MANIPUR EXPRESS | JULY 10, 2016

HEADLINES:
JAC-AATB makaih in Public Consultative meeting om
Lamka, July-9: Joint Action Committee against Anti-Tribal Bills (JAC-AATB) makaih in Hiangtam Lamka a YPA GHQ hall ah tuni zinglam in maban pai dingdan genkhawmna ‘Public consultative meeting' om hi. Huai hun ah makai tuamtuam’ banah Manipur singtangmite’maban ding awlmawhna nei mi tamtak tel uh a, maban paidingdan ngaihdan tuamtuam gen uhi. Hiai tawh kisai a Information & Publicity Department, JAC Against Anti-Tribal Bills te’n thusuah a bawlna uah, YPA GHQ hall, Hiangtam Lamka ah Public consultation meeting om a, huai ah President of India in “the Protection of Manipur People Bill, 2015” pen assent piak ding nawlkhin mahleh Bill dang 2- the Manipur Land Revenue and Land Reforms (7th Amendment) Bill, 2015” leh “the Manipur Shops and Establishment

(2nd Amendment) Bill, 2015”te expert te’n enlel uh a, huaibanah, anti-tribal bills tawh veng nailou banah tribal martyrs 9-te vui hinailou kal a Manipur govt in bill thak introduce a sawm pen tribal martyr-te leh tribal mipi muhsitna hi’n taklang uh a, tua ziakin maban ah JAC mah in tribalte gam, rights leh identity kepbitna dia movement makaih lai di’n lemsa uhi. Consultative meeting in tribalte gam, rights leh identity kepbitna dia panla JAC against Anti-Tribal Bills, Manipur Tribals’ Forum, Delhi leh Outer Manipur Tribals’ Forum-te tungah kipahna chiamteh uh a, tribalte adia pomtheih tan a political autonomy/solution muhma mipi’n amaute nungthuap ding hi’n leng taklang uhi. Atung a thupukna-te JAC against Anti-Tribal Bills leh Outer Manipur Tribals Forum te’n hoihtak a enzui ding in  lemsa uh hi’n thusuak in taklang hi. 
    June 21, 2016 a Tribal Youth Council, Manipur leh All Tribal Lawyers’ Forum, Manipur te’n Tribal Research Institute a thupukna bawlte uh leng Public consultation meeting in lemsakpih (endorse) uhi. Huaite ahihleh (a) June 20 pen Hill Peoples Day a puan (declare) ding (b) Assembly elections 2017 a ki-candidate-te lak a “provisions of article 371C”, “the Manipur Legislative Assembly (Hill Areas Committee) order 1972”, “the  Rules of Procedure and Conduct of Business in Manipur Legislative Assembly” and “the Manipur (Hill Areas) District Council Act, 1971” chihte tawh kisai thei mi (conversant) leh tribal mipi deihdan a nasem dingte kia support ding (c) ADC te’n thuneihna bukim a tawi theihna ding ua panlak ding leh ADC-te suk hat ahihtheihna ding a banah tribalte vengbit ahihtheihna dia Manipur Hill District-teng a Sixth Schedule zat ahihna dia pantheihna teng a pang ding (d) Tribal mipi adia economic development omtheihna dia panlak ding (e) Tribal apex body te’n MLA-te laka Anti-tribal a apuante maban Assembly elections 2017 a tribal te’n vote louh ding chihte hi’n thusuak in taklang uhi. Huaibanah, Christian Goodwill Council te’n June 18, 2016 a “Appeal to Churches” a suah uh tawh kisai meeting paikhawmte’n gupthu puang uh hi’n taklang hi.


India leh South Africa in tup kibang nei uh : Modi
PM in South Africa makai tuamtuam kimuhpih
New Delhi, July-9: Prime Minister Narendra Modi in tuni’n South Africa a Phoenix Settlement veh in Mahatma Gandhi ngainatute leh makai tuamtuam kimuhpih a, South Africa leh India in tup kibang nei in haksatna kibang thuak khawm uh chi hi. Prime Minister in  Durban city apan km 24 vela gamla Inanda (KwaZulu-Natal) a Phoenix Settlement avehkhit in Mahatma Gandhi tenna lui ‘Sarvodaya’ vapha in huaimun ah singnou suan hi.  
    Phoenix ahihleh 1904 a Mahatma Gandhi in political career apatna dinga sakkholhna dia azat hi a, tuamun pansan in ‘Indian Opinion’ newspaper pankhia in, asungkuante tawh clinic, school leh inn bawl in khawsa hi. Sarvodaya bel ‘well-being for all’chihna ahi hi.
    Prime Minister Narendra Modi in tuni a Gandhi khawsakna mun aveh hunah, India adinga lawm hoihtak South Africa hi’n gen a, Durban a Indian Community-te’n Gandhi sulnung zui a kuhkalna tawh sep-le-bawl tamtak aneihte uh kipahthu genkawm in thupisa ahihdan gen hi. Durban ah  Mahatma Gandhi tunu Ela Gandhi in Modi vaitun masa a, huai hunah Indian Community te’n laam tuamtuam tawh vaidawnna nei in, singnou tamkhop suan uhi. Prime Minister in Pietermaritzburg ah Mahatma Gandhi exhibition hongkhia hi.
    Prime Minister in Pietermaritzburg a athugenna ah, huaimun apan Gandhi pen Mahatma hongsuak hi’n gen a, India leh South Africa in kumzabi tamtak apan kizopna hoihtak nei uh chi hi. Pietermaritzburg railway station ah Modi in makai tuamtuam leng kimuhpih hi. Pietermaritzburg  railway station ahihleh 1893 a Mahatma Gandhi in vun (skin) tuam aneih ziaka Rail station a nawhkhiak a a omna hi’n kigen hi. Prime Minister in Tanzania a zot ding kuan in Durban Mayor in Durban city hall ah Modi vaidawn nei hi’n kigen hi.
    Prime Minister in Africa gam 4 avehna sunzom in gam 3na ding Tanzania capital tunitaklam in zuan a, zingchiang in Tanzania capital Dar-es-Salaam  ah President John Magufuli tawh kilemna tuamtuam bawl ding uhi. Tuamun ah ‘Solar Mamas’ chih a om Solar tungtawn a meivak bawlkhia numeite leng kimuhpih ding a, Indian community mi 50,000 val tawh leng kithuahkhawm ding hi. Nitaklam in Kenya capital Nairobi zuan ding a, Indian diaspora rally uap ding hi’n kigen hi.


LOCAL NEWS:
Activa in naupang phuliam in taisan
Lamka, July-9: Tuibuong/Tuibong a Sumkong Kaimun kong ah tuni sunnung dak 3:00 velin Activa ngou a kipua pasal 2 in Emi Nengmuanching (6) d/o Lalrochhan Hmar of  Zion Veng, Tuibuong phukha in taisan uh a, phatuamngaite’n Dist Hospital tun mahle uh a dinmun lauthawnghuai sak ziakin doctor te’n Imphal ah refer uhi. Emi Nengmuanching ahihleh anu Tuibuong Bazar ah dawr bawl kianga hawhsawm lamlian (Tedim Road) kan dia kisai Activa a kipua pasal 2 taitoute’n phu in taisuak uh a, naupang ahihleh kipei hialin lamsak lam a kidawh Tata Winger nuai ah kipeilut hi’n kiang nai a omte’n gen uhi. Emi bel Salva English School a Class A sinlel hi a, a taklam ban leh kheguh kitan in, alu aliam ban ah abil ah sisan pawt a, a dinmun genchet haksa hi’n doctor in gen hi. Thiltung tawh kisai in kiangnai a omte’n mi phutu leh gari number thei ahihman un Tuibuang Area Youth Club in dakkal 24 sung a kipekhe dingin theihsakna bawl uhi.


EM in singnou suan nang hongkhia
Lamka, July- 9: G. Thangkhosuanmung, EM, ADC/CCpur & Chief of Hiangtam Lamka leh Hiangtam Nuihchiam WhatsApp groupte’ pangkhawm in Hiangtam Lamka huapsung a Lampi sik tuak ah tuni zinglam dak 10:00 in singnou suan uh a, G. Thangkhosuanmung, in singnou suan patna in singnou suan hi. Aman agenna ah bouruak bawlhoih nang leh nopnang in singnou atamthei pen suan poimawh hi’n gen hi. Hiangtam Nuihchiam WhatsApp group te’n gari ah singnou leh a umnang (fencing) ding pua in singnou suansa-te fencing bawl ngal uh a, singnou 300 vel suanzou uh hi’n kigen hi.


Pasal 1 amah leh mah kikaplum
Lamka, July-9: Police apan kizadan in, tuni zinglam dak 9:00 vel in  Md. Warish Khan @ Atem (15) s/o Md. Sikandar Khan of Kwakta Khuman Awang Leikai, Ward No. 4 amah single barrel in kikap a, innkuante’n Dist Hospital zuan mahle uh lamkal ah si hi. Warish Khan pianna pa Md. Sikandar Khan in a gendan in, a tapa in ahihleh lungsim lam buaina nei hi’n gen a, licence thau (single barrel) in amah leh mah kikap hi’n gen hi. Thiltung tawh kisai Moirang Police theisak uh a, Police te’n a case la in sunnung dak 4:00 vel in RIMS hospital a post mortem bawl di’n pua uhi. Thiltung tawh kisai Moirang Police te’n FIR register uhi.


Police custody ah July 11 tan omding
Lamka, July-9: Police apan kizadan in July 5, 2016 sunnung dak 2:30 velin Pauminlian Hangluah (19) s/o H. Ginlal of  New Zouveng in K. Lhangjol khawmi numei naupang kum 14 vel school kaitawp innlam zuanlai Khawpuibung leh K. Lhangjol khua kikal ah thagum in sualluih (rape) leh thahsawm  a, himahleh  K. Lhangjol khawmi 2 te’n tuakkha in numei naupang hunkhia uhi. Thiltung tawh kisai zan (July 8, 2015) sunnung dak 12:30 velin Police Station ah report bawl hi a, Police te’n Pauminlian Hangluah mankhia uhi. Tuni’n Police te’n CJM court ah Pauminlian pawlkhia uh a, court in July 11, 2016 tan Police custody ah omding in phalsak a, Police te’n FIR No.l 3 (7) 2016 WPS-CCP U/s 307/354/511 IPC registered uhi.


Children Cultural Meet zat in om
Lamka, July-9: New Life Foundation (NLF) in tuni zinglam dak 11:30 in IB Road a Synod hall ah  “Naupangte i gou uh ahi” chih thupi zangin Children Cultural Meet 2016 nei uh a, huai ah Chief Guest in Nicky Thanga, Convenor, MACR-CCpur Chapter  pang hi. L. Pishak Singh, General Secy, NLF in naupangte nu-le-pate adia gou manpha pen ahih dungzui un hoihtak a chiltou a kepbit  in gamsung ah lemna, muanna leh khantouhna om ding chi hi. Chief Guest in naupangte’n lai hoihtak a sim a, tunung chianga gam leh nam adia zattak leh phatuam hih sawm a panla ding in hasuan hi. Prog. hun sung in Chacha Nehru Balbhawan, New Mata, Children Department, Tuibuang Block leh Mercy Society te’n cultural dance leh special item tuamtuam lahna nei uhi.


HHFC saina in Career Guidance om
Lamka, July-9: The Helping Hand Free Coaching saina in tuni’n Mualkoi a Covenant Children’s Home Auditorium ah Class VIII - X student-te a dingin Career Guidance om a, huai hun zinglam dak 10:30 in Pastor L. Thongkhangin, Adviser in hong hi. Chinsuanlian Tombing in The Helping Hand Free Coaching piankhiakna ziak a genna ah Lamka khawpi a khawsak haksat ziaka private tuition leh coaching la zoulou student-te awlmawhna a kipankhia hi’n gen hi. Cing Tombing, Counsellor in “self awareness” chih thupi zangin sinsak a, CT Lian Guite, MBA in entrepreneurship tawh kisai sinsak hi. Dr. Ginsuanthang Suantak, MBBS in Professional Career  a paiding dan tawh kisai sinsak a, Major C. Tonsing, Gorkha Regt.  in siamsinte adia career tuamtuam omte pulak in apply dingdan sinsak hi.


Singsit YO makai ding tel uh
Lamka, July-9: Presiding Officer Mangneilal leh Paocha makaih in Hmar Veng a Nazarene Ministry Complex ah tuni zinglam dak 11:00 in 2016-19 sung a Singsit Youth Orgn,. (SYO), CCpur Dist makai ding telna om a, huai ah Chairman in Len Robert, V/Chairman- Thanglen, Secretary- Hauminthang, Jt. Secy- Haopu, Fin. Secy- Chongnu, Secy. Social/Culture- Boishi leh Secy. Information ding in Lalpawl telching uhi. Telching thakte Pastor Zamchinlian in thumsak hi.


President, PTC-M in OB ding guang
Lamka, July-9: Muana Hangshing, President, PTC, Mizoram GHQ in tuni’n Office Bearer ding guanna nei a, Vice President in Kaizasang of Teikhang; Gen. Secy in Dalngo of Bawngkawn; Treasurer in T. Thang of Bethel, Champhai; Secy. (Orgn.) in Liandingmuan of Teikhang; Secy. (Fin.) in J. Pau Hau Lian of Vengthar, Champhai, Secy. (Inf.) in G. Thangsangmuan of Dinthar-te hi uhi. Huai appointment letter ahihleh tunitak dak 9:00 in MzrPaiteLink Whatsapp group tungtawn a online a hawmkhiak masak hi a, tuazawh in Pastor V. Goubiakmuan, EBCC Aizawlin makaite thumsak hi.


Lourup Comtt. in Left-canal bawlsawm
Lamka, July-9: June 2, 2016 zangkhanglai in Khuga Dam kichinna bul akipan metre 500 velin Left-side canal kichim a, dam tui a kinga tuilou bawlte beidong in om uhi. Khuga Dam Left Side Main Canal Lourup Commtt-te’sum kithawh in bawlhoih sawm in panla uh a, zan in nasep pan uhi. July 11, 2016 in nasep sunzom ding uh a, Tuilou bawlte’ kuanchiat ding in committee in ngen uhi.


IMPHAL NEWS:
ILPS bill thak ding luikhia
Imphal, July-9: CM Secretariat a CM office chamber ah tuni’n Chief Minister O. Ibobi makaihna in All political party meeting om a, huai ah bill drafting committee a Chairman O. Ibobi in India President in ‘The Protection of Manipur People Bill 2015’ lemsakpihna suai a piaklouh (withheld) ziakin Manipur tualsuak mite humbitna dia bill thak ding tawh kisai a draft model luikhia hi’n gen uhi. Draft Model ah ‘The Protection of Manipur People Bill-2015’ a base year leng January 1972 ding in khek uh a, ‘tenant’ leh ‘original people’ kichi leng paikhia uhi. CM in tuni a bill thak luikhiak pen draft model chi’n gen a, monsoon session a state legislative assembly hun ah govt. in bill thak luikhiak sawm a, huai dia political party teng in ngaihdan sung khawm ding in ngetna bawl a, bill thak finalize ma in Constitutional expert-te kiangah thon khiak hiding a, huai zawh in JCILPS leh Joint Action Committee against Anti-Tribal Bill (JACATB)-te telin stake holder teng tawh ngaihtuah leh kikup khawm theihna dia  draft bill copy piak ding, huai nung a bill finalize hiding in gen hi. Regional party khenkhat a delegate te’n bill masa  tawh kibang a President in lemsakpihna suai pelou ding a gintak thu gen uh a, Naga People’s Front-te meeting na ah tellou uhi.


Indefinite bandh paizom ding
Imphal, July-9: Tuishimi zero point (NH 39) apan Samanphai tan km 7 vel a sau ah lampi leh black topping bawlna ah khentuam om chih ziak in Tuishimi village te’n Chandel district ah total chakka bandh a puang uh Teraphai, PS. Cananyao, Salmephai, Phungthil leh Beaulahram village te’n gupthu puang uhi. CSO tuamtuam te’n a kisaipih thuneite kiangah Tuishimi leh Beaulahram kikal km 0.5 lel a sau bawl louh  a koih in a ziak ding taklang lou uh a, PMGSY Phase IX work order dungzui a Tuishimi Zero Point apan black topping kipan ding himahleh Beaulahram Lamkhai apan nasep kipan a, huai ah lampi a siat luat ziakin numei leh school kai te’n haksatna lianpi tuak uhi. Akisaipih thuneite’n mipi khualna a lampi bawl louh a anutsiatna munte uh bawlhoih ding in ngetna bawl uh a, huai ahihkeileh Chandel District ah NH-102 (Pallel-Moreh road) telin indefinite bandh paizom zel ding hi’n taklang uhi.


Ukhrul ah siluang mukhia
Imphal, July-9: Ukhrul district a Sangsat Police station in a huamkhak Aawo Kong Kaphung gammang ah tuni’n pasal siluang kimukhia hi. Siluang bel kum 50-55 kikal a upa hi dia gintak hi a, police thusuak in misi a muat ziakin ni tamsim paisa a nutsiat hiding in kigen hi. Amah bel a din sang dan 5.5 feet, puan nak eng (yellow) leh khekol grey colour teng hi’n taklang uhi.


Laborer soisak a om mawhpaih
Imphal, July-9: NSCN-IM cadre dia gintakte’n zan nitak dak 11:00 vel in Chakpikarong a Anal Naga Chief Association Office bawlna a nasem 3 a soisak uh mawhpaihna in Chakpikarong Chief Assn. leh Chakpikarong bazar board te’n zinglam dak 10:00 apan sun dak 12:00 tan Chakpikarong bazar khak uh hi’n kigen hi. Akigendan in NSCN-IM cadre te’n zan nitak in Chakpikarong Chief office building bawlna ah nasem 3 a  soisakna uah 1 a liam nasat ziak in Imphal ah refer uh a, hiai tungtang ah Chiefs-te makaihna a meeting hun ah NSCN-IM te gamtatna tawh kisai mawhpaihthu puang uh a, akisaipih thuneite tawh kihoulemna om  hi’n taklang uhi.


MCS trainee te’n cleanliness drive
Imphal, July-9: Manipur Civil Service (MCS) trainee te’n cleanliness drive a neih uh tawh kisai in tuni’n Nupi Lal Complex, CM Bungalow gei a traffic island leh road divider-te hahsiang uhi. Huai hun ah Manipur khangthu adia monument poimawh tak ahih ziakin Nupi Lal Complex banah a kim-leh-kiang siangthou tak a koih ding tupna a cleanliness drive sai uh hi’n taklang uhi.


PET a di'n ni 2 sung hun bikhiah lai
Imphal, July-9: Manipur Police Constable (Male/Civil) lakna ding Physical Efficiency Test (PET) om hun a telkhalou candidate tamtak a omlai ziak in amaute a ding PET ni 2 sung om ding in bikhiah thak hi a, huai dungzui in tuni zinglam dak 8:00 in Imphal West, Imphal East, Bishnupur leh Thoubal district a candidate-te banah supplementary candidate-te ading in PET om a, zingchiang (July 10, 2016) zinglam dak 8:00 in Imphal West, Imphal East (including Jiribam), Bishnupur, Thoubal, CCpur, Chandel, Tamenglong, Ukhrul leh Senapati district (including supplementary candidate)-te a ding in PET om ding hi.


Curvert siat ziakin Leilon-Leimakhong leh mundang kizopna kitat
Imphal, July-9: Sadar Hills a Saitu-Gamphazol sub-division sung a Leilon-Leimakhong area tawh mundang kizopna lampi omsun Leilon Vaiphei-Kanto Sabal road in a tawt khak Kanto Sabal mun ah July 1, 2016 ni a luita lian in culvert bangzahhiam a tuahkhiak ziakin khaw dang tawh kizopna kitat in khua 30 val buai uh hi’n kigen hi. Young Vaiphei Assn. (YVA) Leilon Unit te’n haksatna tuak mipi ngaihtuahna in culvert bawlhoih sawm in tuni’n nasep pan uh a, Dilip Katwal in JCB leh Tipper thawh a, mipite sum ki thawh khawm uh hi’n kigen hi. Joupi road a L. Phaikot lui leh Leimakhong Mission veng a luita te’n culvert 1 tuak tuahkhia a, Leilon Vaiphei leh Khunkho Kuki village kizopna lampi a Hengjang lui in PMGSY Phase X a kibawl culvert tuahkhia hi’n gen uhi. Hiai thu tawh kisai a Soikam Vaiphei, Unit President, YVA Leilon Unit in tunai zek a tuilian in culvert a tuahkhiak ziak in mi tamtak buai a, student-te school kaina leh nek-leh-tak laklutna tanpha buai ban hi’n gen hi.


TUNI THUPI:
“Huchiin, Pathian in amah kibatpih in mi a siam a, Pathian kibatpih mahmah in ahi a siam; pasal leh numei a siam hi.”- Genesis 1: 27


EDITORIAL:
World Population Day
July 11, 2016 in World Population Day zat in om ding a, population day tawh kizawitawn thou in numeite bawlsiatna leh a biktak in naupang kumchingloute tung a thangtatna tawh kisai genkhawm lehang uthuai i sa hi. Tuni in leitung mun tuamtuam ah mihing khanhatdan leh economy dinmun genkhawmna mun tamtak ah om dinga, huai ziak mah in Government tuamtuam in population control/birth control kichi uang gen nawn mahmah ding un kilang hi.
    U.N suikhiakdan ngial in kum 2050 chiang in tulel a mihing om zah leh thum in mihing pungzou ding ahi chi hial uhi. Tukum a World Population Day zatna hun ah UN Secretary General Mr Ban Ki Moon in leitung gam tuamtuam ah message khahkhia in 2016 tan a leitung pumpi in natna chi tuamtuam douding, mihing teng damthei chiat a omding, Population control a tua zawh chiang khantouhna in zui maiding ahihdante gen hi.
    Mihing ikibehlap dungzui in nek tak zonna ah mi tamtak i buai uh a, mi zawng ikibehlap mahmah chih pen nialvou louh thudik ahi. Huai kawmkawm in koimun leh gam ah birth control leh family planning pen buaipih ding hiam chih sut thamching ding hi. Leitung pumpi ah China population tampen a, a zom India ahi. China ah mihing tam mah leh a economy uh niamkiak lawtel lou bang a, India abel population tamziak mah in mihing pumdim hi. Eilak abel tenna inn ding neilou a lampi kiang khawng a bukneu chik khoh a teng i om naikei uhi. A nai tawp genlehang, Dimapur Railway station ah slum area om zek a, Guwahati ah leng a hunkhop om a, Bihar/Patna, UP, Delhi, Mumbai leh adangdang ah mizawng leh genthei pum dim a, vaigam khawng ah population control gen ot ding in deihhuai a, Manipur ah bel Family planning poimawh nailou suak sim hi. Lamka milip leh Kolkata a Howrah station a mihing om zah kikim ding in khenkhat te’n gen uhi.
    India ah mihing a tam mahmah chih i theihsa uh hi a, i theih kawmkawm in vaigam a mulkimna bei a thiltung tuamtuam i zak te’n i Lamka zang nasatak in hon lawng kha in hon sukha mun mahmah ta hi. Vaigam ah bel a mihing mahmah leng tam in numei naupang tung a hehpihna bei a thangtat mi tamtak ana om a, eilawi bel population tawm chik lak a vaigam a mi huhamte chetdan a hong kipuaklut pen lungkham huai mahmah hi. Khawtang leh Saptuam makaite’n i mawhpuakna i sep buchin zawhlouh ziak a thil mulkimhuai taktak ana tungsek adiam chih bang leng ngaihsut tham ching hi.
    CCpur district sung leng vaigam mah bangin thiltung mulkimhuai thei mahmah hi. Kum masa in Joint Womens Organisation /CCpur-te makaihna in Lamka ah public rally thupitak neih in ana om a, tua nung sawtlou in mun tuamtuam ah poikhoihna om tou zel mawk hi. Banghiam thiltung a om chiangin public rally i nei zaizai sek uh a, himahleh, kuapeuh in ngeina seh maimah i diam chih theih hi. Public condemnation leh rally sang a effective zaw ding bang adia chih ngaihsut tham ching a, naupang tung a tatsiatna himhim a Inndongta kigolh veu mah leng buaina leh sualna tok thoutu maimai a suah ton om ding in gintak huai hi.
    I lakah Non Governmental Organisation bangzah hiam in drugs tawh kisai in nasem a, amaute’n IDU, CSW leh HIV+ leh adangdang record a bawlte uh percent sangsim isak leh a dikna hong kilang hiaihiai hi’n leng kilang hi. Tuni in Newspaper a kitaklang lou leh public in a theihlouh numei naupang bangzah soisak leh sualluih in a om dia chih theihbut hilou hi. Ahangbel mi tamtak in mipi lak a puankhiak ding zumhuai leh zahtak huai sa uh a, tuabang a sisan a na test tu NGO te’n confidential record kem uhi. Bangziak a hibang lawmlawm akhelhna punghat a, huhamtak a gamtang kibehlap deuhdeuh hiam chih study bawl hial ding in hoih hi. Technology tuamtuam a i changkannate ubang leng siatna kipatna hikha maithei ahi.