Manipur Express | May 21, 2016

HEADLINES:
Puducherry a Chief Minister ding kichian nailou!
State 4 ah Chief Minister dingin mi 4 kichiam ding

New Delhi, May-20: BJP leader banah Union Sports Minister Sarbananda Sonowal in Assam Chief Minister dingin May 24, 2016 in Guwahati a Khanapara mun ah kichiam ding a, huai hun ah Prime Minister Narendra Modi, BJP national president Amit Shah leh BJP in govt a bawlna state tenga kipan Chief Minister chih in uap ding uhi. Trinamool Congress a MLA chingthak tengin tuni’n Chief Minister ding in Mamata Banerjee telnawn uh a, Banerjee in tuni nitak in West  West Bengal ah govt thak bawlsak ding in Governor Keshari Nath Tripathi kimuhpih a, kalnawn Sintawpni (May 27,2016) in Kolkata a Republic Day Parade venue ah CM di’n kichiam ding hi. Tamil Nadu leh Kerala Chief Minister dingte leng chiangta hi’n kigen a, Union Territory Puducherry a Chief Minister len ding kikan tuahna om zeklai ziakin chiang naikei mahleh, Congress Party leh DMK kigawm in govt thak bawl ding uhi.
    Tamil Nadu ah AIADMK party te’n Chief Minister lenzom dingin a party Chief uh Ms. Jayalalithaa tel uhi. Tuni’n Chennai a AIADMK headquarters ah AIADMK apan MLA chingthak teng meeting uh a, term 4 akizom a Chief Minister len dingin Jayalalithaa telching uh a, aman govt thak bawl dingin Tamil Nadu Governor Dr Rosaiah muding chihthu om hi.
    Tualou in CPI(M) leadership in Kerala a Chief Minister thakding in Left Democratic Front(LDF) leader Pinarayi Vijayan tel uhi. CPI(M) leader-te’n tuni in Kerala state dinmun hoihtak a a genkhawm nungun Chief Minister dingin Poliburo member Pinarayi Vijayan telkhia uh chihthu kiza hi. CPI (M) State Secretariat te’n Thiruvananthapuram ah national leader Sitaram Yechuri leh Prakash Karatat makaihna kimukhawm uhi. Puducherry ah leng Congress headquarters ah tuni in leader-te kimukhawm in govt thak bawl ding tungtang genkhawm uh a, Chief Minister ding bel genfel nailou uh hi’n thusuak in gen hi.
    Assam a Chief Minister thak ding Sarbananda Sonowal bel Assam a BJP Chief Minister masapen ding ahi hi. Amah All Assam Students’ Union(AASU) a President-lui leng hi a, kum 2011 in Asom Gana Parishad(AGP) nusia in BJP zom hi. A kumnawn 2012 in Assam state a BJP President dia guan hi a, kum 2014 a Lok Sabha election ah amah makaihna in BJP in Assam akipan MP 7 nei hi. Tutung a Assam assembly election ah BJP tawh pangkhawm Asom Gana Parishad (AGP) leh Bodoland People's Front (BPF) te’n leng Chief Minister dingin Sonowal mah deuh uh ahihdan puang uhi.


CBSE nuai a Class 12 Result suahkhiak hiding
New Delhi, May-20: Central Board of Secondary Education (CBSE) in saina nuai ah March 1 akipan April 22, 2016 sung Class X & XII exam a sai uh May 21, 2016(Kiginni) sun dak 12.00 in Class XII final result suak ding hi’n kigen a, telecounselling 2nd phase leng result suah zawh akipan June 4, 2016 tan om ding chihthu om hi. Tutung a CBSE Class XII exam ding a registration kibawl candidate 10,67,900 pha a, kumlui 2015 a candidate 10,40,368 sang in  tamzaw hi. Union Minister of Human Resources Development Smriti Irani in tukha sungin  CBSE nuai a Class X leh XII result puankhiak hiding chi’n tuma zekin ana gen hi.
    Student tamtakin hun paisate tawh kibanglou in tutung in Mathematics subject haksa mahmah ahi chi uh a, question paidan leng chituam mahmah chi uhi. State tuamtuam a board te’n leng May 31, 2016 ma ngei in class XII examination result a puankhiak uh gintak-huai chih ahi hi. HRD  Minister Smriti Irani in a gendanin CBSE Board exams (class 10 & 12) result-te hun paisa bangin result puankhiak hiding a, board result tuamtuamte leng May 31, 2016 ma ngei in hong pawt ding chi hi.


LOCAL NEWS:
SDO/BDO Singngat, JPO leh  Vision 2020-te kihou
Lamka, May-20: ZYA Singngat Unit office ah tuni zinglam in SDO/BDO Singngat, JPO Singngat leh Singngat Vision 2020 Implementing Committee te’n kihouna nei uhi. Xavier Nengkhanlam, Chairman, Singngat Vision 2020 in SDO/BDO Singngat leh staff te’n Singngat khua  a nasepnawn theihna din tamveitak panlak ahihdan gen hi. Meeting ah SDO/BDO Singngat leh a staff-te banah JPO Singngat, Singngat Vision 2020 Implementing Committee te’n kilemna bawl uhi. Kilemnate 1. SDO/BDO office, Lamka a vanzat omteng May 30, 2016 tan in Singngat SDO/BDO office tutding. 2. SDO/BDO leh staff te’n June 1, 2016 apan Singngat ah regular taka office kaiding chih ahi hi. Meeting zawh in SDO/BDO Singngat office thak leng enkhia uhi. DC/CCpur in tuni’n thusuah bawl a, SDO/BDO Singngat office staff te’n akintheilam a Singngat khua pansan a nasem ding, office furniture poimawh teng SDO/BDO Singngat in kaikhawm a, abeizah bills submit ding chih ahi.


Employment exchange lun mahmah
Lamka, May-20: State govt in medical leh police deptt a semding tamtak laksawm a, huaiziakin Dist HQ tenga employment exchange-te lun mahmah hi. Lamka a employment Exchange ah tuni’n registration bawl leh renewal bawlnuam tam mahmah a, huchikal ah registration adin sum poimawh hidan in a theilou mi tamtak khemhai om uh a, khenkhat in registration form  xerox copy khat ah Rs. 50 a zuakin sum dawnna in zang uhi. Applicant te’n lamdangsa in thil omdan Asst. Director kiang ah dong uh a, form hawmkhiak leng bangtan hiam khawl hi. Asst. Director in a gendan in hun bangtan hiam akipan deptt in registration form issue lou in office staff te’n A4 size paper zang in form bawl uh a, form bawlna dia sen-le-pan omte muhkikna din sum bangzah hiam ladi’n theisak mahleh, tamtak lakding in bel phalsaklou hi’n gen a, form 1 zel Rs. 50 a zuak om ahihdan applicant-te’n a gen ua pan Asst Director in theikhia hi. Hun bangtan hiam kihou nungin Rs. 30 a zuak di’n Asst. Director in thutanna bawl  hi. Tuni’n fresher registration form 250 vel hawmkhia uh a, renewal 120 vel bawlzou uh hi’n staff te’n gen uhi. Application form lasate’n May 28, 2016 in Employment exchange ah submit thei ding uh a, staff kidaihlouh ziakin  May 28, 2016 tan registration bawllouh phot hidi’n Asst. Director in gen hi.


DDMA te’n genkhawm
Lamka, May-20: DC/CCpur makaih in tuni sunnung in DC office ah Dist. Disaster Management Authority te’n meeting nei uh a, concerned SDO/BDO te’n relief material ahawmkhiat-te uh report pia uhi. SDO/BDO-te report dungzui in huihpi, vuahpi, gialpi’ in inn ahihsiat 929-te kiang ah panpihna hawmkhia uh a, maban ah relief material piak nailouh inn 70-80 kikal-te SDO/BDO te’n inn neitute’ kiang ah personal bank account tungtawna panpihna piakding in genkhawm uhi.


ATML pawlin kipahthu gen
Lamka, May-20: All Tribal Movement of Lamka (ATML) pawlin tuni’n Lamka khawpi sung ah Salpha-te’zahna flag vom vuak uh a, flag leisak, kithuahpih, tha-le-zung seng a kithuahpihte tung ah kipahthu gen uh a, maban ahleng kuapeuh in kithuahpih touzel ding in ngen uhi.


Anti-Corruption Rally om ding
Lamka, May-20: Tuailai 1434 Pro Core Committee saina in May 21,2016  zinglam in Lamka ah Anti-Corruption Rally om ding hi. Rally pai dingte zinglam dak 10:30 in New Lamka a Gospel Centenary Hall ah kingak ding uh a, huai apan Tedim road zui in DC’ office tan rally paiding uh a,  paikik lam in YPA GHQ Hiangtam Lamka ah rally khakna program om ding hi. Rally ah diktat dinga kilamthak lunggulh a suai ana kaisate ban ah suaikai khalou himahleh diklou tak a vaihawmna deihloute leng telding in Rally saite’n chial uhi.
    Tuailai 1434Pro a core committee te’n zan leh tuni in Dist Hospital leh office tuamtuam ah anti-corruption poster  takkhia  uhi. SSPP  YPA Lamka leh New Lamka te’n anti-corruption rally support puangin  unit tuamtuam apan member tamtheilam telding in ngen uhi.


Bolero in Truck khawllai phu: mi 2 liam
Lamka, May-20: Tuni nitak dak 7:00 velin Hmuia Veng a YMA office opp. ah Bolero (MN02A/2055) khat in electric khuam ding pua a lamlian kianga khawl Public Carrier (NL 01A/8103) phukha a, Bolero atuang Sokhojang @Sojang Haokip (57) s/o of (late) Jamkhosei S. Kananveng leh azi Heshi (45) ban ah Manneihching of New Lamka liam uhi. Sokhojang leh azi  a tal uleh a bil uh liamtuak a,doctor te’n Heshi pen Imphal ah referred uhi. Gari hektu Sojang in a gendan in New Bazaar apan a lawm uh Mandeihching of New Lamka khaksawm in a innlam uh zotpih lai ama ua a tai gari light in a salhnak luak ziaka lampi mutheilou in gari khawllai phukha  hi’n gen a, bolero ahihleh ama amah hi’n gen hi. Bolero a glass teng sia a, amailam feet  3 dingvel Truck nuai ah lut hi. Lam kianga khawl truck ahihleh Songtal khua zuan a paisawm hi a, gari neitu ahihleh Thangchinpau of Sinzawl hi’n kigen hi. Thangpu Tonsing, SI makaih in CCpur Police te’n thiltunna mun delh uh a, Bolero la in Police station ah kem uhi.


YLS te’n Awareness Walk nei
Lamka, May-20: Zenhang Lamka a Young Learners’ School(YLS)  a Eco Club te’n khawpi sung kepsiangthou ngimna in tuni’n khawpi sungah awareness walk nei uh a, mun tuamtuam ah dustbin koih uhi. Huai ah L. Mangkhogin Haokip, IPS, SP/CCpur Chief Guest a pangin school campus ah zinglam dak 9:30 in flag-off hi. Aman agenna ah sianthouna kichi mimal akipan ahihdan mipi’ theihsakna dia awareness walk a sai uh kipahpih ahihdan gen a,  kuapeuh in sianthouna poimawh ahihdan theih poimawhdan gen hi.  Awareness  walk ah teaching staff  leh Class IX leh Class X  kigawm  mi 350 val tel uh a, Rengkai Road akipsn Police Station kong aTedim Road zui in IB Road ah lut tou ua, Tipaimukh Road man uhi. Tipaimukh road zui in Police Station kong ah Rengkai road  zui  in school ah zou uhi. YLS  adi'n tukum 25 (silver jubilee) ahihtawh kiton in activities tuamtuam nei uh a, neizom lai ding uhi. Silver Jubilee ahihleh Oct 7, 2016 in school ah lopsawm uhi.


Lelte Award ngah kipahpih
Lamka, May-20: Ginlian Hangzo of Mata village in Lelte Award 2016  (25-Silver Jubilee) hawmkhiak hun a Chibil Award (Paite) a ngah ziakin N. Mangpu, 58-A/C MLA nominee leh a innkuante’n kipahpih in New Lamka a tenna inn uah an nekpih uhi. Nominee in agenna ah Ginlian Hangzou award lak kipahpih ahih latsakna a bawl hi a, maban ah lalam ah naksem a pan alak ding deihsakthu gen hi.


Free Medical camp a di’n Rs. 1.60 lakh thoh
Lamka, May-20:YVA Gen HQ leh YVA Imphal Joint HQ pangkhawm in tunung sawtlou in CCpur Dist. sung singtang lam a khua khenkhat ah free medical camp sai sawm uhi. Huai tawh kiton in S. Minlianthang Vaiphei, IAS Director Tribal Affairs Hills & SC and Managing director MTDC, Govt of Manipur inleng ngai ppoimawh in ama quota akipat  Rs. 1,60,000 (one lakh sixty thousand) YVA Imphal Jt HQ  makaite-te khutah pia chihthu kiza hi.


Mi 125 in NFSA ration card pekik
Lamka, May-20: Tunitan in mi 125 te’n DC office a Food & Civil Supply Deptt. ah NFSA ration card pekik (surrender) uhi. NFSA ration card pekikte- Zenhang Lamka ah mi 1; Hebron Veng, New  Lamka ah 53, Bungmual ah 31, Vengnuam, New Lamka ah 8, Hill town ah 3, Hiangtam Lamka ah 9, Go Cin Khup Veng ah 3, Lailam Veng ah 1, College Veng, New Lamka ah 6, Gangpimual ah 3, Dorcas Veng, New Lamka ah 4, Dutezol khua ah 1, Salemveng ah 1, Headquarter veng ah 1 hi uhi.


Post office te’n mail thonkhe theilou
Lamka, May-20: Imphal lam ah JCILP te’n bandh abawlziak un Tuibuong a Post office staff te’n mail (speed post, ordinary letter, registered letter etc.) thonkhe theilou uh a, local level ah bel normal transaction bawltheih uhi. May 21, 2016 pen ‘Budha Jayanti/Jalakeli’ ziakin National Holiday hia, Post office kikhak ding hi.


Phalna omlou in inn hunkhop kibawl
Lamka, May-20: SP office leh ADC/CCpur office kikal a lampi gei ah phalna tellou in govt gam ah mi tamtakte’n tenna ding inn leh dukan/dawr hunkhop bawl uhi. Huai thu DC apan kizadan in kuamah in DC kiang ah govt. gam ah inn, dukan bawlna dia phalna ngen omlou a, complain tamtak omziak in SDO/BDO, CCpur in spot enquiry bawl dia theisak hi’n DC/CCpur in gen hi.


NYC 2016-2017 ading interview omding
Lamka, May-20: DC/CCpur & Chairman Dist. Advisory Committee on Youth Program/CCpur office chamber ah May 27, 2016 zinglam dak 11:00 in Nehru Yuva Kendra/CCpur nuai a National Youth Corps (NYC) 2016-2017 asemding interview omding hi. Huai hun ah candidate teng telchiat ding in H. Doungel, Dist. Youth  Co-ordinator, NYK/CCpur in theisak hi.


Hawkguam hoihlouh ziakin  lampi ah hawktui luang
Lamka, May-20: Chief Judicial Magistrate office main gate sakdeuh a hawkguam (nullah) hoihlouh ziak in vuahzuk hunteng in lampi lai ah hawktui luang gige a, khe apai leh gari ataituahte ading in nuamlou petmah hi. Huai mun taka a hawktui luan nawnlouhna ding in hawkguam hoihtak bawl banah munniam ahihziak in hawktui luankhiatna ding culvert hoihtak bawl poimawh hi’n kigen hi.


SUUNNA:
S. Ginlianmang (43) s/o S. Khamzagin of Bungmual, tuzing dak 4:00 velin RIMS ah sungna in si a, nitaklam in Bungmual hanmual ah kivui hi. Ama’n Langol, Imphal pansan in Revenue Deptt. ah Process Server sem hi.
Khaigin (50) of Boljol village, tuni nitaklam dak 4:30 velin cancer in si a, May 21, 2016 in Boljol hanmual ah kivui ding hi. Amah hunsawttak Children Home, Bible Hill, Rengkai ah Home Father in pangkha hi.


IMPHAL NEWS:
Candidate-te lakah mi 2 kizukkik
Imphal, May-20: IMC election ding tawh kisai in tuni a withdrawal hunbei tan in Independent councilor candidate khat leh Ward development member candidate 1 kizukkik uhi. Amaute kizukkik ziakin IMC councilor tuh ding mi 86 om uh a, ward development member dinga candidate leng mi 128  om uhi. Councilor candidate teng  seat 27 kituh ding uh a, ward development member candidate  128 te’n seat 52 tuh ding uhi. Ward chih ah Councilor Member 2 chiat om hi’n leng kigen hi. Tutung in IMC election adi’n Imphal East leh West district apan Congress leh BJP in candidate 26  tuak nei uh a, CPI apan candidate 5, LJP apan 3 banah JDU apan mi 1 om in, Independent candidate 25  om uhi. June 2, 2016 in election vote khiak hiding a, re-poll poimawhna munte June 4, 2016 in om ding a, June 6, 2016 in vote simna kipan ding hi.


Anti-Terrorism Day zat hiding
Imphal, May-20: Zingchiang  in Manipur Government intekna in 1stBn. Manipur Rifles Banquet Hall, Imphal  ah Anti-Terrorism Day zatna omding hi. Manipur Government nuaia department/office chih inleng hiai hun zang ding in theihsak hi uhi. India gamsung ah May 21, 2016 pen Anti-Terrorism Day a zat hi a, May 21, 1991 in terrorist attack ah Prime Minister lui Rajiv Gandhi thah a om theihgigena hi’n DIPR apan thusuakin taklang hi. 


HAC makaihna nuai ah meeting om
Imphal, May-20: Dr. Chaltonlian Amo, Chairman, HAC tenna inn Lamphel ah tuni zinglam dak 10:00 velin  ILPS te’n Manipur ah ILP zat ding phutna tawh kisai in meeting nei uh a, huai ah bill 3 tawh kisai a Manipur dinmun gen khawm uh a, bang thupukna la uh hiam chih puan khiak hilou hi’n leng gen uhi.


KSO Gen HQ in suunthu puang
Imphal, May-20: KSO General Headquarters in Capt. (Retd.) Chonkhothang Misao suunthu puang uh a, adamlai a asepkhiakte KSO khangthu ah mang nawnlou ding chi in, anutsiat sungkuante thuakpihthu taklang uhi. Capt. (Retd.) Chonkhothang Misao  ahihleh atenna Kangpokpi, Sadar Hills ah tuni’n si a, KSO Shillong a Founder President ahihbanah KSO ading in hahtakin pang chi uhi. KSO thusuakin agenzelna ah kimawl lunglutmi ahihdungzui in Manipur High School Football team ah leng kuan a,  Javelin leh Discuss leng siam hi’n taklang uhi. Student activist, sport person, military man, policeman leh bureaucrat hi’n leng KSO GHQ in suunthu puangkhawm in taklang uhi.


Police tawh kinawk tuahna ah 4 liam
Imphal, May-20: JCILPS te’n Manipur a ILP zat ding phutna in zan apan dakkal 38 sung Manipur pumpi ah bandh puang uh a, Imphal area ah hindan ngeina nawngkai hi. Bandh supporter te’n phaizang bial mun tuamtuam ah lampi khaktan in police leh Central security force-te leng dal uh hi’n kigen hi. Keishampat junction ah bandh supporter leh police-te ki nawk tuah uh a, huai ah police te’n tear gas a kap na uah nupi 3 telin in mi 4 liam a, RIMS hospital puak tung nung a mi 2-te first aid zawh a khah khiak hi uhi. Bandh ziak in dawr, dukan, siamsinna inn banah govt. office teng kikhak a, All Manipur Working Journalists’ Union (AMWJU) nuai a reporter te’n Imphal area a jail dinmun a etkhiak sawm hun uah bandh supporter-te ziak a nawngkaina tuamtuam tuak uh hi’n leng kigen hi.


Tualthattu matkhiak ding phutna in Police Station luh sawm
Imphal, May-20: Imphal West district a Mayang Imphal Police Station in a huam khak Uchiwa Lamhang ah tuni’n nupi 1 thahna tawh kisai a tual thattu matkhiakna dia panla ding in JAC phuhkhiak hi a, mipi kipun khawm te’n Police station luh sawm uhi. Akigendan in Wahengbam Ichal Devi (20)ahihleh gawl ah khau ki khih sa a sisa a muhkhiak hi a, a taksa tung ah liamna ma tungtawn a sualluih nung a thah dia gintak hi’n gen uhi. Thiltung tawh kisai suzuina dia Police lamte nawngkaina mawhpaihna in mipi kipun khawm te’n Mayang Imphal Police Station manawh uh a, huai hun ah JAC makai leh Police-te ki hou hun in mipi te’n police station luh sawm uh a, mipi hawl khiakna dia tear gas ziak a mi hunkhop liam zek uhi.


TUNI THUPI:
“Na sianthou a na dik leh, nang ziakin tu in ka khanglou  dia, huchi’n  na diktatna omna a lawhching sak ding hi.”  - Job 8:6


EDITORIAL:
Mahni kidiktatsak!
 Pathian’ ma a mahni kiselphou
 Diktatna (righteousness) kichi poimawh mahmah a, maban ah leng  poimawhtou denlai ding hi. Christian  ihih dungzui un Christianity sahkhua i zuih tungtawn in diktatna in malam suan zel laiding hi’n kilang hi. Ahi a, Pathian’ ma ah ei-le-ei i kisel phou khadiam chihbang leng ngaihdan sautak omthei  hi. I gentaksa bang  in kamzol(dang nal) thu hiam,zuaugen siam ziak hiam ahihkeileh i hihna tuamtuam suanga advantage la in  gam-le-nam puah ut dan a kigen ihih khak leh tua in i bial mipite khemzou nawn hetlou maithei hi.
    Mahni kidiktatsak kichi khawvel ah om tham a, mite’n huchibang mite  gal-et maimah uh ahihdan theih in om  hi. Etsakna dingin, CCpur district ah singtangmite adia political institution sangpen kichi MDC 20 val om a, tuni dong khawpi sung puah hilou a, singtangbial leng angei mahin om hi. Vuah azuk tam zek lelah lampi lai ah tuiluang mai, nullah gina omlou, MDC-te’ adia fund kiching pailou mah ahi diam? Tua ziakin khawpi sianthouna dingin a kisaipih MDC te’n a etkai kin uh kisam hi. A chang in huihpi nungin  gialpi kia a, zinling tanpha hong om hi. Hutkhiakna nasep leh panpihna nasepna dingin i muan mahmah uh MDC-te bang dinmun ahi ua le?
    Development fund telin fund tuamtuam delh maimai dingin i MDC te uh i phal kei ua, delh ding un leng i gingta kholkei hi. Ana delh zenzen bang a om ua leleng diktatna mah a  kalhsuanpih uh mipite’ kinepna ahi hi. Laisiangthou ah mihingte’ damkum kum 70 ahi a, a dangzaw chih ahi hi… Kum 90 tanpha dam leng i om kha thei a, Pathian’ hon pidan in ngaihsut theih hi. Diktatna tawh kisai a damsawt leng om thei tham ahi a, atawp chiang in Pathian ma a kiselphouna ahikha diam chih bang ngaihdan liantak om sek hi.
    Diktatna kichi thu lianpi ahi a, pawng nelhsiah ding hi laizang lou hi. Kuaman azak dah hetlouh dingin gen lehang Thukhunlui zui unau 7th Day-te bangin ngaikhawk mahmah ding un gintak huai hi. Israel-te’ hun ahihkeileh Mosi hunlai a thiltung tuamtuamte akipan ngentel tak in suizui a poimawh kha ding hi. Thukhunlui a mi diktat-te soisel vual hilou uh a, amaute thukhunthak hun ah ‘Pharisai’ chih in om mahle uleng a paidan uleh a diktatna uh thupi hi.
    Politics lam  gen lehang, MP, MLA/Minister ahihkeileh  MDC-te tanpha a mawh ua, gensau louhin Village Authority member-te tanpha in leng mawh akhu ding uh chih chiangsa ahi. Bangziakin National Security Food Act(NFSA) tawh kisai  mi tamtakin a ration card uh a concern official-te kianga sumbit uhiam chih ngaihsut tham ching hi. NFSA tungtawn a a card uh surrender ngam uh ahihleh Job card/ NREGS tungtawn a lawh alak sekte uleng surrender le uh eive le chih ngaihdan leng  piangthei  hi.
    Diktatna kichi a poimawh petmah a, bangchibang a diktat ding ihiam chih thu in mipite lungphawng mahmah hi. MP, MLA/ Minister leh MDC te kia mawhsa ding maw ahihkei leh mimal ki-en ding maw chih ahi. Mahni ki-en loupi a diktatna gen phanphan, eilah diktat hetlou chih khawng i om khak leh Pathian in i lu zang ah mei-am hon denkhum hun om  dingin gintak-huai hi. Ngaihtuahna tuam nei kawm a diktatna tangkoupih  i hihkhak ngeingei leh a thuaktu ding ei mah ihikha ding a, thil lauhuai mahmah i tungah hong tungthei ahihdan mangngilh hetlouh deihhuai hi.
    Bangchibang in diktatna, ginomna leh muanhuaina chih tawh kisai tangkoupih mah le hang leng, a tangkoupihte a buaihuaipen i hihkhak ding uh lauhuai  a, Pathian ma i din  hun chiang in ‘Pa Aw, kei zaw diktat veng aw…’ i chingam taktak ding un gintak haksa hi.Leitung a i omlai un i kam leh lei in ut teng gen mahleh a taktak in zaw van mun thupi kongkhak a lut hun chiang in ‘Pa aw, ken zaw hihkhial kha mah veng aw… mimal’ hamphatna leh lampi diklou ka na tawnkha’ i chih mai uh a ngai diam; huai in hon diip kawsak maithei hi. Bangteng hileh kuapeuhin diktatna lampi zuiding in i kideihsak chiat hi. Himahleh, i biak Pathian’ ma ah mahni kiselphou i hihkhak ding lauhuai  mahmah hi.


SPORTS NEWS:
AIBA World Women’s Boxing Championships
MC Mary Kom leh Sarita-te vualzou in Round 2na lut uh
Kazakhstan khawpi Astana mun a AIBA World Women’s Boxing Championships om ah zan (May 19) in India apan Mary Kom leh L. Sarita Devi-te'n akibeihpih uh zou tuak in 2nd Round lut uhi. Mary Kom in Sweden mi Juliana Soderstrom 3-0 in zou a, huchibang mahin Sarita in Belarus mi Ala Yarshevich zou hi. Tuni in 2nd round om ding a, huai ah Mary Kom in Germany mi Azize Nimani kibeihpih ding a, Sarita in Mexico mi Victoria Torres kibeihpih ding hi. Hiai championship draw bawlna ah Mary Kom leh Sarita in group haksa mahmah tangkha tuak uhi. Mary Kom kibeihpih dingte seedings a om ngen hidan un kigen hi. Hiai World Women Boxing Championships bel numei boxers 51kg, 60kg leh 75kg te a ding a Rio Olympics adia qualifying tawpna hi a, mi 12 in qualify theihna chance nei uhi. 51kg ah boxer 49 om uh a, 60kg ah 47 leh 75kg ah 34 om uh a, tua ziakin aniampen in semi-final tan tun ngai dingin kilang hi. Mary Kom bel 51kg ah kihel ding a, L. Sarita Devi ahihleh 60kg ah kihel in 75kg ah Pooja Rani kihel ding hi. Mary Kom in hiai championships ah 5 vei mahmah champion ana la khinta a, tutung in champion nawn leh 6veina ding hita ding hi.