HEADLINES:
Election Model Code of Conduct tuni akipan kizang
ECI in state 5 a assembly election ding puang
 |
| Source : http://timesofindia.indiatimes.com/ |
New Delhi, Jan-4: Election Commission of India (ECI) in tuni’n Manipur, Punjab, Uttarakhand, Goa, Uttar Pradesh a Assembly Election hun ding puang hi. Chief Election Commissioner Nasim Zaidi in a gendan in Assembly seat 117 omna Punjab, assembly seat 70 omna Uttarakhand leh assembly seat 40 omna Goa ah ni 1 sung vote khiak (single phase election) hiding chi’n puang a, assembly seat 60 omna Manipur ah ni 2 sung vote khiak (double phase election) hiding a, assembly seat 403 omna Uttar Pradesh ah ni 7 sung vote khiak (7 phase election) hiding chi’n gen hi. ECI thusuak dungzui in Manipur ah Phase I March 4, 2017 ni in Assembly seat 38 ah vote khiak hiding a, Phase II March 8, 2017 in Assembly seat 22 ah vote khiak hiding hi. State 5 a assembly election teng March 11, 2017 akipan vote sim hiding hi. Election Model Code of Conduct leng tuni akipan Election process zawhsiang masiah zat hiding chi’n ECI thusuak in gen hi.
Punjab, Goa leh Manipur ah tulel a Assembly term March 18, 2017 in bei ding a, Uttarakhand ah assembly term March 26, 2017 in bei ding a, Uttar Pradesh ah bel May 27, 2017 in bei ding hi. Phase 7 election omna ding Uttar Pradesh ah Feb 11, 15, 19, 23, 27, March 4 & 8, 2017 in election om ding a, Punjab ah Feb 4, 2017, Uttarakhand ah Feb 15, 2017, Goa ah Feb 4, 2017 leh Manipur ah March 4 & 8, 2017 in om ding hi. State 5 a election om ding ah voter 16,00,00,000 in assembly constituency 690 ah vote khe ding uh a, huai ah akigawm in polling station 1,85,000 ah vote khe ding uhi.
Manipur assembly election ah ECI in 1 phase leh 2 phase election a bikhiahdan anuai a bang hi.
Phase 1 (A/C 38)
1-Kundrakpam
2-Heingang
3-Khurai
4-Khetrigao
5-Thongju
6-Keirao
7-Andro
8-Lamlai
9-Thangmeiband
10-Uripok
11-Sagolband
12-Keisamthong
13-Singjamei
14-Yaiskul
15-Wangkhei
16-Sekmai(SC)
17-Lamsang
18-Konthoujam
19-Patsoi
20-Langthabal
21-Naoriya Pakhanglakpa
22-Wangoi
23-Mayang Imphal
24-Nambol
25-Oinam
26-Bishenpur
27-Moirang
28-Thanga
29-Kumbi
46-Saikul(ST)
50-Kangpokpi
51-Saitu(ST)
55-Tipaimukh(ST)
56-Thanlon(ST)
57-Henglep(ST)
58-Churachandpur(ST)
59-Saikot(ST)
60-Singhat(ST)
Phase 2 (A/C 22)
30-Lilong
31-Thoubal
32-Wangkhem
33-Heirok
34-Wangjing Tentha
35-Khangabo
36-Wabgai
37-Kakching
38-Hiyanglam
39-Sugnoo
40-Jiribam
41-Chandel(ST)
42-Tengnoupla(ST)
43-Phungyar(ST)
44-Ukhrul(ST)
45-Chingai(ST)
47-Karong(ST)
48-Mao(ST)
49-Tadubi(ST)
52-Tamei(ST)
53-Tamenglong(ST)
54-Nungba(ST)
Election Commission in state 5 a candidate khat zelin campaign na ah asem theih zah ding uh Rs. 20 lakh leh Rs. 28 lakh in bikhiah a, Chief Election Commissioner Nasim Zaidi in a gendan in Manipur leh Goa a candidate mi khat zelin Rs. 20 lakh tan zang thei ding uh a, Punjab, Uttar Pradesh leh Uttarakhand a candidate-te mi khat zelin Rs. 28 tan zang thei ding uh hi’n bikhiah hi. Huchi kalah Union Home Ministry in state 5 a election duty ding in security personnel 85,000 vel zang (deploy) ding hi’n gen hi.
Manipur a Chief Electoral Officer Vivek Kumar Dewangan in a gendan in Manipur adia Voter-Verified Paper Audit Trail (VVPAT) 258 piak a omte A/C 4 : 13-Singjamei, 14-Yaiskul, 24-Nambol leh 31-Thoubal ah zat hiding in gen a, Election Commission in huaite banah VVPAT 1000 mah zat behlap theih dia a bikhiahte ECI phalna la in adang A/C 11 ah zat hiding chi’n gen hi. ECI in Election Model Code of Conduct tuni apan zat dia a puan dungzui in Manipur state pumpi a candidate teng, political party-te, Manipur state leh Manipur a om Union government te’n zui chiat ding in theisak hi.
State 5 a election ding anuai a bang in ECI in bikhiah hi.
Punjab
Date of Notification: 11 January
Last date of nomination: 18 January
Scrutiny of nomination: 19 January
Withdrawal of candidature: 21 January
Voting: 4 February
Goa:
Date of Notification: 11 January
Last date of nomination: 18 January
Scrutiny of nomination: 19 January
Withdrawal of candidature: 21 January
Voting: 4 February
Uttarakhand:
Date of Notification: 20 January
Last date of nomination: 27 January
Scrutiny of nomination: 28 January
Withdrawal of candidature: 30 January
Voting 15 February
Manipur – Two phase
Phase 1
Date of Notification: 8 February
Last date of nomination: 15 February
Scrutiny of nomination: 16 February
Withdrawal of candidature: 18 February
Voting: 4 March
Phase 2
Date of Notification: 11 February
Last date of nomination: 18 February
Scrutiny of nomination: 20 February
Withdrawal of candidature: 22 February
Voting: 8 March
Uttar Pradesh
Phase 1:
Date of Notification: 17 January
Last date of nomination: January 24
Scrutiny of nomination: 25 January
Withdrawal of candidature: 27 January
Voting: 11 February
Phase 2:
Date of Notification: 20 January
Last date of nomination: 27 January
Scrutiny of nomination: 28 January
Withdrawal of candidature: 30 January
Voting: 15 February
Phase 3:
Date of Notification: 24 January
Last date of nomination: 31 January
Scrutiny of nomination: 2 February
Withdrawal of candidature: 4 February
Voting: 19 February
Phase 4:
Date of Notification: 30 January
Last date of nomination: 6 February
Scrutiny of nomination: 7 February
Withdrawal of candidature: 9 February
Voting: 23 February
Phase 5:
Date of Notification: 2 February
Last date of nomination: 9 February
Scrutiny of nomination: 11 February
Withdrawal of candidature: 13 February
Voting: 27 February
Phase 6:
Date of Notification: February 8
Last date of nomination: 15 February
Scrutiny of nomination: 16 February
Withdrawal of candidature: 18 February
Voting: 4 March
Phase 7:
Date of Notification: February 11
Last date of nomination: 18 February
Scrutiny of nomination: 20 February
Withdrawal of candidature: 22 February
Voting: 8 March
TUALSUNG:
CMYA-te tel in CM leh official-te mu uh
Lamka, Jan-4: Langkhanpau Guite, Chairman ADC/CCpur, Lal Hossan Vice Chairman ADC/CCpur, C.V. Duhawma, President YMA Manipur tel in Chairman team te’n tusun in Aizawl ah Lalbiakzuala, President Central YMA kimuhpih uh a, CYMA te’n Manipur a nek-le-tak buai hun a panpih ziak un kipahthu gen in present pia uhi. CYMA leh YMA/Manipur makaih in Mizoram Chief Minister Lalthanhawla leh CAF Minister kimuhpih uh a, Mizoram CM in official poimawh teng thuzak in Lalmalsawma, Chief Secy. Mizoram kimuhpih nawn uhi. Chairman leh ateam te’n Mizoram CM tela official te kimuhpih hun un Manipur a mi leh sate awlmawh leh panpih ziak un kipahthu gen uh a, thautui (petrol & diesel) ban ah niteng poimawh tuamtuam-te aman (price) tamlua hilou a, Manipur a Zosuante’ ading a puaklut theih dingdan genpih uhi.
Mizoram govt. inleng Manipur a Zosuante awlmawh ziak in niteng poimawh tuamtuam ban ah thautui puaklut theih dingdan CYMA te tawh workout ding in phalsak uh a, Ngopa ah Manipur lutding gari tang (stranded) te leng Police te’n hihbuailou a, paisuak sak ding in CYMA leh Mizoram govt in phalna pia hi’n kigen hi. Maban ah leng Manipur te’n nek-le-tak, thautui tel in atamsem pawlut a, panpih ding in Mizoram CM in Chairman,ADC/ CCpur leh ateam te’n theisak hi’n thusuak kingah hi. Chairman ADC/CCpur leh ateam te giahnang in CYMA te’n Aizawla Tourist Lodge saifel sak uh hi’n kigen hi.
Pending case 158 hihveng
Lamka, Jan-4: Inspector N.Thangzamuan in April 13, 2015 apan CCpur Police Station ah Officer incharge(OC) joined a, anuai a officer-te tawh pangkhawm in 1980s vela pan case pending omte hihfel theih teng hihfel in buaipih uhi. OC/CCpur in ama’ hunsung in case pending 158 hihveng pih a, huai lak ah case chargesheet 23 leh final report 135 pha hi. Aman gendan in No.4 leh galvan case tawh kisai Forensic result pending tamtak omziak in case hihveng theihlouh hi’n gen hi.
Central YMA kiang ah ngen
Lamka, Jan-4: United Naga Council (UNC) makaih Naga te’n Manipur adia lifeline poimawh mahmah National Highway 2-te ah hunchiam omlou economic blockade abawl ziak ua Manipur adiak in CCpur district a te’n thautui telin nek-le-tak ah haksatna atuah louhna ding un Guite road tawn in Mizoram akipan niteng poimawh tuamtuam puaklut ding dal lou din Central YMA kiang ah YMA Manipur Group tungtawn in Young Paite Association (YPA) GHQ in ngetna bawl hi.
YPA GHQ thusuak in ataklatdan in, November 1, 2016 akipan UNC in Manipur adia lifeline poimawh mahmah National Highway-2 (Imphal-Dimapur road) and National Highway-37 (Imphal-Jiribam road) khaktan in niteng poimawh van pua gari lutsaklou uh a, huai ziakin Manipur mipi’n thautui telin nek-le-tak ah haksatna tuaklel hi’n taklang a, huchihlai in Manipur adia National Highway kihong omsun Guite Road (NH 102B) pen Mizoram tawh gamgi Zosuante omna CCpur district huapsung a omkha ahihman in khamuan huai mahmah hi’n taklang hi.
Economic blockade ziakin CCpur district ah nek-le-tak haksa hiaihiai in niteng nektawm ding banah thautui vang mahmahta a, akinlam a etkai ahihkei leh mipi’n haksatna namenlou tuak thei ding dinmun a om hi’n taklang hi. Central YMA in Manipur a omte haksatna theihpih a, CCpur District a ding supply Mizoram tawn a hong paite subuailou a paisuaksak din ngen hi.
Special Investigation Team(SIT) kibawlkhia
Lamka, Jan-4: Rakesh Balwal, IPS, SP/CCpur apan kizadan in Jan.2, 2017 sunnung a Tangnuam hanmual ah Siemneihkim (35) d/o (late) P. Lunkhokam of Kolasib, Mizoram sisa a kimukhia tawh kisai Police te’n naktak in suizui uh a, Post Mortem result abaihtheipen a lakkhiat ahihtheihna ding in ama’ level ah laigelh in tuni’n A. Ghanashyam Sharma, MPS, SDPO/CCpur in RIMS pha hi’n gen hi. Thil himhim Police investigation hun lut ahihziak in mipi’n theihsiam poimawh ban ah RIMS ah Forensic expert te’n Post Mortem abawlchiang un mihing taksa tuamtuam lakhia in Kolkota ah thonzel uh a, a result ni 2/3 a suak zoulou hi’n gen hi. Siemneikim sihna tawh kisai Post mortem result suak naikei mahleh kuate hiam in athah uh hiding in muanmawh huai ziak in UD case 1/WPS-CCp 2017 u/s 174 Cr.PC apan FIR No. 1(1)2017 WPS-CCP U/S302/34 IPC kikhek thak hi’n leng SP/CCpur in gen hi. Siemneikim sihna suizui ding in Lunkhomang Khongsai, MPS, Addl. SP/CCpur etkaina nuai ah Special Investigation team tuni a bawlkhiat a om hi’n SP/CCpur in genbeh a, amau ni 1 in 3 vei ama’ kiang ah report bawlzel ding uh hi’n gen hi. Special Investigation team ah A. Ghanashyam Sharma, MPS, SDPO/CCpur, Inspector Suresh, Asst. Reader to SP/CCpur leh Women Sub-Inspector Manhoihvung, OC,Women Police Station hi uhi.
DC’s resident leh IRB liam thu ah FIR bawl
Lamka, Jan-4: Tangnuam hanmual ah sisa a kimukhia Siemneihkim’sihna tawh kisai lungkimlou mipi’n zannitak dak 7:00 velin DC official resident lutsawm in gate phuhong uh a, gate bul a duty 1st IRB personnel (1194458) Kh. Brojen Singh (41) s/o Kh. Nobin Singh of Thoubal Kshetri Lekai mipi’n alu leh amai hihliam kha uh a, DC resident leng suang a dengpawl om hi’n DC/CCpur leh 1st IRB te’n Police Station ah complain bawl uhi. Huai thu ah Police te’n FIR No. 3 (1) 2017 CCP-PS U/S 143/147/149/353/447/506/326/511/34 IPC registered uhi. 1st IRB lam apan kizadan in Kh Brojen Singh serious ziak in zannitak mah in Dist. Hospital apan Imphal a Raj Polyclinic ah puaklut in om a, operation bawlngai maithei hi’n gen uhi.
Food & Vegetable Processor ading apply theih
Lamka, Jan-4: Saikot a Industrial Training Institute ah trade thak Food & Vegetable Processor zilding numei leh pasal lunglutna nei te’n office ah prescribed application form Rs.40/- pia in ngahtheih ding hi. Application form fill-up zawh in gazetted officer/self attested recent passport 2, marksheet /certificate/HSLC admit card etc. attested teng tawh January 13, 2017 tan in submit ngai ding a, thuchian kimzaw office ah kantheih ding hi.
Free and Fair Election thu kikum ding
Lamka, Jan-4: Society for Fast Justice (SFJ)/CCpur makaih in January 5, 2017 zinglam dak 9:00 apan KIC Complex Tuibong ah Free and Fair Election ding tawh kisai “Your Leaders want to share the visions & dreams they have for you for Free and Fair Election” chih thupi zang in kikum khopna omding hi. Huai ah Rev T.Janglhun Adviser SJF-CCpur in thumna in hun hongding a, CCpur A/C, Tupaimukh A/C, Thanlon A/C, Henglep A/C, Singngat A/C leh Saikot A/C a intending candidate te’n 10-15 minutes thugenna neiding uhi. Huai hun ah panel member in Elder Nengsong, Adviser, SFJ-CCpur; Elder Dr LS Gangte; Thangkhojang, President,KIC; Elder J.Lhungdim; Ms June Rose Vaiphei; Ms.Kim Gangte; James T.Singson; Daniel Nehlunlal, Advocate; Thangkhosei, President, KIM leh Thangthasiem, Sr Advocate hiding uhi.
Pensioner te’n Aadhar Card No. submit ngai
Lamka, Jan-4: A.Umarani Devi, Dist. Social Welfare Officer/CCpur in Ministry of Rural Development, govt. of India tungtawna old age pensions- Indira Gandhi National Old Age Pension Scheme (IGNOAP), Indira Gandhi National Widow Pension Scheme (IGNWPS) leh Indira Gandhi National Disable Pension Scheme (IGNDPS) pensioner/beneficiaries te’n akintheilam a Aadhar Card number submit ding in theisak hi. Pensioner/beneficiaries teng Ministry website ah uploaded hiding a, February 20, 2017 tana Aadhar card No. submit louteng Ministry of Rural Development, govt. of India in beneficiary list apan paikhia (cancelled) ding hi’n taklang hi.
SP in Inspector 2 release
Lamka, Jan-4: Rakesh Balwal, IPS, SP/CCpur in tuni nitaklam in CCpur Police Station Officer i/c lenlel Inspector Thangzamuan leh Parbung Police Station a Officer i/c lenlel Elvy Tunglut release hi. Inspector N. Thangzamuan in tuni mah in Sub Inspector Jangkholal, 2nd OC/CCpur PS kiang ah mohpuakna pekhia a, Kangpokpi Police Station ah OC lending hi. Inspector Elvy Tunglut in CID (Special Branch) ah join ding hi.
YPA GHQ in anntang bag 20 pia
Lamka, Jan-4: Young Paite Association (YPA) GHQ in YPA New Lamka block huapsung a om khawsak haksa diakte kiang ah hawm ding anntang bag hunkhop block makaite kiang ah tuni’n pekia uhi. Antang ahihleh YPA GHQ in fund omdan a kaikhawm in, bag 20 lei uh a, block in unit-te tawh kithuzak in list abawl fel chiang ua haksa diakte kiang ah hawm ding uh hi’n kigen hi.
YPA kichi panpih ngaite panpihtu dia pawl kibawlkhia ahih dungzui in December 2016 a meeting hun ah YPA member khawsak haksa diakte kiang ah panpihna piak ding chih dungzui in huai sepsuahna hi a, bazar ah anntang lei ding a vang ziakin tua kisemsuah thei pan chi’n Khailianthang Tonsing, President, YPA GHQ in gen hi. Maban ah leng Lamka block, Imphal block leh Vangai block huapsung a om khawsak haksa diakte panpihna piak hiding in gen hi.
Siemneihkim luang kivui
Lamka, Jan-4: Siemneihkim (35) d/o (L) P. Lunkhokam of Kolasib, Mizoram luang tunitaklam in YMA hanmual ah kivui hi. Ama sihna tawh kisai tuzing in DC/CCpur Office chamber ah makai tuamtuam te’n kihouna nei uh a, huai hun ah DC/CCpur in ex-gratia Rs. 1.3 lakhs banah a tate’ etkona ding social welfare tungtawn in ngaihtuahsak dia achiam dungzui in sunnung dak 1:00 vel in district hospital morgue akipan Police te’n siluang pekhia ua, a sanggam Khaikhomang of Chiengkon inn pansan in Evangelical Synod Church inntekna in vuiliam in om hi.
Morgue ah hunzat kum khat ching dekta
Lamka, Jan-4: All Tribal Women Union (ATWU) makaih district morgue kong ah tribal martyr-te luang tutpih kawm a lengkhawm leh thumkhawmna neih uh kum 1 ching ding hita mahleh tunitan khawllou in paitou uhi. Tuni’n leng mun tuamtuam akipan tamtak paikhawm uh a, mi tuamtuam in thu agen banuah gam leh leitang adin thumkhawmna nei uhi.
Huai banah AWTU in khawpi sung mun tuamtuam ah awareness programme aneih uh sunzom zel uh a, zan nitak in Ngulthawng Bazar, Vengnuam, New Lamka ah nei uhi. Huai hun ah Nianglian, President, ATWU in Delhi zinna report apiak banah 58-CCpur A/C a MLA intending candidate Thangbiaklian Hangzou in thugen a, programme sungin mipi paikhawm te’n gam leh leitang adia thumkhawmna aneih banuah slogan sam uhi.
Entrance test om ding
Lamka, Jan-4: JNV/Tuinom ah academic session 2017-18 a class VI zilding entrance test January 8, 2017 zinglam dak 11:30 apan sunnung 1:30 tan in educational block 6 ah omding a, CCpur Dist. ah candidate 1215 om hi. CCpur block a candidate 685 te’n Phungkhothang govt.H/S ah entrance test neiding uh a, Henglep block a candidate 108 te’n Tuila khua a Vumhao H/S ah neiding uhi. Singngat block a candidate 20 te’n Singngat H/S ah entrance test neiding uh a, Thanlon block a candidate 71 te’n Thanlon H/S ah neiding uh a,Tipaimukh block a candidate 165 te’n Parbung govt H/S leh Samulamlan block a candidate 166 te’n Kangvai khua a INA Memorial H/S ah entrance test neiding uhi.
SUUNNA:
Niangneikim (80) w/o (L) Siaktinkhup of Compound veng zan nitak dak 9:00 vel in teknat in si a, tuni in kivui hi.
Momuon (8) s/o Boinu of Tuinom Lamka a pute khua Salam Patong khua a kum thak zang a hawh Jan. 4, 2017 in tui va dung lui ah kia in si.
Niangthiansiam (13) d/o H. Sontanlian of Chapellane, Hiangtam Lamka tuni sunnung dak 1:00 velin Dist. Hospital ah Kaih ziakin si a, nitaklam in Lamka hanmual ah kivui hi.
STATE THUTHANG:
Smartphone pansan recording system zat hiding : CEO
Imphal, Jan-4: India gamsung a voter ID 100% nei masapen Manipur leh Uttarakhand hi a, Manipur a mun 2,219 a polling station 2,794 teng a vote khiak hun ah smartphone pansan a recording system zat hiding a, voter te’n 3G connectivity tungtawn in polling tawh kisai live streaming en thei ding uh chi’n Chief Electoral Officer (CEO) Manipur Vivek Kumar Dewangan in gen hi. Aman a genzelna ah polling station 2,794 lakah 1,200-te ah real time recording om ding a, huai dia Manipur State Power Distribution Company Ltd. (MSPDCL) in polling station 108 chih louh polling station dang teng ah electric peding uh a, Manipur a election hun ah masapen ding in EVMs ah candidate teng limlak om ding hi. Huaiziakin candidate ding teng in affidavit thak tawh ‘No Demand Certificate’ a piaklut uh ngai ding a, huai pelou-te disqualify theih ding chi hi.
Manipur election khangthu adia masapen ding in outstation service voter 11,915 te’n electronic postal ballot system zang ding uh a, vote khiak ni a voter-te hasot leh makaih ding in Returning Officer-te Voters Assistance Booth piak hiding in gen hi. Manipur a nawngkaina omlou a election siangthou tak a sai ahih theihna ding in Central Para-military force company 250-300 kikal zat hiding a, Election Model Code of Conduct (EMCC) zat ahih tawh kiton in intending candidate, political party, state leh union govt. teng in EMCC khauhtak a zui ding in theisak a, EMCC in Manipur a recruitment process pailel teng a huamkhak ziak in huai dan kalh-te akisaipih official tungah action khauhtak lak hiding in gen hi. Political party teng in Jan 7, 2017 sun dak 12:00 tan a private property a defacement teng lakhe ding in theisak a, political functionaries teng in leng amau adia govt. gari bikhiah teng Jan 5, 2017 sun dak 12:00 tan a pekhe ding in theisak a, ECI in nitak dak 10:00 apan zing dak 6:00 tan loudspeaker zat ding kham a, singtang dawn a polling station tang kha-te Ministry of Defence in helicopter zat ding a bikhiah-te zang a puak tung hiding uh a, emergency hun ah Air ambulance leng zat hiding in taklang hi.
e-Blockade paizom ding
Imphal, Jan-4: Election Commission of India (ECI) in Manipur assembly election ding tawh kisai in tuni’n poll schedule puang mahleh economic blockade paitou zel ding hi’n UNC te’n tuni’n gen uh a, thubuai sukveng masiah Manipur a Naga-inhabited area ah muangtak a election om theilou ding hi’n gen uhi. Huai tawh kisai a K.S. Paul, ex-President, UNC in tuni’n blockade paizom ding a, thubuai suk vengna dia kibuai-te kalah kihouna om ding himahleh tutan in Manipur govt. apan dawnna omlou ziak in ECI in thupuan bawl mahleh blockade tawh kisai a kiphinna hihkhauh chih louh lampi dang omlou chi hi. UNC a active Member Pual in Manipur govt. in Manipur a Naga mite khem a, a pu-pa gam uah district thak bawl khiak ding tawh kisai in thuzak lou a, Naga area ah election sai theihna dia thil omdan hoih ding hiam chih gen theilou hi’n taklang hi.
IED bomb mukhia
Imphal, Jan-4: JK Light Infantry (JKLI) team te’n zan nitak dak 10:30 velin Ningthoukhong Kha Khunou a culvert nuai ah IED bomb mukhia uh hi’n kigen hi. IED tawh kisai police-te theihsak ahih dungzui zing dak 2:30 velin Police bomb disposal squad te’n IED vala uh a, zinglam dak 7:40 velin Tera Urak mun ah susia uh hi’n kigen hi. Akigendan in Police Bomb disposal squad te’n IED omna mun ah gelatin stick packet 16, ball bearing packet 13, detonator 8 leh wire meter 10 mukhia uh a, huai kim ah security suk khauh a om hi’n leng taklang uhi.
Heirok A/C ah party worker-te kinawk tuah
Imphal, Jan-4: Heirok Assembly Constituency ah tuni’n MPP worker leh BJP worker-te kalah maban election ding tawh kisai a buaina om hi’n gen uhi. Thusuak in Heirok A/C a Ukhongshang area ah tuni zing dak 6:00 velin Manipur Peoples’ Party (MPP) intending candidate N. Sovakiran worker te’n BJP intending candidate Th. Radheshyam worker te’n programme a bawl uh va sukbuai sawm ziak in party 2 a worker-te kalah kinawk tuahna om a, Sovakiran security escort-te tawh kithuah MPP worker te’n BJP-te gari 4 sawnpuk sak uh hi’n kigen hi.
Akigendan in BJP worker te’n Th. Radheshyam adia maban election adia panlak ding dan tawh kisai in Ukhongsang mun ah programme a sai hun uah Sovakiran leh a escort-te telin MPP worker te’n huai bial ah election tawh kisai a programme saiphal hilou chi’n va subuai uhi. Huai nung zinglam dak 10:00 velin BJP worker te’n Sovakiran tenna inn va luh uh a, Thoubal district SP makaihna a police team te’n thil tungna mun va delh in BJP worker-te hawlkhiakna dia blank fire bawl uh hi’n kigen hi. Huai tawh kisai a BJP intending candidate Th. Radhesyam in media-te tawh kimuhna ah thiltung mawhpaih thu puang a, Sovakiran in ngaihdam a nget ding banah security escort zang a BJP worker 5 soisak tungtang mipi vaihawmna simmawhna hi a, huai bial pen mipi vaihawmna ahih ziak in voter te’n meeting leh kihou khawmna sai thei uh chi’n gen hi. Thiltung tawh kisai in BJP worker te’n Ukhongsang Makha Leikai ah meeting nei uh a, huai hun ah thiltung mawhpaih banah N. Sovakiran escort-te dakkal 24 sung a suspend dia phut ding banah Ukhongsang leh Heirok A/C sung ah N. Sovakiran boycott ding in thupukna bawl uh a, huailou in Sovakiran in Ukhongsang mite’n election tawh kisai a thil sai phal hilou ding a thutanna ana bawl ngei uh hi’n taklang hi.
Kum 1 paita mahleh Ema Market zawh siang hilou
Imphal, Jan-4: Manipur ah Jan 4, 2016 zinglam dak 4:15 vel a 6.8 magnitude a hat zinling ziakin mi 9 si in mi 100 val liam a, thil tuamtuam sia hunkhop om a, huai lakah Imphal a Ema market 2 leng a kisiat nung kum 1 valta mahleh tunitan bawl zawh hi nailou hi’n gen uhi. Zinling kipatna mun Tamenglong district a leinuai km 17 vel a thuak hi a, Ema market 2-te a muan huai louh ziak in huai a women vendor teng temporary market shed ah suankhiak hi uh a, women vendor te’n market bawlhoih nang a nasep zousiang ding a phutna in kiphinna tuamtuam bawl mahle uh zawhsiang louh in om a, Tamenglong district a zinling thuak te’n rehabilitation package leng zekai hi’n taklang uhi.
Lampi blacktopping bawl louh in nusia
Imphal, Jan-4: Wangkhei A/C a Chingmeirong Maning Leikai a nupi thangpai te’n Jan 6, 2017 tan a Chingmeirong area a lampi bawlhoih ahih keileh lampi khak ding in vauna bawl uh a, contractor khat in lampi bawl a, suang leh lei san sung mahleh blacktopping bawl lou in lampi zawh louh a nusia hi’n gen uhi. Huai tawh kisai tuni nitaklam in Sinam Shyama Devi Town Hall ah press conference om a, huai ah E. Memma in media-te tawh kimuhna hun ah Feb 26, 2016 in veng mipite sum kithawh khawm in lampi bawl uh a, huai nung in Khurai apan Contractor khat in June 2016 in Ward No. 26 ah mipi kiangah dotna bawl lou in lampi bawlhoih nang in lampi kibawl-te tungah sung leh lei san sung a, himahleh economic blockade ziak a van poimawh omlou chi’n kha 6 paisa apan nasep khawlsan a, veng mipite’n bangzah vei hiam sam mahle uh contractor va kilang tuanlou hi’n gen hi. Jan 6, 2017 tan a contractor in nasep a sutzop keileh Chingmeirong a lampi 4 – Khonang Ani Karak, PG Oil pump mai a lampi, Nepali Basti Road-te Jan 7, 2017 apan khak ding uh hi’n taklang a, himahleh press conference hun a Contractor va kilang in khawsung mite tawh kihouna nei uh hi’n kigen hi.
Kpi ah Election MCC puang
Kangpokpi, Jan-4: Kangpokpi Deputy Commissioner T. Ranjit Singh in 11th Manipur State legislative Assembly Election 2017 ding tawh kisai a Election Commission of India (ECI) in New Delhi mun ah tuni’n Manipur telin state 5 adia election schedule a puan uh tawh kiton in tuni akipan election process zawhsiang masiah Election Model Code of Conduct (EMCC) zat hi’n gen a, Kangpokpi district sung a 46-Siakul (ST), 50-Kangpokpi (Gen) leh 51-Saitu (ST) A/C banah intending candidate, political party teng leh a kisaikhakpih teng huam hi’n gen hi. Model Code of Conduct copy ahihleh ECI website – http://eci.nic.in leh CEO Manipur website – http://www.ceomanipur.nic.in ah muhtheih ding a, intending candidate, political party leh akisaipih functionaries, Govt. dept./office teng in leng election process zawhsiang matan MCC zui ding a ngetna bawl hi’n gen uhi.
Integration Tour khahkhia
Imphal, Jan-4: IGAR(S) thusuak in agendan in 9-sector nuai a 12-Bihar-te saina in Delhi leh Agra a National Integration Tour a kuan ding Imphal a school tuamtuam apan teacher bangzah hiam telin student 20-te tuni zingsang in Brigadier Jai Singh Bainsla, Commader 9-sector A/R in khahkhia hi’n gen uhi. Huai hun ah Brigadier in student leh teacher te’n tour ding tawh kisai in lunglutna nei uh a, huai ziak in tour a phatuam theipen a zang ding in ngen hi.
Tour sung in student te’n Qutub Minar, Red Fort, India Gate, Taj Mahal, Agra Fort leh Fatehpur Sikri pah ding uh a, President of India Pranab Mukharjee leh Minister for Human Resources Development Prakash Javadekar tawh kihou khawna hun zang ding uhi. Student te’n tour sung in Dhaulakuan Army Public School leh Delhi University a mun tuamtuam apan student-te tawh kithuah khawmna hun zang ding uh a, Jan 15, 2017 in Army Day Parade zatna ava uap ding banah uah General Bipin Rawat, AVSM, YSM, SM, VSM, ADC, Chief of Army staff tawh kimu ding uh a, Jan 20, 2017 in hon kik nawn ding uh chi’n taklang uhi.
AI of Schools 4 DI of Schools in kaisang
Manipur Secretariat (Tribals Affairs & Hills) in Autonomous District Council / CCpur nuaia Assistant Inspector of Schools 4 tumazekin Deputy Inspector of Schools (Pay Scale Rs 9300-34800 + Grade Pay Rs 4400) in kaisang(promotion) sak hi. AI apan DI a kaisang 4-te anuai a bang hi uhi.
1 S. Zamkhanmang
2 H Paokhothang
3 H. Thangkhankham
4 Smt N. Chongboi Haokip
TUNI THUPI:
“Huchiin, aman, hiai lam hon naih ken: na khepek akipan na khedapte suahin, na dinna mun lah lei siangthou ahi ngala, a chi a.” - Eksodas 3:5
EDITORIAL:
Election maituah hun nawn
Tamtakte’ adia lamet bangin leh tamtakte’ adinga lamet louh hun laitakin Election Commission of India (ECI) in tuni in India state 5 a Assembly election om hunding hon puang uhi. Newspaper-te ah tuni a ECI in election hunding apuan ding thu kigelh a, dik leng adik a, himahleh, Manipur state tawh kisai ahihleh zanin thuleng tamtak om ziakin mi tamzaw phialin election hunding ECI in puangkhe dingin gintakna neilou ua, ‘President Rule om ding ahi’ chih ngaihdan nei tamtak ki-om hi. State dang 4-te apai ngei-in apai dia, ECI in leng election hun ding apuangkhe dia, himahleh, Manipur zaw gen haksa ahi chi tamtak i om uhi. Huchih lai in tuni in ECI in hon puangkhe vek ua, tamtak adingin kiguihna leng hiding hi.
Mipi palai ding telna a poimawh kei ichi kei a, ‘serious’ mahmah ding ahi. Himahleh, eilawi serious dan pen kivelna ding tamtak om ding hi. Kuamah a kimawhsa ding i om kei a, ahihziakin pil hun ineih uh poimawh mahmah ta hi. Politics vai ah gen le hang, sapte’n grass root level a chih zezen uah pan panle hang, Village Authority/MDC/MLA leh MP election-te i neizel ua, huai hunte in mipi’n vote ikhe zel uhi. Vote nei zenpi a vote khelou chih leng Danbupi dungzui in khelhna hi a, vote khat sanga tamzaw va khiak leng khelhna hinawn a, mahni deihtelna zang kawm a i vote tek i khiak pen dan zuihna hi a, Pathian mit muhin leng siangthou hi. I gup candidate adia sih ngam apang a, vote khiak theih zahzah khiaksawm chih pen ei Christiante’ ading hilou hi.
Leitung a vaihawmtu banga ngaih leh super power United States in leng election ngai serious mahmah ua, US President telna dingin kum khat mahmah lut hi. Amaute’ kitelna a siangthou bukim zaw chi tuankhang, himahleh, eilawi dan a volunteer hat akibei, sum a kilei chihte om vetlou in chidam takin kitelna neisek uhi. Maban March 4, 2017 chiangin kum 5 paisa a ituah bang uh Assembly election i maituah nawn ding ua, gam-le-nam iit hong kibehlap nawn ding chih chiangsa ahi. Mipi khual taktak kua hihiam chih bel mimal ngaihtuahna ah hong om maiding a, candidate-te’ mi hinzia, mipi’ adia asepkhiakte uh leh a sepkhiak tup-te uh leng taklatin hong om ding hi. Hiai hunah thupukna siangthoutak bawltu ding voter-te mah ihi uhi.
Candidate hunkhop apan summuh hun leng ahi a, mipi’n amaute’ nuihmai ituah hun uh leng ahi a, hun kipahhuai chikhat hiphot hi. Ahihziakin, sum-le-pai a i vote manpha tak i zuak ngeingei leh a khawnung chiangin ‘Sum a ka leisa’ chih hi veve ding ahih manin, chihtakna, diktatna leh ginomna tawh mipi ikisak uh hunta hi. Election ziakin eilawi lakah kisiatna thupitak ana tungta a, huai in nam-le-gam vai, khawtang, saptuam, inn sak-innkhang leh innkuan sung tanpha hon kangkha sakta a, poi mahmah hi. Tukum 2017 Assembly election bek ah mipi’n pilna leh sinlai (lesson) khat lata le chih deihhuai hi. I gentaksa bangin election tawh kisai bel serious ding mah hi a, i serious dan uh khengval lawsek hi. Candidate-te’ adia sihngam a pang, amau lah hon theihpih khollou hilai chih khawng tam petmah hi. I economy dinmun a niamluat ziak leh i zawnluat ziakuh ahihdan kilang mai hi. India a state dangte ah leng election om zel a, Metropolitan cities New Delhi, Chennai, Kolkata, Bangalore ahihkeileh Mumbai-te ngialah election neihlam theilou bangmai in mi tamtak om uh a, vote uh kikhiakin inn ah ki pai hiau mai ua, vote kituhte leh a serious diakte i et chiangin mi zawng leh genthei- slum area a tengte hi ua, candidate-te apan sum amuh ziak un hahpan thei mahmah uhi. Tua tawh eite kibang lel hihang chih theih hi.
Election in eilawi bangzahta a hon sukha hiam chih leng hoihtak a study bawl poimawh lai hi. Ahitak gen le hang, i serious na penpen uh MLA election hisek a, huai hun chiangin innsak innkhang ahihkei leh lawm-le-vual tanpha kimelma tampi i om khasek uhi. Huai in saptuam leh khawtang hon sukha hi. Saptuam election om hun chiangin, huai hunlai a ka melmapa/ ka melma nu chi a vote pe ut hetlou om sek a, huai in saptuam kitelna tanpha mel hemsak hi. Thuleng khat kiza viatviat danin, koiveng hiam khatah saptuam in Dorcas (numei pawl) in election nei ua, tua ah vote zong tanpha om chi uhi. Election ngaihkhawk pen thilhoih ahi a, ahihziakin i uang khengval khasek uh chihthu ahi hi.
Manipur in bangchibang in 2017 election hon maituah dia chih gen haksa mahmah hi. A ziak ahihleh, Manipur state in UNC’ economic blockade ziakin haksatna gen vuallouh tuaklel a, Naga bial teng ah Government office-te thagum in khak hi a, phaizang bial alah Inner Line permit ngente’n kiphinna pannawn, 3 bill ziaka siluang 8 omlaite lah vui hinailou lai! Hill district teng leh valley district-te buai chihtak abuai. Centre force thahatna zangkawma election neih hong hi peuhmah ding chih bel chiangsa ahi. Manipur ah President Rule om ding chih thu len ziakin Chief Minister Ibobi makaihin Congress MLA te’n Delhi delh uhi. PR koih a omlouh pen Congress-te’ adingin vualzawlna chikhat bel hikha thei mawk hi.
Ahi a, tuni in CM Ibobi makaihin President Mukherjee leng va kimuhpih ua, tua hunah Ibobi in Mukherjee kiangah ‘Union Home Ministry in Election Commission ah Manipur ah Dan leh thupiak ginalou, tu-le-tu a election sai theih vual ding hilou chi a thupiak abawl uh thuzuau ahi’ chi’n va gen hi. A taktak in hiai pen Ibobi adia thil zumhuai mahmah in leng theihtheih hi. Ni 60 val mipi’ gentheihna state government in a suk vaiveng hun mahmah ta hi. Centre a vaihawmna len bel BJP makaih NDA govt hi a, election kuan ahih tawh Congress ruled state a thubuai ah kigolh tengtung ding un gintak huailou him hi. Huchi kawmkalah, Election Commission in Autonomous body ahihna uh leh a chihtakna uh hon suahkhia in, election hun ding hon puangkhe daih ua, alehlam ah, BJP adingin leng nervous huai mahmah dingin kilang hi.
No comments:
Post a Comment