MANIPUR EXPRESS | AUGUST 3, 2016

HEADLINES:
Party leh MP teng kiangah hilhkholhna lai piak in om
Rajya Sabha ah Aug 3 in G & ST bill puaklut hiding
New Delhi, Aug-2: Rajya Sabha ah Goods and Services Tax (GST) Bill puaklut (introduce) hiding a, huai genkhawmna in zui ding hi. Huai bill apaisa May 2015 in Lok Sabha ah passed hi a, himahleh Rajya Sabha ah BJP makaihna Ruling Party-te minority ahihziakun opposition Congress pawlin huai bill a provision khenkhat bawlthak (amendment) masak ding aphut uh government in pomsak pahlou a, August 2015 in Rajya Sabha ah puaklut himahleh passed louh in kum 1 sung koihdap in om hi. Tuni a BJP parliamentary board meeting zawh in Parliamentary Affairs Minister Ananth Kumar in GST Bill pen Rajya Sabha ah passed ahihtheihna ding in Opposition party tuamtuam tawh leng kithuzak khit hi’n gen a, amaute kiangah official amendment tawh kisai lai piak in om uh a, Aug 3 a puaklut hun in Rajya Sabha in a passed zawh ngei leng lam-et huai chi hi.

    Rajya Sabha member teng kianga government in ahawmzak, GST Constitutional Amendment Bill kibawlthak ah Centre leh state kala nawngkaina omthei dingte bawldikna taklat hi a, buaina omte GST Council in enkai ding hi. Govt. in official amendment ataklat theih ziakun Congress party thil ngiat-te buchingsak uh a, Rajya Sabha ah Congress in dal nawnlou ding in kilang hi.  Finance Minister Arun Jaitley in Rajya Sabha (RS) leh member teng in ngah uh chi a, member teng theihsiam sak ahih dungzui in tutung a paisuak zou ding in lam-en hi.
    Central govt. in GST Bill a puahthak ah additional tax 1% kiamsak in om a, state teng in revenue a kaihkhop theih nawnlouh ding ziakun kum 5 sung compensation piak hiding uhi. GST tungtang a state leh centre kala thubuai omte genkhawmtu ding GST Council ah leng state leh centre in palai sawl chiat ding uhi.  BJP leh Congress in zingchiang(Aug 3) in party member teng Rajya Sabha a kai kim ding in theisak uh a, GST Bill tungtang debate leh vote khiakna ah telkim ding in theisak uhi. Rajya Sabha a GST Constitution Amendment Bill apaisuak leh, India ah ‘uniform tax regime’ om ding a, central excise, state VAT, entertainment, entry leh luxury tax teng GST in huam ding a, atuam tuam in tax lak hinawnlou ding hi.


LOCAL NEWS:
SMO telin official 4 in hongpha
Lamka, Aug-2: Dr. Gojendro, State Malaria Officer & State Program Officer, NVBDCP Manipur makaih in official 4 in tuni’n Lamka hongpha uh a, Dist. Malaria Officer & NVBDCP/CCpur tawh Vector disease thu a panlak dingdan gen uhi. State Malaria Officer in ASHA worker-te kiang ah K-Othrine damdawi zanga thousilen diahdan a practical in amahmah in sinsak hi. Amau CCpur dist. a zatding Delta machine (fogging) kapna 5 leh thousilen diahna damdawi (K-Othrine) hunkhop hong pua uh a, sunnung in Imphal ah kiknawn uhi.


Emi Niangmuanching’ panpihna
Lamka, Aug-2: Tuibuong Area Youth Club (TAYC) te’n Tuibuong a Canara Bank ah July 9, 2016 a Activa  in a phutkhak Emi Niangmuanching (6) d/o Lalrochan Hmar of Tuibuong, Zion Veng  pahpihna penuamte piak theihna ding in tuni’n A/C no.4768101004802, IFSC code ÇNRB0004768 honguhi. TAYC in  Emi Niangmuanching’ panpihna ding in tuni tan in Rs.72,611/- kaikhawm uh hi’n kigen hi.


Pumpuk ah sit-in-protest paizel
Lamka, Aug-2: JAC Againts Anti-Tribal Bills makaih in Hiangtam Lamka a Salphate’ Pumbuk ah sit-in-protest paitou zel a, tuni’n JAC apan Thangzamang & Henkholun ban ah Rev. Hangpi Manlun makaih in Nghathal, Vengnuam (New Lamka) leh Kamdou Veng apan sit-in-protest tu uhi. Sit-in-protest hun ah Pathian thu genna leh  JAC makaite pan thugen om hi.


ZoPHE in state govt. mawhpaih
Lamka, Aug-2: Khamchinpau Zou @ K. Zou, Convenor,  Zo Peoples for Human Rights & Empowerment Forum (ZoPHE) in Sajiwa Central Jail a om  Thangminlian Zou @ Bobon (29) s/o (late) Kapkhanpau thah a om ziakin Manipur govt. mawhpaih thu puang hi. Tualthattute Saudi Arabia mi hihleh hihlouh state govt. in a kanchetlouh ban ah Central govt. Immigrants deportation Camp ah huaite pekhe tuanlou in bangziakin  Jail a koihden uh hiam? chih dotna bawl hi. Foreign mi Section 14 of Foreigner Act 1946 nuai a kiman bang dan (law) a Hindi leh English hilhding a Jail thuneitute’n Bobon tawh Cell/room sung ah khumkhom thei uhiam? kua oder hiam? chi’n dotna bawl hi. Jailer te’n Advocate-te konggak (belt) tawh kimuhpih ding phallouh himahleh Jail sungah bangziaka mi 3 kithat thei hiam? chi hi. Manipur govt. in Jail a duty officer teng suspend dingin ngen a, Bobon dam hunsung ding kum 75 tan vel, anu, azi leh a tate state govt. in a etkol ngai hi’n taklang hi. Kal 1 sung a govt. in action lalou chi a, Bobon’ innkuante’n ngetna a bawl ualeh ZoPHE in Manipur govt. notice peding hi’n K. Zou n taklang hi.


ZNC meeting ding kisuan
Lamka, Aug-2: Zomi National Congress (ZNC) pawlin Sim Veng a Simte Inn ah Aug 4, 2016 a meeting 5veina nei ding a sawm uh hunchiam omlou a suan uh hi’n thusuak kingah hi.


Public Consultative meeting om
Lamka, July-2:ATML-te saina in tuni’n YPA Gen HQ hall ah tribal movement leh 6th scheduled tawh kisai in public consultative meeting om a, Manipur singtangmite lakah bill 3-te’ziakin thu tuamtuam atam ziakin mipi hamhaih a, ahoihpen ding bang hihiam chih kikupna dia programme sai  uh hi'n gen uhi. All Tribal Women Union makaih in thumkhawmna nei uh a; L. Rohlun Hmar, Pumzakham Simte, Nehtinmang Haokip, Hauneilal Vaiphei leh Nianglian, Convenor, ATWU, Dr. Paul Ginthang leh Lianmuanthang telin mi tuamtuam in thugen uhi.  Huai meeting ah Manipur singtangmite haksatna hihvengna dinga lampi omsun 6th scheduled provision ahihdan gen uhi. Mipi paikhawmte’n ATML in maban ah a sepdia hoih a sakte uh leng genkhawm uhi.


Mi 5 in damlou sisan pia
Lamka, July-2: Upa G. Thiankhangin (57) h/o Chingzaniang of Vengnuam, New Lamka Vengnuam damlouh ziakib July 30 in Dist Hospital a admit a om  sisan a poimawh ziakin social media tuamtuam a kapkhiak nung in phatuamngai mi hunkhop in sisan pia uhi. Zan in  unit 2 piak himaleh unit 4 poimawh nawn chihthu om  ziakin ama innkuante’ akipan  1 telin mi 4 in tuni’n sisan unit 5 pia uhi.


Bijang leh Kamdou Veng ah fogging
Lamka, Aug-2: Dist. Malaria staff te'n khua leh veng tuamtuam ah Japanese Encephalitis natna pua Culex mosquito thahna dingin Delta machine zang in meikhu (fogging) akap uh sunzom uh a, tuni’n Bijang leh Kamdou Veng lak ah kap uhi.


Dorcas Veng V/A te’n lei bawlhoih
Lamka, July-2: Dorcas Veng leh Gangpimual kikawmna  Lanva-lui  tunga suspension bridge(lei) kum 2015 a tuilian in ahihsiat tuni’n Dorcas Veng V/A te’n gua (bamboo) zangin bawlthak uhi. Lei bel Langkhanpau Guite’ inn khang zek a om, 2013-14 a BRGF fund zanga kibawl hi a, Gangpimual/Mualkoi leh Dorcas Veng/Chimtung Vengte kikawmna hi’n kigen hi. Mipi khualna in V/A fund zangin Dorcas Veng V/A te’n  gua(bamboo) zangin  bawlthak uh a, kikawmna poimawh ziakin Dist. Admn in leng ngai poimawh dingin ngen uhi.


ZEO in list petlut di’n theisak
Lamka, July-2: ZEO/CCpur in August 15, 2016 in Tuibuong a Peace Ground ah 70th Independence Day zatna ding a tel ding  educational institution akipan pasal leh numei contingent-te’ adin Augt 13, 2016 zinglam dak 7:00 in rehearsal om ding hi’n taklang hi. Parade contingent a teldingte’n contingent 35 leh makaitu ding teacher teacher numei leh pasal tuak ban ah commander leh flag bearer-te detail Aug 9, 2016 tan in ZEO office a DI/DDO kianga pelut ding theisak hi.


YPA GHQ makaih in social work
Lamka, Aug-2: YPA GHQ leh YPA Lamka block makaite'n tuni in CCpur college gei, Tipaimukh road ah social work nei uh a, Mahajon Dongpi Langel in JCB  thawh a, niin omte hahsiang uhi. Niin tamtak JCB zangin Dist. Council Sanitary truck/tripper gari in pawkhia uhi. Mahajon Dongpi in khawpi sung sianthouna ngai zan leh tuni’n  a JCB manbei in a zatsak ziakin Khailianthang Tonsing @ Thangte President, YPA Gen HQ in kipahthu gen a, CCpur College kiang, Tipaimukh zul ah kuaman niin pai nawnlou dingin area mite ngen hi.


Thousilen hawm ding la uh
Lamka, Aug-2: Malaria deptt. te’n CHC, PHC tuamtuam bial ah thoukang (mosquito) akipan kivenna dingin Longlasting Insecticide Net/Iinsecticide-Treated Net (LLIN/INT) hawmkhia uhi. Khua leh veng khenkhat ah LLIN/INT tang  nailou hunkhop om a, huaite lak ah hawm dingin ASHA worker-te’n tuni’n Dist. Malaria office  ah LLIN/INT tamtak lakhia uhi.


SUUNNA:
L. Khamzadou (83) f/o L. Lianchinthang of Hmuia Veng, tuzing dak 9:45 velin cancer in si a, nitaklam in CYA hanmual, New Lamka (G) ah kivui hi.
Niangkhoching (75) m/o Upa H. Ginthanlian of V. Munhoih (New Lamka), tunitak dak 6:00  velin teknat in si a, Aug 3, 2016 in YPA hanmual, New Lamka ah kivui ding hi.


IMPHAL NEWS:
Manipur ah tuni’n richer scale 3.5 a hat zinling om
Imphal, Aug-2: Chingmeirong a MET office thusuak in a taklat danin tuni zing dak 7:55 in richter scale 3.5 a hat zinling om a, epicenter ahihleh  Ukhrul district a leinuai km 73 a thuk sung hi a, mi tamzaw in zinling om lam theilou uhi. Akigendan in July 27, 2016 in Ukhrul district sung ah richter scale  magnitude 4.4 a hat zinling ana om hi’n leng taklang uhi.


Dist thu ah Aug 15 tan hunpia
Imphal, Aug-2: Senapati district a Sadar Hills a CSOs tuamtuam kipawl khawmna Joint Action Committee (JAC) Sadar Hills te’n Aug 15, 2016 tan a full-fledged revenue district dia Sadar Hills puang ding phutna in Cabinet Minister khat tungtawn in tuni’n CM O. Ibobi kiangah memorandum pia uh hi’n kigen hi. JAC Sadar Hills-te  hunbikhiah sung a pichingsak ahihkeileh maban Assembly Election hun ah Congress party boycott ding banah kiphinna tuamtuam pan ding uh a, kum 1971 a Manipur full-fledged statehood dia puan hun ah Manipur singtang bial leh tribal-te humbitna ding a India govt. in Manipur (Hills Areas) Autonomous District Council Act 1971 bawlkhia hi. Huai Act tungtawn in Manipur a ADC 6-te full-fledged district dia kheng lamdang theih himahleh Sadar Hills khek a om louh govt. kia in a ziak thei chi’n gen uhi.
Hiai tungtang ah Governor leh CM in full-fledged district a puang ding bangzah vei hiam chiam uh a, April 30, 2016 ni a full-fledged ADC dia puan din chiam uh a, tulel a vaihawmna len govt. in 3vei a chiam nung in Sadar Hills pansan a CSO – Sadar Hills Chief Assn. Women Union Sadar Hills, Sadar Hills Town Committee Kangpokpi, TSA Sadar Hills leh student orgn. tuamtuam te’n July 26, 2016 ni in meeting nei uh a, huai hun ah govt. kiangah thutawpna piak ding a thutanna bawl uh hi’n kigen hi.


Mun 2 ah JE vei 2 mukhia
Imphal, Aug-2: Heingang Constituency sung ah JE vei 1 tuak muhkhiak ahih tawh kiton in Manipur ah JE vei mi 27 pha hi’n official te’n gen uhi. Heingang Awang Leikai apan Achanbingei High School a Class VIII simlel khat in JE vei a, July 28, 2016 nitaklam apan JNIMS hospital ah etkol hi a, test tungtawn a JE vei ahihdan theihkhiak hi a,  Heingang United Club Orgn. (HUCO) leh Heingang Awang Leikai mipite’n panpihna sum pia uh a, anti-vaccine kap 1 ah Rs. 400 man a, sum lamah haksatna tuak uh chi’n gen uhi. Heingang Awang Leikai apan JE vei theihkhiak tawh kiton in mipite’n affected area ah fogging kap ding in akisaipih thuneite kiangah ngetna bawl uh a, Heingang PHC te’n zan tan in panlak bangmah neilou uh a, Achanbingei village ah fogging kap himahleh Heingang Awang Leikai ah fogging minute 5 kap nung in equipment buai chih ziak in paikik uh chi’n gen uhi.


Project ‘Belladonna-200’ pan ding
Imphal, Aug-2: Directorate of AYUSH-te saina in Imphal a Spoon Multi-cuisine Restaurant ah tuni’n press conference om a, huai hun ah P.K. Singh, Health Commissioner in media-te tawh kimuhna hun a Manipur mun tuamtuam ah Japanese Encephalitis (JE) natna doudalna dia Project Belladonna 200 patkhiak hiding in gen a, JE natna leng ngaihkhawk huai mahleh tulel a patauh ding leh mass vaccination poimawh nailou a, JE apan kivengna dia hoihpen fogging banah viral disease pua culex mosquito-te nouneih ding dal theihna dia tenna inn kim-leh-kiang siangthou tak a koih ding chi hi. Directorate in JE natna tawh kisai in Project Belladonna 200 telin thil tuamtuam pan uh a, Belladonna 200 damdawi mihing a dia poina omlouh ziak in a lauh huai nang omlou chi’n gen hi. Conference zawh in Scientific session om a, hiai hun Homoeopathy Experts, Homoeopathy Doctors, Research Scholars leh AYUSH official te’n uap uh hi’n kigen hi.


Osmania University tawh kibang a suahlou ding in vau
Imphal, Aug-2: Manipur University (MU) a reservation policy tawh kisai a annual row thubuai a kigolh akisapih thuneite’n Osmania University tawh kibang a MU suak saklou ding in Manipur University Tribal Students’ Union (MUTSU) te’n vauna bawl uh hi’n kigen hi. Hiai thu tawh kisai in Thangtinlen Haokip, President, MUTSU in Manipur University Authority te’n Centre Educational Institution (Reservation in Admission) Amendment Act 2012 a behlap uh Parliament Act ahihbanah High Court in Sept. 3, 2014 ni thukhenna a bawl hun uah Act gum a, mimal ahihlouh leh organization te’n Act bawl dik/khek ding deih te’n Parliament/High Court a tut masak uh ngai a, University authority te’n leng huam chi’n gen hi. Manipur University thuneite’n Central Education Institution (Reservation in Admission) Amendment Act 2012 a zat ua kipan kum teng in pawl khenkhat te’n Act a theihkhelh ziak un tribal student-te tanvou a suk khak banah student tamtak-te career dengdel sak a, hiai in nam kal kituah louhna tanpha tun thei hi’n gen hi.
Aman agenzelna ah Major community te’n University ah tribal student-te kituahpih theilou ahih ua leh NE state dang-te tawh kibang a hills district teng ah regional campus hongkhiat ding a loutheilou hi a, Parliament Act sukbei na dia MU a Professor leh Academic Council khenkhat a kigolh uh tungtang lamdang sa a, tribal student-te constitutional rights kalhna tungtang ah MUTSU-te daidide lou ding hi’n leng taklang hi.


TUNI THUPI:
“Michih, vaihawm thuneitute’ nuai ah kitahlut chiat uhen, Pathian akipan lou a thuneihna nei kuamah a om ngalkei a”  -Rome-te 13:1a


EDITORIAL:
Dan banga thutanna
July 30, 2016 zingsang dak 1:00 velin Sajiwa Centre jail sungah buaina om a, huai ah Thangminlian Zou @ Bobon (29) s/o Kapkhanpao telin mi 3 si uh a, huai tawh kisai in Special Secy (Home), Govt. of Manipur in Dist. Magistrate, Imphal East kiang ah magisterial enquiry bawl ding leh ni 30 sunga  report a pelut di’n theisak hi. Jail atang khempeuh in hihkhelh aneih ziak ua tangkha vek hi uh a, himahleh sihna ding tan ah atung ua thukhenna omloupi a sihna a om chiangin, suizui mah poimawh nawn zel hi. Hiai thiltung tawh kisai sutsawm ihi kei a himahleh dan banga thutanna tawh kisai tamlou gen lehang ut-huai isa hi.
    I theihsa himahleh, India gam kia hilou in leitung a gam tuamtuam ah lemna leh muanna (law & order) pen Home Ministry nuai ah om a, huai nuai ah Police dept te’n enkai uhi. Khawpi sung hi’n koimun hitaleh thubuai labuai, kithahna, kisualna leh  kiphinna a omhun in Police-te mah kizangin, siluang la leh buaina omte athei masapen leh asaipen hi uhi. Hiai paidan pen mawk mai a khektheih ding hilou a, kizang lel a kizangtou zel ding chih leng i thei uhi.
    Ei tribalte’ lakah abikin Non-Naga te’n ipu-ipa ua kipan iluah sawn uh tawndan leh paidan(custom & culture) hoihtak I nei uh a, huaite laka inndongta ahi hi. Tunitan in innsung thubuai, gamthu buai, nupa, ta-le-nau thubuai hitaleh tualthahna tan in, inndongta i zang ua, Police ah FIR omsa leng inndongta level a  kihoulemta chi’n i zukkik (withdraw) zel uhi. Kihoulem theih a om ahoih a, kituak dialdial a innsak-innkhang tenkhawm nuam mahmah hi. Himahleh, inndongta vai ichih chiangin gelhthoh (written) a zuih ding dan a omlou (paidan tangpi bel omtham) kia hilou in, kihoulem pen “Justice” hi theilou ahi chih i theih uh poimawh mahmah hi. Huchibang a kihoulemna a omchiangin thil gilou hihtu pen zalentak a vakthei in, a thilhih khelh tawh kisai kisik chih leng om tuanlou banah numei-naupang leh khawtang adia lauhuai thilte chiklaipeuh a bawlthei dingin kikhahzan tawh kibang a om uh hi a muh in om hi. Huchibang a i khahzan mibangzah a om dia?
    India a teng ihi uh a India Constitution in eileng hon huam ahihman in, India dan bang a thutanna ibawl uh a poimawhna  tam mahmahta hi a theih hi a, inndongta i zatdan uh gamgi neihsak poimawhlou ding hiam i chi hi. Nopna lam- mou helna/mou lawmna, puzu kholh, naudon vakna, Tousa gawhna, sialkhumsa gawhna, nau min phuahna leh adangdang ah bel Inndongta zatpen a hoih mahmah a, tanau kalah ki-itna behlap semsem hi. Himahleh, thubuai labuai tuamtuam leh criminal case neite bel akisaipih Police tungtawn in hoihtak a etzui leh thutanna lak hileh tua sangin i gam ah sualna leh ngongtatna kichi a dan a omzaw  diam chih ngaihtuahna ah lian mahmah hi.
    Mumbai, Kolkatta, Chennai, Bangalore leh New Delhi chihte ah Police te’n chiangpum khat tawi le uleng mipi in lau mahmah uh chih ahi hi. Huai omdan bel Police- pa lauhziak hilou in Police te’n dan tawh kituak in atung a vaihawmna ma ah pithei ahi uh chih a theih ziak uh ahi hi. Eilak ah bel Police kichite i lauhlouh pente lak ua khat himawk hi. Huaiziakin, Police-te a zatna ding bang a akizat ua, kihoulem/kitheisiam tan a beilou in, thilhoihlou hihte tunga thudik-thutang leh dan banga thukhenna a om theihna dingin i paidan uh khektuak bangbang hiam om di’n i ngaihtuah ahizaw hi. Kikhekna kichi a omtheihna ding thilbaih ahikei chih i thei a,  athuaktu leng a om teitei ngai him hi. Himahleh kikhekna a om chiangin a thuaktute mah a zalzoute ihi veve uhi.
    Atunga igensa Sajiwa Centre jail a thiltung tawh kisai in dan banga thutankhum a omte tungah danlou banga thiltung a om chiangin amau pen a ‘victim’ suak uh a, tuaziakin thiltung pen dan bang a sui ngai nawn hi. Huaiziakin, dan bang a vaihawmna ompen a hiding banga zuih ahihchiang in kuamah nelhsiah/pampaih/simmawh chih om theilou hi. Alangkhat ah, inndongta level  ah bel tanau haudeuhte adingin alanglang nawk nuam mahmah maithei himahleh dai kilkal a mi, belhding leh vaihawmsak  ding kichian neiloute adi’n inndongta sap khawm bangleng haksa mahmah a, a vualzawh uh leng kinep huailou chihtheih ding in om hi.
    Huaiziakin, i paidan pen abukim pen hilou maithei, ahoih pen leng hilou maithei himahleh ahun leh mun (khawvel) tawh kituak a ahoihzaw lam a kikhek theite i hih uh hun mahmah hi’n i mu hi.


SPORTS NEWS:
Chennayin FC in Siam Hanghal leikhia
Indian Super League (ISL) Champions Chennayin FC te’n tuni in Bengaluru FC midfielder Siam Hanghal leikhia uhi. Siam Hanghal bel ISL ah Northeast United in loan in la uh a, 2015 ISL ah 12vei pangkha hi. Kum 23 mi Siam Hanghal bel Tata Football Academy akipan in AIFF development club Pailan Arrows ah lut a, tua zawh in DSK Shivajians ten loan in la uh a, I-League II Division ah kimawl pan hi. 2013 in Indian I-League club thak Bengaluru FC ten leikhia uh a, Bengaluru FC te bel I-League a kihel pat kum un champion la ngal uhi. Chennaiyin FC Coach Marco Materazzi in, Hanghal ahihleh talented midfielder ahi a, kumlui in ISL ah hih hoih mahmah a, abiktak in Chennayin FC te tawh kimawlna ah hih hoih diak hidan in gen hi. Siam Hanghal bel India U-23 team ah leng kihel kha hi.


Argentina coach di’n Edgardo Bauza
Argentina Coach Gerardo Martino in Copa America final a Chile-te a zawhlouh utawh kiton in kitawp a, Argentina Football Federation (AFA) in a thakheng ding naktak a zon nung un tuni in Argentina player-lui leh Brazil club Sao Paulo soccer club Coach Edgardo Bauza zol zou uh a, amah in Argentina Coach dinmun len ding hi. Tua tawh kiton in August 5, 2016 in Bauza in Brazil akipan in Argentina zuan ding a, tua hun in thil omdan tawh kisai kikupkhawmna om ding hi. Bauza in Ecuador club Liga Deportivo de Quito leh Argentina club San Lorenzo te 2008 leh 2014 kum in Copa Libertadores tournament ah champion lakpih tuak hi. Argentina player-lui Diego Armando Maradona in a free a Coach hihna len ding in gen mahleh AFA te’n nawlkhin uhi.


Narsingh Yadav in PM kimuhpih
Rio Olympic a India ai-oh a kihel ding Narsingh Yadav bel doping ziaka kihel theilou ding dinmun a omlai zan in National Anti-Doping Agency (NADA) in Narsingh Yadav tung a ngohna om tengteng hih vengsak in bangmah omlou leh thil diklou omlou hidan in gen uhi. Tua tawh kiton in tuni in India PM Narendra Modi in a office chamber ah Narsingh Yadav kimuhpih a, PM in maban a Rio Olympics a medal lak teitei sawm a naktak a panla ding in hasuan a, best wishes khak hi. Narsingh Yadav in PM in a hon nungthuapna tung ah ka kipak petmah a, a hon muan bang a Rio Olympics a thawn kik louh teitei ka sawm ahi, chi hi. Narsingh Yadav bel Wrestling Federation if India President Brijbhushan Sharan Singh in makaih hi. Amah bel Uttar Pradesh state a BJP MP leng hi a, PM in Narsingh Yadav kiangah a tung a dikloutak a ngohna ompen ngaihtuah lou a medal lak ding kia ngaihtuah ding a theisak hidan in gen hi.


AFC in one day trial nei ding
Ahshijolneng Football Club (AFC) in August 3, 2016 zinglam dak 9:30 in M. Lhahvom playground ah one day trial nei ding uhi. Hiai tawh kisai a lunglutna neite’n passport size nih leh kimawlna van bukim tawi in kihel theih ding hidan in thusuak kimu in taklang hi.


England te’n plumber tonpih
Rio Olympic’ Games village a complaint a tamluat ziakin England kimawlmi te’n plumber tonpih uh hidan in kigen hi. Plumber bel hotel leh insung khawng a thil bawlsiamte hi uhi. England teamte bel Rio Olympic a tun ma un games village hoihlouhdan leh zawhlouh ahih dan thei uh a, tua ziaka tui leak tel in toilet blocks, electric wiring duhthusam loute hih vengsak ding leh bawlhoih dingin amau mimal in plumber tonpih uhi.


Rio Olympics ah kum 13 mi kihel ding
Brazil khawpi Rio de Janeiro ah Aug. 5-21, 2016 sung Rio Olympic om ding a, tua hun in Nepal akipan kum 13 lel mi Gaurika Singh leng kihel ding a, Rio Olympic a kimawlmi kihel naupang pen hiding hi. Gaurika Singh bel kum 13 leh ni 255 a upa hi a, amah bel swimming ah kihel ding hi. Aman national record tamtak mu a, numei 100 metres backstroke ah kihel ding hi. Aman a genna ah, Rio Olympic ah ka kihel nuam a, ahihziakin ka naupang ziakin hi thei dingin ka gingta kei man a, khalui a kihel thei chihthu kazak in lamdang kasa zawzen, chi hi. Nepal a zinling hattak omlai in insawng sang mahmah sawng 5na ah ka om a, huai akipan in suahtakna ding zong a ka omlai un a building a thak ahihziakin kichim lou in ka suakta uh, chi hi. Gaurika Singh in Rio Olympic a sum muhkhiakte apa lawmpa khat in charity a bawlkhiak a thawh vek hidingin gen hi. Rio Olympic a kihel ding kimawlmite lak a naupangpen a tang vuak leng Gaurika in kipahhuai sakthu gen hi.


Football Thuthang :
** Chelsea Manager Antonio Conte in Brazil midfielder Oscar kiangah Inter Milan a ut a leh zom thei ding hidan in gen.
**Wayne Rooney in Englanc captain dinmun a tangkhak nawn kei a leh leng England adia mansa gige ahihdan gen.
** Burnley leh Celtic ten Manchester United defender Paddy McNair kituh lel uh.
** West Brom in striker Saido Berahino zuak hiding in gen ua, West Ham in leisawm uh.
** Everton in Southampton centre back Jose Fonte deih in 9 million pounds a leikhe ngam ahihdan uh taklang.
** Chelsea in Barcelona academy akipan Marcin Bulka leikhe ding dinmun in om uh.