MANIPUR EXPRESS | JULY 11, 2016

HEADLINES:
SBI leh associate-te’ merger ding banah  IDBI Bank’ privatisation deihlou
Bank nasem tengin ni 2 sung Nationwide Strike nei ding
New Delhi, July-10:  Bank Management in  IDBI Bank privatise  ding banah   State Bank of India ah SBI associate bank teng  gawmkhawm ding thusun a bawlte govt in leng a pompih deihlouh ziakin  July 12-13, 2016 sungin India gam pumpi a Public Sector Bank a semte’n nationwide strike nei ding uhi. Thusuakin agendan in July 12 in SBI associate bank  a sem 45,000 te’n strike nei masa ding uh a, a zingchiang (July 13) in public sector bank dang teng in strike zom ding uhi.
    Bank Union pawlin strike a neih ding uh khawlsak dia ngen in Chief Labour Commissioner  in union makaite kihoupih a, huai ah kilemna a om theihlouh ziakin strike paisuak ding chi’n All India Bank Employees Association (AIBEA) a General Secretary C H Venkatachalam  in tuni’n gen hi.  Strike ah All India Bank Officers' Association leh State Sector Bank Employees' Association leng tel ding uhi.

    Strike ding ziakin customer-te adia haksatna tung ding hi’n Bank of Baroda, State Bank of Bikaner and Jaipur  leh State Bank of Mysore in puang khinta uh a, strike hunah banking operation teng khawlsak ngai ding chi’n State Bank of Mysore  in official statement ah suah uhi. Bank Management in thusun a bawl dungzui a govt in Govt in SBI a merger ding a adeih Associate Bank tuamtuamte bel State Bank of Bikaner & Jaipur (SBBJ); State Bank of Travancore (SBT); State Bank of Patiala (SBP); State Bank of Hyderabad (SBH) banah Bharatya Mhila Bank hi uhi.
    Bank strike hunah cheque clearance, cash deposit leh withdrawal leng khawlsak hiding chi’n AIBEA in puang a, Associate Bank teng khak(close) nung a SBI a gawmkhawm ding banah IDBI Bank pen privatise ding tawh kisai bank nasemte’n pom theilou ding uh hi’n taklang hi.  AIBEA thusuakin agenzelna ah Central government in loan dinkiklou tamtakte kitheihmawh bawl in, bank tamkhop privatise sawm a, associate bank teng SBI a gawmkhawm a sawm pen tuhun adi’n poimawh nailou hi’n gen hi.


LOCAL NEWS:
NEC Fin. Adviser in nasepna enkhia
Lamka, July-10: NEC Finance Adviser GK Chin in NEC fund a Lamka Public Ground puahna nasep tunai zekin enkhia a, Imphal akipan Bobby EE, MTDC in  honzui hi. Lamka Public Ground puahna  nasep leng pailel a, nasemtute’n CCpur College lampang fencing ding leh tui koihna ding(tanky) bawllel uhi


July 20 ma adin thutawp pia uh
Lamka, July-10: All Manipur Written Test Successful Candidate of Police Constable Male,2013/CCpur Branch akipan thusuak dan in tuni sunning in IB road a KKL complex ah dist tenga kipan paikhawmte’n joint meeting nei uhi. Huai ah dstrict tenga member te’n mahni district a MLA te’n pan alakpih theihna ding un memorandum piak chiat din thukm uh a,CM tawh July 4,2016 a kihouna ah Aug 2016 khasung a result suahsak hidin CM in gen mahleh July 20, 2016 ma a result a suah kei leh kiphinna tuamtuam pat dingin All Manipur a member  paikhawm tengin thupukna bawl uhi.


Convenor MTF, Delhi kikhoppih ding
Lamka, July-10: All Tribal Movement Lamka (ATML) leh numei pawl kithuahte makaihna in July 11,2016(Seppatni) sun dak 12.00 in District Hospital a morgue ah Romeo Hmar, Convenor,Manipur Tribal Forum, Delhi(MTFD) kikhoppihna om ding a, huai ah mipi kuapeuhmah tel dingin chial uhi.


PASS in theihsakna bawl
Lamka, July-10: People Advance in Social Service (PASS) in theihsakna thusuah a bawl dan in Kanpur a ALIMCO akipan vualphaloute’a ding vanzat tuamtuam (wheelchair, rotator, walking stick, smart white cane leh hearing aid) hongtung a. New Mata a PASS office ah  om lel a, applicant te’n ngaihven theih ding chi uhi. Vanzat ngen thak nuamte’n passport size copy 2, disability certificate leh income certificate tawi in application piak theih ding a, thuchian kimzaw leng PASS office kan theih ding hi.


Financial Literacy Awareness Program
Lamka, July-10: ‘NABARD  Foundation’ in July 12 in SAGY nuai a Model Village Kangvai ah DDM/NABARD leh Rural Aids Service (RAS)/CCpur saina in July 12, 2016 zinglam dak 10:30 in Financial Literacy Awareness Program omding hi. Huai ah Special Guest in Seiminthang Lenthang, MCS, SDO/Kangvai pang dng a, aman Awareness Program hongding hi. N. Hauzel, LDM; Thangchinkhup Guite, DDM/NABARD; Branch Manager, Canara Bank/CCpur ; Branch Manager, SBI/Tuibuong/Tuibong; Khamsanglian, Progressive Farmer; Joy Singh, LIC representative leh H. Haokip, Chief Functionary, RAS te’n thupi tuamtuam zangin  sinsak ding uhi.


Essay writing competition
Lamka, July-10: National Legal Services Authority, New Delhi leh Manipur State Legal Services Authority thusuak dungzui in CCpur Dist. Legal Services Authority saina in tuni in Bungmual a Lalpuithluaii Foundation School ah ‘Essay Writing Competition’ om  hi. Huai ah category 2 in kikhen a, Category- 1 ah class VIII-X te’n ‘Fundamental Rights and Duties of Citizen’ chih thupi zangin words 500 tan gelh uh a, Category-2 ah class XI-XII te’n ‘Fundamental Rights and Duties of Citizen’ chih thupi zangin word 700 tan gelh uhi. CCpur Dist. a Private School/College tuamtuam 20 vel akipan candidate 299 om a, result bel hun lemtang masa ah puan hidin kigen hi. Category-I a 1st in Rs.1500/, 2nd Rs.1000/-, 3rd Rs. 800/- leh mi 10 kiangah consolation Rs. 500/- chiat piak hiding a, Cat-II ah 1st in Rs. 2500/, 2nd Rs. 2000/-, 3rd Rs. 1500/- leh mi 10 in Consolation Rs. 700/ ngah ding uhi.


YPA Gen HQ makaite charge kipia
Lamka, July-10: H. Nengsong, Sr. Advisor, Young Paite Assn.(YPA) GHQ  office ah tuni sunnung in kum 2016-19 sunga YPA GHQ makai thakte’ leh aluite’n charge kipia uhi. Huai ah President lui S. Chin Ngaih Pau in President thak Khailianthang Tonsing mawhpuakna pia hi. Office Bearer thakte’ Vice President- M. Luahkhanchin, Gen. Secy- Lianmuanthang Valte, Jt. Secy- K. Thangkhogin leh Thathang Langel; Fin. Secy- V. Chinkhenmung leh Treasurer- Vungzapau hi uhi. CEC  Chairman-lui V. Vungzathang in Chairman thak S. Chin Ngaih Pau kiang ah mawhpuakna pia hi. CWC member ah Vice Chairman in Paukhanmawi Guite leh member in- Thangkhochin Ngaihte, Awnsuanhau, Haukhenpau, V. Khankhup Guite, Khanpau Ngaihte, Singnunsiam Ngaihte, H. Pauzathang Ngaihte leh T. Thangkhangou  hi uhi. Ambulance zang nuamte’n President (+91 96124547394) leh Gen. Secy (+91 9856666954) thuzak theih ding ingen uhi’



EBC Imphal Divn. papi Camp zou
Lamka, July-10: EBC, Imphal divn, saina in New Lamka a Grace Bible College ah July 6, 2016 nitak in Papi camp kipan a, Rev. Dr. Kh. Khaizakham, Evan T. Damkhothang leh Rev. K. Kamchinkhup, DS, EBC Imphal Divn.  thugentu in pang uhi. Huai camp ah EBC Imphal divn. bialsung a saptuam tuamtuam akipan papi 152 vel tel uh a, tuni’n zousiang uhi.


SUUNNA:
S. Ginkhanlel (47) s/o Thuampau of Bethel Veng, New Lamka tuni sunnung dak 2:30 velin Dist. Hospital ah sungna in si a, July 11, 2016 in YVA hanmual ah kivui ding hi.
Ginchinkham @ Khama Hangshing (50) of Zomi Colony, hunsawttak damlou a om tuzing dak 4:00 velin si a, sunnung in  Zomi Colony hanmual ah kivui hi.
Chawngneizing @ Chongi (44) w/o Laltanliana of Langol Housing Complex, Imphal tuni nitaklam dak 5:30 velin sinna in si a, July 11, 2016 in kivui ding hi.


IMPHAL NEWS:
CM in Exhibition Match hongkhia
Imphal, July-10: Wahengbam Indramani Memorial Football Academy (WIMFA)-te saina in Khuman Lampak stadium ah tuni’n International Football Exhibition Match om a, huai ah khuallian in CM O. Ibobi pang in exhibition match honkhiatna nei a, Functional President in T. Mangibabu Singh, Chairman, PDA pang hi. Guest of Honour in R.K. Imo Singh, Sagolbandh A/C MLA leh Oinam Bhobendra, Director, WIMFA-te pang uh hi’n kigen hi. CM in a thugenna ah kum 1970 hunlai a Nagaland a ding in Footballer minthang Wahengbam Indramani  hi a, football ngaina te’n Manipur ah Singapore FC leh Manipur FC-te International Football Exhibition match a kimawlna a ettheih uh vangphathuai a, hiai tungtang ah WIMFA-te panlakna kipahpihhuai a, tuni a match pen a bulpatna hi a, maban ah International match tamtak om ding a deihthu taklang hi. Tuni a exhibition match hun ah Manipur FC te’n Singapore FC-te 3-1 a zou uhi.


Fish Farmers’ Day zatna om
Imphal, July-10: Fisheries Dept.-te saina in Lamphelpat a Directorate’s Complex ah tuni’n ‘The 16th Fish Farmers’ Day 2016’ zatna om a, huai ah Chief Guest in Md. Abdul Nasir, Minister (Agri & Fisheries) pang hi. Functional President in Th. Gopen Meetei, IAS (Secy. Fisheries) leh H. Biramani Singh-te pang uh a, Guest of Honour in Smt. Peijonna Kamei, Director, (Eco.& Stat.) leh Smt. E. Sulochana Devi-te pang uhi. Manipur in kum teng a nga poimawh zah  local fish farmers te’n a piak khiak theihna ding uh hanthawnna a fish farmer day zat hi’n kigen hi.  Fisheries dept.-te saina in kumlui a Fish Fair-cum-Fish Crop Competition hun ah 1st Prize latu N. Kumar Singh of Thanga Chingmei, Bishnupur district kiangah Rs. 1,00,000 leh citation, 2nd Prize latu N. Basanta of Kribul, Bishnupur district kiangah Rs. 70,000 leh citation banah 3rd Prize latu S. Surachandra of Hiyangthang, Imphal West kiangah Rs. 50,000 tawh citation hawmkhia uhi.


Bangziak singtang bial a ADC by-election om ngei lou hiam: NPP
Imphal, July-10: National People’s party (NPP) te’n kum 2010 apan singtang bial a Autonomous District Councils (ADC)-te ah representative khenkhat sih ziak a post awng om mahleh bangziak a by-election sailou uh hiam chi’n Manipur govt. ah dotna bawl uhi. Hiai thu tawh kisai in MG Avenue a NPP office ah tuni’n press meet om a, huai ah Thangminlen Kipgen, President, NPP Manipur Unit in media-te tawh kimuhna hun ah June 2010 a Sadar Hills  ADC election hun ah Nehkholam Chongloi telching himahleh Nov 2012 in si a, huai mah bang in tu term sung in Sadar Hills apan Haokholun Chongloi in ADC elected member ding a kichiamna a neih nung a ni 6 ni July 19, 2015 in si a, govt. in post awngte hukdimna din panlak neilou uh a, Manipur govt. in singtang bial a mipi hamphatna ding leh khantouhna ding ngai poimawh lou uh a, ADC te’n pension facilities bangmah neilou uh hi’n gen hi. Govt. omdan a kikhek keileh NPP te’n Court tun ding uh a, ADC constituency teng ah elected member 24 a phak ding banah govt. in member 2 a nominate ding uh chih ziak in member 26 pha ding a, himahleh govt. in tunitan a ADC 6 ah member nominate neilou hi’n gen hi.


Pineapple piangkhia 7090 quintal tung
Imphal, July-10: North Eastern Council (NEC) sponsor na nuai a Andro Kendra Development Orgn.-te saina in Poroupat Lamkhai Andro a Thambalnu market Complex ah ni 5 sung daih ‘The 9th State Level Pineapple Festival cum Seller & buyer meet and Youth Festival 2016’ tuni’n zawhsiang hi a, huai ah Special Guest in Ram Muivah, Secy., NEC Ministry of DoNER pang a, Chief Guest in Th. Shyamkumar, Andro A/C MLA pang hi. Ram Muivah in MLA dang tawh teh in Andro MLA in talent chituam tak nei a, NEC in Andro a Immortal fire puahna ding in Rs. 2 crore sanction a, Andro A/C sung a water supply puahna dia NEC in Rs. 6 crore banah numei leh pasal hostel bawlna dia Rs. 4 crore sanction ding uh hi’n gen hi. NEC in Andro A/C sung a pineapple festival hoihtak in enkai a, Andro hill apan Ukhrul hills tan ah pineapple chin theihna dia MLA Th. Shymkumar tawh kithu zak uh hi’n leng gen hi. Festival thusuak in tutung a pineapple 7090 quintal  leh pineapple juice 9000 litre piangkhia a, stall 240 honkhiat hi’n leng taklang uhi.


Railway tawh kisai nasep khawlsak
Imphal, July-10: Tamenglong district a Jiribam-Tupul railway in a tawt khak ding tunnel bawl ziakin buannawi leh nin tuamtuam te’n Tupul area ah tuilou leh irrigation canal susia a, huai veng te’n April 14, 2016 apan railway tawh kisai nasep khawlsakna in ‘total ban’ puang mahle uh akisaipih thuneite’n tunitan haksatna a tuah uh enkai lou in compensation leng pelou uh hi’n kigen hi. Rangthailong village a loukhou mite’n tunneling nasep ziak a buannawi leh nin tuamtuam pawtkhia-te ziakin a tuiloute uh khou theilou ding in sia a, irrigation canal-te zat theihlouh suak a, khawdang-te leng huchi vek hi’n gen uhi. Akigendan in kum 2003-2004 a Look East Policy tua Act East Policy tungtawn in Northeast Frontier Railway te’n Jiribam-Tupul railway Rs. 4,445 crore bei ding in bikhiah uh a, Jiribam sub-division leh Tupul kikal a railway kum 2015 tan a zawh ding kichi kum 2018 dia khekthak in tunitan a minor bridge 107, major bridges 7, road over bridge 3, road under bridge 2 leh tunnel 34 lakah 4 bawl zawh hi a, govt. in Moreh tan ah tung dia railway line bawl sawm uh hi’n leng taklang uhi.


Romen death penalty piak ahi : UNLF
Imphal, July-10: Imphal West district a Tera Sapam Leirak Nongmaithem Leikai ah July 7, 2016 nitak dak 7:00 vel a Meikam Romen kaplupna tawh kisai a UNLF te’n amau khut nung hi’n puang uhi. Hiai tungtang ah M. Sak-Hen, Director, Dept. of Publicity, UNLF in Meikam Romen in pawlpi kal in thau tawh taikhia a melmate a belh ziak a death penalty pia uh a, Meikam Romen @ Sajibu s/o Meikam Pisak of Sagolband Tera Lukram Leirak ahihleh UNLF armed-wing Manipur People Army  a batch 32 na hi a, a posting na mun apan 3.8 pistol tawh Aug 7, 2007 in taikhia a, MPA rule and regulation nuai a section 18 of 27 Clause (IV) tungtawn a thau tawh melma-te kiangah kipiak khiak ziak a kaplum uh hi’n leng taklang uhi.


Meltheihlouh te’n mi 1 pimang
Imphal, July-10: Meltheihlouh pawlkhat in tuni nitak dak 6:30 velin Wangjing Purana Heitupokpi mun apan RK. Mani (36) pimang uh hi’n kigen hi. Thusuak in RK Mani (36) s/o RK Kheda ahihleh UNLF cadre lui hi a, mi pimang te’n Hyundai i-10 car zang uh hi’n leng taklang uhi.


TUNI THUPI:
“Hehpihnate, lemnate, itnate na tung uah hihkhan in om hen.”
- Juda 1:2


EDITORIAL:
Kilemna chikchiah a om dia?
JAC-te makaihna in Kiginni (July 9, 2016) in YPA Gen. Hqtrs Hall, Hiangtam Lamka ah Public Consultative Meeting poimawhtak om hi. Tua hunah media report dungzuiin mipi tamtak kihel uh chih ahi a, kipahhuai mahmah hi. President of India in “the Protection of Manipur People Bill, 2015” pen assent piak ding nawlkhin mahleh Bill dang 2- the Manipur Land Revenue and Land Reforms (7th Amendment) Bill, 2015” leh “the Manipur Shops and Establishment (2nd Amendment) Bill, 2015” te expert te’n enlel uh a, huaibanah, anti-tribal bills tawh veng nailou banah tribal martyrs 9-te vui hinailou kal a Manipur govt in bill thak introduce a sawm pen tribal martyr-te leh tribal mipi muhsitna hi’n taklang uh a, tua ziakin maban ah JAC mah in tribal-te gam, rights leh identity kepbitna dia movement makaih lai di’n lemsa uh chi uhi.
    Ahi a, JAC panlakna kuapeuhin ithei in mi tamzaw inleng i kipahpih ding un gintak huai hi. Himahleh, MLA election di vai gentel a hong om khak pen in mi tamtak sa-ik sak dingin gintak huai hi. JAC pen bill 3-te douding a pawlpi tuamtuam in abawlkhiak hi a, himahleh, kumnawn election om ding ah MLA hilelte kuaman vote lou ding chih a om pen nalhlah deuh abatna tan om hi. I pau upa uah ‘kamsung a lei leh ha le kikei tuahkha thei’ chih om a, i tua ziakin MLA hilel leh MLA tuhsawmte’ banah JAC in innpite thuzak kawma hoihtak a houlimna aneih uh poimawh mahmah hi’n theihtheih hi.
    Public Consultative meeting poimawh tham a, ngaihdan tuamtuam lakna leng ahi hi. Huai kawmkawmin JAC in policy leh politics a selam in hon hetkha diam chih bangleng ngaihdan om thei hi. 3 bills te doudal dinga kibawlkhia JAC in tutan in UPF/KNO te’ paidan subuai naikei mahleh hun hong paitou ding ah ngaihdan alak tamluat uleh hong buaithei omkha thei dingin gintak huai mawkmawk hi. I rights leh ihihna (identity) te kepbitna dingin a kul tamtak om hi. Kilemna chik chiah om ding hiam chih ngenteltak in ngaihsut vengveng tuakta hi.
    Salpha 9-te luang tuni dong vui louhin morgue ah koihin om a, bangtan hong om tou ding hiam chih gen ngam ahi naikei hi. Siluangte vuilouh ziaka i demand (?) tuamtuamte uh chikni chianga muh ding hiam chih leng itheikei hi. NSCN (IM) in sovereignty a ngetna hang un siluang a sanga sim kikham in tuni dong amukei uh a, LTTE in leng mihing a sing asim mah akhahsuah uhi. Telangana statehood apianna dingin mihing a za asim mah luang kikham hi. Salpha ineih uh mi 9-te zahna ipiak kawmkawmin amau ziakin sovereignty hiam muhding zaw kinem hetkhang. Amaute thupi isa a, hiai movement hoihtaka kalsuahpihte leng igense kei hi.
    Himahleh, kumnawn 2017 kumbul in MLA election om ding a, MLA politics leh hiai movement hong kizom (relate) khak leh hoihna sangin hoihlouhna omzaw diam chih ngaihtuahna ah lian mahmah hi. Manipur a Hill district Senapati, Ukhrul, Chandel, Tamenglong banah Sadar Hills bial a MLA te’n amau bialte zalentakin vehthei uh a, eilak (CCpur) ah MLA 2/3 lel gak tinten a om in gen neiban ding hiam chih leng ngaihtuahna ah lian mahmah nawn hi. Maban ah election hong om dinga, mipi’n a deihkei uleh chinglou ding hilel mai uhi. Eisung ah kigakgak tawk lehang leng midang a kigak tuankei leh huai in bangtan kawkkha leh denkhak (impact) hon neituan ding hiam?
    JAC in mipi dong dialdial a Public Consultative meeting a saizel uh hihhoih mahmah uh a, kipahhuai mahmah hi. Hiai meeting tungtawn inleng gah kipahhuaitak hong piankhiak ngei I lamien hi. Ahihhang in, 3 bills tawh kisai i buaipih kawmawm ua, electoral politics leng buaipih ihih khak ding lauhuai mahmah hi. Government tawh tripartite talks nei UPF leh KNO-te’ demand leh JAC in tua demand tuamtuam i neihte kituaktak a ‘parallel’ apaikhawm helhel poimawh mahmah dingin gintakhuai hi.
    Bangteng hileh, MLA election tawh kisai hilou in Government tawh kilemna lampi sial poimawh mahmah hi’n theihtheihin om hi. Kitheihsiamlouhna leh kinakna hun om mahleh kilemna inleng mun aluah hun mahmahta sakin om hi. Christian ngen ihi uh a, Laisiangthou ah, ‘Lemna bawlte ahampha uh, Pathian tate chihding ahi ngal ua…” chih leng om hi. India i chih democratic country ahi chih i thei uh a, pawl tuamtuam phuhtheih mah hi, himahleh pawlpi a tam zengzung ziaka i thiltup (demand/motive) hat ding hiam chih bel theih haksa mahmah hi.