MANIPUR EXPRESS | JULY 12, 2016

HEADLINES:
Sum leh pai a leikhiakin ka om ngeikei ding: Romeo Hmar
AMTWU leh ATML makaih in MTFD Convenor kikhoppih
Lamka, July-11:  All Tribal Movement of Lamka (ATML) leh numei pawl kithuahte’ makaihna in tusun dak 12.00 in District Hospital a morgue ah Romeo Hmar, Convenor, Manipur Tribal Forum, Delhi (MTFD) kikhoppihna om a, huai hun Upa Jamkhanpau in thumna in hongkhia in mun tuamtuam akipan mipi tamtak paikhawm uhi.

    Romeo Hmar in a thugenna ah singtangmi pawl tuamtuam te’n mahni deihdan in thil tuamtuam sai in panla mahleng ideih kibang in suahtakna hi a, kipumkhat a panlakkhawm poimawh mahmah ahihdan gen in, thil deih/tup kibang hingal tunitan bangziaka pangkhawm taktak theilou ihi uh hiam chi hi. British-te hunlai in singtangmite nam leh nam a kidou zak ding tawm a, Manipur politics honglut apan hibang thil deihhuailou tamtak piangkhia hi’n gen a, pu-le-pa khang a mi hangsan i hihna uh tunitan bei nailou ahihdan kuapeuh in athak a thei a, khangthak te’n kuamah suksiat vuallouh kipumkhatna mah mitsuan a panla ding in chial hi. A genzelna ah, kipumkhatna suksiatna dia khem a, sum-leh-pai a leikhiak a om ngeilou ding ahih dan mipi paikhawmte mai ah puang in, huai dia sisan ah suai kaih leng ngam ahihdan agen ban ah vauna ziakin leng taise ngeilou ding hidan in gen hi. Delhi a Northeast singtangmite’ adia taise ngeilou a panlatu’n bangchi’n Manipur a singtangmi ka mi-leh- sate ka taisan thei dia chi’n gen hi. Programme hunsung in mi tuamtuam inleng thugen in AMTWU leh ATML-te panlakna phathuai sakthu gen uhi. Deborah makaih in mipi paikhawm te’n Pathian buan in gam leh nam adi’n thumkhawm uh a, huaihun ah Romeo Hmar zi Roselyn inleng phatna la sa hi.


NEC Secy. R. Muivah in Hostel bawlna ding suangphum
Imphal, July-11: Ram Muivah, IAS, Secy., North Easter Council (NEC) in tuni’n Manipur University campus ah boys hostel leh girls hostel bawlna ding suangphum hi. Aman a thugenna ah Manipur khantouhna ding in NEC in poimawh ngaih mahmah hi’n gen a, kum 1972 a NEC dinkhiak akipan North East bial a state dang te’n fund 7% akipan 16% tang mahle uh Manipur in 5% tan lel tang hi’n gen hi. Aman NEC Secy. ahih nung kumlui a kipan in Manipur a di’n development fund kibikhiah-te lakah Manipur a ding tampen hi’n gen hi. NEC secy. in a genzelna ah NEC in infrastructure bawlkhiak, livelihood project tuamtuam sepkhiak banah human resource development lam ngaih poimawh pen a nei in panla hi’n gen hi.
    NEC fund tungtawn in tulel in Manipur ah Rs. 148 crore bikhiah in scheme leh project tuamtuam sepna pailel a, huai-te road communication, 33/11 sub-station, Industrial workshed, singtang gam a Ukhrul, Senapati, Churachandpur leh Chandel ah  livelihood programme-te NERCOMP tungtawn in nasep pailel hi’n leng gen hi. R. Muivah in a genzelna ah Manipur University a student 3000 omte lakah student 500 tan hostel ah om theihna ding facility om a, huaiziakin NEC in gamdang akipan student-te leng hong om theihna ding un tuni’n numei-te leh pasal-te omna ding hostel 1 tuak bawlnang a nasep patna ding in foundation suangphum hi’n gen hi. Hostel 1 bawlna ah Rs. 7 crore vel lut ding a, hostel 2te ah pasal 50 leh numei 50 om thei ding a, kha 6 sung a building bawl zawh siang ding a gel ahi (plan) chi’n gen hi. Tuni a function ah Manipur University a Vice-Chancellor H. Nandakumar Sharma, Professor leh lecturer tuamtuam banah NEC top official tuamtuam hunkhop tel uhi.


India in Kenya ah Cancer Hospital bawl ding
Kenya leh India in point 7 ah kilemna (MoU) suaikai
New Delhi, July-11: Kenya veh a zin Prime Minister Narendra Modi leh Kenyan President Uhuru Kenyatta in tuni’n Nairobi khawpi ah kilemna point 7 bawl in suaikai uhi. Memorandum of  Understanding (MoU) bawl a omte lakah defence and security, revised pact on avoidance of double taxation, LOC 2, visa, housing & measuring standards telkha hi. Prime Minister in tuni a Kenyan President Uhuru Kenyatta tawh Nairobi a kilemna abawlkhit un, Kenya kiangah Line of Credit (LOC) USD 44.95 million behlap hiding chi a, huai tungtawn in Kenya ah small & medium enterprise leh textile tawh kisai masawnna omthei ding chi hi. Kenya a quality healthcare omtheihna dingin India solkal in Cancer Hospital bawlkhe ding hi’n leng Prime Minister in gen a, khantouhna tamsem omtheih chiang in Kenya leh India kizopna hoihsem ding chi hi.
    Kenya gam veh dia zinkhia Prime Minister in gamnihte kizopna hoih huntawk hi’n gen a, gamnihte’n melma kibang - terrorism & radicalisation nei uh chi hi. Helna leh hiamgamna doukhawm apoimawh ziakin India leh Kenya in huai tungtang ah kilemna bawl uh chi a, cyber security banah drugs & narcotics leh human trafficking doukhawm dingin suaikai uhi. Tuni a MoU bawl a omte laka Defence Cooperation tawh kisai ah staff exchange, expertise sharing, training, cooperation in hydrography & equipment supply telkha a, Indian Ocean tungtawn a Kenya leh India kikawmtuah thei ahihman in maritime security tungtang ah gamnihte’n kituaktak a pangkhawm dia kithukim uh hi’n PM in gen hi.


LOCAL NEWS:
SL Senior Centre hong
Lamka, July 11: Rev. S. Vung Minthang, General Secretary, EBC in tuni zinglam dak 10:30 in Gangpimuol ah SL Senior Centre kichi hongkhia in Pathian kiang ah thumna in lan (dedicate) hi. SL Senior Centre ahihleh upa lamte adia Daycare Centre dan hiding a, sun hun in huai a om ut kuapeuh asaitute thuzak in omtheih leh tawldam theih ding hi’n kigen hi.


TK Simte, MCS in Intensified Diarrhoea Control Fortnight hongkhia
Lamka, July-11: Dist. Health Society, CCpur saina in tuni zinglam dak 10:30 in CMO Conference Hall ah July 11-23 tan daih ding Intensified Diarrhoea Control Fortnight (IDCF) kichi T.K Simte, MCS AC to DC/CCpur in hongkhia a, huai ah block tuamtuam a ASHA Worker-te kihel uhi. Dr. Thangchinkhup Guite, CMO/CCPur in ICDF tawh kisai agenna ah gamsung pumpi a naupang kum 5 nuailam sungkhoh ziaka si beisak nanga Central govt in 2015 in pankhia a, 2015 in Education Deptt. leh Dist. Health Society kithuah in school tuamtuam ah khut silsiang dan leh thou bawhsa nektheih neklouh ding banah tui suansou dawn ding chihte sinsak in om chi a, ORS leh Zinc tablet PHC leh CHC teng a Zinc Corner koih in om hi’n gen hi.


Police te’n Jail ah koih uh
Lamka, July-11: Police te’n Pauminlian Hangluah (19) s/o H. Ginlal of  New Zouveng, tuni’n Tuibuong/ Tuibong Court ah pawkhia uh a, Court phalna bang in Police te’n Jail ah koih uhi.
    Pauminlian Hangluah bel July July 5, 2016 sunnung in Khawpuibung leh K. Lhangjol khua kikal ah K. Lhangjol khawmi numei naupang kum 14 vel school kaitawp innlam zuanlai thagum in sualluih (rape) leh thahsawm ziaka Police-te mat  hi a, Police te’n FIR No.13 (7) 2016 WPS-CCP U/s 307/354/511 IPC registered uhi.


World Population Day zat in om
Lamka, July-11: CCpur Dist Legal Services Authority (CDLSA) leh Centre for Community Initiative (CCI) kithuah in tuni sunnung dak 1:30 in New Lamka a Rayburn College Auditorium ah “Protection of Girl Child” chih thupi zangin World Population Day om a, huai ah numei nauapngte’ kipbit nanga CCI in ‘Child Policy Booklet’ abawl Letkho Kipgen, Secretary, CDLSA in  hongkhia hi. Kaylie Lalrokim leh Ashley Lhaineihphal te’n “Protection of Girl Child” chih thupi pansan in video clipping kibawl lahna nei uh a, Rayburn College student’ 70 val tel uhi.


Town area a hawmding pawkhia
Lamka, July 11: Malaria Deptt. CCpur te’n CHC, PHC leh PHSC nuai a khua/veng tuamtuam ah thousilen (longlasting insecticide net) hawmkhe khinta uh a, tuni’n ASHA worker-te leh Deptt. te’n Town area a khua/veng tuamtuam a hawmkhiat din  LLIN pawkhia uh hi’n Dr. Liankhawjam Guite, DMO/CCpur apan kiza hi.


Tuailai 14:34 Pro Motivation Prog
Lamka, July 11: EBCC Singngat ah July 16 &17, 2016 in Tuailai 14:34 Pro Motivation Program omding a, Tuailai 14:34 Pro heutute apan thugenna om ding hi. July 17, 2015 in EBC Central Choir te’n Pathian phatna la sa ding uh a, sunnung in Worshop & Discussion omding a, Singngat khawkim leh kiang apan lunglut kuapeuh teltheih ding hi’n kigen hi.


SUUNNA:
Upa LT Moia f/o Joseph R Hmar, ATSUM President  zannitak dak 7:00 velin Hmar Veng, Sangaiprou, Imphal ah nitak biakna kikhop a thu genlai BP stroke in buai sia, damzoulou in si a, tuni’n kivui hi.
H. Ginsuan (59) h/o Lalvenhim of  Pearsonmun tuzing dak 5:00 velin luna (headache) ziakin si a, July 12, 2016 in Pearsonmun hanmual ah kivui ding hi.


IMPHAL NEWS:
Kh. Ratan tungah criminal
Imphal, July-11: JCILPS convenor lui Kh. Ratan in a tung ah ‘wanted tag’ tawh kisai a Court ah petition a khiak ziakin Manipur High Court a Chief Justice Rakesh Ranjan Prasad, in ‘wanted tag’ puanna tawh kisai a record om teng deposit ding a thusuah a bawl Manipur Police te’n tuni’n counter-affidavit dawnna a bawlna uah JCILPS convenor lui Kh. Ratan tungah criminal case 75 omlai hi’n gen uhi. Counter-affidavit piak zawh nung in Ratan Counsel Khaidem Mani inleng rejoinder pelut ngal a, Justice Kh. Nobin leh Justice S. Serto te’n July 18, 2016 ni a hearing om nawn ding din bikhiah uhi.
Hiai thu tawh kisai in Khaidem Mani in media-te kiang ah Police te’n Ratan tungah criminal case 75 list a piak lut ziak un Court in criminal case in paisak ding a, Ratan verse Manipur govt. and five other respondent chih hita ding chi’n gen hi. Akigendan in UNLF a member banah Manipur ah khawtang siatna leh buaina tun chih ziak in Singjamei Police Station te’n June 2, 2016 in Ratan tungah criminal case bulhkhum uh a, matkhiakna dia thupe sawn thei-te Rs. 5 lakh piak chiam uhi. Ratan in hiai tungtang a petition a khiakna ah social media tuamtuam a limlak kitheh zak pen bawltawm chi a, tunitan in Police te’n a tenna inn va enkhe lou in  mat leng sawmlou ua sapna leng mulou chi’n gen a, kibu lou hi’n leng taklang hi.


Khamtheih tawh mi 2 mankhia
Imphal, July-11: Manipur Police Narcotic and Affairs of Boarder (NAB) team te’n thuguk a zak uh dungzui in operation a bawlna uah numei 1 apan heroin gram 250 mukhia uh hi’n kigen hi. Mat a om Rengnuhoi Parpa @ Elizabeth (45) w/o Samson Parpa of Waikhong Chothe Khunou, Chandel district hi’n gen uhi.
    Huailou in Thoubal Police te’n Usoipokpi ah tuni’n Md. Zameruddin tenna inn a luhna uah Md. Ayub Khan (45) s/o (late) Abdul Helim of Thoubal Moijing apan opium gram 300 a gik tawh opium bawlna mukhia uh a, van muhkhiak-te tawh Thoubal Police Station ah pekhia uh hi’n kigen hi.


Kheroda sihna ah Doctor suspend
Imphal, July-11: RIMS thuneite’n July 6, 2016 zingsang a naunei zawh nung a Thokchom Kheroda sihna tawh kisai in tuni’n Dr. L. Trinity Meitei  suspend uh a, JAC leh Thokcom Kheroda innkuan te’n siluang July 12, 2016 ni a la ding uh hi’n gen uhi. Akigendan in JAC member, Kheroda innkuan leh Khurai Sajor Leikai-te  tuni’n RIMS complex buluh in huai ah doctor suspend  phut uhi. Huai nung in kiphinna neite’n  RIMS Director leh Medical Superintendent  kimuhpih uh a, Dr. L. Trinity Meitei suspend banah thiltung tawh kisai a enquiry pat ding chiam uh hi’n leng kigen hi.


Bomb puak ah NSCN(K)-te kipuang
Imphal, July-11: Senapati district a DC office complex a planning section mai ah zan nitak  dak 8:00 vel a bomb puak tawh kisai in NSCN-K te’n amau khutnung hi’n kipuang uh a, bomb puah ah window glass leh kongkhak-te kise mahleh si leh liam omlou uhi. Thiltung zakphet in Jacintha Lazarus, DC/Senapati, SP/Senapati leh Assam Rifle office te’n delh pah uh hi’n leng kigen hi.


Ni 7 sung a white paper luikhiak phut
Imphal, July-11: BJP Manipur Pradesh te’n JNIMS a ngeina dan zuilouh (anomaly) tawh kisai a thuchian kimtak white paper phut uh a, akisaipih Union Ministry of Health kiangah report piaklut ding hi’n leng taklang uhi. Hiai thu tawh kisai in Nityaipat Chuthek a BJP office ah tuni’n press conference om a, huai ah M. Asnikumar, Vice President, BJP Manipur Pradesh in student te’n medical lam a zil theihna mun uh JNIMS ah tulel in ngeina dan zuihlouh banah transparency leh accountability omlou a, society etkolna nuai a JNIMS te’n nasem uh a, huai society ah Chief Minister in President len a, Health Minister in Vice-President leh Health Commissioner in Member Secretary len chi’n gen hi.
JNIMS kipat tung in kisak theihpih huai a, himaleh tuni’n Institute sungthu thangtak a suah banah maban saupi muhkhawlna nei nawnlou hi’n gen hi. JNIMS adia nurse 200 lakna ding leh MCI dan kalah a Medical Superintendent banah Addl. Superintendent lakna leh Professor banah Associate Professor-te kaisang na tawh kisai leh thu tuamtuam om a, JNIMS society a President len Chief Minister in ni 7 sung a JNIMS kiphutkhiak apan tunitan a JNIMS administration record mipi theih dia taklang ding in phut a, BJP in JNIMS a ngeina dan zuilouh tawh kisai a report a neihte uh Union Ministry of Health, Govt. of India leh Medical Council of India ah pelut ding uh a, MCI in JNIMS tungah thutanna bang hiam a bawl ua leh Chief Minister O. Ibobi in mawh akipuak ding chi’n leng taklang hi.


Helpawl a tel 5 mankhia
Imphal, July-11: Imphal East District Police te’n thuguk a muh uh dungzui in zan zingsang in Yourabung Maning Leikai ah KCP(MC) cadre 1 mankhia uh hi’n kigen hi. Mat a om Telem Birjit Singh (47) s/o T. Nilachandra Singh of Yorbung Maning Leikai hi a, amah apan articles ginlelh huai khenkhat mukhia uh hi’n leng kigen hi.
    Huailou in Thouba Police Commando te’n zan nitak dak 8:30 velin Pallel, Heipokpi leh Wangjing area apan GPRN cadre 4- K. Ibosana @ Sanjoy s/o Kh. Angou, M. Sobita Chanu (35) d/o Lalhari, RK Manisana (41) s/o Khedasana leh RK Chinglensana (33) s/o RK Sanahal mankhia uh a, amau apan demand letter 4 leh mobile 4 mukhia uh hi’n kigen hi.


CBI ahihkeileh NIA-te zang di'n phut
Imphal, July-11:  JAC against the attempt to murder of Dr. N. Gyaneshore Singh-te saina in tuni’n press meet om a, huai ah JAC Co-convenor RK Tombisana in May 17, 2016 zingsang dak 2:00 vel a RIMS Boys hostel a toilet room sung ah khawphok lou a Dr. N. Gyaneshore Singh muhkhiak tawh kisai a kigolh khakna neite matkhiak ding phutna in CM, Dy.CM, DGP, Lamphel Police Station leh RIMS thuneite kiangah memorandum tungtawn a July 3, 2016 tan hun piak himahleh tunitan a matkhiak om nailou chi’n gen hi. Dr. N. Gyaneshore bel Shija Hospital a ICU ah etkol in om a, RIMS thuneite’n a ki-etkol nang in Rs. 2 lakh piak beh mahle uh thiltung tawh kisai in panlak neilou ua, hiai tungtang CBI ahihkeileh NIA-te suizui sak ding in phutna bawl uh chi a, akisaipih thuneite’n a kintheipen a kigolh khakna neite a matkhiak kei ua leh RIMS thuneite leh Police Deptment-te tungah kiphinna pan ding uh hi’n leng taklang hi.


Old age home ah free eye camp om
Imphal, July-11: Shija Eye Care Foundation leh All Manipur Senior Citizens’ Welfare Assn-te saina in Mongsangei a Old Age home ah tuni’n Free Eye camp om a, huai ah Dr. Kh. Vikram, Consultant Ophthalmologist leh Shija Eye Care Foundation a supporting staff te’n mitlam buaina neite en uhi.


TUNI THUPI:
“Dangka sum deihtak zaw gilou chiteng bul ahi ngal a; huai bel khenkhat te’n a eng ua, ginna a pai mangsan ua, amau leh amau lungkhamna tampi in a kisunlet tektok uhi.” - I Timothi 6:10


EDITORIAL:
Khelhna lakah bang uangpen?
Pathian in a it mahmah a tapa Jesu mikhialte tandingin pekhia a, i biak Toupa dingin nna mahmah ding chih haihvual hilou hi. Genesis laibu a Abraham in a tapa Isaac maitam a thil latding a luikhia a, gan gawh banga a dawtlup sawmlai i ngaihtuahchiang in a lungtang uah bangteng om ding hiam chih hon ngaihsun sak hi. Jesu Kris in bangteng khelhna nei a, Isaac in bangteng khelhna neihiam? Leitung a khelhna lakah bang khelhna uangpen ahi dia le? Jesu in Samari numei a ngaidam a, eisung ah thu houchik chik chianga kingaihdamna leh kitheihsiamna lampi i zon tuankei ding leh a zongloute’ tung a a pap hong om kha diam chih guk lauhhuai hi.
    Zanin kilemna lampi tawh kisai saulou i tangkoupih a, lemna kongkhak kihonna dinga chance pe lou ihihleh denchiangin ahoihsangin a hoihlou hong om khathei chih i muhlawhna ziak ahi hi. I bial (area) uh neu deuhdeuh denchiangin mimal vai lel hong suahkhong ding lauhuai a, pilvangtaka et vengveng hun leng ahi hi. Lamka khawpi i chih neuchik himahleh, thu-le-la tam mahmah in, mit a muhtheih bang hileh, suah tum mal sim ah leng vengvung ding in suangtuah thei hi. I gen taksa gengen lai lehang, i khawpi sung ah mipil leh siam tam mahmah a, huai kawmkawm in biakinn a za a sim om in, 99% Christian hiding in i kigingta hi.
    Christian i hi taktak hia, ahih kei leh i maiphaw dia Christianity zang i hi hia chihte theih haksa tak in om a, eimite pau siamlou vaite khenkhat in ‘Mumal Naihe…” a chih utawh i dinmun uh ek kiat a hongkiak ding lauhuai mahmah hi’n muhkholhtheih hi. Mipil leh hausa i tam ziak mah in khelhna bang hi a, bangtan i sawk chiang a khelhna hihiam chih leng theih zawh nawnlouh khawp ding in i gam a seta hi. Lehkha thei lou lua om nawnlou in, mahni self defence na ding khop in lehkha i thei ua, i Rights uh i theih kawmkawm in i duty uah i hamhaih kha nak uhi. Hiai i gen nawpna ziak ahih leh thildang hizaw lou in, i lak ah ngaihdan lel a kiselbuaina a tam luat ziak ahi hi. I kipilsakna leh Christian min i put ziak lel a vangam kai ding adiam chih bel gentan ngam khang!. Zu dawn khat kiang ah bang dia zu dawndawn chi in dotna bawlta lehang, aman ‘nou biakinn kai gige sang in ka ginna a hatzaw, zu dawn khelhna hia? Laisiangthou in na damtheihna ding in ua in dawn zeuhzeuh in chi ahi” chi peuh khawng in dawnna hon pe ding ua, mah ni kisiamtan na tawh meimit theihlouhna mun ah i tawm lut khong ding lauhuai isa mahmah hi. Christiante adi’ n gambling kimawlna khelhna adiam? Christian circle sung ah tuabang kiselna ana tam mahmah hi.
    Gambling i chih chiang in hun awlzatna dan a ngaih ahihban ah, khuak nouhna dia poimawh mahmah ahi hi. Himahleh, a kheng aval a hih a hih chiang in khelhna hongsuak kha zel ahi chi in dawnna i pethei diam? Gambling sung ah kimawlna selua om ding in i ngaihsun kei hi. Himahleh, betting i chihte leng gambling chi khat hi veve hi. Bible siam Theologian leh Philosopher tamtak in bel gambling kimawlna khelhna hi lou in kitaitehna siangthou ahi chi uh a, himahleh, sum kitah a kimawl a hih chiang in khelhna tawh mek mat theih geihgeih in om chi uhi.
    Theizouta khang khawvel paidan! Nikhat ni chiangin thuguk kiphumgu hong kilang khe ngeingei dingin gintakhuai a, hiai thuguk bel Pathian leh mimal kal ahi chi in khephot ni. Khamtheih hihte, gutate banah society in a pomlouh tuamtuam nasemte chauh khelhna bang a i ngaihkhak ding uh thil lauhuaitak hi a, Saptuam a nasemtute leng adik kim tuankei a, tuaban ah Government nasemte leng a diktat vek tuan kei ua, a lom a tang a khial khawm vek houh i di uam chih bang dotna tham ching hi. Saptuam/ Sahkhaw makaite, civil society leader tuamtuam banah NGO heutute kingaihsun ni, leitung ah mihingte’ muhin diktat bangin kilang mah lehang le Van-gam kongkhak ah sawnkhiakin i om thouthou diam?