Manipur Express | April 21, 2017

Police team in footpath tunga vanzuakte hawlkhia

Lamka, April-20:  M. Kumarjit, MPS, Addl SP (Ops), SDPO/CCpur, OC CCpur PS leh OC Traffic Control Police makaih Police team te’n tuni sunnung in new bazar area ah traffic drive nei uh a, huai ah SDPO leh SI te’n kithuahpih uhi. Police team te’n Tedim Road, Red Cross Road leh Thangzam road dung a footpath tung a thil tuamtuam zuakte hawlkhia ua, New Bazar Bus Parking a gari tuamtuam kikoihdan enkai uhi. Traffic drive ahihleh Police te’n hun bangtanhiam paisa apat uh hi a, New Bazar bus parking a Lagao kimawlte hawlkhia in, Imphal leh Lamka kikal a passenger pua a taituah Bus leh Winger-te kidawh ding dan bikhiah sak uh a, thawveng mahmah in lampi leng awng tuan mahmah hi.

Police te’n mipi hoih zawk leh bitna dia hibang panlakna uh kuapeuh in nungthuap poimawh ahihdan tamtak in gen uhi. Police te’n  paungaihna (loud speaker) zang in Sielmat apan Damkam Bazar kikal ah mipi theihsakna bawl uhi. Police te’n tuni apan Tedim road a footpath ah tung ah kuaman mehding tela thil tuamtuam zuaklou ding, mipi paina hihbuailou ding, workshop te’n leng footpath hihkha lou a nasem ding, footpath dongkholh a dawr/dukan te’n hihbuailou ding in ngen uhi. Tedim road kiang a inn bawlte’n teklei, piaunel akoih uhleh leng nitak mah a nawnkhe ding, smart city ahihtheihna ding a bazar kaite leh dawr/dukan bawl te’n kim leh kiang hihsiang ding, Tedim road ah kuaman gari double parking bawllou ding un ngen uhi. Tunia mipi lak ah ngetna April 21, 2017 in etzui ding leh azuilou omte action lak hiding in mipi theisak uhi.

Lamka khawpi pen gari lam ah khangtou mahmah in, niteng in gari thak tamtak kibehlap in lampi neisak tuan mahmah hi. Tuabang kal ah, lampi dung a gari park leh mipi paina dia kibawl footpath tung khenkhat in meh telin thil tuamtuam zuakna dia azat sek ziak un khe a paite adi’n nawngkai mahmah hi’n kigen a, tuaten lampi leng neusak zou uhi. 

HEADLINES:

Asia a biakin lianpen bawlna ah Rs.crore 36 seng uh:

Zunheboto a SBC biakin honkhiak hiding

Kohima, April-20: Nagaland a Zunheboto town a Sumi Baptist Church Zunheboto (SBCZ) biakin bawl zawh ahih tawh kiton in hongtung-ding April 22,2017 (Kiginni) in honkhiak hiding chihthu om hi. Huai biakin ahihleh mualtung a om Zunheboto town laizang a kibawl hi a, mi 8,500 tut theihna ding chih ahi hi. Biakin dung-lam feet 203, availam feet 153 banah a sandan feet 166 hi’n kigen hi. Biakin ahihleh sawng (storey) 8 pha a, room 27 pha in huaite main sanctuary banah a sung ah biakin neuzaw mi 300 vel tut theihna leng om hi. Huai banah, saptuam office, conference room, training room, kiteng dingte kisak-kholhna room banah damlou kikep theihna room leng om hi’n gen uhi. Anuailam ah library liantak om a, kikhop tawp nung a kithuahkhawm theihna room kichingtak leh baptisma tanna ding tuikhuk (pool) hoihtak leng bawl a om hi’n kigen hi. Biakin building bawl ding in mundang apan nasemtu la uh a, Inner Line Permit(ILP) piak a om nasemtu (worker) 2000 khawng zat a om hi’n kigen hi. May 7, 2007 apan kibawl hi a, March 31, 2017 a zawhsiang a om tanin a sumsen uh Rs. crore 36 tungzou hi’n gen uhi.  

Thusuak dan in, huai biakin building bawlna a Architect kizang ahihleh Honoholi K Chishi-Zhimomi of M/s.Akitektura, (Dimapur) hi a, Engineer ahihleh M/s.Map Project Services Pvt. Ltd (Kolkata) apan hidan in gen uhi. Biakin kibawl pattung in Budget ding in Rs crore 25 & lakhs 30 guang mahle uh akidaih louh ziak a behlap nung in Rs. crore 36 tungtou chih ahi hi. Biakin bawlna ding sumte ahihleh SBCZ apan funding 50% banah deihsaktu mi tuamtuamte piakkhawm 10% vel hi a, saptuam member-te thawhkhiak 40% khawng hi’n Church Secretary Nikheto Jimomi in gen hi. Sum thawh khawmtute ahihleh Church planning board member-te, government officer-te, sumdawngte leh niteng a nitha kilawhte khawng hi uh a, biakin bawl lunglut leh kithalawp mahmah upalamte tamtak in abawl hunsung ah om louhsan uh hi’n gen hi. Biakin bawl sung in Zunheboto town sung ah Veng tuamtuam thumkhawmna leh fellowship sutzop in om touden a, group tuamtuam a fellowship leh thumkhawmte a kallak ah kigawmkhawm zel in, mi honpi thumkhawmna leh fellowship neih hunte ah saptuam member-te kithalawpna kibehlap zel hi’n Pastor in taklang hi.Atangpi agen in, saptuam member-te thathousaktu pen ahihleh ginna hi a, Architect Honoholi K Chishi-Zhimomi in Pathian ziak vek ahihdan theikawm in ‘Thupina leh pahtawina teng Pathian kiang ah piak ahi’ chi’n gen hi.

Biakin building a san luat ziak in Zunheboto district sung a khawta 20 vel apan in biakin building kigal muhthei a, sea level apan metres 1,800 mun a kibawl chih ahi hi. Biakin building a san ziak in elevator /lift 2 koih in om hi. Biakin dak liantak leng lei uh a, akigen danin, huai dak ahihleh kilogram 500 a gik hi a, a kikhetging chiang in kilometers 1.5 huamsung ah ngaih huntawktak in kiza phaban chi uhi. Dak ahihleh Poland apan a puak uh chih hi a, aleina leh puakna ah Rs.lakh 15 bei hi’n gen uhi. Biakin kibawlna lak zinling a om zelzelna mun himahleh zinling ziak a mawk a selou ding a gel leh bawl a om hi’n architect in gen hi.

April 22, 2017 zing dak 8.00 in biakin building honkhiakna ah Moderator in Rev. S.Yevito Sumi, Senior Pastor pang ding a, ‘Glorious things of Thee’ chih la Church Choir-te’n sa ding uhi. Rev Dr. Solomon Rongpi, General Secretary, CBCNEI in a honkhiakna tawh kithuah in Pathian kiang ah lan ding hi’n thusuak in taklang hi.

TUALSUNG:

PCI (R) in kum 33 chinna zang

Lamka, April-20: Presbyterian Church in India (PCI- Reformed) in ‘Toupa kua ahia ka hih uh, hiai tantan n’onpi’ thupi anei in zan nitak apan tuni’n Mualkoi PCI (R) Biakinn ah PCI (R) dinkhiak nung kum kum 33 chinna ‘PCI (R) Day’ zang uhi. Day zatna ahihleh South Lamka PYF leh Lamka PYF te’n makaih uh a, zan nitak in Rev. T. Liankholal, Co-ordinator (Missions) in hong a, Rev. H. Chinthiansong, Co-ordinator (Ministries) in thu gen hi.

Tuzing dak 10:00 in Day nipi zang in, mipi paikhawm te’n phatkhawmna nei in Rev. Kham T. Valte in PCI Maitam Pathian kiang ah lan hi. Hun zatna ah PCI(R) Founder Member damlai omsun Elder T. Thangzakhup in PCI Day zatna tawh kisai pulak a, Rev. M. Khamlianmang, PYF Co-ordinator in Pathian thu gen hi. Nitak biakna kikhawp ah Rev. Khen P. Tombing, Chief Co-ordinator in thu gen a, Elder Langkhanpau Guite, GA Moderator apan thugen tom ngaihkhiakna om a, Rev. G. Suanzalam in PCI Day khak hi.

Presbyterian Church in India Reformed ahihleh April 14, 1984 in Mualkoi ah innkuan 17 apan mi 157 kikhawm te’n a dinkhiak uh hi a, huai hun ah Executive Committee leng bawlkhe pah uh a,  April 20, 1984 pen biakna kikhop patni masapen dia bikhiah in kikhopna  pan in, huai ni pen PCI (RD) Day dia puang in, tuni tan kum teng in zang uhi. PCI (R) nuai ah tulel in Presbytery 4 – Lamka Presbytery, South Lamka Presbytery, Singngat Presbytery leh Thanlon om a, Lamka Presbytery nuai ah biakinn 13, South Lamka Presbytery nuai ah 7, Singngat Presbytery nuai ah biakinn 12 leh Thanlon Presbytery nuai a biakinn 9 om in CCpur district ah khua 40 val ah saptuam om hi’n kigen hi.

Tuaban ah, Goodnews Lucknow leh Anugraha, Bangalore ah saptuam dinkhiak ahih banah Delhi leh Bangalore ah leng City Church dinkhiak hi a, PCI (R) in Meitei Missions Field leh Tedim Synod nei in, tulel in PCI (R) nuai ah innkuan 2000 val  om in milip (population) 10,000 val hi’n kigen hi.

Inspire Award Manak 2016-17

Lamka, April-20: Director of Education (S) in ZEO teng kiang ah online tungtawn in April 29, 2017 tana Inspire Award Manak (sheme) 2016-2017 nominate bawl ding leh online tungtawn a buaina neite’n passport photo, student bank account leh brief innovative project report pelut ding in theisak hi. Huai thu ah CCpur District sung a om govt school leh private school te’n student te nominate theih ding a, thuchian kimzaw ZEO kiang ah kantheih ding hi. Inspire Award Manak (scheme) 2016-2017 bel Ministry of Sc & Technology, Deptt of Sc & Technology, govt. of India leh National Innovation Foundation, India pangkhawm a kibawl Inspire Award Scheme hi a, class VI- X kikal student te’n Sc & Technology hamphatpih ding, innovative idea neih ding chih tup leh ngim hi’n kigen hi. CCpur Dist. ah online tungtawn in school 20 in www.inspireawards-dst.gov.in ah registration bawl uh a, student kua hiam in thil hoih idea aneih pen gelhthoh in Guwahai a IIT ah thon ding a, technical expert te’n asuizui nung un thil hithei ahihleh student kiang ah idea apiak tungtawna thil bawlkhiatna ding in Rs. 20,000/-tan bank account tungtawn in peding uh hi’n kigen hi.

DLCC-cum-Review meeting 

Lamka, April-20: R. Sudhan, IAS, DC/CCpur makaih in April 29, 2017 zinglam dak 11:00 in DC’s office a BRGF Resource Centre ah District Level Coordination Committee (DLCC)-cum-Review meeting omding hi. Huai hun ah PHED/CCpur Division leh PWD/CCpur Division te’n Detailed Project Report (DPR) ban ah MSPDCL/CCpur Division te’n IPDS power point presentation nei ding uh a, District Level Officer teng telkimchiat ding in DC/CCpur in theisak hi.

PTC GHQ makaite’n guite road enkhia 

Lamka, April-20: Paite Tribe Council (PTC) GHQ te’n Guite road puahthakna nasemtu Bhartia Infra Company te’n nasep apat dek un PTC GHQ makaih a Unit te’ tawh pangkhawm a Guite road nasepna enkai ding chih atheihsak dungzui un Block leh Unit te kiang ah enkai ding in gelhtawh in laithon uh a, tuni’n akhatveina ding in PTC GHQ makaite’n enkhia uhi. Bhartia Infra Company te’n Lungthul (T) Pumlong khua leng kichi pansan in nei uh a, huai nun ah work incharge leng PTC GHQ gen kihoupih uhi. Bhartia Infra Company te’n tulel in WBM (suang sung) uh a, bang hun a alkatara (buttument) zang a lampi bawl ding, WBM sah ding dan, alkatara asah dingdan chihte kikum uh a, Bhartia Infra Company ah thuneitu sangzaw te kimuhpih sawm uhi. Guite road puahthakna ah suang lakna mun (quary) hoihtak omlouh ziak in suang kizangte deih bangzou chiah kei mahleh nasemtute kuhkal leh chihtakna PTC GHQ in kipahpih hi’n Generay Secretary, PTC GHQ apan kiza hi.

National Seminar hun khakna om

Lamka, April-20: Rayburn College in North Eastern Council (NEC), Shillong sensakna tungtawn in ‘Protection of Forest for Sustainable Development in Manipur’ thupi anei in zan apan Rayburn College Auditorium ah National Seminar aneih uh tuni sunnung in zou uhi. Huai hun ah Chief Guest in Brig. Ajay Kumar Kumar, Commander, 27 Sector, Assam Rifles pang a,  Guest of Honour in Col. DS Murty, SC, SM, Dy. Commander, 27 Sector, Assam Rifles leh Functional President in Rev. Dr. Khen P. Tombing, Principal, Rayburn College pang hi.

Chief Guest a pang Brig. Ajay Kumar in khawlum-khawvot kilamdangna lua omlou in CCpur district mipi boruak siangthou tak tawh a khawsak hampha uh chi a, himahleh singtang lam a sing leh gua-te naktak a hihsiat a om lamdangsa in poisakthu gen hi. Khawpi lian zawte ah singkung hoih taktak muh ding a vanglai in natural resources tuamtuam i ngahte a thupi dan thei a, kepbit poimawh hi’n gen hi.  I gam a sing leh guate eimah in I hihsiat ahihman in government tawh kithuzak tuah in singtang lam  a omte nekzawnna ding  zonsak  poimawh mahmah hi’n gen a, kum 20 paita sung a CCpur district bang dinmun a om a, tuhun a bang kihih chih leh kum 20 nung a bang dinmun a om ding hiam chih ngaihtuah poimawh mahmah hi’n gen hi. Gamsung khantouhna dia hibang seminar atam theilam neih poimawh hi’n leng gen hi. 

Valedictory programme zawh in college campus ah cultural extravaganza zang uh a, huai hun ah Rayburn College akai lasiam tuamtuam banah cultural item tuam tuamtuam show uhi.   Seminar sungin expert tuamtuam chial a omte’n thupi tuamtuam pansan in sinsak uh a, mun tuamtuam apan in mi 400 vel kihel uh hi’n kigen hi.

Rayburn College graduation- 2017 

Lamka, April-20: New Lamka a Rayburn Chapel ah April 21, 2017 sunnugn 2:30 in Rayburn College Graduation-2017 omding hi. Huai ah T. Lianchinpau, Vice Principal in vaidawnna thugen ding a, Sr Paukhankhual Tonsing, Dean of Examination makaih in Exam Tips hawmkhiat hiding a, Dr Nehkhomang leh Dr Ginneihching makaih in Best Student Award hawmkhiat hiding hi. Rev. Khen P.Tombing, Principal, Rayburn College in Graduation-te’ hanthawnna (exhortation) leh Pathian kiang ah thumsakna neiding hi. English Deptt, History, Pol.Science, Geography, Sociology leh Commerce Deptt apan studen te’n thugenna nei ding uhi.

B.Ed zilnuam te’n ngaihven theih

Lamka, April-20: Director of Education (S) nuai a in service Graduate Teacher (Science & Arts) te’n Academic Session 2017-2019 kum 2 sung DM College of Teacher Education ah B.Ed zilnuam te’n apply theih ding hi. Huai apply dingte’n regular appointment order, EIN, graduate certificate, date of birth certificate, No object certificate etc. ban ah application form May 5, 2017 tan in Director of Edcucation (S) ah piaklut ngai ding a, thuchian kimzaw ZEO/CCpur ah kantheih ding hi.

EBC Workers Pensioner Prayer

Lamka, April-20: GBC campus a Chhungi Prayer Hall ah April 22, 2017 zing dak 10:00 apan sunnung dak 2:00 tan a 6veina EBC Workers Pensioner Prayer Fellowship omding hi. Thumna hun ah Rev. ST Jamkhanthang, Evan. Thangkhanpau, Rev. Ngulkam te’n makaih ding uhi. Sharing ahihleh Rev. V. Thangsuan, Upa K. Ginkhanthang, Pastor Ngaithang leh Rev. T. Kamzakham te’n nei ding uhi.

Numei te’n NSIGSE apply theih

Lamka, April-20: Central govt in May 2008 in centrally sponsored “National Scheme of Incentive to Girls for Secondary Education (NSIGSE) kichi hongkhia a, atuppen bel SC/ST numei te school apan drop out louhna ding chih ahi. Scheme in SC/ST student pasal nei nailou a class VIII passed te uap ding uh a, class IX asim sung un Central govt in bank account tungtawn in Rs. 3000/- deposit sak ding a, class X a passed chiang un draw khethei ding uhi. Application form ZEO/CCpur ah muhtheih ding leh thuchian kimzaw kantheih ding a, April 29, 2017 tan in Director of Education (S) ah piaklut ngai ding hi.

Mzr Univ. ah Ph.D ngah

Lamka, April-20: Gin Khan Chin @ GK. Chin, IP & TAFS, Financial Advisor, NEC leh Mrs. Buangi tanu upa pen Ms Grace Kim Khaute in Mizoram University ah Education Deptt tungtawn in Doctor of Philosophy (Ph.D) ngah hi. Aman thesis in “Constructivist approach to teaching-learning; Knowledge, attitute and practices of elementary School teachers in Mizoram”chih zang a, Prof BB Mishra in apoimawh bangbang in panpih hi.

SUUNNA:

Upa Goukholam Buite (77) s/o (late) Khaitinsong of HQ Veng, tuzing baihtak dak 12:30 velin teknat in si a, tuni’n HQ Veng hanmual ah kivui hi.

Khampam (95) m/o Phungkhokam of Zellang Veng, Hiangtam Lamka tuni nitaklam dak 3:50 vel in teknat in si a, April 21, 2017 in Lamka hanmual ah kivui ding hi.

Lhingkhokim Touthang (60) w/o Haopao Touthang of Touthang Veng, Saikul, zannitak dak 8:00 in District Hospital ah sungna in si a, KKL GHQ te’n KKL Ambulance gari in Saikul ah vakha uhi.

Mangkholal Guite (54) h/o Chiinngaihkim of Pearsonmun Vengsak, tuni zinglam dak 10:00 velin Motor Neuron Disease ziak in si a, nitaklam in Pearsonmun hanmual ah kivui hi.

STATE THUTHANG:

Review Meeting om

Imphal, April-20: Manipur Government nuai a department tuamtuam in Developmental Project a septe uh dinmun etzuina chikhat Review Meeting kichi tuni’n CM Office chamber ah om a, huai ah Administrative Secretaries tuamtuam tel uhi. Tuni a Review Meeting Chief Minister N. Biren Singh makaihna a om hi a, huai ah Addl. Chief Secretary Shambu Singh, Addl. Chief Secretary (Home) J. Suresh Babu, Principal Secretary (Finance) Vineet Joshi banah Commissioner, Secretaries leh Dept. tuamtuam a Director-te tel uhi. Huai meeting ah BJP makaihna government thak in ni 100 sung a nasep dan etzuina kawm in Dept. tuamtuam in developmental project a septe uh tungtang genkhawm uh a, Chief Minister in a gendan in huchi bang Review Meeting kha teng a khat vei zel om ding hi’n gen hi.

Civil Service Day zat hiding

Imphal, April-20: Manipur Government nuai a Department Personnel & Administrative Reforms intekna in Manipur Secretariat Conference Hall ah April 21, 2017 zinglam dak 10:30 in ‘12th Civil Service Day’ kizang ding hi. Huai ah Chief Guest in Manipur Chief Minister N. Biren Singh pang ding a, Functional President in Th. Biswajit Singh, Minister (PWD/RD&PR/Textile, Com. & Industries/Power/ AR & Training / PR) pang ding hi. Directorate of Information & Public Relation in Civil Service Day zatna hun uap ding in Electronic leh Printed Media-te banah All Indian Radio, Doodarshan, ISTV leh ImpactTV-te chial hi.

School-te bawl hoih ding govt. lunglut

Imphal, April-20: Dy CM Y. Joykumar in Manipur a government school-te ah nidang lai a kisinsakna bangbang a om nawn hun hita hi’n gen hi. Dy. CM in tuni’n Langol ah SSA nuai a ‘Wangdei Primary School’ bawlna ding sungphum kawm in a thugenna ah Government school-te ah kum tam kuamtak paisa a chindan Homework, classwork leh weekly test phatuam mahmah hi’n gen a, tu hun in hibang tawh kisai panlakna ke niam hi’n gen hi. Dy. CM in agenzel dan in Government School-te ah tulel in semtu teacher-te leh school a kai student-te tamdan kituakna hiam chih etzui poimawh a, hun paisa a lai kisinsak dan hoih ziak in competitive examination tamzaw ah govt. school a kaisa student-te khatna khawng in ana pangsek uhi. Aman private a tution lak leh private school kibehlap deuhdeuh leng lungtun huailou sa a, hibang thil paidan in student-te adia siamna taktak haksa hi’n gen hi.

NSU mun ding enkhia

Imphal, April-20: IFCD Minister Letpao Haokip in a gendan in Prime Minister N. Modi in Imphal West district a Koutruk mun ah National Sports University (NSU) nasepna ding tunung sawtlou in suangphum ding (foundation laying ceremony) nei ding hi’n gen hi. Minister in tuni’n Sports University bawlna mun ding va enkhia a, huai mun ah gam acre 325.90 poimawh mahleh acre 400 felsa a om hi’n gen hi. Aman agenzelna ah Pheiding akipan Loitang Khunou tawn in Koubruk zotna lampi dinmun leng enkhia hi. Aman Manipur a Project tuamtuam leng enkhia a, Singda dam leh Dolaithabi barrage project leng enkhia hi. Minister in Singda dam a etkhiak hun ah IFCD official te’n huai dam a latdan leng kilawm zaw ding a bawlkhe ding in thupia a, aman  a pua akibawl railing-te leng bawlthak ding in thupia hi. 

Aman Dolaithabi barrageproject a etkhiak hun ah tun nasepna 96% vel zawh hi’n gen a, huai project ah tunnel vuhna ding in kha 2 leh akim vel hun lut laiding in gen hi. IFCD Minister in Imphal luidung Hatta Golapati leh Sanjenthong kimlak telin mun tuamtuam enkhia a, Imphal lui piau a mun awng luahte tungah action khauhtak lak hiding chi’n gen hi. AMan a genzel dan in Revenue Dept. tawh kithuza in Imphal lui piau a dan kalh a gam awng luahte nawhkhiak (evicted) hiding chi’n gen hi. Sanjenthong suahlam pang a Permanent Police Picket kikoih leng deih louh thu Minister in gen a, Police Picket-te mun tuam a suankhiak ding dan ngaihtuah hiding in gen hi. Huai tawh kisai in DC/Imphal East district akipan report ngen a, huai report muh hunhun in a poimawh bang a panlak hiding in gen hi. Huai hun ah Parliamentary Secretary (IFCD) Rameshwor Meetei, Parliamentary Secretary (YAS &Edn) Shri K. Robindro, Parliamentary Secretary (RD&PR) Heikham Dingo Singh, H. Deleep Singh, Commissioner (YAS), Ksh. Pritam Singh, Chief Engineer, IFCD, K Kirti, SE, Thoubal Circle-II leh Songput W. Albert, SE, Irrigation Circle-II banah IFCD leh YAS a official te’n Minister zui uh hi’n kigen hi.

TKS conf.-cum-sports meet

Ukhrul, April-20: Ukhrul district a Tashar khua ah tuni’n kal 1 sung om ding Tangkhul Katamnao Saklong (TKS) 30th General Conference-cum-sports meet kipan hi. Huai hun uap Works Minister Th. Biswajit in AS Khating Memorial Ground ah TKS student body-te pahtak thugen a, gam adia mi hoih leh makai piching suah theihna ding in laizil hun sung in lunglut tak a lehkha sim ding in hasuan hi. Minister Biswajit leh Parliamentary Secretary (PHED and Printing & Stationary ER) Leishiyao Keishing te’n TKS leh Tashar Katamnao Long-te kiangah Rs. 1 lakh leh Rs. 50,000 pia uh a, TKS General Conference-cum- sports meet kichi kum 4 hal zel a om hi a, tunung in TKS nuai a unit 10 tel uh hi’n kigen hi.

Rs. 22.60 crore sanction

Imphal, April-20: Union Minister for Tribal Welfares Jual Oram in a gendan in Manipur a Tribal-te khantouhna ding leh amau tawh kisai poimawhte a panlakna ding in Centre in kum 2016-17 sung a sum zat ding in Rs. 22.60 crore sanction hi’n gen hi. Tuni’n Tamenglong district HQ a BJP kiphuhkhiak ni zatna hun uap kawm in Minister in thugen a, huai hun ah Centre in Rs. 22 crore val a bikhiahte school bawlhoihna ding, Mobile Dispensary honna ding, Organic farming adia zat ding leh scheme tuamtuam tel hi. Union Minister in a genzelna ah amah Ministry in singtang gam khantouhna ding a sum kizatnate dikloutak a zang hiam nasem a om leh Government Website ….. ah report pia hiam huai ahihkeileh lehkha gelh a thon ding in leng mipite ngen hi. Oram in a genzelna ah Centre a N. Modi makaihna NDA government in kum 3 vaihawmna len pan himahleh India gam a khua 300 val Minister leh MP te’n pha in huai mun a mipi te’n haksatna a tuahte uh enzui uh hi’n gen hi. District dang 560 omlai-te leng phaksuak vek ahih ding banah huai mun a mipite tawh kihou in amau adia poimawh bangbang hiam chih suizui hiding a, tuma zek a Manipur Assembly Election ah BJP MLA 21 mipi’n  a telching ua kipan in Prime Minister N. Modi ah mipi muanna nei ahihdan taklang chi hi. Tuni a Manipur hongpha Minister Oram in April 21, 2017 in Imphal nusia a kik nawn ding hi.

TSA te’n mawhpaih thupuang

Imphal, April-20: Thadou Students’ Assn. – General Headquarters (TSA-GHQ) te’n gang member 7 in Good Friday/Cheiraoba (April 14, 2017) nitak in Imphal East district a Lamlong Bazar gei ah school kai student numei 2 a suahluih tungtang uh mawhpiahna sangpen in mawhpaih thupuang uhi. Manipur Police team te’n huai tungtang suizui in migiloute a matkhiak uh tawh kisai in pahtak thugen uh a, state authority te’n leng huai tungtang ngai poimawh in POCSO law in hun abikhiah sung a case kintak a zawh dia paihatsak ding leh giloutak a gamtang-te hawi neilou in gamsung a dan tawh kituak a gawtna khauhtak pe ding in ngetna bawl uhi. Huai tungtang ah Social Welfare Minister Nemcha Kipgen kigolh in lauhna tak a om sualluihna tuak numei 2 leh a innkuante uh panpih theihna teng ah panpih ding a chiam kipahpih uh a, POCSO law dungzui a victim-te hihna puankhiak dan kalh ahihziak in mipite pilvang ding in ngetna bawl uhi. TSA-GHQ te’n a genzelna uah nupi leh naupang teng in innsung leh pawlam a bit akisak kei ua leh society khatpeuh a khantouna om theilou ding a, khawtang khangtouh ah sualluih leh kilawmloutak a kisualna ngaihdam theih hilou hi’n gen uhi. Government tawh pangkhawm in Civil orgn. teng leh mipi’n kilawmloutak a kisualna khatpeuh banah numei leh naupang-te tungah sualna khautak a doudal ngai a, state government in tunung a huai tawh kibang a thil a tung nawnlouhna dia panla ding in leng ngetna bawl uh a, KSO Sadar Hills teng leng thiltung tawh kisai mawpihthupuang uhi.

Consultation om ding

Imphal, April-20: United People’s Front (UPF) thupuangtu Aaron Kipgen in New Delhi ah June 15 leh Oct 19, 2016 in India govt. leh UPF in kihouna a neih uh tungtawn a peace process dinmun tawh kisai April 6, 2017 in Guwahati ah UPF te’n ngenteltak a genkhawm uh chi’n gen hi. Aman agenzelna ah UPF leader te’n akinlam in apex/frontal organisation adiak in Kuki Inpi Manipur, Zomi Council leh Hmar Inpui tawh April 22, 2017 in consultation neih ding poimawh sa uh a, huai hun ah Kuki/Zo mipi-te political lam ah lam-etna leh peace process paihatsakna dia panlak ding dan tungtang ah thu poimawh tuamtuam genkhawm hiding in taklang hi.

‘74th commemorative function’

Imphal, April-20: Imphal East district a Mandop mun ah tuni’n Khurai Chingangbam Mandop Bombing Disaster committee saina in World Ward II hun a Khurai Chingangbam Mandop mun ah bombing ziak a si-te phawk gige na in ‘74th commemorative function’ om hi’n gen uhi. Huai hun ah bombing ziak a si-te innkuan leh tanaute, Sahitya Academy upadhi awardee banah writer Khuraijam Nimaicharan, II World War researcher Yumnam Rajeshwar leh Khurai Chingangbam Mandop Bombing Disaster committee members–te tel uhi. Yumnam Rajeshwar in Mandop mun ah bomb khiakkhum ziak a si mi 28-te hihna theih chet himahleh mahleh research a bawl tungtawn a tunitan in mi 69-te hihna theikhia a, committee member-te kiangah list pe khia hi’n gen uhi. 

Rotary Club expedition khahkhia

Imphal, April-20: Rajasthan akipan Rotarian Manu Paliwal leh Manoj Paliwal-te saina in April 5, 2017 in Rajasthan a Indo-Pak border gei a Thanot a BSF post mun ah road expedition pan uh a, state tuamtuam a tawt nungun zan in Imphal hongtung uhi. Maj. Gen. Virendra Singh, IGAR(S) in tuni’n Mantripukhri ah Road Expedition team-te khahkhiak a, amau Myanmar, Thailand, Laos, China, Russia, Belgium, Switzerland leh Italy tawn in September kal masa sung in Rome tan tun ding uhi. Huai hun sung in India leh Rajasthan Tourism thangsakna ding in gam tuamtuam a Rotary Clubs 25-30 vel tawh kihouna hun zang ding uh hi’n leng kigen hi.

Central Evaluation kipan ding

Imphal, April-20: Dr. Chingangbam Sarat, Secy., BSEM in tuni a thusuah a bawlna ah April 25, 2017 akipan venue 2 ah HSLC Examination 2017 a Central Evaluation kipan ding in akisaipih teng theisak kawm in venue leh subject bikhiahna munte anuai abang hi’n gen hi. Johnstone Hr Sec. School ah S. Sc., Manipuri, Elementary Manipuri (MM), Elementary Manipuri (RS), Home Science, Maola, Mizo, Thadou Kuki, Tangkhul, Paite, Ruangmei, Hmar, Vaiphei, Hindi, Elementary Hindi leh Bengali answer script-te check hiding a, C.C. Higher Secondary School ah English, Mathematics, Science, Addl. English, Computer Science, Higher Mathematics, Nepali, Thang-Ta, Liangmei, Zou, Kom, Fine Arts, Eshei Nongmai, Manipuri Jagoi leh Commerce hiding in gen uhi. 

Free Medical camp

Kangpokpi, April-20: District Council Administration, Sadar Hills Autonomous District Council (SHADC) saina in tuni’n Island sub-division a Laokoiching village ah ‘Free Medical Camp’ om a, huai ah Doctor 4 in mi 200 val en uhi. SHADC Kangpokpi te’n Rs. 1 lakh man ding damdawi manbei a hawmkhia uh hi’n kigen hi. Huai mun mah ah tuni’n Free Animal Camp leng om a, huai ah Vet. Doctor te’n ui (dog) tuamtuam 75 leh poultry 600 valte vaccination kap uhi. DK. Thanboi, MCS, Chief Executive Officer, SHADC in Free Animal Camp hun ah vok telin ganvulh tuamtuam vaccination kap louh-te trained personnel telkhiak te’n tunung sawtlou in vaccination va kap ding uh a, free medical camp hun ah gan natna muhkhiak bangmah omlou hi’n gen hi.

Smile Train Shija 

Kangpokpi, April-20: Kangpokpi District Administration leh Smile Train Shija Cleft project saina in tunitaklam in DC Conference Hall ah Cleft week observation tawh kizawi tawn in Cleft Lip and Palate tawh kisai a awareness programme om  hi’n gen uhi. Huai hun ah Dr. Surchandra Singh, CMO/Kangpokpi leh T. Ranjit Singh, IAS, DC/Kangpokpi te’n mipite adiak in ASHA leh Anganwadi worker-te Cleft lip leh palate tungtang a theih ding uh poimawh diak a, Smile Train Shija Cleft Project tungtawn in Cleft lip leh palate neite free medical treatment piak hiding in gen uhi. DC/Kangpokpi in a genzelna ah district sung a Cleft disorder neite atheikhia ASHA leh Anganwadi worker-te kiangah inventive piak hiding in puang a, Smile Train Shija project tungtawn a free treatment a muh ding uh deihna hi’n taklang hi. 

NH-37 ah nasep pan

Imphal, April-20: National Highway Infrastructure Development Corporation Ltd. (NHIDCL) te’n NH-37 (Imphal-Jiribam) ah BRO-te khekkhia in lawpi bawlhoih nang in nasep pan uhi. NH-37 lampi siatluat ziak in mipi leh van tuamtuam pua gari te’n nawngkaina tuak uh a, kha 2/3 paisa a Union Road Transports & Highway Minister Nitin Gatkari in mipite kiangah lampi bawl ding ana chiam a, Chief Minister N. Biren in leng hoihtak a lampi bawl ding chiam a, NHIDCL te’n April kal masa apan nasep pan uhi. Imphal leh Wangkhul kikal HVA te’n bawl uh a, Wangkhul leh Barak road kikal NILtd., Barak Road leh Jiribam kikal Bharatiya Infrastructure Pvt. Ltd. te’n bawl uh a, Chief Minister N. Biren in NH-37 lampi leh Barak lei etkhe ding hi’n leng gen uhi. 

TUNI THUPI:

“Tangte lam nga in ka dak tou a, koi akipan, hon huhna a hongtung dia?. Kei hon panpihna tuh lei leh van siampa Toupa akipan in ahong pai hi”

-Sam: 121:1-2

EDITORIAL:

BJP a lutvek ding maw? 

Manipur state khangthu a om ngeilou tutung Assembly election zawh in hong om hi. March 15, 2017 in BJP makaih coalition government dingkhia a, huai ah BJP member 21, NPF 4, NPP 4, Lok Janshakti 1 banah Congress member 1 kigawm member 31 pha uhi. Manipur a BJP makaih government a dinkhiak masakna pen hi’n kigen hi. Ministry bawlkhiak ni in Manipur Governor mai ah MLA 9 kua in Chief Minister, Deputy CM leh Cabinet Minister ding in kichiamna nei uhi. Huainung in Assembly Session masapen neih a om in Session beini in Ministry keklet in om a, MLA 3 cabinet ding a kichiam in MLA 12 in Parliamentary Secretary ding in kichiamna nei nawn uhi. Huai banah, zanzek in Singngat Assembly Constiturency apan telching a om Congress MLA 1 in BJP government zom nawn in member 31 hilai tu’n member 32 tungtou uhi. Manipur a BJP makaih Coalition government ahihleh tu’n kha 1 leh ni 6 khawng lel hiphet a, huchihlai in zan in Congress MLA 4 in CM office chamber ah Chief Minister N. Biren vamu in BJP zop theih dingdan lampi a zon ban uah state BJP President K. Babhananda leng mu uh hi’n kigen nawn hi. Huai banah, zanzek in Congress MLA hunkhop in BJP government zop sawm a green signal tanpha pekhin uh ahihthu om a, hichibang dan thuthang leh panlakna omte i et leh opposition party apan MLA bangzahhiam lutbeh lai ding dinmun ah om chihna suak hi.       

Manipur state ahihleh gam kilkawi a om ahihna ah National Highway 2- Imphal-Dimapur Road leh Imphal-Jiribam Road pansan in India state dangte tawh kikawmtuah hi. State kitoudelh zoulou hihna ziak mah in National Highway a Economic blockade a om chiang in state sung naktak in nawngkai hi. Ibobi makaih Congress vaihawm hunsung a Economic Blockade kha tamtak omsa BJP makaih government hun ah ni tamlou sung in khawlsak in om hi.  State a dia buaina liantak hihveng a omna ah BJP makaih government in state mipite muanna bangtanhiam ngahbeh hilou hiam chihtheih di’n om hi. 

Ni 1 paisa inleng Chief Minister N. Biren Singh in All Manipur Petroleum Products Transporters Assosciation banah All Manipur Petroleum Products Drivers Assn te’n meeting nei uhi. Huai ah Minister leh Parliamentary Secretary khenkhat banah Addl. Chief Secretary (Home) Sureh Babu, DGP L.M. Khaute leh civil leh police a top official tuamtuam tel uhi. Huai meeting ahihleh Association 2 te’n Dimapur apan Imphal zuan oil tanker-te ambush a om chihthu ziak a CM a kimuhpihna uh hi a, CM kiang ah action lak ding phu uhi. Chief Minister in National Highway-te vengbit ding a security hoihtak koih banah patrolling paisak ding in chiam a, Assn. 2 te’n indefinite case work strike a sawm uh khawlsak pah uh hi’n kigen hi.Tumazek inleng Centre in Higway Protection Force (HPF) bawlkhiak ding lemsa ahihdan CM in puangkhe khin hi.   

Manipur state ahihleh mahni kitoudelh zou vuallou state khat hi a, revenue bangmah mulou bangkhop ahihna ah thil bangkim Central government a kipumngak chileng kikhiallou ding hi. Banah,Centre a vaihawmna len BJP makaih NDA government nungthuapna ziak a Manipur a BJP makaih Coalition government dingkhia chileng kikhiallou ding hi. Manipur a government bawlkhiak ni mah inleng Prime Minister Narendra Modi in a poimawh bangzel a Centre in Manipur panpih ding ahihdan a langtang in thuchiam bawlkhum a, huaite ziak mah in Chief Minister N.Biren Singh in leng Central mit-tunna bang a sepkhiak sawm a panla ahihdan kilat theihna tamtak om hi.  

Tuabang kalah, democracy a kivaipuakna banah multi-party system zui India ah opposition a hat leh thil paidik in government in nasem hoihzaw chih hi a, huchibang tangtunna ding lam Manipur a kizui khalou ahizaw diam chih in om hi. Kum 20 phial paisa inleng Manipur a MSCP party makaih government ding khia a, huailai in MLA teng in ruling party kibawhhuan uhi. Huai lai in opposition MLA khat kia om a, huaipen Chief Minister-lui Rishang Keishing ahi hi. Tu’n leng Manipur ah BJP makaih government dingkhia in hundangte banglou takin mipite lak ah thuchiam lamdang taktak nei uhi. Kum 15 paisa a Congress government in a sepkhiak zawhlouhte hun tomchik sung a zawhkhiak ding leh thu dangdang a chiamte uh tangtun thei ding ua gintak theihna mi tamtak in nei uh a, elected member (MLA)-te lak mah ah leng ruling lam lunggulhna liantak om hidan in kilang hi. Huaiziak in, tubang dan a thil a paitouh zel leh opposition lam a member tawmchik kinusia a, ruling party a kibawhhuan kheukhou ding uh baihlam maimah leh kilawm hi’n muhtheih hi.