Manipur Express | April 20, 2017

DC/CCpur in Zezaw, Singngat leh Behiang pha

Lamka, April-19: R. Sudhan, IAS, DC/CCpur in tuni zingsang dak 6:30vel a Lamka apan kipan khia in Zezaw PHSC, Singngat PHC, SDO office/Singngat leh Behiang PHC pha hi. DC bel Rakesh Balwal, IPS, SP/CCpur; Jameson Hangshing, SDO/Singngat; Dr Kimngaihching, CMO/CCpur makaih in Dr. VC Pau, DFWO, Dr T. Pumzathang, DTO, National Health Mission Staff-te banah DC’s office apan staff-te leh DRDA staff te’n zui uhi. 

DC in Zezaw PHSC, Singngat PHC leh Behiang PHC building ban ah Mission Indradhanush 3rd round pailel nasep ban ah SDO office building leh staff-te nasep dan enkhia a, India leh Mynmar gamgi a Border Pillar leng enkhia uhi. DC leh ateam te’n khua 3 aphakna uah mipi’n vaidawn in official te pakkhi awksak uhi. DC’s team te  nitak dak 6:30 in Lamka hongtung uh a, CMO team te bel gari siat ziak in nitak 8:00 in leng Lamka hongtung zoulou uhi.

Supreme Court (SC) in Ayodhya thubuai hingsak nawn:

Union Cabinet in VVPAT lei ding proposal pom

New Delhi, April-19: Prime Minister Narendra Modi makaih in tuni’n Union Cabinet meeting nei uhi. Huai ah Election Commission (EC) in Voter Verifiable Paper Audit Trail (VVPAT) lei ding tawh kisai proposal a piaklut genkhawm uh a, kum 2019 a General election hun a zattheih dinga leikhiak di’n thupuk uh chihthu om hi. EC apan VVPAT Unit 16,15,000 lei ding proposal etchetna ah Unit 1 zel ah Rs. 19,650 tungzou in a vek a kigawm in Rs. crore 3173.47 phading chih ahi hi. Union Cabinet in fund piakkhiak ding portion 2 tan bikhiah in huaite ahihleh Rs.crore 1,009 leh Rs.crore 9,200 hidan a gen in om hi. Centre government ah VVPAT lei ding tawh kisai a fund sufel ding in EC in apaisa June 2014 apan in theihsakna bawl zihzeh a, reminder dan in 11vei theisak hidan kigen hi. Chief Election Commissioner (CEC) Nasim Zaidi in kumpaisa in Prime Minister Narendra Modi kiang ah machine thak leina ding a fund poimawh tungtang gelhthawh in pelut a, huainung in Supreme Court (SC) in Election Commission kiang ah polling sation-te a VVPAT machines a kizat hun ding bikhiah masa taklang ding in ngen hi. Tunai zek a election omte ah tuhun a kizang Electronic Voting Machine (EVM) kikhoih chihthu ah Bahujan Samaj Party (BSP), Aam Aadmi Party (AAP) leh Congress te’n naktak in EC mawhsa uhi. 

Tuabang kalah, Supreme Court (SC) in tuni’n Ayodhya mun a Babri Masjid (Muslim temple) hihsiatna a kiphialgu a ngawh a omte tungthu saizui nawn di ng in thupia hi’n kigen hi. SC order a mimal min taklat a omte ahihleh BJP makai LK Advani, Murali Manohar Joshi leh Uma Bharti banah midang khenkhat hi uhi. Justices PC Ghose leh RF Nariman omna SC bench in Lucknow a Session judge in niteng a thubuai ngaihkhiakna nei zel ding a theisak chih ahi hi. Thubuai saina a masawn zel theihna ding in witness teng leng niteng a tonpih ahih ding uh chih hi a, kum 2 sung a thubuai saifel ding in SC bench in ahun bikhiah hi. SC in tuni a order a suahkhiak tawh kiton in Lucknow leh Rae Bareli a huai thubuai a tuam tuak ngaihkhiak ding pen Lucknow kia a sai leh ngaihtuah hita ding hi’n kigen hi. 

Kum 89 a upa LK Advani leh kum 83 mi MM Joshi ahihleh tulel in BJP a member 5-omna ‘margdarshak mandal’ ah telkha uh a, adang 3-te ahihleh Prime Minister-lui Atal Bihari Vajpayee, Prime Minister Narendra Modi leh Home Minister Rajnath Singh hi uhi. Huai banah, MM Joshi in kum 1991-93 sung BJP President len a, amah hunsung i.e.December 6,1992 in Uttar Pradesh state a Ayodhya mun ah Babri Masjid hihsiat in om hi. Babri Masjid hihsiat hun in Ayodhya mun ah BJP makai MM Joshi leh Uma Bharti in lawm zezen uh chih ahi hi. SC in order suahna ah, BJP makai khenkhat tung ah thubuai bulhkhum hiding in gen a, kum 24 vingveng paisa a thiltung himahleh ngawhna bawl hiphet lai hi. Hun sawt alutna ziak ahihleh Justice Liberhan Commission in suizuina a neih sung a sawt ziak hi’n kigen hi. PV Narsimharao government hunlai, kum 1992 in Justice Liberhan Commission bawlkhiak hi a, Commission in kum 2009 in Allahabad  High Court ah report pelut phet uhi.   

Ayodhya a Babri Masjid ahihleh kumzabi 16na hun a kibawl hi a, December 6, 1992 in Hindu tuailai (kar sewaks) asang-a-simte’n Rama pathian pianna munsiangthou ( Holy land) sung a kibawl ahi chi’n hihsia uhi chih ahi. Huai hun apan in Hindu leh Muslim kalah buaina tamveitak piang hi. Allahabad High Court in Archeological Survey of India (ASI) kiang ah huaimun a Hindu temple kibawlkha ngei hiam chih suidi’n thupia  a, ASI in report a piakna ah kumzabi 10na hunlai a Hindu temple kibawl chih a kilat theihna (sign) khenkhat om hi’n taklang hi. Babri Masjid hihsiat hunlai a UP Chief Minister ahihleh tulel a Rajasthan Governor Kalyan Singh hi a, amah leng thubuai a ngawh omte lak ah tel hi’n kigen hi.  

SC apan order a om nung sawtlou in, PM Modi makaih in senior Minister Arun Jaitley, Rajnath Singh, Nitin Gadkari leh Venkaiah Naidu te’n meeting nei uh a, Ayodhya thubuai banah July 24, 2017 leh August 10,2017 a term bei ding President Pranab Mukherjee leh Vice President Hamid Ansari mun luahtu ding kikumkhawm uh hi’n kigen hi. 

TUALSUNG:

Rayburn College ah ni 2 daih ding national seminar kipan

Lamka, April-19: North Easter Council (NEC) sponsored na in New Lamka a om Rayburn College Auditorium ah tuni’n ‘Protection of Forest for Sustainable Development in Manipur’ chih thupi a zang in ‘Two Day National Seminar’ kipan hi. Khuallian in V. Hangkhanlian, Minister (Agri., Vety., & AH) pang in hong a, Guest of Honour in Prof. Adya Prasad Pandey, Vice Chancellor, Manipur University pang  hi. Seminar ah Chief host in Prof. N. Mohendro Singh, DoNER a steering committee NER Vision 2020 a member lui banah Rayburn College a Academic Advisor pang a, Functional president in Rev. Dr. Khen P. Tombing, Principal, Rayburn College pang hi. 

Huai hun ah Rayburn College telin college tuamtuam a kai student leh teacher tamtak kihel uh a, Dr. Seiboi Singsit, IFS Retd. Principal Chief Conservator of Forest in seminar kisaina ziak pulak a, Prof. Salam Irene leh Prof. Laldena makaih in technical session ah Mizoram, Manipur, Nagaland, New Delhi leh mun tuamtuam apan resource person dia chial a om te’n thupi tuamtuam pansan in sinsak uhi.

Chief Guest in gam bawlhoihna ding lunggulh a mipi hiai zah kalsuanna thupi sa ahihdan gen in, hun paisa ah ‘suanni maw....suanni maw’ I tangkoupih uh taksuah in hiai seminar tungtawn a kuapeuh in hamphatna a ngah deihsak thu gen hi. Khantouhna lam tawh kisai in programme ah Guest of Honour a pang Prof. Dr. Adya Prasad Pandey kiang ah Hill University extension om theihna dia panla di’n ngen a, huai adia kalsuanna teng nungthuap ding ahihdan gen hi. Manipur Government in om zia neitak a salphate’ luang vuikhiak leh kikawmtuahna hoihtak omsak lungulh in ngaih poimawh pen anei hi’n gen a, tua dungzui in  khawpi sunga lampi poimawh diak IB Road leh Mission Road telin lampi tuamtuam puahphatna pailel a, department te’n Nehru Marg, Thangzam Road, Red Cross Road leh a dangdangte survey bawl lel uh a, survey  zawh hun in DPR submit a nasep pat theihna dia panlak hilel hi’n gen hi. Manipur Chief Minister N. Biren Singh in  CCpur District in khantouhna dia bang poimawh hiam chih thei ut in Lamka hongphak lunggulh  a, kuapeuh in bildawh a, boruak hoihtak bawl thei dia mansa a om dingin mipi kiang ah ngen hi.

Guest of Honour in a thugenna ah, gammang (forest) in mihing adia poimawh thil tamtak pekhia in, gamsung pumpi ah mihing a kimkhat sanga tamzawte gammang ah ki-nga uh hi’n gen hi. Gammang tawm deuhdeuh in, khawlum leh vawt kikhek lamdangna uang mahmahta ahihman in, gammang ineihte kepbit ding mite’ng mawhpuak ah ki-nga chi hi. Chief Host in gam leitang leh a sunga teng mihing leh gamsa-te a ding thil poimawh mahmah 2 om a, huaite ahihleh tui leh gammang (forest) ahi chi hi. Gam in hiai gel aneih kei aleh a phattuamna omlou in, gam zat theihlouh suak chi’n gen hi. Gammang leh a sunga teng ganhing leh mihing te’n kizawpna thuktak kinei huai pen mihingte lou ngal ahihse thei omlou chi a, mihing te’n tunitan in kizawpna hihbuai tou lai hidan in gen a, tuni chiang in leitung pen tenna taklou suaksak dekdek kihita ahihna ah kuapeuh in panla thak ding leh seminar tungtawn a kibawlthakna hoihtak a hong om deihthu leng gen hi.

Functional President in gam leh leitang itna ziaka hibang a hong kalsuante kipahpih ahihdan gen in, hiai seminar tungtawn a khangthak te’n tusawn khangsawnte khualna a gammang ineih sunsunte kepbitna dan hon theih ua, kingakna tham chiang ahon suah uh lam-et thu gen hi. April 20, 2017 nitaklam dak 3:00 in hunkhakna hun ah Chief Guest in Brig. Ajay Kumar, Commander, 27th Sector, Assam Rifles pang ding a, Guest of Honour in Col. D.S. Murty, SC, SM, Dy. Commander, 27th Sector, Assam Rifles pang ding a, Functional President in Dr. Rev. Khen P. Tombing pang ding hi.

JAC-AATB makaih in ni 600 chinna zang ding

Lamka, April -19: Joint Action against Anti-Tribal Bills (JAC-AATB)  makaih in April 22, 2017 in zinglam dak 11:00 in Hiangtam Lamka a Salphate Pumbuk ah tribal movement ni 600 chinna mass mourning leh fasting prayer tawh kithuah in salphate' zahna hun zat hiding hi. Huai ah Thangzamang, JAC-AATB makaih in hunzat hiding a, Pastor MC Pau Khan Tuang, Local Pastor Sinai Baptist Church, Gouchinkhup Veng, New Lamka in thumna in hun hong ding a, H.  Mangchinkhup, Convenor, JAC-AATB in keynote address gen ding hi. Rev. V. Khamvum, Principal Grace Bible College in 600th Day message gen ding a, Pauthianmuang, Lecturer Grace Bible College makaih in mipi paikhawm te'n thumkhawmna nei ding uhi.

TSA-GHQ in enkai ding guang

Lamka, April-19: TSA-GHQ a Secy-Info. & Pub Laljangam Hangshing in thusuah abawlna ah Thadou Students’ Association, GHQ (TSA-GHQ)a Central Working Committee (CWC), 2017-20  a member te’n Imphal a Head office ah April 15, 2017 in meeting masapen nei uh a, huai ah Thadou student khantouhna ding tawh kisai in thu tuamtuam genkhawm in Association hoihtak a paitouh theih tupna in branches/blocks tuamtuam a in-charge ding leng amau sung ah kiguang uhi.

Tua tawh kiton in Bengaluru Branch enkaitu dingin James Haokip, Vice-President (Admn), Chandel Branch ah Thangminlun Sitlhou, Speaker; Delhi & NCR Branch ah Thangtinlen Haokip, Secretary-Joint; Churachandpur Branch ah Henkhokai Singsit, Secy-Games & Sports; Dima Hasao Branch ah Michael Lamjathang Haokip, Secretary-General; Hyderabad Branch ah Laljangam Hangshing, Secy-Info & Pub.; Imphal Branch ah Ngamkholen Haokip, Secy-Soc. & Cult; Mizoram Branch ah Lhaineikim Haokip, Secy-Finance; Phaitol Block ah Michael Lamjathang Haokip, Secretary-General; Sadar Hills Branch  ah Tracy Lhingneihoi, Secy-Edn & Stat.; TSO Myanmar ah James Haokip, Vice-President (Admn) guang uhi. Tuaban ah, branch teng in general headquarters annual budget ding Rs. 2,000/- chiat a piak ding un leng thupuk uhi. 

PCI Day zatna kipan 

Lamka, April-19: Presbyterian Church in India, Reformed [PCI (R)] Saptuam kiphuhkhiatni April 20, 2017 in kum 33 chinna Mualkoi PCI (R ) Biakinn ah SLPYF leh LPYF makaih in lawm ding uhi. Program bel tunitak in kipan a,  Lapawl, Artists leh Band tuamtuam apan phatna la ngaihkhiak hi a, Rev. H. Chinthiansong, Coordinator (Ministries) in Pathian thugen hi.

         April 20, 2017 zing biakna hun ah Elder T. Thangzakhup, Founder member damlai omsun in Day pulakna nei ding a, Elder Langkhanpau Guite, GA Moderator leh Rev M. Khanlianmang, PYF Coordinator te’n Message gending uh a, Rev Kham T. Valte makaih in PCI maitam omding hi. Nitak program ah Rev Khen P. Tombing, Chief Coordinator in Pathian thugen ding hi.

Mi 15 P/S ah tawnpih

Lamka, April -19: CCpur Police te'n zu leh khamtheih doudalna aneih uh paipih zel in, zu kia man nawnlou in zu zuakna mun a dawnte leng manta uhi. Huai tawh kiton in CCpur Police Station a Officer In-charge makaih police team patrolling paite'n  nitaklam dak 4:30 velin Zou Veng ah zu zuakna mun a zu dawn mi 15 man in Police station ah tawnpih uhi. OC/CCpur  in maban a hibang hih zawm nawnlou dia taihilh in, a innkuante kiang chiat ah pekhia hi'n police officer apan kiza hi.

First sangin Second hand khedap lei tamzaw

Lamka, April-19: Lamka khawpi ah tulai in second hand khedap kithang mahmah in, khedap brand hoih taktak bun tamtak muh ding om hi. Tua ziakin a zuak tute' lun petmah uh a, huaite ziakin first hand khedap zuakte adia lung-ap huai pha in, van zuakkhiakna lam ah niamkiak tuan mahmah uh hi’n kigen hi. Kum paisa in Lamka honglut second hand khedap-te ahihleh a tangpi in India gamsung mah Delhi, Mumbai telin khawpi tuamtuam akipan hi a, nikum Christmas kuan apan in Moreh lam apan in second hand khedap tamtak honglut a, India gamsung apan honglutte sang in second hand belt man leng naktak in kikhezou hi’n second hand zuak khenkhat in gen uh a, Lamka khawpi kia hilou Imphal tanpha second hand khedap in zelsuak hi.

Second hand khedap-te ahihleh atangpi in Japan, China, Thailand leh Myanmar apan hi’n kigen a, Nike leh Adidas telin brand hoih taktak tamtak om banah brand theih ngeilouh lah avan hoih mahmah tamtak leng om hi. A hoih deute atangpi in Rs. 600 in kizuak a, Rs. 50 man leng hoih taktak om ahihman in, van leitute mit hip diak in khawng hoih thei uh chih ahi.

Huchikal ah, first hand khedap zuak-te niamkiak nasa mahmah uh hi’n kigen a, Moreh lam apan second hand khedap honglut apan van leite second hand lam kia ah kihei uh a, deihbang in leitu ding muzou nawnlou ua, nikhat a van khat leng a khotlouh hun uh tam mahmah hi’n gen uhi.

Machine hoih nawnta

Lamka, April-19: District Transport Office, Bijang ah kha 1 sung driving licence smart card kilakna machine a kizang software siat ziak in driving licence smart card ading kila theilou leh aki zoute leng piakkhiat theihlouh a om nung tuni’n ngeina bang in nasem thei nawn uhi. Huai asemtute gendan in Head office, Imphal apan software hong bawl ziak un hoihthei nawn hi’n gen uhi.

Tuni’n leng driving licence smart card ading mi biometric photo leh finger print kila uh a, driving licence kilakhin mi hunkhop leng smart card pekhia uhi.

Dak 2 pak nalhtak om

Lamka, April-19: ZEO office campus a CMO office lampang, DI of schools/CCpur office kiang ah pak chi khat amin kitheilou nitaklam dak 2:00 agin chiang in pak khe zel a, dak 2:30 tan in pak vek hi’n kigen hi. Nitaklam dak 2:00 aginma in pak ahihlam kitheilou, akung bel lianlou a, a pak vek chiang in nalh mahmah hi. Huai pakte amin thei kuamah om tuanlou a, inn kawng phiatna a kizangte mah bangsim in asandan khuk (knee) tanlel ding pha hi.

Thailand leh Vietman a training di’n telkha

Lamka, April-19: Manipur Governor lemsakpih leh phalna dungzui in Short Term Training Course in Reputed Institute outside the Country ah tel dingin Manipur apan officer 15 telkhiat hi uh a, huai lak ah singtangmi 2-  S. Thienlaljoy Gangte, MCS, AC to DC/CCpur  leh Hmangte Lerte Kom, Addl. Director, Education (S) tel uhi. Officer 15 te’n April 24- May 5, 2017 sung Thailand leh Vietnam ah "Leadership Development for Public Service Delivery and Citizen Centric Governance" chih thupi anei in training  ding uhi. Manipur apan officer training dingte MCS 9, MFS 3 leh MSS 3 hi uhi.

ZEO in DI-te tawh genkhawm

Lamka, April-19: T. Goukhomang, ZEO/CCpur in tuni’n DI of schools te tawh govt school a teacher te photo takkhiat ding thu genkhawm uhi. School khenkhat a teacher-te photo kitakkhe nailou te akisaipih DI of schools te’n Headmaster/Headmistress te theisak a, copy leng concerned DI of school te kiang ah pelut ding in genkhawm uhi. Lamka area a govt school tamzaw in amau school ua teacher-te photo takkhia uh a, copy 1 DI of schools kiang ah pelut uh a, DI of schools te’n school tuamtuam a teacher-te photo te whatsapp tungtawn in Directorate of Education ah thon ding uh hi’n kigen hi.

Special drive ah gari 31 man

Lamka, April-19: Sub-Inspector P. Neihsial, OC Traffic Control Police Officer makaih in tuni’n Tuibong a Mini-Secretariate kiang, Tedim road ah special drive nei uh a, permit neilou leh document renewal bawllou diesel auto 31 mankhia in TR-5 receipt tungtawn in gari 1 ah Rs.100/- liausak uhi. Higher Authority apan 2-wheeler a taituah helmet khulou leh permit neilou leh document renewal bawllou diesel auto te special drive neizel ding chihthu om ziak in maban ah Traffic Control Police te’n khawpi sung leh akim-le-kiang ah special drive neizel ding uh hi’n P. Neihsial, OC Traffic Control Police apan kiza hi.

Training program apply theih

Lamka, April-19: Central Institute of Indian Languages saina in Seven Regional Language Centres ah Ten months training program in Language Education kichi July 5, 2017 in kipan ding hi. Huai ading in govt schools, govt aided school leh private school a teacher te’n apply theih ding a, April 24, 2017 tan in ZEO/CCpur office ah application form piaklut theih ding hi. North East state te ading in North East Regional Language Centre, Guwahati hiding a, language bel Assamese, Bodo, Manipuri leh Nepali hiding a, thuchian theih utte’n website http://www.ciil.org/ltp.aspx ah ettheih ding leh application form download theih ding hi.

YPA Unit election zawh hita

Lamka, April-19: YPA New Lamka block nuai a Unit 12 te kum 2017-2019 sung makai ding YPA New Lamka block makaih in April 12, 2017 apan Unit election kipan a, tuni’n zawh hita hi. Tuzing in YPA Vengnuam Unit election neih hi a, President in H. Ginkhotuan telching uhi. Vice President- T. Lianzachin; Secretary- M. Tualchinpau; Asst. Secretary- T. Thangthianzem; Finance Secretary- N. Tuanminthang leh Treasurer- G. Tualzathang telching uhi. 

YPA Kaanan Veng Unit President in P. Nengthianmuan; Vice President- H. Ginzadal; Secretary- G. Thangzasiam; Asst. Secretary-M. Pauzalam Guite; Finance Secretary-El Nathan Guite leh Treasurer- Thangtual hi uhi. YPA Hebron Veng Unit President in N. Dongbiaklian; Vice President- K. Dalzakham; Secretary-T. Thangkholal; Asst. Secretary-S. Paukhansiam; Finance Secretary-G. Gouthiansiam leh Treasurer- Khanlian Tonsing hi uhi.

Diamond Jubilee lawm ding 

Lamka, April-19: Manipur Evangelical Lutheran Church (MELC) nuai a Lutheran Youth Fellowship (LYF) in April 21-23, 2017 sung Zomi Colony a MELC HQ Church ah kum 60 chinna (Diamond Jubilee) lawm ding uhi. Diamond Jubilee lawpna ahihleh April 21, 2017 nitak in Upa V. Lawmsang, Moderator, MELC in hong in, Diamond Voice Final Round om ding a, huai ah Dr. Steve Minlun leh Dr. Langlunthang-te VIP in pang ding uhi.

SUUNNA:

Dimniang (85) m/o Khatgin of Vaalveng, New Lamka, tuni nitaklam dak 4:00 velin teknat in si a, April 20, 2017 in YPA hanmual, New Lamka ah kivui ding hi.

Nengkhothang (75) of Phaitong village, Thanlon Sub-Division, zan nitak dak 7:30 velin teknat in si a, tuni’n kivui hi.

S Ginzasuan Ngaihte (54) h/o Ngaikhanvung of Dorcas Veng, New Lamka tuzing baihtak dak 1:30 velin cancer in si a, sunnung in YPA hanmual, New Lamka ah kivui hi. Amah ahihleh Voice of New Lamka (VNL) a founder Editor ahi.

T. Goukhogin @Goukoi (87) f/o Jamkhothang of Venglai, Pearsonmun tunitak dak 9:40 velin taknat in si a, April 20, 2017 in Pearsonmun hanmual ah kivui ding.

STATE THUTHANG:

Manipur Police Constable lakna result akinlam in puankhiak hiding

Imphal, April-19: Chief Minister N. Biren Singh in Manipur Police Constable lakna ding a Recruitment Result puankhiak louh a om akintheilam a puankhiak hiding chi’n gen hi. Chief Minister in tuni’n Palace Compound a om Chandrakirti Auditorium a All Indian Radio-te sai ‘Music Festival Yeningthagi esei’ a uapna ah Assembly term beisa a government hun a Police Constable lakna ding a Written Test leh Interview diktak a sai hiam chih suichet nungin adik lou a om keileh tunung sawtlou in a result puankhiak hiding chi’n gen hi. Chief Minister in a genzel dan in corruption dalna ding a panlakna ah mipi’n mawhpuakna liantak nei a, sum-le-pai zang a kigolh gukna kuaman ching lou ding in leng ngen hi. Election hun ah voter te’n candidate-te akipan sum lak hiam candidate-te sum zang a mipi in annek khawm chindan leng tawpsan ahihleh sum-le-pai dikloutak a zatna dalna ah panpihtu phatuam tak hiding chi hi. 

Chief Minister in a gendan in Cancer natna veite in Manipur akipan Mumbai ah ki enkol sak ding a azin chiang ua lemchang ding in Guest House bawlna ding gam lei khit hita a, akinlam ah Guest House bawlna ding nasep kipan ding in gen hi. Huai hun ah Information & Public Relation Minister Th. Bishwajit in thilteng ah lungsim siangthou banah pangkhawm a panlak poimawh hi’n gen a, Churachandpur a om tawh kibang district dang teng ah FM (Radio) station khat chiat bawlkhiak ding in State government ahithei tan in panla ding chi’n gen hi. Aman a genzel danin All India Radio Imphal Station ah BJP in thil tuamtuam apuankhiak ziak un Assembly Election ah BJP in lawhchinphah hi’n gen hi. Aman a genzelna ah kum bangzah hiam paisa akipan IT leh social media in masawn mahleh radio ngaikhia mi tamtak om lai hi’n gen hi. Huai hun ah National School of Drama (NSD), New Delhi a Chairman Ratan Shyam in leng thugen hi. Huai zawh in pawl tuamtuam lasak ngaih khiakna om hi.

Cong MLA 4 in BJP zop sawm 

Imphal, April-19: Thusuak in Congress MLA 4 in BJP ah alut theih ding uh phalsak ding a ngetna in tuni’n CM Office Chamber ah Chief Minister N. Biren Singh leh BJP Manipur Pradesh President K. Babhananda kimuhpih uh a, huai hun ah Congress MLA 4te tungtang ah thupukna bangmah om keimahleh nitam nung a sukveng hiding in gen uhi. Akigendan in Congress MLA 4 – Brojen Singh (Wangjint-Tentha A/C) , Ksh. Biren Singh (Lamlai A/C), Md. Abdul Nasir (Lilong A/C) leh O. Lukhoi Singh (Wangoi A/C) hi uhi. Manipur Pradesh Congress Committee (MPCC) a thusuak in party leader khenkhat om louh ziak in Singngat A/C MLA Ginsuanhau tungtang genkhawm nailou banah kinawhtak a thutanna bawl lou ding uh a, himahleh MLA Shyamkumar bel nawhkhiak ding a thupukna bawl uhi. Party leader te’n dan siamte tawh kithuhzak in Anti-Defection Law kalhna ahihziak in dan dungzui a panlak hiding in taklang uhi.

Medicinal plant tam

Imphal, April-19: State Guest House ah tuni’n Manipur a damdawi a kizang thei sing-le-gua (Medicinal plant) tawh kisai tungtang genkhawmna ah Health & Family Welfare Minister L. Jayantakumar in Manipur ah damdawi a kizang thei sing-le-gua phatuam kining chingtak om a, huaite phatuam tak a zat hileh mipi te’n sum-le-pai muhna leng phatuam sak ding hi’n gen hi. Damdawi a zat theih ding sing-le-guate kebitna leh chinna thil ah numeite mawhpuakna chih tawh kisai function Health Minister in a honna ah Manipur a sum-le-pai haksatna tuamtuam om mahleh Pathian in mihingte a ding a phatuam ding thil tamtak honpia a, huai mipite kithutuak in kepbitna ding a panlak khawm hileh sum-le-pai dinmun leng phatuam mahmah ding chi’n gen hi. Huai hun a tel AYUSH Director Dr. K. Lokendro Singh in a gendan in Manipur ah medicinal plant omte mipi’n a phattuam dang bangkhop in zang thei nailou hi’n gen a, damdawi a zat theih ding thil tuamtuam lou bawl mite’n ching mahle uh a zuak khiakna ding omlou ziak in haksatna tuak veve uh hi’n gen hi. Huai hun ah district tuamtuam akipan paikhawm nupi tamtak tel uh a, huai programme bel Manipur State Medical Plants Board Directorate of AYUSH saina a om hi’n kigen hi.

Lou bawl mite’n chindan thak zat poimawh

Imphal, April-19: Dy. Chief Minister Y. Joykumar in lou bawlna tungtawn a thilpiangte a tamsem theihna ding in chindan ngeina zat touh zel sang in lou bawlna tawh kisai technique thak a khenkhiak poimawh hi’n gen hi. Tuni’n Iroisemba a om Central Agriculture University (CAU) a College of Agriculture ah Agricultural Inputs Distribution Function uap in a thugenna ah Dy. CM in kum bangzah hiam paisa akipan in Manipur singtang gam ah lou bawlna ding in gam mang a sing-le-gua phuk a mei a haltum hisek a, huai in akim-le-pam (environment) leh mihing dam theihna nasatak a khoihse pha hi’n gen hi. Huai ziak in huchi bang chindan tawpsan a lou bawlna mun a buh-le-bal tamzaw sem pian theihna ding leh mihing dam theihna leng khoih selou ding technique thak zat hunta chi’n gen a, CAU te’n state 5 a tribal Sub Plan-project tungtawn a alternative farming patkhiakna dia apanlakna uh uh kipahpih thugen kawm in University thunei te’n double cropping banah cash crop cultivation in singtang leh phaizang a gamlian tak huamsak ding in ngetna bawl hi. Programme zawh in Dy. CM in singnou leh haichi tang hunkhop hawmkhia hi.

Thau gin za kuamah omlou banah matkhiak neilou

Kangpokpi, April-19: Kangpokpi District a NH-2 in a tawtkhak S. Changoubung Village leh Kangpokpi DHQ kikal ah zan zingsang a galvan tawi helpawl te’n Oil tanker ambush uh chih tungtang ki minsiat sak tupna bang hi’n gen uhi. Akigendan in Kangpokpi Police Station akipan km 3vel a gamla S. Changoubung village leh Kangpokpi DHQ kikal a om S. Changoubung Golai mun ah thiltung hi’n kigen a, Police thusuak in tanker driver te’n thau kikapna mun diktak theilou uh a, thil ging ngaihtak zak ziak in gari tyre puncture dia gintak in  in S. Changoubung Golai mun ah khawl in  gari enkhia uh a, huai hun ah tanker keh ahihdan thei khia uhi. Driver-te thil gen dan tungtawn in S. Changoubung Golai mun ah helpawl te’n thau kapkhum uh chih chetna om lou a, thau tang in tanker kha ahihdan huai mun ah theikhia uhi. Huai banah S. Changoubung khua a mi 600 valte banah huai khua apan gamlalou Santing khaw mipite lakah leng thau ging za kuamah omlou uhi. Thiltung zak phet in Police personnel-te leng tung mahle uh huai mun ah thau cartridge (empty case) mu omlou a, IG (Range-4) etzuina in H. Balram Singh, MPS, SP/Kangpokpi makaihna in Commando Unit 8 in sunnung dak 1:00 akipan nitaklam dak 6:00 tan operation bawl mahle uh matkhiak neilou uh a, huai bial a 35-A/R leh 38-A/R telin para military force-te combing operation hun ah tellou uh a, a ziak ahihleh combing operation tungtang theisak ahihlouh ziak uh hi a, huai bial a om SoO leh non-SoO group kipuang khia kuamah omlou uhi. 

Huailou in Twilongkun Area Youth leh Women Union te’n S. Changoubung Golai mun ah Oil tanker-te ambush a om chih ngawhna tungtang ngaikhawk uh a, huai khua leh akim a omte minsiat sak tupna hiding in gen uhi. S. Changoubung leh akim a khua omte’n thau ging tungtang theikha kuaman omlou uh a, operation suanlam a security force te’n khaw mipite subuai uh a, Kangpokpi local bodies te’n leng huai mun ah thiltung bangmah omlou hi’n hilhchetna bawl uhi. Oil tanker 2 (No. MN05-3-0473 leh MN04AA-0402) a Driver te’n Nepal SIM number zang uh a, Imphal a tun ma un mobile phone tungtawn in migilou kua hiamte’n thuzak uh a, term lui a government hun ah tanker neite khenkhat leh top brass politician leh official-te kithuah khawm in black business sai uh chih ngawhna leng om ngei a, akisaipih thunei te’n thubuai a suah louhna dia gin-om leh chitakna tawh case tungtang suizui ding a ngetna bawl uhi. 

Health Minister in akitawpna zukkik

Imphal, April-19: Health & FW Minister L. Jayantakumar in April 14, 2017 in Chief Minister N. Biren kiangah kitawpna lehkha (resignation letter) apiak Chief Minister in April 17, 2017 nitaklam in Odisha khawpi Bhubaneswar a BJP executive meeting a telkhin hontung nung nitak sawtsim nung in akitawpna zukkik hi. Huai ni mah in National People Party (NPP) National President Conrad Sangma in Manipur hongpha a, Chief Minister tawh akihou khit nung zek un NPP a National President makaihna in Core Committee Meeting om a, huai a thupukna dungzui in Health & FW Minister in akitawpna zukkik hi’n kigen hi. 

KIK officer bearer thak ding tel

Kangpokpi, April-19: Kuki Inpi Kangpokpi (KIK) District tuma a Kuki Inpi Sadar Hills kichi a term 2017-2019 sung a vaipaw ding telna ADC Sadar Hills Conference Hall ah tuni’n om hi. Huai ah observer Lalkhosei Lhouvum pang a, Kuki Inpi Manipur Vice President Lunpi S. Thangjom leh Khaimang Chongloi, Kuki Inpi Manipur Executive te’n uap uhi. KIK term thak adia officer bearer telching-te Haosa (President), Paokai Chongloi – Semang (VP Adm.), Janglet Kipgen – Pachong (VP Home), N. Sehjalien Gangte – Thuching ( General Secretary) and Lamminlun Singsit – Lhangsam ( Secretary Information Bureau) hi uh a, April 20, 2017 in officer bearer kekletna om ding hi’n gen uhi. 

TUNI THUPI:

“Kumpipa’ thugen zui inla, Pathian’ kiangah thuchiam kintak in bawl ken”

-Eklijiasti 8:2

EDITORIAL:

Manifesto kuan enzui?

Manipur Assembly election March 4 & 8, 2017 a phase 2 a kineite March 11, 2017 in vote simna banah result puankhiak in om hi. Vote campaign hunsung in party tuamtuam leh candidate mimalte’n election manifesto suahkhia uhi. Election office honna leh manifesto pulakna program mun tuamtuam  ah nei uh a, huaite media-te tungtawn a suahkhiak a om in, manifesto puankhiak a omte lungtunhuai thei petmah hi. Constituency teng ah candidate bangzahhiam chiat om a, amau mimal & party manifesto chiat puangkhe mahle uh election zawh in candidate lak a khatlel telching a om ahih manin manifesto semkhe thei taktak telching a omte kia suak uhi.  

Huchi kallak ah, Chief Justice of India JS Khehar in April 4, 2017 in political party te’n election hunma in sepsuah ding thil thupitak tak puangkhe sek mahle uh kitheih mawhbawl uh hi’n gen a, India gamsunga electoral politics paidan mumal lou hi’n gen hi. Political party te’n vote zonna dan maimai a mipite khem uhiam chi in dotna bawl hi. Election manifesto kichi sepsuah dia thuchiam kibawl ahihlai in, sepsuahlouh a mangngilh mai dia kamchiam tawh kibang ta ahihziakin gamsung paidan khek hunta chi hi.Election ding kuan a political party te’n manifesto a puante uh lakah Socio-economic Justice tawh kisai telkha ngeilou tangpi chi hi. Khantouhna ding leh mipi hamphatna dingte tangkoupih sang in, chi-le-nam banah nambing tamzawte’ gupna lunggulh ziak lel in manifesto bukimlou tamtak omsek hi’n gen hi. India a electoral politics pen ‘mobilisation leh politicisation’ kawk deuh a paipih in om gige lai a, mizawng leh nam tuantualte adia lam-et ding bei in social group thupi leh milip tamzawte hamphatpih theih ding lel in poll manifesto puankhiak in omsek chi hi.

New Delhi ah April 4, 2017 a ‘Electoral Issues & Economic Reforms’ tawh kisai national seminar  neih hun in Chief Justice in politics paidan lungtun huailou a sakdan taklang hi. India gamsung pumpi ah political party-te’n nambing tawh kisai a tangkoupih louhna uh vang mahmah ding chi hi. Constituency teng ah leng majority community apan gupna deih ziakin nambing tawh kisai hahtak a tangkoupih in om touzel in huaite’n Indian politics ginat louhna langsak chi hi. Gam khangtou zawte ah election politics paidan hoih mahmah napi in India ah kilehbulh hileh kilawm hi. Indian politician-te’n a buaipihte uh, gam khangtou zawte buaipih tawh kibang theilou a, huaite apan in politics tawh kisai a India dinmun niam ahihdan muhtheih a kilang hi’n CJI in gen hi. 

CJI in election politics paidan mawhsa mahleh kum tamlou paisa apan thil paidan kikhek zek hi’n gen a, political party-te’n mipi gupna a zonna uah khawtang kikhekna omsak ding chihte a tangkoupih uh thilhoih leh kipahhuai hi’n gen a, political alignment, social engineering leh social support chihte tangkoupih ahihziakin gamsung ah khawtang kikhekna om toulai ding in kilang chi hi. Kum tamlou paisa sung a electoral process kikhekna omte gamsung mipi’n lam-etna sangtak tawh a etlai un, election manifesto mangngilh thangsak uh a, huaite tuni chiang in electoral issue lianpi hong suak chi hi. Political party-te’n election hunma a thuchiam a neihte uh semsuah zou ngeilou in, thuzuau phuahtawm zang in, election hun nawn dek chiang in a sepkhiak zawhlouh ziak uh puangkhe pan sek uhi.

India Dan bupi ah election manifesto sepsuah louh ziak a gawtna piak ding chih a omlouh pen thilpoi suak chi’n gen hi.Chief Justice JS Khehar in a genzelna ah, election manifesto tawh kisai in SC in Election Commission (EC) kianga guideline pia hi’n gen hi. Manifesto tawh kisai dan kalh a gamtang political party te’n SC thupiak dungzui in EC apan gawtna tuak thei ding uh chi hi. Political party-te’n economy khantouhna ding kia buaipihlou a, khawtang leh politics thil a dikna (justice) lamte leng ngai-poimawh ding in chial a, Constitution paidan zuilou a khantouhna kichi in omzia neilou chi hi.

Tuabang kalah, vote campaign hun in manifesto naktak a tangkoupih in om a, sepkhiak ding masa leh nanung banah long term a dia thiltup omte tanpha gen in om zel hi. Candidate-te’n vote campaign hun a thuchiamte telching a om nung a sepzuina taktak omlou chih om thei hi. Tup-le-ngim tangtun leh tangtun louh kitehna ding manifesto ahihdan kuapeuh in i theih poimawh hi. Mipite’n leng party hiam candidate deih a i telchingte’n tup-le-ngim omte a sepsuah ding uh ngai poimawh a, mimal hamphatna ding lel mitsuanlouh poimawh hi. Local area development fund leh fund omte zatbei zah leh sepkhiakte a kibuk hun hia chihte telin manifesto etzui zel thil poimawh petmah suak hi. Community Hall hia ahih keileh fund tungtawn a kibawlte mimal sakhau apan lakhia a bawl dan a tangkoupih maimah chihte paikheng hunta ahihdan kuapeuh in theih chiat hunta hi!