Manipur Express | December 5, 2016

HEADLINES:

India leh Bangladesh in Home Secretary level kihouna nei ding: 

Ni 2 sung kihouna ah ‘Terrorist douna’ agenda poimawh pen hiding

New Delhi, December-4: India leh Bangladesh in ni 2 sung daih di’n Home Secretary level kihouna December 5, 2016 apan in New Delhi ah nei nawn ding uh a, huai hun ah thuguk kipiaktuahna (intelligence sharing), gamgi kantan thilkham puaklutna (smuggling) banah a poimawh pen ding in gam 2 in terrorism douna a panlak khawm ding tungtang tel in thu tuamtuam genkhawm ding uhi.

Bangladesh leh India in New Delhi a zingchiang (Dec 5) a Home Secretary level kihouna a neihna ding uah Union Home Secretary Rajiv Mehrishi in India team-te makaih ding a, Bangladesh team ahihleh tulel a Bangladesh Home Secretary Mozammel Haque Khan in makaih ding hi. India leh Bangladesh in apaisa November, 2015 in Bangladesh a Dhaka khawpi ah Home Secretary level kihouna nanungpen nei uhi.

Tutung a kihouna ding ah gam 2 apan Home Ministry official-te’n tulel a India leh Bangladesh a dia terrorism group lauhuai leh gamsung a gamtangte leh siatna tun thei dingte suikhiakna leng nei ding uh a, terror group omte nasep leh panlak dan banah a kizoppih leh kantuahtute tanpha nounel tak in suikhawm ding uhi. India gamsung ah kha bangzahhiam paisa apan in Islamic State (IS) helpawlte sulnung muh theih om zeuhzeuh a, Bangladesh leh India gam a state khenkhat ah ‘Jegadi group’ kichi terrorist pawlte mulkimna bei in gamtang uhi. Bangladesh ah July 1, 2016 in terrorist group-te’n Hotel khat a  beihna uah gamdang mi khenkhat tel in mi 20 vel si uhi. Kihouna hun ah July 1 a thiltung leng genkha ding uh chih ahi. 

Gam 2 kal a gamgi kantan a damdawi khamtheih, huangvulh ganta leh galvan tuamtuam chihte tel in thilkham tuamtuam a sumdawnna/ puaklutna (smuggling) omte leng genkhawm in dalna dia panlakna omsa leh maban a panlak dingdan genkhawm ding uhi. Bangladesh in ‘most wanted criminals’ chih minvoh in Bangladesh mukhetu Sheikh Mujibur Rahman thahna a kigolhte matkhiak ding chiklaipeuh in awlmawh pen in nei hi.

Dhaka khawpi a July 1 a thiltung tawh kisai a Mumbai pansan Islamic Preacher Zakir Naik in gen-le-sak a neihte suizuina leng genkhawm ding uhi. Bangladesh a ‘Daily Star’ kichi newspaper in Zakir Naik’ thugen ziak a tuailai khenkhat terrorist nasepna a kihel dia hanthawn a om hidan a ngawhna a bawl ziak in India security agency in ngentel tak in enzui den uhi. Zakir Naik ahihleh tuma teng in Bangladesh a tuailaite’n naktak in ngaisang uh a, UK leh Canada gamte ah sahkhua dangte tung a huatna kampau a zatte ziak in ‘ban’ in om hi. Indian security agency in India pawlam a zinkhia Naik tungtang hoihtak a suizuina a patkhiak nung tunitan in a sulnung theihlouh in om a, India ah leng hongkiklou hidan a gen in om hi.

TUALSUNG:

UPF leh KNO makaite reception program omding

Lamka, Dec 4: Kuki Inpi Manipur leh Zomi Council makaih in Simveng a Simte Inn ah December 6, 2016 zinglam dak 11:00 in United Peoples Front (UPF) leh Kuki National Organisation (KNO) makai-te reception program omding hi. Hiai hun in Central govt., Manipur govt. leh UPF &KNO te’n Oct 19, 2016 a Delhi ah 2nd round tripartite talk a neih uh tawh kisai UPF leh KNO delegate te’n report peding uhi. Huai zawh in President, KNO leh Chairman, UPF te’n thugenna nei ding uh a, Joseph Lalrothang in vote of thanks gen in Upa Lalrinliana, President, Mizo Peoples Convention in UPF leh KNO makaite ading in Pathian kiang ah thumsakna leh itna ankuang landing hi.

Bhopal Eimi Society kiphutkhia

Lamka, Dec 4: Bhopal a Eimi omte’n kinaihsem, ki unausem ding leh maban ding khualna in zan in Bhopal Eimi Society (BES) kichi phutkhia uh a, makai ding leng guang uhi.

President- Lalkawl Gangte; Vice president- Chinsuanlam Zou; General Secretary.-Ngamboi Haokip; Joint Secretary- Puii Hmar; Finance Secretary- T.C. Minthang; Treasurer- Kikim Singson; Information Secretary- Lalboi Vaiphei  hi uh a, Adviser in Pr. Seikhomang Haokip guang uhi.

Civil Service Coaching Inititative ah mi tamtak lawhching

Lamka, Dec 4: Robin Hibu, IPS, Gangte Ngulkam, IFS, James Singsit, IRS leh Amstrong Pamei, IAS te’n NE student-te khualna in ALS, Delhi ah Civil Service Coaching Inititative kichi pankhia uh a, class X, XII leh BA/BSc result dungzui in online http:// www.indianmandarins.com tungtawn in selection bawl uhi. Coaching atel dingte caterogy 1 ah mi 10 kiang ah 100% Scholarship piak hiding uh a, huai lak ah Manipur apan Veijaneng Haokip leh Chingneimoi telkha uh a, midangte Mizoram apan 1, Nagaland apan 2, Sikkim apan 1, Meghalaya apan 1, Assam apan 1, Arunachal Pradesh apan 1 hi uhi. Category 2 ah 75% scholarship piak hiding uh a, mi 9 select lak ah Manipur apan 5, Arunachal Pradesh apan 4 telkha hi. Category 3; 50% scholarship piak ding mi 20 select hi uh a, Category 4; 25 % scholarship piak ding mi 50 select in om uhi.

2nd round ah Arunachal Pradesh state a ding in 100% scholarship piak ding mi 2, 75% scholarship piak ding mi 3, 50% scholarship piak ding mi 2, 25% scholarship piak ding mi 7 select in om uhi. Select ngah teng Dec 4, 2016 in IGP Robin Hibu, IPS, Nodal Officer for NE People office ah ki report ding uh a, December 5, 2016 in IAS coaching ah tel ding uh hi’n kigen hi. Civil Service Coaching Inititative in IAS coaching ah scholarship, 2017 ding in 87 lakh earmark uh a, 100% scholarship ngah te’n coaching a sending teng 1.80 lakh leng Civil Service Coaching Inititative in piaksak vek ding hi’n kigen hi.

63rd ESC Annual Council 2016 zou uh 

Lamka, Dec 4: Evangelical Synod Church (ESC) in Dec 1-4, 2016 sung Synod HQ Church, Chiengkawnpang ah 63rd Annual Council 2016 nei uh a, "Khawvak Chate bang in um un"  Ephesi 5:8 chih thupi zang in Rev K Siemlien, Rev Henkholien, Upa Thangkholien, Rev Khaitinthang te’n Pathian thugen uhi. Program sung in  Synod  HQ. Church, Bijang KKP, D Phailien KKP leh Bijang NSSU Choir te’n Pathian phatna lapawl sa uhi. Council Vaihawmna hun ah Upa Dr LS Gangte, Council Chairman in makaih a, 2017 ESC budget ding in Rs.1.75 crore passed uh a, 2017 thupi ding in “Krista Sika Palai” 2 Korinth 5:20 zat hiding hi.

      Tuni sun kikhop hun ah Council in kum 2015 a Pastor ding a  guan uh leh kum 1 sung Pro Pastor ding  a guan uh  P. Thanglalmuon leh Mangneihlal, Council lemsak pihna leh exam a passed ziak un Rev Thangkhosiem, Executive Director ESC in Pastor ding in ordination pia hi. Huaiban ah Council in Saptuam Upa mi 3- Upa Dongzakap, Upa Lulpi leh Upa Neihthang pahtawina pia uh a, tunitak biakna zawh in Rev Khaigin, Vice Chairman in Annual Council Khawmpi khak hi.

Blockade ziakin nasepna buai 

Lamka, Dec 4: Vungkhum Guite @ V. Guite, Special contractor in North Eastern Council (NEC) tungtawn in July 2nd week vel akipan Lamka Public ground puahphatna nasep pan a, NH-te ah Ecomomic blockade ziak in nasemtute’n haksatna thupitak tuak uhi. Lamka Public ground ah fencing nasepna 70% vel zawh hita a, VIP gallery nasepna akimkhat cement sungkhing ta uh a, akim khat mah cement suntheih ding in nasemtute’n sik (iron ) phanlel uhi. Himahleh Economic blockade ziak in cement hongtung theilou a, tua ziakin nasemtute dinkhawl hial ngai ding hi’n kigen hi. VIP gallery ah mi 5000 vel tuttheih ding hi’n kigen hi. Fencing leh VIP gallery zawhsiang ahihchiang in earth filling (ground levelling) nasep kipan ding hi’n kigen hi.

EBC Kumsim Khawmpi 68 veina omding

Lamka, Dec 4: New Lamka a Gospel Centenary Hall ah December 8-11, 2016 sung Evangelical Baptist Convention (EBC) Kumsim Khawpi 68 veina, 2016 omding a, “Diktatna a kilamthakna” chih thupi zang in Rev. Dr. Solomon Rongpi, General Secretary, Council of Baptist Churches in North East India in Pathian thugen ding hi. Upa M. Ginzalian, Khawmpi Chairman in Khawmpi hong  ding a, Bible Study ahihleh Rev. Kumam Suresh Singh, Asia Co-ordinator of Partners in Disciple International in makaih ding hi. Khawmpi sung in Khawmpi palai te’n Vaihawmna nei ding uh a, 2017-18 EBC budget ding Rs.16.5 crore genkhawm ding uh a, EBC Kumsim Khawmpi 69 veina a Ulian ding telding uhi. 

Rev S. Vung Minthang General Secretary EBC in Upa 50 leh Pastor 6 ordination peding a, Upa pension mi 31 kiang ah Pahtakna lai piak hiding uh a, EBC Worker Pension 6 kiang ah Meritorious Award piak hiding uhi. Dec 8, 2016 zinglam dak 10:30 in Dorcas Hall ah palai minkhumna omding a, Dec 11, 2016 nitak in Upa Lalthanghlun Guite, Khawmpi Vice Chairman in Khawmpi khak ding hi.

Mi 5 Upa Ordination pia

Lamka, Dec 4: IB Road a Presbyterian Biakinn ah Tuithaphai Presbytery in vaihawmna Khawmpi 69-veina December 1, 2016 nitak apan nei uh a, Upa PH Lalrinthang, Upa Lalthankhuma leh Upa Lalramhluna te’n Pathian  thugen uhi.  

Vaihawmna Khawmpi ah Pastor bial 7–Lamka, Kawnpui, Saikawt, Imphal, Raengzeng, Koirengei leh Leimaram Presbytery apan palai 200 val paikhawm te’n 2016-17 sung a budget dia kiguang Rs. 2.95 crores val pom uhi. 

      Tuni zing biakna a Ordination Service hun ah Rev.Lalthantluanga, Moderator in Upa ding in mi 5- Angouba Pamei, s/o  Dinsinglung Pamei of Thanggal; Lalbiaktluanga s/o (late) Upa Rallianzuala, Lamka; B. Lalramsanga s/o Upa B. Tlangthanga, Lamka; Lalramliana s/o (late) C. Lalhmingliana, Khawpuibung; Lalngaihawma s/o (late) Hrangsanga, Moreh ordination pia  hi.

Financial Literacy Awareness

Lamka, Dec 4: Rural Enhancement Foundation te’n NABARAD panpihna zang in tuni tunnung in Teising Community Hall ah Financial Literacy Awareness Camp sai uh a, Pastor Hemkam, Local Pastor AG Church, Teiseng in thumna in program hong hi.

Huai hun ah Jamginmuan Guite, ADO, LIC/CCpur, Joy Singh, LIC Expert leh Jangkhongam, Asst. Manger, SBI/Tuibuong te’n Financial planning & budgeting family, income/expenditure, basics of saving, money transfer concerpt, basics of credit & interest, RuPay credits & debit card, schemes of PMJDY, APY, importance of social security & schemes chih thupi zang in sinsak uh a, khawmi 50 val tel uh hi’n kigen hi.

Zawlbuk FC in mun 5 veh

Lamka, Dec-4: Zawlbuk FC (Rengkai) member-te’n tuni sunnung lam in Lamka khawpi sung mun 5  a tagah kepna veh uhi. Amau pawlin Christmas Gift neih dia thupukna abawl dungzui un “Zawlbuk FC for Orphan (Jehova Jireh)” chih thupi zang uh a, Sang Ga Muon Inn, Bijang; Vondei Saulim, Zomi Colony;  Only Grace, New Lamka; Salvation Army Motherless Baby Home, Muolvaiphei leh NECA, Rengkai a tagah naupangte lakah muamkhum, anntang, dal, machi leh thil tuamtuam pia uhi.

‘Seminar on Christian Ethics’ 

Lamka, Dec-4: BCD Moria Pearsonmun a Junior, Intermediate leh Senior pawlte adi’n tuni sunma dak 10:30 apan Sunday School ah ‘Seminar on Christian Ethics’ nei uhi. Huai hunah Upa H. Thuamminthang in naupang huna gamtat-khawhei leh kampau kilawm zat apoimawhnate sinsak a, saptuam sung ah piching a lut nailoute’n omdan a zuihte uh apichin hun ua khahsuah lou ahihman un, naupang lai apan Christian gindan tawh kituak omdan neih poimawh chi in sinsak hi. Christian hinkhua ah thildangte sang in Bible tawh ki etkak poimawh pen ahihdan leng Upa H. Thuamminthang in gen a, lawm-le-vual leh mihinpihte’ omdan tawh ki-tehkakna ah Pathian deihlouh lam zuih khak baihlam mahmah chi in, naupang hun apan Pathian deihdan zui a hinkhua hoih neite lawhching ngeingei uh ahihdan sinsakna pia hi.

STATE THUTHANG:

DM/Tml in 144 CrPc puang

Imphal, Dec-4: Tamenglong District Administration in zan akipan thuthak om masiah Tupul leh Tatbung kikal ah NH-37 in a tawtkhakna mun teng  kimkot metre 50 huamsung ah 144 CrPc puang hi. Tamenglong District Magistrate M. Luikham in UNC-te economic blockade bawl suanlam in thil hoihlou bawl sawm om ziak a muanna leh bitna etkaina banah van poimawh tuamtuam pawte’n  buaina tuahlouhna ding ua 144 CrPc puan a om hi’n kigen a, mi 5  sang a tamzaw omkhawm phal hilou a, hiam hei leh galvan, chiangpum tawi kuamah om theilou ding a, muanna leh bitna kepbitna ding a duty police leh para military-te bel khakkhol hiding in thusuak in gen hi.

Cong Leader leh Worker-te’n SHDP zom

Sadar Hills, Dec-4: Sadar Hills thubuai tawh kisai a Kangpokpi Block a Congress Leader leh Worker te’n Congress party ah kitawpna a piak nungun Sadar Hills Democratic Party zom uh hi’n kigen hi. Akigendan in Haokholal Hangshing, Chairman, ADC Sadar Hills Office chamber ah Dec 2, 2016 in joint meeting om a, huai ah Kangpokpi Block Congress te’n SHDP zom uhi. 

Haokholal Hangshing in Kangpokpi Block Congress a Leader leh Worker-te vaidawnna hun ah SHDP ah kigawm khawm dia thutanna abawl uh thupukna dik chi a, SHDP ahihleh Independent Political party ahih dungzui in National, regional leh state political party-te tawh kizopna neilou chi hi. Member thak-te tawh Sadar Hills mipi vangphatna dia party principle leh ethics zui in deihsaktuam leh khentuam neilou a panla khawm ding in gen a, SHDC te’n Sadar Hills thubuai tawh kisai a dal zawhlouh thil a tungma a state govt. in panla kin ding in leng ngetna bawl hi.

Dakkal 72 sung a blockade call-off ding ngen 

Imphal, Dec-4: United Club Manipur te’n mipi deihna bang in United Naga Council (UNC) te’n dakkal 72 sung  Economic blockade pailel call-off ding in ngetna bawl uh a, thil deih huailou a tun nawnlouhna dia UNC apan dawnna hoihtak lam-en uh hi’n kigen hi. Huai tawh kisai in UCM office ah tunitaklam in press conference om a, huai ah Elangbam Johnson, President, UCM in UNC blockade ziak in phaizang leh singtanggam a mipi’n haksatna a tuahte uh taklang ua, hunbikhiah sung a blockade pailel zukkik ahih keileh mipi tawh pangkhawm in a poimawh bang a panla ding uh chi hi. Aman agenzelna ah UNC in UCM ngetna zahtak ding leh ahoihlam a dawngthukna lam en uh a, himaleh govt. daitak a omlou ding leh election politics khawlsan a stake holder teng tawh kihouna nei ding in leng ngetna bawl uhi.

Principal ngawhna nial

Imphal, Dec-4:Lilong Haoreibi College Students’ Union (LHCSU) te’n LHCSU General Secretary in College principal apan Rs. 1.5 lakh lakhia hi’n electronic leh print media tuamtuam ah kisuah tawh kisai in mawhpaih thupuang uh a, huai thu tawh kisai in tuni’n Manipur Press Club ah press conference om hi. Huai ah Makakmayum Awesh Karmi, Gen. Secy., LHCSU in media-te tawh kimuhna hun ah College Principal tungah ngawhna a bawl thuzuau leh pansan bei chi a, Principal in sum lakhia ahihdan a chet (proof) theih leh Union apan kitawp ding chi hi. Aman agenzelna ah College Principal in atanau banah mi khenkhat nung thuapna in College paidan khen lamdang sawm a, Union a Finance Secy. Md. Sulpha in Gen. Secy. theihpihna tellou in thusuah ana bawl hi. Hiai tungtang  State Education Department in enkai ding leh media house te’n leng tua thubuai tawh kisai thilte Gen. Secy theihpihna tellou a suah khe lou ding in leng ngetna bawl hi.

Counter blockade khauhsak sem

Imphal, Dec-4: United Naga Council (UNC) te’n Nov 1, 2016 apan National Highway teng ah indefinite economic blockade a bawl uh kha 1 valta a, pawl tuamtuam apan blockade khawlsak ding in ngetna om a, phaizang gam a mun tuamtuam ah blockade thukkikna in counter blockade khauhsak sem uh a, hills district ah puaklut ding van tuamtuam kaih khiak banah suksiat sak uh hi’n kigen hi. Kakching police te’n zan nitak in counter blockade bawl mi 9 man in Kakching police station tun uh a, huai thu tawh kisai theih khiak nung in mipi thangpai kipunkhawm te’n zan nitak dak 11:00 velin Kakching Police Station luh in mi 9-te khahkhiak ding phut uhi. Hun bangtan hiam nung a Police te’n buaina sousang khak ding venna in thunung-thuma omlou in mi 9-te khahkhia uhi. Thiltung tawh kisai in Kakching mipi’n police-te panlakna kipahpih uh a, himahleh Manipur a om teng subuai banah nek-leh- tak tuamtuam pua gari hihsia blockade bawlte tungah bangmah lawh lou in counter blockade bawlte a matkhiak uh tawh kisai a thangpai hi’n gen uhi. 

Thoubal district a Kakching Keithel ah dawr bawlte leh van zuak nupite’n UNC economic blockade leh govt. in thubuai a suk veng theihlouh mawhpaihna in tuni zinglam dak 11:00 apan nitaklam dak 3:00 tan sumsinna inn leh dawr teng khak in sit-in-protest nei uh a, huai hun velin Kakching Lamkhai ah volunteer kipun khawm te’n Chandel district ah puaklut ding gari apan nek-leh-tak telin van tuamtuam kaihkhiak sak in lampi lai ah thehzak sak uh a, himahleh gari-te bel bangmah chihlou uhi. Huailou in Jiribam ah leng mipi thangpaite’n zinglam dak 8:30 velin Pangal Tabi Babupara leh Chandrapur mun ah security escort ngak a om truck-te vanpuak kai khia in hal uh a, Truck driver te’n van kipua-te Imphal ah puaklut ding ziak a hallou ding in ngen mahle uh mipi thangpai te’n ngaihsak lou uh chi’n gen uhi. Khurai ah leng mipi kipun khawm te’n Ukhrul district ah lut ding gari-te khawlsak in nek theih banah nek-leh-tak tuamtuam a muhkhiakte uh laksak uh a, Mini truck khat in van a puakte hentang uh a, himahleh Ukhrul district a security force-te a ding ahihdan Army-te theihsak nung a khahkhia uhi. NH-37 in a tawt khak Takyel leh Moidangpok kikal ah leng counter blockade supporter te’n gari apan van tuamtuam kaikhia in halsiat sak uh hi’n kigen hi.

STDC te’n Dec 6 in dakkal 1 sung kiphinna nei ding 

Imphal, Dec-4: Mutum Churamani, Convenor, Co-ordinating Body Schedule Tribe Demand Committee for Meetei/Meitei in tuni a media-te tawh kimuhna hun ah Chief Minister O. Ibobi in India Constitution nuai a Schedule Tribe list ah Meitei/Meetei-te telsak hilou hiam chih thu tawh kisai a report thon ding chiam mahleh a sepkhiak louh ziak in nial a, valley district tuamtuam ah Keithel nupi te’n December 6, 2016 zinglam dak 11:00 sun dak 12:00 tan protest rally nei ding uh a, huai hun ah gari taite khawlsak hiding a, Keithel nupi tuamtuam te’n leng ST demand committee-te gupthu puang uh chi hi. Union Ministry of Home Affairs ngetna dungzui a state govt. in Meitei/Meetei-te socio economic condition leh Ethnography thon ding in STDC te’n ngen uh a, himahleh state govt. lam apan panlakna omlou a, STDC te’n Nov 28, 2016 in Chief Minister kimuhpih uh a, huai hun ah CM in ni 5 sung a cabinet/CLP meeting sam ding leh agenda a ST category lakah Meitei/Meetei omsak ding tungtang telsak ding in theisak uh a, hiai tungtang ah Chief Minister a daih lai leh kiphina tuamtuam pan ding uh hi’n leng taklang hi.

Court in gam thubai tawh kisai a thudik thei

Sadar Hills, Dec-4: Kuki Inpi Sadar Hills leh Sadar Hills a Civil Society Orgn. tuamtuam te’n Koutruk leh L. Tangnaum village gamgi thubuai tawh kisai in pawl tamzaw deihna bang in kigolh uh a, L. Tangnaum Village Authority te’n ngetna a bawl dungzui in Koutruk leh L. Tangnaum village gamgi thubuai om na mun ah National Sports University (NSU) bawlna dia mun piakna mun zan in Kuki Inpi Sadar Hills, KSO telin CSO Sadar Hills te’n enkhia uh a, huai hun ah a kim leh kiang a khaw hausate tawh kihouna banah official document telin ground report kaikhawm uhi. Huai tawh kisai a Kuki Inpi Sadar Hills a Gen. Secy banah CSO Sadar Hills a Convener Secy. N. Sehjalien Gangte in akim a khaw hausate tawh kihouna banah official document dungzui leh official sketch map tungtawn in NSU bawlna ding mun dan tawh kituak in L. Tangnaum gam hi a, huaiziak in thubuai nang omlou chi hi. 

Record tuamtuam suizuina a gam thubuai tawh kisai a thil muhkhiakna lakah Chief Commissioner Manipur in Aug 7, 1953 ni a Court order thusuah taklat dan in Mr. Gimson in Dec 6, 1920 a thupiak a bawlna ah Koutruk village in tulel a Laipham leh a kim a sing puna mun tan huam a, himahleh singnou kisuan thakte huamkha lou chi’n taklang a, R.P. Bhargava, Chief Commissioner lui banah DC in Cril. Appeal Case no. 52 of 1952 tawh kisai a thusuah a bawlna ah Koutruk Village-te a ding in tulel a Laipham, Ishailok a Laiphal east a sing pouna tan leh Laiharaoba zatna dia Laipham apan Haraoching peak paina ding lampi lianlou phalsak chi hi. Hiai tungtang ah state govt. a daih ziak in thubuai om hi’n ngawhna bawl a, Govt. in Court thupiak zui hileh thubuai omlou ding a, Koutruk leh a kim a CSO telin State govt. leh BJP te’n Court thupiak ngai poimawh ding in ngetna bawl uhi. National Sport University bawlkhiak ding dal lou uh a, himahleh gam piak khiakna tawh kisai a thubuai suk veng masak ding hi a, Kuki Inpi leh CSO Sadar Hills te’n kituahna omna ding in L. Tangnaum huamkhakna sung ah Koutruk Village leh akisaipih thuneite’n a kintheipen a welcome banner lakhe ding in leng ngetna bawl uhi.

TUNI THUPI:

“A na uh a sepsakte chi uh leng ka ngaihtuah ding: huchiin, huai khit chiangin sum tampi nei in a hongpawt ding uhi.” – Genesis 15:14

EDITORIAL:

Manipur leh sum

Govt. employee te’ lawh lutlou!

India gamsung ah azawngpen leh ahaupen-te houlimna ‘Demonetisation’ thu mah hi a, hiai thu mah parliamentary debate a issue hot pen leng ahi. India a state tuamtuam inleng sum-le-pai a haksatna hichikhop atuah patna uh hidingin kigen a, ahihziakin India a state 29-te lakah Manipur state tuk a buai om dingin gintakhuai lou hi. National capital New Delhi ah ahihleh Chief  Minister Arvind Kejriwal in sum lui-te zattheih a chih ziakin buaina tuak tawm uh kichi a, bank in mipi lakah sum note thak pekhe vaklou uh chih ahi. Thil omdan i etchiang in BJP leh a kizoppihte’ vaihawmna (ruled state) te ah sum note sihsakna thupi diak a, himahleh, BJP vaihawm louhna state-te ah sum note luite  paithou lai in kibanga, himahleh, Congress vaihawmna Manipur state buai diak se bang hi. Thil bangkim ah Manipur state ah lauhthawngna kichi mipi lakah om baih diak banga, khemleng i khemnop tuanse uhi. Kum masa deuhin chi (salt) haksa ding chih zuauthu hong kithanga, nikhat/ni 2 thu in chi ser ah Rs 100/- phialphial in alom-atang in i lei uhi. 

“I promise to pay the bearer a sum of…” chih sum note lui leh thakte ah gelhin om tuak veve a, hiai pen promissory notes/legal tender notes teng ah gelhin om a, Bank of England te’ gelhdan copy ihi lim uhi. Government in thakhat thu a sum note hon sihsak in mipi kiguihsak a, gamsung pumpi adingin buaina khawktak tun a, himahleh, Manipur state ah sum haksatna uang diak kholse hi. Bangziak hiding hiam? State Assembly election anaih ziaka Manipur a kigawtna om diakse adiam chih tanpha hon ngaihtuahsak a, Assembly election neihna ding mun state dang 4-te ah issue dangin buaina khenkhat om mahleh sum note sih tungtanga buaina thupi lawzen gending omlou banga, huai kawmkalah, propaganda tuamtuam leng in sum note luite hal, mi hiaizah in sih lawh chihte khawng hilel a, a taktak a mipi’n ei lak a bang haksatna tuak ding un ngaihsut haksa a, Centre government in Reserve Bank of India (RBI) tungtawna Congress ruled state Manipur hon gawt utse uh hiam chih ngaihdan piangthei khat om hi.

Law and IT Minister Ravi Shankar Prasad leh Union Power Minister Piyush Goyal te’n Rajya Sabha ah kallui in RBI in sum note lui sihsak a athak bawl ding a chih uh Government in lemsakna pia hizaw chi ua, ahihziakin, Government in a minsiat ding uh alauh ziak uh leh mipi’ kiphinna a sousan semding lauhthawngna aneih ziak ua ‘scape goat’ dan a RBI hon zang uh hiam chih mi tamtak ngaihdan leng hidingin ngaihsut huai hi. A ziak ahihleh, RBI Governor in hiai tungthu ah paukam azatlam zak hilou a, centre government makaite pau uh a, sum thu abiktakin currency tungtang ahih chiangin apaukhetu ding pen RBI apan hi masa sek tangpi uhi.

Manipur dinmun mah genlai ni. Manipur government in tu in anuai ua sem (salaried class/govt employee) te lawh pethei ding dinmun ah omlou uhi. RBI apan sum kiningching hongtun louh ziak hia, ahihkeileh a lawh-te uh deposit hileleng, Banks leh ATM-te ah a kha lawh laksawm zah uh employee te’n lakhia (withdraw) thei tuan ding un gintakhuai lou hi. Bank hunkhop in ahihleh RBI ngawh ua, sum kiningching kingahlou ahi chi uhi. Newspaper te ah sum hongtun chiangun RBI apan Manipur in Rs 200 crore, Rs 50 crore etc.etc a ngahdan uh itaklang zel ua, hiai sumte thakhat-thu a beipah zel mah adiam? Ngaihdan dangkhat ah a chethei politician/contractor leh Bureaucrat-te’n amau sum a lakh/crore a sim ana guk khenthei uh hiam chih bang om thei ding in ei mimawl ngaihtuahna ah om thei hi. 

Zanzek mahmah in SBI Leimakhong Branch leh MU/Canchipur Branch banah mun khenkhat ah leng buaithei dinmun a a omna hunkhop om chih ahi. A chetheite’n Rs 20,000 alakkhiak theihlai ua, zankhaw vak a ngak mipi’n Rs 2000 khawnglel la thei chih hizel hi.

Tutung a hiai sum sihsakna tawh kisai ahoihlam agenin mi tamtakin ana hamphatpih leng i om kha thei hi. A ziak ahihleh, Lamka khawpi sung ngeiah ah sum note lui leh athakte a percent nei a khengtuah a kivei bangleng hunkhop om hi. Rs 1000 note luite 100 note ngen Rs 700 a kheng, Rs 500 note luite Rs 100 note ngen 3 a kheng chih khawnga business ana bawlman bang ki om a, tua chauh lou in bank mai a zan khawvak a queue ading  dia Rs 500 lawh dia mi guai chih leng om a, mi genthei tamtak adingin sum muhna kong a kihon na khat leng bang hi. Tua chauh hilou in bank staff khenkhat-te’n kipahman/singpi dawnman ding (chathakna ba) hunkhop a muh lawhna leng ahikha mawhna! 

Government leh private sector tuamtuam a employee te’ adingin haksatna tun chih haihvual ahinawn kei a, amaute’n a sumte uh market ah hon thehzak louh chiangun huai in bazar nupite leh niteng nektawm zong tuamtuamte nakpitakin dengkha zel hi. All Manipur Bank Employees Association in bel Manipur state govt in Rs 100 note leh aniam zaw denomination notes te Manipur state adingin koihkhiak ahi chi ua, huchi ahihleh bangziaka kidaihlou? Bank khenkhat te’n a lomlom a percent nei a sum nen khengsaktute’ kiangah ana pekhe pawl om adiam chih leng om thei a, ki muanmawhna gam ngen ah ki om abang hi. 

Huai kawmkalah, Manipur state in ahun hunin pensioner leh state govt employee-te’ lawh pezou vang mahmah ua, huai kawmkalah, MGEL kichi buaipih mahmah in om a, tu in election kuan ahihziak leng ahi ding a state govt in tulai in recruitment hon bawl zungzung ua, himahleh, lawh apezou na ding uam chih theih haksa mahmah a, MGEL neilousa employee adim-aha in omlai zawmah hi. Alehlam ah, sum note thubuai thu hong ompen state govt adia vualzawlna hong hi maithei hi.