HEADLINES:
Manipur a UNC blockade thil diklou ‘illegal’ ahi - Ministry of Home Affairs
New Delhi, December-12: United Naga Council (UNC) in Manipur a nek-le-tak thilte leh niteng vanzat poimawh tuamtuamte puaklut ding a khamna a Economic Blockade a puan ni 40 a chin tawh kiton in Ministry of Home Affairs (MHA) in tuni’n UNC kiang ah blockade lakhe ding in theisak a, issue khatpeuh democracy dan tawh kituak a kihouna tungtawn a sukveng theih vek ahi chi hi. Blockade ziak in Manipur ah buaina thupitak a tun tawh kiton in tuni’n Centre in ‘warning’ pia a, kuapeuh in gamsung dan omsa kalh a mahni khut a dan kitawi thil hithei hilou ding chih thupuan bawl hi. Manipur a blockade omlel pen ‘thil diklou (illegal) ahihdan a taklat banah ‘crime against humanity’hizaw hi’n Home Ministry thusuak in taklang hi. Home Ministry thusuak in Manipur a blockade om tungtang ah awlmawh huai ahihthu taklang kawm in Manipur mipite a dia nek-le-tak banah niteng poimawh tuamtuam a haksatna a tuahte uh Centre in theihpih leh thuakpih ahihdan leng gen kawm in UNC in blockade a bawl a kinthei pen a lakhe ding in theisak hi.
Thusuak in a genzelna ah, India government pen gamsung a dan-le-thupiak enkai dia kiman gige ahi chi a, India gamsung koimun peuh hitaleh blockade kichi himhim thil diklou leh dan kalh a gamtatna ahih banah mihinpihte tung a haksatna thupitak a tun ding deih a tatsiatna ahi chi hi. Huai banah, mimal hi’n pawlpi khatpeuh hitaleh kuamah in dan-le-thupiak pen amau khut a kitawi sawm a ut dandan a thilhih leh nasep phal hilou ahihdan leng gen hi.Home Ministry in a thusuahna ah state government in leng pichingtak leh a mawhpuakna thei kawm a gamtang ding in ngen a, Manipur a nektak leh niteng poimawhte hoihtaka a lut nawn theihna ding leh social harmony hoihtak a om theihna ding a panla di’n ngen hi. Tuabanah, a poimawh bangzel a kiching ding a Ministry of Home Affairs in state government kiang a ‘additional forces’ peding ahihdan leng thusuak in taklang hi.
Manipur a van poimawh kiningching tak a alut theihna ding leh National Highway-te hoihtak a hon a hih theihna dia Centre in panla zel ahihdan gen a, Central force company 15 (company 1 a personnel 100 vel omna) vel Manipur government kiang a piak a omta ahihdan taklang kawm in nipikal paita inleng central forces company 15 vel mah Manipur government zattheih ding a piak a om hidan in taklang hi. Government of India in Manipur a dan-le-thupiak dinmun hoihtak a tunding a hihtheihna ding leh van poimawh bangkim hoihtak a puaklut ahih theihna dia a panlakna ah a kisaipih kuapeuh in kithuahpih ding a lam-en ahihdan leng MHA thusuak in taklang hi.
Nupee Lal Day 77veina kizang
Imphal, Dec-12:Manipur Govt. vaisaina in tuni zinglam dak 9:00 in Imphal a Nupee Lal Memorial Complex ah ‘Nupee Lal Day’ theihgigena 77veina hun zat hi a, huai ah Chief Guest in O. Ibobi, Chief Minister pang a, Functional President in Gaikhangam, Dy. CM pang hi. Chief Minister in a thugenna ah ngaihdan kibatlouhna leh lungkim louhna omte himhim tukhawm a kihou limna tungtawn a kilemna lampi kia thil paidan ding om sun hi’n gen hi.
Chief Minister in a thugen zelna ah,i gam pen mipi vaihawmna (democracy) gam hi a, huai ziak in kuapeuh mah lungkim louhna nei teng in buaina leh hiamgamna tellou in akisaikhakpih thuneite lak a theihsak poimawh hi’n gen hi. Huailou in thil hithei tuanlou-te phutna a ei-te laka kituahna hihse thei thilte leh mi khat in midang a ding a haksatna tunsak thildik hilou hi’n leng Chief Minister in gen hi. Huchi bang chindan sikin lungkim louhna omte tukhawm a kihou lemna mah chindan in zang chiatni chi’n ngetna bawl hi.
Dy. Chief Minister Gaikhangam in a thugenna ah, Manipur a thiltung thupitak Nupee Lal i chih leitung pumpi adia leng chiamteh thamching nupi te’n a hinna uh phal a hangsan tak a apanlakna uh ahih manin, huai hun laia nupite hangsanna leh panlak dan tulai hun a, mipi te’n manghilh vual hilou ahihdan gen hi. Tuni a Nupee Lal Day zatna ah Minister tuamtuam, E. Chand Singh, MLA, Arts & Culture Director K. Sushila Devi leh Manipur government a top official-te tamtak tel uh a, huailou in party tuamtuam leh pawl tuamtuam inleng tuni’n mun tuamtuam ah Nupee Lal Day zang uhi.
TUALSUNG:
Haflong ah ICI 67th General Assembly om
Lamka, Dec-12: Independent Church of India (ICI) in Dec 7-11, 2016 sung Muolhoi, Halflong, NC Hills (Assam) ah 'Sandamna Ropui' thupi anei in 67th General Assembly zang uhi. Huai hun ah 2017-18 sunga Vice Moderator dingin Rev. HC Thiek leh Vice Moderator dingin Rev. D. Ruolngul telching uhi. Khawmpi hunsung thugentu in Rev. HB Hluothang; Rev. Rorelfel, Child Co-Ordinator; Rev. Lalramlawm Inbuon, Superintendent, Tuithaphai Presbytery; Rev. Lalrohlu, Superintendent, Hmarbiel South Presbytery; Rev. HP Runremthang, EAL; Rev. H. Chungthang Thiek, EAL; Rev. Darsanglien Ruolngul, Moderator, ICI pang uhi. Huai hunah ICI nuai a semtu pension - Pastor Khampu, Pastor Lalbungsiek, Lalhlansang, John Munda-te pahtawina piak in om a, Solomon Thiek (Saikawt, Manipur), Joseph Venglienlawr Thiek (Diger Compound ,Cachar - Assam), Lalramtan Thiek (Muolhoi, Haflong Assam), Solomon Parate (Guwahati, Assam), Robert Hmar (Tieulien, Manipur), Ramsiemsang Thiek (Saipum, Mizoram) leh Ramsiemthar Zote (Phuoibuong, Mizoram) leng pastor dingin ordination pia uhi.
(late) Chhungi Tonsing han siansuahna om
Lamka, Dec-12: Hebron Veng, New Lamka a Salem house ah Upa T. Phungzathang, MLA inndongta-te makaih in azi (late) Chhungi Tonsing hansuang siansuahna leh puahphatna uh a, huai ah MLA pu zi’ Sangi Tonsing, atapa Khanthang Tonsing leh atanu Lulun kihel uh a, Pastor H. Jamkhanpau, Local Pastor EBCC Hebron in hansuang leh amun siansuah in innkuante’n adi’n thumsak hi.
Upa LT Juan Tonsing in Upa T. Phungzathang athugen ding laithon siamkhia a, huai ah August 31, 2015 a Manipur Assembly in Bill a pass pen genkhawmna (discussion) hun hon ahihlouh banah namphu sim a thil kibawl ahihman in mimal kimawk ngohtuamna ding omlou asakthu taklang a, constitution expert te’n leng India constitution tawh kikalh ahihna ah government in chikmah in a pass keiding achihsa dungzui un governor in home ministry tungtawn in India President kiang khak mahleh President in lemsa (assent) pelou in Bill 1na pen nawlkhin a, Bill 2-te leng home ministry in gentak salou in koihdap (abandon) hi’n taklang hi.
Bill 3-te ziaka si-te thuak pih ahihdan taklang a, govt. in a innkuante kiangah zangna-dopna (ex-gratia) mi 1 tungah Rs. 10 lakhs leh hansuang bawlna ding Rs. 1 lakh banah kinaihpih pen kiang ah govt. sepna piak di’n cabinet ah 2vei puaklut ahihnung in pawmsak mahleh tunitan a nawlkhin uh poisa ahihdan gen in, govt.te term bei leh hibang hamphatna pen sukbei hiding ahihman in bangmahlou asi ahihkhak ding uh lauhuai hi’n taklang hi.
Laithon in taklatna zelna ah, zuau phuahtawm bulbal neilou thuleng in gamsung a zelhsuak poisa ahihdan taklang a, nam dangte’n ahunchiang thei in nam heutu leh amau sunga elected member-te tawh kithuah in na semkhawm in agah alawh chiangun enhuai uh chi a, tu’n in va-uk bangin hon leng mangsan vekta uh chi a, hanmun hahsiangna hun uap teng tungah kipahthu gen hi.
Khanthang Tonsing in bangmah hihselou hansuang kihisiat sakpen thuak haksa petmah chi a, hibang a gamtangte tungah phuba lak sawmlou ahihdan gen in, amau leh Pathian kal a koihta uh hi’n gen hi. Maban ah kuapeuh in Pathian min a i vui liamna munte uh kizahtaksak dingin ngen hi.
YPA GHQ makaih in kithuah khawmna omding
Lamka, Dec-12: Young Paite Assn. (YPA) GHQ makaih in Dec.13, 2016 zinglam dak 11:00 in Singngat khua a YPA Hall ah YPA Singngat Block makai-te tawh kithuah khawmna program omding hi. Huai ah Pastor Thangkhanmuan, Local Pastor, PCI (R) Singngat in thumna in hun hong ding a, G. Thangmuankham, Secy. YPA Singngat Block in introduction neiding a, T. Khailianthang, President, YPA GHQ in Presidential Speech neiding hi. Huai zawh in Chin Ngaih Pau, Chairman, CEC, YPA GHQ; P.Vungzadong, President, YPA Singngat Block; S. Manlian, President, YPA New Lamka Block; Kamlianthang Guite, President, YPA Imphal block; President/Secy. YPA Zion Veng Unit; President/Secy. YPA Station Veng Unit; President/Secy. YPA Bethel Veng Unit leh President/Secy. YPA Mission Veng Unit te’n thugenna neiding uh a, Pastor H.Chinkhanlian, Local Pastor, EBCC Singngat in thumna in hunkhak ding hi. Singngat a program zangding in Dec 13, 2016 zing dak 9:00 in YPA GHQ office, Hiangtam Lamka apan gari 6 in kuankhe ding uhi.
Gamvak lai tuahsia in si
Lamka, Dec 12: Thonliansiam s/o Ginnang of Palkhuang village, Dec.8, 2016 nitaklam in sabeng(gamvak) ding in amah kia kuankhia a, hongtun theihlouh ziakin Dec 10 sunnitum in Palkhuang khawmipi’n mun tuamtuam zong uhi. Mipi’n sun hun a muhlouh ziak un nitak in sunzom nawn uh a, Belnam kawl (Hanmual taw lam) ah torch light vak sa mipi’n mu in huai apan Thonliansiam mukhia uhi. Thusuak kingahdan in Belnam kawl ah Thonliansiam’ gamtangkhial khia in kawl ah kia a, mai lak naktak a tatkha in a ha (teeth) hunkhop kia hi’n leng kigen a, tuni’n Palkhuang hanmual ah kivui hi.
Addl. SP in tuni’n hong join
Lamka, Dec-12: Lunkhomang Khongsai, MPS in tuni’n Addl. SP/CCpur (L & O) lending in hong join hi. Aman ACI, Chakpikarong, Chandel Dist. apan class X passed a, Johnstone Hr. Sec. School, Imphal ah XII passed in Delhi University apan BA passed hi. Kum 2007 in MPS service join a, Oct. 2009- March 2012 sung CCpur Dist. ah CDPO/CCpur len hi. March 2012- March 2014 sung SDPO/Chandel len a, March 2014- Dec. 2015 sung 4th IRB ah Dy. Commandant len a, Dec. 2015- Dec.2016 sung Addl SP/Tamenglong len in huai apan Addl. SP/CCpur (L & O) lending in hong kisuan hi. Aman azi tawh ta 3 nei a, asungkuan-te Lamphel, Imphal ah om uhi.
STC HQ makaih in jt meeting
Lamka, Dec-12: Simte Tribe Council, HQ makaih in tuni zinglam in Sim Veng a Simte Inn ah Manipur govt. in Pherzawl District apuan tawh kisai joint meeting om hi. Huai ah Thanlon A/C sung a Hausa-te, Pastor-te, STC, SYO, KZP block leh Unit makai te’n ngaihdan tuamtuam genkhawm uh a, thupukna kichiantak bawl theilou in Dec. 13, 2016 zinglam dak 11:00 in sunzawm nawn ding uh hi’n thusuak kingah hi.
Pathway school in annual concert nei
Lamka, Dec-12: Nehru Marg a om The Pathway School in tuni’n IB Road a Synod hall ah annual school concert 2016 nei uh a, Chief Guest in Langkhanpau Guite, Chairman ADC/CCpur pang a, school year book hongkhia hi. Guest of Honour in T. Goukhomang, ZEO/CCpur leh Chief Host in Lienhmingthang Simte, Proprietor, Kim Joe Gas pang hi.
Rita Vanlalchhanhimi, Headmistress in school kipatdan leh kivaipuakna tawh kisai nu-le-pa ban ah mi poimawh chial a omte mai ah pulak hi. Chief Guest in Bible a kigelh bangin naupang te’n nu-le-pate’ thuman Pathian thupiak ahih banah hiai kan a thilhoih omlou a, lei a damsawtna hi’n leng gen a, teacher-te leng mihing bawldia kisa ahihna uah kuhkal leh taimakna tawh pan alak uh deihsakthu gen hi.
The Pathway School in kum tengin category 3 akhen in student of the year telkhia in kipahman pesek uh a, tukum in Pre-primary apan Abigail Mawineisiem, KG ‘A’ in sang a, Lower-primary ah Rachael Zolienkim, Class II banah Upper-primary ah Esther Ramdinthar, Class V in sang uh a, Guest of Honour in kipahman pekhia in, tuaban ah Chief host in house champion blue house-te kiang ah trophy pia hi. Programme hunsung in student te’n item tuamtuam lahna nei uhi.
Paukhansuan in ‘Hrietthiem Zai’ album hong
Lamka, Dec-12: Rengkai Road a JJ Memorial hall ah tuni sunnung in Paukhansuan Khuptong, intending candidate 58-CCpur A/C in Vincent Hekte Hmar in abawl ‘Hrietthiem Zai’ kichi music video album honga, PC Lalrawngbawl in lan hi. Dec.13 akipan adeih te’n leitheih dingin kigen hi. Hunzatna Hmar Artiste Association in inntekna la in, Lalvullien, President, HAA in vaidawnna thu gen in, James Songrolal Songate in album tawh kisai pulak hi.
Chief Guest in HAA in hibang plarform apiak kipak ahihdan gen in, Paite pau zang himahleh maban election om ding ah nam teng ai-awh in palai dia kisak sawm ahihdan gen a, lungtup tangtunna din kuapeuh in kithuahpih din ngen hi.
Album bawl te’n leng a zuakkhiakna ding ngaihtuah kawm in ahoih thei pen leh mite etlah tham dia panla dia hasuan kawm in, tha, sum-le-pai ban ah lungsim-ngaituahna tamtak seng in abawl uh ahihman in copy right zahtaksak dingin leng kuapeuh ngen hi.
Album sung ah Vai (Hindi) la telin la 7 om a, Full HD a kibawl ahih ban ah Francis Lallawmum, Zoramthang Hrangate leh Kaia Paruolte te’n aphuah uh hi a, Doh Doh Records, Mwanlal Music Production leh So So Records zanga recording kibawl ahih banah Jeffery D. Tusing, Duduk Zote, Michael Chawnghau leh Jacky Khawmbung te’n videography leh editing abawl uh hi’n kigen hi.
Zillai GHQ in ZOFEST a telte vaidawnna nei
Lamka, Dec- 12: Zillai GHQ in kumtawp meeting tawh kithuah in ZOFEST atel Zillai palai-te tunitaklam in Bethel Veng a Vaiphei Community Centre ah vaidawnna nei uhi. Huai hun ah Vaiphei Peoples' Council (VPC) leh Young Vaiphei Association (YVA) GHQ a executive member-te, Paul Lalchhanhima, Mizo Zirlai Pawl (MZP) President, Manipur leh K. Vanlallian Vaiphei, President ZSF GHQ ban ah Zillai GHQ a executive member-te kihel uhi. Program hunsung in Khamneithang Vaphei, Gen. Secretary VPC GHQ leh MZP President, Zillai President te’n thugen uhi.
Huai hun ah kumnawn March 29-30, 2016 sungin Zillai Annual Assembly om dinga, amun ding bel gentheih hinailou hi’n kigen hi. ZOFEST ahihleh Dec. 6- 8, 2016 sungin MZP GHQ inntekna in Zokhawthar, Champhai District, Mizoram ah neih hi a, huai ah CCpur district akipan MZP makaih in student organization tuamtuam apan palai bangzah hiam vakihel uh a, zan in hongtung uhi.
ZAA makaih in Kangvai ah vaidawn ding
Lamka, Dec-12: Zogam Artistes Assn. (ZAA) makaih in Dec 13, 2016 in Kangvai khua ah North East Idol a 1st Runners-up (2nd prize) la Jenny Zawnkhanhoih Thomte of Vengnuam, New Lamka vaidawnna omding hi. Huai atelding teng sunnung dak 1:00 in Hebron PCO , New Lamka ah kingak khawm in Kangvai khua zuan ding uhi. Kangvai khua a vaidawnna zawh in Lamka khawpi sung vangkual ding uh a, huai zawh in Hiangtam lamka a YPA GHQ Hall ah reception program zat hiding hi.
SDPO/CCpur makaih in kuankhia
Lamka, Dec-12: Manipur Chief Minister O. Ibobi Singh in Dec.14, 2016 in Pherzawl khua phaksawm a, huai ah duty ding in A. Ghanashyam Sharma, MPS, SDPO/CCpur makaih in Police leh VDF personel tamtak in Pherzawl khua zuan in kuankhia uhi. Dec.13, 2016 in Rakesh Balwal, IPS, SP/CCpur tel in IG bangzahhiam te’n Pherzawl khua zuan nawn ding uh hi’n kigen hi.
'A Night With Christ' zatna om
Lamka, Dec-12: God’ Grace Mission(GGM) pawlte saina in Bungmual a JC Park ah tunitakin ‘A Night With Christ’ kichi Advent Christmas programme zatna om a, huai hunah BYF Dorcas Veng leh BYF Bungmual apan lapawl sakna om in, God Grace Mission apan lasakna leh thugenna nei uhi. GGM pawlin Dec 16 in Ngulthong Bazar, New Lamka ah tuabang programme nei nawn ding uh a, Dec 20 in Rengkai ah sunzom ding uh chihthu kiza hi.
Kangvai V/A in vualzawlna ngetsak ding
Lamka, Dec-12: Kangvai V/A makaihna in Dec. 14, 2016 zinglam dak 11:00 in Kangvai community hall ah T. Manga Vaiphei, Minister PHED adia ‘vualzawl ngetsakna leh kipahthu genna’ om ding a, huai hun ah pastor leh saptuam Upa tuamtuam te’n thumsak in vualzawlna ngetsak ding uhi.
Programme ahihleh Upa Henkhawlam in thumna in hong ding a, KT Vaiphei, Chief of Kangvai in kipahpihna thu gen ding hi. Kangvai male voice-te apan special no. ngaihkhiakna om ding ban ah T. Manga Vaiphei telin gen ut neite’n thu gen ding uhi.
BYF Pethuel te’n Winter Meet pan
Lamka, Dec-12: Pethuel EBCC a Baptist Youth Fellowship Committee makaih in BYF Winter Meet a 10 veina patna ding in tuzing in marathon race nei uh a, tunitak in Biakinn campus ah Pastor K.Pumsuanthang in hongkhia hi. Huai hun ah gift exchange, short clip contest leh musical nite zang uhi. Dec 13, 2016 apan quartette, monologue, debate, group lapawl, silent choir, lenkhawm kidemna, photogenic kidemna, volleyball, football, tug of war, throw ball leh adangdang kitaitehna nei ding uhi. Winter Meet sung in kum 2017 sung BYF Pethuel makai ding mi 15 telkhe ding uh a, Dec 15, 2016 in zouding uhi.
BVFA saina in U-50kg football tournament
Bungmual Veteran Football Association (BVFA) saina in tuni’n Bungmual a L. Foundation School Ground ah under 50kg 9-men Football Tournament kipan a, huai hun Paukhansuan Khuptong, social worker in Chief Guest hihna tawh uap in hongkhia hi. Tournament ah mun tuamtuam akipan in team 17 kihel uh a, Dec. 29, 2016 in zou ding uh hi’n kigen hi. Chief Guest in BVFA-te’n tuailai football lunglute maban ding khualna a hiaibang asai uh kipahpih ahihdan gen hi. Opening match ah AFT leh Lamkanuai FC kimawl uh a, AFT in 5-0 in zou a, 2nd match ah UUFC leh SSFC kimawl in UUF in 10-0 in zou hi. Under 50kg football tournament kisaipen Manipur adia 1veina hilai hi’n leng kigen hi.
Under 50kg Tournament ah team tuamtuam 17 kihel ua, amaute group khat a team 4 zel om in group 4 a khen in om uh a, league match zawh in quarter-final lut ngal ding uhi. Dec. 13, 2016 in FZFC leh MLFC te kimawl ding ua, tua zawh in DPFC leh KKFC, FUB leh NSFC banah MUFC leh AFFC te kimawl ding uhi. 1st match bel zinglam dak 11:00 in kipan zel ding hi.
STATE THUTHANG:
Manipur ah ‘President Rule’ koih di’n ngen
UNC makaih in Naga pawlpi-te’n meeting nei
Imphal, Dec-12: United Naga Council (UNC) makaih in Naga Tribe Council, Frontal & Regional Orgn, Intellectual, Church Leader, Parliamentarian, Social Leader, leh mipi te’n Senapati dist. a Tahamzan ah tuni’n ‘Naga People’s Consultation’ nei uh a, huai hunah Manipur a thiltung tuamtuamte genkhawm uhi. Huai meeting in, UNC makai nihte matna mawhpaih a, Naga mite leh a gam uh khenzak theihlouh ding chi uhi. Govt. of Manipur (GOM) in Dec 8 a dist thak 7 a puankhiakte ah akisaipihte thudot hilou in, HAC taikan a thupukna kibawlte’n Indian Constitution kalh a, Naga-te gam leh gam-hauhsakna (resource) hihsiat tupna ahihziakin Naga mipi’n pomlou chi in, huai district thakte ziakin namkal buaina piangthei ding hi’n taklang uhi. Huailou in Indo-Naga Issue pen Naga mite leh GoI in a etkai a saifel ding, Aug 3, 2016 a Framework Agreement kibawlte sepsuahna di’n nasep pailel mahleh GoM in Naga issue hihbuai hi’n meeting a paikhawm te’n ngawh uh a, thubuai tamtak om ziakin Manipur ah President Rule koih ding in ngen uhi. Meeting palai paikhawm te’n maban panlak dingdan UNC khut ah koih uh a, UNC Executive te’n Presidential Council deihna bang in Naga mite humbitna dia movement aneih peuhmah uh gupna piak ding inleng thupukna bawl uh a, UNC, Naga People’s Organisation, Chandel; Tangkhul Naga Long; Zeliangrong Baudi; Naga Women’s Union; All Naga Students’ Association Manipur leh Naga People’s Movement for Human Rights te’n suaikai in huai thupuknate pom uhi.
Security te’n gari 1300 vel Imphal tun
Imphal, Dec-12:UNC in Nov 1, 2016 akipan National Highway-te a economic blockade abawl ziak un mipi’n haksatna gen vual louh tuak uh a, security vengbit in niteng vanzat poimawh tuamtuam pua gari-te Manipur ah pilut a om in tuni’n leng Md. Firoj Khan, CO 6th MR makaihna nuai ah security khauhtak vengbitna tawh thautui leh niteng vanzat tuamtuam pua gari 1300 val ding te’n Jiribam dist HQ nusia in Imphal-Jiribam lampi (NH-37) tawn in Imphal zuan uhi.Imphal manawh gari te’n tuni nitaklam dak 4:00 in Noney kheng uh a, tunitak zan sawt nung in Imphal hontung uh hi’n kigen hi. Huai gari-te lakah Petrol tanker 38, Diesel tanker 67, LPG Bullet tanker 30, ATF tanker 2, Medicine truck 5, Oxygen cylinder pua truck 2, cement truck 413, FCI anntang pua truck 112 leh van tuamtuam pua truck 631 hi’n kigen hi. Huailou in gari 1300 val ding te’n Jiribam a nutsiat nung un van tuamtuam vala truck 100 val ding Jiribam tung uh a, huai te’n security escort ngak lel uh hi’n leng kigen hi.
BJP tawh kisai thupuan poimawh bawl
Imphal, Dec-12: BJP Manipur Pradesh adia mi poimawh banah Minister lui Dr. Nimaichand Luwang in BJP party tawh kisai thilte ah Assembly Constituency a meeting om ding himhim, state unit office bearer-te leh Centre leader-te telna ding programme ahihleh BJP Mandal tungtawn a sai poimawh hi’n gen hi. Tuni’n Imphal a BJP office ah Dr. Luwang in news saite kimuhpih in Mandal saina a Assembly tawh kisai a meeting dingte himhim Candidate ding te’n amau constituency a mipite telkim ding a chialna bawl ngai hi’n gen hi. Aman agenzelna ah election tawh kisai meeting himhim ah state leh constituency a BJP office bearer teng telding a chialna omlou himhim kua mahin meeting neih sawmlou ding in BJP Manipur Pradesh in tuma in thupukna bawl khin ahihdan leng gen a, zan in BJP party tungtawn a MLA candidate ding 2 leh a nungzuite un party office ah ava hawh hun ua buaina piangte leng kithuzakna om masak louh ziak himai thei chi a, himahleh BJP Manipur Pradesh in hibang thil tawh kisai thukimna hoihtak ana omsa ahihdan gen hi.
UPF/KRA-U C-in-C in President kiangah thuneihna pekhia
Kangpokpi, Dec-12: United People’s Front (UPF) nuai a Tripartite Talk atel Kuki Revolutionary Army (Unification) te’n pawlpi thuneihna teng Dec 10, 2016 in President kiangah pekhia uh hi’n kigen hi. Huai tawh kisai in KRA (U) Chief-in-Command (C-in-C) Paolen Chongloi @ Robinson Thadou in hoihtak a ngaihtuah nungin Cabinet member-te om in KRA(U) thuneihna teng banah Government of India tawh kisai a KRA(U) signature-te piakkhiak lemsa ahihdan gen hi. President omlou in C-in-C Robinson in KRA(U) ana enkai hi’n gen a, kilemna ah suaikaih ahihdungzui in tunung a President banah pawlpi kalh a gamtang lou ding hi’n leng gen hi. Huai banah KRA(U) te’n thusuahna a bawlna uah Ch. Davidin President len a, Paolen Chongloi @ Robinson Thadou in Vice-President, Robert Kuki in Home Secretary len hi. Ch. Romel, Ch. Johny, Th. Nelson leh Ch. Albert te’n Joint Secy.cum JMG, Defence Secretary, Finance Secretary leh Information & Publicity Secretary len uh a, KRA(U) a financial khatpeuh thu tawh kisai in Finance Secretary Th. Nelson, Mobile No. 8118923460 ah thuzak theih ding hi’n leng taklang uhi.
‘Nupi Lal Memorial Run’ om
Imphal, Dec-12: Nupi Lal Day zat ding tawh ki zawitawn in Imphal a Nupi Lal Memorial Complex ah tuni’n zingsang in Nupi Lal Observation Committee-te saina in‘The 25th Memorial Run’ om hi. Huai hun ah nupi kum 20-80 kikal mi 1000 val ding te’n Nupi Lal Memorial complex apan Singjamei tan tai uh a, Manipur University a Department of Life Science-te saina inlengNupi Lal tungah zahtakna latsakna in Department Campus ah plantation program sai in om hi. Nupi Lal Day tawh kisai in Welfare Assn. for the Blind, HDFC, Biramangol College Sawombung, NSS Unit I & II, Peace Gong Manipur Chapter, Kasturba Gandhi Institute for Development leh Lions Club of Imphal Greater banah Depart. of Immuno Haematology Blood Transfusion RIMS-te saina in ‘Blood Donation Camp’ om hi.
Th. Chaoba in Keba hehnem
Imphal, Dec-12:BJP Manipur Pradesh Ticket Committee a thupuangtu Th. Chaoba in maban election hun a BJP intending Candidate Sapam Kunjakeswor @ Keba in Tera ah zan in public meeting hun ah kitheihsiam louhna ziak a BJP party tuang ah kiphinna a bawl tawh kisai in tuni’n a tenna inn ah vakimuhpih hi. Huai hun aTh. Chaoba in BJP worker-te mai a athugenna ah Sapam Kunjakeswor kianga BJP ticket piak ahih keileh amah leng BJP apan kitawp ding chi hi. BJP Manipur Pradesh President Bhavananda lemsakna in Tera ah public meeting sai in om a, huai hun in amah leh Union Minister Prakash Javedkar leng kihel ding chih hi a, kitheih siamlouhna-te saifel hidng hi’n leng gen hi. Akigendanin Patsoi A/C a ex-MLA Keba in tuma a election hun ah Congress Candidate Mirabai zoulou ngeita hi.
Buffalo farm employee te’n cease work strike pan
Imphal, Dec-12: Thoubal district sung Wabagai a Regional Buffalo Breeding Farm a Muster roll employee te’n haksatna atuahte uh akisaipih thunei te’n a etkai louh banuah kilemna kibawl dungzui a sepkhiak bangmah omlou chih ziak in cease work strike pan uhi. Huai tawh kisai in nasem-te’n media-te kimuhpih in thil omdan puangkhia uh a, kum 25 paisa in nasem mahle uh kum 2003 akipan lawh mu nawnlou uh ahihdan taklang uhi.
Climbing Championship a telding-te khahkhia
Imphal, Dec-12: Bangalore ah Dec 17-20, 2016 sung a omding ‘The 22nd National Sports Climbing Championship’ hun a NEZSCC nuai a telding NEZSCC contingent - Climber 28, coach 5 leh Manager-te tuni’n Brig. J.S. Bainsla, Commandar, HQ 9 Sector Assam Rifles in khahkhiakna nei a, climber te’n championship hun ah lawhchinna a ngah ding uh deihsakna thukhah bawl hi.
Cashless transaction awareness
Kangpokpi, Dec-12: Prime Minister Narendra Modi makaihna nuai a NDA Govt. in Rs 500 leh Rs 1000 note zattheihlouh dia thupuan a bawl nung in, Kangpokpi adia masapen hidi’n NKY Kangpokpi leh Senapati district saina nuaiah NYK Kangpokpi office ah tuni’n ‘One Day Awareness Program on Cashless Transaction’ om a, Kangpokpi Deputy Commissioner masapen T. Ranjit Singh, IAS; Sahib Singh, State Director, NYKS, Imphal; Masi Chawang, District Manager Common Service Centre, Senapati leh mi hunkhop te’n uap uh hi’n kigen hi.
TUNI THUPI:
“A hehna un hamsia dong hen, hangsan tak ahi ngala; a thangpaihna un leng hamsia dong hen, hinse tak ahi ngala: Jakob te in amau ka kikhensak dinga, Israelte in ka hih dalh ding hi.” – Genesis 49:7
EDITORIAL:
Nupi lan/ Nupi lal Day
Manipur adia ni poimawh mahmah Nupi lan/ Nupi lal kichi tuni in zatin om hi. Hiai ni pen state adia hunbi poimawh mahmah a, bangchi bang a Numeite’n kalsuan uhiam chihte etkhawm ana poimawh mahmah hi. Khawvel in thil bang khempeuh ah numei poimawh mahmah a, huchih lai in India inleng numei a poimawh mahmah chih haihvual hilou hi. Numeite ahihleh society sungah special status piak poimawh uh a, amau leng Manipur a society sung bawlhoihna dingin role liantak play thei uh ahihdan muhsuahin om hi.
Ahitak genin, kidoupi khat leh nihna om hun sungin numeite’n leng dinmun poimawhtak ana luah uhi. Tua kia hilou in Kangla a Army-te mai a vuaktang a kitomngam numeite mah ahi hi. Manipur ah pasalte’ sangin numeite’n dinmun poimawh leh mawhpuakna neizaw uh ade aw chih ut huai hi. Banghiam buaina om zek chiang in Meira Paibi chih ngen hi a, numeite tellou in pasalte leng hithei tuanlou ahihdan chiang deuhdeuh hi.
Himahleh, pasal te’n numeite i zat dan uh ki-etthak poimawh mahmah hi. Kum tamlou paisa in Sadar Hills demand ziakin nupi pawl kiphinsak hi a, tu in economic blockade tawh kisia in counter blockade om nawn a, nupi bawl zatin om hi. Lamka khawpi sung mahmah aleng total shutdown telin bandh leh strike banah kiphinna (protest) tuamtuam i neita uh a, tua hunah nupite leh student-te i zang tham uhi. Hiai in hoihna sangin siatna lam hon tunzaw diam chih hon ngaihtuah sak hi.
Nupi Lan ahihkeileh Nupi Lal kichi 1904 in kipan a, kibeihtuahna thupitak om a, British Government in Manipuri-te Kabow Valley ah sawl a, tua hun inleng kikaptuahna nasa mahmah chih ahi. Manipur a kumpi deih leh deihlou kalah leng kisat tuahna tanpha pianga, numeite’ galdouna ziakin Manipur in suahtakna ngah uh ahi chih theihtheih in om hi.
Ahi a, Manipur a business hong bawl Marwari business men leh Meitei nupite’ kalah leng buaina hun sawttak apan ana om chih i haihkei hi. Hiai thu tawh kisai British te’n vai hon hawmkhum ua kipan hidingin i gingta hi. Tuni a ngaihtuah tak mahmah khat ahihleh ‘economic and administrative policy’ tawh kisai hi a, Manipur Maharaja hun a i thuaknate uleh i tulel dinmun uh ahi hi. Irom Sharmila in kum tamtak ann ana ngawlta a, huchi kalah, Mary Kom in leng naktan a apan nungin Doctorate Degree banah MP (Rajya Sabha) dinmun piakin om hi.
India genlouh Manipur mipi’n numeite i awlmawh a, lam chiteng ah leng vawkkhiak ding in hoih uhi. Nidang hunte in numeite sihmawh leh bawl gentheihin om mahle uh Historian-te’ gendan in numeite mi poimawh ahi uh a, sihmawh ding vual ahi kei uh a, eite hon suangtu ahi uh chi uhi. Dik leng dik mah in teh! Huchih lai in Nupi Lan movement tawh kisai in Manipur Manipur a numeite’ dinmun leh pansan banghiam om dingin gintakhuai a, huaibel economic and political reforms hidingin ingaihsun hi. Manipur a numeite’ kiphinna nasa thei mahmah a, Kangla mai a vuaktang kiphinna aneih un leitung deng hi. Hiai pen ahoihlam (merit point) a et in hoih mahleh, ahoihlou lam (de-merit) lam et in nakpitakin zahlakhuai hi. Army-te’ mai a silh-le-tente suahkhe dinga phalna honpia kua ahia chih theihin om a, sisan lumlai a puan va suahkhete’n leng hih khial khadeuh ihi maithei uhi.
Akoi abang hileh Nupi Lal/ Nupi Lan kichi zingchiang in zat hiding a, hiai hunah mi tamtak a kihel uh lam-en hang hi. Nupi lan/ Nupi Lal kichi ahihleh Manipur state mipi, gam leh leitang humbitna dinga kalsuante theihgigena danin neihin om a, huai kawm in Manipur numeite adia ‘special status’ piakna ahi chi uhi. Manipur in suahtakna a ngahna dingin in numeite’n naktakin nnasem uh ahihdan leng taklatna ahi chi uh. Tua ziak mah in Nupi Lal/ Nupi Lan kichi hunbi poimawh mahmah bawl a om ahi chi uhi. British te’n India hon opkhum lai uh 1904 apan 1934 kikal hunsung in Manipur in suahtakna a muhna dingin Meitei nupi pawl naktakin pang uh a, mi hunkhop inleng sih lawh uh chi uhi. Ahitakin Nupi Lan/Lal ahihleh ‘women’s war in Manipur’ chih in om thei a, hiai pen phaijang numeite’ galdouna bangin ngaihsut theih theih in om hi. Kidoupi khatna leh Nihna ah Manipur phaijangmi Meitei nupite pang mah le uh bang tup le ngim neih ziaka pang uhiam chih ngaihsutna bangmah ana neihlouh banuah mawltak a lungsim tuamtuam ana suangtuahna ziakin tuni in hiai tan tun lel i diam maw chih hon ngaihsun sak hi.
I ut teng gen mah lehang i gam in tu in numei poimawh mahmah hi. Mi tamtakte’n tapa neilou in tanu kia nei uh a, tamtakte’n tapa ngen nei in tanu neilou uh a, himahleh, thilteng zaw Pathian thuvek ahi. I gam a vaihawmna lending in numeite leng hong kivawk khiak uh poimawh hita lou hiam chih Manipur a numeite’ ni ahih tawh kitonin i taklang ut uhi. Hangsantak a British-te dou ngam numeite zahtak piak hi uh a, eilawi inleng numei hangsante zahtakna ni ibawl a poimawh diam chih ngaihdan sunglut ut kawm leng ihi hi.
No comments:
Post a Comment