(Manglam Bek Ana Hileh Zaw)
Written by: K. Lianthansang
Lamka a class X ka zawh phet in Aizawl ah maban sunzom dingin ka kuan hi. Ka nu leh pa’ adia tanu neihsun ka hihman in ka nu-le-pa’n hon duat mahmah ua; sum-le-pai ka ‘demand’ zahzah piak in ka om zel hi. A nasepna uh, a sum muhdan uh, a khalawh uh chihte ka theihoih mahmah. Achang in hon sum khakdan ua kipan in ka nu-le-pa’n ‘saving bawlsiam’ uh kasa mahmah nawn hi. Car mantamtak nuamtak ah kikhawh zou ua, kei a tanu uh lah sum kitasam a hon koih tuanlou uh, a lawhkhiat ulah tamlaw hetlou(sawm-a-khat ‘receipt’ a kipan ka theihdan in). Ke’n nuamtaka sum zat ding ka neih nakleh chi’n a summuhna uh ka ngaituah sau sese tuankei a,lamdangsakna khat chu ka nei veve hi.
Tangval chihdan khat ana kineisam ahihman in ama’n leng “Khualgam vangngaih zaw nalua” chi ahi ngei ding a,
Aizawl lam mah ah admission hong zong a, ka innluahna kiang lak ua inn khat hongluah tei hi. Ka College kaina uh lah kibang, ka veng(omna) uh lah kibang ahihman in ka kimukha mun mahmah uhi. Achang in lai ka simkhawm ua, achang in an ka nekhawm uhi. Kipanpihtheihna chiteng phiala kipanpih ka himai uh. Khat in laigelh ding ahauh luatleh gelhpih chih bang, an huan manlou a omleh khat in ana huankep chih bang in ka kihuhtuah zelzel uhi.
Ka ki-itna uh grape gui leng a zampha mahmah mai a, a zamna mun leng ahoih mahmah. Aman bel anu-le-pa akipan huhna(sum khak) a mutam kei a, kei zatkhiat zah kimkhat khawng in a kitoudelh nimnem sek hi. Sum saving a siam a, tep-le-muam bangmah hihlou ahihman in sum bel a kizatsam(zat ding bei in a om) ngei kei. A omdan leh khawsakdan ka theihpih tam deuhdeuh chiangin ka hehpihtha a suak deuhdeuh hi.
Hunte hong paizel in Class XII ka zawhkhiat khit in a ‘hot’ zawk deuhna mun - Mumbai lam ah ka ki-tuansifar ngal hi. Ka tangvalpa’n bel sum a neihlouh ziakin hon zuizou nawn kei a,Aizawl mah ah B.A a sunzom hi. Mumbai ka tung a, lenna akipan ka ‘cat-walk’ pawt tawh kiton in a huihkhua mahmah in leng honna vaidawn hoih mahmah a, “ Warmly Welcome to Mumbai “ honna chi tawh kibang in ka ngai hial hi. Aizawl tawh ka tehkak ziak a lum(warm) va sa diak ka hi ngei ding. Huai chi lehang lah ana omsa khenkhat in uang gen deuhmai in “ Mumbai zaw, leitung(earth) leh nisa(sun) kikal a om hiding hiveh aw” a chih khawng uh i zak chiang a lum phet leng hilou a, sa(hot) zawzen hidi’n ka koih zel hi.
Mumbai ah, College hoih ka muhzawhlouh ziakin ‘a om-om’ chi’n khat peuh ah ka kikhum suk hi. Aizawl a ka nutsiat, lungzuang kisa a ana maumau, ka tangvalpa tawh ka kithuzak zel ua, ka lunglen dan khawng uh ka kikum zel uhi. Ka thukhitna uh ahihleh, “ Lungkiat sak nemnum sangin, lung lensak diaidiai hoihzaw in teh..” chih a himai. Kei kia a inn luah nawn ka hihman in nuam kasa mahmah hi. Hun hau kisalua in ‘notebook sangin ‘facebook’ ka hong(open) tamzaw a; ‘text book’ sangin ‘text message’ ka sim tamzaw hi. Midang ana omte zaw hoihtak a om in lai mah chi tinten ve uh aw, kei ka huchithei mahmah kei a!. Kei kia a ka omziak leng hidi’n ka gingta hi. Mi, a innkuan ua omte’ tanute ka enzel a, nungak a hihna uh a kembit uh. Kei ka ki-en zel a, Lamka a ka om chiang kia a ‘Nungak’ ka himai!
Atom lamlam in gen ni. Kum 3 zawh in B.A ka zou a, sepna leng neuchik khat ka mu ngal hi. Ka sepna muhpen zaw gentam leng ka ut kei -zumhuai maimai. Ka sepna uah Meiteite pasal khat leng a om a, ka kimuh masak ni un bel ka ki-entuah cheuh lel uhi. Huchih kawm in Aizawl a ka tangval nutsiat pen leng Lamka ah ana pai a, College khat ah ana sem hi. Sepna neituak chihdan a om ka hihman un ka kihou vang mahmah mai uhi. Ka grape gui uh ateh teng leng pulhkhin a, agui gaw gepgop vuak zam sengsung bangmai a hita. A bulpi a tui piak a hoih ding hia, ahihkeileh bawng-ek vasun a hoih ding hia chih ngaihsak zawsam leng ka om nawn kei uh. Kou om-om a ki-om tuak ka hita mai uhi.
Alehlam ah, ka sepna ua Meitei tangval mel hoihtak in ka lungsim teng hon luahdim hi. Kha khat sung bang nasem dia kuankhawm zel leh kik-khawm zel a ka omnung un phone number khawng ka kilatuah ua, hun neih tengin ka kihouden phial uhi. Aman leng amah kia a inn luah ahihdan khawng hon gen a, kei tawh kihou nuam a sakdan khawng leng a ‘masala’ dan in hon heltel zel hi. Melhoih hoihsalou omlou ahihman in ke’n leng hoihsa ka hipen mai(melhoih mah ahih chiang a). Tangval leh pasal ding tan a en bel ka hipah kei, a kamsiamna ziak a kitawtah dek lampang chu ka hi peuhmah. Awl in ka kihoutou zel ua, kei’ innluahna ah leng hong pawtthei zel a, kei leng ama’ innluahna mun ah ka va hawhthei zel hi.
Hunte hong paizel in Lamka a grape ka tuh uh Aizawl a ka zamsak un hon sihsanta(amasapen tawh kikhenta). Poisa zawsam ka om tuankei uh.
Huchih hunsung in Meitei tangvalpa tawh ka kinel gawp man ua, a ATM Card tanpha kei khut ah a om theita. Kha 5 ka sepkhawm nungun a tawptan(?) adia thuchiam bawl in grape dang ka suanpih hi. Huai in leng a gam ngeih a hingei dia, hong khanghat mahmah hi. A khanhatna dia leihoih pia bel ka hi zenzen kei. Ka tangval thak pen ka it mahmah mai a, aman leng kei hon deih mahmah hi’n ka thei( hon it taktak ahihdan bel ka chian naikei). A haksatnate khawng hon gen zel a, hehneptheih dandan a hehnem in panpih theih nana ah ka panpih zel a,hon muang chu ahi peuhmah ding. Ka pasal bangmai in ka bawl a, hon ngetnget ka sukpichin saklouh khat lel leng a om kei. Sum khol(saving) theilou ahihdan ka theih manin a sum kholna bawm ding khawng a inn luahna ah ka va pia a, “ Sum nen khawng na neih chiangin hiai bawmsung ah ana khe zel lechin..” chi’n ka hilh hi. Hichidan a saving bawl dingdan bel Aizawl a ka omlai a ka tangvalpa’ hon hilh akipan ka theih ahi.
Kei sang a ka sepna mun ua ‘junior’ zaw ahihman in tawm a lawh zaw a, innlam a om anu-le-pa’ kianga sum a khak ding chiang bangin tawm ka sa a, kei lawhte khawng tawh behlapsak in ka khakkhawmsak zel hi. A inluahna a van poimawh tuamtuam khawng leng ka ngaihtuah sak atam mahmah. Huai kia hilou a inn chabi(key) leng khat aman kem a, kei khat hon kepsak a hizaw mah hi. Nikhat, damlouhna ziak in hong kaipeih kei a, huai ni bang ka om anuam kei phial hi. Ka pai in a innluahna lam ka phasuak ngal a, damdawi inn a paipih in ka va ensak hi(a halhlou chu hilou). Sum zattawm ding leng neilou ahihman in ka kuahkhak sunsun Rs.500 ka pia a, a nen 40 ka neihlai pen kei bahara dingin ka sit chenchen hi. Lung nuamloupi in ka paisan a, inn ka tuntak a ka message leh hon thuk(reply) ngei kei. A tawp a ka call leh, “ Cyber Café ah ka om”, chih teng gen in a phone hon off khum hi. Huai nitak ka ngaihtuahna a paisau ngei mai. Ihmu theilou a ka om laitakin, SMS (aman facebook leh WhatsApp chihte a khoihlouh ziaka SMS a kihou sek) hong lut a “ Sepna mun a i om chiangin, a kingailou bangbang in i om dia, mi theih in i kithuahtam dah ding aw “ hon chi a, ke’n leng a thu nial dia koihlou himhim ka hihman in ka sepna mun uah kimeltheih lel bangmai in ka om sek uhi.
Hunte hong mualliam zel in ka itna bukim ka piaksa Meitei tangvalpa’n hon ngaihsak nawn kei hi. Akiang ah “ Bang chidan e, hon ngai nawnlou maw? Non ngaih kei leleng aziak hoihtak in hon genchian mai ve” ka chih chiangin, “ Hon ngailou hilou ka hi” chi’n hon dawng zel hi. Nidang khawng a ka innluahna a hong hawhzel himahleh kha 3vel bang hong hawhlou a hita hi.A omdan lamdang leh chituam ka sak mahmah ziakin, “ Khatvei bek nong hawh sam kei dia, i hon ngai thei aw ve le” ka chih chiangin, “ Ni salua a, hiai nisa nuai a hong pawtkhe ngaplou ka hi” chi’n hon dawng hi. Huai hon chih takin, “ Ke’n nisa poi ka sa kei, ka thuakzouna…kei ka hong hawh ding” ka chih chiangin, “ Numei-mei, mi inn a hawh kilawmlou ahi” hon chihkhum zel hi. Nidang a a inn chabi kem dia hon muang a, “ Kei omlouh hun in leng inn ah na lut dia, nana om zel ding…” hon chih himahleh, bang dawh-ai hita hiam, tu’n ka va hawh zual ding lel leng hon phal nawnkei hi.
Dawhzou taka kha 4 bang ka om nungin ka seppihte uh mah Naga nungak khat tawh hong kizuithei mahmah uhi. Huai nu bel kei sangin leng a smart zaw a, akam leng a siamzawk banah dangnal mahmah khat ahi a,nidang a, “ Sepna mun a i om chiangin, a kingailou bangbang in i om dia, mi theih in i kithuahtam dah ding aw” hon chipa, tu’n Naga nungak khat tawh, hon engbawl hile uh kilawm in ka muhmuh in omkhawm gigeta uhi. Ka muhmuh bangin a kihou nuam diak ua, ka mittui a guk in ka nul mun mahmah hi. Achang in ka kingaihtuah sual dekdek a, ka mangngilh theihna dia sepna apan tawp bang ka ut mai hi.
Himahleh ka heutute un hon phal mawklou uh ahihman in ka tawpsan thei kei hi. Nasem lai khawng ka kingaihtuah khak chiangin ka mittui hong takkhe keuhkeuh zel a, ‘wash room’ a tailut in, thumna ka va neih kawmin mai ka va phiatzel hi. Akhen chiangin, “ Ka manglam bek ana hileh zaw..” ka chi vungvung sek hi. Kum 1 leh akim bang ka thuak nungin, a sepna akipan amah hong tawp a, awlawl a mangngilh thei in ka om vanglak. Huchibang kal ah ‘eimi tangval mah’ chi’n ka tangval masapa tawh ka kingaikik uhi. A khawnung a ka theihdan in, Naga nungaknu’n Meitei tangvalpa a deihdan tawk a apei lung-ap nunga taisan chih ahi zawmah hi. Tuh bangbang at chu ahi peuhmah ve!
Vaigam a ka om chiangin, an huan leh inn na bangkim ka hih a, Office ka kailouh kal chiangin inn nupi ka himai. Himahleh Lamka ka tun chiangin, ka nu leh pa’n hon duat mahmah ua, “ Ke’n an huan utlou, inn zut nuamlou. Ke’n tomato(sap manta) chihte duhlou” chi peuh in ka omthei thepthup zel hi. Huchi a ka om hangin, an ka ngawl ngei tuan kei; ka nu’n ka duhduh hon huansak zou ahihman in. Vaigam lam ah bel, i huanpeih kei leh neklouh ding chihna a himai( a kihuansa va lei i hihngal kei leh). Innkuan a khawsa a, laisimna a hoihtak a nu-le-pa’ panpihna ngahte ka eng mahmah. Kei leng pilthei hileng a gal apan hon panpihlouh uh ka hituan sam kei. Huai ziakin, Vaigam a om a, belh ding kichian neilou a mahni kia a inn luah zaw nupi tawh kibatna chikhat ahi(nungak hi’n tangval hitaleh). A lehkha lamlam leng a kisaipha khol kei. Kei dandan a om bangzah hiam leng ka thei a, maban ah mahni kia a innluah a numei vuak(pasal bel adan omdeuh hi’n ka thei) khawsak sawmte ana kingaihtuah le uh chih ka deih mahmah hi. Lamka a nungak om a om hiuhiau a, Vaigam tun chiang a, ‘hiaite nupite’ nasep ei ve le ‘ chihte om vetlou a sep vitvit hita mai ahi. Huai ziakin Lamka ah leng nungak tampite’n, nupute’ nasep ding deuh a kikoih khenkhat i septheih uh ngai ka sa hi.
Laigelhtu’ Lungsung Pan:
Tulai in, nungak tamp te’n nu-le-pa’ kiang a a om chiang un sep nuamlouh bang hau in, duhlouh bang hau mahmah uhi. Muntuam a a om chiang un (Vaigam hiam, pasal nei hiam a a om chiang un) bel, nupi bat hun leng a om ngei ding. I theihsiam ding uh ahi. Inn a omdan tengteng(avek a), i va omthakna lam a puaklut pen thil kilawmlou ahi.
- Ka Kipak -
No comments:
Post a Comment