Manipur Express | January 10, 2017

HEADLINES:

ECI in February 7 in ‘Election Notification’ suahkhe maithei: CEO

UNC blockade tawh kisai in ECI in Manipur dinmun enzui touzel

Imphal, Jan-9: Election Commission of India (ECI) in Manipur tel a India state 5 a Assembly election ni ding a puankhiak dungzui in Manipur ah phase 2 in election om ding hi. Phase masa March 4, 2017 in seat 38 ah election om ding a, phase 2na  March 8, 2017 in seat 22 ah om ding hi.Huchihlai in Manipur a Congress government in ki vaihawmna lemtangzaw ding tupna a district 7 a bawlkhiak deihlouh ziak a United Naga Council (UNC) in state sung a national highway-te a economic blockade a bawl ni 69 chingta hi. January 7, 2017 a UNC makaite’n meeting a neihna uah blockade sutzop touhzel sawm uh chih hi a, UNC General Secretary S Milan in blockade khawlsan hilou ding leh Manipur a government office-te ah kiphinna khauhtak pat hiding in gen chihthu om hi. UNC blockade ziakin ECI in Manipur state dinmun enzui touzel hi’n Vivek Kumar Dewangan, Chief Electoral Officer (CEO), Manipur in gen hi. Manipur a Assembly seat 60 a election om ding tawh kisai in ECI in February 7, 2017 in ‘Notification’ suahkhe maithei hi’n leng CEO in gen hi. Huaithu ah election ni ding kha 2 omlai ahihna ah tuhun a thutawp genpah poimawh nailou ahi chi hi. Manipur a highway-2te ah economic blockade a paizom touh zel leh free & fair election neih lemtanlouhna om thei ahihdan leng gen-le-sak tamtak om hi’n leng kigen hi. 

Manipur a ruling Congress pawl in kivaihawmna lemtangzaw ding tupna a district thak 7 a bawlkhiak thu ah BJP pawl in singtang bial a Nagate leh phaijang bial a Meitei-te kal a political thil a kituah louhna ding Congress-te’n bawlkhia uh hizaw in ngawh uhi. Tua banah, ECI leh government in blockade leh thagumsuahna thilte enkai ding ahihna ah Manipur ah free & fair election om thei ding ahihdan BJP pawl in gingta uh hi’n leng BJP Manipur incharge Prahlad Singh Patel in gen hi. 

Tuabang kalah, Human right activists Irom Sharmila makaih Peoples Resurgence & Justice Alliance (PRJA) pawl in tutung Assembly election ah khatveina di’n telsawm uhi. Sharmila in Manipur apan Armed Forces (Special Powers) Act (AFSPA) lakkhiak ding phu a kum 16 sung vingveng kiphinna a tawpsan nung in Assembly election ah tuh sawm ahihdan puang hi. Thusuak kiza dan in, Sharmila in Thoubal a Chief Minister O. Ibobi Singh’ constituency ah tuh sawm a, amah makaih PRJA party te’n state sung a Assembly seat 20 ah tuh ding uh hi’n leng kigen hi.

TUALSUNG:

Mipi lak ah Petrol leh Diesel zuak hiding-ADC Chairman

Lamka, Jan-9: Langkhanpau Guite, Chairman ADC/CCpur apan kizadan in tun nitak in Mizoram akipan Diesel leh Petrol tanker khat tuak Lamka hongtung a, Jan. 10, 2017(Sepnawnni) zinglam dak 10:00 in Lamka Public Ground kianga ADC (Town Office) ah mipi lak ah zuak hiding in gen hi.Diesel litre 1 ah Rs. 80/- leh petrol  litre 1 ah Rs. 90/- in zuak hiding a, gari tawh kuante kiang kia a piak ahih ding banah black market a zuakte kiang ah bel piak hilou ding uh chi’n gen hi. Diesel heavy vehicle-te litre 100, light vehicle-te  litre 40 leh 3-wheeler-te  litre 10 tan piak hiding a, Petrol ahihleh Light vehicle-te litre 30, 3-wheeler-te  litre 10 leh 2-wheeler-te  litre 5 tan piak hiding hi’n gen hi.. 

Mizoram akipan thautui laklut theihna ding in YMA Manipur Group tungtawn in Central YMA kiang ah ADC leh YPA in ngetna bawl  a, huchihlai in Lamka khawpi a oil pump tuamtuamte tawh Jan. 7, 2017 in ADC office ah meeting om mahleh huaimun ate’ tanker nei a tawm ban ah IOC phalna lou in route tuam atai phallouh ahih ziakin Central YMA in tanker mah zangin gari 2 hong sawl uh a, tunitak a hongtungte chihlouh tanker dang 2 leng Aizawl akipan hong kipankhia om hi’n gen hi. 

Thautui puaklutna tawh kisai in YMA Manipur Group, YPA GHQ leh Mizoram Government in pan naktak alak ban uah Guite road tawn a puaklut ahihna ah lamkal a mimal, pawlpi leh security personnel te’n mipi khualna a tax lalou in paisuaksak uh a, amaute tung ah ADC kipahthu gen  hi.Huchikal ah, khawpi sunga thautui tamlou tutpih a zuakte lak ah police personnel-te banah uniform silh leh silhlou pawlkhat tax dong (collect) om chihthu zak hi a, poisakthu gen in hibang kuaman hih nawnlou din ADC Chairman in a nget banah black market a zuak te’n leng Moreh thautui-te Asian paints tawh helkhawm nawnlou ding ngen hi.

I gam in khantouhna leh suahtakna poimawh- Thangbiaklian Hangzo

YPA Gen HQ hall ah tuni’n manifesto puangkhia

Lamka, Jan-9: 58-CCpur assembly constituency a ding  Thangbiaklian Hangzo adia Central working committee makaihna in  tuni’n Hiangtam Lamka a YPA Gen HQ hall ah manifesto( a tup-leh-ngimt) puankhiakna om a, huai hun ah mun tuamtuam akipan amah  deihsak leh ngainatu tamtak atel ban ah BJP CCpur Mandal a President leh Spokesperson telin member bangzah hiam in leng uap uhi.Upa V. Vungzathang in thumna inhun  hong a, S. Ginchinthang in vaidawnna thu gen in Khaichinpau Guite in election manifesto hongkhia a, Rev. Lian Benson, Exe. Secy. EELC in candidate adin thumsak hi. 

Thangbiaklian Hangzo  in manifesto tawh kisai puankhiakna ah  aman Pathian leh gamsung dan tawh kituak a vaihawmna leh ki-etkolna siamthak ding, siangtangmite’ kivaihawmna tuam pansan a tunding ding, nek-le-tak zonna tawh kisai i gamsung mahni kitoudelh ahihna dia panlak ding, damtheihna tawh kisai a kikepna piching i gam a omsak ding banah siamsinna tawh kisai a gamsung pumpi tawh kikim siamsinna mun omsak ding chih telin thiltup tuamtuam Long Term Goal a koih hi’n  gen a, i gam in khantouhna leh suahtakna poimawh petmah chi’n gen hi.

Political lam ah mawhna neilou a si Salpha 9-te’ kipumpiakna ziak a tangtun theihna ding banah adikna uleh amaute tungtang genveng a, zahna sangpen tawh vuikhiak ahih theihna dinga panlak ding, Manipur Assembly ah hunlem masapen ah India Danbupi a omsa singtangmite’ tanvou Sixth Schedule puaklut a tangkoupih ding leh singtang gam teng a akintheipen a kizatna dia panlak ding, separate State demand hatsak ding leh hunchiam nei a kilemna om theihna dingin ‘Tribal Legislator Forum’ bawlkhiak a, huai tungtawn a a state leh central government kiang a nawh ding, govt sepna (service) zonna tawh kisai ah singtangmite tanvou omsa (ST Reservation) te kipbitna dia panlak ding a thiltup masapente laka tel hi’n gen hi. 

I gam ah nekgukna leh kineksiatnate beisak a, development hatsak dia kivaihawmna leh guhgel omsate etkik poimawh hi’n gen  a, constituency puahna dia sum hongpai(MLA Local Area Development Fund)te enkaitu ding ‘constituency development committee’ bawlkhiak poimawh chi’n gen hi. Mipi mah in development na asep theihna ding ua panlak ding in gen a, huaidin saptuam leh pawlpi tuamtuam tawh  pangkhawm ding hi’n gen a, gamsung adia development fund tamtak hongpaite nek gaihvek ahih sek ziakin i gam in thuaklawh a, tunitan ahiding bangin  khangtou theilou chi’n gen hi.

Gamsung ah dan leh thupiak banah lemna a om thei na dingin District administration, police department, tribe council, philanthropic organization leh saptuam makaite apan coordination committee dinkhiak a, gamsung ah lemna leh muanna omsak deihthu gen hi. Gamsung ah economy leh development tawh kisai mahni kitouhdelh thei gam suahsakna dingin theihtawp suah a panlak ding leh siamsinna, damtheihna lam naktaka panlak  a deihthu gen hi.

Thangbiaklian Hangzo bel (late) H. Khatkhawjam & Mrs Dimzaching te ta hi a, tulel in Evan Thangvang Street, Khominthang, New Lamka ah a innkuante tawh khawsa  uh a, aman kum 2004 leh 2006 in Grace Bible College ah B.Th leh M.Div a zawh banah kum 2015 in Eastern College, Australia ah MA (International Development) zou hi. Kum 2007 -2010 sung in GBC HIV & AIDS Home Based Care Project nuai ah Project Co-ordinator in sem a, kum 2010-2015 sung in Compassion International ah Partnership Facilitator a pangin tulel in Tribal Rights Vigil, Manipur, Lamka Joint Headquarter ah Chief Moderator lenlel hi.

PTC GHQ in kipahpihthu puang  

T. Guite, IPS IGP apan ADGP in kaisang

Lamka, Jan-9: Thangkhanlal Guite @ T. Guite, IPS tunai zek in IGP Zone-III apan Addl. Dy. General of Police (ADGP) in kaisang a, Paite Tribe Council GHQ in kipahpihthu puang hi. H. Pauzalal, General Secretary, PTC GHQ in ataklatna ah Thangkhanlal Guite @ T. Guite IPS in IGP Zone-III apan ADGP a, akaisang thu zak in PTC GHQ kipak mahmah hi’n taklang hi. T. Guite, IPS kaisangna kipahpihthu puang kawm in amaban ah asep-abawl khempeuh ah Pathian in ompih in makaih zel ta he’n chin deihsakthu taklang hi.

PS ah mi 8 in thau koihlut

Lamka, Jan-9: Manipur ah March 4 & 8, 2017 in Manipur Legislative Assembly election om ding ziak in Dist. Magistrate/CCpur in CCpur Dist. a licence nei thau (gun) leh atang akinaihpih pen Police Sation ah kalkhat (one week) sung a koihlut ding in theisakna bawl hi. Huai dungzui in tuni’n mi 8 in Lamka Police Station ah licence nei thau leh atang koihlut uh a, tunitan in mi 14 in thau (gun) leh atang koihlut uhi.

Hmar Inpui in party support tuam neilou ding

Lamka, Jan-9: Hmar Inpui (Hmar Supreme House), General Headquarters in Executive Council in thupukna abawl dungzui in March 4 & 8, 2017 a 11th Manipur Legislative Assembly election om ding tawh kisai in Hmar Inpui (Hmar Supreme House) in party support tuam neilou ding ahihdan tuni’n thusuah abawl un taklang hi. Election Commission of India (ECI) in  model code of conduct apuan mimal leh pawlpi in bawhselou a, kuapeuh in siangthoutaka vote a khiak theihna dia panla dingin leng ngen hi. ECI in model code of conduct abawl leh Pathian deihdan tawh kituak ahih theihna din kuaman thagum zanglou a, gam leh nam adia zattheih telkhiak ahih theihna dia kuapeuh in panla din leng ngen hi. 

Delhi zinna report leh awareness campaign 

Lamka, Jan-9: All Tribal Women Union (ATWU) makaih in Jan. 10, 2017 nitak dak 5:30 in Gouchinkhup Veng a CYA hall ah Delhi hawhna report tawh kithuah in mass awareness campaign om ding a, huai hun ah maban election hun a 58-CCpur assembly constituency a MLA intending candidate Paukhansuan Khuptong, CT Lian Guite, DK. Mang leh Thangbiaklian Hangzou te’n minute 20 sung chiat thugen ding uh a, Nianglian, President in leng minute 20 sung Delhi zinna tawh kisai report peding hi. Huai hun ah mi a tam theilam kihel dingin chial uhi.

28th Road Safety Week

Lamka, Jan-9: India gamsung pumpi ah tuni apan January 15, 2017 tan daih ding 28th Road Safety Week kizang a, CCpur Dist. ah Traffic Control Police makaih in tuni’n kizang pan hi. Traffic Control Police, Police leh VDF pangkhawm in khawpi sung mun 2 ah special drive nei uh a, 2-wheeler ataituah gari 28 man in TR-5 receipt zang in liausak uhi. Traffic Control Police makaih in January 10, 2017 in khawpi sung ah road marking nei ding uh a, January 11, 2017 in mun tuamtuam ah postal takkhiat hiding a, mipi leh gari tuaituah te’n kithuahpih ding in OC Traffic Control Police/CCpur in ngen hi.

Rickshaw Lungtuak Society te’n lampi siatna bawl

Lamka, Jan-9: CCpur Rickshaw Lungtuak Society pawlin tuni’n Damkam bazar leh Lailam Veng lutsukna bul ah social work nei in lampi kuak diakna munte ah suanghum (balu single) sung uhi. Lamka khawpi laizang a lampi poimawh mahmah Tedim road dung lamlian lai mun tamtak sia a, adiak in Lailam veng junction a pipe kikhungna dia lampi kitoutan hoihtak a bawlkik ahihlouh ziakin gari a taite adin nawngkai mahmah hi’n kigen hi. 

Huai tawh kisai rickshaw puller te’n ngai poimawh in, tuzingin gari taituahte kiang ah sum bangzahhiam khon in phatuamngai te’n  a piakkhawm uh zangin suanghum (balu single) lei ua, a daihlou teng CT Lian Guite, New Lamka (West) MDC in behlap in Shaktiman (truck) dim 2 lei uh a, Damkam bazar leh Lailam Veng junction ah sung uhi.

St. Mary H/S a 2007 batch-te kithuah khawm

Lamka, Jan-9: Tuibong a St. Mary’s High School a kailui 2007 batch te’n  tuni’n St. Mary High School ah 1veina din Decadal celebration cum Alumi Meet nei uhi. Huai hun ah school dinkhiak akipan teacher semlui banah semlel-te kihel uh a, 2007 batch lak ah si mi 2-Esther leh Tabitha sunna aneih banuah power point tungtawn in hunluite etkhawmna nei uh a, Sister Anto Maria, Headmistress in 2007 batch-te adin thumsak a, teacher, student banah teltuamte akipan thugen ngaihkhiakna om hi. 

St. Mary H/S ahihleh 1979 kum a dinkhiak hi a, 1989 akipan Class X board exam neipan a, 2007 batch ah student 74 in board exam maituah uh a, huailak ah first division in 41 lawhching uh a, CCpur district ah top ngah uh hi’n kigen hi. 2007 batch-te siamsinna lam ah lawhching mahmah uh hi’n kigen a, tutan in 50% val in central leh state government banah private institution tuamtuam ah teacher leh lecturer sepna ngah om in Manipur Public Service Commission, MSPDCL ah Dy. Manager; Sister, Nurse leh Doctor telin Professional footballer, Military lam ah Lieutenant Nurse tanpha sepna nei om uh hi’n kigen hi.

YPA New Lamka block in panpihna hawmkhia

Lamka, Jan-9: YPA GHQ te’n khawsakna haksa deuhte panpihna ding in YPA New Lamka block-te kiang ah antang bag 20 pekhia uh a, YPA New Lamka block nuai a Unit 12 te’n amau area chiat ah khawsakna haksa deuh innkuan 7  telkhia uh a, tuzing in YPA Hall, New Lamka ah YPA New Lamka block makaih in Unit 12 a makai-te tawh inn kuan 84 te’ kiang ah antang kg 10 chiat pia uhi. S. Manlian, President YPA New Lamka block in agenna ah tuni a antang kihawmkhia ahihleh khawsakna haksa deuh-te kiang ah hawm ding a YPA GHQ in apiak hi’n gen a, Unit 12 te’n amau area chiat ah khawsak haksa diak innkuan 7 telkhiat te lak ah kipia a, khawsak haksa teng kipe kimzou nailou hi’n gen hi. YPA in maban ah panpih ngaite pahpih touzel ding tup leh ngim anei hi’n gen a, YPA in si vui, misi inn ah lenkhawm kia nasep a neilou in gam-le-nam khantouhna ding ahun leh mun dungzui a semtou zel ding hi’n leng S. Manlian, President YPA New Lamka block in gen hi.

MU result suak ah topper in pang

Lamka, Jan-9: Manipur University in Master of Arts (MA) – History department final result puangkhia ua, tua ah Mercy Baite d/o Holkhopao Baite of Mualveng, Hiangtam Lamka in topper la a, Florence C.  Moite d/o Rev. S. Khaikholam of Kangvai in top 4  la chihthu kiza hi.

SUUNNA:

Rev. Lianchinkhup Taithul, tulel a USA a om tuni’n gari a train tract kandeklai train in phukhia in si hi. Ama’n  Zou pau in Laisianthou ana bawlkhia a, UZO (USA) Founder khat leh Board of Director hi’n kigen hi.

STATE THUTHANG:

Guv leh CM in message khak

Imphal, Jan-9: Manipur Governor Dr. Najma A. Heptulla leh Chief Minister O. Ibobi te’n Gaan-Ngai festival ding tawh kisai in Manipur mite kiangah deihsak thukhah bawl uhi. Huai tawh kisai in Governor in Zeliangrong community te’n tualsuak festival kumlui pen leh lianpen ‘Gaan-Ngai’ kichi tek leh khanglai te’n zangkhawm ding uh a, sahkhua thil tawh kisai ahihleh Zeliangrong community-te tawndan hausatak taklang a, Gaan-Ngai festival tungtawn a Manipur mipite muanna leh bitna banah kituahna a tut ding deihthu taklang hi. CM O. Ibobi in Gaan-Ngai pen festival of winter season hi a, Zeliangrong community-te adia buh lakzawh nung a festival lianpen hi a, hiai festival pen Manipur a nam tuamtuam om teng in muanna leh bitna banah khawtang kituaktak a zat khawm ding chi’n taklang hi.

GOC 57th Mtn. Divn. lui leh thak in CM mu

Imphal, Jan-9: Major General S.S. Mishara, GOC, 57th Mountain Division hihna apan kisuankhe ding leh 57th Mountain Division hihna len thak ding Major General U. Suresh Kumar in tuni’n CM Secretariat ah Manipur Chief Minister O. Ibobi va mu uh a, huai hun ah Manipur security dinmun tawh kisai leh thil tuamtuam genkhawm uhi. CM Ibobi in Major General 2-te kiangah souvenir pia chihthu om hi.

Gari hunkhop Imphal hongtung

Imphal, Jan-9: Petroleum product leh niteng vanzat poimawh banah nek leh tak thil tuamtuam pua gari ahunkhop Jiribam a hong kipan tuni nitaklam in Imphal hongtung uh chih thu om hi. Tamenglong akipan thupesawmtu in a gendan in tuni nitaklam tan in gari 182 in Noney pel in Imphal lam hon zuan uh hi'n gen a, huai nungin leng gari bangzahhiam Noney tung nailou  omlai hi'n gen hi.

Assam Rifle te’n ANSAM makai 3 hentang 

Imphal, Jan-9: Senapati a Mount Everest College gei ah tuni’n All Naga Student Assn. Manipur (ANSAM) makai te’n Assam Rifle Convoy truck a khawlsak sawm ziak un Assam Rifle te’n ANSAM President Seth Satsang, Fin. Secy. Joseph leh Exe. Secy. Soto-te hentang uh a, himahleh hun bangtanhiam nung in ANSAM makai 3-te khahkhe nawn uh hi’n kigen hi.

Maharaj Gambhir Singh sih champha zatna om

Imphal, Jan-9: State Archeology, Dept. of Art & Culture, Govt. of Manipur-te saina in Langthabal a Maharaj Samadhi mun ah tuni’n Maharaj Gambhir Singh sih champha a 183 veina zatna om a, huai ah Chief Guest in Eminent Scholar Padmashree R.K. Jhalajit Singh pang a, Functional President in eminent scholar B. Kulachandra pang hi’n gen uhi. Huai ah R.K. Jhalajit in Burmese te’n Manipur a luah khum uh Maharaj Gambhir Singh panlakna ziak in Manipur suakta ahihdan mipite’n a theih uh ngai a, Seven Years Devastation (1819-1826) nungin mipite gawm khawm nawn a, mipite’n Manipur gamgi a kepbit tungtang leng a theih uh ngai chi’n gen hi. Huai hun ah mipi paikhawm te’n Maharaj Gambhir Singh leh Mahara Narsingh-te tungah zahtakna latsakna in a limlak uah pak pia uh a,  Gulapi Nata Sankritana Academy te’n Dhop Pala lahkhiakna nei uh hi’n leng kigen hi.

Election ding tawh kisai in meeting

Imphal, Jan-9: DEO/Imphal West makaihna in tuni’n DEO office chamber ah Model Code of Conduct, Expenditure monitoring, Suvidha, Samadhan leh lawhchingtak a election process saitheihna dia thil poimawh tuamtuam thu tawh kisai a meeting om hi’n gen uhi. Huai hun ah Robert Singh Kshetrimayum, DEO/Imphal West in Returning officer leh Nodal officer te’n akisaipih district ah election adia cash leh dan phal louh a thilte khauhtak a enkai ding in theisak a, official om teng kiangah leng tukal sung a training programme, SVEEP campaign om dingte a hoih theih pen a sai ding leh Assembly Constituency teng a elector tam theipen telsak ding in leng theisak hi. Plan omsa dungzui in Jan 10 & 11, 2017 in videography (for video surveillance team) leh Returning officer-te adia VVPAT om ding a, 11th State Assembly Election 2017 ding tawh kisai in print leh electronic media a Editor teng tawh Jan 10, 2017 sunnung dak 1:00 in interaction programme om ding a, tuni a meeting hun ah election process zawhsiang masiah DEO leh Returning officers-te office ah nawngkaina omlou a power supply piak ding tungtang leng gen uhi.

Ima Emoinu Irat Thouni zatna om

Imphal, Jan-9: Manipur ah adiak in Meitei community te’n tuni’n mun tuamtuam ah Ima Emoinu Irat Thouni Thouram zatna nei uh a, huai hun ah Goddess Imoinu kiangah vualzawlna ngetna in thei gah(fruit), meh hing leh nga banah thilpiak tuamtuam lan uh hi’n kigen hi.

Bus leh truck kiphu tuah, mi 1 si, 15 liam

Imphal, Jan-9: Nambol Police Station in a huamkhak Maibam Lotpa Ching apan metre 200 vel a gamla ah  tuni zinglam dak 11:30 velin CCpur apan Imphal zuan Direct Bus (No. MN02A-2101) leh Imphal akipan Tata Truck (No. MN02A-5525) kiphu kha uh a, amun ah mi 1 si a, handyman telin mi 15 vel liam uh hi’n kigen hi. Misi RK. Chandrakumar of Nachou Bazar hi a, aliam mi 15-te RIMS hospital tut in om uh a, huai lakah mi 3 dinmun lauhthawng huai hi’n gen uhi. Thiltung tawh kisai in Nambol Police Station te’n case register uh a, brake fail ahihlouh leh steering buai ziak a accident om hiding a gen in om hi.

Cong ticket piak ahihkeileh kihallup sawm

Imphal, Jan-9: Thangmeiband assembly constituency a maban assembly election hun ah Jotin Waikom kiang ah Congress party ticket piak ahih keileh congress supporter khat kihallum ding chi hi. Huai tawh kisai in Manipur Press Club ah tuni’n press meet om a, huai ah Shijagurumayum Ibohal Sharma in media-te tawh kimuh khawmna hun ah Jotin Waikhom kiangah Congress ticket piak ahih keileh CM Bungalow mai ah mei a kihal ding in gen a, Thangmeiband Kendra Congress Worker Committee (TKCWC) convenor Elangbam Hoy Kumar in Jotin Waikhom kiangah congress ticket piak masiah Nagampal Phaogei Shunglen ah relay hunger strike pang ding uh chi hi. BJP MLA lui Kh. Joykishan in Congress party a zawp ziak in Thangmeiband A/C ah congress ticket ngah thei dinmun in om a, huaiziak in huai bial ah buaina om in congress support te’n Jotin Waikhom chih louh midang kiangah party ticket piak ding hilou chi uh a, intending candidate thak leh luite hoih vek uh a, himahleh congress party te’n thagum a kinawk tuahna leh liamna tuak omlouhna dia kua kiangah ticket piak ding hiam chih hoihtak a ngaihtuah masa ding in theisak uhi.

Air Chief Marshal in NCC Republic Day camp vehna nei

Imphal, Jan-9: PIB (Defence) Imphal thusuak in Air Chief Marshal BS Dhanoa, PVSM AVSM YSM VM ADC, Chief of the Air Staff (CAS) in Delhi Cantt ah tuni’n NCC Republic Day Camp 2017 vehna va nei in huai ah DGNCC Lt. Gen. Vinod Vashisht, VSM** in ana dawn a, NCC a Army, Navy leh Air Force te’n ‘Guard of Honour’ leh band display nei uhi. Huai hun ah Air Chief Marshal in NCC Directorates 17 te’n flag area a theme tuamtuam a bawlte uh leh ‘Hall of Fame’ enkhia a, huai nung in NCC auditorium ah ‘Cultural Programme’ om hi’n taklang uhi.

Santosh Trophy :

Manipur in Mizoram zoulou (zel)

71st Santosh Trophy Northeast Zone qualifying Group-B match kimawlna zan a om ah Manipur leh Mizoram kimawl ua, tua ah Manipur in vualzawhna a  poimawh lai in Mizoram te 2-1 a zoulou in Santosh Trophy adin qualify zoulou zel uhi. Hiai match ah half ma minute 15 in Mizoram apan Lalbiakhlua in goal masa khum a, tua zawh minute 31 in Lalrammuanpuia in khat khum nawn in 2-0 in makai ua, Manipur adin vualzawhna chance tawm mahmah hi. Half zawh minute 54 in Manipur apan Imran Khan in goal khat khum in Manipur in chance nei kik ua, ahihziakin hun beitan in goal kikhum zou omlou in Mizoram te 2-1 a vualzou in final adin qualify uhi. Kumlui inleng Manipur leh Mizoram te group khat ah omkhawm in Manipur in Mizoram zoulou in qualify zoulou ua, tukum akizom a nihvei Mizoramte  a zawhlouhna uh hita hi.

TUNI THUPI:

“Huchiin, pom unla, jui un; huai mahmah, hiai dan tengteng jaa, Hiai nam thupi tak mipil tak leh thil theisiammi tak ahi mahmah ngut uh, chih namte mitmuh ah na pilna uh leh thil theisiammi na hihna uh ahi ding.” – Diuteronomi 4:6

EDITORIAL:

Vision 2020 neih poimawh

Election hun leh naupangte’ exam hun hong nai hulhul ahihdan itaklangta a, huai kawmkawmin mengmuhna (vision) poimawh  ahihdan igen lang ut hi. Christmas leh kumthak lop hun lah beita ahihmanin student te’n leng a maban ding uh mengmuhna aneih uh poimawh  a, hunpaisa in lehkha ana sim gina man kei mahle uh kha 1 val zek lel khawng kisakkholhna hun nei uh ahihman in hiai hunbi hoihtaka amansuah kei ua leh lawhchinna chance lian mahmah lai ahihdan atheih ua, lungke mailou a, lehkha mah hon buaipih a, pan hon lak taktak uh poimawh hi. Hiai hun tomchik sung amanpha theipen a hon zat uh ideihsak petmah a, tua banah, nulepa te mah in leng tate ompih tam a, Biakinn a kikhopna hiam ahihkeileh moukhak/moulop/tousa gawh leh adangdang program tuamtuam om mahleh tuate ahitheitan a nawlkhin a, innkuan sung a kikhopna neih a, tua zawh chianga tate ompih a, a lehkhasim uh etkaipih hun laitak ahi. Galvan leh vanzat chi tuamtuam in khawvel ah kidouna om mahleh ataktak a ‘cold war’ a kidoupen lehkhasiamna leh pilna a kitaitehna hi thouthou a, mi tamtakte’n 2030 vision tanpha genban mahle uh eite’n tuapan kum 3 (2020) tanbek mengmuhna neikholni chi ut ihi hi.

Manipur state assembly election hun lah hong nai hulhul mai a, candidate ut (intending) lah ki behlap deuhdeuh mai, sitting te hi’n MLA tuh sawmte sa vitvit a a om hun uh leng ahi hi. Manifesto puangkhe dia program nei lah tam, innlut chialpina nei lah tam, khaw hausa tuamtuam leh mipi tawh program neilah om touden hi. Chih phetlouh in sitting-te thukhat hitaleh intending candidate hunkhop in atheihlouh kal un sum hunkhop sengta ding un gintakhuai hi. A ziak ahihleh, kha masa vel apan a tenna innte uah a zing leh nitakin ann ne pumdim mai ua, pocket money ngen pawl tawh, damlouhna vai banah, naute’ school fee di, antang man di, bahara di chih leng nget theih ngetmawh a ngen mi tam mahmah hi. 

Candidate-te apan sum nget kichi i chiindan khat uh ahi a, poi mahmah hi. Poi ichih hangin  aloutheilou ahihna tanleng om veve hi. Voter tamtakte’ ngaihdan in telching hong hile uh leng hamphatna akhawnungin ki tang tuanken teh, tu hunpen a nek hun ahi chih ngaihsut in nei ua, dik veve hi. Ahihziakin, kizuakna chikhat hi a, candidate te’n telching a a om chiangun ka leisa ahi chih mah paipih veve ding un gintakhuai hi. Mipi’n candidate te apan sum chengkhat leng lamenlou in siangthoutakin i vote manphatak khe lehang, amau leng telching ahih zawh nungchiang un kisuanlahna liantak hon nei ding ua, development thil tuamtuam hon semkhe zaw ding uam chih bang mipi’n leng i ngaihsut uh poimawh hi. Tuni chiangin sumsenna asang mahmah ta a, Election Commission of India in guidelines abawlna ah candidate khatin Rs 20 lakhs kan seng theilou chih himahleh, ataktakin candidate khatin Rs 1 crore tan aniampen in hon sengkha maithei uhi. A sum sente uh amuhkikna dingun kum 1/2  hong lut dinga, mipi’ adingin vangtahna hiding hi. Huaiziakin mipi lamin leng candidate-te apan sum neksawmna chiinlouh hamham dingin deihhuai  hi.

Manipur leitang i et chiangin,  90% bang singtangbial (rural/tribal area) ahi hi. Phaizang bialah MLA 40 om in singtanggam ah MLA 20 om hi. Tu-le-tu in constituency delimitation tawh kisai bangmah i genban kei a, hih leng hih ahikei ding. Ahihziakin, singtangbial a candidate sawm peuhmah in vision hoihtak aneih ua, tuapan kum 3 (2020) tan bek a sepkhiak sawm uh leh mipi khualna ziaka policy leh program tuamtuam aneihte uh kibulphuhna hoihtak leh mengmuhna sautak tawh pan alak uh poimawh hi. Election kuan chauh a gam le nam iit ihih khak ding lauhuai  a, mipi’ adingin leng pilvanna ding tamtak om hi. Nidang hundan a volunteer hat a thagum a vote capture chihte tuni chiangin hong hithei nawn khollou maithei a, strategy khawh siamsiam, mipi’ lungtang zou pa pen in vualtungtuanna hon ngah ding un gintakhuai hi. Bang lampi tawn (approach) ding ihia chihte ngenteltak a ngaihtuah vengveng candidate te’n lawhchinna ngahthei mahmah a, MLA te’n power anei ve ua le chih ziaka pawng ut phut mawkte guitung hetlou hi.

I gam ah sep le bawl tuak tampi petmah om hi. Sianthouna (sanitation) tawh kisai leng genban naikhang, damdawi inn leh kikawmtuahna lampi mahmah awlmawhhuai hi. State government in district thak 7 hon bawlkhia ua, developmental aspect chikhat bel ahi. Himahleh, kikawmtuahna lampi a hoihtuan kei leh huai in om zia nei tuahlou dinga, phaizang bial chauh pansan (base) in nei veve ding uhi. Tu in leng Sub-Divisional headquarters tuamtuam leh BDO office te atamzaw district headquarters te ah function sakin om a, a zarzoutu ding mipi a vangtah suak lel hi. Medical thil ah leng PHC/PHSC i chihte a ginat keileh mipi a buai, naupangte kap hun (immunisation) hiam ahihkeileh polio leh govt official program hun chauh i posting na mun a va pai ihihleh abial mipi’ vangtahna hinawn hi. Ahitakin, government policy te ahoih a, education vai ah leng school omlouhna mun ah school less teacher tanpha la ua, tualou in naupangte’ nek ding ann chi tuamtuam bang avangkim in hawm lai ua, hiaite singtangbial a om i mihinpih naupangte’n a taktak in a hamphatpih na ding uam chih ngaihtuahhuai hi. Mahni posting na mun tanpha mu nailou a lawh la gige government employee bangzah I om ding ua? Ahihkeileh, I sepna mun khatvei mahleng va sikkha lou a pension tanpha leng i om kha ding uam? Lungkhamhuai!

Tuapan kum 3 tanbek a i bial a kikhekna  (change) banghiam bawlzou dia iki nepkei leh MLA bangleng tuh vetlouh ding ahi a, i sianthouna hihbuah louh dingin deihhuai hi. A poimawhpen zaw MLA te mah hi veve hi. State capital a a official quarter a om den, kumkhat a abial uh 2 veikhawng veh lel, huai leng Chief Guest ding a sapna ziak chih khawng hilai, huchi ahihleh government employee te a posting na mun ua pailoute va mawhpaih theihluat hituanlou abatna tan om hi.  Chief Guest a panna pen bang hilou a, a bialsung ua developmental project adia sum paite bangchi banga ki semsuah (implement) hiam chih amun mahmah a ava etkhiak pen uh bialvehna leh mipi khualna hizaw hi. Mipi’ khantouhna dingin PMGSY poimawh mahmah a, huailou in mipi tamtak kingakna MGNREGA lah hichi himaita a, mipi’ palaite kalsuan hun hita hi. Tua ziakin, intending candidate tuamtuam te’n leng thil saupi amuh batlouh tawp un Vision 2020 tanbek hon nei mahmah le uh igam ah banghiam kikhekna chikhat hong om dingin gintakhuai mahmah hi.