Manipur Express | January 9, 2017

HEADLINES:

Aadhaar nei nailoute’n Aadhaar enrollment slip/application copy neih ngai ding

MGNREGS ah ‘Aadhaar’ aloutheilou (mandatory) hiding

Source: http://images.indianexpress.com/

New Delhi, Jan-8: India gamsung rural bial a tengte adia kumkhat sung a ni 100 sepna muhtheihna Mahatma Gandhi National Rural Employment Guarantee Scheme (MGNREGS) ah April 1, 2017 apan in Aadhaar (12-digit unique identification number) alou-theilou (mandatory) hiding chih Cabinet Secretariat thusuak om hi. Huai thusuak dan in MGNREGS scheme nuai a register kibawlsa kuapeuh in Aadhaar a neih ngai ding a, anei nailoute’n leng March 31, 2017 tan adia enrollment process pailel chih a kilat theihna enrollment slip/ application copy a om poimawh ding hi.   

MGNREGS scheme beneficiary-te’n April 1, 2017 mateng ration card, driving licence, voter identity card, Kisan passbook + photo, job card zangthei lai ding uh hi’n leng a, Aadhaar nei nailoute’n Aadhaar enrollment slip hiam a kisaipih thuneitute kiang a Aadhaar application piak a omsa copy a show theih uh ngai ding hi. Aadhaar/enrollment slip/application copy pen India gamsung pumpi adia identity leh address chetna (proof) a zat hiding chih ahi.  

Tuabang kalah, Centre in alou theilou a Aadhaar zat ding tawh kisai in J & K telin state hunkhop ah order suahkhe ta a, kuapeuh in baihlam tak a ngah theihna di’n leng panlak sunzom hi’n thusuak in taklang hi. Government in Section 7 of the Aadhaar (Targeted Delivery of Financial & other Subsidies, Benefits & Services) Act 2016 pansan in nei chih ahi. Consolidated Fund of India (CFI) apan government in subsidy a piakkhiak MGNREGS pen mimalte’n a hamphatpihna ding in Aadhaar number a neih teitei ngai ding a, neih leh neihlouh etchet hiding chih Section 7 ah taklat a om hi’n leng gen hi. Government in financial year 2015-16 sung in MGNREGS scheme tawh kisai a zat ding in Rs. 3,800 crore a bikhiah nung in financial year 2016-17 in Rs. 38,500 crore bikhiah nawn a, ahi ding bangtak a beneficiary-te’n a muhna ding leh sum thelthang a om louhna ding a Aadhaar alou theilou a zat ngai ding chih ahi hi.

Aadhaar tungtawn in MGNREGS leng Direct Benefit Transfer (DBT) scheme lak ah telsak hiding inleng kigen a, welfare scheme thelthang a om louh ding deihna in January 1, 2013 in DBT scheme honkhiak in omta hi. DBT pansan in beneficiary-te’ bank account ah tangtak a thunsak hiding hi’n leng kigen hi. Centre government in department tuamtuam leh state government teng kiang ah DBT scheme keklian di’n leng theisak hi. Government scheme himhim DBT a paisak ding leh DBT Mission a taksuah zawksem ding deihna in government in kum paisa in Cabinet Secretariat in a etkai di’n koih a, sepkhiakna lam etzuina (monitoring) tawh kisai pen Prime Minister’ office mawhpaw sak hi. MGNREGS tawh kibang sim khat ahihleh pensioner lakhs 50 leh subscriber crore 4 vel omna EPFO (retirement fund body) inleng social security schemes beneficiary-te kiang ah Aadhaar pen alou theilou hisak uhi.

TUALSUNG:

ADC Chairman in ngen

Lamka, Jan-8: Langkhanpau Guite, Chairman ADC/CCpur in Mizoram a zinna uh tungtawn in mipi lakah ngetna bawl a, tua tawh kiton in Mizoram CM Lalthanhawla leh CAF Minister Lalmalsawmate lemsakna bangin Mizoram apan thautui (petrol & Diesel) a tanker nih a puaklut hiding a, tua ding tawh kisai in Sinzawl gam a lei (bridge) a hoihlouh ziakin tanker tai ngamlou ua, Guite bawl a om Bhartia Infra Project Ltd. a works Manager kiangah bawlhoih di’n ngen ua, aman Chairmante kiangah ni 3 hunpe di’n ngen a, tua zawh chiang a report DC/CCpur kianga pedingin chiam hi. Huai bawl zawh ahih chiangin tanker tungtawn a thautui Mizoram akipan laklut hidin gen hi. Huai banah, khawpi sung a thautui kiman theipen a zuak ahih theihna ding a lamkal a tax kuaman la lou di’n leng Chairman in ngetna nei khin hidan in gen a, hiai tawh kisai a kuapeuh in kithuahpih leng gen hi. Thautui bel khawpi sung puaklut chiangin Town Hall ah mipi kiangah zuak hidin gen hi.

Chairman in agenbehna ah, khawpi sung ah thautui sianglou Burma lam a rong nuh tawm om chihthu ah hiai bang thilhoihlou kuaman hih nawnlou din ngen a, huchibang a hih teitei om a, gari kisia om a matkhiak ahih ua leh akituahpih bang action lak hidin leng gen hi.

Lamka khawpi sungah guta lang

Lamka, Jan-8: Lamka khawpi ah tualai in guta honkhat lang in, veng tuamtuam ah inn luh uh a, sum leh van la sek uh hidan in kigen hi. Huai  tawh kition in zan nitak in guta pawlkhat in D. Phailian a  G. Nengzalal Guite s/o (late) Thongzakhup Guite tenna inn luh uh a,  asung ah sanakhi leh sum hul tamtak gu uhi.

Inn neite gendan in, amau zan zingkal akipan kitenna programme khat atel nitak dak 9:00 vel in inn pai uh a, a omlouh kal un guta pawlkhat in a inn uh luh uh hi’n gen uhi. Gutate ahihleh inn huangsung ah lut in inn phaitam lam kongkhak kalhong in asung ah lut uh a, inn neite bed room a steel almirah kalsia  in asung ah kikoih sum hul Rs. 1.4 lakhs leh inn neite nupa’ sanakhi  nih la uh hi’n gen uhi. Gutate’n hiamhei sek leh tem zangin almirah kalsia uh a, guk ding a zongna lam uah innsung van tuamtuam phekdalh in tuanglai ah thang zengzung in taisan uhi. Hiai tawh kisai inn neite’n police ah complaint bawlsawm uh hidan inleng gen uhi.

Student tamtak JNV entrance ah tel

Lamka, Jan-8: JNV/Tuinom ah academic session 2017-18 a class VI zilding entrance test tuni zinglam dak 11:30 apan sunnung dak 1:30 tan in educational block 6 ah om a, CCpur Dist. ah candidate 1215 om hi. CCpur block a candidate 685 te’n Phungkhothang govt. H/S ah entrance test nei ding uh a, candidate 241 absent uh, ZEO/CCpur in entrance test te enkhia hi. Henglep block a candidate 108 te’n Tuila khua a Vumhao H/S ah nei uh a, Singngat block a candidate 20 te’n Singngat H/S ah  nei uhi. Thanlon block a candidate 71 te’n Thanlon H/S ah nei ding uh a, Tipaimukh block a candidate 165 te’n Parbung govt H/S leh Samulamlan block a candidate 166 te’n Kangvai khua a INA Memorial H/S ah  nei uhi. CCpur block chihlouh block 5 ah student absent zah bel theih hilou hi.

Biakinn kikhawm tawp kipuk in si

Lamka, Jan-8: Upa Suankhopau (67) (late) Lunthong of Saipum tuzing biakna kikhawm tawp pukphut in district hospital paipih himahleh lamkal ah si a, aluang Jan. 9, 2017 in Saipum hanmual ah kivui ding hi. District hospital ah duty nurse-te gendan in, sunnung dak 1:15 in casualty puaktung ahih hun in etkol theih hinawn hi’n gen uhi.

Upa Suankhopau ahihleh tulelin Khuga Sadar Presbytery (KSP), Saipum saptuam a local chairman lenlel hi a, tuzing biakna kikhawp hun ah leng thugen in pang a, kikhawm tawp biakinn konga ding kawm a houlim thakhat a kipuk in khua phawtlou hi’n kigen hi. Ama’n, heart problem leng nei ahihna ah stroke ziaka kipuk hiding in kigen a, a thahatlai  in kum 30 val evangelist a pangin Mizoram leh Myanmar telin mun tuamtuam ah Pathian thugen a kuan ngei hi’n kigen hi.

Course zou leh adamsiang mi 108 pha

Lamka, Jan-8: Revised National TB Control Programme/Dist.TB office, CCpur ah January-December 2016 kum 1 sung in OPD case 23247 om a, huai lak ah mi 1713  khaksuah (sputum) a thak in test sak in om uh a, mi 374 khaksuah alui test (follow-up) in om hi. Huai hunsung in TB positive 76 muhkhiat hia, TB natna neilou mi 33 pha a, TB damdawi course ching a ne leh adamsiang kigawm 108 pha hi. Mi 7 te’n TB damdawi a course kim in ne mahle uh damsiang zoulou uh a, kum 1 sung in TB ziaka si official record omlou hi.

ZEO staff-te kituah ding

Lamka, Jan-8: CCpur Govt H/S a room kizangloute ZEO/CCpur in temporary office azat ding in puahthak uh a, Staff te’n January 9, 2017 in Synod House, Hill Town apan office thak mun ding ah kisuan in social work nei ding uhi. ZEO’s temporary office ding bel DC/CCpur in January 11, 2016 zinglam dak 10:00 in hong ding a,  Upa L. Taithul in Pathian kiangah lan ding hi.

DTO te’n tamtak mukhia

Lamka, Jan-8: Dist. Transport Office/CCpur te’n January-December 2016 kum 1 sung in revenue Rs. 86,10,273 mukhia uh a, govt ah challan submit uh hi’n kigen hi. Huai sung mah in gari registration kibawl thak 1000 val pha a, 2-wheeler (bike/activa etc) tampen in 1039 phazou hi.

Road Safety Week zang ding

Lamka, Jan-8: India gamsung pumpi ah January 9-15, 2017 sung Road Safety Week, 2017 zat hiding a, Lamka a Traffic Control Police te’n leng zang ding uhi. Huai hunsung in postal campaign, road marking leh special drive nei ding uh a, mipi leh gari taituah te’n kithuahpih chiat ding in ngen uhi.

News Hawker ding kideih

Lamka, Jan-8: Imphal a Paite Veng area/Changanggei area ah Manipur Express News Hawker lemtanlouhna ziak in news hawmzawm theilou ding a, ahawm nuamte’n Imphal a Staff reporter, Kaphnun (contact No. 9436081348/ 8732020635) thuzak theih ding hi.

Pat leh ahekna khawl vang

Lamka, Jan-8: Ipu-Ipa te’n Pat (cotton) leh patkhawl(helhawt) zang in amau ading tualpuan, tual kawlzal hoihpipi bawl uh a, nungak te’n pasal aneih dek chiang un pat (cotton) apan kibawl puanpi leh kantha kengzel uhi. Lamka ah leng pat leh ahekna khawl muh ding tawm mahmah a, himahleh Lamka khawsung ah pat (cotton) leh ahekna zang a puan ding kibawl muhlai in om hi. Khawvel khanthouh dungzui in tunai khangthak tamtak in pat (cotton) leh ahekna patkhawl (helhawt) thei nawnlou in nungak te’n pasal aneih hun un lupna a phah ding Dunlop leh branket kensak in omta uhi.

Video singles khahkhia

Lamka, Jan-8: Pingpei Pictures in a bawl ‘Tua Chi Ding Hipah Le La Lou’ kichi Music Video Singles tunitakin Hiangtam Lamka a programme khat ah khahkhiakna nei uhi. Hiai Music Video ahihleh ‘The Godfather Themesong’ pansan a kibawl ahihbanah Chynzou Tonsync leh T. Benson in aphuah uh hi a, 10-Studio ah recording bawl a om in, Youtube leh Local Cable ah khahkhe ding uh hi’n kigen hi.

Drugs Cell te’n zu hunkhop mankhia

Lamka, Jan-8: Inspector R.K Anil Singh, OC Police Station makaih CCpur Dist. Police department a Drugs Cell & Anti Alcohol Unit te’n tuni’n Khumujamba area ah zu zuakna mun bangzahhiam check bawl in, Indian Made Foreign Liquor (IMLF) leh local zu kigawm litre 18 vel man uh a, Police Station a malkhana (store room) ah koih uhi.

Gospel video album 2 kihong

Lamka, Jan-8: H. Hauminlian in abawl ‘Itsiem Mangpa’ kichi gospel music video album tuni’n Lailam Veng a ZPCS Sunday School hall ah honna om hi. Huai ah Chief Guest in Khamthang, Special Contractor pang in hongkhe ding chih himahleh a omlouh ziakin a tapa Khaibiaklian in hong a, Rev. Hangpi Manlun, bialtu pastor  in lan hi. Functional president in CT Lian Guite, New Lamka (West) MDC pang a, mun tuamtuam akipan deihsak leh ngainatu tamtak paikhawm ua, lasiam tuamtuam inleng uap uhi. Album ahihleh Naomi Chiinhauniang Zou in a produced hi a, asung ah  la 11 om hi. 

Huai banah Rody Ramneihlun Pulamte in asak 'Hringna tui a ruong del del' kichi gospel music video album Rengkai a Unity Church compound ah Chief Guest in M. Gouzamang Guite, EM/ADCC pangin hong hi. Huai album ahihleh a 1veina hi a, Joseph Lalditsak Pulamte in a produced, album sung ah la 13 om in a deihte’n Rs. 150 pia in leitheih ding hi.

SSC Admit Card download theih

Lamka, Jan-8: Staff Selection Commission (SSC) saina in North Eastern Region bialah January 16-22, 2017 sung in Combined Higher Secondary Level (10+2)  Tier-I examna om ding a, Jan 7-15, 2017 sung in www.sscner.org.in ah Admit Card download theih ding hi. Tulai buaina ziakin Imphal Centre ah Exam hun ding January 15-22, 2017 dia bikhiah thak in om a, Edusurge, Imphal ah Jan 7, 2017 a CHSL 2016 Tier-I CBE om ding pen Jan 15 apan neih dia bikhiah thak in om hi. NER biala Combined Graduate Level Examination-2016 Re-Exam nei ding candidate 28  te min list leng website ah puankhiak in om hi.

SUUNNA:

Chinzagou of Tuinom Khopi, CCpur  tuni nitaklam dak 5:00 velin liver cancer in si a, Jan 9, 2017 in kivui ding hi.

Chinzakhum (42) s/o Ngulngai of Hebron veng, New Lamka tunitak dak 7:20 in Dist Hospital ah sinna in si a, Jan 9, 2017 in YPA hanmual, New Lamka ah kivui ding.

STATE THUTHANG:

Gari 500 val hongtung

Imphal, Jan-8: Security escort khauhtak tawh kithuah vanpua truck tuamtuam 519 zan a Jiribam a hong kipan tunitak sawt nung in Imphal hongtung hi. Huai garite lakah LPG bullet tanker 54, diesel tanker 78, Kerosene (SK-oil) tanker 11, petrol tanker 44, damdawi leh live saving drug pua truck 4, anntang pua truck 9, cement pua gari 131 leh gari dang 168 tel uhi.

ECI ah complaint bawl 

Imphal, Jan-8: BJP Manipur Pradesh te’n New Delhi a Election Commission of India (ECI) ah tuni’n Ibobi makaihna nuai a state govt. in Model Code of Conduct (MCC) kalh in dept. tuamtuam adia backdoor appointment tawh kisai complain bawl uh hi’n kigen hi. Huai tawh kisai in BJP MLA Th. Biswajit in Manipur telin state 5 a election ding tawh kisai a BJP palai te’n New Delhi ah meeting a neih ma in ECI Director General va kimuhpih in Manipur a MCC kalh a recruitment drive leh appointment order tungtang ngenteltak a theihsak banah huai tungtang enkai ding leh hypersensitive polling station-te ah voter te’n lauhna neilou a vote a khiak theihna ding ua Central security force personnel kiching koih ding a ngetna bawl hi’n gen uhi. 

Akigendan in Election Commission of India (ECI) in complain a muh uh dungzui in Manipur govt. nuai a dept. tuamtuam a Jan 2, 2017 akipan promotion leh appointment order tawh kisai a thuchian kimtak pelut ding in state govt. theisak uh a, Ibobi govt. in kha 3 paisa apan recruitment drive kinawh tak in sai uh a, poll schedule puankhiak nung tanpha in department khenkhat ah backdate in recruitment tawh kisai result leh appointment order suahkhia uh hi’n kigen hi.

Anntang pua truck mei in kang

Imphal, Jan-8: Tamenglong town shop a ding anntang pua truck khat zan nitak in Imphal-Jiribam lampi ah ‘mechanical failure’ ziak in mei a kang hi’n gen uh a, himahleh thudang khat ah meltheilouh pawlkhat te’n a hal uh chi’n gen uhi. Huai tawh kisai Police thusuak in a taklatna ah Truck driver Aning Gangmei (22) s/o Khangthaipou Gangmei of Sibilong village (Barak) in mechanical failure ziak in gari mei in kang a, blockade leh counter blockade tawh kisai kha lou chi hi. Akigendan in Tamenglong district HQ a IB Bazar a dawr khat adia anntang bag 250 pua truck (No. MN07C-3475) zan nitak dak 8:30 velin Kotlien village gei a New Leijang mun ah mei in kang a, gari neitu Paupu Rama Shankar of Dewaria (U.P) tulel in Tamenglong IB Bazar ah om in kum 20 paisa apan grocery shop bawl hi’n gen uhi.

DEO/IW in MSPDCL leh PHED-te tawh meeting nei

Imphal, Jan-8: District Election Officer (DEO) Imphal West saina in Lamphel ah tuni’n meeting om a, huai ah Water Supply Dept. (PHED) leh Manipur State Power Distribution Company Ltd. (MSPCDL) palaite tawh maban 11th State Assembly Election 2017 hun a water supply leh electricity telin Assured Minimum Facilities (AMF) piak ding in thukim uhi. Huai banah Imphal West district a polling station teng ah January kal tawptan in a kintheilam a AMF nuai a toilet, ramp & electricity piak ding tungtang genkhawm uhi. Robert Singh Kshetrimayum, DEO/Imphal West in State/District Level power Control Room telin CEO office, DEOs leh Returning officer, govt. Press leh Counting centre-te ah nawngkaina omlou in power supply om theihna dia MSPDCL-te panlak leh nasep ding gen a, huai banah counting Centre leh Government Press-te ah Standby generator koih ding in palai paikhawmte theisak a, PHED Dept. te’n state/district level PHED Control Room bawlkhia leh contact detail-te State Election Control Room (24 hour service)-te theisak ding in gen a, PHED dept. te’n CEO, DEOs, ROs, Govt. Press leh Counting Centre a Transport Cell office teng ah special water supply koih ding in leng theisak hi. Meeting hun ah department pailai in Dy. Gen. Manager Imphal Electricity Division II Oinam Kartik Singh, Executive Engineer Maintenance Division PHED Ksh. Lakshaheb Singh, Executive Engineer Imphal West Division PHED K. Ibochou Singh te’n uap uh a, huai ah MSPDCL, PHED Dept., DEO Imphal West a election team a RO leh staff-te leng tel uh hi’n kigen hi.

Workshop om

Imphal, Jan-8: KSO General Headquarter (KSO-GHQ) leh Kuki Research Forum (KuRF) saina in zan in Kuki Inn Imphal ah Anglo-Kuki war 1917-19 thu tawh kisai in One day workshop om a, huai ah moderator in Dr. Thathang Vaiphei leh Dr. Robert Thongkholal pang uh a, resource person in Dr. Sonthang Haokip, Dr. Sheipu Kipgen, Dr. Jangmang Guite leh Dr. J. Lamboi-te pang uh hi’n kigen hi. Huai hun ah research scholar120 vel tel uh a, British India khangthu a Anglo-Kuki War 1917-19 pen chituam a, kum 3 dai in buaina in International border liantak huam a, colonialism douna, suahtakna leh zalenna gupna, singtang gam a kivaipuakna tuam vengbitna hi’n gen uh a, workshop hun ah Anglo-Kuki war centenary celebration kum 3 (2017-19) sung zat ding banah huai sung a awareness campaign leh workshop sai ding in gen uh a, Dr. Sonthang in ‘Causes of Anglo-Kuki War’ tawh kisai a paper luikhia a, Dr. J. Lamboi, Dr. Sheipu Kipgen leh Dr. Jangmang Guite te’n thugenna nei uh hi’n kigen hi.

Passenger bus tailouh ziakin nawngkaina tun

Kangpokpi, Jan-8: National Highway 2 Imphal leh Senapati kikal ah passenger bus a tailouh ziak in niteng a khualzin-te a ding in nawngkaina lianpi tun hi’n gen uhi. Senapati passenger bus service te’n Dec 19, 2016 ni a UNC volunteer te’n Ukhrul zuan gari-te counter blockade bawl te’n a hal uh thukkikna in Senapati a Mt. Everest Hr. Sec. School gei ah Koubru Express leh Tata Sumo a halsiat nungun service khawlsak uh a, huai nung ni 20 valta mahleh Senapati zuan a passenger bus tai ding tunitan  muhding omlou a, khualzin mite leh huai bial mipite adin haksatna tun hi’n gen uhi. Senapati passenger bus service omlouh ziak in Kangpokpi leh Senapati kikal ah Diesel Auto te’n service pan uh a, himahleh passenger te’n Kangpokpi DHQ - Senapati DHQ leh Senapati DHQ-Kangpokpi DHQ tunna ding in mikhat in Rs. 70 pia uh a, bus service om hun ah Rs. 10 kia seng uh hi’n kigen hi. 

Senapati apan Imphal zuan ding te’n Diesel auto in Kangpokpi DHQ tan pai uh a, huai apan Imphal tunna ding in Kangpokpi-Imphal passenger bus-te ah tuang nawn uhi. Passenger te’n economic blockade leh counter blockade bawlte kal ah kithuk kikna ziak in nautang thuaktu in pang uh a, Imphal-Dimapur lampi ah Kangpokpi DHQ tawn in Senapati leh Imphal kikal ah passenger bus service omlouh ziak in mun tuamtuam phakna dia sum tamtak a bei banah haksatna lianpi tun a, Senapati lam a kiphinna neite tunung in gari kihalsak tawh kisai a thiltung om nawnlou ding in chiam uh a, himahleh Senapati-Imphal bus association te’n gari service lou dia thutanna abawl uh a khek ding uh hiam chih theih chet hinailou hi’n leng taklang uhi.

Handgrenade mukhia

Imphal, Jan-8: Imphal West Police station in a huamkhak Thangmeiband Hijam Dewan Leikai a Y. Sushil Kumar, tulel a Bishnupur DSP zi 2na tenna inn ah tuni zinglam dak 9:50 velin handgrenade khat muhkhiak hi’n gen uhi. Huai tawh kisai police-te theihsak nungin Police Bomb Squad te’n handgrenade vala khia uh a, UG group apan sum demand na thu tawh kisai hiding in gen uhi.

Men’s Fitness Challenge kipatna in Marathon om

Imphal, Jan-8: Cross Fit’s ‘First State-Level Men’s Fitness Challenge 2017’ kipatna in tuni zingsang in Nambol apan Teddim Ground tan ah Marathon om a, huai ah Norem Tokyo minute 30 leh second 20 a tung in 1na la a, Oinam Enouch leh Haobijam karnajit te’n 2nd leh 3rd  la uhi. Marathon hun ah Jan 15, 2017 in Cheiraoching mun ah stage two ‘Mountain Running’ adia mi 50 telkhiak hi uh a, huai hun ah level nawn adia mi 30 telkhiak hinawn ding uhi. Huai zawhin Participant mi 30 telkhiak-te Nagamapal a Cross Fit Manipur mun ah ‘Plank Core’ challenge ah kidem ding uh a, huai ah Grand Finale ‘Push Up’ Competition adia mi 10 telkhiak hiding hi. Tuni a marathon te bel JNIMS te’n kithuahpihna in First Aid  van tawh kituah Ambulance zang sak uh hi’n kigen hi.

Mi 2 sisa in kimukhia

Imphal, Jan-8: Meltheihlouh galvantawi te’n Jan 6, 2017 nitak dak 7:00 velin N. Gamnom village hausa S. Otkhomang (57) leh Chairman leader Tilpao Haokip (51)-te pimang uh a, mi 2-te pikhiak hun ah khaw mipite’n a delh zui louhna ding in thau tanpha kap uh a, N. Gamnom village apan gamla lou ah mi 2-te sisa in tuni a muhkhiak hi’n gen uhi. S. Otkhomang tapa in thiltung tawh kisai Moreh Police Station ah complain bawl a, huai ah galvan hoihtak tawi maituam pawlkhat in apa leh saptuam makai khat pimang in khawsung mite suklauna dia thau kap uh chi a, Hill Tribal Council Moreh leh Kuki Chiefs’ Assn. Moreh Block te’n mi pimang-te kiangah mi 2-te damtak a khahkhe din ngetna abawl bawl mahle uh sisa a muhkhiak hi uh a, thiltung mawhpaihna in N. Gamnom village authority te’n CSO tuamtuam kithuahpihna in Chandel district ah Jan. 9, 2017 in dakkal 17 sung bandh puang uh a, zingsang dak 8:00 bandh kipan ding hi.

TUNI THUPI:

 “Gilou hih dingin mipi na zui ding ahi kei; vaihawmna kai kawi dingin tampi nungzui dingin a panna uah thu na gen ding ahi sam kei:” 

– Eksodas 23:2

EDITORIAL:

Election leh Exam hun

Kum 5 halin India gamsung pumpi ah mipi palai ding kitelna om zel a, tu in leng ahun hongtung nawnta a, tuapan hun sawtlou sungin Manipur state assembly election i phu nawn ding uhi. Hiai hun tawh kituak mahin festival tuamtuam leng omlai a, huchilou in a poimawh mahmah Class X leh XII te’ exam piak hun leng hong hiding hi. Election bouruak leh laisim hun taktak hong kituak ding ahihmanin pilvan poimawh a, hiai hunbi zang siamte a hampha hilel ding hi.

Kitelna (election) pen ahitakin gam le nam adia khantouhna sang mahin mimal hamphatna hisek tangpi a, huchi kawmkalah, exam a lawhchinna pen mimal leh innkuan adia hamphatna thupitak ahihdan ithei vek uhi. Hamphatna detdou kichi bangleng om khathei a, a huihzap in hon sukkhak ziak lel a hampha kha zual, sum le pai a puk i chih bangleng om a, tua igen nop pen i khantawn hinkhua a ding hikei mahleh, ikhuak pilna tungtawn a hamphatna i ngah ding hizaw hi.

Election hun a sum le pai a kizuak a, lakh 1/ 2 imuh in khantawn hon daih mahmah lou dinga, tuasang mahin kuhkaltaka lehkha i sim a, gahsuah pen guitung zaw mahmah ding hi.  Tuni chiang ngialin Manipur state government ah sepna muh kichi haksa mahmah  a, sum neinei ching, laisiam tawk lengle sum ineih kei leh kichai vawt (open secret/ back door) chih ding hita hi. Tua ziak mahin centre service ikidelhhuan uh hunta hi’n theihtheih in om hi. Vangphathuai takin Lamka khawpi a Staff Selection Commission (SSC) in exam centre hon hong zenzen ua, huai tungtawn in mi hunkhop in sepna i ngahta uhi. Lamka leh Imphal kalah bandh om zihzeh mahleh SSC nuai a exam sai ahih chiangin CCpur college telin mun tuamtuam ah zalentakin exam i petheita ua, kipahhuai mahmah hi. 

Pathian vualzawlna ziakin tulelin Manipur state in DGP in LM Khaute, IPS i nei ua, police lam tawh kisai in amah sulnung zui ding, abiktakin Non-Naga te’ lakah mi hunkhop i om thei ua, vualzawlna thupitak ahi. Himahleh, administration line ah mi i vang mahmah uhi. Manipur Public Service Commission (MPSC) in post awng hunkhop hukdimna dinga advertisement abawlna lak uah tutung in ei Non-Nagate’ lak ah mi bangzahhiam i suakta a, i maban ding uh khangthakte’ lakah kinga ban mahmah ahihdan theihchet hunta hi. Nambing hilou in collective deuh a kithuahkhawm hunta a, ilak ah CDSU kichi bangleng suk hat thak a, siamsinna lam mahmah pibawl leh hanthawn hunta hi. Pau kithei tuah, tawndan kibang, ngaihdan kibangte’ kalah kikhen hun nawnlou hi. I khuak pilna in phaizangmite’ pilna leh siamna banlou ahihdan kilang a, huchi kawmkalah, ngaihdan neu chikchik kikalhna ziaka kitheihsiamlouhna a om nawnlouh hunta hi.

Tunung sawtlou in Union Public Service Commission (UPSC) in leng civil services tawh kisai exam na dingin thusuah hon bawl ngei ding ua, Manipur state assembly election husa leng hong ngaih mahmah ding hi. Bangteng ituak zongin sinlaite adingin laisim tam poimawh mahmah a, thubuai tuamtuamte ah kikaih buaisak hun hinawnlou hi. Election vai a buaite abuai un buai uh henla, himahleh, student te’n i lehkha simna mah buaipih ni. Election official te’n leng hiai tungtang ah guidelines khauhtak hon bawlbeh uh deihhuai a, BSEM/CoHSEM ahihkeileh CBSE nuai a student t’ exam hunding ahihman in loud speaker zattheihlouh, mipi lungphawng thei dia bangmah hihlouh ding chihte (do & don’t’s) hoihtak hon suahkhiak uh deihhuai hi. 

Central Board of Secondary Education leh Manipur Board of Secondary Education ban ah, Council of Higher Secondary Education, Manipur exam a hong nai nawn mahmah ta a, laisim hun ahi. Election vai leh thuleng tuamtuam te adiakin internet leh mobile phone a thu kigente ah kihih buai hun hinawnlou a, table tunga lehkha sim hiathiat hun ahi. Exam peding ihih leh thu leng tuamtuamte ibuaipih louh a, i subject mah ibuaipih pen i khawsuahna ding leng hizaw ding hi. Election vai ah buaina tuamtuam leh thawmging ngaih taktak hong om mahle leng, i laisimna mah ngaih poimawh huai hi. Election i chih kum 5 hal zel a neih hi a, tua zawhchiang in mipi palai kikheng tou zel hi. Laisiamna leh pilna tawh kisai nekzonna taktak leh innkuan detdoutak a omna ahihman in lehkha sim mah pibawl poimawh hi. Mahni siamna leh chihtakna tungtawn a golhgukna tellou a sepna mu peuhmah in politician te mai etna leh zahtakna neilou himhim ua, huai chauh leng a hamphatna uh ahi. Tua ziakin MDC/MLA/MP te’ nuai a va kunlouh a ‘principle’ neitak kawm amaute’n hon leh zahtak uh leng deihhuai mahmah ta hi. 

Kuapeuhin i theih ding ua poimawh  ahihleh, election sangmah in education (siamsinna) poimawh zaw ahi chih ahi. Siamsinna pen i tunung kum tamtak khualna hi a, kisekkhiak hun ahihdan kitheihsiampih poimawh hi. Hun paisa adiakin 2016 kum a thubuai-labuai tuamtuam ituahte ithei vek ding ua, tua ziakin tukum (2017) pen ‘Embracing’ ahih ngeileng lamen hang. Tua ziakin lemna leh muanna omna ding (nonviolent- peaceful co-existence) ahihtheihna dingin kuapeuhin mawhpuakna liantak inei thei uhi. Election vote campaign hong sousang mahmah thei a, ahihziakin, political party tuamtuamte’n exam peding student-te khualna tawh hun zatdan pilvang  ni. Huai kawmkawm in exam peding naupang (student-te) leng election vai ah kisubuai keile hang chih deihhuai hi. Election leh Exam hun a kituak chih ithei a, hiai hunbi a zang siamte’ adingin a hinkhua uah lawhchinna om dingin leng lamen hang!