MANIPUR EXPRESS | JULY 6, 2016

HEADLINES:
Hmar Civil Society 3 in mawhpaih thusuah bawl
Galvan tawite’n HNA founder President kaplum

Lamka, July-5: Lamka Police apan kizadan in tuzing baihtak dak 1:00 velin meltheihlouh galvantawi pawlkhat in Hmar National Army (HNA) a founder President Lalthangsang Intoate (54) s/o (late) Khamlien Intoate of Hmar Veng kap uh a,  hospital tut himahleh dam zoulou in zing dak 4:00 vel in si hi. Lalthangsang zan nitak dak 9:00 velin inn apan pawtkhia zinglam dak 1:00 vela innlam zuanlai main gate bul ah galvantawite’n kap in kihem mang uh a, innmun a bangtanhiam buaipih nung in Sielmat Christian Hospital puaklut in om a, huai apan zingsang dak 2:30 velin dist hospital tut in om hi.

Kap lup a om Lalthangsang’   innkuante’n tuzing dak 6:30 in CCpur Police station ah report  uhi. Lalthangsang’ a gil (abdomen) veilam leh taklam ah thautang lutna ma muhtheih in om a, zinglam dak 11:00 in forensic expert te’n Police tawh kithuah in post mortem bawl uh a, sunnung dak 2:00 in Rev. Huolthangsei Thiek, Exe. Secy, ECA in morgue akipan khakhia in, HYA Ambulance zangin pua uh a, Hmar Veng a tenna inn tut hi a, huaizawh Sielmat a, a sanggampa Lalremsang tenna inn ah puaklut hi a, July 6, 2016 in Sielmat hanmual ah kivui ding hi.
Lalthangsang in kum 2013 in Hmar National Army (HNA) phutkhia a, KNO nuai a om hi’n kigen hi. Aman azi Melody Ramdinmawi tawh tapa 2 nei in Hmar Veng ah innluah a khawsa uh hi’n kigen hi. HNA President sihthu tawh kisai suunna in tuni nitak dak 6:00 tan dawr teng khak uhi. Thiltung tawh kisai khutkhatu kipuang omkei mahleh Lalthangsang in a sihma in khutkhatu thei ahihdan a innkuante hilh hi’n azi’n gen hi.
Hmar Inpui GHQ; Hmar Students' Assn GHQ, Hmar Youth Assn GHQ leh Hmar Women's Assn GHQ in tualthatte mawhpaih thusuah uh a,  mulkimhuai leh gamsa banga kithaha tawpsan dingin ngen uhi. Thiltung tawh kisai Police in FIR No. 35 (7) CCP-PS U/S 302/34 & 25 (1-C) A. Act registered uh a, thil omdan suizui uhi.


Minister thakte’ lakah lawyer, doctor leh mipil tampi tel
Tuni’n Council of Ministers di'n mi 19 laklut hi uh
New Delhi, July-5: Prime Minister Narendra Modi makaihna Council of Ministers tuni in lepthakna( reshuffle) om a, Rashtrapati Bhavan ah India President Pranab Mukherjee in Minister of State in mi 19 gin-omna thu chiamsak hi. Tulela Minister of State (Independent charge) len Prakash Javdekar leng Cabinet Minister a koihtouh (elevated) in om hi. Huai tawh kiton in aman Human Resources Development (HRD) paw ding a, HRD Minister Smt Smriti Irani in Textile Ministry len ding hi. Huailou in Union Finance Minister Arun Jaitley in additional charge a let Information & Broadcasting leng Rural Development Minister M. Venkaiah Naidu in additional charge dan mah in len ding hi. Sadananda Gowda in Statistics and Programme Implementation nusia in Law and Justice len ding a, Ravi Shankar Prasad in Telecom nusia in, Law Minister len ding hi. Cabinet rank in Vijay Goel koih hi a, aman Sports Minister len ding hi. Jayant Sinha ahihleh Minister of State hilai ding a, himahleh Finance Ministry apan Civil Aviation ah kisuan hi. Minister thakte lakah lawyer, doctor (onco-surgeon), Ph.D degree holder banah mipil leh lehkhasiam taktak om uh a, amaute ziakin India in khantouhna lam a nawt ding chi’n BJP National President Amit Shah in gen hi. Prime Minister Narendra Modi inleng tuni a kichiam Minister thakte kipahpihthu gen hi.
    Tuni a Minister thak 19te lakah Uttar Pradesh, Madhya Pradesh leh Guajarat state akipan mi 3 chiat tel uh a, Rajasthan akipan 4 leh Maharashtra akipan mi 2 tel uhi. West Bengal, Assam, Karnataka leh Uttarakhand akipan mi 1 chiat tel uhi. Prime Minister Modi makaihna NDA govt ah tu’n Council of Ministers 83 phatou hi. India constitution a provision dungzui in Council of Ministers 82 sang tamzaw hilou ding chih hi a, PTI News Agency in official source a taklatdan in tulela Council of Minister-te laka mi 5 khinkhiak (dropped) hiding uh a, huaite Nihalchand, Ram Shankar Katheria, Sanwar Lal Jat, Manuskhbhai D Vasva leh M K Kundariya hi uhi.
    Minister thakte lakah BJP akipan 17 tel uh a, Apna Dal leh RPI akipan 1 tuak hi uhi. Minority leader 2 -MJ Akbar leh SS Ahluwalia banah numei 2 -Anupriya Singh Patel leh Krishna Raj tel uhi. Mi 19te laka law graduate 5, post graduate MA 4, undergraduate 2 leh doctorate degree tanpha tel uhi.


Minister of State thak 19te leh a tanvoute (portfolios) uh anuai abang hi
1. Faggan Singh Kulste: Health & Family Welfare
2. S S Ahluwalia : Agriculture & Farmer Welfare, Parliamentary Affairs
3. Ramesh Jigjinagi:  Drinking Water & Sanitation
4. Vijay Goel : Youth Affairs and Sports (Independent Charge) Water Resources, River Development & Ganga Rejuvenation
5. Ramdas Athawale: Social Justice & Empowerment
6. Rajen Gohain: Railways
7. Anil Madhav Dave: Environment, Forest and Climate Change (Independent Charge)
8. Parshottam Rupala: Agriculture & Farmer Welfare, Panchayati Raj
9. M J Akbar: External Affairs
10. Arjun Ram Meghwal: Finance, Corporate Affairs
11. Jayant Sinha Bhabhor: Civil Aviation 
12. Dr. Mahendra Nath Pandey: Human Resource Development
13. Ajay Tamta: Textiles
14. Smt. Krishna Raj: Women & Child Development
15. Mansukh Mandaviya: Road Transport & Highways, Shipping, Chemicals & Fertilisers
16. Smt. Anupriya Patel: Health & Family Welfare
17. C R Chaudhary: Consumer Affairs, Food & Public Distribution
18. P P Chaudhary: Law & Justice, Electronics & Information Technology
19. Dr Subhash Bhamre: Defence


LOCAL NEWS:
Kum 13 mi class VI simlai awklum
Lamka, July-5:  M. Benjamin Kom (13) s/o Alar Kom of Haotak Khulen, Henglep sub-divn, tuni nitaklam dak 4:30 velin a omna uh New Lamka College huangsung a hostel building ah awklum hi. Benjamin anau Ngamgunmang tawh New Lamka a Lamka College huangsung a hostel building awng pansan in Ebenezer Academy a kai hi a, aman class VI simlel hi’n kigen hi. Thiltung tawh kisai inn vengte gendan in summer vocation zangkhin, anu Chingthianlun leh anau tawh zan in Lamka hongtung uh a, unau 2-te tuni’n school kai hi’n gen uhi.Half-yearly exam ah fail hi’n kigen a, unu puansawp kalin puan zangin na kikhailum  hi’n gen uh a,a  theih phet un lakhe mahle uh phatuam nawnlou hi’n gen uhi. Benjamin ahihleh first quarterly exam ah leng fail in, anu’n zep ngei hi’n kigen a, tutunga a fail nawn ziaka innkuante tai ding lauh ziaka kingaisia a awklum hidi’n mi tamtak in ginthu gen uhi. Benjamin luang YPA Elim Veng in buaihpih in, hankuang bawlsak uh a, tuzan in akhua ua vuidi’n pua uhi.


Mi 300 val in Ration Card pekik
Lamka, July-5: CCpur Dist. ah National Food Security Act.(NFSA) nuai a Ration Card nei himahleh govt. in ration card neitheiding chia criteria apiak tawh kituaklou chi’n tunitan in mi 309 te’n DC office a Civil Supply Deptt. ah ration card  pekik (surrender) uhi.


DC office ah electric meivak pia
Lamka, July-5: DC/CCpur office te’n kum 2 val vingveng Electric deptt. apan electric meivak lalou in generator leh Solar light zang uh a, DC/CCpur office-te ngetna bang in tuni’n electric deptt./CCpur te’n AB cable tungtawn in DC office ah electric meivak pia uhi.


SSPP saina in teacher’ training kipan
Lamka, July-5: Siamsinpawlpi GHQ in New Lamka a EBC Dorcas Jubilee Guest House, Mini-Auditorium ah July 5-9, 2016 sung Generation Global Project a Facilitator leh Siamsinpawlpi nuaia teacher-te ading in training sai uh a, tuni zinglam dak 10:00 in Rev Suanzalam, Co-ordinator (Instn), PCI (R) in hong  hi. Training ah Resource Persons in Mrs. Sandhya Gupta, Education Consultant, ASIA; Khumi Gangte, District Co-ordinator, SSA; T.Chinsuanthang, Principal,Saviours Public School; M.Darneingam, AI, ZEO/CCpur; Muani Tombing, Director, Lainat Ministry leh MK Lal Guite, Programme Officer, NFI/Delhi in thupi tuamtuam zangin sinsak uh a, teacher 30 tel in July 9,2016 sunnung in Rev. S. Ginmalsawm, Director(Social& Dev.) EBC in training hun khak ding hi.


AMWTSCPC Male 2013 Batch te’n theisak
Lamka, July-5: All Manipur Written Successful Candidate of Police Constable (AMWTSCPC) Male-2013 Batch CCpur Dist. makaite apan kizadan in July 4, 2016 in Manipur CM O.Ibobi Singh office chamber ah Dy CM leh Minister 5 te tawh kihouna nei uh a, AMWTSCPC Male 2013 Batch final result August 2016 khasung a suaksak ngeingei ding in CM leh Minister te’n AMWTSCPC Male 2013 batch a JAC-te chiam (promised) uhi. Huai dungzui in AMWTSCPC Male 2013 batch a JAC te lemsakna bang a August 2016 kha tan dohzoutaka ngak ding in member-te theisak uhi.


Orientation on IDCF neih in om
Lamka, July-5: Dist. Health Society/CCpur saina in tuni zinglam dak11:00 in CMO Mini Conference Hall ah‘I-Day Orientation on Intensified Diarrhoea Control Fortnight (IDCF) om a, Special Guests in T. Goukhomang, ZEO leh Dr J. Son Goukham,Medl Suptd. Dist. Hospital pang uhi. Orientation hun ah Dr. V.C. Pau, DFWO/CCpur leh Tongzakai, Padiatrician, Dist. Hospital te’n sinsak uh a, CHC leh PHC a i/c Medical Officer-te, Dist. Program Officer (IDCDS), CDPO-te telding uhi.
    Huaizawh sunnung dak 2:00 in CMO Mini Conference Hall ah National Program for Prevention and Control of Deafness (NPPCD) tawh kisai Grand Hearing Screening Camp and Free Hearing aids Distribution ding thu meeting om hi. Huai ah CMO makaih in PHC Singngat, PHC Saikot, PHC Henglep, PHC Thanlon leh CHC Parbung a Medical Officer i/c teng tel uhi.


67th Vanamohatsav zat hiding
Lamka, July-5: Divisional Forest Officer, Southern Forest Divn./CCpur saina in July 7, 2016 sunnung dak 2:00 in Kangvai Model Village (Community Hall) ah 67th Vanamohatsav (National Festival of Tree Planting) zat hiding hi. Program ah Special Guest in CT Lian Guite, MDC (New Lamka West) pangding a, DC/CCpur leh DFO/CCpur makaih in singnou suan hiding a, YVA Kangvai Unit, NSS/Rayburn College leh Forest Deptt. staff te’n singnou suanna panpih ding uhi.


HNA Founder President suunthu puang
Lamka, July-5: Hmar Peoples’ Convention (Democratic) pawlin tuni a HNA Founder President Lalthangsang Intoate thahna tawh kisai amau khutnung hilou hi’n taklang uh a, mulkimhuaitak a kithahna mawhpaih kawm in anutsiat sungkuante thuakpih thu taklang in suunthu puang uhi. HPC(D) thusuakin agenzelna ah UPF leh KNO in dawhkan khat a tukhawm in ngaihdan kibang nei uh a, Hmar Christian Leaders’ Forum (HCLF) inleng Hmar namsunga kituahna omding deihna in pan nasatak a alaklai ua hiaibang kithahna thiltung pen HPC(D) adi’n theihsiam haksa chi uhi. John F. Hmar, Info & Pub, GHQ, Sinlung apan thusuakin ataklatzelna ah tualthattute matkhiak a, akituahpih bang gawtna piak ding in HPC(D) in deihthu taklang hi.


Zenhang Lamka te’n theihsakna bawl
Lamka, July-5: Zenhang Lamka V/A; YPA Zenhang Lamka Unit, Zenhang Lamka Numei Pawl leh Zenhang Lamka Youth Club joint meeting thupukna bang in Zenhang Lamka area sung chidamna, kepbitna leh sianthouna/khantouhnang ngimna in vengsung mi, veng pua leh akisaipih kuapeuh ading in thupuan leh theihsakna bawl uhi. Zenhang Lamka area sung ah khamtheih-guihtheih zuakna leh bawlna thil-te August 5, 2016 apan kham bikbek hiding a, khamtheih-guihtheih zuak leh bawl tute’n tawpsan or kikhem khe ding in thupiak leh theihsakna bawl uhi. Zenhang Lamka area sung ah Vengsung mi or Vengpua kuapeuhmah July 5, 2016 apan nitak dak 10:00 apat zing dak 5:00 kikal sung hihding poimawh neilou a vialvak/mawkpawt khamna bawl uhi.July 5, 2016 apan guta, numei-pasal thangtatna leh numei-naupang supatau theiding buaina bawl kham uhi. Kuapeuh hiai thupuan leh theihsakna zahtaklou a patsat/bawhsia omleh akituahpih bang gawtna/thuhilhna omzeneitak piak hiding a, kuaman namthil (communal) in ala theikei ding a, amah mimal in mawh akipuakding chi’n thupukna bawl uhi.


Trg. Prog. on Mushroom Cultivation
Lamka, July-5: Dist. Council Complex, Tuibuong/Tuibong a Mushroom Cultivation House ah July 12, 2016 in Mushroom Cultivation training omding hi. Training hun a telnuam/tel-ut  farmers/mushroom cultivator te’n July 9, 2016 tan in plain paper ah apply in S.Roemdro Singh, Agriculture Officer (SC), ADC/CCpur office, Tuibuong/Tuibong ah piaktheih ding hi.


Prospectus hawm sunzom ding
Lamka, July-5: MUEWS pawlin CCpur dist. apan Manipur Univeristy nuaia department tuamtuam a Master zilnuamte khualna in CCpur Govt. College campus ah sunma dak 11:00 apan sunnung dak 2:00 tan Prospectus leh Past Question hawmkhia uh a, MU Admission tawh kisai dotnop leh buaina neite leng panpih uhi. July 6, 2016  inleng CCpur College Campus ah sunzom ding uh hi’n Lamboi Ngaihte, Vice Chairman, MUEWS in gen a, CCpur dist. leh Motbung ah MUEWS pawlin hiai bang in panla uh chi hi.


Jamkholal sihna tawh kisai thusuah
Lamka, July-5: Kolphe Kuki, Secy, Info & Pub, KNLF/KNO in tuni a thusuah abawl kimudan in, July 2, 2016 a UKLF Tuivang(Myanmar) post commander Capt. M. Jamkholal Zou sihna tawh kisai amau sunga cadre khat leh alawm te’n Cabinet theihpihna tellou a athah uh hi’n taklang hi. Thusuakin ataklatzelna ah Zoumun/Bokan (Myanmar) ah KNLF apan Sgt. Jamkai leh Sgt. Major Kankho tawh UKLF Capt. M. Jamkholal Zou kisubuai kha uh a, huainung July 2 in KNLF theihpihna tellou a Moreh a M. Jamkholal  a hoh ziakin KNLF cadre te’n mankhia in thudotna aneih hun uah vawlum kha in Menal lui ah paih uh chi hi. Cabinet theihpihna omlou a UKLF commander vawlum tute lock-up a koih uh hi’n leng thusuakin taklang a, lui tui in a tuahmang siluang muhkhiakna dingin KNLF inleng pan nasatak a la in, maban ah sunzom ding uh hi’n taklang hi.


SUUNNA:
Khawlzen (85) M/o Khamkhothang of Zionveng, New Lamka tuni nitaklam dak 5:00 velin Dist. Hospital ah sungna in si a, July 6, 2016 in YPA hanmual, New Lamka ah kivui ding hi.
Chingoumuan (37) s/o Vungkhongai of Kangkap Village, Singngat sub divn. tuni nitaklam dak 4:00velin an-huanlai kipukphut in si a, July 6, 2016 in kivui ding hi.


IMPHAL NEWS:
CM apan Id-Ul-Fitr message 
Imphal, July-5: Chief Minister O. Ibobi in July 6, 2016 a kiag ding Id-Ul-Fitr tawh kiton Manipur mipi a diak in Muslim community-te a ding in deihsak thuchah bawl a, Ramzan bei tawh kiton a Id-Ul-Fitr in kipum piak zawhna leh kipaktak a nek kihop khawmna taklang a, hiai festival tungtawn a Manipur ah miteng kipumkhatna leh muanna banah bitna a tut ding a deih thu taklang hi. Huailou in Major Gen. Shashank Shekhar Mishra, VSM, GOC, Red Shield Division leh Coalition Against Drug & Alcohol (CADA) te’n leng deihsak thuchah bawl uh hi’n kigen hi.


HDFC luhna ah mi 3 mankhia
Imphal, July-5: Thoubal Police te’n tuni nitaklam dak 5:00 velin zan a Thoubal HDFC branch luhna tawh kisai in HDFC a staff 1 telin mi 3 mankhia uh hi’n kigen hi. Mat a omte thudotna dungzui in Charangpat a inn khat a Mandir sung leh Thokchom village ah sum tang leh gold mukhia uh hi’n kigen hi. Sum Rs. 7.5 lakh leh gold a sum a tuat in Rs. 50 lakh man ding mukhia uhi. Charangpat apan Arun leh Dilip mat hi uh a, bank luhna ah tel kei mahle uh bank luh te’n van koihna din  va zang uhi. Huai banah bank luh te’n zan a HDFC staff-te mobile 10 lak sak ua, Charangpat kim lakah bank staff-te mobile signal a pai thei khenkhat om ziak in Thoubal Police Commando leh A/R te’n tuni nitak dak 6:00 vel a search operation bawl uh hi’n leng gen uhi.


Ni 2 om din Prahlad Patel hongtung
Imphal, July-5: Prahlad Singh Patel, in-charge BJP Manipur Pradesh in  ni 2 om ding in tuni’n Imphal hongtung a, aman  BJP executive committee thak ding bawl ding a hongzin hi’n  kigen hi. Hiai list a bawlte Ram Madhav, BJP National Gen Secretary banah in-charge Northeast state ah thon ding a gintak ahi hi. Prahlad in Manipur a om sung in BJP Manipur Pradesh President K. Bhabananda; Th. Chaoba, Convenor, Election Committee leh BJP makaite  tawh meeting nei ding hi. Akigendan in K. Bhabananda Singh, President, BJP Manipur Pradesh in June 23, 2016 in executive committee member din mi 58 nominate in thusuah bawl mahleh party sunga khenkhatte’n a pomlouh ziak un thubuai piang hi.


PCI teamte’n official tuamtuam mu
Imphal, July-5: Ravindra Kumar, Convenor, Press Council of India (PCI) makaihna  PCI sub-committee member– C.K. Nayak leh Kosuri Amarnath te’n tuni’n Chief Secretary O. Nabakishore, IAS; Dr. Suresh Babu,IAS, Addl. Chief Secy (Home) leh LM Khaute,IPS, DGP-mu uh a, Manipur a mediate’n pawl tuamtuam apan vauna ziaka haksatna a tuah  tungtang uh genkhawm uhi. Huai zawhin National Investigation Agency (NIA) palaite mu uh a, huai ah CorCom te’n Assam Rifle-te a ambush  thu tawh kisai in Manipur a newspaper 4 laka 2-te thulaksawnna (source) taklang dia phut uh tungtang thudik ahihdan PCI teamte theisak uh hi’n kigen hi.


Accident  ziakin mi 1 si; 2 liam
Imphal, July-5: Tamenglong district HQ apan km 25 vel a gamla Naomkalong leh Sarungpham kikal ah tuni zingsang in gari accident a, huai ah mi 1 si in midang 2 liam uhi. Khawtual te’n lampi hoihlouh ziak a thiltung hiding in gen uh a, si leh liam-te hihna theichet hinailou hi’n kigen hi.


‘Wanted tag’ lakkhiak keileh kiphinna khauhsem pat hiding: JAC
Imphal July-5: JCILPS convenor lui Kh. Ratan in Sapam Robinhood sih champha zatna hun a uap theihna din state govt. in a tunga ‘wanted tag’ a puan July 8, 2016 ma a lakhe dingin JAC te’n ngetna bawl uh a, huai ahih keileh kiphinna khauhsem pan ding hi’n gen uhi. Huai  tawh kisai in tuni’n JAC thupuangtu Th. Dara Singh in mipi te’n Ratan tunga ‘wanted tag’ pomlou uh a, state govt. in Ratan tunga  ‘Wanted tag’ leh FIR lakhe dingin ngen hi.


TUNI THUPI:
“Toupan hichi’n a chi: Mi pilin a pilna suang kei henla, mi hatin a hatna suang sam kei henla, mi hauin asum leh pai suang sam kei heh.”  – Jeremia 9:23


EDITORIAL:
Modi leh kisumdawn tuahna
Chief  Minister O.Ibobi  in term masa akipanin Moreh town puahphat dingdan naktakin gen a, tuni dong agen leng agen mun mahmah a, bangteng Trade centre tawh kisai a sepsuah a om hihiam chih theih haksa mahmah hi. Himahleh, kikawmtuahna lampi Imphal leh Moreh kal bel hoih mahmah a, sah leng sah a, blacktopping mam zihziah  mai hi. Lamka akipan Moreh tan tuhun in nuamtak mai in kileh zawhin om a, Manipur mite’ adia hamphatna ahih banah Moreh a tengte’ adingin leng vualzawlna thupiak bangin ngaihsut theih hi. Prime Minister Narendra Modi in gam nih kal kisum dawntuahna dingin policy tuamtuam bawl a, tuateng a kitual dialdial (parallel) a thil paimah ahidiam chih leng theih hilou hi.
    Bulsut zual lehang India leh Myanmar official te’n kum 20 val paisa 1994 kum in trade agreement nei uh a, April 12, 1995 akipan in official in gam 2 kal ah kisumdawn tuahna kipan a, huai pen Moreh border trade centre chih in om a, tuni dong huai trade centre lawhching mahmah a theih ahi hi. Government in Moreh town naktak a a puah gentaklouh Namphalawng tawh kal a gate no 2 pen lian mahmah in  bawl a, gate bawlna kia in Rs 1.5 crore beisak zou  chih ahi hi. Tualou in leng Imphal-Moreh naktak a puah in om a, thamlou in, Moreh kantan in Tedim tan BRO te’ blacktopping nasep pailel a, huai trade centre puahna dingin kum 4 paisa in centre govt in Rs 25 crore sanction hi’n kigen hi. Hita mah leleng, Look East Policy, Vision 2020 banah Trans Asian Highway chih thu a kigenna hun bangtanhiam hita a, a kum a sim kiveita hi. Niteng in gari aza asim Moreh lut gige a, huchibang in aza asim mah pawt gige hi.Huchi ahihleh, Moreh kichi mun poimawh petmah ahi chih chiang a, ni khat maimai a sum kiveituah leng a nasa mahmah ding chih theihsa ahi hi.
    Thukal zehin, Trade agreement 1994 kum a suai  kikai  town development pen a hak lawlam hi zawmah a, kum 16 nung a Moreh puahna kipan pan chih hilel tak hi. A zekai na a, thil kipahhuai bel ahi veve hi. Manipur leh Myanmar sum kidawntuahna  Moreh mun kia ah  honkhiak in om a, Moreh sang mah a kikawmtuahna nuamzaw leh naizaw ahihleh Behiang ahi hi. Behiang khua leh Myanmar gam kizom helhel in om a, trade centre koihna mun din mun lemchangtak ahi hi. CCpur district a civil society tuamtuamte’n kum bangzahhiam paisa akipan in centre government ah Behiang leng trade centre a puang ding in ngetna ana khelut ta ua, centre in trade centre hon hiding chih thuchiam  nei mahle uh tuni dong official  a inauguration bawl hinailou hi.
    Moreh bang in Behiang ah leng Trade centre om sam leh chihhuai mahmah a, ngaklah huailua hi. Mipi vantang mahmah ading in leng nekzonna baihlam zawdeuh ding a, a totkhak khaw tuamtuamte’n hamphatpih lai ding uhi. Moreh mun ah trade centre a kihon theih leh bangziak a Behiang a hon theihlouh a om tuan ding hiam chih dotna poimawh mahmah hi a, Minister/MLA te’n pan a  lak taktak uh poimawh hi. Union commerce ministry in leng lemsakpihna peta uh bang a, ahihziakin, a taktak in thil omdan theih haksa mahmah lai a, chik chiang a nasep kipan ding hiam chih leng theih hinailou hi.
    Mizoram leh Myanmar government in leng trade agreement 3 vei hial ana bawlta ua, tu in Mizoram leh Myanmar kalah kisum dawntuahna  trade centre mun 3 ah  honkhiak hita a, mipi’n hamphatpih mahmah uh a, nektawm zongte ading in leng sep senglouh ding nna tuamtuam om chi hial uhi. Genlai le hang, Moreh i chih thuneitu tuamtuam tam mahmah in buaina leh bandh/strike kichi a vangkim in om a, thunei ut midang tampi omlai   hi. Behiang bang trade centre dia puan hi ngeingei leh Moreh sanga a buaizawk gintak huailou a, government in leng revenue mu hoihzaw ding in ginhuai a, thamlou in kikawmtuahna thil ah leng Moreh sang mah in baihsam zawtham  ding  hi. Chief Minister Ibobi  in ataktakin Behiang Trade Centre bawlkhiakna ding ah bangtan pan ala ahihiam  chih theih hakpi suak a, huai kawm in Prime Minister Narendra Modi makaih BJP/NDA government in huai mun border trade centre in  hong khezouna  ding  uhiam chih ngaihdan tam mahmah hi.