Manipur Express | December 6, 2016

HEADLINES:

Venkaiah Naidu in Jayalalitha dinmun PM Modi zasak

Chennai a Apollo hospital ah Tamil Nadu Chief Minister Jayalalithaa sihsual in om

Chennai, Dec-5: Tamil Nadu Assembly election May 2016 a AIDMK ticket a telching a om Chief Minister Jayalalitha (68) dinmun thuchian diktak tunitak dak 11 tan inleng theih hilou hi. Pathianni paita nitaklam in lungtang natna (cardiac arrest) ziak in Chennai a Apollo Hospitals ah puaklut in om a, Hospital Executive Director Sangita Reddy in si thei dinmun a om in ICU ah life support system piak a om hidan in gen  hi. 

Hospital thuneitute’n nitak dak 6.08 vel a statement a suahkhiak pansan in, amah etkolna Hospital ah ruling AIADMK party MLA teng kisamkhawm in a thakhengtu dia O. Panneerselvam guan ding a lemsakna suaikaih sawm uhi. Chennai khawpi sung teng Jayalalitha damlouhna ziak a husa a nasat luat ziak in ruling party MLA te’n nitak sawt nung in a meeting ding uh postponed thak uhi. Tamil news channel tuamtuam in Jalayalalitha si hi’n puang uh a, Apollo hospital official thusuak in ahihleh damlai hi’n gen uhi.    

Tuni zingsang apan Tamil Nadu CM damlouhna ziak a state sung nuselou Union Minister banah AIADMK Chief M Venkaiah Naidu in hospital a damlou enkaitu doctor-te kimuhpih a, nitak dak 8.00 vel in kum 68 a upa Jayalalitha si guih thei dinmun a om ahihdan Prime Minister Narendra Modi kiang ah hilhsawn hi. Nitak dak 10.30 vel in a dinmun nengkha hoihzaw dan in ruling party thupuangtu in gen a, huchih lai mah in specialist team-te’n enkol den uh hi’n thusuak in taklang hi.   

Jayalalitha enkol dia London apan specialist banah AIIMS apan sawl a om doctor/specialist minthang deuhte lak ah Pulmonologist Dr G C Khilnani, Anaesthetist Dr Anjan Trikha, Cardiac Surgeon Dr Sachin Talwar leh Cardiologist Dr Rajiv Narang leng tel uhi. Jayalalitha dinmun diktak thei nop ziak in  tuni’n Chennai state sung a dan-le-thupiak dinmun lauthawnghuai khop in om a, tuni’n Karnataka State Road Transport in Tamil Nadu leh Karnataka state kawmtuah Bus- 470 vel khawlsak a, private gari-te leng TN state ah lut ngamlou uhi. Jayalalitha damlouhna kim ah venbitna hihkhauh in om a,  IG nih makaih in police tamtak in damdawi inn veng uhi. Union Minister for Information and Broadcasting Venkaiah Naidu in Apollo hospital ah Jayalalitha ve veh a, BJP Chief Amit Shah inleng veh ding hidan in gen hi. Jayalalitha damlouh ziakin banghiam thiltung om ding lauh ziakin security hihkhauh in om a, school  tel in sumsinna innte leh sumbuk te khak in om hi. 

Jayalalitha ahihleh February 24,1948 in Melukote (Karnataka) ah Jayaram leh Vedavalli-te nupa kal a goutan khat in piangkhia hi.  Kum 1984 apan MLA dia telching a om in 1991 in khatveina di’n Tamil Nadu Chief Minister len hi. Kum 2014 in Disproportionate Assets case ah mat a om in Banglaore a special court in Rs. 100 cr a liausak banah kum 4 sung suangkulh ah khum in om hi. May 2016 in CM dinmun len nawn a, MLA dia telching ahih hun in a kibeihpih DMK candidate tawh vote 39,545 in kikhia uhi. MLA a chin zawh phet a thugenna aneihna ah party 10 in pangkhawm in hon kalh mahle uh party dang kizoppih nei tuanlou leh Pathian a ginna kia a kinga ahihdan gen a, bial mite tawh pangkhawm a kizopna bawl hizaw hi’n gen hi. Bial mipite’n a muan bang ua aman leng mipite tung a muanna nga hi’n Jayalalitha in gen hi.

TUALSUNG:

DC/CCpur in NEISDF office leh trg. centre ding hong

Lamka, Dec- 5: North East India adia masapen di’n tuni zinglam in Hiangtam Lamka a Mualveng ah North East India Skill Dev. Foundation (NEISDF) office leh training centre ding honna om a, Chief Guest in DC/CCpur Lunminthang Haokip, IAS pangin honga, Rev. Dr. Kh. Khaizakham in Pathian kiangah lan hi. Special guest ah CEO/CCpur Soiminlian Lengen, MCS leh Hiangtam Lamka hausa Thangkhosuanmung Guite, EM/ADCC hihna tawh a uap ban uah Student Org. tuamtuam a makaite kihel uhi.

Lianzalal Vaiphei, Founder in NEISDF kipatkhiatdan gen a, aman Non-Govt. social service orgn. ahihdan gen in, 2015 kum a dinkhiak hi a, gamsung tawh kituak a nekmuh lam a khantouhna om ding tupna a kipankhia hidan in gen hi. NE India ah rural entrepreneurship leh employability skills dev. training orgn. hoihpen hihsak ding tup anei ahihna ah tuailaite lak ah amau lunglutna leh hihtheihna tawh kituak course tuamtuam 130 vel athawn in sinsak hiding uh hi’n gen hi. Kum 2020 tan in khawvel in nasemtu million 40 poimawh ding a, hiai hih buching thei ding India leh China kia ahihdan gen in, India in China sanga nasemtu tamzaw aneih theihna dia Ministry of Skill Dev etkaina nuai ah training centre patkhiak hidan inleng gen hi.

DC/CCpur in entrepreneurship omlou in gamsung ah khantouhna taktak om theilou ding ahihna ah tuailaite’n skill development lam naktaka a paipih poimawh ahihdan genkawm in hiai tungtawn a tamtak in lawhchinna angah deihsakthu gen hi.  CCpur district ah tuailai sepding theilou atam luat ziakin gamsung ah siatna tuamtuam pung ahihdan gen in,  skill development lam hahbawl leng mite etlah leh India adia kisaktheihpih district hithei ahi chi’n gen hi.

Soiminlian Lenggen in dist. ah industry tuamtuam om leh gamsunga ah tuailai tamtak in phattuampih in district leng tuasang in khangtou zaw ding hi’n gen hi. NDA govt. in ‘make in India’ policy apatkhiak ilap zawh keileh gamsung ah khantouhna in hon taisan ding chi’n leng gen hi.  NEISDF in course masapen din computer hardware training pan ding uh a, register bawl tutan in mi 63 om in amaute morning leh evening shift akhen in sinsak hiding uh a, Dec. 8, 2016 in class kipan ding hi’n kigen hi.

Capping Ceremony om

Lamka, Dec-5: Rakesh Balwal, IPS, SP/CCpur makaih in Tuibuong a SP’s office ah tuni sunnung in Capping Ceremony of  Head Constable of  Police (Male/Civil) om a, Police officer-te, Constable apan Head Constable a promotion thak sungkuan te’n uap uhi. SP in promotion muh hun in nasep ding leh mawhpuakna leng kibehlap a, Churachandpur District ah Police Constable apan Head Constable a promotion muthak mi 69 te’n amohpuakna uh kuhkal, chitak leh gin-omtaka semsuah ding in hanthawn kawm in kipahpihthu gen hi. SP, CDPO 2-te, Officer incharge-te leh Sub Inspector bangzahhiam in promotion thakte rank pia uh a, Churachandpur District ah Constable apan Head Constable a promotion thak mi 69 lak ah  mi 66 telthei uhi.

ZOFEST a tel dingte khakhia

Lamka, Dec-5: Joseph Lalrothang, President, Hmar Inpui in tuzing in Hmuia Veng a YMA Hall ah ZOFEST, 2016 atelding-te khakhia (flag-off) a, CV Duhawma, President Group Young Mizo Assn. Manipur in Pathian kiang ah thumsak hi. ZOFEST 2016 ahihleh December 6-8, 2016 sung Zokhawthar, Champhai District, Mizoram ah zat hiding a, huai atel ding in Lamka apan MZP (M) makaih in ZSF, KSO, TKSU, Zillai, ZSP, KZP, TCSA makaite mi 80 vel Tata Sumo 8 zang in Mizoram zuan uhi. SSPP Jt. HQ Aizawl makaite tel ding ziakin SSPP GHQ makaite tellou uh a, HSA GHQ makai te’n tuni’n Aizawl zuan uh hi’n kigen hi. ZOFEST sung in Student Organisation a President teng in thugenna neiding uh a, Costume Parade ah telvek ding ban uah Kuki Cultural Troupe te’n cultural show ding uhi. ZOFEST 2016 hun ah Chief Guest in Mizoram CM Lalthanhawla; C. Ngunlianchunga, Minister of  State Mizoram leh Lalrinmawia Ralte, Minister of State, Mizoram hiding a, Chief Host in Zohmingthanga Zote leh Sabina Lalnunsiami hiding hi. Chuest of Honour in Joseph Lalhimpuia, Parliamentary Secretary, Mizoram hiding hi.

Jail ah Jeptha Famhoite koih

Lamka, Dec-5: Police te’n tuni’n CJM court ah Jeptha Famhoite (22) s/o Lalremruot of Saikot, Kanan Veng pawkhia uh a, court thupiak bang in Police te’n Jail ah koih uhi. Jeptha Famhoite bel Diesel Auto (No.MN 02A-3498) driver hi a, November 26, 2016 nitaklam dak 4:45 velin HQ Belam Veng a paiding student 2 pua in New Lamka lam ah taisuakpih a, student 2 te auto apan tawmkhia in New Lamka khawsung ah matkhiat in om a, Police te’n FIR No.57(11)2016 CCP-PS U/S 365/511 IPC registered uhi.

Huaiban ah Oct 13, 2016 nitaklam dak 4:20 vel a Red Cross road apan kumchinglou student 3 Auto atuang driver in kidnap sawm in Tuibuong lam ah taipih a, student te’auto apan tawmkhia uhi. Police te’n Auto driver matkhiat sawm in hunsawttak abuaipih nung un FIR No.50(10)2016 CCP-PS U/S 365 IPC tungtawn in Dec 2, 2016 in Jeptha Famhoihte mat hinawn hi’n Police apan kiza hi.

Sum thu ah ngen kawm in vau

Lamka, Dec-5: The Zo People for Human Rights and Empowerment, Manipur a Publicity Lamsianman in tulai a sum Rs.500 leh Rs.1000 note hihbeina ziaka mipi haksatna tuahlai a Bank nasemtute leh commission delh a mi subuaite’n tawpsan ding in ngetna leh vauna (warning) bawl hi. Maban ah RBI in inquiry aneih chiang in Lamka sung a bank nasemtute leh minautang sum deih man a genchian theiloupi a sum tampipi bank account a deposit bawlte Income Tax Deptt te’n amatlouhna ding ua pilvang ding in ngen hi.

        Aman ataklatna ah ei leh ei kal ah pitek-putek pension lading leh gamdang a tanau-te sum thawtte lakkhiat sawm a, phalbi khawvawt nuai a zan giakte thu tawh kisai tuni sunnung in Khamchinpau Zou @ K. Zou in UBI, SBI etc vehna nei in mipi tawh kihouna nei hi. Mipi’ haksatna atheih in bank sung a thil omdan enchian hi. SBI Chief Manager in Counter 6 ading chimahleh counter 3 kia ah na kisem hi’n taklang hi. Sum haksa mahleh mipi zanhak hial a bank ah sum lakkhiat nang thu omlou ahihdan gen a, Coupon kipe chiat a, huai dungzui in sum kilakhia hileh buaina ding omlou hi’n gen hi. ATM ah leng sum atamthei lam kikoih a, himahleh mipi’n atamthei pen in sum lakkhiat ding leh deposit ding kia ngaihtuah uh hi’n Chief  Manager, SBI/CCpur in K. Zou theisak hi’n taklang hi.

       UBI ah leng mi tam mahmah in atamzaw numei hi uh a, mi khenkhat nitak dak 11:00 vel apan bank a sum lakhe ding a kivual uh hi’n taklang hi. UBI step (kaibi) ah nupi hon dingdim in kuaman lampi awnlou uh a, UBI kongkhak akikhak ziak in asung ah K. Zou luttheilou hi’n taklang hi.

      Huaiziak in Khamchinpau @ K. Zou in bangchidan a District thuneitu DC leh concern Sub-Divisional Magistrate te’n tutan ‘on the spot observation’ bawllou uh hiam? chi’n pawisakthu taklang a, akinthei pen a mipi’ leh Bank-te haksatna bang pentak hiam chih kanchian ding in ngetna bawl hi.

Khengjang power house ah shutdown omding

Lamka, Dec-5: MSPCL/Electricity Deptt. CCPur Divn. te’n 132-KV Line Khengjang leh Thanlon kikal ah electric gui (wire) kaih ding ziak in December 6, 2016 zing dak 6:00 apan nitaklam dak 5:00 kikal shutdown la uh a, nasep zawhhak leh zawhbaih in shutdown hun kikhek thei hi’n MSPCL/Electricity Deptt.,CCpur Divn. apan kiza hi. Shutdown hun sung in area/locality/transformer shutdown dingte 1). 33-KV Feeder to New Lamka- New Lamka leh Singngat power house in electric meivak apiakna teng, 2). 33-KV Feeder to Thingkeu- Thingkeu, Thanlon, Pherzawl & Sinzawl power te'n mei a piak na khua teng, 3). 11-KV IB Feeder- Tuibuong, Bijang, Doordarshan, AIR, Munsif Court, DM Veng, B. Vengnom, Bijang, Sielmat, Zomi Colony, Zellang Veng, District Headquarter, District Hospital, Community Hall, Chiengkawnpang, CCpur College, Microwave Tower, 7 Assam Rifles, Salem Veng, Cetral Lamka, etc. hiding hi.

Bank leh ATM ah mi kiam tuanlou

Lamka, Dec- 5: NDA Govt. in gamsung ah nekgukna leh sumlem hihbeina dia sum note sangpen Rs. 1000/- leh 500/- hihbei in Rs. 2000/- leh 500/- note thak bawl a, huai in gamsung mipi naktak in buaisak hi. CCpur dist. ah bank tuamtuam ah niteng in sum lakhia leh koih ut tamthei mahmah a, Nov. 10, 2016 akipan tutan in bank a hoh mipi’n kiamlam nawt nailou in uang deuhdeuh dingin kilang hi. Dec. 2 nitak apan ATM booth tuamtuamte kihong in sum koih hi a, sun leh zan in kivual ding omzou ban ah Bank-te ah leng mi kiam tuanlou a, amasa hihsawm in khenkhat zan khawvak in bank mai ah zanhak pawl om hi’n kigen a, sum draw ut tamtak thawnkik zel leng om hi’n leng kigen hi. 

  ATM booth-te ah khatvei in Rs. 2,000/- tan lakkhiak theih ahihziakin, sum zatna ding haute’ niteng in ATM/Bank mai ah adin uh ngai a, sepding tamtak taisan in ahun uh azat bei uh ngai maimah a, customer khat in ni khat in ATM ah 4000/5000 tanbang lakhethei hileh azia om deuh ding hi’n tamtak in ngaihdan gen uhi.

Dist. mipi’n sum ah taksapna atuah uang semsem dingin kilang a, a tamzaw Rs. 2,000/- note thak ahihna ah aneite’n leng bazar ah zat-haksa  hi’n gen uhi. Bank tawh kinaih khawpi sunga teng te’n sum a haksatna atuahlai un bank tawh kigamla adiak in zodawn a tengte adin beidawt huai diak din kilang hi.

Delhi ah Sikpuiruoi kizang

Lamka, Dec-5: Delhi Hmar Welfare Association (DHWA) inntekna in Grih Kalyan Kendra Open Ground, R.K. Puram, New Delhi ah zan in Sikpuiruoi 2016 kizang hi. Sikpuiruoi Pa in H.K. Kawllienthang, Deputy Secretary, Ministry of Road Transport & National Highway, GOI pang hi. L.B. Tuolte, Deputy Secretary, Ministry of Water Resources, GOI; Hrangkaplien Sinate, Secretary, Hmar Christian Fellowship Delhi; Lalremsiem, Founder Chairman, Pray For The World Ministry te’n thupi tuamtuam zang in thugen uh a,  Hrangthangvung, Chairman, DHWA in L.B. Tuolte in agelh laibu ‘Tawnhriet’ kichi hong hi.

       Hun 2 na ah Sikpuiruoi Lucky Draw Result puangkhia uh a, Mamte Joute in 1st Prize: Honda Activa man a, Esther Lalsanhim in 2nd Prize: Refrigerator leh Pastor Lalditsak Inbuon in third 3rd Prize: LED Smart TV man hi. Program sung in lasiam tuamtuam- Mary Jones (Haire Hai), Mercy Lalumpui, Mercy Varte, Thlasik Tawllawt Band, Zion Varte, Uchiha, Esther Ruolngul, Chatuon Ramhlunnei, Beauty Sinate, Roselyn Lalumpui, Thanglalmuon Hrangchal, Lalhrietsung Sanate, Jessica Khawbung leh Chawnthakim ten la sa uh a, program apaikhawm teng in nitak ankuang umkhawm uhi.

     Tuabang kal ah Dec 2, 2016 in Guwahati ah Sikpuiruoi-cum-Welfare Annual Meet 2016 kizang a, Chief Guest in Shishir Jha, IRS Pr. Director of income Tax (Inv) NER, Guwahati leh Sikpuiruoi Pa in P.K Singson, IBS (Retd.) pang hi. Mr leh Miss Sikpuiruoi 2016 telna nei uh a, Mr Sikpuiruoi in Lalthangzawm Ralsun leh Miss Sikpuiruoi in  Kidron Buongpui telching uhi.

Electric current in manlum

Lamka, Dec-5: Paullalzui Gangte (5) s/o Lallienson Gangte of  L Phainuom Village (near HQ Veng) tuni sunnung dak 2:20 velin electric earth connection in manlum a, Dec 6, 2016 in YMA hanmual, Chiengkawnpang ah kivui ding hi. Aman The Excel Foundation Academy (TEFA), HQ, Belam Veng a UKG simlel hi. TEFA te’n final exam neilel mahle uh Paullalzui Gangte suunna in Dec 6, 2016 holiday puang uh a, Dec 6, 2016 a exam ding subject pen Dec 8, 2016 in exam ding uhi.

Covenant school in annual Sports, 2016 pan

Lamka, Dec- 5: Mualkoi a Covenant School in tuni’n annual sports pan uh a, zinglam in MYC Ground  ah bialtu MDC T. Khaikhomang, Chairman, Fin. Committee, ADC/CCpur in Chief Guest a pang in hong a, Guest of Honour in Rev. G. Suanzalian, Co-ordinator (Institution), PCI (R) leh Chief Host in Rev. M. Khamlianmang, Chairman, School Managing Board pang hi.

Chief Guest in education (siamsinna) kichi laisimna kia hilou in, sports (kimawlna) leng education khat ahihna ah kimawlna tungtawn in mimal kithununna (discipline) leh kimuan ngamna (self confidence) hontun ahihman in kuapeuh in ngai poimawh dingin chial a, school ah co-curriculum activity atam chiangin naupangte’n nuamsa in huai in naupangte siamsinna khangsak hi’n gen hi. Programme hunsung in student te’n item tuamtuam lahna nei uhi.

SUUNNA:

Niangkhochong (91) m/o S. Thangkhopau of Gangpimual, tuni nitaklam dak 4:00 velin teknat in si a, Dec 6, 2016 in Gangpimual hanmual ah kivui ding hi.

STATE THUTHANG:

CM in Food Processing Park hong

Imphal, Dec-5: Imphal East a Nilakuthi mun ah tuni’n Department of Commerce & Industries saina in Food Processing Park kichi CM O. Ibobi Singh in Chief Guest hikawm in hongkhia a, Functional President in Govindas Konthoujam pang a, Guest of Honour in L. Lakher, Principal Secretary, Commerce & Industries leh Ksh. Biren Singh, Minister (Works, CAF & PD)-te pang uhi. Chief Minister O. Ibobi in a thugenna ah private partnership tellou in Manipur ah Industrial sector lawhching lou ding a, Food Processing Park ziak in lehkhasiam sepna neilou mi hunkhop te’n sepna mu ding uh chi hi. MSRTC leh Loitang Khunou a Spinning Mill ah state govt. in  sum tamtak seng mahleh lawhching zoulou a, huaiziak a industry-te puahna dia private-te akihel uh a louthei lou chi’n gen hi. Northeast bial a transportation lam ah buaina ziakin India govt. in hunpaisa a Industry Policy nuai a subsidy a piak bang uh a sutzop ding uh chi a, huai policy omlou in North East bialte ah industry phuhkhiak hitheilou ding chi hi. 

Govindas Konthoujam in State government in Thoubal leh Bishnupur district ah Industrial Estate 1 tuak leh Imphal West a Central Poultry Farm hongkhia hi. Manipur ah Handloom sector 40%, Food Processing 25.8 % leh Small Scale Industries Sector te’n 20% in masawn a, state govt. in skilled leh unskilled unemployed youth-te hamphatna ding in Manipur Start Up Policy patkhiak ding lemsa a, himahleh general strike leh bandh sang a lauh huai zaw economic blockade in Manipur a industry-te masawn ding nawngkai sak chi hi. L. Lakher, Principal Secy., Commerce & Industries in Rs. 45 crore bei in gam plot 49 a lian ah Food Processing Park bawl hi a, entrepreneur-te adia gam 600 square meter bikhiah hi a, huai food park ah cold storage, warehouse, drainage sewerage leh affluent treatment plant om hi’n taklang hi.

Saikul Block Congress Committee te’n kitawpna pia

Sadar Hills, Dec-5: Sadar Hills thubuai tawh kisai a JAC Sadar Hills-te panlakna lemsakpihna in Saikul Block Congress Committee (SBCC) te’n Congress leader leh worker banah Mahila Congress leh Youth Wing-te tang in tuni’n Congress party apan a lom in kitawpna pia uhi. Saikul office ah zan a joint meeting hun a Congress party apan kitawp ding a thupukna sepsuahna in tuni’n MPCC President kiangah Saikul Block Congress a President leh Secretary telin member 700 vel ding te’n kitawpna pia uhi.

SBCC te’n O. Ibobi makaihna a govt. in mipi a khem gige banah JAC Sadar Hills-te phutna tawh kisai a thutanna bawl uh a, kitawpna tawh kisai a MPCC President in a kintheipen a panla ding in ngen uh a, himahleh Sadar Hills Democratic party zop leh zoplouh ding tawh kisai a thutanna bawl nailou uh hi’n leng taklang uhi. Akigendan in Kangpokpi Block Congress Committee te’n leng Congress party apan kitawpna pia in Sadar Hills Democratic Party zom uh a, Kangpokpi Assembly Constituency Chief te’n Dec 1, 2016 ni in Ngahmun ah joint meeting a neih na uah local MLA te’n Congress tawh kizopna a tatsak ding uh chi’n thutanna bawl uh a, himahleh Saitu-Gamphazol Block Congress Committee te’n JAC Sadar Hills thupiak banah Congress party apan kitawp ding tawh kisai in tutan bangmah gen nei nailou uhi.

Global Sustainable Development Summit 2016

Imphal, Dec-5: Institute of Bio-resources and Sustainable Development (IBSD), National Institute of Department of Biotechnology, Govt. of India leh North East Development Foundation (NEDF)-te saina in United Nations Sustainable Development Goal tawh kisai in ni 2 daih ding in tuni’n Guwahati a NEDFi Conventional Centre ah ‘Global Sustainable Development Summit 2016’ kipan a, huai ah IBSD Director banah Global Sustainable Development Summit a Chairman Prof. Dinabandhu Sahoo in United Nation in a bikhiah 17 Sustainable Development Goal thiltup 169-te tangtun sak din ngetna bawl hi. 

IBSD in NE bial a environmental protection leh socio-economic development omna din panlak tuamtuam nei a, Sustainable Development lam ah IBSD goal 5 – No Poverty, Climate Action, Life on Land, Peace Justice & Strong Institution leh Partnership-te ahi chi hi. KV Eapen, Additional Chief Secretary, Govt. of Assam in IBSD-te panlakna kipahpih thugen a, sate govt. in panpih theihna teng ah panpih din chiam hi. 

Huai hun ah Dr Syed Kazi, Hony. President, NEDF, Prof S.K Srivastava, Vice Chancellor Noreth Eastern Hill University (NEHU), Dr Anil P Joshi, Director, HESCO, Dehradun, Prof. S.K. Barik, Director, National Botanical Research institute (NBRI), Lucknow, Dr. Ajay Parida, MS Swaminathan Foundation, Chennai, Dr Pratibha Jolly, Principal, Miranda House, Delhi University, Dr. Anula Maurya, Principal, Kalindi College, Delhi University,  Biswajit Roy Chowdhury, Nature Environment and Wildlife Society (NEWS) Kolkata, Government officials, North East state 8 apan stakeholder, scientist, academicians, researchers, media, Civil Society member, student leh mi tuamtuam te’n uap uhi.

Van tuamtuam paw din kuan

Imphal, Dec-5: Security khauhtak vengbitna nuai ah Oil tanker 180, LPG tanker 40 telin truck 771 velin Assam a thautui banah van tuamtuam paw ding in Imphal-Jiribam lampi tawn din tuni zinglam dak 9:30 leh sunnung dak 1:00 in Imphal nusia uh hi’n kigen hi. Jiribam tung nungin CRPF company 10 telin security-te mah in Leinangpokpi ah security ngak a om gari 568-te Imphal tan escort ding uh a, huai lakah Oil tanker 165 tel hi’n leng gen uhi. 

Huailou in Town Churches Union (TCU) Tamenglong te’n mipite khualna a UNC te’n economic blockade call-off ding in ngetna bawl uh a, huai tawh kisai a TCU Secy. In thusuah a bawlna ah demonetization in sum taksapna a tut ziak in mipite’n haksatna tuak uh a, economic blockade leh counter blockade in mipite’n haksatna a tuah uh behlap hi’n taklang uhi. Huai banah Christian-te adia Christmas a naihtak ziak in miteng in Christmas leh Kum thak lawp ding ngak in om uhi. Nautang-te ngaihtuahna ziak a UNC te’n economic blockade leh counter blockade bawl te’n kiphinna khawlsak ding in ngetna bawl uhi.

Accident ziak in liamna ma thuak zoulou in si

Imphal, Dec-5: Singjamei Thokchom Leikai ah zan nitaklam dak 4:30 velin hattak a tai i20 car in Diesel Auto a nunglam apan phut touh khak ziak in Auto Driver Chongtham Premjit @ Goroba s/o (late) Chongtham Ibotombi of Chingamathak Nameirakpam Leikai in lamgei a i20 car khawl khat phukha in ki lehlep hi’n gen uhi. Thiltung hun in Premjit telin Diesel Auto a tuang a lawm mi 3 – Papak, Priyo leh Boyai-te tawh  Khwairamband Keithel apan Singjamei zuan uh a, accident na ah mi 3-te liam nasa kei mahle uh Premjit a liam nasat ziak in Iboyaima Hospital tut in om hi. Huai nungin RIMS hospital ah refer in om mahleh tuni zingsang dak 8:30 velin a liamna thuak zoulou in si a, Auto phu i20 car leng kihem mang a, Premjit innkuan te’n thiltung tawh kisai a Car hektu matkhiak banah dan tawh kituak a gawtna piak ding phut uh hi’n leng kigen hi. Auto neitu diktak Papak hi a, Premjit in tire workshop bawl a, Papak Auto a zatsak hun ah thiltung hi’n leng taklang uhi.

Limlak ziakin Journalist khat soisa

Imphal, Dec-5: MG Avenue a United Bank of India (UBI) a security personnel khenkhat te’n a mi deihsak-te uh mipi ki vualte akantan sak laitak uh Imphal Press Press a reporter B. Rakesh Sharma in camera a lim alak ziak in bank sung ah pilut in camera suhsak banah amai suksak uh a, bank staff khenkhat te’n security personnel kham sang in Reporter tungah kampau kilawmlou tanpha zat khum uh hi’n kigen hi. Thiltung tawh kisai in All Manipur Working Journalists’ Union (AMWJU) te’n tuni’n emergency meeting nei uh a, huai ah thiltung ngenteltak a genkhawm nung in kintak a police personnel-te tungah action lak ding phut banah UBI staff te’n bank sung ah tua bang thil a tungsak uh mawhpaih thupuang uhi. Sudhir, Officer in-charge, City Police makaihna a police team te’n Imphal Free Press Reporter soisatu security personnel 3 – Md. Nashir Khan, Th. Riyaj Khan leh Md. Hakim-te mankhia in dan tawh kituak a gawtna piak chiam a, mi 3 te lock-up ah khum hi uhi. City Police Office incharge Sudhir panlakna in security personnel 3 te’n tunitaklam in AMWJU kiangah ngaihdam ngetna pia uh a,  W. Shyamjai, President, AMWJU in City Police OC panlakna kipahpih a, himahleh mi 3-te tungah dan bang a action lak ding phut veve hi.

BJP IMC Corporator khat in Congress zom

Imphal, Dec-5: Imphal Municipal Corporation (IMC) a Ward. No. 3 (Thangmeiband Constituency) a BJP Corporator Hijam Nutanchandra Singh in NDA makaihna nuai a BJP govt. ‘demonetization’ kalhna in tuni’n Congress zom hi’n gen uhi. Huai tawh kiton in Congress Bhavan ah tuni’n vaidawnna om a, huai ah Manipur Pradesh Congress Committee a President TN. Haokip, Gen. Secy. K. Ranjit leh Vice President N. Loken banah officer bearer hunkhop tel uhi. Huai ah K. Ranjit in a thugenna ah maban general assembly election hun ah BJP-te zawh hiding a, Hijam in Congress party a zop ding MPCC President in lemsakna pia chi hi. Huai lou in IMC Ward No. 3 a BJP worker te’n Hijam in Congress party a zop mawhpaihna in a lim mei in hal uh a, Hijam in Congress party a zawp tawh kiton in Imphal Municipal Corporation ah Corporator 27 lakah Congress party Corporator 17 tung a, Congress in IMC election nunung pen ah seat 14 ah vualzawhna ngah a, Independent Corporator 2 in Congress party zom uh hi’n kigen hi. 

TUNI THUPI:

 “Damloute hihdam unla, misite kaithou unla, phakte hihsiangthou unla; dawite hawlkhia un, a thawnin na mu ua, a thawnin pia un.”

 – Mathai 10:8

EDITORIAL:

Damlouhna leh Doctor-te…! 

Damlouhna kichi thil khawktak ahi a, mihingte’ adingin dam gige kichi om theilou a, damna kichi tuh i lunggulh pen himahleh thil hitheilou hi a, ahihziakin mihingte’ lakah a damthei deuh leh adamtheilou deuh bel ana ki om hi. Ei deihtelna bangin thil paithei ahikei chih a chianna leng himai hi. Laisiangthou ah mihing adin damkum kum 70 ahi a, hatna ziakin kum 80 leng ahithei chih ahi.

Khang (generation) paidan kikhek lamdang tou zelin tuni chiangin tate’n nulepa te vui nawnlou in nulepa te’n tate vuita uh ade aw chih theih hun leng tam hi. Naupang chikchik himahle hang, nulepa sangin i mel le puam leng teksuak zaw tamtak ki om mawk hi. Natna khawktak ziak ahihleh thutuam, huchilou a mahni gawl leh utna tanzawhlouh ziaka mahni taksa ngoihngoih siatna dinga kibawlkha ihih ziaka naupang chikchik leng akpul dek mah bang khoikhoi idiam?. Newspaper a sunna igelhna hunah kum 100 tan dam a si-te bang isuun kei chihna thu hilou in nak ngaihsanhuai law mahmah a, tualou in kum 70 tan damte bangleng thupi law mahmah uhi. Khangthak- kipilsak-duhduh ne naupang chik a si, nulepa vaksa hilaite pen Pathian apan hamsiatna (curse) chikhat leng ade aw chih in om zezen hi.

Sihna vai tawh kisai thutuam hileh, eilawi in damlou ivehdan uh etthak tuak mahmah om hi’n i thei hi. Vaigam hospital-te ah damlou vehding in a lomlom in kuamah luttheih louh himhim a, security-te’n khauhtakin enkai uhi. Eilak aleng nidang hun tawh etkhawm in bel azia omdeuh ta a, ahihziakin doctor te’ round hunsung chauh chihtheih in om hi. CCpur District hospital etsakna dingin la zual le hang, doctor te’ round dek hunchiangin patient party te’ lak ah mikhat lel om sak hi a, adangteng hawlpawt in om a, himahleh, doctor te’n a round zawhchiangun a ut zahzah lutnawn zaizai zel hi.

Doctor te’n amawhpuakna uh azawh chiangun hospital pawtsan ua, damlou vehte leh a ompihtu te’n a ut nak ua leh a sawngnuai leh pua ah laizial tanpha tepkhu riahriah ngam mit a muhtheih ding tamtak om hi. Damloute’ omna room ah bel laizial tep hial muhding om kei mahleh a kong pawzek ah laizial tep tamtak om a, thil poitak ahi. Telsuimite’ gendanin laizial kichi a tep tute’ sangin agal a ana diiktute’ adingin lauhuai zaw ahi chi hial uhi. Damlou vehding a kuan laizial leh tobacco product tuamtuam gim a khuutkhum pen damloute’ adingin anatna uh behlaptu asuakkha theizaw diam? Pitek/Putek khenkhat in lah damlou awlmawh kisa a tuibuk gim uh tawh damloute va houpih teitei sawmlai ki om hi. Zu kham kawma damlou veh leng itam a, i zu huu in damlou adingin damna atun diam chih bangleng ki ngaihtuahtham ching hi.

Doctor leh Nurse te’n damloute etkhiakna (round) aneih sung ua pawtkhe ut mawngmawng lou bangleng mi bangzahhiam ki omlai a, hiai pen chilgilna diklou ahi a, athuaktu ding eimah i hi. Patient leh Doctor teamte’ kala kizopna (relationship) ompen subuaitu ihih khak ding damlou enkoltu leh avehtute’ adingin pilvanhuai mahmah hi. Lamka damdawi inn ngial sianthouna lamah award sang hi a, tualou in 1947 a kiphutkhia International Organisation for Standardization (ISO) Certified leng hi a, a kem siangthou ding tualsung mite mah ihi uhi. Tua ziakin, i damdawi innte leh i damloute mahmah leng akisaipihte’n kem siangthou leng chih ut huai hi.

I gennop nawn ahihleh, tuni chiangin natna chi tuamtuam leh hileeng om phutphut tam deuhdeuh bangin kilang a, akhawvel in hon puakkhiak leng ahi maithei! Huchi kawmkalah, damlou iveh chiangun pilvanna ding tamtak om ding hi. Natna kilawhsawn thei hunkhop leng om dinga, a kilawhsawn theilou natna leng om tham ding hi. Ki pilvangsak in damloute va pumlauh leng hoih tuanlou a, ahihziakin va pawng maingal luat leng hoihlou zel a, hithei hileh kilawhsawn theihin theihlouh hita leleng damlou (patient) naihlua a va om pen hoihlou hi. Damlou kiangah i huu chi tuamtuam iva khahkhum pen ama adingin hoihlou zaw a, damlou kiim-le-kianga mi hunkhop va tut kheukhou in damlou pen su bah tuan mahmah a theih ahi.

Tualou in, mi tamtakte’n damlou kiang hiam ahihkeileh a kemtute’ kiangah damdawi chi tuamtuam i va tah ziahziah thei uhi. Doctor/Specialist-te’n hoihtaka treatment apiak nung ua hiai damdawi hoih eive chi a advice va bawlthei bang tampi i om uhi. Etsakna dingin zunkhum, kalna, sinna, lungtangna, sungkhawh, gilna, cancer, suulna, thana, sinkha a suang om, guhna, haa na leh natna tuamtuam ah hiai hoih, i singtangpa damdawi kaan omlou ahi va chithei pawl mi tampi petmah ki om a, patient party-te bang va thuzawh (convince) zou ki om zawmah lai hi. Dot a i om keileh va kikum law kholkei theile hang!

Huaikawmkalah,  doctor-te’ adingin leng kingaihtuahna khenkhat om a, a duty hun uh a zekailouh hamham deihhuai hi. Patient-te a round ding uhiam ahihkeileh OPD timing leh casualty duty hun a lap uh mipi kinepna ahi. Doctor khenkhat in zingkala a private clinic ua mi a et uh ziaka hospital a timing fail, nitaklam chianga a clinic mah uh adelh kin ut ziak ua hospital nuse pah chihte a om louh hamham deihhuai petmah hi. Private clinic delhzoute ahihleh neuchik sum neizaw deuhte hi ua, OPD a doctor ngak chenchen-te mi genthei leh zawngkhalte kihi zaw hi. Ei pen ei Christian dan takin Missionary nnasepna thupitak leng ahi hi.