MANIPUR EXPRESS | JULY 7, 2016

HEADLINES:
Prime Minister Modi in Africa gam 4 pha dingin zinkhia
New Delhi, July-6: Prime Minister Narendra Modi in Africa gambuppi sunga om gam tuamtuam 4- Mozambique, South Africa,Tanzania leh Kenya  pha dingin tuni nitak in Delhi akipan zinkhia a, July 7, 2016 zingsang in Mozambique tung ding hi. Prime Minister Modi in PM alet nung a Mainland Africa a phsk patna ding hi a, kum 34 nunga Mozambique pha masa India Prime Minister hiding chi’n kigen hi. Prime Minister in Africa gam buppi a gam tuamtuam 4 a phakna ding tungtawn in India leh Africa gam in  sum kidawntuahna (trade)  leh tuipi lam tawh kisai maritime security ah resource a hausa Africa tunga China in bangtan hiam thuzawh theihna a neih India in adal zawh theihna hidia lam-et leng hi’n kigen hi.

Prime Minister Modi in Mozambique President Filipe Nyusi kimuhpih ding a, Mozambique Parliament leng pha ding hi. Aman Mozambique khawpi Maputo a nutsiatma in huai gama om India mite kimuhpih ding hi.Modi in July 7, 2016 nitaklam in Mozambique akipan South Africa a Pretoria khawpi tung ding a, huai gama a om sungin energy, gas, coal, solar energy, defence technology, mining, food security, sports & tourism telin issue tuamtuam ah kilemna suai (MoU) ah suaikaih hiding chihthu om hi. PM in South Africa akipan in Tanzania leh Kenya gam leng pha ding hi.


Union Cabinet a Minister thak te’n charge la
New Delhi, July-6: Narendra Modi makaih Union Cabinet a Minister laklut thak a omte’n tuni’n charge la uhi. Information and Broadcasting Minister M Venkaiah Naidu in charge a lak zawh in solkal vaihawmna hoihzawk semna di’n mipi leh govt. kithuzakna poimawh ngaih ding hi’n gen hi. Minister for Law and Justice Ravi Shankar Prasad in agenna ah govt leh mipi kal a thudik a vaihawm ding thiltup masapen ahi chi a, India ading in Judiciary poimawhna lian mahmah chi hi. Parliamentary Affairs Minister Ananth Kumar inleng Monsoon session sunga GST bill passed theihna dinga panlak hiding in gen a, Textile Minister Smriti Irani in Prime Minister thupiak dungzui in Textile industry masawnna dinga panlak hiding chi a, Rural Development Minister Narendra Tomar, Steel Minister Birender Singh, Environment Minister Anil Madhav Dave leh Sports Minister Vijay Goel te’n leng charge a lakzawh un India mipi adia theihtawp suah a panla ding uh hi’n Media tungtawn in puangkhia uhi. Tuni a Charge la, midangte lakah Arjun Ram Meghwal leh Santosh Gangwar te bel Ministers of State for Finance hi uh a, Minister of State for Railways Rajen Gohain leh Minister of State for External Affairs M J Akbar inleng charge la uhi. Ministers of State thakte bel S S Ahluwalia, Ramdas Athawale, Jayant Sinha, Mahendra Nath Pande, P P Chaudhary, C R Chaudhary leh Ajay Tamta hi uhi.


Zo Sahkhua founder Rorelliana in Tribal Martyr-te gal
Lamka, July-6: JAC Against Anti-Tribal Bills makaih in Hiangtam Lamka a Salphate Zahna Pumpuk ah Veng leh khua tuamtuamte’n sit-in-protest a neih uh paitou zel a, tuni’n Mizoram apan Zo Sahkhua founder siampu Rorelliana  leh mi 2 in Tribal martyr-te gal uh a, Tribal Martyr 9-te’ innsungkuante kiang ah Mizo puandum 1 chiat pia uhi.Tuni sit-in-protest hun ah JAC lam akipan K. Paukhansuan, Zam Khua Cin, Pastor/Rev apan Paosei te’n makai uh a, Gangte Veng, Hmuia Veng, Lailam Veng leh Central Lamka-te tu uh a, H. Mangchinkhup, Chief Convenor tel in JAC makai hunkhop leng tel uhi.
    Rorelliana in a genna ah gam-le-nam leh sahkhua kikhen theilou a, khat a kigawmkhawm vek ding ahi chi hi. Pathian in mihing a bawldek in kuamah dong selou in amah deih dan in bawl a, tu a i omdan uh leng Pathian deihdan ahihman in kithah, kimat chihte mihingte hihdia sianglou leh hoihlou hi’n gen hi. Gam 1 amah leh amah a kidou leh khawsuak ngeilou ding a, huchimah bangin nam 1 amah leh amah a kidou leh khawsuak ngeilou ding a, huai bang in ei leh ei i kidou leh khawsuak ngeilou ding hi’n gen hi.


LOCAL NEWS:
DGP Manipur in Lamka hongpha
Lamka, July-6: LM Khaute, IPS, DGP, Manipur in tuni’n Lamka hongpha a, Rengkai road ah Dr. Chinkholal Thangsing’ nu hong-gal hi. Huai zawhin Thangzam road a, a inn tel in mun tuamtuam pha a, nitaklam in Imphal ah kiknawn hi.


EM in Medical Assistance pekhia
Lamka, July-6: G. Thangkhosuanmung, EM, ADC/CCpur & Chief of Hiangtam Lamka in tuni in a tenna inn ah ama’ bialsung a mi 12 kiangah Rs. 5000/- chiat Medical Assistance pia a, T. Singneng, Member V/A Hiangtam Lamka in mi 12-te veh in ama’ pocket apan Rs. 500/- chiat pia hi. Medical Assistance ngahte-Zomi Colony apan Samuel leh Pamkhanching; Marian Street Phailian akipan Liansangmuan; Hiangtam Lamka akipan Niangthon, Niansuanching, Nemzaching, Siamchinkhup, Velminthang, Lallianpuii leh Chingbiaklun hi uh a, Compound Veng akipan Kaigin leh Zogam Bazar apan Khanching hi uhi.


Upa K. Thansang’ laibu gelh hong
Lamka, July-6: Upa K Thansang MCS (retd) in laibu a gelh "Omdan kilawm leh chindan hoih" kichi tuzing dak 8:00 in Lamphelpat , Imphal a Upa K. Thangsang’ inn ah Rev K Kamchinkhup, DS/Imphal in hongkhia in Pathian kiang ah thumna in lan hi. Huai laibu bel Lamka a Convention Book House leh Tedim road a Dicky Book Store ah Rs.100 in muhtheih ding hi’n kigen hi.


Tuailai Pro saina in kidemna
Lamka, July-6: Tuailai 1434 Pro leh Central BYF in “Thutak leh diktatna a kibulphuh thakna”  thupi zangin article gelh kidemna, spot painting competition leh laphuah kidemna sai sawm uh a, alunglut te’n July 9, 2016 tan  in Rev. N. Pumsuanmung, Youth Co-ordinator, EBC kiangah min piak theih ding hi.
    July 16, 2016 zinglam dak 10:00 akipan sunnung dak 1:00 sung Ebenezer Academy ah spot painting competition om ding a, huai a telte’n mahni vanzat ding kitawi ngai ding hi. Huaini in Dorcas Jubilee Guest house a mini auditorium ah laphuah etdikna om ding a, huai a teldingte’n July 9 tan in Youth Coordinator kiangah tonic solfa tawh kithuah la phuah copy  piaklut ngai ding  hi. Article gelh kidemna atel ding te’n leng thumal 1000 apan 2000 tan gelhin July 9, 2016 tan in Youth Co-ordinator kiangah soft copy/hard copy submit ngai ding hi.


Canal bawlhoih hun in tui paiding
Lamka, July-6: Khuga Dam Left side canal siat ziakin July 4, 2016 apan tui supply khawl a, IFCD in canal sia abawl hoih hunhun un tui supply thei nawn ding uh hi’n Deptt. lam apan kiza hi.


YMA Lamka Branch Diamond Jubilee lopna om ding
Lamka, July-6: Hmuia Veng a Young Mizo Assn. (YMA) Hall ah July 7 & 8, 2016 in YMA Lamka Branch kum 60 chin Diamond Jubilee lop hiding hi. July 7, 2016 zinglam dak 11:00 in Cultural Dance Competition hun ah Chief Guest in Lalzawmliana, President, YMA Lamka Branch pang ding a, nitak dak 6:30 program ah Cultural Festival leh program tuamtuam nei ding uhi.
    July 8, 2016 zinglam dak 11:00 in main day Diamond Jubilee lop hiding a, Chief Guest in JC Ramthanga, IAS, Principal Secy. govt. of Manipur leh Lungmuana, IAS, Principal Secy. govt. of Manipur pang ding uh a, Jubilee Pa in Lalbiakzuala, President, Central YMA hiding hi. J.C Ramthanga, IAS in Diamond Jubilee suang hong ding a, khualliante makaih in Jubilee dakpi 60 vei tumging/khen-ging ding uhi. B. Lalramsanga, Ex-Secy,. YMA Lamka Branch makaih in member sisate suunna omding a, Lungmuana, IAS in Souvenir laibu hong ding hi. Sports Sub Committee-te apan kipahman hawmkhiat hiding hi a, tua zawh in Lalbiakzuala, President, Central YMA makaih in pahtawina hun omding a, program zawh in PC Lalchhuanawma, Ex-Secy. YMA Lamka Branch in thumna in hunkhak ding a, Diamond Jubilee lopna in nitak ankuang umkhawm ding uhi.


Gangte MIL lopna om
Lamka, July-6: Gangte MIL lopna tuni’n TRI Auditorium, Chingmeirong, Imphal ah Gangte MIL Celebration Committee makaih  in om a, Chief Guest in Ngulkham J Gangte, IFS, Jt Secy, MEA pang hi.  Functional President in H Thanghaulien Gangte IPS, Senior SP, CO 5th  IRB leh Guest of Honour in Ng. Joseph Gangte, IRS. Jt. Commissioner IT, Imphal & Dibrugarh pang hi. Rev. Khaigin Gangte, Retd. Exe. Director ESC in Class-IX leh X a MIL(Gangte) tawi theih ding a om Pathian kiangah kipahthu genna nei in Gangte Literature Society makaite ading in thumsakna nei hi. Huai hunah Guest-te leh S Thienlaljoy Gangte, MCS, SDO/Ccpur leh T. Dongzakai banah makai tuamtuam in thugenna nei uh a, GSO Ccpur Branch, GYO New Lambulane te’n Cultural Dance lahna nei ua, program zatna ah Gangte sunga officer, public leader leh saptuam makai tamkhop kihel uhi.


Tui in Lanva-lei ahihsiat  bawlthak
Lamka, July-6: Dorcas veng leh Lanva kikawmna  Lanva-lui tunga  lei kibawl  tuma deuh in tuilian in hihsia a, mipi lam apan  ngetna leh school naupangte’ khualna in bialtu MDC CT Lian Guite’ panlakna in bawlthak hi  a, tunung sawtlou in zattheih ding hi. Huai lei Lanva Model H/S a student’ leh teacher-te’ adin phatuam petmah a, lei kibawl masa a niamdeuh ziakin  tuilian omlai in  sia hi’n kigen  hi. A bawlna ding fund omkei mahleh bialtu MDC in  panla in  zawhsiaing hipahta din  kigen hi. MDC in khawpi sung mun tuamtuam a electric post-lui kizang nawnloute, sik van tuamtuam a neihsate leh lawm-le-vualte kithuahpihna tungtawn a lei a bawl hi’n  gen hi.


Khawpi sungah donation box 5 koih
Lamka, July-6: All Manipur Tribal Women Union in tribal movement tawh kisai maban kalsuanna a zatding sum poimawh ziakin khawpi sung mun tuamtuam ah donation box 5 koih uh a, phal zahzah khe dingin mipi ngen uhi. Donation box-te Hiangtam Lamka, Tipaimukh road a Nuching dawr; Dist. Hospital Canteen; Zenhang Lamka Rengkai road a  Pukhup Medicare;  Hebron veng Tedim road a  Students’ Corner le Pethuel, New Lamka a  Five Star Hotel ah koih uh hi’n kigen hi.


New Lamka UPS ah uniform hawm
Lamka, July-6: 16-New Lamka West Dist Council Constituency  a New Lamka Upper Primary School ah  tuni’n  SSA tungtawn a student-te ading free school uniform hawmkhiak  hi a, bialtu MDC CT Lian Guite in uniform pekhia a,  student-te hasotna thu gen hi. Aman  huai school ah sinsaktu hoihpente  om ahihman in studente’n leng laisim kuhkal ding leh  sianthouna kembit dingin hasuan hi.
    New Lamka JB school bel 1980 kum in kipankhia a, bangtanhiam puahlouh a om puahthak nawn hi a, class VIII tan ziltheihna dingin govt in upper primary school in upgrade in, tu academic session akipan zat hi’n kigen hi.Tukum in admission bawl 325 lak ah regular takin  student 284  kai hi’n Headmaster Hranghmingthang  in gen a, amah telin teaching staff 17, school mother 1 leh  chowkidar 1 om hi’n gen hi. Bialtu MDC in tukum in naktak a puahthak in  school building leng rong nuhthak a, teacher-te orientation a neihpih ban ah student-te leng Kite festival neih pih a, huai in student-te thathousak hi’n teacher te’n gen uhi.


UZO GHQ in Lentang Block veh
Lamka, July 6:  United Zou Organisation (UZO) General Headquarter in UZO Block 14 omte vehna sunzom zel in tuni’n UZO Lentang Block vehna zinglam dak 11:00 in Daijang Community Hall ah nei uhi. Hiai hun in Lentang Block sung a khua 6 omte akipan UZO unit makaite kihel ua, UZO President Chinlunthng, vice-President T. Gouzalal, Gen. Secretary Thangzamang leh Treasurer Jamgenthang ten thugenna nei uhi. Tuni in UZO makaiten mi kiphal tuamtuam ten a thawhkhawm uh antang leh sum a piakkhawmte uh Lentang Block te panpihna dan in pia uhi. UZO Gen. Hq ten hongtung ding July 14, 2016 in UZO Haupi Block vehna nei nawn ding uhi.


Mahni school uniform silh ngai
Lamka, July-6: New Lamka a Ebenezer Academy ah July 8, 2016 zinglam 9:00 in HSLC compartmental exam  om ding a, candidate-te’n mahni school uniform silh kawmin  zinglam dak 8:00 a  school tung ding a theihsak hi uhi. Exam hall ah mobile phone leh  electronic device tawi phal hilou hi’n kigen hi.


Dist. Level Sc Exhibition leh Maths kidemna
Lamka, July-6: SSA/CCpur dist saina in July 8, 2016 in Vimala Raina H/S ah Dist. Level Science Exhibition leh Mathematics Competition 2016 om ding a, huai ah govt. school a class VII student-te lakah Sc leh Maths ah 1 tuak telding uhi. Science Exhibition ah ‘Water Harvesting’ thupi zangin model tuamtuam lah hiding  a, ‘Mathematics Daily’ thupi zang in Mathematics written competition om hi. Competition ah school 1 apan science leh mathematics ah 1 tuak tel ding uhi.


SUUNNA:
Mrs. Nianzen (80) w/o (late) L. Tunzathang of  ZMA road, New Lamka tuzing dak 6:30 velin teknat in si a, sunnung in YPA hanmual, New Lamka ah kivui hi. Nianzen ahihleh Dr Tualchin Neihsial’ nu (mother) ahi.
Mr. C Lalhlimpuia (47) s/o (late) C. Hranglianthanga of  Thingkangphai zannitak dak 10:13velin RIMS ah pancrease cancer in si a, tuni’n Thingkangphai hanmual ah kivui hi.
Mr. K. Ginkhanhau (41) s/o K. Phungpau of Khominthang, New Lamka zannitak dak 11:20 velin khawsik in si a, tuni’n YPA hanmual, New Lamka ah kivui hi.


IMPHAL NEWS:
State Level Pineapple festival kipan
Imphal, July-6: Andro Kendra Development Orgn.-te saina in Imphal East a Thambalnu Market Complex ah July 10, 2016 tan daih ding tuni’n ‘The 9th State Level Pineapple Festival cum Seller & Buyer Meet and Youth Festival 2016’  kipan a, Chief Guest in CM O. Ibobi pang hi. Functional President  in Th. Shyamkumar, Andro A/C MLA pang a, Guest of Honour in T. Pamei, Commissioner, Horti & Soil Conservation, Brig. J.S. Bainsla, Commander, 9 Sector A/R leh Col. J.C. Hajarnis, Commandant, 2nd A/R-te pang uhi. Chief Guest in tourist destination dia Andro leh Kaina phuah banah lampi keklet hi a, Thoubal Dam/Maipithel Dam bawlna a nasep 99% zawhsiang hi a, vuahzuk hun ah vuai tui khawlkhawm hiding in gen hi.  Dam zawh hun chiang in Imphal area ah tuisiang dawn ding banah electricity leh irrigation a din tui pekhe ding a, Manipur govt. in horticulture & soil conservation dept. tungtawn in pineapple telin horticulture louma a piangkhia-te puah leh market lam a zuak khiak ahihtheih nang in lam tuamtuam ah panla uh chi’n taklang hi.


July 7  in Id-Ul-Fitr kizang ding
Imphal, July-7: Muslim-te anngawlh Ramzan a bei tawh kiton in zan in kha (moon) kimu a, Muslim festival poimawh Id-Ul-Fitr kichi July 7, 2016 (Thursday) in Manipur ah kizang ding hi. Huai dungzui in Manipur govt. a GAD in July 7, 2016 in govt. office leh institution teng suti puang a, negotiable instrument act pansan in bank leh commercial institution teng leng suti (holiday) hiding in state govt. in puang hi.


District Magistrate in Curfew khahkol
Imphal, July-7: Thoubal district sung Lilong sub-division a Nungei village ah hunchiam omlou Curfew kipuang July 7, 2016 in zingsang dak 5:00 akipan nitaklam dak 6:00 tan khahkol (relaxed) hiding chi’n District Magistrate/Thoubal in tuni’n order suah hi.


HDFC bank luh 1 police in mat beh
Imphal, July-7: Meltheihlouh pawlkhat in Thoubal a HDFC branch a luh uh tawh kiton in Thoubal Police te’n bank luhte laka tel mi 1 mat beh uhi. Amah kipuanna apan Charangpat Mamang a Pukhri sungah plastic a kituam Rs. 1 lakh leh gold gram 700 muhkhiak hi a, Thoubal police te’n tunitan in bank luhte lakah mi 3 mankhia uh a, huai-te akipan a sum guk uh Rs. 8,55,000 banah gold kg 2 val mukhia uhi. Tun Thoubal Police te’n midangte zongin mun tuamtuam ah search operation bawl uhi.


KSO leh TSA te’n mawhpaih
Imphal, July-6: KSO-GHQ te’n UKLF a External Secy. George Jamkholal Zou thahna tawh kisai mawhpaih thupuang a, KNLF/KNO cadre te’n Moreh ah George a thah uh KNLF lamte gin-om (treachery) louhna hi’n gen uhi. Thautawi-te kithah tuah chiang in a thuaktu mipi ahih ziak a KSO in Kuki Armed orgn. sung ah muanna leh bitna banah kituahna omna ding a panla a, pawlkhat sung ah kithahna pen kituahlouhna leh muhdahna ziak hi’n gen uhi. Kuki mipi leh KSO te’n hibang a gamtatna ngaidam lou ding uh a, armed orgn te’n muanna leh bitna banah kituahna leh kipumkhatna dia panla ding in ngetna bawl uh a, uangsem ki A melmakna a tun louhna dia KNLF-te gamtatna ziak a UKLF te’n thukkik lou ding inleng ngetna bawl uh a, huai banah TSA-Chandel te’n leng mawhpaih  thupuang uhi.


Gari sungah zu litre 450 mukhia
Imphal, July-6: Thoubal Pakhangkhong mipite’n tuni zingsang dak 7:30 velin Kangsengbi Lampak Thoubal Pakhangkhong Leirak a Bolero (No. MN04A-6933) sung ah country made liquor litre 450 mukhia uh hi’n kigen hi. Zu matkhiakte mipi muh in hal uh a, hiai hun Thoubal Pakhangkhong Meira Paibi, Loukha Leirak Apunba Meira Paibi leh Pakhangkhong Youth Development Assn. a volunteer te’n uap uh hi’n kigen hi. Akigendan in Thoubal Pakhangkhong mipite’n tuni zingsang in Bullet proof gypsy a tuang security personnel leh Bolero a tuang-te kisel laitak tuak kha uh a, bolero gari a checkna uah zu mankhia uh hi’n gen uhi.


RIMS A-block ah van susia
Imphal, July-6: RIMS hospital ah tuni zingsang dak 4:30 vel a nupi nau nei khin khat a sih ziakin a innkuante’n  RIMS Administrative Block (A-Block) a furniture, glass window leh van tuamtuam susia uh hi’n kigen hi. Akigendan in Thokchom Kheroda Devi (34) w/o Th. Somerendro Singh of Khurai Kongpal naunei dingin July 4, 2016 ni a RIMS hospital ah puaklut hi a, huai nitak zan sawt nung in naungek numei nei            mahleh bleeding ziakin a dinmun in siatlam nawt a, July 5, 2016 nitaklam in ICU ward ah puaklut in om a, Doctor te’n sisan poimawh ding chi’n a innkuante theisak nung uh tuni zingsang dak 4:30 vel a si ahihdan theisak nawn uh hi’n kigen hi. Thokchom innsung mite’n Doctor leh nurse-te tungah inquiry leh gawtna piak ding phutna a siluang a lak nuam louh ziak un RIMS morgue ah siluang koih a om hi’n gen uhi. Akisaipih thuneite’n enquiry pat ding chiam mahle uh Thokchom innsung mite’n inquiry tawh kisai a report luikhia leh hospital a staff-te gawtna piak ma siluang lalou ding uh hi’n  taklang uhi.


Tuni’n Kang festival kipan
Imphal, July-6: India pumpi ah Hindu sahkhua zuite’n Rath Yatra a zat uh tawh kiton in  Manipur ah ‘Kang Chingba’ festival kichi Palace Campound ah Shri Shri Govindajee-te saina in tuni’n om a, huai ah mipi paikhawm te’n Kang (kangta lai chi khat) a kaih banuah Lord Jagannath kiangah thilpiak danin thei, pak leh lounah tuamtuam pia uh a, festival in ni 9 sung daih ding chi uh a, Sangaiprou Temple leh ISKCON complex ah leng Kang festival zatna om hi’n leng gen uhi.


Recreation park ah Singnou suan
Imphal, July-6: Central Forest Division, Govt. of Manipur te’n Kangla Recreation Park ah ‘The 67 Vanamahotsava’ tawh ki zawi tawn in tuni’n singnou suanna hun sai uhi. Hiai hun Sambu, Addl. Chief Secretary; L.M. Khaute, DGP, RK, Nimai Chan, Consultant to the government, PN. Prasad, Principal Chief Conservator of Forest leh Forest dept. a official tuamtuam te’n uap uhi.


Hunbeisa van zuaktu pekhia
Imphal, July-6: Nambol market ah tuni’n hunbeisa (expire) sweet, chocolate banah nektheih tuamtuam zuaktu non-local khat DYUVPO te’n man uh a, Nambol Police Station ah pekhia uhi. Mat a om Bishwanath Sharma (55) tulel in Nagamapal a om hi a, a kipuan khiakna ah a van zuakte Masjid road a Muskesh store apan alak sawn hi’n gen hi.


TUNI THUPI:
“Huchi’n Christ Jesu ginna ziak a hotdamna mu ding a nang honhih pilthei Laisiangthoute naupang nou a kipan theikhin na hi chih thei gige in.”- II Timothi 3:15


EDITORIAL:
Naupangte’ kipiaksiatna
Tuni chiangin  siamna, theihna   leh khawvel pilna tuamtuam sang mahmahta chih kuapeuh in i thei chiat uhi. Naupang pauthei nailou tanpha in leng mobile phone tawi lunggulhta uh a, school kai’ kipantung kum 3 velmi hipan preparatory class a kai chiang in smart phone leh phone tanpha thei lumlet mahmahta  uh a, a ut-ut uh mekkhe zatzat thei mawk uhi. Touch screen mah lunggulh uh ahihdan theih hi a, a suangtu’ kibatlouh dungzui in naupangte’ ngaihtuahna lamdang in kibang kimkei mahleh atamzaw 90% velin phone hoih mah enlah zaw uh ahihdan tamtak in i muchian uhi. Hiai tungtang ah laisiam tuailaite’n research hoihtak in bawl le uh chih deihhuai mahmah hi.
    Technology akhan hat banah a kikhen zungzung dungzui in aneupen akipan alianpente’ ngaihsutna in saupi ban pahpah hi. China gam ngial ah technology akhan hatluat mahmah ziakin school naupang hunkhop in sih lawhta uhi. United States ah leng kum bangzahhiam paisa akipan zalentaka ‘gun license’ issue ahihziakin student-te’n a  pate’ uh thautawi in banghiam lungkimlouhna aneih ni uhiam ahihkeileh ki ‘show off’ na dingin school tanpha ah thautawi uh a, tua ziakin shooting incident kichi US gam ah om mun mahmah hi.
    Theihna asang a, khuakpilna leng a maimai nawnkei hi. I tate/ i tute i chih naupang bangmah thei nailou bangin ngaihsun mah lehang leitung pilna a nasat mahmah tak ziakin amaute nuaisiah(under estimate) theihvual  hinawnlou uhi. Tulai mobile/technology khawvel ahita a, huai kalah nu-le-pate’n leng i tate leh i tute etkolna lamah mawhpuakna leh kisiakthakna ding tamtak i nei uhi.
    Vangtahhuaitakin, M. Benjamin Kom (13) s/o Alar Kom of Haotak Khulen, Henglep sub-divn, zan nitaklam dak 4:30 velin a omna uh New Lamka College huangsung a hostel building ah awklum hi. Benjamin bel anau Ngamgunmang tawh New Lamka a Lamka College huangsung a hostel building awng pansan in Ebenezer Academy a kai hi a, aman class VI simlel hi’n kigen a, half-yearly exam ah fail a, a unu puansawp kalin puan zangin na kikhailum chih ahi hi. First quarterly examna  ah leng fail kha hi’n kigen a, a innkuante’ soisak ding lauhziaka amah leh amah a hinna kila mai hidingin muanmawh hi a, poi petmah a, a innkuanpihte leng i suunpih mahmah hi.
    Dik hia, diklou theikhang, himahleh, naupangte’ ngaihtuahna (psychology) ah bangteng omta hiam chih nu-le-pate’n i theih  uh poimawh hi. Benjamin innkuante i mawhsa  chihna a hikei, himahleh, hibang thil maban ah khawvel a khantouh dungzui in i tuak toutou thei uhi. India pawlam gam tuamtuam in leng naupangte’ ngaihtuahna leh khawsakdan hoihtakin study bawl uh a, bangchileh naupangte kep dam a om theiding uhiam chih ngaihsun uhi. Kum 13 lel a upa Benjamin in hibang ngaihtuahna lungtang neithei ahihleh amah sang a naupang zaw midang tamtakin leng ngaihsun thei a, ama sanga upa zaw school kai student te’n  leng ngaihsunthei uh a, tua ziakin student te’ lakah kihilhpilna ‘awareness  program’ poimawh  hi’n theihtheih hi. Poi mahmah.
    Lawhsapna leh lawhchinna pe’n ei Christian-te’n  Pathian apan ahi ichi ua, himaheh, gendang dang ah mimal a kinga ahi chih leng ahi hi. Mimal ah kinga masapen a, a zomin bel Pathian mah ahi chihlouh theihlouh hi. Huchi kalah  nu-le-pate’n i tate uh pawng tai gugu, sal gaga, suak-le-sal bang a bawl chihte i chinlouh teitei uh poimawh lua  hi. Nidang lai naupang leh tuni a naupangte kikhai mahmah uh a, theihna,pilna leh siamna ah leng van leh lei bang khop ahihman un ahoihlam ahihleh kipak khengval pahpah, a selam ahihleh kipese khengval pahpah chih ahihmanin nu-le-pate’n tate i kepna ah pilvan poimawhlua hi. Exam result ah a lawhsap khak ua leleng pilvangtak a amaute houlimpih poimawh a, hong lawhchin ua leleng kipahpihdan i siam uh poimawh hi.
    Khawvel khantouhna sang mahmahta ahihman in nu-le-pa te’n leng tate’ kepna ah sinlaithak lak hunta hi. Huchi ahihkeileh, eilak ngial ki-engsawn kichi tamlua ahihman in pilvanna ding tampi om hi. Unaupa Benjamin akipan sinlai la in nu-le-pate’n thathak la ni. Tualou in civil society tuamtuam banah NGO-te’n leng counsellor i neihte zanga  panlakdan om dingin i ngaihsun hi.


SPORTS NEWS:
Euro-2016:
World Champions Germany leh zintuntu France kimawl ding
World Champions Germany in tunitak in zintuntu France-te Marseille ah kimawlpih ding uh a, July 10, 2016 a Paris mun a final kimawl ding gal etkawm ding ua gintak hi uhi. Hiai match bel gam nihte a dingin poimawh petmah a, France in 2014 FIFA World Cup quarter-final ah Germany-te 1-0 in zoulou uh a, tua thei kilkel in France te’n vualzawh teitei sawm ding uhi. Hiai gam nihte bel a vualzou penpen final a leng vualzou a Euro-2016 Champion la ding a gintak hi uhi. Tua ziakin hiai match pen gam nihte adia final cheplawkna tawh kibang a gen in om hi. France te’n kum 2000 in World Cup leh European championships trophy dom uh a, tua tawh kibang a Germany te’n leng akizom a doptheihna chance nei uhi. 2014 World Cup a Germany-te 1-0 a zawh hun ua goal khumtu Mats Hummels kihel theilou ding a, tua banah striker Mario Gomez, Sami Khedirate leng aliam ziakun kihel theilou ding uhi. Bastian Schweinsteiger dinmun kithei nailou hi. France lam ah players 1st eleven kihel theilou ding omlou uh a, tua ziakin Coach Didier Deschamps in full squad pangsak ding hi. Germany adia goal 2 khumtu striker Mario Gomez kihel theilou ding a, tua ziakin Germany adi’n goal khum haksa mahmah maithei hi. France te’n ahihleh goal khum thei ngen Antoine Griezmann, Oliver Giroud leh Dimitri Payet nei uh a, tua ziakin Germany defender-te adi’n lauhhuai mahmah maithei hi.
    Hiai match bel Germany leh France adia major tournaments a 5vei akimawltuah khakna ding uh hi a, 1958 kum in France in 6-3 in zou a, 2014 World Cup a Germany in 1-0 a vualzawhna tang a, match dangte ah penalty in Germanyte vualzou uhi. 2015 November in friendly match ah France ten 2-0 in vualzawhna tang ua, Germany te’n World Cup leh Euro ah ah akizom in thumvei semi-final lut uh a, ahihziakin 1996 kum a European Champion alak nung uh khatvei mah leng lakha nailou uhi. 2006 World Cup nung a France-te major tournaments a semi-final a lut patna uh hi a, major tournament ah France-te amau homeground ah match 17 ah vuallel khalou uh a, Euro-2016 ah goal 11 khum uhi. Goal a khumte uh 45% bang header a khum uh hi a, tua ziakin France te’n home advantage nei uh a, tua ziakin vualzawhna tang ngei ding ua gintak hi uhi.


Tax fraud ziakin Messi leh  apa jail tang ding
Argentina leh Barcelona footballer Lionel Messi leh apa (father) Jorge Messi-te tax fraud ziakin Spanish court in kha 21 sung jail tang dingin thutankhum uhi. Messi leh apa Jorge Messi ten 2007 leh 2009 kikal in tax tamtak hih thelthang uh a, tua ziakin hunpaisa in buaina nei uh a, zan in Spanish court in a tungthu uh ngaihtuah nungun kha 21 sung jail tang ding in thutankhum uhi. Ahihziakin, amaute bel jail tang ding ua gintak hilou uh a, Spain gamsung ah bel kum 2 sung jail tang dingten probation in om thei uhi. Hiai bang thutanna bel Messi leh apa’n Spanish Supreme Court ah appeal bawl thei uh a, Barcelona in Messite pata in haksatna a tuah uh nungthuap gige ding uh hidan in taklang uhi.


Wimbledon:
Federer leh Raonic semi-final lut
Wimbledon Tennis Championships pailel ah tunitak in pasal singles quarter-final match kimawlna om a, huai ah Roger Federer leh Milos Raonic te vualzou uhi. Roger Federer in Marin Cilic kimawlpih a, huai ah Marin Cilic in set masa nihte ah vualzawhna tang in zou ngei ding a gintak lai in set 3 te ah Roger Federer vualzou in vualzawhna leh tang daih hi. Federer in 6-7, 4-6, 6-3, 7-6, 6-3 in zou hi. Tua zawh in No. 1 seeded zoukhetu Sam Querrey leh Milos Raonic te kimawl ua, huai ah Sam Querrey in set khat ah vualzou mahleh Milos Raonic in set thum la khin in set ah vualzou in semi-final lut hi.
    July 7 in numei singles semi-final match om ding a, huai ah Venus Williams in Angelique Kerber kimawlpih ding a, Serena Williams in Elena Vesvina kimawlpih ding hi. Numei doubles quarter-final ah Sania Mirza leh Martina Hingis pangkhawmten Timea Babos leh Yaroslava Shvedova te kimawlpih ding uhi.