Manipur Express | January 12, 2017

HEADLINES:

Ibobi’ tapa Okram Surjakumar in election ah tuh ding:

Congress party candidate dingte hihfel di’n Manipur CM Ibobi in zan in New Delhi zuan

Imphal, Jan-11: Manipur a March 4 & 8, 2017 a Assembly election phase 2 a om ding tawh kisai in Congress High Command tawh kimu ding leh party candidate dingte hihfel di’n Chief Minister Ibobi Singh in zan in New Delhi zuan hi. CM in a zinkhiakma in party candidate ding a lunglut mi 80 val in party office apan application form la ahihdan leh submit theih huntawp January 25, 2017 hi’n gen hi. Huchihlai in Chief Minister Ibobi Singh’ tapa neihsun Okram Surjakumar in term pailel a CM’zi Landhoni Devi’ bial 35-Khangabok Assembly constituency (Thoubal district) apan candidate ding hi’n leng kigen hi. 

Chief Minister Ibobi ahihleh tuni a New Delhi a ‘Congress Convention’ uap kawm ding a zinkhia chih ahih banah tutung Assembly election a party campaign committee Chairman ding a guan a om hi’n leng thusuak in taklang hi. Manipur Assembly election a seat tamtak ah party tuamtuam apan candidate om ding a kilat lai in mun khenkhat ah Congress party leh BJP kal a kibeihna hiding inleng kigen hi. Congress in term 4na ding a thuneihna lak ding lamen kawm in CM in party worker-te kiang ah campaign hun a government sepkhiak leh lawhchinna omte tangkoupih ding a theisak hi’n leng kigen hi. 

Tuabang kalah, political party tamtak in Manipur a United Naga Council (UNC)’ economic blockade leh kiphinna paizomte’n election campaign naktak a buaisak phaban ding hi’n gen uhi.UNC in apaisa November 2016 apan state sung a national highway-te a blockade a bawl ni 70 valta a, blockade ziak in state sung ah nektak leh niteng poimawh thilte ah taksapna liantak tung hi. Huai banah, pawlkhat in state sung a Nagate tenna bialte ah government office nasepna nawngkai sak in apaisa Seppatni nitak inleng mel theihlouhte’n Tamenglong Deputy Commissioner (DC) office ah petrol bomb bangzahhiam paihlut uhi.Petrol bomb-te a kuanzak ma in bottle-te kisia in office building kangse manlou hi’n police thusuak in taklang hi. Huai kallak ah Janata Dal (United), Aam Aadmi Party (AAP), Janata Dal(Secular) leh Manipur Democratic People’s Front (MDPF) te’n free & fair election a om theihna dia UNC-te kiphinna a kinthei bangpen a tawpsak ding in state government leh Centre kiang ah phukhinta uhi.  

Election campaign ah Congress leh BJP in UNC blockade tungtang issue lianpen a zat sawm uh hidan inleng kigen a, kalpaita in NE bial a Congress makaite’n Manipur election ding tungtang telin party in Assam leh Arunachal state a BJP ziak a vuallelhna a ngah tungtang Guwahati ah genkhawm uhi. New Delhi a kalpaita a BJP National Executive meeting ah blockade om saklou ding government bawlkhiak hiding in voter-te kiang ah thuchiam bawl uh a, tutung Manipur Assembly election ah party kikawipih neih sawmlou uh hi’n leng kigen hi. BJP makaih Northeast Democratic Alliance (NDA) Convenor Himanta Biswa Sarma in Manipur tungtang genkawm in UNC blockade in niteng poimawhte, damdawi leh chidamna lam kikepna a hihbuai ziak in democratic lou chi’n UNC thilhih deih louhthu gen hi.

TUALSUNG:

DC in dealer-te thupia

Lamka, Jan-11: DC/District Magistrate CCpur in tulai in CCpur district ah petroleum product adiak in petrol, diesel, LPG (cooking gas) leh khawnvak tui (SK Oil) kichin louh ziakin mipite khualna in dealer-te thupia hi. Huai dungzui in dealer te’n thautui leh gas hong tun hunhun in DC ah stock hongtung zah report a piak masak uh ngai ding a, huai zawh a phalna piak nungin hawmkhe theipan ding uhi. LPG dealer te’n leng cooking gas hawmkhiakna ding leh a hun ding kichian tak local a printed media leh electronic zang a puankhiak nung a hawmkhe pan ding in theisak hi. Oil pump dealer te’n leng election tawh kisai in thautui hongtung teng in District Adm. adin litres 200 tan reserve teitei ding in theihsak hi uh a, huaite DC in permit apiak dungzui a hawmkhiak theih hiphet ding hi’n DC in dealer-te theisak hi. Huai banah petrol leh diesel leng mipi lakah hawmkhiak hun ah 4-wheeler-te litres 10 leh gari dangte litres 5 piak ding in thupia a, hileleng huaite barrel leh jerkins dangdang a tawi khiak phal hilou ding chi’n District Magistrate/DC in dealer-te theisak hi.

ADC/CCpur office ah thautui kizuak ding

Lamka, Jan-11: ADC/CCpur leh philanthropic organization tuamtuam ban ah Central YMA Mizoram theihpihna in CCpur Dist. ading petrol leh diesel tanker khat tuak tuni’n hongtung a, January 12, 2017 zinglam dak 9:30 in Tuibong a ADC/CCpur HQ office ah mobile sale dan in kizuak ding hi. Petrol litre 1 ah Rs.90/-leh diesel litre 1 ah Rs.80/- hiding a, mimal poimawh te’n bikhiah omlou in deihzah laktheih ding a, himahleh zuaksawn ding bel piak hilou ding ban ah Head of Deptt-te., Church Leader-te, Organisation tuamtuam  te'n amau poimawh zah petrol leh diesel gelthawh in piaktheih ding a, amaute thautui piak hiding hi’n Chairman ADC/CCpur apan kiza hi. Zan in Lamka Public ground kiang a ADC Town Hall office ah petrol leh diesel tanker 1 tuak Mizoram apan mah mipi lak ah zuakbei in om hi.

ZEO’s office ding hong

Lamka, Jan-11: Lunminthang Haokip, IAS, DC/CCpur in tuni zinglam in CCpur Govt High School a room zatlouh a omte ZEO/CCpur leh staff-te zatding a renovation kibawl thak hongkhia a, Upa T.Lamkhothong, DI of schools, CCpur in Pathian kiang ah thumna in lan hi. DC in “ZEO office thak ding kei Lunminthang, IAS, DC/CCpur in robbon cut in kahong hi.” chi hi. DC in ZEO leh staff te room thak ding room tuamtuam enkual a, huaizawh in Imphal ah Election ding tawh kisai official meeting aneihziak in paipah hi. ZEO leh staff-te room thak ding ah Block tuamtuam a DI of schools leh staff-te’ room ding om a, renovation ah bangzah beizou hiam chihbel kithei nailou hi’n kigen hi.

Case tamtak registered 

Lamka, Jan-11: CCpur district Police-te’n January- December 2016, kum khat sung in case tamtak registered uh a, Lamka Police Station, Henglep Police Station, Singngat Police Station, Thanlon Police Station, Parbung Police Station leh Women Police Station ah akigawm in case tuamtuam 78 registered uhi. Huai case-te bel UG (helpawl) kiman case 9, Narcotic-Drugs and Psychotropic Sustances (ND & PS Act) case 3, murder case 3, POCSO Act. case 2, road accident case 4 leh guta case 14 pha hi. Kum 1 sung in Dist. Police te’n case 27 charge sheet uh a, case 76 final report bawl uhi. Huai sung mah in khamtheih (drugs) Spasmopoxivon (SP) tang 344, No. 4( Heroin powder) 15 gms, WY tang 850 mankhia uhi. Galvan tuamtuam- 5.56 mm  MA-3 MK-II rifle 2 leh magazine 3; 5.56 mm Auto MA-2 MK-II rifle 1; AK-56 rifle 4 leh mazagine 4; MA-16 rifle 4 leh magazine 4; M-4A1 carbine Cal.5.56 mm 3 leh magazine 3; M-3 carbine 2 leh magazine 4; 9 mm pistol (country made) 8 leh magazine 8; 5.56 mm tang (ammunition) 875; 9mm pistol tang 17 leh 9mm tang hawm (fired case) 1 mankhia uhi. Guta case 14 lak ah (4-wheeler, 2-wheer gari, inn kiluh) tel in guta-te’ gukmang teng sum atuat in Rs.20,84,000/- value hi’n taklang uhi.

Guta te’n Lamjang H/S luh

Lamka, Jan-11: Guta te’n Lamjang High School kongkhak (door) hihsia in asung kizang computer set 5 gumang uhi. Lamjang High School staff te’n tuni apat admission bawlding a school ahoh hun un school kiluh leh computer set 5 kigumang ahihlam thei khia uh a, January 8 nitaka thiltung hiding in gintakthu gen uhi. Lamjang High School ah chowkidar omlouh ban ah khawsung apan atuam deuh a om ziak in guta te’n aluh hun un khawsung mipi’n theiban lou uh hi’n kigen hi.

R-Day ding thu genkhawm

Lamka, Jan-11: W.Ibohal Singh, MCS, Addl, DC/CCpur leh S.Thienlal Joy Gangte, AC to DC & OSD (Election) makaih in tuni sunnung in DC’s office a BRGF Resource Centre ah Dist. Level Co-ordination Committee (DLCC) meeting om a, January 26, 2017 a Indian Republic Day lopna ding kikum in tanmun hawm uhi. Tuibong Peace Ground ah Republic Day thupi theipen a zat hiding a, DC/CCpur in Chief Guest apang in Indian Flag kaipalh ding a, general salute lading hi. School tuamtuam apan March Past omding banah hausa-te kiang ah Hausa Puansan(red blanket) hawmkhiat hiding a, govt. Deptt tuamtuam a nasem hoihte kiang ah appreciation certificate piak hiding uhi. Election Icon te’n special item lak in DC/CCpur in Election tawh kisai la (song) aphuahte sading uh a, cultural troupe tuamtuam omding hi.

       DRDA te’n main gate bawlding uh a, welcome gate bawlding te- PMGSY/PWD te’n Khomoi ah, District Council te’n Tuibong forest gate ah, Chief Medical Officer leh staff te’n Lamka Police Station mai leh SSA/ZEO te’n Nehru Marg Junction ah welcome gate bawlding uhi. Deptt. tuamtuam- Forest Deptt., Agriculture Deptt., Horti & Soil Conservation Deptt., PHED, IFCD, DIC leh District Social Welfare Office te’n stall bawl in Deptt. nasep tawh kisai mipi muhtheih ding in koih ding uhi.

ZoRO in kipahthu puang

Lamka, Jan-11: Zo Re-unification Organisation (ZoRO) Northern Zone in United Naga Council te’n Manipur ah Economic blockade abawlziak ua CCpur Dist. mipi’n haksatna thupitak tuak a, Mizoram govt, Mizoram a om Central YMA, Civil Society-te leh Zo-hnahthlaak te’n CCpur Dist. mipi’ ading petrol, diesel, nek-le-tak (essential commoditie) hongpuaklut sak ziak un kipahthu puang uhi. Huaiban ah Gouzalal Tungnung, Vice President, ZoRO, Northern Zone zi’ Nuamneikim Tungnung, ex-Secy Evangelical Lutheran Women’s Assn. MELC in January 3, 2017 a si suun thu puang uh a, anut siat innkuan-te Pathian in khamuanna pia hen chi uhi.

Lion MJF Roman Bordoloi in Lamka hongpha ding

Lamka, Jan-11: Lions Club a District Governor lenlel Lion MJF Roman Bordoloi in January 12, 2017 in Lamka hongpha ding a, Lions Club of CCpur Greater-322D in sunnung dak 1:00 in District Council Chairman office chamber ah kithuah khawmna nei ding uhi. 

Huai hun ah Lion T. Goukhomang, Treasurer makaih in Lions Club member te’n Flas Salutation nei in, khawvel ah lemna leh muanna om theihna ding in minute 1 sung dai dide in hun zang ding ua, Lion James Doungel, Secretary in Annual Report pia in, Lion MJF Roman Bordolo, District Governor apan thugen ngaihkhiakna om ding hi. Program hun ah Lions Club of CCpur Greater-322D member teng telchiat ding in Lion Langkhanpau Guite, President, Lions Club of CCpur Greater-322D in ngen hi.

25-AR te'n damlou sisan pia

Lamka, Jan-11: Headquarter veng a om 25Assam Rifles te’n tuni’n district hospital a damlou sisan poimawh mi khat ading blood bank tungtawn athawn in sisan pia uhi.

Damlou sisan piak poimawh ahihleh Thangmuansiam @ Siamboi (18) s/o Kamzathang (Ex-Serviceman in Assam Regt.) of Mata hi a, aman chi suk-keh chiangin sisan kang/khal (clot) thei pahpah lou natna chi khat ‘Haemophilia’ kichi natna nei a, sisan chauh ziakin January 8, 2017 nitak in district hospital ah admit in om hi. 

Doctor te’n sisan unit 2 poimawh ding ahihdan theisak uh a, a innkuan te’n sisan zonna ding a theih zoklouh ziakun Manipur Express reporter khat kiang ah thil omdan gen in, aman leng 25 Assam Rifles a Town Commander Major Pankaj Giri kiang ah ngaihtuahpih din ngen a, ngai poimawh in ama panlakna tungtawn in jawan 2– Ashish Kumar leh Sushil Kumar Upadhyay te’n blood bank ah O+ve unit 1 tuak pia uhi.  ibang a huhna pia 25 Assam Rifle-te tung ah Siamboi innkuante kipak mahmah in news tungtawn in kipahthu gen uhi.

SSPP GHQ kum 70 chinna zang ding

Lamka, Jan-11: Siamsinpawlpi GHQ in January 13, 2017 in Bungmual a Angels’ Place ah kiphutkhiak nung kum 70 chinna leh Siamsin Award hawmkhiakna banah SSPP member MPSC a lawhchingte thakte kipahpihna nei ding uhi. 

Huai hun zinglam dak 10:30 in kipan ding a, T. Lianchinpau, Vice President, SSPP GHQ in vaidawnna thu gen in, Lianzapau Samte, President, SSPP GHQ leh Ricky Vanlallawm Guite, Chairman, Standing Committee, SSPP GHQ te’n thugenna hun zang ding uhi.

Programme sungin G. Gouthiansiam, Secretary, Human Resources makaih in Siamsin Award hawmkhiakna om ding a, MPSC a lawhchinna ngahthak Teresa Tangpua, Lianminthang Samte leh T. Chinkhansiam te’n leng thugen ding uh a, Rev. L. Khamkholun, Life Member, SSPP GHQ in award sangte leh lawhchinna ngah thakte  thumsak ding hi. Huai hun ah SSPP Residential School te’n nam lam lahna nei in, lasiam Chingngaihlian leh Jenny Thomte telin lasa siam tuamtuam in uap ding uh a, Thangzamuan Hauzel, Chief General Manager, RBI/Imphal in hasotna thu gen ding hi.

School 2 kiang ah zebra crossing

Lamka, Jan-11: Sub-Inspector P.Neihsial Officer i/c Traffic Control Police makaih in Traffic Control Police  te’n 28th Road Safety Week, 2017 sepsuahna in tuni’n Tuibong a Salt Book school mai, Tedim road leh Sielmat a Sielmat Christian Hr.Sec.School mai, Tedim road ah zebra crossing leh speed breaker rong nuhngou uhi.

NFI saina in Video conference om

Lamka, Jan-11: Delhi pansan India pumpi huap a nasem National Foundation for India (NFI) saina in zan in Skype (Internet) tungtawn a ‘Security and Governance in North East India and its impact on Civil Society’ thupi anei in houlimna (videoconference) om a, huai hun Delhi apan TV journalist minthang Kishalay Bhattacharjee in makaih hi. 

GK Pillai (India Home Secretary lui) leh Gautam Mukhopadhaya (Myanmar a India-te Ambassador) in Guest Speaker hihna tawh uap uh a, houlimna ah Internet tungtawn in Kokrajhar (Bodoland) apan North East Research & Social Work Networking (NERSWN) kichi NGO leh Lamka (SSPP Complex, Bungmual) apan Siamsinpawlpi GHQ makaite’n uap uh a, dakkal 2 val North East India a tuailaite nekzonna, gam leitang vai a buaina, muanna-leh-bitna, cihte pansan in houlim uhi.  Huai hun ah SSPP akipan H. Mangchinkhup (Ex-President,  SSPP GHQ), Nangmuansang Lethil, General Secretary leh Thangzamuan Tombing, Jt. Secretary, SSPP GHQ tel uhi.

BRTF asemlai damlou in si

Lamka, Jan-11: 80-RCC BRTF Camp, Thanlon ah January 9, 2017 nitak dak 8:30 velin BRTF asemlel BD Tiwari (54) h/o Meena Tiwari of Mohala village, Almora Dist. Uttarakhan State damlou in si a, BRTF officer te’n January 10, 2017 in Thanlon Police-te kiang ah report bawl uhi. Thanlon Police-te makaih in January 10, 2017 in Dist. Hospital ah postmortem bawlzawh in a innkuante kiang ah siluang piak in om a, Police te’n UD case No. 1/TLN-PS/2017 U/S 174 Cr.PC registered uhi.

One People’s Convention

Lamka, Jan-11: SSPP JHQ Lamka in New Life Foundation leh Centre for Social Development tawh kithuah in tuni’n Mini-Auditorium, Dorcas Jubilee House, New Lamka ah ‘Peace and Justice in Manipur’ thupi zangin One Day People’s Convention om hi. Huai hun ah saptuam, khawtang, tuailai leh nu-le-pa hunkhop kihel ua, Pastor PL Thanga, Local Pastor, Zion PCI (R) in hun zatna hongkhia hi.

L. Pishak Singh, Director, Childline/Bishnupur in keynote address gen in, aman Manipur a om nam tuamtuam tengkhawmte kituaktak a om a, lemna leh muanna hoihtak a om theihna dia panlak poimawh sak ziakin hibang convention neih a om hidan in gen hi. Programme sungin U. Nobokishore, Secretary, UNMM, Rev. N. Nicky Thanga, Chief Functionary, Health Integrated Ministry leh Dhanabir Laishram, Social Scientist, Manipur University banah Safi-ud-din, Secretary, JUK te’n thupi tuamtuam zang in sinsak uhi. 

Sunung lam in Gousonlian, Joint Secretary, SSPP GHQ; Sobita Mangshatabam, Convenor, UNMM Women Committee, Joshua L. Amo, Secy (Information & Publicity) HSA leh Thangsangkham, Social Worker te’n leng uap in thugen uhi.

BJP CCpur ST Mandal in thusuah bawl

Lamka, Jan-11: Thangneikhum, President, 58-CCpur (ST) Mandal, BJP in thusuah bawl a, huai dungzui in tunung zek a Assembly Election ah political party tuamtuam in candidate nei ding uh ahihman in mipi te’n diklou tak a, khembuai a om louhna ding in pilvang ding in theisak hi. Aman ataklat danin Manipur a development tamzaw-te centre a BJP in fund a sanction hi a, project khenkhat nasep kipat nailou ahih keileh zawhsiang louh hidan in taklang hi. Election hun ah mipi te’n corruption omlouh theihna ding in pilvang chiat ding a deih thu leng taklang hi.

Raja Goukhothang Guite’ lim (statue) tungkhia

Lamka, Jan-11: Tuni in G. Tonjang khua ah Raja Goukhothang Guite Street lutna bul ah Raja Goukhothang lem (statue) kibawl tunkhiak in om a, Rev G. Haukhomang in Pathian’ kiangah lan hi. G. Thangkhosei, Chief of G. Tonjang in lim pen Kolkata pansan a bawlsak hi’n gen hi. Hiai hun a kihel K. Guite in agenna ah pipute hunlai a puansilh leh vanzat tuamtuamte kaikhawm a, munkhat a koihkhawm hoihsa leh lunggulh ahih dan gen hi.

STATE THUTHANG:

UNC makaite police custody ah omlai ding

Imphal, Jan-11: Imphal East Chief Judicial Magistrate (CJM) ah tuni’n UNC a President Gaidon Kamei leh Pub. Secy. Stephen Lamkang-te dinsak in om nawn uh a, huai ah UNC makai 2 te’n police custody ah electric shock telin 3rd degree torture ( kisoisakna) ziak in a damtheihna hoihlou chi’n bail a khahkhiak ding ngen mahleh uh Court in medical certificate-te hoihtak a etkhiak nung in bial a khahkhiak dia ngetna nawlkhin sak uhi. Gaidon Kamei in helpawl a tel ka hi kei a, mipi makai ka hi a, soisakna ziak in ka taklam khut leh khe-te hik mulmul chi hi. Court in Tadubi police station a case tawh kisai in UNC makai 2-te ni 15 sung judicial custody ah om ding in thutan khum hi. Huai lou in case dang ah Nungba Police station te’n Nov 23, 2016 ni a blockade supporter dia gingtak te’n FCI anntang pua truck a halsiat uh tawh kisai a mi 2-te matna dia court ah ngetna bawl uh a, Court in ngetna pomsak in Nungba police custody ah ni 7 sung om ding in thutanna khum a, huai banah police custody ah om sung in mi 2-te dakkal 48 teng a medical treatment piak ding banah breakfast leh lunch banah dinner telin tiffin hoihtak pe ding in theihsak uhi. Police te’n UNC makai 2-te Nov 25, 2016 in man uh a, huai nung apan police custody ah om uh hi’n kigen hi.

Moreh ah combing operation

Imphal, Jan-11: Manipur leh Myanmar gamgi gei a Nungkam Gamnom village apan mun gamlalou ah meltheihlouh te’n Nungkam Gamnom hausa S. Otkhojam Mate (57) leh saptum a chairman Tilpao Haokip (51)-te pimang nung in Jan 8, 2016 ni a sisa a muhkhia hi uh a, huai tawh kisai a khaw mipi’n Naga helpawl-te gamtatna hiding in gingta in Moreh a dinmun sousang hi’n gen uh a, security sukkhauh banah huai kim a helpawl omte matkhiakna dia combing operation bawl uh hi’n kigen hi. Police commando leh IRB te’n thuguk a muh dungzui un K. Tuisem village ah search operation bawl uh a, himahleh matkhiak neilou uh hi’n kigen hi. Huailou in Kuki Students’ Orgn. (KSO) te’n mawhpaih thupuang in thiltung ziak a Moreh ah nam kal buaina tun thei a, muanna leh bitna deih mipi teng in thil tung mawhpaih ding  uh chi hi. Helpawl te’n Jan 6, 2017 nitak a mi 2-te a pimang uh Jan 8, 2017 ni a sisa a muhkhiak hi uh a, nam tuamtuam kituah louhna tut ding deih helpawl-te gamtatna hi a, kigolh khakna neite’n a gamtatna uh hilchetna bawl ding in ngen uh a, huai ahihkeileh dawilok tak a gamtang-te ziak in nam 2 kalah buaina om thei a, kum 10 paisa apan Nungkam Gamnom leh Satang Khunou-te muang leh bittak in teng khawm uh a, thiltung ziak a ki muhdahna leh khaw 2 siatna ahihlouh ding chi uhi. KSO te’n khaw 2 a mipite a khua chiat uah kiknawn leh kitheisiam tuah a khawsa khawm ding in ngen uh a, a huntak a state govt. panlakna ziak a buai om louh tawh kisai ni kipahthu gen uh a, himahleh huai bial a helpawl-te daldia om Assam Rifle te’n a sep ding uh lawhsam uh chi’n lungkim louh thu taklang uhi.

Security kidaih louh ziak in NH-2 kihong nailou 

Imphal, Jan-11: Security escort ziak a NH-37 (Imphal-Jiribam) kihong phial mahleh security personnel kidaih louh ziak in NH-2 (Imphal-Mao) kihong nailou hi’n gen uhi. Manipur a NH 2 ah indefinite economic blockade hong ding leh highway vengbit ding in Manipur govt. in Centre ah Central Para Military Force (CPMF) company 60 ngen uh a, himahleh Centre in company 50 kia Manipur ah sawllut a, Centre in CPMF kidaih ding sawllut chi’n thusuak om mahleh NH-2 ah van tuamtuam pua garite escort ding a security kidaih lou hi’n gen uhi. Manipur govt. a thusuak in company 29 (personnel 2900)te Manipur ah ki report uh a, NH-37 ah gari-te escort ding a company dang 21 kizang a, Centre in Manipur ah December 2016 in CRPF company 21, BSF company 27, ITBP compnay 2 leh SSB Compnay 9 telin company 59 sawllut hi’n taklang hi. CPMF company 59-te Manipur ah a om theih hun uh Jan 6, 2017 in bei mahleh Union Ministry of Home affair in Chief Secy., Home Secy, leh DGP kiangah a Jan 16, 2017 tan om thei ding uh ahihdan theisak a, Manipur a CPMF company omsa 21 banah company dang 29-te behlap in state govt. ah ki report uh a, CPMF company 9 ki report ding omlai hi.

Company 29 behlap a omte lakah BSF/SSB company 16-te NH-37 ah van pua garite vengbitna a zat hi a, company 13-te NH-2 ah zat himahleh security personnel kidaih louh ziak in vanpua garite vengbit zou dia gingtak hilou hi’n taklang hi. Manipur a CPMF sawllut-te lakah CRPF leh BSF akigawm in company 49-te Raj Bhawan, state assembly, Loktak Hydro Electric Project, Maphou Dam, Railway project leh thil tuamtuam ah zat hi uh a, huai ziak in state thuneite’n state security force-te kithuahpih ding a CPMF company 30 vel kisam hi’n gen uhi. Hiai tungtang ah State Home Dept. in CPMF company 9-te kireport loute state govt. ah theihsak a, state govt. in MHA apan dawnna ngak hi’n gen uhi.

Thau a kikap siluang 1 kimu

Noney, Jan-11: Noney Police Station bial sung Longmai Part II a tuilou mun khat ah tuni’n pasal thau akikap lum khat siluang kimu khia hi. Police thusuak in a gendan in misiluang kiangah thau cartridge hawm 2 kimu khia a, UG faction a cadre lui dia gingtak hi’n gen uhi. Police te’n nitaklam dak 4:10 velin siluang vala uh a, thiltung tawh kisai in Noney Police station ah case khat register uhi.

Sentence hearing hun Jan 20 ah suan

Imphal, Jan-11: Imphal Airport road ah March 20, 2011 ni a Irom Roger (21) thau a kaplup na tawh kisai a ngawh a om Nonthongbam Ajay Meitei s/o ex-Minister N. Biren tuni zinglam dak 11:00 velin court ah dinsak hi a, huai ah Ajay Meitei in ‘Probation of Offender Act 1958 a section 4 a good conduct tungtawn in probation a khahkhiak ding in ngetna bawl hi. Court in akisaipih probation officer apan report tungtawn ngetna ngaihtuah ding in theisak a, defence counsel leh CBI counsel-te kiselna sousang luat ziak in Court in Probation of offender Act 1958 section 4 a sub-section (2) dungzui in ‘Sentence hearing’ Jan 20, 2017 ni a om ding in bikhiah a, Sajiwa Jail SP kiangah huai ni in Court ah mawhpaih a om Ajay Metei kilang sak ding leh Director Social Welfare Dept. ah leng court order thon uh hi’n kigen hi. Akigendan in Ajay (27) in March 20, 2011 in Imphal Airport road a Ghari mun ah license thau in Irom Roger kaplum a, huai ni mah in Ajay leh a lawm mi 4-te mat himahle uh a lawm te’n  mawhna neilou chi’n khahkhiak hi uhi.

SAMADHAN case enkai din theisak

Imphal, Jan-11: Robert Singh Kshetrimayum, DEO/Imphal West office chamber ah tuni’n Imphal West a assembly constituency 13 a Returning officer teng tawh meeting om a, huai ah SAMADHAN tawh kisai a poll related complain omte report  pelut ding in theisak hi. Ph. Bhavananda, Nodal Officer, SAMADHAN in electoral roll tawh kisai in Sagolband A/C ah case 1, Patsoi A/C ah case 1, Mayang Imphal A/C ah case 21,  Wangoi A/C a 3 leh Langthabal A/C a case 1 om hi. Sagolband A/C sung ah flag 500 lakkhiak hi a, Uripok A/C ah 320, Thangmeiband A/C a 200 leh Keishamthong A/C ah flag 400 lakkhiak ahi hi. Pastoi A/C leh Konthoujam A/C a banner kila khia akigawm a 4 hi a, banner lakkhiakna tam pen Sagolband A/C ah 7 lakhia uh chi hi. Aman agenzelna ah Langthabal leh Naoriya Pakhanglakpa A/C ah poster 64 lakkhiak hi a, A/C dang tawh teh in Sagolband A/C mah a poster kila khe tam pen a, huai ah poster 435 lakhia uh chi’n gen hi. Meeting hun ah DEO in akintheilam in dan phallou political advertisement a sukbeina dia action khauhtak la ding in theisak a, Returning officers leh Asst. Returning officer teng kiangah Voters’ Guide hawmkhe ding a thupia hi’n gen uhi.

Training program om

Imphal, Jan-11: DC/Imphal West Office Complex ah 11th State Legislative Assembly Election 2017 a din DEO saina in EVM, VVPAT, EVM Tracking Software leh Couting tawh kisai in training programme om hi. Bantee Singh Konthoujam,  AC to DC-Imphal West banah Langthabal & Naoriya Pakhanglakpa A/C a Returning Officer in training programme hun ah sinsak a, David Elangbam, Returning Officer, 22-Wangoi & 23-Mayang Imphal A/C in VVPAT machine tawh a theih dingte sinsak hi. Hiai hun Returing Officer, Asst. Returning Officer leh DEO nuai a Eleciton staff-te tel uhi.

Promotion lopna leh vualzawlna ngetsakna om

Imphal, Jan-11: BSF a sem Francis Paukhomang h/o Alice Chingngaihnem of Happy Valley, Kangpokpi district in Deputy Commandant akipan 2nd-in-Command in promotion mu a, huai tawh kisai in Paite Veng a Dr. H. Khamkhenthang inn ah promotion lopna leh Pathian akipan vualzawlna ngetsakna in programme zat in om hi. Francis bel tulel in SSB a 68Bn ah deputation a om in Commanding Officer len a, tulelin  Tezpur, Assam ah om lel hi’n kigen hi.

UTLA a active cadre 1 man

Kangpokpi, Jan-11: Senapati Brigade nuai a Jwalamukhi Battalion te’n Dec 28, 2016 in operation a bawlna uah Pistol 1 leh demand letter tawh United Tribal Liberation Army (UTLA) a active cadre 1 mankhia uh hi’n kigen hi. Thusuak in Jawalamukhi Battalion te’n Kangpokpi district a Pheiren mun ah helpawl om chih thuguk amuh uh dungzui in huai area ah operation bawl uhi. Huai hun ah helpawl a tel dia muanmawh pen inn nung lam apan taikhiak sawm mahleh mat in om a, Kangpokpi district ah UTLA adia thagum a sum khon leh thil tuamtuam ah kigolh hi’n kipuang a, galvan tawh police station ah piak khiak hi’n taklang uhi.

TUNI THUPI:

“Vaihawmna ah deihsak tuam na neih ding uh ahi kei; mi neu leh mi lian kibang tak in na ngaihkhiak sak ding uh ahi; kuamah na lau ding uh ahi kei; vaihawmna lah Pathian a ahi ngal a” -Diuteronomi 1:17

EDITORIAL:

Gaan-Ngai leh Zahngaihna

Naga Nam lak atel Kabui-te’ adia hunbi poimawh mahmah banah Gaan-Ngai festival i chih kum zabi tamtak paisa apan zat patin om hi. Assam, Nagaland, Tripura leh India state sung mun tuamtuam a om Zeliangrong a Kabuite’ adia hunbi poimawhtak ahihdan theihtheih in om hi. Kumdang tawh kibang hetlou in tutung in leng amau pawlin buana liantak a tuak tuak ua Gaan Ngai festival hun leh economic blockade a kituahkhak ziakin hun paisa bangin hiai festival zangtheilou uh hi’n chiamtehtheih in om hi.

Manipur state adiakin Tamenglong district ah Zeliangrong mi tam uh a, tualou in hill district mun tamtak ah leng om uhi. Zeliangrong namte NE India ah Assam, Manipur leh Nagaland state-te ah kithehdalh uhi. Hiai hunbi poimawh ‘festival’ ahihleh Zeliangrong te’n (Gaan Ngai-Dry or Winter season) ahihkeileh Chakan Gaan-Ngai chi’n hun paisa a honna paisan sate banah kumkaite tawh kikal kikhenna danin la ua, mualliamsate suun kawm in kumthak mel musaktu tungah kipahthugenna danin zang zel uhi. Ahitak genin hiai hunbi pen nop bawlna hun leng ahi mah a, nungak-pasal nop talna hunleng hi a, zi leh pasal kineihna hun leng hise hi. Khawvot i am mahmah ziak zaw chi khang himahleh, a bouruak in a hon puakkhiak himhim ahi chih thehding in om hi. Moukhak/ moulop, hansuan hon hun ahihkeileh innkuan vai a program tuamtuam ineih hun uh ahi hi.

Kuate hiam gendan hileh, Gaan Ngai ahihleh, ‘religious and cultural festival’ poimawhtak ahi chi uh a, dik leng adik ngeiding hi. Eilawi in ineu apan Christmas ingak lah thei mahmah ua, tua hunchiang in Christmas putek apan present ngah ikinep kawm in nu-le-pa te’n phulalen puannak hon leisak ding uh chih hinawn hi. January apan December tan ingak uh Christmas hun i zang zouta uh a, ahihziakin, Kabui te’n Gaan Ngai festival bangchidanin hon zang uhiam chih i gen theinaikei hi. Amau Wakching a chih uh (December- January) kikal hi a, hiai hunsunga thusia-lasia abawlkhakte uh thuphatawina hun aleng zatin om hi.  1947 kumin Kabui Samiti (tua Zeliangrong Union) chih a om teng kumteng a Gaan Ngai kichi zatdingin thupukna leng ana bawl uhi. Tua tawh kitonin kumteng in ni 5 apan ni 7 kikal hiai festival zatin om tangpi hi.

Gaan Ngai hunah Ukhrul leh Chandel district apan mi kihel tam kei mahle uh Senapati leh Tamenglong apan Gaan-Ngai festival uap dingin mipi a sang asim paikhawm gige uhi. Tua kia hilou in, Assam leh Nagaland state apan in leng mi tampitak hong kihel zel ua, program neih hun ah tanvou liantak tak hong tangkha zel uhi. Hiai program bel atangpi in buhlak hun zawh chiangin neih hisek a, kumthak leh khaw hunthakin mipi’ adia kinepna thak hon puakding lunggelna ziak ahi chi uhi.

Tuni in Gaan Ngai festival tawh kisai thil omdan itaklang a thudik mah leng ahi hi. Ahih ziakin, Kabuite’ lak i sui vengveng chiangin mi hehpih huai tamzaw om dingin gintakhuai hi. Zanzek in a makai muanhuai mahmah Gangumei Kamei si hi. Gaan Ngai festival hunah Gaikhangam in gen-le-sak tamtak anei ngeiding chih theihsa hi a, himahleh, a taktak in Naga nuai a om Zeliangrong mipi’n Gaikhangam thugen a valhthei lai ding uam chih ngaihtuahtham ching mahamh hi. 

Gaan Ngai i zat kawm in zahngaihna kichi leng poimawh mahmah a, mipi’n zahngaihna kichi i nutsiat hunhun in ei leh ei kinawmvalh tawh kibang ding ahi chi uhi. I pupa paidan leh i pau upate leng heutu leh makai tuamtuamte’n velthak poimawh a, amau thugen teng a dikkim i chikei a, ahihziakin adikna tan leng tam mahmah a, va pawng pampaih theih himawk lou hi. Gul in ka mei hon sik henla, huchi’n kitu suk maileh chih policy in tuni in igam gen a neinawn kei maithei. Zeliangerong te’n Gaan Ngai azat kawmkawm in kiphawkthakna leh kiniamkhiakna thak neiding un leng igingta a, amau sunga helpawl faction tuamtuam adiakin NSCN IM/ NSCN K ahihkeileh ZUF-te khekhat a hong ding ngei dingun leng gintakna liantak inei a, GoI leh NSCN IM makaih a tripartite talks om leng lamzangtak a hong paitouh i gingta hi. Gaan Ngai festival tungtawnin igam ah kitualsatna, milim biakna, kiengbawlna leh kimuhsitna tuamtuate beita henla, a taktak in kipumkhatna leh sianthouna hoihtak hong omta leh chih huai mahmah hi.

Nidang hunin dawi le kau be mah lehang, tuni chiangin Jesu Christ vangin hawlkhiak vekin omta a, kibumna, vanzat chi tuamtuam a kibeihnate’n igam ah mun neinawn kei leh chih ithumna leng ahi hi. Huchih lai in, mi chihte’n leng zahngaihna liantak ineih uh poimawh mahmah a, inn mun kikek zek thu a buaina ahihkeileh khat le khat kal a kitheihsiamlouhna ziaka kisuk buaina ziaka liamna leh thubuai-labuai ineihte issue piching suahkei hamham ni. Unau Nagate’n Gaan Ngai festival a zat kawmkawm un eilawi inleng zahngaihna liantak neidingin kipumpiak thakni chi ut leng ihi hi. Adiakin Nagate’ laka kulmut mahmah Rongmei/ Kabui pawlin khawvak muhthak dinga Gaan Ngai kichi hunbi poimawhtak azat theih uleh eilawi abikin Non-Nagate’ lakah khawvak tang dek nailou hiam chihtheihin om hi.