District Governor Lion MJF Roman Bordoloi in zingchiang in lamka hong pha ding a, District Council Chairman Chamber ah Lion Club of CCpur, Greater Lion club international, District-322D te toh hun zang khawm ding uhi. Hiai hun Lion T Gouzadou in makaih ding a, Lion T Goukhomang, Treasurer in flag salutation, hun patna leh khovel pumpi ah muanna leh lemna om theihna ding in dai dide a minute 1 sung hun zatna pi ding hi. President Lion Langkhanpau Guite in welcome address gen in, Secretary Lion James Doungel in Annual report piakna nei ding a, Lion Dr, Kim Simte in presentation hun la ding hi. District Governor Lion MJF Roman Bordoloi apan thugenna om ding a, Lion N Lhungdim IRS Retired in vote of thanks gen in, India lapi sa in hun zang zou ding uhi.
XXXXXX
Hongtung ding January 13, 2017 sunma dak 10:30 apan in Angels Place, Bungmual ah a 10-veina Siamsinpawlpi SSPP Foundation Day leh Siamsin Award hawmkhiakna ban ah tutung a MPSC nuai a SSPP member lohchinna ngahte kipahpihna hun zatna om ding hi. Hiai hun Pausuanlian Tunglut leh Zenngaihniang ten makaih ding ua, Siamsinpawlpi SSPP Lapi sakkhawmna om in, Pastor V. Khamvum in thumna in hun hong ding hi. T. Lianchinpau, Vice President, SSPP GHQ in vaidawmna leh member phamsate sunna hunla ding a, Nangmuansang Lethil, General Secretary, SSPP GHQ in General Secretary Report pia in, Lianzapau Samte, President, SSPP GHQ, leh Upa Ricky Vanlallawm Guite, Chairman, Standing Committee, SSPP GHQ apan thugenna om ding hi. G. Gouthiansiam, Secretary, Human Resource, SSPPGHQ makaih in Siamsin Awards hawmkhiak hi ding a, MPSC a lohchinna ngah Teresa Tangpua, Lianminthang Samte leh T. Chinkhansiam apan thugenna om in, Thangzamuan Hauzel, Chief General Manager, Reserve Bank of India, lmphal in hasotna thugen ding a, Rev. L. Kham Kho Lun, Life Member, SSPP GHQ in thumsaknahun la in, Upa V. Vungzathang, Life Member, Standing Committee, SSPP GHQ in thumna in hun khak ding hi. Program zat hun sung in SSPP Residential School apan nam laam lahna a om ding ban ah chingngaihlian, Jenny Zawnkhanhoih Thomte, Nemsiam Guite, Minlian Valte leh Biaksang ten lasa ding uhi.
XXXX
Tuni sunma dak 11 apan in Dorcas Hall Mini Auditorium, New LAmka ah pawl thum Siamsinpawlpi SSPP, Joint Headquarter, Lamka, New Life Foundation leh Centre for Social Development te saina in One Day People’s Convention on Peace and Justice in Manipur kichi hun zatna nei uhi. Hiai hun ah saptuam makai, khotang makai, tuailai, student, numei pawl tuamtuam ban ah makai tuamtuam mi 83 hiai hun ah tel ua, hun zatna Kimngaihlian, Treasurer, Siamsinpawlpi JHQ, Lamka in makaih a, Pastor P. L. Thanga, Local Pastor, Zion PCI in hun patna nei in, Manvung, Area Coordinator, Lamka Block, New Life Foundation in presentation hun la in, L.Pishak Singh, Director; Child line, Bishnupur in keynote address gen a. Gamsung ah muanna, bitna leh thu dik a vaihawmna om theihna ding in heutu tuamtuam U. Nobokishore, Secretary, United NGOs Mission, Manipur (UNMM) , Rev. Nicky Thanga, Chief Functionary, Health Integrated Ministry, Dr. Dhananbir Laishram, Social Scientist, Manipur University, Shafi Uddin, Secretary JUF, Gousonlian, Joint Secretary, Siamsinpawlpi GHQ, Joshua L. Amo, Secretary information and publicity, Hmar Students’ Association HSA leh Thangsangkham, Social Worker te apan thugenna om a, T. Tuanzakhup, President, Siamsinpawlpi Joint Hq, Lamka in vote of thanks gen in , Pastor P. L. Thanga in thumna in hun khak hi.
XXXXX
Tipaimukh Road a Zonal educational Office, ZEO CCpur Office building ding kibawl thak luah theih dia zoh siang ahihtoh kiton in tuni sunma dak 10 in Office building honna leh pathian kiang ah latna L Taithul DI of school in nei hi. Hiai hun ah ZEO nuai a sem office staff, Hill Town hausapu ban ah student body a makai tuamtuam in hiai hun zatna uap ua, Lunminthang Haokip IAS DC CCpur in Zonal educational Office, ZEO CCpur office main gate leh office building hongkhia in, Upa L Taithul in office thak pathian kiang ah thumna in lan hi. ZEO CCpur office building thak ahihleh ZEO CCpur T, Goukhomang panlakna nuai a CCpur government High School building kisia a puah thak uh hi a, school campus leh ZEO Office building thak leng lanva in umsuak ua, School lutna leh ZEO office lutna ding kongpi gate leng hoih tak in bawl thak uhi. ZEO Office thak ah ahihleh ZEO CCpur main office, Block chih a Deputy director of School, ban ah Accountant, Clerical, SSA office ding tel in Office room 10 om ding hi.
XXXXXX
Hongtung ding January 26 chiang a Republic Day lopna ding toh kisai in tuni sunnung dak 1 apan in BRGF Resouce Centre, DC Office, Tuibong ah District level officer DLO ten meeting nei uhi. January 26 chiang a Republic Day lopna ding toh kisai meeting ahihleh Lunminthang Haokip IAS DC CCpur in makaih ding chih himahleh Imphal lam ah meeting poimoh tak om ziak in makaih thei lou a, Thienlaljoy Gangte, MCS AC, leh W Ibohal Singh AC to DC ten makaih ua, Ccpur District Level Officer te tel in republic day lopna ding toh kisai nounel tak in kikum khawm uhi. Meeting hun ah paikhawm member ten tutung republic day 2017 district level a lopna hiangtam lamka a public ground a kibawl lel ziak in, Peace Ground Tuibong ah zat ding in thupukna bawl ua, Sub divisional headquarter tuamtuam Singngat, Thanlon, Henglep, Tipaimukh leh kangvai ten amau sub division level ah lopna nei ding uhi. Republic day lopna ding toh kisai in, khopi sung mun tuamtuam ah gate bawl hi ding a, DRDA in Peace ground tuibong ah main gate bawl ding ua, PWD & PMGSY in Khomawi, District Council in Tuibong, forest gate, CMO in Police Station leh SSA in Nehru marg ah republic day gate bawl ding uhi. Republic day lopna mun Peace ground tuibong ah department tuamtuam Forest, Agriculture, horticultute and soil Conservation, PHED, IFCD, DIC, Sericulture leh Social Welfare DPO ten stall khat chiat bawl ding ua, hiai stall ah department chih in amau sepna toh kisai van tuamtuam tak khia ding uhi.
XXXX
All tribal women union ATWU GHQ leh all tribal movement of lamka ATML in khopi sung leh a sehvel ah sixth schedule awareness aneih uh pai touzel in zan January 10, 2017 nitak dak 5:30 in CYA Hall, Gouchinkhup Veng, New lamka ah Delhi hohhna report leh mass awareness campaign nei nawn uhi. Hiai hun ah Gochinkhup veng ban ah akim nai a veng leh khua apan mi tamtak paikhawm ua, hun zatna nu Liannem in makaih a, Nu Ningsial in thumkhawmna pi in, Nu Manngaihkim in slogam saamna makaih hi. thugenna hun ah Nu nianglian President ATWU apan delhi hohna report om in, hiai hun ah DK Mang leh Thangbiaklian Hangzo te kihel ua, maban election a tup leh ngim aneih te uh genna nei in, mipi apan dotna tuamtuam om te dawnna nei ua, toupan hon sinsak thumna in hun khak uhi.
XXXXX
Xxxxx
Manipur Government in Singtangmite gamleh leitang lak suh ding tupna in kumpaita August ni 31 2015 a Bill 3 a pass jiak in mipi thangpai ten Newlamka chimtung veng a om Vungzagin Valte MLA Thanlon Assembly Constituency ten na in haltum sak uhi. Haltum a om Vungzagin Valte inn ban ah Niangzen khualbuuk chih a om zaan zing kal dak 7:30 in Rev V Songkhothang in thumna in siansuah na nei hi, hiai hun ah Vungzagin Valte' inn dong ta te makaih na in social work in hahsiang na nei ngal ua, hiai toh kisai in Thanlon MLA Vungzagin Valte in leng zaan in Imphal apan in lamka hong pha in a inn mun hah siang a om mipi te toh hun sawt lou zangkhawm in suunnung in Imphal ah Kik nawn hi, hiai na sep na zoh ahih nai louh na ah tuni in leng a inn dong ta te leh workers te makaih na in sunzom nawn ua mipi tamtak in nasep na nei uhi, kumpaita December ni 12 2016 in MLA Phungzathang Tonsing zi late chuungi haansuang sian suahna neih in omta a, huai ban ah a inn halsiat a om leng puahphat na nei ngal in tunitan in nasep na neitou zel in tuin a inn luah theih phial in omta hi, huai ban ah T Manga Vaiphei PHED Minister inn Red cross road a om leng YVA GHQ te makaih na in ni kum December kha in sian suah na leh hah siang na nei ua tuin puah phat na nasep pai lel hi.
Xxxx
ADC/CCpur leh philanthropic organization tuamtuam ban ah Central YMA Mizoram theihpihna in CCpur Dist. ading petrol leh diesel tanker khat tuak tuni’n hongtung a, zing chiang January ni 12 zinglam dak 9:30 in Tuibong a ADC/CCpur HQ office ah mobile sale dan in kizuak ding hi.Hiai hun ah Petrol litre 1 ah Rs.90/- leh diesel litre 1 ah Rs.80/- hiding a, mimal poimawh te’n bikhiah omlou in deihzah laktheih ding a, himahleh zuaksawn ding bel piak hilou ding hi’n Chairman, ADC/CCpur apan kiza hi.huai ban ah Head of Deptt., Church Leader-te, Organisation tuamtuam a te'n amau poimawh zah gelthawh in piaktheih ding a, amaute thautui piak hiding uhiin thusuak in tak lang hi.
Xxxxx
Zaan January ni10, 2017, Sepnawnni suunma dak 11:30 apan in Delhi pansan a India pumpi huap a nasem, National Foundation for India (NFI) kicite saina in Skype (Internet) tungtawn in "Security and Governance in North East India and its impact on Civil Society" cih thupi a nei in houlimna (videoconference) neih in om hi. Hiai houlimna ah Delhi apan in TV journalist minthang Kishalay Bhattacharjee in pii a, GK Pillai (India Home Secretary lui) leh Gautam Mukhopadhaya (Myanmar a India-te Ambassador) in Guest Speaker hihna toh uap tuak uhi. Hiai houlimna pen Internet tungtawn in Kokrajhar (Bodoland) apan in North East Research & Social Work Networking (NERSWN) kici NGO leh Lamka (SSPP Complex, Bungmual) apan Siamsinpawlpi General Headquarters in uap a, daakkal 2 vaal vingveng North East India sunga tuailaite nekzonna, gam leitang vaai a buaina, muanna-leh-bitna, cihte pansan in houlimna thathoutak neih in om hi. Hiai houlimna ah Siamsinpawlpi apan in H. Mangchinkhup (Ex-President, SSPP GHQ), Nangmuansang Lethil (General Secretary, SSPP GHQ), leh Thangzamuan Tombing (Joint Secretary, SSPP GHQ) tenleng va uap uhi.
Xxxxx
No comments:
Post a Comment