MANIPUR EXPRESS | JULY 27, 2016

HEADLINES:
Employee te’n August apan 23.55% pung in khalawh la ding
Centre Govt in 7th Pay Commission zat di’n pomkipna bawl
New Delhi, July-26: Central government in 7th Pay Commission zat ding in notification suahkhia a, central govt. nuaia nasemtu 4.8 million leh pensioner 5.2 million te’n August 2016 apan in khalawh 23.55%  pung in la ding uhi. 7th Pay Commission Panel in June 2016 a recommendation abawlte Cabinet in pomsak a, khalawh tangpi Rs. 7000 akipan Rs. 18,000 kikalin pung ding hi. Seventh Pay Commission zatna ding tawh kisai enkai di’n CBSE chief Rajesh Kumar Chaturvedi guang in om hi. 7th Pay Commission panel te’n November  2015 in junior level ah basic pay 14.27 percent pungsak di’n recommend uh a, central government nuaia sem lakh 33  banah armed force personnel lakh 14 leh pensioner lakh 52 te’n khalawh pung hamphatpih ding uhi.

    7th Pay Commission zat ding tawh kiton in, Central government nasemtu ginomlou te’n khalawh pung hamphatpih lou ding uh hi’n leng kigen a, Finance Ministry in notification a suahkhiakna ah Modified Assured Career Progression scheme a "very good" tung zoulou te’n hamphatpih theilou ding uh hi’n taklang hi.  Thusuakin agendan in 7th Pay Commission zat ding ziakin 2016-17 sung in India solkal in Rs. 1.02 lakh crore seng ding a, arrear leh pension ah Rs. 12,133 crore seng beh ding hi.
Seventh Pay Commission Panel apan recommendation kibawl Finance Ministry in a pomte lakah  kum 20 sung central government nuaia sem te’n promotion khatvei leng a muhkei uh leh nasem hoih a chiamteh hilou ding uh a, amaute’n annual increment mu theilou ding ua, tua ziakin central government nasemte’n ginomtak a asep uh ngai ding hi’n kigen hi.


Ex-Serviceman League makaih in Kargil Vijay Dewas Day zang
Lamka, July-26:  Ex-Servicemen League makaih in tuni’n Hiangtam Lamka a YPA GHQ hall ah ‘Kargil Vijay Dewas Day’ zatna om a, Chief Guest in Lunminthang Haokip, IAS DC/CCpur pang hi. Brig. Ajay Kumar, 27 Sector Assam Rifle; Vijay Hooda, CO, 6th Sixth Infantry, Khuga Battalion, CT Lian Guite, MDC 16- New Lamka West leh G. Thangkhosuanmung, EM/MDC banah Ex-Servicemen leh Widows (Army sisa-te’zi-te) tamtak tel uhi.  Huai hun ah Kargil war a si, Lamka mi Havildar Chinzasiam h/o Niangkhanvung of Hebron Veng, New Lamka leh Zamkholal Vaiphei s/o Tingkhongai, Hmuia Veng innkuante’ kiang ah pahtawina thilpiak pia uh a, mi 2-te ahihleh 7th Assam Regt., apan 42nd  Rashtriya Rifles attached hi uhi.
    Chief Guest in gam leh nam adia hinna pia mihangsante zahna sangpen pia a, India in galpi tuamtuam tuaktou in 1962 (Sino-Indian war) leh Pakistan (Kargil War-1999) tawh kidouna nei ngei a, anaipen in 1999 kum in Kargil war maituah a, huai ah ni 60 sungin India sepaih lakh 2 val sawllut hi uh a, 527 martyrs uh a, July 26, 2016 in Siachen Glacier mun ah buaina kiveng hidan in gen hi.
    Brigadier in Kargil buaina a site zahna sangpen pia in, Army pensioner innkuante’ hi’n mipi kuapeuh hileh Army tawh kisai a haksatna tuak om leh panpih dia mansa ahihdan gen hi. Kargil buaina ahihleh May 20, 1999 in kipan a, July 26, 1999 in kidouna khawl hi.


Rayburn College in Degree leh HSE topper-te kipahpih
Lamka, July-26: Rayburn Chapel, New Lamka ah tuni’n Manipur University nuai a rank holder student 5 leh CoHSEM nuai a stream topper student 3 kipahpihna om a, Khual Tonsing, Dean of Exam makaih in awards hawmkhiakna om hi. Rev. Dr. TK Muana, Governing Board Member in hasotna thugen a, Rev. Khen P. Tombing, Principal, Rayburn College in thugenna leh topper student-te’ adingin Pathian kiangah thumsak hi. Hiai hun Langkhanpau Guite, Governing Board Chairman inleng uap hi.
    MU degree rank holder-te leh class XII a stream topper 2016 te ahihleh- Jangkholam,1st position, B.Com (Hons); Wellborn Ginkhankhual, 4th position, BA (Hons) History; Lunmalsawm, 5th position, BA (Hons) Political Science; Chiinngaihmawi, 10th Position BA (Hons) History; Neihlianching, 10th Position BA (Hons) English; Chinggoulun Buansing (XII Arts-85.4%); Doudikthang (XII Science-80.4%) leh Ginsuankhup Tonsing (XII Commerce -66.8%) hi uhi. First position Jangkholam in kipahman Rs.10,000/- ngah a, adangte’n Rs. 5000/- chiat ngah uhi. Kipahmante Langkhanpau Guite leh Khen P. Tombing te’n pekhia uhi.


LOCAL NEWS:
DI Pick-up accident:
Nupi gailai 1 telin mi 8 liam
Lamka, July-26: Henglep sub-divn huamsung D. Khawzim leh Chiangpi kikal ah tuni zinglam dak 11:30 velin Lamka manawh a tai passenger pua DI Pick-up (No. MN02/ 8835) tuahsia a, nupi gailai 1 telin mi 8 liam uh a, nitaklam dak 5:00 velin Dist Hospital casualty tut in om uhi. Thukizadan in, gari ah mi 10 tuang uh a, amaute lakah Hemananda (19) d/o Inaocha of Toupokpi, Chingmuankim (24) (pregnant) w/o Liansuanzam @ Zampu of Thanlon, Jonathan (25) s/o (late) Mangkhohen of Bualjang, Paulalmawi (23) s/o Zomlian of D. Phailian, N. Dongkham (66) s/o (late) Singgou of Bukpi Village, M. Sunder (18) s/o M. Open of Toupokpi leh Mathew Paumuanlal (30) s/o (late) Thang David of Thanlon liam uhi. A liamte lakah mi 6 admit in om uh a, tunitakin doctor te’n Imphal a etkol di’n Chingmuankim referred uhi. Nupi gailai Chingmuankim ahihleh Lamka a naunei dinga hongzin hi’n kigen hi.
Thiltung zakphet in YVA GHQ makaih in TRATDA leh phatuamngai te’n tuahsiatna mun delh uh a, CMO/CCpur in Medical Deptt.’ Ambulance sawlin damloute hospital puaktung in om uhi. Gari neitu ahihleh Kaikhosiam s/o (L) Thangzadou of Thanlon hi’n kigen a, anau Douthianmuan in ahek hi’n kigen hi. Gari neite gendan in Thanlon apan Lamka manawh a tailai, steering buai ziaka accident in, lampi khanglam feet 50 vel ah tuksuk in 3vei kilep hi’n gen uhi.


Thangmuansiam in hospital pawtsanta
Lamka, July-26: Master Thangmuansiam s/o Nengkhantuang & Chinggouniang of Gangpimual damlouhna neih ziaka Advance hospital, Imphal ah July 21, 2016 a operation kibawl tuni’n hospital pawtsan theita a, CT Lian Guite, MDC (16- New Lamka West) leh a Team CT Lian member te’n vapi uhi.  Amah kalnih zawhin RIIMS ah check paipih ngailai ding a, kha (month) 1/2 nungin second operation bawl lai hiding a, huai zawhchiang in operation zawhsiang hiding in kigen hi. Thangmuansiam operation lawhching saktu Pathian leh operation ding tawh kisai a itna ziaka sum thawh teng tung ban ah thumpih teng tungah Team CT Lian in kipahthu gen uhi.


Student-te’ zuih ding thusuah bawl
Lamka, July-26: Thadou-Kuki Students' Union, Manipur GHQ a Inf. & Publicity Deptt., apan thusuah kimu in a taklatdan in student kuahiam uniform silhkawma khamtheih, guihtheih (intoxicating) leh khawtang adia thil hoihlou hihte tungah TKSU GHQ in action la ding hi'n taklang uhi. Student te'n mahni school rules, dress code leh discipline zuichiat dingin theihsakna bawl uh a, student-te' maban hoihna ding a TKSU panlakna mipi’n kithuahpih chiat dingin ngen uhi.


JAC dharna paizom zel
Lamka, July-26: Joint Action Committee against Anti-Tribal Bills (JAC-ATB) makaih tuni’n Hiangtam Lamka a Salphate’ Pumbuk ah Bijang, Chiengkawnpang leh Gocinkhup Veng-te sit-in-protest tu uh a,  Romeo Hmar, Convenor, MTFD; H. Mangchinkhup, Chief Convenor JAC-AATB te’n leng uap in thugen uhi. Dharna ahihleh JAC member Thangzamang leh Henkholun Gangte ban ah Rev. Laldawngliana-te’n makaih uhi.


OPD leh Immu. office ah mitam
Lamka, July-26: Kal nihvel paita in Lamka khawpi leh a sehvel ah hitang khawsik hileng in naupang banah piching tanpha mankha in tamtak damlou uhi. Huai tawh kiton in Dist. health deptt in theihtawp suah in panla a, Dist. immunization office ah niteng in JE dalna damdawi kikap omden a, tuni’n mi tamtak kikap om a, zingkal dak 7:00 in malaria deptt te’n Bungmual YPA hall ah JE dalna damdawi kap uh a, Bungmual, Phailian, Pearsonmun telin veng tuamtuam ah fogging machine zangin thoukang thahna damdawi kap uh a, sunzom zel ding uh hi’n kigen hi.
    Dist. hospital OPD ah piching telin naupang kum 13 nuailam ki-ensak tamthei mahmah a, hospital authority in damlou hileng tawh kisai a fever clinic 2 honbeh a, doctor duty ding guanbeh in, doctor te’n khosik et-na machine suak thak zangin damloute en uhi.


LYC te’n cleanliness drive nei
Lamka, July-26: Leijangkhopi Youth Club (LKYC)  te’n zan leh tuni’n Leijangkhopi ah cleanliness drive nei  uh a, inn kim a tui luangkhelou-te khahkhia in damdawi zang in inn kim leh kiang banah toilet kim leh kiang kap (spray) uhi. Khawsung mipi’ kiang ah inn kim leh kiang hihsiang ding in thuhilh uhi. Kumlui 2015 in HM English H/S (HoMES) student-te JE dalna kikap hun un khawsung mipi leng JE dalna damdawi in kikap uh a, tukum in Leijangkhopi ah JE natna ziaka damlou kuamah omlou hi’n kigen hi.


YPA Lamka block makai telthak
Lamka, July-26: Young Paite Assn (YPA) Lamka block in July 22, 2016 nitak dak 7:00 in Hiangtam Lamka a block office ah 2016-2018 sung vaipaw ding lepthakna leh in-charge kipiaktuahna nei uh a, term omlai tenga makai ding secret ballot tungtawn in tel uhi. Huai ah President in H. Chinsianmung, Vice President- Sumpi Hanghal, Secretary- Nengzalian Tonsing, Asst. Secy- Lianminthang, Fin. Secy- T. Paubiaklun leh Treasurer in G. Kamlianding telching uhi.


Barrack Type Quarter hong
Lamka, July-26: Seilenmang Khongsai, MDC (1-Khousabung) in tuni zing dak 8:00 in S. Kotlian khua ah school teacher-te’ omna ding SPA 2013-14 fund a kibawl Barrack Type Quarter hong a, Upa T. Thanga Vaiphei in Pathian kiang ah thumna in lan hi. Hiai hun Mannuamching, IAS, ADC/CCpur & CEO/CCpur in uap hi.
    Seilenmang in S. Kotlian khua ah govt. in building poimawh tak abawlsak-te khawsung mipi'n amau mimal property bang a ngai poimawh leh hoihtaka kem ding in ngen hi. Kum nawn chiang in S. Kotlian Primary school ah nu-le-pa te'n atate uh school kaisak ding in ngen hi.
    Mannuamching in Barrack Type Quarter honkhiat ahihtawh kiton in teacher-te leng sepna mun a om ding leh school hoihtak a kai dingin ngen hi. Education khantouhna ding a khawsung mipi'n theihtawp suah a panla chiat ding inleng deihthu gen hi. Barrack Type quarter ah teacher-te giahna ding room 5, toilet 2, bath room 2 leh hall 1 om hi.


SUUNNA:
Kaichinmang Manlun (86) f/o M. Liansuankap of Vaalveng, New Lamka, zannitak dak 10:50 velin BP Stroke in si a, tuni’n YPA hanmual, New Lamka ah kivui hi.
Tlangruoli (71) w/o (late) Chinzado of Bijang, zannitak in awmna in si a, tuni’n Bijang hanmual ah kivui hi.
L. Paulianthang (6 months) s/o L. Thanggoutan of Thanlon, tuzing dak 3:00 velin Lamka damdawi inn ah khawsik in si a, Thanlon khua a vuiding in kipua hi.


IMPHAL NEWS:
Kargil Vijay Diwas zatna om
Imphal, July-26: Lamphel a Rajya Sainik Board-te saina in tuni’n Rajya Sainik Board mun ah tuni’n ‘The 17th Kargil Vijay Diwas’ zatna om a, huai ah Chief Guest in L.M. Khaute, DGP pang hi. Hiai hun Major Gen. V.S. Sreenivas, VSM**, IGAR(S), Major Gen. S.S. Mishra, VSM, GOC, Red Shield, Top Police officer leh mi tuamtuam te’n uap uh hi’n kigen hi. Chief Guest in a thugenna ah Kargil Vijay Diwas ahihleh kum 1999 a Kargil war hun ah Indian Army-te hangsanna leh Pakistan-te tung a vualzawh uh lawpna hi a, Kargil war in hangsanna leh India sepaih-te kipiak zawhna taklang hi’n gen hi.
Kargil war hun ah Manipur apan Lance Naik Kaleshore, Sepoy Charles Nicholas Moyon, Sepoy Beningvir Moyon, Lance Nayak Birneithang, Sepoy Zamkholal Vaiphei, Sepoy Kapani Asuli leh Sepoy Daikho Mao-te Martyr in si uh a, tuni a programme hun ah innsung mite uh pahtawina leh kipahpihna hun zatna om hi. Huailou in State govt. saina in 1st Bn Manipur Rifle Banquet Hall ah Kargil Vijay Diwas zatna om a, Chief Guest in CM. O. Ibobi pang a, hiai hun Parliamentary secretaries, MLAs leh govt. official te’n uap uh hi’n kigen hi.


Sharmila in anngawl khawlsan ding: Election tuh ding
Imphal, July-26: Manipur a AFSPA lakkhiak ding deihna a anngawl a nuakna nei Irom Chanu Sharmila tuni’n  Imphal West Judicial Magistrate Court ah va kilang a, huai ah Chief Magistrate Lamkhanpau Tonsing in custody ah a om hun ding beisak in Court ah Aug 9, 2016 ni a kilang nawn ding a theisak hi’n gen hi. Court pawlam ah media-te tawh kimuhna hun ah Sharmila in Manipur apan Armed Forces Special Power Act (AFSPA) lakkhiak ding phutna in Nov 2000 apan anngawl nuakna ana pat khawlsan ding chi a, Khurai A/C apan Independent candidate a 2017 election tuh ding a ut thu gen hi. Aman a genzelna ah Aug 15, 2016 Independent day ni a anngawl khawlsan sawm a, himahleh Aug 9, 2016 ni a Court ah akilah zawh nung a anngawl khawlsan maithei chi’n gen a, election a tuh utna ziak ahihleh Manipur a administrative system khek ding leh AFSPA doudal ding chih louh agenda dang neilou hi’n leng taklang hi.


Kh. Ratan case tawh kisai hearing
Imphal, July-26: Manipur High Court ah tuni zinglam dak 11:19 apan sunnung dak 1:20 tan JCILPS a convenor lui Kh. Ratan tungah ‘wanted tag’ tawh kisai a case tawpna ding (final) hearing om a, huai hun ah division bench Justice N. Koteswar leh Justice Kh. Nobinsingh te’n thutanna khamkhawl (reserve for order) a koih uh hi’n kigen a, hearing hun ah mi a tam ziak in Court room pawlam tanpha ah mi hunkhop om hi’n leng gen uhi.


Card piakna dia sum khon om
Imphal, July-26: Meira Paibi Development Association leh Oinam Sawombung Youth Citizen Organisation (OSYCO) te’n Oinam Sawombung area ah National Food Security Act nuai a Food Security card piakna dia mi khenkhatte’n sum Rs. 200-Rs. 300 kikal khon uh hi’n gen uhi. Hiai thu tawh kisai in OSYCO a DDAM office huamsung ah tuni’n emergency meeting om a, huai hun ah sum sungte’n tunitan a Food security card a muhlouh uh tungtang genkhawm uhi. A kisaipih thuneite’n food security card muhna dia sum piak ngai hiam chih hilhchetna a bawl ding uh chi’n thupukna bawl uh a, beneficiary gentheite’n tunitan a  bangmah a muhlou mah uh hiam chih Counselor kiangah dotna bawl uh hi’n kigen hi.


Student leh Police-te kinawk tuah
Imphal, July-26: Manipur ah ILPS zat ding ahih keileh huai tawh kibang a tualsual mite humbit nang a dan bawl khiak ding leh JCILPS convener lui Kh. Ratan tungah ‘wanted tag’ lakkhiak ding phutna in CC Hr. Sec. School, TG Hr. Sec. School leh Ananda Singh Hr. Sec. School a student te’n tuni zinglam dak 11:00 velin Palace Gate ah rally a neih sawm uh Police te’n a dal ziak un kiselna piang a, Sanjengthong bridge ah Police te’n Chief Minister bungalow zuan a pai CC Hr. Sc. School a student-te a kham ziak un traffic hihbuai in om a, police te’n student-te hawlkhiakna dia tears gar banah chiang pum zat khum uh a, huai ah student bangzahhiam liam uh hi’n kigen hi. Nitaklam dak 3:00 velin Johnston Hr. Sec. School apan student te’n Keishampat tan rally pai uh a, huai ah lamgei ah silent protest nei uh hi’n kigen hi.


TUNI THUPI:
“Pianken thak, diktatna leh sianthouna a Pathian batpih a siampen silh un.” – Ephesate 4:24


EDITORIAL:
Irom Sharmila’ lungtup! Kum 16 sung an a ngawl bangchi?
Tuni a Manipur district court a dinsak a om kum 44 a upa Irom Sharmila in kum 16 sung vingveng ann angawl nungin tu in ann ngawl nawnlou ding ahihdan leh kumnawn 2017 a Manipur state assembly election tuh ding ahihdan gen a, mi tamtak adingin kipahhuai mahmah dinga, tamtak ading mahin bang ‘policy’ kigolh ahi dia chih ngaihdan piang mahmah thei hi.
    Kuapeuhin a min i zakzak uh Irom Chanu Sharmila ahihleh, 14 March 1972 in Kongpal, Imphal ah piang hi. Armed Forces (Special Powers) Act kichi Manipur state apan lakkhiak vilvel ding chih deihna ziaka annngawl a kiphinna nei ahihdan ithei uhi. Kum tampitak ann a ngawl ziak leh mi nasa mahmah khat a chiamteh ahihman in "Iron Lady of Manipur" chihin om a, unau phaijangmite’n "Mengoubi" ana hial uhi.
    Kum tamkuamtak paisa chi maile hang, November 2, 2000 apan hunchiam omlou ann ngawl ana pan a, tuni dong akhawlkei. Tua ziak mahin "the world's longest hunger striker" chih minvuahin om a, kum 2 paisa a ‘n International Women’s Day, 2014’ hunin MSN Poll ah ‘top woman icon of India’ award khuksakin leng ana om hi. Ahi a, tutung a bangchidan a Manipur assembly election om ding ah hong tawmlut sawm ahia chih ngaihdan liantak omthei mawk hi. Ahitakin genle hang, 2014 in party nih in national election om dek hun a election tuh (fight) dingin ana chialpi uh a, himahleh, aman ana nial hi. Himahleh, tutung a hong tawmsawm lut guihna in gen neikha mahmah maithei hi.
    Sharmila in ann angolhna ziak, ahihkeileh gen le sak om tuamtuamte, Malom case leh adangdangte gensawm hikhang himahleh, sih tanpha a ann ngawl dia kipekhia khatin August 9, 2016 apan ann ngawl khawlsan ding, kumnawn election tuh ding chih court mai a hon genkhiak theih mawkleh huai in gen saupi neiding hi. Mihing apiangkhia khat in kum 16 sung ann ngawla a nak apan ann piak (nose feeding) hitawk leleng adamsuah mi lamdang mahmah ahi. Hiai tan ann ngawlding a bang ngaihtuahna nei leh lungtang pua ahi dia chihte telin a guk a ana tawsawntu om mahmah ding ahihdan haihvual hilou a, tu hun a AFSPA gennawnlou kawmkawm a, MLA hon genkhawng thil lamdang leh maktak hi a, MLA-te thil hihtheihna lian mahmah ahihdan hon thei khawnung phing adiam chih ut huai hi.
    Eilawi inleng Sharmila tungtawnin sinlai (lesson) banghiam ilak theih uh om dingin gintak huai hi. Naga issue ithei a, Bodo leh Telangana issue te leng ithei vek uhi. Eilawi kiphinna adiakin 3 bills tungtang leng MLA election chauh ah hong ke maimah diam maw chih mi tamtakin ngaihtuahta hi. MLA ut ziaka… ahihkeileh kuate hiam fuihsa ziaka chihkhawng in i hong om nimnem kha ding uam chih theih hilou hi. Kum 16 sung vingveng ann ngawla om Sharmila in MLA-te poimawhna leh poimawhdan theih ahihleh mipi’n leng MLA-te poimawhna leh poimawhdan itheih uh hunta a, bangchileh maban kalsuan ding ihi ua chihte kikup a genkhawm hun mahmahta hi.
    Central government a poimawh mahmah a, Sharmila in kum 16 sung ann a ngawlh hangin Manipur state ah AFSPA lakkhiak ahikei a, NSF telin Naga Hoho te’n Nagaland state apan AFSPA lakkhiakna dingin kiphinna thupitak nei mahle uh tu in kha 6 behlap ahinawn. Jammu and Kashmir ah BJP leh PDP in vaihawmna lenkhawm in J&K Chief Minister Mehbooba Mufti in AFSPA lakkhiak dingin kiphinna nei mahleh aphatuam kei a, Union Defence Minister Minister Manohar Parrikar in thil omdan Home Ministry in hoihtakin hon enkai laiding chi hit hiat hi. Eilawi bangchituk in kiphin in khat le khat kimawhsa in kinawknawk lehang leng government poimawhna i theih uh kisam a, mipi’n palai dia itelkhiakte douthawh sangin amaute’ lungtang i zawhtheih uh a poimawh zaw diam? Kum 16 sung ann ngawl Irom Sharmila in mipi’ palaite’ poimawhna theikawmin kum hiai tanvei ann angawlna pen MLA politics ah hon sunglut maimah hi. Movement himhim MLA politics tawh a kizawitawn louh hamham deihhuai hi.