Manipur Express | January 6, 2017

HEADLINES:

Election observer di’n IRS officer 400 sawl ding:

Opposition party 8 apan palaite’n Budget luikhiak hun suan gamla di’n phu uh

New Delhi, Jan-5: Congress, Janata Dal-United (JD-U) leh Trinamool Congress (TMC) party tel in opposition party 8 apan palaite’n tuni’n Election Commission of India (ECI) te kimuhpih uh a, tua hun in Party 8 apan palaite’n India state 5 a Assembly election om ding kuan a Parliament budget luikhiakna (presentation) February 1, 2017 a neih ding lemsalou uh ahihdan theisak ua, State 5 a vote khiak tawpni March 8, 2017 nung a neih din phu uh hi’n kigen hi. Senior Congress makai Ghulam Nabi Azad in a genna ah, budget luikhiak kichi ruling party-te’ adia vote zonna kalbi poimawhtak ahi chi hi. Election hunma a budget luikhiak ahih ngeingei leh ‘free & fair elections’ kichi thil hithei hilou ding ahi chi’n leng Azad in gen hi. Tua ziakin Centre a ruling BJP in voter-te a thuzawh nop ziak ua huaithu hon bawl uh ahi chi’n leng Azad in gen hi. Zan in leng opposition party te’n President Pranab Mukherjee kiang ah budget luikhiak hun suan ding in gelhthawh in ngen khinta uhi. 

Tuabang kalah, Assembly election omna ding state 5-te a expenditure observer ding in Indian Revenue Services (IRS) officer 400 sawl hiding a, observer-te’n election  hun sung a black money zat leh dikloutak a thilhih omte enchian ding uh hi’n ECI thusuak in taklang hi. ECI in hoihtak a briefing a bawl nung in observer dingte’n election omna ding state leh constituency-te zuan ding uhi.  Observer a kuan dingte ahihleh Income Tax apan IRS officer 200, Central Excise & Customs departmSent apan IRS officer 150 leh central services dangte apan IRS officer 50 hiding hi’n leng thusuak in taklang hi.    

Election expenditure observer-te ahihleh New Delhi a EC Headquarters tawh kithuzak  ding uh a, voter-te sum a khem a om louhna di’n panla ding uhi. IT department a policy making body ‘Central Board of Direct Taxes’ in election omna ding state a major airport-te ah sum puaklut leh puakkhiak om kha hiam chih ngentel tak in enkai ding uh a, election kisakkholhna leh vote khiak hun sung a zu leh khamtheih thilte zat a om louhna di’n leng a kisaipih State excise departments leh police-te’n panla ding hi’n kigen hi. Tua banah, flying squad leh mobile team nasep leh panlaknate GPS pansan a etzui hiding hi’n ECI thusuak in taklang hi.  

ECI in zan in UP, Punjab, Uttarakhand, Goa leh Manipur a Assembly election hun ding a puang uh tawh kiton in February 4-March 8, 2017 sung in vote khiak hiding hi. UP ah phase 7 a neih hiding a, Uttarakhand, Punjab leh Goa state ah ahihleh phase 1 a zawh ahih ding banah Manipur ah March 4 & 8, 2017 in phase 2 a neih hiding hi. State 5-te a candidate te’n a sum zat theih zah ding uh leng bikhiah in om a, huai dungzui in UP, Punjab leh Uttarakhand ah candidate 1 zel in Rs. 28 lakhs sang a tamzaw zang theilou ding uh a, Goa leh Manipur a candidate 1 zel in Rs. 20 lakhs sang a tamzaw zang theilou di’n bikhiahsak a om hi’n leng kigen hi.

TUALSUNG:

DEO/DC in Election tawh kisai thusuah

Lamka, Jan-5: Lunminthang Haokip, District Election Officer (DEO)/DC CCpur in Manipur ah Assembly election om ding tawh kisai Election Commission in thupuan abawl pansan in Ccpur district a assembly constituency (A/C)6 teng ah assembly term 11na a ding election tawh kisai press note suah hi. Huai dungzui in CCpur district sung a A/C tuamtuam 6 omte 55-Tipaimukh A/C, 56-Thanlon A/C, 57-Henglep A/C, 58-CCpur A/C, 59-Saikot A/C leh 60-Singngat A/C ah Phase I assembly election om ding anuai a bang in taklang hi. 

Sl.No. Poll Event Phase-1 Assembly Constituencies of CCpur district

1. Date of notification 07.02.2017 55-Tipaimukh (ST) A/C

2. Last Date of Making Nomination 14.02.2017 56-Thanlon (ST) A/C

3. Scrutiny of Nomination 16.02.2017 57-Henglep (ST) A/C

4. Withdrawal of Candidature 18.02.2017 58-CCpur (ST) A/C

5. Date of Poll 04.03.2017 59-Saikot (ST) A/C

6. Date of Counting 11.03.2017 59-Saikot (ST) A/C

7. Date of Completion 15.03.2017 60-Singngat (ST) A/C

ECI in election thupuan (announcement) a bawl tawh kiton in Model code of conduct leng CCpur district pumpi ah zatpah hi’n DC in taklang a, huai tawh kisai candidate-te, political party-te, mipi leh akisaipih te’n ah model code of conduct bawhse lou a zui chiat ding in DEO/DC Ccpur in theisak hi.

Feb. 7 in election notification suahkhiak hiding: DC

Lamka, Jan-5: Election Commission of India (ECI) in zan a State 5 ah assembly election neih hun ding a puankhiak tawh kiton in tuni sunnung in DC/CCpur Lunminthang Haokip, IAS in ama office chamber ah Lamka pansan press/media-te kimuhpih in, election pai ding dan leh model code of conduct tawh kisai pulak hi. Aman agenna ah, tutung election ah electronic voting machine zat  hiding a, EVM first leh second level checking zawh hita  a, tunung sawtlou in political agent-te tawh randomization neih hiding in gen hi. 

Election hun ah numei leh vualbanlou te’n leng buaina tuaklou a vote akhiak theihna ding ua naktak in panla uh hi’n gen hi. Tutung election ah phaijang bial kia ah Voters Verifying Paper (VVPAT) zat hiding a, election hun a political party/candidate-te enkai ding Surveillance Team tuamtuamte leng guangfel hita in, candidate khat in vote campaign na in Rs. 20 lakhs sang a tamzaw zang theilou ding a,  Rs. 50,000/- sang a tamzaw paw theilou ding hi’n leng gen hi. Electoral roll final publication ahihleh January 12, 2017 a suahkhiak hidin gen hi.

Manipur Legislative Assembly Election ahihleh phase 2 in khen a, CCpur district sunga assembly constituency 6-te first phase ah telkha a, huai dungzui in February 7, 2017 in election notification suahkhiak hiding a, February 14, 2017 tan in nomination a file theih ding banah February 16 in Scrutiny om ding hi’n gen hi. March 4, 2017 in vote khiak hiding a, March 11in vote sim hiding a, CCpur district in election process teng March 15, 2017 tan in zousiang ding hi’n leng gen hi.

Dir. IPR in Lamka hongpha

Lamka, Jan-5: Lalrongbawl Hmar, Dy. Director, Information and Public Relations (IPR) & in-charge DIO/CCpur in Lamka khawpi a newspaper editor teng tuni zinglam dak 11:00 akipan Tuibuong a DIO office ah kipawlhkhawmna leh ann nekpihna bawl a,  huai hun ah Meghachandra Kongbam, Director, IPR in Lamka hongpha in uap hi. Director IPR in Editor paikhawmte ma ah thugen in tuni a hibang kimuhkhawmna hun nuamtak om nuamsa in kipak petmah ahihdan gen hi. Aman agenzelna ah DIO CCpur office a staff tungtang leh thil poimawh tuamtuam tawh kisai DIO in-charge kiang a dotna a bawl Ms. Rongbawl in a dawnna ah staff 3 lel om in gen a, staff  kiching leh gari poimawh thu gen hi. Director in huai tawh kisai a dawnna ah gari ngaihtuah ding hi’n agen banah DIO office a translator 1, UDC 1, Driver 1 leh Grade IV 2 a om ding hi’n gen a, DIO in-charge in Directorate ah staff tawh kisai lehkha pe ding in Director in theisak hi. Huai louin press-te a din DIO office ah telephone banah internet facility leng a om theihna ding lampi ngaihtuah hidin gen a, in-charge DIO tawh akul leh poimawh bangin kithuzak tuah ding hi’n gen hi. Hiai hun zat zawh in Dy. Director IPR in Headquarter a MHJU Press Club mun va enkhia hi.

SFJ pawlin intending candidate-te kimuhpih

Lamka, Jan-5: March 4 & 8, 2017 a 11th Manipur assembly election om ding tawh kisai a gamsung ah siangthoutak a kitelna om theihna ding tupna in Society for Fast Justice (SFJ) te’n tuni’n Tuibuong a KIC office ah constituency tuamtuam a intending candidate-te samkhawm in kithuahkhawmna nei uhi. Huai hun ah assembly constituency 6-te a sitting MLA leh intending candidate teng chial mahle uh tamtak tellou uh a, CCpur A/C akipan intending candidate CT Lian Guite leh Dr. N. Thangtawn, Henglep A/C akipan Tinkhonei leh Mangcha Thangzom kia kihel uhi. Huai hun ah moderator in Rev. Dr. Ginkhanmung Zou, Vice President, Society for Fast  Justice pang a, panelist in Elder LS Gangte, Thangkhojang Haokip, President, KIC, Elder J. Lhungdim, June Rose Vaiphei, Daniel Nehlunlal, Advocate leh H. Thuamson pang uh a, intending candidate telte’n  policy leh manifesto puangkhia uhi. Programme sungin panelist-te apan ngaihdan genkhawmna om hi. Huai hun ah Social for Fast Justice Core Committee expansion bawl a, maban ah candidate teng tawh live debate neih dingin leng thupuk uhi.

MCC & Expenditure team te’n nasep panding

Lamka, Jan-5: ECI in 11th Manipur MLA Election, 2017 ding apuankhiat nung CCpur District pumpi leh A/C 6 ah Model Code of Conduct (MCC) leh Election Expenditure Monitoring te’n nasep pan ngal a, concerned Nodal Officer-te kiang ah report ding in District Election Officer/DC CCpur in theihsakna bawl hi. Huai dungzui in MCC Standing Committee te’n District. level in nasem ding uh a, MCC Monitoring Committee/Team te’n A/C level in nasem ding uhi. Video Surveillance Team te’n A/C level, Video Viewing Team te’n A/C level, Accounting Team te’n A/C level in nasem ding uhi. Complaint Monitoring Control Room & Call Centre te’n District level in nasem ding uh a, Media Certificate and Monitoring Committee te’n District level in nasem ding uhi. Flying Squad te’n A/C level, Static Surveillance Team te’n A/C level leh Assistant Expenditure Observer te’n A/C level in nasem ding uhi.

VDF personnel-te normal duty nei din theisak

Lamka, Jan-5: CCpur District VDF Welfare Association (CDVDFA) a President Laltingen Vaiphei akipan kizadan in, Manipur government in Jan. 5, 2017 tan a khalawh a punsak keileh tutung assembly election om ding ah election duty a kuan/kihellou dia  theisak uh hi’n gen hi.

Huai tawh kiton in Imphal pansan niteng tanchinbu Echel Express in December 30, 2016 issue ah government in VDF personnel-te khalawh Rs. 7,000/- in pungsak chih suahkhia ua, a kanchet nungun thudik mah suah uh hi’n gen hi.

Huai tawh kiton in VDF personnel te’n normal duty nei ding in theisak a, kha lawh punsak pen secretariat ah process pailel ahihna ah member te’n ngaklai dingin ngen hi. Normal duty bawl mahle uh economic blockade a ROP ah bel kuamah kuanlou dingin theisak a, secretariat a process pailel leng government Jan. 20, 2017 tan a pichin keileh election duty dia kuanlou ding uh hi’n gen hi. 

Chandel CSO in boycott zukkik di’n theisak

Lamka, Jan-5: Kolphe Kuki, Info. & Pub., Kuki National Liberation Front (KNLF/KNO) in Chandel district sung a Civil society orgn. (CSO) tuamtuam in joint press release a suahna uah Lalmoi Haokip, Gen. Secy., KNLF leh aseppihte Chandel district ah boycott hiding chih a puan uh thudik theilou a, a puan uh hi a taklang kawm in lungkim louh thu taklang uh a, hilhchetna bawl ding leh boycott zukkik ding in CSO-te theisak uhi. 

New Samtal hausapu gun point a merger bawlsak tungtang ah CSO leh security force-te kigolh uh ahihdan theihkhiak hi a, CSO leh security lam in akintheilam a bawldik ding in theisak uhi. Huchih ahih keileh tunung a atung ua thil tung om leh kuamah mawhsa theilou ding uh a, amau mawh kipuak ding hi’n theisak uhi. CSO te’n khentuam neilou a, nasem ding in leng ngen in theisak uhi.

PS ah license thau koihlut din theisak

Lamka, Jan-5: Election Commission of India in Manipur ah 11th MLA Election, 2017 ding apuankhiat nung Model Code of Conduct kipat ziak in District Magistrate, CCpur Dist. in DC’s office apan license nei thau (gun) 2665 val issue a omteng ahoihlou lam azat ding venna in akinaihpih Police Station ah koih chiat dingin theihsakna bawl hi. Huaiban ah Dist. Magistrate/CCpur in clause (b) of Sub-Section 3 of Section of the Arms Act.1959 dungzui in MLA election 2017 result puankhiatma DC’s office apan Arms license piakkhiat (issue) hihtawp phot (suspend) hi’n taklang hi.

Itsiam Mangpa album

Lamka, Jan-5: H. Hauminlian in abawl ‘Itsiam Mangpa’ kichi gospel music video album Jan. 8, 2017 sunnung dak 1:00 in Lailam Veng a ZPCS Sunday School Hall ah honna om ding hi. Huai ah Chief Guest in Khamthang, Special Contractor pangin hong ding a, Rev. Hangpi Manlun,  bialtu pastor  in lan ding hi. Chief host in Suanchinpau, Lungthul MDC leh functional president in CT Lian Guite, New Lamka (West) MDC pang ding uhi. Programme sungin PYF Lailam Veng leh PYF Tongdam te’n lapawl sa ding uh a, lasiam tuamtuam inleng uap ding uhi.

State Awardee for Best Teacher adi’n thon

Lamka, Jan-5: ZEO/CCpur makaih in zan in Dist. Level Screening Committee for Selection of State Awardee for Best Teacher Award, 2017 ading in CCpur Dist. ah applicant CL John, Headmaster i/c Gandhi Memorial H/S kia om a, screening committee te’n CCpur Dist. ai-oh a State Awardee for Best Teacher Award 2017 ading in Imphal ah thon uhi.

Inspector K. Santosh Singh in join

Lamka, Jan-5: Imphal a CID (Security) apan Inspector K. Santosh Singh in Singngat Police Station ah Officer i/c lending in tuni’n SP/CCpur office ah hong join hi.

Kum 1 sung in sisan 18796 test

Lamka, Jan-5: CMO office a Dist.Maralia Deptt. te’n January-December 2016  kum 1 sung in khawsik ziaka damlou mi 18796 sisan test uh a, malaria positive 72 mukhia in huai lak ah malaria PF 38 pha a, official record in khawsik ziaka misi omlou hi. August kha in khawsik ziaka sisan test teng 1953 pha in tampen a, malaria positive leng tampen in 13 pha hi.

IPPI leh Mission Indradhanush, 2017 

Lamka, Jan-5: Dr K. Rajo Singh, Director Family Welfare Service, Manipur makaih in Dist. 16 a Chief Medical Officer leh Dist. Family Welfare Officer/Dist. Immunization Officer teng in January 6, 2017 zinglam in Conference Hall, Family Welfare Service, Manipur ah State Level Review-cum-Preparedness nei ding uhi. Huai hun ah Manipur a Dist. 16 ah January 29, 2017 in 1st Round Intensified Pulse Polio Immunization/National Immunization Days (IPPI/NIDs) 2017 leh February 7, 2017 a Mission Indradhanush neih hun a ding kisakkholhna nei ding uhi.

Police te’n ginlelh mi 1 mankhia

Lamka, Jan-5: Police te’n January 3, 2017 nitak dak 8:30 velin Tangnuam hanmual ah sisa a kimukhia Siemneihkim (35) d/o (late) P. Lunkhokam of Kolasib, Mizoram sihna tawh kisai FIR No. 1 (1) 2017 WPS-CCP U/S 302/34 IPC tungtawn in ginlelh (suspect) Lamthianmuan (20) s/o (late) Zampau of Tangnuam mankhia uhi. Police te’n zan in Tuibong a Chief Judicial Magistrate court ah Lamthianmuan pawkhia uh a, CJM in January 12, 2017 tan Police custody ah omding in phalsak hi. Siemneihkim’ sihna tawh kisai Lunkhomang Khongsai, MPS, Addl SP (L & O) makaih in Police te’n sun-le-zan in suizui uh a, niteng in SP/CCpur kiang ah thil omdan report zel uhi.

YPA Lamka Unit’ winter meet

YPA Lamka Block nuai a om Lamka unit in vengsung kipolhkhawmna leh kimel theihtuah tupna in tuni’n public ground ah winter meet nei uhi. K. Kamkhanlal, Secretary, YPA  Lamka Unit in winter meet hongkhia in, N. Thangzamoi, President in kick-off a, unit nuai a zone 7-te group tuamtuam a kikhen in group leh individual ah kidemna nei uhi.

Zingchiang nitak dak 5:30 in Hiangtam Lamka a YPA GHQ hall ah winter meet programme nei ding uh a, huai hun ah 2016 sunga member si’te sunna om in, Rev. K. Lian Benson, Executive Secy, EELC in innsungmite adin thumsak ding hi.

Programme sungin Miss leh Mr. YPA kitelna om ding banah phatuamngai tungtuangte kiang ah pahtawina peding uh a, YPA Lamka Unit te’n traditional show leng nei ding banah North East Idol a first runners-up Jenny Thomte telin lasasiam tuamtuam in uap ding uhi.

SUUNNA:

Soikhanlam (60) h/o Ngailiantel of Mata tunitak dak 7:00 velin awmna ziakin si a, Jan 6, 2016 in Mata hanmual ah kivui ding.

STATE THUTHANG:

State level MC & MC meeting masapen om

Imphal, Jan-5: Old Secretariat a conference hall ah tuni nitaklam dak 3:00 velin assembly election ding tawh kisai in Chief Electoral Officer (CEO) Manipur Vivek Kumar Devangan makaihna in State level Media Certification and Monitoring Committee (MC&MC) om hi. Huai hun ah paid news tawh kisai banah Manipur a Election Model Code of Conduct (MCC) zat ahihtak ziak in media a instigating content tungtang banah MCC tawh kisai a tunitan a nasepkhiakte   gen khawm uhi. CEO in Election Commission of India (ECI) in district level tanpha a MC&MC activate ding in theisak a, huai dungzui in avek a gawm in committee 10 phutkhiak banah activate hi a, media a election thutawh kisaite enkai leh akisaipih thuneite theisak ding uh chi hi.  Meeting hun ah political parties leh journalist-te adia workshop sai ding leh Jan 20, 2017 nitaklam dak 5:00 in MC & MC meeting sawm nawn ding a, huai hun ah District Level MC & MC leh Jounralist-te chial hiding hi’n gen hi. Hiai hun RK Dinesh Singh, Addl. CEO, Ravindra Kumar, PCI member, Dr. N. Johnson, Jt. Director, IPR, N. Krishnakumar Singh, State Nodal Officer, MC & MC, official tuamtuam leh political party palaite’n uap uhi.

MCC kalh in recruitment order suak

CM Nephew leh Superstar Gokul te’n Civil Supply Inspector  mu

Imphal, Jan-5: 11th Manipur general assembly election ding tawh kisai a Model Code of Conduct (MCC) zat himahleh state govt. nuai a Major department khenkhat te’n MCC kalh in recruitment notification suah uh a, huai lakah Minister Ksh. Biren etkaina nuai a Directorate of Consumer Affair, Food & Public Distribution (CAF & PD) te’n ‘Civil Supply Inspector (post 21) leh Store keeper (post 3) lakna dia candidate selected list tawh kisai Jan 3, 2017 adia notification a suah uh a,  interview Jan 3, 2017 ni a om hi’n gen uhi. Himahleh thusuak in Jan 4, 2017 nitaklam tan in Chowkidar leh Peon lakna dia interview om a, result bel puankhiak hinailou hi. 

Civil Supply Inspector lakna ding tawh kisai a lunglut huai khenkhat ahihleh Chief Minister O. Ibobi sanggamte tapa (nephew) John Okram leh Manipur Film Superstar Atokpam Gokulchandra Singh-te selected list ah tel uh a, huai post adia examination Dec 31, 2016 ni adia bikhiah himahleh Dec 28, 2016 a ding in suan nai (prepone) hi a, examination venue ding Dec 30, 2016 nitak dak 7:30 vel a puankhiak hi’n gen uhi. Thusuak in ‘Rural Development and Panchayati Raj’ teng leng ‘Village Level Worker (VLW) lakna dia mipi theih louh ding in date back appointment order suah uh a, Minister M. Okendro etkaina hi a, hiai tungtang hihkhelh hiam ahihlouh leh ECI in zuih ding thupiak pen Minister leh official head of department-te thuneihna zang a kalhna hihiam chih theih chet hilou a, Department/HODs telin Revenue, Forest and Environment, Education, RD & PR, Works, Health & FW, Labour, Employment Exchange, CAF & PD te’n backdate appointment order a suah sawm uh MCC kalhna hi’n leng taklang uhi.

Police te’n drive nei

Imphal, Jan-5: Dr. Sarangthem Ibomcha, Addl. SP (Op)/Imphal West makaihna nuai a Imphal West Police personnel team te’n tuni’n khawm theih leh omdan kilawm lou tawh kisai in Kabow Leikai ah drive bawl uh a, huai hun ah numei 2 telin mi 10 mankhia uh hi’n kigen hi. Akigendan in Addl. SP makaihna nuai a police team te’n tuni zinglam dak 9:30 velin Manipur Public Service Commission gei ah drive pan uh a, drive sung in drug addict leh mi lakah omdan kilawm lou-te mankhia uh a, Imphal Police Station tut uh hi’n leng taklang uhi.

Prof.Gangmumei Kamei si

Imphal, Jan-5: Professor Gangmumei Kamei tuni zingsang dak 8:20 velin in Majorkhul ah a tenna inn a hunsawt sim apan natna tuamtuam a thuak nung in si a, amah kum 76 a upa hi’n gen uhi. Prof. Gangmumei ahihleh HRD Ministry nuai a Indian Council for Historical Research (ICHR) member, DoNER Ministry nuai a North Eastern Council (NEC) a Regional Planning body a member leng ahi hi. Imphal College, DM college, JNU centre for post graduate ah leng teacher in sem kha a, kum 2001 in Manipur University a History Professor  hihna apan retire a, Nagaland University, Rajiv Gandhi University, Arunachal Pradesh, NEHU Shillong tawh kizopna leng nei uhi. kum 1993 a kiphut khia Federal Party of Manipur a founder President banah kum 1995 leh kum 2001 in Legislative Assembly Member dia telching in om hi. W. Nipamacha Singh makaihna a government hun ah kum 1998 leh kum 2001 in Minister for Forest, Environment leh Higher Education banah portfolios poimawh tak len hi. Aman kum 2012 a BJP zom in outer Manipur Lok Sabha Constituency ah ding in telching hi keimahleh amah ziak a singtang gamte ah BJP in masawn hi’n gen uhi. 

Chief Minister O. Ibobi, RV Minthing, ex-Minister telin mi tallang tuamtuam banah Manipur University a teacher leh CSO tuamtuam a makai te’n Prof. Gangmumei galna va nei uh hi’n leng kigen hi. 

RIMS kihong ding

Imphal, Jan-5: Dr. M. Amuba Singh, Medical Superintendent, RIMS in Jan 8-10, 2017 sung general holiday himahleh mipi khualna leh ngaihtuahna ziak in general holiday sung a RIMS Hospital leh Dental College kihong ding hi’n gen a, huai tawh kisai a RIMS a thuneite leh akisaikhakpih teng in hospital nasep nawngkai louhna dia nasem din ngetna bawl hi’n gen uhi. 

Certify bawl

Imphal, Jan-5: Shija Hospital & Research Institute Pvt. Ltd. in services tawh kisai a National Accreditation Board for Hospitals & Healthcare Providers (NABH)  Pre Accreditation Entry Level – Hospital prog adia assessed leh certify hi’n kigen hi.

MPP supporter-te kiphin

Imphal, Jan-5: Thoubal district Police te’n Manipur Peoples’ Party (MPP) President banah Heirok A/C a intending candidate N. Sovakiran a mat uh deihlou latsakna in tuni’n MPP supporter te’n kiphinna nei uh hi’n kigen hi. Akigendan in zan a Ukhongsang Mamang Leikai a MPP worker te’n BJP-te gari 4 lumlet sak banah BJP programme subuai in worker 4 soisakna tawh kisai a BJP intending candidate Th. Radheshyam in case a file tungtawn in Thoubal Police te’n Sovakiran man in Thoubal CJM ah dingsak uh a, Court in ni 4 sung Police custody ah om ding in thutankhum hi. Huailou in Sovakiran in BJP worker-te thau a kapkhum dia  escort-te thu apiak ziak in leng complain om a, huai dungzui in escort lakkhiak sak a om hi’n gen uhi. MPP supporter te’n Sovakiran khahkhiak ding phutna in Ukhongsang Mamang Leikai Lampa mun ah kiphinna nei uh a, huai hun ah kiphinna neite’n Ukhongsang Mammang Leikai ah mipite’n election tawh kisai a programme om theilou ding in thupukna ana bawl uh a, Th. Radeshyam in mipi thutanna kalh a programme sai hi’n leng taklang uhi.

Drive khauhsak

Imphal, Jan-5: Chief Electoral Office (CEO) Manipur in Election Commission of India (ECI) in Manipur ah March 4 & 8, 2017 a vote khiakna om dia thupuan a bawl uh tawh kiton a zan akipan Manipur ah Model Code of Conduct (MCC) zat hi a, Police department te’n leng Indian Made foreign liquor leh local zu-te zuak leh puak ding kham tawh kisai a drive khauhsak uh a, Singjamei Police Station a OC Ingocha makaihna nuai a police team te’n mun tuamtuam ah zuak dia local zu kipua hunkhop mankhia uhi. Sugnu Police leh police force dang te’n mun tuamtuam ah liquor tawh kisai in drive pan uh a, Yangangpokpi Lamjing Nupi Lup te’n leng tuni zingsang a local zu leh foreign liquor tamtak makhia in mipi muh ding a susia uh hi’n kigen hi.

KSO-GHQ te’n dakkal 48 sung general strike puang

Kangpokpi, Jan-5: Kuki Students’ Orgn. (KSO-GHQ) te’n state govt. in Jangkholam Guite leh Jamchinthang Manchong thah sawmna tawh kisai a kigolh khakte matkhiak ding a lawhsap ziak un Chandel leh Tengnoupal district ah Jan 6, 2016 zankim akipan dakkal 48 sung general strike puang uh hi’n kigen hi. Huai tawh kisai in KSO-GHQ te’n a genna uah KNLF cadre te’n kum thak ni in KSO Gunpi Block President Jangkholam Guite leh a driver Jamchinthang Manchong-te a lu uah thau a kap in si ding in nuse mahle uh vangphat ziak in suakta uh a, mi 2-te tulel in Imphal ah etkol in om uhi. State leh Central govt. tawh SoO kaite lakah tel KNLF-te gamtatna pen SoO ground rule kalhna hi a, tripartite pact nuai a UG group te’n tam veitak ground rule kalh uhi. Mipi bitna ding a SoO pact nuai a UG cadre-te a designate camp chiat uah a om ding uh govt. mawhpuakna hi a, UG cadre-te thunun zawh louh govt. mawhsak theih hi’n leng taklang uhi.

Pawl 2 in suunthu puang

Imphal, Jan-5: BJP Manipur Pradesh te’n Prof. Gangmumei Kamei sihthu tawh kisai in suunthu leh a innkuan pihte thuakpih thu puang uh a, Prof. Gangmumei in Manipur a nam tuamtuam kituaktak a khawsak khawmna ding in panla a, social leh academic lam ah a kipiak zawhna thupi hi’n gen uhi. Prof. Gangmumei in kum 2012 a BJP zop ziak in singtang gamte ah BJP te’n masawn thei a, Manipur mipi adia manna liantak hi’n gen uh a, BJP Manipur Pradesh Weavers’ Shell te’n leng BJP kia hilou in mipi teng adia manna liantak hi’n taklang uhi.

Huailou in Manipur Mountaineering and Trekking Assn. (MMTA) te’n leng Minuthong a MMTA office ah tuni’n special meeting nei uh a, huai hun ah Prof. Gangmumei tungah zahtakna latsakna in minute 2 sung dai dide in om uh a, suunthu leh a innkuante thuakpih thutaklang uh hi’n kigen hi.

Flying squad te’n enkai ding

Imphal, Jan-5: DEO/Imphal East in tuni a thusuah a bawlna ah Indian Penal Code (IPC) 171B dungzui in election process sung a vote khiak ding tawh kisai a mi thuzawh ding tupna a kuapeuh kipahman dan a sum pia leh late kum 1 sung jail tang leh sum liau theih a, IPC 171C nuai a mi kuapeuh in candidate/mi khat peuh vaulau leh suliam-te jail kum 1 sung tang thei banah sum leng liau thei uh a, Flying squad te’n golh gukna tawh kisai a sum pia leh late tungah case register ding a bawl khiak hi uhi. Huai ziak in gammi hihna neiteng in golh gukna a puk lou ding in theisak uh a, mi kuapueh in golh gukna leh ki vauna banah voter-te thuzawh khumna tawh kisai theite’n Complain Monitoring Cell a toll free number 1905 ahihlouh leh mobile no. 7005321841 ah theisak ding in leng ngetna bawl hi. 

TUNI THUPI:

 “TOUPA ka Pathian aw, ngaihtuah inla, hondawng dih ve: ka mit honhihvak sak inla, huchilouin jaw sihna ihmutin ka ihmu kha ding hi.” 

– Sam 13:3

EDITORIAL:

Special Investigation Team

Mi tamzaw in SIT chi a le itheih uh Special Investigation Team kichi poimawh mahmah a, India gamsung ah hiai term ‘SIT’ kichi lar mahmah hi. SIT i chih chiangin thiltung banghiam ngenteltak a suizui pawl chihna bangin leng lettheih a, crime thil hi’n corruption telin thubuai-labuai suitu dia muangtaka sehkhiakte hi tangpi uhi. India a state tuamtuamin thubuai leh gimneihhuai tuamtuam suitu dingin SIT kichi nei tek uh a, huai in gah kipahhuaitak suangsek hi. A kuakua in Special Investigation Team (SIT) kichi dinkhe thei mahleh, Manipur state in banghiam buaina i tuah hun chianga Joint Action Committee (JAC) kichi i phuanveu uh tawh SIT pe’n kibang hetlou maithei hi. 

Hibangkalah, tunai zeka CCpur a SP dinga mawhpuakna hongla Rakesh Balwal, IPS in Jan.2, 2017 sunnung a Tangnuam hanmual ah Siemneihkim (35) d/o (late) P. Lunkhokam of  Kolasib, Mizoram sisa a muhkhiak ahihna tawh kisai in thiltung hoihtaka suizui hiding chi a, huai kawmkawm in SIT member ding leng guang ngal a, a thil muhdan uh niteng a ama kianga report ava bawl zel ding uh chih hilai hi. SP panlakdan pe’n kipahhuai mahmah a, ama panlakna tungtawn a thudik hong pawtkhiak ngeileng i gingta in i muangngam  hi. Huchikawmkalah, mipi lamte’n thil itheihsiamlouh uh khenkhat om khasek hi. Hiamgamna (violence) kichi maituah ut theilua mah ibang ua, banghiam thil mulkimhuai atun chiangin police station hia ahihkeileh DC office/residence luhsawm pawl ki om khasek a, mipi lamin leng zahngaihna leh dawhzawhna (patience) ineih uh poimawh  sakin om hi. Law enforcing agency lamin leng thuneihna (power) liantak tawi uh ahihdan thei a, va pawng maingap luat leng thil hoih hilou a, kihouna (negotiation) tungtawna thil vengthei ding pi issue liantak suah khakin om thei hi.

Kuamah a ki mawhsa tuam ding om kei, himahleh, apoi mahmah bel zukham-ankham ziaka thuneu thu liantak suahsak khak ding  lauhuai mahmah hi. Anawn in, kuahiam in pilvangtak kawma thuhoih deihna ziak hilou a, buaina deih ziaka midangte hon fuih ding leng lauhuai mahmah hi. I gam ah smart phone tawi atamzaw ihita  ua, naupang pauthei panpan tanpha in a utut uh mek khe thei ziahziah mawk uhi. Facebook hia, whatsapp leh internet vanzat chi tuamtuam in khawvel hih neu mahmah ta a, leitung a thiltung khat second 1/2 lel sungin theihsuahin omta hi. Tua ahihmanin, government in leng technology zatdan tawh kisai khauh deuh a a etkai uh poimawh  a, second tamlou sunga zuauthu leh thutak thehzak theihna gam ah ki omta hi. Thudik hia, diklou chih leng theih hilou in, communal tension tanpha piangsak thei ding thu tuamtuam tut mun a khah mi tampi ki om ahi chih haihvual hilou hi. Amun (spot) a om leng hilou, blanket nuai a lum, ahihkeileh, state dang a mun bittak a om kawm a mipite tat tuahtheihna dinga thu hoihlou pipi veksek leng mi tampi i om uh chih haihvual ahikei hi.

Tu in maban ah March 4 leh March 8, 2017 chiangin state assembly election i maituah laiding ua, hiai hun chiangin bangchibang in technology vanzat chi tuamtuam tungtawnin iki kaptuah lai maizen ding ua, chih theih but hilou hi. Thudik, thutak  banah society damna dia thu kigente zaw poikei, khat leh khat tattuahna, party khat leh khat kala thuse vawk banah, supporter/ worker-te tattuahna dinga thuzuau pipi kapkhia hong tamsem lai dinga mipite’ adingin pilvan nang tam mahmah hi. I gentaksa mah bangin eilawi election himhim haipihte ihihman un technology/internet/ mobile phone te’n hon pei lung-am zou zawsem lai ding uh ahihdan theih poimawh hi.

Huai kawmkawm a i taklat ut touh zel ahihleh, lamet hetlouh a banghiam thil huaise mahmah hongtun hun chiangin, thuchian theiloupi a government property suksiat leh attacked bawlte kuapeuhin tawpsan theita le hang chih huai hi. Official tuamtuamte leng mihing mah hi a, theihna bukimlou leng hithei, ahihkei leh theise lua a sem utlou leng hithei, himahleh, chetna (evidence) neilou a thagum a kibuluhna kichi tawpsan hunta a, official-te chauh hilou in a kim akiang a teng BP sang neite ading diakin buaisiat theihna om mun mahmah a, hibang chiindan pe’n kuapeuhin tawpsan hunta hi. Nam changkang (civilized nation) ihita ua, numei-naupang su thawmhau thei ding a paukam zat, thawmging neih leh bouruak huham taktak hih nawnlouh hamham pilhuai mahmah ta ding hi.

Unaunu Siemneihkim sihna tungtang a Suptd of Police (SP) in SIT hon bawlkhiak pe’n ikipahpih kawmkawmin police lamin leng investigation tawh kisai a pan hon lak thak uh deihhuai hi. Lamka i chih khawpi neuchik himahleh crime thil tawh kisai nasa mahmah hi. News a igelh hiam ahihkeileh mipite’ mai a puankhiaklouh thil tamtak om a, inndongta level a kihoulemna kichi mun tamtak ah a om chih haih hetlouh ding ahi. Adiakin, numei-naupang sualluihna leh a sianthouna uh sukbuah sawmna (molestation) tawh kisai in, media hiam ahihkeileh police te’ sangmah in NGO te’n thei zaw  ua, suksiat a om naupang leh a innkuante’ zahlakna ding khualna leh a kipiaksiat (depress) ding uh lauhna ziakin police ah FIR bawl hilou hi.

SP thak tungah kinepna liantak i neih kawmin, crime thil lam hon awlmawh tou zel henla, tua dingin Intellience wing (INT) ahitheitan in suk hat hileh chih huai hi. I lakah hehpihna bei a gamtatna kichi thang law mahmahta a, gimneih huai taktak a si bangzahhiam leng ki omta a, ahihziakin a sihna diktak uh leh a that-tute suikhiaklouh hunkhop omta hi. Dan (law) tawh kisai i theisau kei a, un-natural death case hunkhop Lamka police station ah leng ki registered dinga, tuate suisuahna dingin Investigation Officer (I/O) chauh hilou in Special Investigation Team hoihtak dinkhiak ana hunta  hi. Mihing apiangkhia khat koihiam ah uisih-aksih a om dingin iki phal nawn kei hi…!!!