MANIPUR EXPRESS | JULY 5, 2016

HEADLINES:
PM Modi makaihna Union Cabinet lepthak (reshuffle) hiding

New Delhi, July-4: Prime Minister Narendra Modi makaihna NDA govt a Union Council of Minister-te  July 5, 2016 (Sepnawnni)  in kekletna leh lepthakna(reshuffle)  om ding a, Minister thak dia laklutte laka khat in tulela Union Finance Minister Arun Jaitley in a letkhawm Information and Broadcasting ministry len ding hi’n kigen a, tulel a BJP makaihna Centre govt in a ngaih poimawh mahmah namniam Dalit mite tamna Uttar Pradesh ah kumthak a assembly election om ding mitsuan kawm in huai state a  Dalit makai khenkhat leng Minister dinga lak ahih gintak thu kigen hi.

    Agency thusuak in a gendan in Modi in  Prime Minister a let nunga Council of Ministers lepthakna zinglm dak 11.00 in om ding a, Rashtrapati Bhawan ah India President Pranab Mukherjee in Minister thakte gin-omna thu chiamsak ding hi. Council of Minister-te laka  tel Sports Minister Sarbananda Sonowal in  Assam a BJP govt thak ah Chief Minister alet ziakin amah mun luah ding lakna hikawm ding in Councl of Ministers lepthakna om ding hideuh in kigen hi.Tulelin Council of Minister-te  Prime Minister telin 66 om uh a, India Constitution  dungzui in Minister dingin mi 82 tan hithei ding chih ahi hi.
    Council of Minister-te lepthakna om ding ah tulela Defence, Finance, Home leh Foreign Affairs len Minister-te bel a mawhpuakna  khenlamdang omlou ding hi’n kigen a,
    Minister thak dinga telkhiakte leh BJP President Amit Shah tuni in kimu uh a,Prime Minister Modi leh Amit Shah in leng tuni in sawtkuamtak kimu in thil omdan genkhawm uh chihthu om hi.Tuni nitaklam in Amit Shah in Rashtryia Swayamsewak Sangh(RSS) office vapha in   thil omdan pompih ding in va genpih hi’n thusuak om hi..
    Minister thak dinga laklut gintak huaideuhte bel  Uttar Pradesh a BJP tawh pangkhawm Apna Dal pawla MP chingthak Anupriya Patel(35) hi a, Ms Patel bel Kurmi community(caste) pawla mi poimawh hi’n kigen hi. Maharashtra a BJP in regional party a kizoppih RPI pawlte makai Ramdas Athawale leh  Gujarat a Patel community-te makai poimawh Parshottam Rupala leng gentel khak in om uhi.Namsang(upper caste) te lak apan BJP leade Anil Madhav Dave, Delhi akipan Vijay Goel banah BJP MP tuamtuam S S Ahluwalia, Mansukhbhai Mandavia, M J Akbar leh  Arjun Ram gentel in om uhi.
    Rajasthan akipan Minister hilel lai Sanwar Mal Jat banah kum 75 tunglam mi Najma Heptulla leh  Kalraj Mishra bel Minister hihna apan khinkhiak ahih uh gintakhuai hi’n BJP lam apan thuthang om hi.


LOCAL NEWS:
Consultative meeting nei ding
Lamka, July-4: Joint Action Committee against Anti-Tribal Bills (JAC-AATB) in 300 days of mourning and mass prayer zatna hun ah a puansa bangun July 9, 2016 zinglam dak 10:00 in Hiangtam Lamka a YPA GHQ hall ah maban pai dingdan genkhawmna ‘consultative meeting' om ding hi. Huai hun ah makai tuamtuam’ ban ah Manipur singtangmite’ maban ding awlmawhna nei peuhmah tel ding leh programme tawh kituak thei ding programme dang sailou a, ngaihdan sungkhawm dia tel dingin JAC in ngen hi.


Morgue building dengdel mahmah
Lamka, July-4: Lamka ah ni 3 sung vuah azuk ziakin mun tamtak ah menchim om a, tulel a tribal martyr-te luang koihna Dist hospital morgue nunglam menchim om ziakin foundation chimkhe thei dinga om in, dengdel hi’n kigen hi. Huai tawh kisai Med. Supdt. in a gendan in, kum 2015 inleng vuahzuk ziakin menchim om a, huai thu Medical Director kiang tut hi a, Imphal apan official 2 in  hong enkhia uh a, kum  2016-17 work programme  adia guan a om hi’n gen hi. Tutung in CMO/CCpur inleng enkhia in, report pia a, govt in banghiam  ahih lam-et thu gen hi. Huailou in  S. Paukhojam Veng a  Chiengkon lui khangin retaining wall kichim a, Khuplianlal Samte gam bangtan hiam hihsia in dailen buk leng chimthei ding in om hi. Retaining wall ahihleh kum  2014 in HQ Veng V/A in MGNREGS tungtawn a a bawl uh hi’n kigen hi.


Blood bank ah sisan unit 94 om
Lamka, July-5: Lamka Damdawi Inn ah June 2016 sungin naupiang 303, OPD ah damlou ki-ensak 11,725 banah tulel in Blood Bank ah sisan unit 94 hi. Hiai tawh kisai a kisaipih deptt-te’ report danin June 2016 sungin maternity ward ah naungek 303 huai lak ah akawp (twins) 2 leh Nu gilsung apan sisa a lakkhiak (IUD) 3 om in, live birth 300 om hi. Huailou in,  nau piangtung si leh nauneih ziaka si bel omlou hi’n report uhi. OPD ah naungek kum 1 nuailam (Neonate) 343, Anti-Netal Check-up bawl 227 tel in ki-ensak himhim mi 11, 725  pha hi. Blood bank ah tulel in sisan A+ve unit 37, B+ve unit 16, B (-ve) unit 1, AB+ve unit 19 leh O+ve unit 19 leh O (-ve) 2 unit om hi. March 2016 sungin mi tuamtuam apan sisan unit 152 kaikhawm uh a, damlou tuamtuam kiang ah unit 126 pekhia in, zat theihlouh unit 7 om hi’n taklang uhi.


Ni 8 ni in 200 val dharna tu
Lamka, June-28: Hiangtam Lamka a Salphate Zahna Pumpuk ah JAC against Anti-Tribal Bills makaih in tuni ni 8 ni’n Hiangtam Lamka, Hmar Veng leh Pearsonmun apan mi 200 val sit-in-protest/dhana tu uhi. Huai hun Rev. Dr. Pulamte leh D. Angam Gangte te’n enkai in Rev. Jerry Zoliansanga in poimawh bangin hun zatpih a, H. Mangchinkhup, Chief Convenor telin mi tuamtuam in thugen uhi. July 5, 2016 in Hiangtam Lamka, Lhangjol leh Salem Veng tuding uhi.


S.K Oil quota 16 KL in kiam ding
Lamka, July-4: CCpur Dist. ading June 2016 tan in Kerosine Oil Dist.quaota 152 KL hong pai pen July 2016 apan 136 KL hongpai ding a, 16 KL (Litres 16,000) hihkiam a omding hi’n Civil Supply deptt apan kiza hi. July 2016 apan Dist. tuamtuam ah Dist. quota tamloulou hihkiam a omding hi’n kigen a, CCpur Dist. ah S.K Oil agent teng 11% deduct ahihkei leh kidaihlouh ding ban ah kihawmtheilou ding hi’n Civil  Supply Deptt/CCpur lam apan kiza hi.


SBR in reduction sale nei
Lamka, July-4: Synod Book Room, CCpur Branch in laibu sim lunglutte’ khualna in a laibu zuak teng uh discount bawl in tuni’n IB Road ah reduction sale nei uhi. Synod Book Room in kuapeuh in laibu mantawm chik a leitheih ding ngimna in laibu dungzui in 5 percent apan 80 percent kiam in zuak uh a, lun mahmah a July 9, 2016 tan  sunzom ding uh hi’n kigen hi. Synod book room in 2004 kum apan reduction sale ana pat uh hidan in manager in gen hi.


Chairman leh Hausa pa’n Thangkai-Lungpau road enkhia
Lamka, July-4: Langkhanpau Guite, Chairman, ADC/CCpur leh Phaipheng Hausa pu’n tuni’n Chongkhozou Chiangpi  apan khe a pai in Thangkai-Lungpau Road ah tulai vuahzuk ziakin Saktiman gari bek lutteihlouh nang khop a buaina om hiam chih va enkhia uhi. Chairman, ADC/CCpur in Phaipheng khua ah Hausa pa'n Sing atna Khawl a koih Pathian kiang ah thumna in latkhiatna nei ngal hi. Thangkai-Lungpau road bel hunpaisa in Chairman, ADC/CCpur leh Zillai Lamka Block pangkhawng in abial mipi’ khualna ziaka repair ana bawl uh hi’n kigen hi.


Activa laksaktu Police te’n mankhia
Lamka, July-4: Meltheihlouh kuate hiam in June 29, 2016 nitak dak 8:00 velin Khawmawi lei (bridge) ah Lalbabu Gupta (34) s/o (late) Anandi Shah of B. Vengnuom in a zat Honda Activa (No.MN02B-3287) Engine No.JF50E72337780, Chassis No. ME4JF504JF7337680 laksak uhi. Huai thu ah Police te’n suizui uh a, zan nitaklam dak 2:30 velin Activa gari suhsak/laksaktu Seiminlal Haokip @ Lalboi Haokip (25) s/o Seimang Haokip of Laijang village mankhia uhi. Police te’n tuni’n CJM ah Lalboi Haokip pawkhia uh a, Court in July 7, 2016 tan Police custody ah omding in phalsak a, Police te’n  FIR No.34 (6) 2016 CCP-PS U/S 397/34 IPC registered uhi.


CJM thupiak in Jail ah koih
Lamka, July-4: Police te’n tuni’n CJM/CCpur ah Seitinlal (29) s/o Jangthang of  D.Vaison village; Zangkhogin (37) s/o Seikhopau of  V.Bethel leh Tongmang Guite (28) s/o Doukhothang of Saikul, Senapati Dist.pawkhia uh a, Court thupiak bang in Police te’n Jail ah koih uhi. Mi 3 te bel 7-A/R te’n June 22,2016 nitaklam dak 5:30 velin Koite road ah country made 9mm pistol 2, magazine 2, atang 2,mobile phone 5,simcard 2,memory card 1,Scooty Yahama Ray-2 (No.MN01C-8081),Honda Activa (No.MN02A-7928), Rs.3492, SP tang 344 leh Heroin (No.4) gram 5 tawh mankhia uh a, Police te’n FIR No.32 (6) 2016 CCP-PS U/S 21 NDPs Act &25 (1-C)  A. Act. registered uhi.


Sc Exhibition & Maths competition
Lamka, July-4: ZEO/CCpur nuai a Dist. Board of Education, SSA saina in July 8, 2016 zinglam dak 9:00 in Vimala Raina H/S ah “Dist Level Science Exhibition & Mathematics Competition for Upper Primary Schools 2016 omding hi. Scienece Competition ah “Science: Water Harvesting” chih thupi hiding a, Mathematics competition ah “Mathematics: Daily Mathematics” chih hiding hi. Sunnung dak 1:00 in Prize hawmkhiat hiding a, Chief Guest in T.Goukhomang, ZEO leh Functional President in Lalthanzam Infimate, BO HQ, DC/CCpur office hiding hi.


Question leh Answer sheet hongtung
Lamka, July-4: New Lamka a Ebenezer Academy ah July 8, 2016 in Class X (HSLC Compartment) exam ding tawh kisai in tuni’n Imphal apan board te’n CCPur Dist. a ding question paper leh answer sheet hong koih uhi. CCpur Police station ah Question paper koih uh a, Exam Centre (Ebenezer Academy) ah answer sheet koih uhi. CCPur Dist ah compartmental candidate 399 om a, admit card la nailou te’n Phungkhothang Govt. H/S ah laktheih lai dingin kigen hi.


Class X passed ngaita ding
Lamka, July-4: Indian army nuai ah vanzat tuamtuam a changkan ban ah pilna leh siamna a khantouh dungzui in Indian army requirement om hun ah education qualification suksang hita ding hi. Huai ding in  Nagaland leh Manipur nuai a Soldier General Duty (GD) lak nang ah minimum qualification class X passed (33% in each subject) hita ding a,  Soldier Tradesmen ah education qualification Class X simple passed tan bek hita ding chi’n Col. B. Mukherjee,Director Recruiting Officer, Rangapahar in theihsakna bawl hi.


SUUNNA:
Mrs. Ningzahat (75) m/o Dr.Chinkholal Thangsing of Rengkai Road, Zenhang Lamka, tuni sunnung in kalna in si a, July 5, 2016 in Zenhang Lamka hanmual ah kivui ding hi.
JB Rai (85) h/o Neigoting of Hmuia Veng, zannitak dak 9:30 velin BP stroke in si a, nitaklam in YVA hanmual ah kivui hi. Aman JN Model H/S; Douglas Memorial H/S; Young Learners’ School, L.Foundation school ban ah school bangzah hiam ah teacher anasem kha hi.
P. Lianjoel (19) s/o P.Dongthang of  Joutung, tulela Khominthang, New Lamka ah omlel innmun ah damlou a etkawl a om, tuni zinglam dak 11:20 velin si a, Joutung khua ah vuiding in kipua hi.Aman Second Division League 2014 leh 12th Hmar Martyrs Trophy, 2015 ah Lenlai Club min in ana kimaw hi.
Awingaihching (57) w/o (late) S. Nengkhup of V.Munhoih, New Lamka tuni zinglam dak 10:00 velin Dist. Hospital ah awmna in si a, Simveng hanmual ah kivui hi.
Chingdeihat @ Hatneu Zou w/o  Ginlianthang Zou of Moreh Ward No.1, tuni sunnung dak 1:00velin lungtang leh kal (kidney) natna ziak in si a, July 5, 2016 in kivui ding hi.
Khammuanthang s/o Khanvung of Zenhang Lamka tunitak dak 9:00 velin Dist Hospital ah khawsikpi ziakin si a, July 5, 2016 in kivui ding hi.


IMPHAL NEWS:
Police outpost koih di'n chiam
Imphal, July-4: Thoubal district a Nungei Meitei leh Nungei Muslim village-te kal a thubuai tawh kisai in tuni’n CM Secretariat ah state govt. panlakna in JAC 2- JAC Against the Cruel Firing at Nungei Meira Paibi leh JAC Against the Brutal Killing of Md. Arif Khan-te tawh meeting om a, huai ah CM in khaw 2-te bitna dia a kintheipen a police outpost koih ding chiam ziakin kihoulem thei uhi. Hiai hun ah state govt. lam apan CM O. Ibobi, Dy CM Gaikhangam, Md. Nasir, Minister (Agriculture), L.M. Khaute, DGP, Suresh Babu, Principal Secy. (Home) leh Thoubal DC-te hi uh a, kilemna om dungzui in bit kisak louh ziak a ni 2 paisa apan Lilong Chajing Community hall ah om Nungei Meitei village-te a khua uah kik nawn ding leh JAC against the brutal killing of Md. Arif Khan te’n leng siluang lak ding lemsa hi’n gen uhi. Hiai thu tawh kisai a CM. O. Ibobi in media-te tawh kimuhna hun ah state govt. in police outpost honkhiat ding a chiam nung in khaw 2 te’n kituak tak a khawsak khawm ding lemsa tuak uh a, hunlui paisa a thil tungte mangngilh ding banah muanna leh bitna om nawnna dia panla tuak dingin ngetna bawl hi’n leng gen hi.


Department press conference kipan
Imphal, July-4: DIPR-te saina a Manipur govt. nuai a dept. tuamtuam 24 te’n a nasep khiak-te uh puankhiak deihna a Aug 11, 2016 tan daih ding in Moirangkhom a DIPR Campus ah tuni’n press conference session 1na sunnung dak 1:30 in kipan hi. Huai hun ah Louis Ngasainao, Director, Agriculture in loukhou mite a dia welfare programme tungtawn in subsidize rate a Urea piakkhiakna dingin kum tengin Rs. 3.75 crore seng uh a, Manipur ah kibawl ‘Kouna’ kichi sukminthanna dia panla uh hi’n leng gen hi. Session 2na nitaklam dak 3:00 in kipan a, huai ah A.S. Ningmi, Addl. Director, Horticulture & Soil Conservation in NEC fundingna in 10 MT capacity nei ding a Solar Power Cold Storage bawl khiakna dia lemsakpihna (approve) a ngah banuah Tamenglong a Namdunjang, Ukhrul a Ngarungphung leh Kangpokpi a Haipi mun-te ah koih hiding in gen hi. Centrally Sponsored scheme nuai ah Hort. & SC Deptt te’n MIDH, RKVY, Micro Irrigation leh programme tuamtuam pan uh a, kum 2001 a meikang in a suksiat Magfruit factor leng dinkhiak thak hi, NEC lemsakpihna a Nilakuthi ah nasep kipan hi’n leng gen hi. Hiai hun O. Nabakishore Singh, Chief Secretary, Meghachandra, Director, IPR, Agri. leh Horti. & SC dept. a official te’n uap uh hi’n kigen hi.


PCI team-te Imphal hongtung
Imphal, July-4: Ravindra Kumar, Convenor, Press Council of India (PCI) makaihna nuai a PCI sub-committee member– C.K. Nayak leh Kosuri Amarnath-te tuni nitaklam in Imphal Tulihal International Airport hongtung uh a, huai ah Meghachandra Kongbam, Director, DIPR leh official-te banah AMWJU member te’n ana dawn uh hi’n kigen hi. Huai nung in Manipur Press Club ah press conference om a, huai ah Editor, Senior journalist leh AMWJU makai-te tawh kihouna om a, journalist te’n a nasep hun uah  govt. leh underground-te apan vauna a tuah sek uh tungtang theisak uh hi’n kigen hi. PCI team te’n July 5, 2016 zingsang in Manipur hongphakna uh thu tawh kisai in press conference nei ding ua, huai zawh nung in Chief Secretary, DGP, Addl. Chief Secy., Assam Rifles Official, National Investigation Agency (NIA) Imphal Camp member-te leh officer tuamtuam kimuhpih ding uh a, July 6, 2016 ni a Imphal nusia in New Delhi zuan ding uhi. India a freedom of press kephoih ding banah newspapers leh news agency-te standard bawlphat ding tupna a Parliament in quasi-judicial din Press Council of India ana phutkhia uh hi’n kigen hi.


HDFC apan Rs. 13 crore gukhia
Imphal, July-4: Manipur khangthu ah masapen hiding in tuni nitaklam dak 5:00 velin maituamna zang (mask) mi 7 te’n Thoubal HDFC branch apan Rs. 13 crore gukhia uh hi’n kigen hi. Thusuak in a gendan in maituam 1 in temta zang in ground floor ah bank security guard salmat (hostage) a, maituam dang-te 1st floor ah kal tou in bank employee-te cell phone teng suhsak in light off sak uh a, huai nung a safety bolt susia in sum tang Rs. 3 crore leh gold a sum a tuat in Rs. 10 crore man ding tawh taikhia uh a, bank ground floor ah CCTV camera kithuah lou hi’n leng gen uhi.


MYAS a Secretary kimuhpih ding
Imphal, July-4: Chief Secretary O Nabakishore  in New Delhi ah July 11, 2016 in Rajiv Yadav, Secretary, Sports, Ministry of Youth Affairs & Sports kimuhpih ding a, Manipur ah National Sports University (NSU) bawl khiak ding tawh kisai leh thu tuamtuam genkhawm ding uh hi’n kigen hi. Akigendan in Chief Minister in NSU bawlkhiakna mun ding Yaithibi Loukol ah gam ngah nang in nasep zawh siang hipah ding chi’n gen a, huai nung gam neitu in gam a zuak khiak louh banah NSU bawlnang a nasep dal ding chi’n taklang hi.


MPCC-te saina in Iftar Party om
Imphal, July-4: Manipur Pradesh Congress Committee (MPCC)-te saina in B.T. Road a Congress Bhavan mun ah tuni’n Iftar party om a, huai ah TN. Haokip, President, MPCC in July 6, 2016 ni a Idul Fitter leh Rath Yatra tungtawn in Manipur ah muanna leh bitna banah hausakna a tut ding deih thu taklang hi. Md. Admin Shah leh Md. Amin, Chairperson, State Hajj Committee te’n Muslim community-te a dia thuchah bawl uh hi’n leng kigen hi. Hiai hun N. Loken, MLA, Vice President, MPCC; K. Ranjit, MLA, Treasurer, MPCC; Md. Amin Shah, Parliamentary Secy. (MOBC & SC, Science & Tech.); Md. Fazur Rahim, MLA leh MPCC a office bearer te’n uap uh hi’n kigen hi.


TUNI THUPI:
“Huaiziakin, kisa un, khawpi i bawl dia, innsang avum van sun dingin i bawl dia, i min i thangsak ding uh; huchilouin zaw leitung  pumpi ah hihdalh in i omkha ding, a chi uhi.” – Genesis 11:4


EDITORIAL:
Khawpi 1 suahna dingin!
CCpur district adia khawpi lian omsun Lamka khawpi chih in om a, himahleh a taktak a muhtheih ding khawpi (town/city) lak ah itel ban ahiam chih kidong lehang  city chih dinmun hinailou in Manipur state adia khawpi nihna(second town) chih dawnna pia tamtak a om ding hi. Himahleh Lamka pen Manipur adia khawpi nihna chi’n  official a puan hituanlou hi. Lamka dinmun tutung a vuahzu in a ciangtakin a taklang a, vuahzu in khawpi teng tum(submerged) tawh kibang hi. Kum tamtak paisa akipan vuah azuk chiang in lampi teng  hawktui in tuamgai mai a, mipite’ buaina genvual hilou hi.
    Khawpi (city/town) te vuahzu in atum theikei chi i hikei a, bangchibang a i khawpi Lamka  dinmun om ahiam chih ngaih ngaihtuah tham ching hi. Ni 4/5 vel paisa akipan vuah tamtak a zuk ziangin eilak buaizak a, mundanga mite  buaizakdan tawh tehvual hikei mahleh eisung adingin i khom in ibuai mahmah uhi. State dang a plain area (phaizang bial a tengte’) buaina pe’n ei tawh teh vual hilou a, tu in ei singtangbial a mite’ buaina tawh tehkak vual hilou hi. Manipur state adia khawpi nihna a minlawh Lamka khawpi ah tutung a vuahpi ziaka i thil tuah uh lung himawhhuai mahmah hi.
    Education/hospital/transport & communication/road & highway chihte gen nai hetlou in i khawpi omdan tamlou taklat zek ut-huai hi. Khawpi khat chih theihna dingin a kisam tamtak om ding chih bel haih vuallouh a theihsa ahi hi. Huai ding in mihing omzah ( population) leng atam  deuh metmot ngai a, dawr/dukan  piching, building hoih leh gari leng standard sang taktak poimawh  a, lamlian kilawm leh lian huntawk ahih banah  gari bangleng tuiluang banga a luan zungzung ding mah ahi hi. Lamka khawpi  in leng khawpi dangte mah bangin a kisam tamtak neita a, khawpi neukhat suakta bang in kilang hi. Ahihziak in, a bukimlouhna bangzahhiam a om a, huaite bukim hileh khawpi etlawm, siangthou leh khualzin mite’ veh utna mun pen Lamka hong hiding in ngaihsut theih hi. Second Town Lamka khawpi kongzing adiakin Tedim Road keklet ding thu kum 5 val paisa akipan tangkoupih ahita a, tuni dong sepsuah hituanlou hi. Imphal airport road a Changangei tan kia  zawh ahi a a ‘riruang’ in Nambol tan hidin kilang panta  bang a, Lamka khawpi kongzing keklet ding hun theih phak hilou hi.
    Tualou in khawpi khat hihtheihna ding mah a poimawh bel sianthouna thilah  sewer system/toilet kichi poimawh lua hi. Lamka khawpi mun tamtak ah ekbuk septic tung kikhuhlou muhding bangzah hiam omlai a, bangzahhiamte lah cement kizang selou in trop takin om hi. Eklong bang leng a nuaia ek kimu suakthei bang leng mun tamtak ah omlai a, huaite  tho (fly) in bawh a, huai thouten i an nekna kuang tanpha a bawhna mun omlai ahihziak in khawpi dingin zaw chin(qualify) nailou deuh ihi de aw chihtheih hi. Manipur govt in electricity privatized bawlin MSDPCL khut ah ngakhia a, prepaid metre bulh mahle uh mipite’n power  24x7 supply i  kingah tuan naikei uhi. Chief Minister O. Ibobi  in kum 2019 tan in mipite’n meivak dakkal 24 sung ngah ding uh chih kampau a zatpen a khatveina hi nawnlou hi.Ataktak in kum  2019 tanin 24x7 power supply hong om zou taktak nadiam chih leng gintak haksa mahmah hi.
    Prepaid power himahleh a ginatlouhna in i khantouhna ding uh naktak in  dal ahi chi lehang dik  mahmah ding hi. I damtheihna ding in leng electric thahatna a  poimawhna tam law mahmah a, power ginatlouh ziakin tuisiang dawn ding kitasam in, tuisousa tanpha dawn zou nawnlou hunkhop i om uhi. Nek-le-tak tawh kisai in leng power ginatlouh ziak in kuaman refrigerator lei ding in ngaihsun ban nawnlou in, an khing/mehkhing te fridge a koihlou in i omta ua, huai in i damtheihna uh  sukha ahidiam chih theih in om hi. Tu in khawpi sungah solar hunkhop vakta a, a ziazia om chih ding ahi a,mi vantang   paivelte adingin nuamtuam mahmah hi.Khawpi khat suahna dingin kuate hiam gendan hileh ‘hisap-kitap’ poimawh  a, ngaihtuah vengveng kawm a ‘framework’ bawl poimawh dingin ngaihsut theih hi.  A taktakin khawpi ka hi uh kichih leng a zumhuai ton tam mahmah hi.