S. Khaia, Exe. Secretary, Manipur Synod; Rev. Stephen Chinzathang; Rev. Tualzachin leh Rev. Khupkhansuan, Moderator te’n Pathian thu gen uhi. Devotion leh Bible Study bel Rev. Kapsuanthang, Rev. Mangmuanthang, Pro-Pastor S. Ginlianmang te’n makaih uhi.
Palaite’n tuni’n Vaihawmna hun ah 2016-17 sung ZPCS sum muhkhiat leh zat ding in Rs. 2,00,00,000/- passed uhi. Huaite lak ah ZPCS muh leh zat ding in Rs. 1,60,00,000/-;Mission & Evangelism adin Rs. 15,00,000/-; Zou Presbyterian Youth Fellowship adin Rs. 5,00,000/- Zou Presbyterian Women Fellowship adin Rs. 20,00,000/- hiding hi. Huaiban ah, kum 2017 sung a ZPCS Office Bearer ding guang (nominate) uh a, Moderator- di’n Rev. Mangsuanthang; Moderator Elect.- Rev. Awnkhankhup; Secretary (Sr)- Upa Sianzahau; Secretary (Jr.) Upa Thangchinmang; Treasurer-Upa Chinsuanthang; Statistician-Upa Nangkhanlal; Finance Officer- Rev. Khamchinkhai leh Sr.Executive Secretary- Rev. Stephen Chingzathang guan in om uhi. Dec 4, 2016 zing dak 10:30 a biakna program ah Moderator thak Rev. Mangsuanthang in Pastoral Ministry a sem ding Kamminthang s/o Upa Nengkhogin of New Zoveng leh Khupsianlal s/o Upa Khamzathang of Tuibuong laklutna (induction) nei ding hi.
Moria EBCC Pearsonmun honkhiak in om
Lamka, Dec-3: Moria EBC Pearsonmun saptuam in biakinn abawl thak uh tuzing dak 7:30 in Rev. S. Vung Minthang, General Secy, EBC HQ in hongkhia in Pathian kiangah lan hi. Huai hunah Upa T. Pauzakai, Local Chairman in vaidawn thugenna, Rev. E. Paukhanlian, DS, EBC/LND in short speech nei a, local BYF apan phatna lapawl om in Upa V. Chinzagin, Finance in kipahthu genna leh biakin bawldan report pia hi. Moria EBCC ahihleh Pearsonmun a saptuam omsunte laka biakinn nihna hi a, EBCC Pearsonmun apan kum 2003 in tuankhia uhi.
School 4 a Farewell program uap
Lamka, Dec-3: Lianzapau Samte, President, Siamsinpawlpi (SSPP) GHQ makaih in SSPP GHQ makai te’n Nov 30, 2016 in Lamka apan Zodawn ah school 4 a Farewell Program uap ding leh Legal Awareness nei ding in zinkhia uh a, tuni’n Lamka hongtung nawn uhi.
November 30, 2016 zinglam in Lungthul (D) khua ah Farewell Program uap uh a, Lungthul MDC G. Suanchinpau in Chief Guest hihna tawh uap a, Functional President in Lianzapau Samte pang hi.
December 1,2016 nitak dak in Suangdai khua a Convention English School Farewell program uap uh a, Chief Guest in G Suanchinpau, Functional President in Lianzapau Samte pang a, M. Vunglianmang, Advocate in Legal tawh kisai sinsak hi. Program hunsung in kum 2017-19 sung adi’n SSPP Suangdoh Block Presidential Election nei uh a, tuhtu omlou in Pausonthang telching in om hi. Lianzapau Samte, President, SSPP GHQ in kichiamsak a, Pausuanlian, Jt Secy. SSPP GHQ in gupna lai pekhia in Pastor T Lamkhanthang in Pathian kiang ah thumsak hi.
Marathon Awareness Disc honna om
Lamka, Dec-3: The Singtangmi (Whatsapp group) saina in tunitak in New Lamka a YPA hall ah ‘The Singtangmite Marathon Awareness Disc’ honna tawh kithuah Tribal Movement Motivation programme om hi. D. Suanhau, President, Lamka Barbar Assn leh Ningta, Local cobbler te’n disc hong uh a, Thangboi Valte makaih in martyrs 9-te zahna om in, martyr-te’ inkuan leh a lawmte’ uh ban ah inpi tuamtuam a makaite’n candle lighting nei uhi. JAC-AATB, YPA GHQ, Tribal Right Vigil Manipur leh YPA New Lamka Block makaite’n thu a gen ban uah ATML Core Committee leh member-te makaih in slogan samna om hi.
Gangpimual leh G. Mualkoi makaite kimuhpih
Lamka, Dec-3: 59-Saikot A/C apan BJP ticket a MLA candidate sawm Holkholun Lhungdim in tuzing in Gangpimual a K. Sianhnun inn ah Gangpimual leh G. Mualkoi apan makaite ban ah 59-Saikot BJP Mahila makaite kimuhpih hi. Holkholun Lhungdim in Pathian hehpihna leh mipi deihsakna ziak a MLA telching ahihleh CCpur District ah communal harmony om sak ding, tuinek leh development ngaih poimawh ziak a BJP ticket apan 59-Saikot A/C ah candidate sawm ahihdan gen hi. Hun paisa a MLA-te bawlkhelhte apan zil-lai hoihtak lak hiding in gen a, maban a MLA election ah kuapeuh in hehpihna leh deihsakna tawh vote chiat ding in ngen hi.
59-Saikot BJP Mahila Chairperson Lamlhing in BJP intending candidate 3 om uh a, amaute’n program a neihna teng uah Mahila-te observer a tel zel hi’n gen a, kuamah guptuam, paihtuam omlou in BJP ticket ngah penpen full support hiding hi’n gen hi. Pauson in pankhawmna a poimawh pen hi’n gen hi. Holkholun Lhungdim in BJP ticket a MLA dia telching ahih a leh Gangpimual khua a ding a development work a sepsuah keileh a maitang ah kitawm hiding in gen a, Gangpimual leh G. Mualkoi khawsung mipi’n chitak, gin-om leh muanhuaitak a sem ding uh hi’n gen hi. Program zawh in Molnom ah zing-an nekhawm in kimeltheih tuahna leng nei uhi.
STATE THUTHANG:
Manipur govt. in DA leh DR pungsak
Imphal, Dec-3: Manipur govt. nuai a Finance Department (Pay Implementation Cell) in tuni’n memorandum suah a, huai dungzui in Government nasemte Dearness Allowance (DA) leh Pensioner/Family Pensioner-te Dearness Relief (DR) Dec 1, 2016 leh June 1, 2017 in DA/DR Dose 2 pung ding in bikhiah hi. Huaite ahihleh Dec 1, 2016 akipan in Employee-te DA pen Basic Pay 113% akipan in 119% in pung ding a, Pension leh family pensioner-te DR leng huai zah mah hiding hi. Huailou in June 1, 2017 in employee-te Basic Pay a 119% DA leng 125% in pungtou ding a, pension leh family pensioner-te a leng June 1, 2017 mah in 119% akipan 125% in pung ding hi. DA piak hun ah paisa 50 leh a tunglam-te cheng 1 ching a bikhiah touh hiding a, hileleng paisa 50 leh huai sang a tawm zaw-te ahihleh nelsiah (ignored) hiding chih ahi hi. Vineet Joshi Commissioner Finance in huai thusuah a bawl ah Accountant General (A&E), Manipur leh Authorized public sector te’n finance thusuak dan tawh kituak in pensioner-te DR leng huchi dan mah a pe ding in theisak hi.
Media Workshop on Climate Change kipan
Imphal, Dec-3:Centre for Media Studies (CMS), Department of Science and Technology (NMSHE) leh Swiss Agency for Development and Cooperation (SDC) nuai a Indian Himalayas Climate Adaptation Programme (IHCAP)-te saina in Hotel Imphal ah ni 3 daih ding in tuni’n Media Workshop on Climate Change Reporting om a, huai ah khuallian Governor Dr. Najma A. Heptulla in workshop hongkhia a, ‘impact of climate change and the need for adaptation in the northeast region’ tawh kisai a media-te panmun uang gen a, scientist te’n climate change kilatdan tuamtuam tawh kisai in nasem uh a, state government in adaptation dia plan bawl ding in kisa uh a, media te’n awareness leh local level tanpha a communities-te hasot ding in dinmun liantak luah uh chi hi. Governor in Loktak Lake kiakniam na tawh kisai ngai poimawh in naupangte huamkha a wetland puah thakna dia programme pankhe ding in gen a, print leh electronic media te’n leng climate change impact leh vulnerable communities lam ngai poimawh ding leh case studies lawhching-te in pulak ding in theisak a, huai hun ah ‘Himalayas, Climate Change and the Media’ Manual hongkhia hi’n leng gen uhi. I. Hemochandra, Minister (Environment) in a genna ah India gamsung pumpi ah Manipur in Climate change demna lam ah makai a, climate change tawh kisai a state tamlou lakah action plan bawlsuah masa pawl banah semsuah ding a bulpan chi’n gen hi. Huai hun ah P.N. Vasanti, Director General, CMS in journalist reporting a demna ahihleh climate change tawh kisai a local level tawh global climate science and policy kikhekna zoptuah ding hi a, CMS Vatavatan film festival ahihleh film tungtawn a awareness ding tupna chi’n gen hi. Media workshop series nuai ah maban kum 3 sung in Northeast state teng ah media workshop om ding a, hiai hun Senior thematic experts, scientists leh policymaker te’n media outlet tuamtuam a journalists-te tawh kikupkhawmna nei ding uh a, workshop zawhsiang hun in Journalist Fellowship award banah Journalist Best stories award hawmkhiak hiding in leng taklang uhi.
Govt. Polytechnic hostel ah kisualna piang
Imphal, Dec-3: Takyel a Govt. Polytechnic College Hostel ah tuni nitaklam in bike leh 4-wheeler gari zang a meltheihlouh pawl khat te’n hostel a om student-te vua uh a, huai ah student khenkhat liam uh a, gari a kuante hihna theihchet hinailou hi’n leng gen uhi. Huailou in Govt. Polytechnic College a student te’n zan nitaklam in Manipur Students Federation (MSF) Advisor Md. Sherajuddin vaw liam uh a, Langol a Shija Hospital and Research Centre ah etkol in om hi. Akigendan in Govt. Polytechnic hostel sung ah zu leh drug kham nung a khawtang siatna ding bawl om chih report om ziak in Md. Sherajuddin makaihna nuai a MSF volunteer te’n zinglam dak 10:00 velin hostel sung etkhiakna va nei uh a, huai nung sawtlou in hostel a student-te tawh kiselna om a, vanzat tuamtuam tawi pawl khat in MSF team-te a vuak ziak un kisualna piang a, huai ah MSF advisor liam nasa a, volunteer khenkhat liam zek uh hi’n kigen hi.
Handloom and Handicraft-te work-shed ding hong
Imphal, Dec-3: Th. Lokeshwar, Speaker, Manipur Legislative Assembly in ‘Nungthileima Handloom and Handicraft Development Organisation (NHAHDO)’-te a ding in Imphal East a Haraorou mun ah tuni’n work-shed hongkhia hi’n gen uhi. Huai ah Speaker in a thugenna ah weaver-te a dia taksapna omlou in machine leh equipment mamawh-te piak hiding a, state pawlam ah thonkhiak theih dia artisan te’n van hoihtak a bawl ding in leng ngetna bawl hi. Hiai hun M. Sanatomba, President, NHAHDO, S. Saratchandra, ex-Zilla Prashad Khundrakpam leh mi tuamtuam te’n uap uhi.
Leimakhong ah Ex-servicemen rally om ding
Imphal, Dec-3: Red Shield Division saina in Dec 10-11, 2016 sung in Leimakhong a Military Station ah ‘Towards a Happy and contented Second Innings’ chih thupi a ziang in Manipur a dia ‘Ex-Servicemen Rally’ lianpen om ding a, huai hun ah Veteran te’n hasatna a tuah-te uh tawh kisai a thu kaih khawm banah sukvenna dia panpihna piak ding tupna hi’n gen uhi. Army leh State govt. te’n ‘welfare and self employment scheme’ tuamtuam a patkhiakte uh tawh kisai a awareness om ding deihna in Welfare Agencies leh Civil Administration te’n stall hong ding uhi. Veteran portal ah registration bawlna ding in ‘Online Registration Counter’ hong hiding a, Vetran portal ah registration bawl Ex-servicemen teng in mobile phone chiat ah ID leh password a ngah ding banuah huai tungtawn in a Army ah athiltut-te uh enkai thei ding uh hi’n kigen hi.
Retd. Major Gen. in War Cemetry veh
Imphal, Dec-3: Somnath Jha, (Retd.) Major General, VSM in cycling expedition tungtawn in tuni’n Imphal hongtung a, Hatta Minuthong a Indian Army War Cemetry ah Indian Army kivui-te zahtakna latsakna in pak piakna nei hi’n gen uhi. Huai tawh kisai a media-te tawh kimuhna ah Somnath in cycling expedition tungtawn in India a state 29-te tawn suak in India Army-te kivuina munte ah zahtakna pe ding in gen a, North East state 7-te phasuak ding chi hi. Imphal apan Dimapur, Silchar, Mizoram, Tripura, Meghalaya leh Guwahati tawn ding a, huai apan North Bengal, Jharkhand leh mun tuamtuam phasuak ding hi. Cycling expedition sung in km 12000 tai ding a, expedition beina ding in April 2017 kha tawp kuan in New Delhi a Amar Jawna Jyoti (India Gate) tung sawm chi’n gen hi. Aman agenzelna ah Army a kum 37 a sep sung in sepna tawh kisai in Manipur hongpha mahleh posting in om kha lou a, Sept 30, 2016 in Army apan pension hi. Huai nung Oct 19, 2016 in a pension kuan in aposting na mun Ambala Cantonment apan Cycle expedition pan a, tunitan in km 2400 tai ta hi’n gen hi.
Intnl Day of Person with Disabilities 2016
Imphal, Dec-3: Handicapped Development Foundation (HDF), Manipur; Welfare Association for the Blind, SAKSHAM Manipur Prant leh Manipur State Legal Services Authority, Manipur-te saina in ‘Achieving 17 Goals for the Future we want’ chih thupi a zang in Manipur Press Club ah tuni’n ‘International Day of Persons with Disabilities 2016’ zatna om a, huai ah Chief Guest in Dr. RK Kumarjit Singh, State Commissioner for Persons with Disabilities pang hi. Functional President in Dr K. Sobita Devi, Chairperson, Manipur State Commission for Women pang a, Guest of Honour in W. Shyamjai, President, All Manipur Working Journalist Union; Thangjam Sarat, Vice-President, SAKHAM leh Y. Brajamohon, President, Welfare Association for the Blind (WAFTB) -te pang uhi. Huai hun ah Dr. Sapam Jasowanta, Gen. Secy. Handicapped Development Foundation Manipur in a thugenna ah kum 1992 a UN General Assembly in Dec 3 ni pen ‘International Day of Person with Disabilities’ dia puangkhiak tawh kiton in khawvel pumpi ah zat in om a, khawvel pumpi a mihing om teng lakah 15%-te differently abled person hi uh a, haksatna a tuahte uh theih a, niteng hin khua zatna ah a panpihna poimawh uh chi’n gen hi. Senior Advocate Daniel in disability kichi deihtelna ziak leh dan kalh a gitlouhna hilou a, disability omlou in khawvel bukim lou ding a, Pathian in khawvel pumpi a mi om teng a koih ahih ziak in a nuam leh hoihtheih pen a hinkhua zat ding chi hi. Govt. leh dept. tuamtuam te’n special and disabled person-te a ding in panpihna tuamtuam pia uh a, himahleh khenkhat-te education lam ah taksapna ziak in hamphatna tuamtuam omte thei khalou uh a, akisaipih govt. leh department te’n khawtang hoihna dia unskilled disabled person-te skill training banah sepna a piak ding uh chi a, huai hun ah post metric scholarship hawmkhiakna om hi’n leng taklang uhi.
Grenade tawh kisai in PREPAK kipuang
Imphal, Dec-3: Imphal West a Sagolband Nepra Major Leikai a Angomjambam Nandini (41) w/o Koijam Sangoy @ Bale tenna inn ah handgrenade koih tawh kisai in Peoples Revolutionary Party of Kangleipak (PREPAK)te kipuang uhi. Huai tawh kisai a Achouba, Publicity Officer, Dept. of Publicity & Propaganda, PREPAK in a genna ah Nandini leh apasal Bale in pawlpi sum tamtak khonkhia in zang thelthang uh a, nupa-te a sum khonkhiat uh Rs. 35,00,000 din kik ding in theisak uh a, Nandini veng mipi te’n leng kum bangzah hiam paisa in Bangalore ah flat a leikhiak dan uh thei uh a, huai flat ah Nandini leh apasal banah anu Premilla-te teng uhi. PREPAK te’n kiangah sum teng dinkik a hinkhua thawveng zang ding in ngen uh a, media tungtawn a min taklatna ah telkha teng in leng sum dinkik ding in theisak uh a, huai ahih keileh action lak hiding in taklang hi.
TUNI THUPI:
“Hiai khawvel pilna tuh Pathian ngaihdan in haina ahi. Aman tuh amaute a pil lepchiahna uah a man hi, chih gelh ahi ngala:”
– I Korinth-te 3:19
EDITORIAL:
Parliamentary Debate:
Ruling Versus Opposition
Leitung mun tuamtuam a kizang a bang a ‘International Day of Persons with Disability 2016’ i zat kawm in lawm-le-vual phaloute kepbitna tawh kisai leh amaute’ adia hamphatna tamtheipen luanglut thei leh chih i deihthu i lan masapen hi. Huchi bang kalah, Parliamentary Debate tawh kisai a government (ruling/ Treasury Bench) leh Opposition-te’ kal a kinantuahna tuamtuam omte tawh kisai genkhawm i ut hi.
Kinial tuahna (debate) tawh kisai poimawh mahmah a, ahihziakin hoih deihna (positive) lam nga a kinial tuahna pen hoih mahmah ahi. Himahleh, hoih deihna ziak leng hilou a ruling-te ahihnak ua leh a thugen peuhmah uh opposition-te’n a pum nial mawk ua leh dikthei tuanlou hi. Ruling lam in leng vaihawmtu ka hi uh chikawm a opposition-te nuaisiahna a bawl ua leleng hoihtuanlou ding hi. Vaihawmtu government /ruling leh opposition kal a kitheih siamlouhna a om ngeingei leh a thuaktu mipi (common man) te hi veve hi. Thu hoih leh thutang deih ziaka kiselna om pen thilhoih hi a, thusia leh policy tuam neih ziak a kikalh tuahna om in khantouhna sang in niamkiatlam manawh zaw ding hi.
Parliament Winter Session neihin om lel a, sum note sihsak ziakin Lok Sabha leh Rajya Sabha session buaiden lai hi. Nialkalh pawl chimai lehang (opposition) lamte’n issue tuamtuam ziakin kiphinna, kikou zakna leh hall sung apan a pawtkhiak kal uh advantage dan a la a ruling in bill tuamtuam ah lemsakpihna (passed) abawl uleng siangthou (fair) lua hiding in ngaihtuah huailou a, opposition lamin leng govt apan bill tuamtuam kilui khete peuhmah dou (counter) dia a kisak ua leleng hoih tuanlou ding hi. Ruling in opposition lam hitaleh, mipi’ khualna a damdam a thil hon genkhawm uh deihhuai mahmah hi.
Treasury ahihkeileh Opposition bench lam apan thu hoihpipi luikhiak himahleh, ki pawngsel a, naupang kimawl mah bat maimah pen deihhuai hetlou hi. Lok Sabha hi’n Rajya Sabha member-te hitaleh amaute mipi’ palai hi ua, hibang session hun pen hun mahpha mahmah ahihdan a theih uh deihhuai hi. State Assembly session hun ah leng hithou a, ruling leh opposition-te’ kala kiselna ziakin session a hunloupi in khawlsak in om mun mahmah hi. Kisel in kikou zialzial ni a om leleng poilou, ahih ziakin ‘ki-pawngsel’ kichi omthei mawk hi. Tup dan leh ngaihdan banah mipi’ maban ding ngaihsutna om tuanlou a kel pan a panmawk kichi leng om thei a, huai pen mipi’ palaite’ a dingin ngaihtuahtham ching hi.
Debate kichi himhim team 2 om a, tua ah thukhentu (judge) khat om hi. Hiai Judge (Speaker) in mawhpuakna liantak leng nei a, a kiseltute’n leng zahtakna liantawk tawh a thugen ma ua Speaker’ thugen zahtakna leh address pe masa teitei uhi. Lok Sabha Winter session pailel bang i et chiangin nuihzat huai mahmah a, Speaker-te zahtakna himhim omlou in paper leh document tuamtuam in deng ua, a table tanpha va sawiling zungzung ngam uhi. Hiai pen India adia a masapen ahi tuan kei. Manipur State Assembly Speaker’ Chair a zun vatha ngam hiahhiah leng om chidan khop hichin…!
Assembly Session ahihkeileh Parliament Session pen hun poimawh mahmah hi a, hiai hunah a kisaipih mipi palai (MP/MLA)-te a tel teitei ding uh ahi. A ziak ahihleh, mipi’ banah khua-le-tui vai a mipi’ poimawhte ngen genkhop a om hi a, member hunkhopte’n suanlam tuamtuam bawlin tellou sek uhi. Zan in Nagaland state a Hornbill festival tungtang editorial ah i gelh a, hiai hun a sum kizangkhia sum a crore a simte’ tungtang i gen ua, huai tawh kizawitawn thou in gen-le-hang, mipi palaite’n session aneih hun chiangun sitting/session allowances in sum tampipi lawhsek ua, kha 1/2 phialphial session aneih sungun sum a crore a sim mangthang a, hiaite pammaih mahmah hi. Parliament hall a kipawng sel, a topic/issue leng theiloupi a mahni party gupna ziaka kipawng kou in session hihbuai kichi bangleng member hunkhop a ding a tuattham ahi. Poi mahmah!
Member khenkhat-te taget lah mi’n thu poimawhtak a gen hun ua ihmu leh lusu a nak puak durdur mai, mi khenkhat in lah smart phone khoih a buaiden chih khawng hi a, tamtakte’n leng mite’ thugen ngaikhe danin om mahle uh ngaihdan chiangkuangtak (original idea) nei mawngmawng lou, kup ding leng theilou, a tutphah ua pawngtut mai chihkhawng om zel hi. Huchih lai in, session hunin Congress leader Rahul Gandhi, Sachin Pilot leh adangdangte hak kilkel ua, alanglam ah BJP leader Kiren Rijiju telin heutu tuamtuamte pilvangtak in om uhi.
Tutung Session ah GST bill tel a issue tuamtuam banah sum note sihsakna tungtang ah leng ruling leh opposition member tuamtuamte pau mahle uh mipi’ adia hamphat theihna ding a idea sekhia mipi palai (MP) mi tam hetlou uhi. Huai zaw thutuam lai, mipi’n muangtak a palai dia a telkhiak uh a hihnak ua leh amau leng chihtak a suah uh kisam a, mipi’ muanna zahzah tawh member-te’n ngaihdan a gente uh kumthei dia khuak a zat uh poimawh petmah hi. Tua dingin khangthak lehkhasiam-te i gam in poimawh mahmahta hi.
No comments:
Post a Comment