MANIPUR EXPRESS | JULY 4, 2016

HEADLINES:
India President in US Independence Day chibai buk
New Delhi, July-3: India President Pranab Mukherjee in USA President Barack Obama kiangah ‘Independence Day’ chibai buk hi. US in zingchiang (July 4, 2016) in Independence Day zang ding uh a, huai hunah leitung gam tuamtuam akipan mi  poimawh tuamtuam tel ding uh chihthu om  uhi. Tuma in US leh India  in gamnih kikal a High-level contacts om in gah kipahhuaitak tun  dingin gintak hi a, India inleng US tungah lam tuamtuam a kizopna omsate leh omtou zel dingte ah kinepna liantak nei hidanin kigen hi.

    United States leh India in tup kibang nei uh hi’n President Mukherjee in gen a, gamnih apan mipite hoihna ding leh leitung a lemna leh masawnna omtheihna dingin India leh US poimawh uh chi hi. Indian Prime Minister Narendra Modi in tuma a US avehna tawh kisai ah gah tamtak piang ding hi’n Mukherjee in gen a, India mipite’n United States masawnna ding deihsak uh chi hi.
    US President Obama kiangah India President Mukherjee in chihtakna, ginomna leh diktatna kichi gam nihte’ kalah khibah bang hi a, tua ziakin kuaman huai i mansuah  hetlouh ding ahi chi a, ‘democracy, pluralism leh rule of law’ te India in chi taktakin paipih ahi chi hi. Helpawlte douna, thuguk kipiaksawnna, sum kidawnna tuahna leh defence thil a kizopna leh kitanauna h India gin-om mahmah ahihman in US in leng gin-omna a suah touhzel  India kinem ahi chi hi. US in kum 240 paisa (July 4, 1776) in United Kingdom empire akipan zalenna (independence) ana ngah uhi.


State teng ah Commercial Court poimawh : Chief Justice
India a Commercial Court masapen honkhiak in om
Raipur, July-3: India gamsung a Commercial Court leh Commercial Disputes Resolution Centre masapen Chhattisgarh capital Raipur ah honkhiak in om a, Chief Minister Dr. Raman Singh leh Supreme Court judge Madan B. Lokur te’n Chhatisgarh mipite ading in Naya Raipur a Commercial Court complex lan khia (dedicate) uhi.
    Commercial Court Complex sungah Video-conferencing, E-Court, E-Library, E-Filing leh E-Summon telin ultra-modern facility tuamtuam om hi’n kigen a, India ah court tamtak om mahleh Chhatisgarh a Court tawh kibang omnailou hi. Commercial Court leh Commercial Disputes' Resolution Centre bel investor leh business saimite’n phattuampih ding uh hi’n Chief Minister in tuni’n gen a, court sunga ultra-modern facility omte ziakin commercial dealing  tawh kisai ah investor-te haksatna  beita ding chi hi.
    Supreme Court Judge Madan B.Lokur in Commercial Court tungtawn in judicial system bawlhoih hiding chi a, judicial system tawh kisai in Chhatisgarh mipite hampha uh chi hi. Chief Justice of India inleng huai hun uap theikei mahleh Commercial Court kihongkhia kipahpih ahihdan vaikhak a, State teng in Commercial Court & Commercial Disputes' Resolution Center poimawh uh chi hi. Tuni a Commercial Court honkhiakna ah Chhattisgarh High Court a Chief Justice Deepak Gupta leh Rajasthan High Court apan Chief Justice  Mr. Naveen Sinha banah Judge tuamtuam kihel uhi.


Tuilou leh water supply tanpha buai
Khuga Dam left-side Canal kisia; tuilou bawlte beidong
Lamka, July-3: Khuga Dam left-side Canal zan nitak zankhanglai in kichim a, canal ah tui luang thei nawnlou hi. Huaiziakin Khuga tui a kinga Mata leh Lingsiphai area a tuilou bawlte’n beidawt thu gen uhi. Lamka khawpi adia tuinek piakna leng canal a tuiluang a kinga ahihman in Mata khawgei a reservoir ah tui laklut ding omlou a, Canal bawlhoih ma khawpi sung tui supply theilou ding uh hi’n kigen hi.
Canal siatna mun kum 2/3 paisa akipan  dengdel a, feet 64 vel ding canal bang (wall) tui in phusia hi. PM-lui Dr. Manmohan Singh in Dy Chairman, Planning Commission, alet lai Oct 3, 1986 in foundation suang phum a, kum 28 sung nasep ahihnung zawhsiang taktakma Nov. 10, 2010 in Sonia Gandhi, Chairperson UPA in hong hi. Khuga Dam bawlna in Rs. 434.65 crores zatbei hi a, Hydro- electric 1.5 mega watt, buh china tuilou  15.000 hectares ah tui supply ding chih banah nitengin water supply 5 million gallon pekhethei ding chih  himahleh electric a piak khiaklouh ban ah tuilou adi’n tui kiching supply tuanlou a, water supply leng deihbang in pekhe theilou hi.


LOCAL NEWS:
Compartmental examna om ding
Lamka, July-2: New Lamka a Ebenezer Academy ah July 8, 2016 in class X/HSLC Compartment examna  om ding a, huai dingin July 4, 2016 zinglam dak 10:00 in Phungkhothang govt H/S ah exam centre fee Rs. 300 pia in school authority te’n admit card laktheih ding a, huailou in zing dak 9:00 tan in New Lamka (G) a T. Hanglamthang, Officer i/c HSLC kiangah leng laktheih ding hi. Tutung in CCpur dist. a HSLC compartmental exam ding student 394 om uhi.


JNU ah Associate Prof. sem ding
Lamka, July-3: Fulbright Postdoc Scholar Dr. Nemthianngai Guite d/o M. Khanpi Guite of Nehru Marg in Delhi University  a School of Social Work ah kum 10 vel Assistant Professor a sepnung tunai zekin Jawaharlal Nehru University (JNU), New Delhi a Centre of Social Medicine and Community Health (CSM & CH), School of Social Science (SSS) ah Associate Professor (unreserved Post awng khat om)  ah ching a, July khasung  in zom ding  hi’n kigen hi. Aman kum 2015 in Fulbright-Nehru Postdoctoral Research Fellowships ana ngah ziak in, kum nawn 2017 in US ah Postdoc hih dinga kisalel hi’n kigen hi.


Assistant Director in kaisang
Lamka, July-3: Nemzarual w/o Dr. KP Guite in Doordarshan Kendra (DDK) Imphal a Programme Executive hun sawttak a sep nungin July 1, 2016 in Assistant Director (Program) in kaisang hi.


Siamsinpawlpi in training sai ding
Lamka, July-3: Siamsinpawlpi GHQ in New Lamka a EBC Dorcas Jubilee Guest House, Mini-Auditorium ah  July 5-9, 2016 sungin  Generation Global Project a Fecilitator leh Siamsinpawl nuaia teacher-te ading in training sai ding uh a, Rev Suanzalam, Co-ordinator (Instn), PCI( R) in July 5, 2016 zinglam dak 10:00 in hong ding hi. Training ah Resource Persons in Mrs. Sandhya Gupta, Education Consultant, ASIA; Khumi Gangte, District Co-ordinator, SSA; T. Chinsuanthang, Principal, Saviours Public School; M. Darneingam, AI, ZEO/CCpur; Muani Tombing, Director, Lainat Ministry leh MK Lal Guite, Programme Officer, NFI/Delhi in thupi tuamtuam zangin sinsak ding uh a, July 9, 2016 sunnung in Rev. S. Ginmalsawm, Director (Social & Dev.) EBC in training hun khak ding hi.


Inn ah vatawt khat ana om
Lamka, July-3: Lailam Veng a Upa H. Vungzamang inn ah tuni zingsang a thawhma un vatawt (duck) khat om a, inn neite’n lamdang sakthu gen uhi. Lamdang a sakna ziak uh ahihleh huai a lutna ding inn konglam a main gate kikalh a, ground floor lutna kongkhak collapsible gate leng kikhak hi a, common/varandah  ah ana om mawk hi’n gen uhi.Amau a innkim uah  vatawt nei omlam leng theilou uh hi’n gen uh a, huai vatawt a pumpi siang sitset a, lamdang a sak ziakun  hoihtakin kemlai uhi.


June kha in malaria positive 11
Lamka, July-3: District  Malaria deptt. te’n June 2016 kha in damlou a khawsik mi 1973 sinsan test uh a, huai ah malaria positive 11 mukhia uh a, huaite  lakah malaria PF 8 tel hi’n kigen hi.


Prospectus leh past question
Lamka, July-3: Manipur University MU) nuai a Post Graduate (MA) course tuamtuam zil utte’n Manipur University Eimi Welfare Society (MUEWS) tungtawn in prospectus leh information tuamtuam ngahtheih ding a, CCpur dist. a omte khualna in July 4, 2016 zing dak 11:00 leh sunnung dak 1:30 kikal in  CCpur Govt. College ah Help Desk- cum-Counselling Centre hong in prospectus hawm ding uhi. Huai ah prospectus ban ah course tuamtuam a subject omte  question-lui  leng muhtheih ding a, a lunglutte’n ngaihven theih hi.


Diarrhoea Control Fortnight
Lamka, July-3: Dist. Health Society/CCpur saina in July 5, 2016 zinglam dak 11:00 in CMO Mini Conference Hall ah ‘I-Day Orientation on Intensified Diarrhoea Control Fortnight (IDCF) omding hi. Huai ah Special Guests in Mannuamching, IAS, CEO/ADC; T. Goukhomang, ZEO leh Dr J. Son Goukham, Medl Suptd. Dist. Hospital te pang ding uhi. Orientation hun ah CHC leh PHC a i/c Medical Officer-te, Dist. Program Officer (IDCDS), CDPO-te telding uhi.


IMPHAL NEWS:
IAS a Topper kipahpihna zatpih
Imphal, July-3: All India Confederation Of SC/ST Organisation Manipur, Library & Information Centre Kakching leh Sahitya Seva Samiti Manipur-te saina in Kakching a Library & Information Centre a Auditorium ah tuni zingsang in UPSC 2015 examna ah Topper Tina Dabi leh rankers dangte kipahpihna program leh interaction hun zatna om hi. Hiai hun mun tuamtuam apan students leh academicians te’n uap uh hi’n kigen hi. Akigendan in Tina Dabi ahihleh India pumpi a Schedule Cast lakah UPSC examna ah topper  masapen hi’n leng gen uhi.


Kiphinna tuamtuam in ni 55 buaisak
Imphal, July-3: Serto Tondana Kom, Independent Researcher in tuni’n Manipur Press Club a press conference hun ah tukum sung a kiphinna tuamtuam tawh kisai survey a bawl tungtang  report suahkhiakna nei hi. Huai report ah Manipur in tukum sung a nasep ding ni (working day) 277 a neihna lakah January apan June kha tan in bandh, strike leh kiphinna tuamtuam ziakin ni 55 man suahta hi’n taklang hi. Statistics a luikhiak dungzui in state govt. employee te’n tukum sung in Saturday 12, general holiday 25 leh Sunday 52 telin holiday ni 89 nei ding ua, holiday leh non-working day simlouh in employee te’n nasep ni ding (working day) 277 nei uh a, Central govt. office-te nasep ding ni 53 mansuah uh hi’n leng taklang hi. State leh Central employee-te statistics a kibat louh tungtang Chief Minister leh Chief secretary te’n enkai ding leh bawldik ngai-te enzui ding in ngetna bawl a, bandh ziakin  Manipur in nikhat in Rs. 36 crore leh National Highway-te ah economic blockade ziak in Rs. 3.09 crore mansuah gige hi’n  taklang hi.


Mun niamnate ah tuilian
Imphal, July-3: Imphal area ah ni 2 paisa apan vuah a zuk ziak in mun niamna mun-te ah nullah tamzaw ah tui luang let a, Uripok area ah tuilet ziakin dukan leh sumsinna mun teng dinkhawl hi. Irrigation and flood control department a official te’n Nambul lui kiamsuk zek mahleh tui luang a hat dan lauhhuai hi’n gen uhi. Huai louin Chingmeirong Keisamthong, Sagolband, Dharmasala leh Paona bazar-te ah tuilian zek a, mun tuamtuam ah vuahzuk dan kibang lou a, Imphal area in vuah tui 24mm-26mm kikal mu a, Saikul ah 28mm, Litan ah 26mm leh Kangpokpi in vuah tui 15mm mu hi’n taklang uhi.


6th pay commission pe din phut
Imphal, July-3: Khadi and Village Industries Employee Association of Manipur (KAVIEAM) te’n 6th pay commission zat ding in phutna bawl uh hi’n kigen hi. Tuni’n press conference om a, Secy, KAVIEAM in kum 1966 a Manipur Legislative Assembly in bill a pass uh tungtawn a statutory body dan in Manipur Khadi & Village Industries board bawlkhiak hi a, sanctioned post 75 lakah staff 24 lel lak ahihziak in scheme/programme sepkhiakna dia haksatna tuak uh a, state govt. nuai a employee dang-te tawh kibang in nasem mahle uh kha lawh a muhzah uh kibang lou hi’n gen hi. Loktal Development Authority, Co-operative Union, Pollution Control Board, Public School leh Manipur Housing Corporation te’n R.O.P 2010 banah D.A. 119% mu uh a, Khadi leh Village Industries board te’n 5th Pay nuai a D.A. 47% mu uh a, hiai tungtang govt. in a kinthei pen a enkai ding in ngetna bawl uh a, huai ahihkeileh Centre govt. ah tut ding uh hi’n leng taklang uhi.


AMWJU' felicitation programme
Imphal, July-3: All Manipur Working Journalist Union te’n Manipur Press Club ah tuni’n Meghachandra Kongbam in IPR a Director a let kipahpihna in hunzatpihna nei uh a, Chief Guest in Tombiraj Singh pang a, Functional President in W. Shyamjai, President, AMWJU pang hi. Huai ah AMWJU leh National media correspondent te’n  Director in media person-te hamphatna dia pan a lakte leh Departmental welfare scheme tawh kisai mipi theih din niteng in media tungtawn ah ataklat tungah kipahthu gen uhi. Huai ah Director in a sep tung apan member hikei mahleh Union tawh kizopna nei uh a, media omlou a democracy full-fledged hithei lou a, Manipur kichi nam tuamtuam omna ahihziak in Govt. schemes tawh kisai awareness om theihna dia DIPR-te khut ah kinga hi’n leng taklang hi. Hiai hun AMWJU member leh DIPR staff te’n uap uhi.


Kipum khatna suse dingte dalding
Imphal, July-3: United Committee Manipur (UCM) te’n Lamphel ah tuni’n ‘The 16th Foundation Day’ zatna nei uh a, huai ah presidium member in E. Johnson, President,  UCM; Kh. Chingkhei, President,  IPSA ; S. Ratankumar, President, UPF ; M. Medun Maring, President, NIPCO, Ph. ShakhiLeima, President,  AMKIL; Yunmancha Dilipkumar, President, PANDM; Ksh. Somorendro President, ACOAM leh KANGLAMEI President-te pang uh a, Manipur kipumkhatna suksiat sawmte nang  ding banah pan-Naga council bawlkhiak a sawm uh doudal ding uh hi’n gen uhi. Hiai thu tawh kisai  media-te tawh kimuhna ah E. Johnson, President, UCM in India govt. leh NSCN(IM) te kilemna in Manipur gamgi a suk khak ding leh civil society tuamtuam te’n kilemna pomlou ding uh chi a, Manipur sung kia hilou in pawlam apan leng gamgi thu banah Manipur kituahna leh kipum khatna demna nasatak om hi’n gen hi. India govt. leh NSCN(IM) te’n kihouna a neih uh tu kum sung a thutawp a bawl sawm uh tungtang UCM te’n enzui uh chi a, framework agreement sung a thu omte taklat ahihlouh tungtang ah civil society tuamtuam a makai te’n Central govt. soisel uh a, Centre leh NSCN(IM) kilemna ah Manipur govt. tawm kan theih hilou a, UCM in Centre tawh kihou sawm mahle uh tunitan a dawnna mu nailou uh hi’n leng taklang hi.


Hatta- JNIMS kikal lampi khak uh
Imphal, July-3: Soiba Leikai veng mipi leh Easter Edcuation Club and Citizens te’n hun sawt sim apan Hatta Golpati apan JNIMS tan lampi puah louh a om, puah ding a ngetna a bawl uh tunitan a  ngaihsak ahih louh ziak in lampi khak uh a, akisaipih thuneite’n lampi a etkai masiah uh lampi khak ding uh hi’n taklang uhi.


TUNI THUPI:
“Khaukhupten kumpipa a neikei ua, himahleh a honhon in a vek un kilemin a pai uh;” -Paunakte 30: 27


EDITORIAL:
Pathian’ thilsiam kilatna!
Pathian hatkhum a bawl Laisiangthou a Genesis ah Pathian in lei leh van a siam a… chih apan entou  lehang, huihkhua, leitung leh leinuai banah tuipite bawltu Pathian ahi hi. Huchih lai in i gam ah thillamdng taktak hongtung a, thakhat thu in buaina phutphut leng i tuak toutou ua, bangtan tuakzou ding ihi ua chih i theikei hi. Central Lamka area a om Lailam Veng a Upa H. Vungzamang innsung ah tuni in vatawt (duck) chikhat va ut a, inn neite’n lamdang sa mahmah uhi. Bangchidan a amau khoi leng hilou vatawtin a inn uh va bel mawk ding hiam chi uhi. Tuzing baihtakin a common room uah ana om mawk a, amau leng lamdangsa mahmah in hoihtakin kem uh chih ahi. Innsung mite’n hoihtak  a room kongkhak akalh nung un common room ah  khamuangtaka vatawt ana omtheih pe’n thil hithei hithou mahleh igam a thil lamdang tuamtuamte et in banghiam lam  kawk ah diam chih bel hon ngaihsun sak hi.
    Thakhat a vuahtui tamphut, thakhat thu a zinling phut, thakhat thu mah a menchim tuamtuam om phut chihte i tuah uh ahi a, i gam a natural calamities dinmun lunghimawh huai mahmah hi. Government in ahihtheihna tan uh ahihding ua, mipi lam leng ikisak zek uh poimawh ding hi. Hibang zinling, menchim,force hattak a  tuiluang, vuahpi leh gialpi chihte mihing thahatna a zawh ding vualin kilanglou hi. Kum paisate sangin tukum tui tawh kisai in nuamzaw bangin ngaihsut theih a, nidang in July kha in tui buai in ibuai ua, tulai in i gam ah vuahtui kichingtak  a om ziakin ibuai tadih kei ua, maban ah i buai mel uh theih hilou hi. Himahleh, khaal(khawkeu/dry season)  hunin tui haksatna thupitak hongtung ding a, tua dingin a kisaipihte PHED leh MDC/ politician-te tu in a kisakkholh uh poimawh hi. Eilawi lak a tamzaw Christian ihi ua, Noa long bawl ‘Noa Arks’ akipanin leng sinlai tamtak i ngah ding un gintakhuai hi.
    Delhi ah khua alum mahmah a, khaw-ul akai zungzung thei a, gari leng atam mahmah a, ahuih mahmah leng alum hut hut a, tuabang  dinmun geihin Lamka khawpi leng a omta hi. Tulai in thakhat thu in vuah hong zu phutphut mahleh vuah theu tawh kiton  in khawlumdan a ngei mah hazel hi. Maban ah bangteng haksatna ituak ding ua chih i theikei hi. Natna hiileng tuamtuam hong kibehlap ding in patauh huai a, huai ding in , humidity leng hong sang hiaihiai ding a, mihingte keu deuhdeuh, vom deuhdeuh in i kilatni uh hong om ding hi. Delhi telin Vaigam mun tuamtuam a omte’ khawlum thuakdan leh eilawi thuakdan a kibang kei a, igam maban uh lungzinhuai mahmah sakin om hi.
    Kumkhat sung lel daih ding lou (field)  ngaihsutna ziakin sing-le-lou tamtak i phuk in i haltum ua, meihol lakna dia gamhal, sabetna dia gam hal leh luidung asing leh suang omte lak kidek zou mahmah lou ihih chiangin hiai teng i thuak ding mau uh himailou ding hia chih theih in om hi. A himhim thu in hun paisa a singnou kisuante etkai a om hiam chih theih ut huai mahmah hi. Forest department in leng hiai tungtang ah pan ala tham uh a, ahih ziakin, civil society tuamtuamte tawh gammang humbitna ding tungtang ah nasa zawsem in  pan a laksem uh deihhuai mahmah hi.
    I luidung neih sunsunte  ua catchment area ah singnou tamsem suan ni, i suan tamzawh khop leh a hamphatpih ding mipite mah i hi a, hiai pe’n Pathian thilsiamte’ kilatna leng hiding hi. PHED nuaia Zone I, II leh III huam sung ah singnou hunkhop suan in om  mahleh lawhching lawlou ahi de aw chihtheih in om a, state government gentaklouh Centre government in kingakna thamching a akoih uh Khuga Dam Left Side Canal zan nitak in buaise nawn a, Khuga tui a kinga Mata leh Lingsiphai area a tuilou bawlte’ adingin lungzinhuai mahmah dinghi’n kilang hi. Lei leh van banah tungleng vasate siamtu Pathian ahi a,amah akipan  hibang thil thupi i ngah uh  tungtawnin i gam in hamphatpih theih ding in eite’n leng pan i lak ah poimawh hi.Huai dingin govt hiam pawl tuamtuam kia hilou in  ei mimal chiatin lng pan i lak ding uh a poimawh ahi hi. I gam ah nau lamdang pipi a piangta a, tualou in thilhihtheihna (power) kuapiak hiam chih theihlouh khop in mi danglam pipi leng a omta… I gam lungzinhuai hi. Thil tengteng zaw Pathian thilsiam kilatna hi’n muhtheih hi.