Manipur Express | August 12, 2013

Headlines:

Manipur ah khualzinmi(tourist) 20-29% in pun behlap

Tourist-te’n Northeast state tuamtuamte lunggulh uh

New Delhi, Aug-11: India gam state tuamtuam a khualzin mi (domestic) leh gamdang (international) apan khualzinmi (tourist) te’ adingin India malsuahbial (Northeastern state-te) a lunggulh theihna ding uleh vehtham pha a sakna dinguh deihna ziakin naktaka panlak hilel chihthu kiza hi. Kum paisate tawh teh in Manipur, Tripura leh Nagaland in leng vehtu hauthei mahmah uh a, foreign tourist-te ngial hiai state 3 te veh 20%-29% in khangtou zou chihthu om hi. India gamsung mun tuamtuam apanin leng khualzinmi tamtakin Arunachal Pradesh leh Nagaland state pha uh a, 36%-41% in vehtu khangtou zou chih ahi hi. Hun paisate ah  bel khualzinmite’n Nagaland, Arunachal Pradesh, Manipur leh Tripura phakding lin vungvung uh chih hi a, tuni chiangin bel khualzinmi zah kibehlap deuhdeuh hi’ kigen hi. Khualzinmite’n India malsuahbial a lunggulh theihlouhna taktak uh ahihleh security tawh kisai bang, ahihkeileh inner line permit hatluat ziak leh kikawmtuahna haksat banah flight leng atawm  ziak ahi chi uhi. Tua ziak mahin mite’n Goa leh Kerala khawng ettak ana sazaw uh chi uhi. Northeast  state tuamtuam enkaitu local government-te banah travel company leh airlines te’n pan ahah lak mahmah ziakun tuni chiangin khualzinmi kibehlap nasa mahmah chihthu om hi. Manipur, Nagaland leh Mizoram state phanuam gamdang mite’n alou theilou in  Protected Area permit (PAP) a neih teitei uh poimawh sek chih ahi hi.

Headlines:

Bijang, Hmarveng leh Tuibuong area azia om tuan mahmah

Lamka, Aug-11: Bijang Women Welfare Assn(BWWA), Hmarveng Welfare Defence Committee a Women Wing pawl leh Tuibuong Women Welfare Assn  te’n  kha bangzah hiam paisa in khawpi sunga khamtheih(drugs) ziaka siatna huaisetak omte doudalin, amau area chiat ah khamtheih hihte banah  azuakte leh a  pawlutte  dalna in duty gige uh a, huaiziakin Tuibuong, Hmarveng leh Bijang area ah khamtheih ziaka buaina omte kiam hiaihiai in, tuni chiangin khawsung in sianthoulam nawt hi’n gen uhi. 

Tuni sunnung in Hmarveng Welfare Defence Committee nuaia women’s wing pawl a duty te’n kal paisa sunga khamtheih a matkhiak uh Heroin powder(No. 4) first class tun khat , zu ahunkhop leh dendrite haltum uhi.  Tuibuong Women Welfare Assn te’n Aug 8, 2013 akipan huai area ah khamtheih zuak om theilou dia thupuan a bawl uh bawhzui zel uh a,zan nitak dak 7.30 in nupi khat apan zu(local wine) litre 29 mankhia uhi.Nu Alhoinu Mate, Chairperson, Tuibuong Women Welfare Assn in tuni’n  agenna ah nitak dak 7.00 akipan naupang kuamah pawtkhiak phal hilou a,  KSO tawh pangkhawm in panla touzel uh hi’n gen hi. Nu-le-pa te’n khawtang hoihna dinga panlakna kithuahpih chiat dingin leng ngen a, sun-le-zan a duty gige  uh ahihdan leng mipite theisak hi.

Headlines:

Apu Jain thahna a telte’ laka khat  mankhia

Lamka, Aug-11: Police apan  kizadan in  Aug 8, 2013 zingsang dak 6:30 in 46-Assam Rifles te’n B.Aijalon khua ah HPC(D) President group a cadre  David Demlou Hrangchal @ Paul (29) s/o LC Hmar of Leisen village tulel a Rengkai a om mankhia uhi.  Army te’n amah akipan USA made M-16  rifle 1, magazine 1, atang 6, Gemany made 9mm pistol 1, magazine 1, atang 4 , 7.62 mm local made pistol 1 ban ah AK- 47 magazine 1 leh atang 4 mukhia in Imphal Police ah pekhia uhi. Police thusuak kingah dan in David Demlou Hrangchal ahihleh sum-le-pai demand na leh  sual gamtatna tuamtuam atel hi’n gen uhi. Tedim Road a om LIC building a dukan bawl Bsbulal Jain’ tapa neihsun  Apu Jain(30) apaisa  Oct 26, 2011 nitak dak 7:30 velin   pimang (kidnap) a om in  Oct 29, 2011 zinglam in Sugnu PS apan gamlalou Sangaikot area a Hengken khaw kianga a culvert gei ah  kaplupsa in aluang kimukhia a, huai thiltung ah leng 

David Demlou Hrangchal kigolh hi’n suikhia uh chihthu om hi.CCpur Police te’n David Demlou Hrangchal tunga  case lasawn in CJM/CCpur Court ah dingsak uh a, CJM in August 16, 2013 tan Police custody ah omding in phalsak hi.  Thudang kizadan in  Aug 6, 2013 nitaklam in 46-Assam Rifles pawlin New Bazar a Rajdhani Travels kiang ah sumkhon(extortion) lai HNA cadre 2 a matte uh CJM/CCpur in Aug 16, 2013 tan Police custody a omding in phalsak hi’n kigen  hi.

Headlines:

Pakistan army-te’n BSF jawan 1 kapliam nawn

Jammu, Aug-11: Pakistan army te’n tuni zingkalin hiamkham thukhun (ceasefire) bawhse nawn in gamgi veng a om India sepaihte kap uh a, Border Security Force (BSF) jawan  khat kapliam  uhi. Official thusuakin a gendanin Pakistani army te’n Jammu frontier a forward post a duty lai BSF jawan khat agal apan kapliam  uhi. Kallui a Pakistani army-te’n Indian army 5 a kaplup nung uh gamgi bul sousang mahmah a, India in sepaih hunkhop sawllut beh khin hi’n kigen hi.

Senior BSF officer khat in a genna ah, tuni zingkalin Alfa Machial Border Out Post (BOP) area a international border (IB) bul ah agal a pan sniper zangin Pakistan sepaih te’n hon kap uh chi hi. Huai a liam BSF jawan ahihleh Pawan Kumar  hi a, damdawi inn tut in om pah a, a dinmun bel lauthawng huailou hi’n a enkoltu doctor te’n gen uhi. BSF sepaihte tu in kikhou zou nawnlou phial  a, tuni a thiltung leng Pakistan army te’n sniper zanga IB mun ah a  kap uh nihveina hita chi uhi. Apaisa August 5, 2013 in Pakistan sepaihte’n a gal apan a kapna uah BSF a head constable Ram Niwas Meena of 200th Battalion  in liam hi. 

Huai thiltunna mun   Samba district sunga om Narainpur BoP area hi a,thautang in a awm (chest) akhak ziakin gim mahmah a, tuni tan in New Delhi a AIIMS ah etkol hi a, a dinmun lauthawnghuai hi’n doctor te’n gen uhi. Zanhal nitakin leng Pakistan sepaihte’n gamgi bul a Army te’ post omte ban kap uh a, thautang hawm 7,000 val top ahihbanah mortar tang tanpha leng muhkhiakin om chi uhi. 

Local News:

Dakkal 48 sung Gen Strike puang 

Lamka, Aug-11: Kuki State Demand Committee (KSDC) pawlin Kuki state a nget uh pekin dinga govt nawhna in Aug 13, 2013 zankim (mid-night) akipan dakkal 48 sung Manipur a Kuki mite luahna munteng ah general strike puang uhi. KSDC a Info & Publicity Secretary George Guite apan kizadan in general strike sungin Media leh medical kia khahkol (extempted) hiding a ,General strike in govt establishments, educational institutions, business establishments, vehicular movements leh adangte huamvek ding chi hi. KSDC in Independence Day leng zatlouh ding in puang uh a, govt employee leh student-te leng Aug 15 a Independence Day lopna a tellou din ngen uhi. Guite in Kuki statehood ngetna lawhchinna dingin Kuki mipite’n General strike  support chiat dingin theisak hi.

Traffic stand thak ding kibawl 

Lamka, Aug-11: Environment’s Friend pawlin  Lamka Police station kong Tipaimukh Road- Tedim Road kisuktuahna a Traffic stand  hihsia in athak bawlna nasep pan uh a, sunlai in  gari a tamluatziak in nasem theilou in nitak in semzel uhi. Traffic stand thak ding nasepna  sunzom zel uh a, Mumbai apan vanzat ding hongtun hunhun in zawhsiang pah theih ding hi’n gen uh a, vanzat hongtun leh  Aug 15, 2013 ma in  zawh sawm uhi.

Parade rehearsal omding 

Lamka, Aug-11: Aug 15,2013 in Lamka Public Ground a Independence Day lopna ah school tuamtuam akipan contingent 47 vel parade ah telding uh a, huaite pasal contingent 24 leh numei contingent 23 hiding uhi. Huaite banah NYK/CCpur, ASHA, Job Card holder, Civil Police, ex-Servicemen leh IRB & Band party te leng telding uhi. Parade a telding contingent tengin Aug 12 & 13,2013 zing dak 7:00 in Lamka Public Ground ah Parade Commander ding JK Suan Guite, MPS, Asst Commandant, 1st IRB makaih in Rehearshal nei ding uhi. 

Rev. S Vungminthang in hongkhia

Lamka, Aug-11: Rev. Dr. Kh. Khaizakham,  Evangelical College of  Theology (ECT) a Principal-lui in agelh Paite pau a lehkhiak ‘Tuailai Aw Na Malam En in!’ kichi laibu thak tuni zinglam in G. Mualkawi EBC a  biakna kikhopna ah Rev. S. Vungminthang, General Secy, EBC hongkhia a, ‘tuailaite kuapeuh in simchiat ni’ chi hi. Huai laibu  tulai tawh kituak a khangthakte dinmun leh maban hasotna thute kigelh hi a, N. Zatawn, ex-MLA in a sut  hi’n kigen hi. 

Bus Terminal mun siangthou

Lamka, Aug-11: Pangjawl kianga Bus Terminal leh akim a gam-awng omte ah nidang in Pathianni khawng in nungak-tangval muh ding tam mahleh tuni in kuamah muhding omlou a,  amun thoveng takin om hi. Huaikim a inn neite’n agendan un YPA thupuan om nung kilawmlou a gamtatsawm a vanaih omlou deuh a, huai banghiam tan siatna dalzou hi’n gen uhi. 

Peace Mela en mipi tam deuhdeuh 

Lamka, Aug-11:KSO/CCpur leh Babu Enterprises Meniananda Mela, Assam pangkhawma  a asai uh Tuibuong Peace Ground a Peace Mela Festival omlel a en mipi tam deuhdeuh  hi’n kigen hi. Student-te’n nipi kalkhat sunga suty a neih uh Kiginni leh Pathianni in Mela vanaih zel uh hi’n kigen hi. Mela omna ground a Merry-go-round a om nuam naupang tampen chi uhi. Huai Peace Mela bel Aug 30, 2013 tan zinglam akipan nitak dak 8.00 tan kihong ding hi. Women Welfare te’n nitak in naupang pawtlou dia theihsakna abawl uh toh a kituahkhak ziakin KSO makaite tawh huaithu   genkhawm uh a, nitak chiangin KSO leh amau pawlin Mela omna munah naupangte enkai in thupuan delhzui ding uh hi’n gen uhi.  

Catchment Area Plantation & I-Day Eve 

Lamka, Aug-11: District Admn saina in Aug 14, 2013 zing in Lalpuithluaii Foundation School’s playground ah Chairman ADC/CCpur in Lanva Catchment Area Plantation hongkhe ding hi. Huaizawh in DC/CCpur in Lanva Catchment Area Plantation tawh kisai  thugen  ding hi.Huaini nitaklam dak 5:00 akipan Lamka Public Ground ah Independence Day Eve Celebration om ding a, RAV, Muan Hangzo, Pauginmuan, TT Lal apan lasakna banah Kaihlam Heloo leh STC/BSF te’ akipan  special item tuamtuam lahna om ding hi. Nitak dak 6:30 in Cultural program om ding a, nitak dak 7:00 in Independence Day Theme: Clean & Green CCpur leh fire works in zuiding a, nitak dak 7:30 in DC’s Bungalow ah dinner om ding hi.

Suunna

K. Ginkam (62) h/o  Niangkhanching of Lamphelpat zan zinglam dak 10:30 in heart fail in si a, tuni in Chingmeirong Christian Cemetry ah kivui hi.

Lutgou (80) f/o S. Jamdoulian of LV Lane, New Lamka tuni zinglam dak 10 velin awmna in si a, tuni mah in YPA hanmual New Lamka ah kivui hi. 

Imphal News:

CM bungalow kimlak security khauh 

Imphal, Aug-11:  Chief Minister O. Ibobi Bungalow a gate kiangah  zan nitak dak 6.30 vela bomb puakzak ziakin tuni in Imphal khawpi sungah venbitna(security) naktaka hihkhauh in om hi. Thu kizadan in CM Bungalow kimlak ah Police Commando tamtak duty uh a, mipi pai vialte check zel uhi. Tua banah Greater Imphal area sung mun tamtak ah police check point om behlap hi’n kigen hi. CM bungalow kianga bomb puak ziakin CM bungalow akipan  tumlam panga lamlian leng nitaklam dak 5:00 akipan in khak in om hi. Tua ziakin Imphal khawpi ah traffic jam nasatak in om behlap chih ahi hi.

Trinamool Cong in candidate puang

Imphal, Aug-11: Manipur ah political party tuamtuam in kumthak 2014 a Lok Sabha election om ding tawh kisai in kisakhol panta uh a, huchih lai in Trinamool Congress Party(TCP)   in Lok Sabha election ah Inner Manipur Parliamentary seat leh Outer Manipur Parliamentary seat ah candidate nei tuak ding uh hi’n puang uhi. TCP thusuak in a gendan in Trinamool Congress chief Ms Mamata Banerjee in Outer Manipur Parliamentary constituency a candidate dingin Manipur state TCP President Ms Kim Gangte puang chihthu om a,TCP in party candidate dia a puankhiak masakpen hilai chi’n kigen hi.

Mipite’n  Sit-in-protest nei

Imphal, Aug-11: Horticulture deptt. a sem M. Priyokumar of Yaiskul leh W Ibopishak Singh of Nongmeibung apaisa  Aug. 9, 2013 in Maram akipan Imphal zuanlai Kanglatongbi area ah  meltheihlouh galvantawi te’n a pimang uh khahkhe dia phutna in  tuni in Nongmeibung leh Yaiskul Janmathan khawmi ten amau khua tuak ah  sit in protest nei uhi.  Mi pimangtuten District Officer(Hort)  Jayentakumar Sharma kiangah message tungtawn in Rs. 50 lakhs pe dingin theisak uhi. Ahihziakin   deptt. ten ngaihsaklou uh a, tuaziakin tuni in pimang a omte tenna khua tuak ah sit in protest om a,govt in mi 2te khahkhiak ahih theihna dia panla ding in leng phut uhi. Mi 2te bel Mao Maram a Regional Progeny Orchard asem hi uh a, M. Priyokumar pen Farm Manager hi a, W Ibopishak bel Asst Agri Officer(Hort) hi’n kigen hi. 

Hill Tribal Council vaipua telin om

Imphal, Aug-11: Thutut kingahdan in tumalam deuh in Moreh ah kum 2013-2017 sunga Hill Tribal Council vaipua(Office Bearers) ding telna om a, huai ah President in Jangmang Haokip, Vice President in Ginsei Lhungdim, General Secretary in Mangminlien Singson, Deputy General Secretary in Francis Paoneo Baite, Finance Secretary in Lalremsien Kholum leh Vice Chairman(Judiciary) in H.Mate telching uhi.Huaite banah Executive Member ding 10 a telkhiakna uah Jangsei Haokip, Paomang Baite,S. Haokhopao Haokip, Victor Limthang Touthang, H. Robert Khongsai, Laltinkhup Gangte,Shonthang Mate,Zamkhansuan Chin,Ngamlet Hangmi leh Ts Seiboi Haokip telching in om uhi. 

Club 25 in Blood Donation camp nei 

Imphal, Aug-11 : Club 25 International Manipur, NCC Group HQ  Imphal leh RIMS a deptt  of Immuno Haematology & Blood Transfusion (IHBT) banah RIMS a Blood Bank & Transfusion Service- te pangkhawm in tuni in DM College campus  ah Blood Donation Camp sai uhi. Huai ah Arunachal Pradesh, Mizoram, Nagaland, Meghalaya, Sikkim, Tripura, Manipur akipan NCC cadres  leh NSS cadets tamtak tel uh a, mi 400 velin sisan thawh uhi. 

Border fencing thu ah lungkimlou

Imphal, Aug-11: Manipur leh Myanmar kala border fencing kibawl Aug 8, 2014 in UCM pawlin va enkhia uh a, tuni in UCM President Y. Nabachandra in UCM office ah  press-te kimuhpih a,  Union government in Manipur govt bangmah a ngailou hidan in gen hi. 

Huai fencing bawlna mun ah India mi tamtak Myanmar gam a omkha uh hidan in gen a, Manipur gam lianpi Myanmar a lut ding hi a gen in huai lungkimlouh thu gen hi. Home Ministry in fencing tawh kisai a diktak a kibawl hidan in gen mahleh huai kikhemna maimai hidan in Y. Nabachandra in gen hi. Tua banah border pillar 76 tawh kisai leng etkai poimawh, chi uhi. 

ILP in phattuamna tamtak nei ding : Araba

Imphal, Aug-11 : Senior Advocate Araba in ISTV Programme tungtawn a panel discussion ah a gendan in Manipur ah Inner Line Permit System (ILP) zat hileh state govt in revenue tamtak muding hi’n gen hi. Huai mai hilou in ILP kichi hihna(identity) leh tawndan kepbitna hidan a gen in Arunachal Pradesh, Nagaland leh Mizoram inleng ILP zang uh a, huaiziakin hamphatna tamtak mu uh, chi hi. DM College of Science a Lecturer Brajakumar in, ILP Manipur a zat hileh  a state neite mipite sangin pawlam mi tamzaw ding hidan in gen a, buaina nasatak om ding hi’n gen hi. 

Foreign News:

Sinai tangvum buluh in om nawn

Cairo, Aug-11: Egypt military thusuakin agendanin zan nitak zankhua a Sinai tangvum buluhna ah huihkhua tungtawn in helpawl 7 thah hi ua, midang 7 mat a om in, security force leh target bangzah hiamte khoih thei dinga akilat ziak a helpawl tunga airstrike kibawl ahi, chi hi.  Islamist  helpawl ‘Ansar Beit al-Maqdis’ te’n zanhal a amau pawl mi 5 sihna air strike masapen Israel gamtatna hi’n ngoh ua, Egypt solkar  theihpihna tawh Israel  gamtang  chi  uhi.  Egyptian army  official thusuak gendanin  July 3, 2013 akipan Sinai gamdawk(Peninsula) ah Islamist helpawl 60 vel thah hita ua, Egypt President paihkhiak nungin huai bial ah helpawlte’n panmun khawh, chi  a, govt. douna dinga galvan azat te uh U.S.  khutsuak hi’n leng gen hi.  Egypt leh Israel gamgi Sinai tang  a Islamist helpawlte bukap masakna pen, helpawlte gamtatdan Egypt adia lauhuai theiding ahihman  a operation bawl hiding chihthu puankhiak nunga thiltung hi a, Egypt security official 2 in amin uh taklang utlou in Israel gamtatna ahihdan gen ua, zanhal a thiltung ah rocket launcher hihsiat ahihbanah helpawl te kaplup in om chi uhi.  Zan nitak a Sinai bukapna ah helpawl lam inleng Helicopter kap ua, himahleh hihsiat neilou in, amau pawl kaplup a omte tuni mah in mipi thangpaite’n vui uhi. 

Tuni in US embassy kihong nawn

Lamka, Aug-11:  Al-Qaeda makai nih kihouna zakguk ziakin United States solkar in Middle-east a US embassy omte khaksak in US nautang te leng kihemkhe di’n theisak a, buaina thupilua omlouh ziakin Embassy 19 laka 18 vel  tuni in kihong thak nawn hi. State Department  apan thusuakin agendanin Yemen capital Sanaa a US embassy bel lauhuai thei dinmun ahihman in khak hilai ding a, terrorist attack omthei dinga akilat ziakin Middle East leh Africa  a US embassy omte kikhak mah ahihdan taklang hi.

Obama in security dinmun enkai

Washington, Aug-11: US president Barack Obama in Patriot Act kichi puahphat hidinga gen in NSA nasepdante mipi muhpailet theih dia taklat zel hiding chi a, huai tungtawn a gamsung mipite’n NSA a muanna neithei ding uh chi hi. US spying programme soisel a om mun sim tawh kisai President in ngai poimawh ahihdan kilang hi.  Reform thak in Patriot Act nuaia section 215 tungtawn a National Security Agency te’n warrant omlou a communication channel tuamtuam, social network leh telephone line tel a mipi vantang million  a simte kianga information a kaihkhop ding dalkha ding hi’n thusuakin gen hi.