Manipur Express | December 14, 2016

HEADLINES:

PM in Session ni 3 omlaite Parliament ah zang ding: Venkaiah Naidu

Parliament Winter Session ni 4 a khawl nungin zingchiang(Dec 14) in sunzom ding

New Delhi, Dec-13: Parliament Winter session tutkhawmna ni 3 sung omlai dingte ah Prime Minister Narendra Modi in Parliament ah hun zang ding hi’n Union Minister M Venkaiah Naidu in tuni’n gen a, opposition pawlte’n innpi 2-te a ‘demonetization’ thu debate dia a phut uh debate akipat phet a PM leng debate neih hun a om ding a phut uh‘goal post kiphuhna mun suan uh’ hizaw in leng taklang hi.  

Venkaiah Naidu in a genna ah, PM  in niteng in Parliament ah hun zang tampen gige a, a pawtkhiak kal chih louhte ah Parliament a om hizaw in taklang hi.  Parliament a lut masapen leh a pai nanungpen leng hi a, a room sung ah session a bang thiltung om hiam chih hoihtak a enchian zel hizaw in taklang hi. Session hun ni 3 omlaite ah Prime Minister in Parliament a om taktak ding hiam chih dotna tawh kisai Venkaiah Naidu in a dawnna ah ‘om ding ahi’ chi hi.  Union Minister of Information & Broadcasting Venkaiah Naidu in Prime Minister tungtang a genna ziak ahihleh opposition pawl te’n ‘demonetization’ thu a debate neihna hun ah Prime Minister Modi leng tel ding  a phut ziak uh hi a, discussion neih a omte vote lakna in a zuih ding chih deih uhi. Parliament Winter session ahihleh November 16, 2016 akipan in kha 1 ching thei phial neih in omta mahleh ‘demonetization’ thu a kiselna a sousan gige ziak in masawnna taktak omlou a, ni 4 sung khawlsak a om nung December 14, 2016 a kipan nawn in December 16, 2016 in zou ding uhi.  

Naidu in ‘demonetization’ thu a government in debate neih lunglut a hihdan leng gen a, huai thu ah opposition in goal post omna mun suan kawm a parliament proceeding a paizom ding dal uh hi’n taklang hi. Aman a genna ah, Speaker in rule 193 nuai ah ‘demonetization’ thu a debate neih ding kong kihong gige a, Congress makaih opposition pawl in dal theihna chiteng a dal hizaw in taklang hi. Opposition pawl phutna bang a debate a kipat phet in opposition te’n a gen ding uh a om nawn louh ziak in discussion hun a PM leng a om ding chih thu pawlut nawn uh hi’n leng taklang hi. Prime Minister kiang ah Inpi a lut ding a leh discussion hun thu khatpeuh ut-le-dah a gen-le-sak a neihte uh tukawm a ngaikhe dia phutluih sawm opposition pawlte kuate a hi ua? chi’n leng Minister in dotna bawl hi. Rule 193 nuai a debate neih ding Speaker in pom leh lemsa ahihdan Union Minister Venkaiah Naidu in gen hi.      

Tuabang kalah, Union Finance Minister Arun Jaitley in tuni’n opposition pawlte ngetna bang a debate nei dia government kiman ahihdan gen a, slogan sam a kikou chihte omsak nawnlou a thupukna kichiantak bawlkhiak a manphatna muban ding in opposition pawlte ngen hi’n kigen hi. Huchi lai in, Congress pawl in ahihleh a thil phut ngeina mah uh letzom touh sawm uh a, opoosition pawl leh ruling BJP te’n inpi 2-te amau party MP chiat kimtak a tel ding in ‘whip’ suahkhe tuak uh hi’n thusuak in taklang hi.

TUALSUNG:

TRVM HQ makaih in Emergency meeting om 

Lamka, Dec-13: Manipur Govt. in Dec. 14, 2016 in Pherzawl District honkhiat sawm tawh kisai zannitak in Delhi a Tribal Rights Vigil Manipur (TRVM) HQ office ah emergency meeting om a, Delhi based SSPP Jt HQ leh ZYA, Delhi makaite tel uhi. Tunsuanthang Guite in 

patna thumna a neihzawh in TRVM Moderator-Secretary in hun honla in issue detail zawdeuh in gen hi. 

       ZYA President Vumsuan Naulak in Manipur Govt. in District thak 7 a puan guihna uah athil hihdan uh diklou ahihdan leh MLA Election 2017 tawh kisai a'ngaihdan hoihtak gen hi. Huai zawh in paikhawm te'n District thak 7 tungtang kigenkhawm a, Manipur Govt. gamtatdan TRVM Principle tawh kikalh hi’n taklang uhi. Aziak bel Affected Villages leh stakeholders kuamah consult leh theihsak (inform) na om masalou ban ah Manipur Govt. in amau a 'Entrusted power abused' uh hi a akitheih man in nakpi in mawhpaih uhi. Huaiban ah Hill Area Committee (HAC) by-pass a singtangmite’ gamsung (schedule matter) a certain individuals leh some political party' vested interest vaihawmna pen pomtheih vual hilou a, dan hoihtak kibawlsa ADC Act, 1971 Clause 3(3) naktaka kalh a om ahihziak in hiaithu nouneltaka genkhawm a om nung in maban ah panlak dingdan hoihsakthu genkhawm uhi. Huaite- TRVM in RTI akin theilam a filed ding, Affected Villages Chief Association in condemnation a suahpen uh delhzui a, Public Interest Litigation (PIL) Imphal High Court ah filed a, District thak inauguration program dinkhawlsak ding, Lamka khawsung ah District thak bawl tungtang ah lungkimlouhna latsak theihdan omleh hihding hoihsa uh hi’n Chief Moderator, TRVM HQ, Delhi apan kiza hi.

Saikot ah 2nd State Level Sikpui Ruoi zatna om

Khantouh leh siamna ziak a culture mangngilh vual hilou:

Lalbiakzuala, President CYMA

Lamka, Dec-13: Saikot Playground ah tuni’n Manipur State Level Sikpui Ruoi- 2016, Celebration Committee makaih ‘Festival of brotherhood; back to the roots’ thupi zangin 2nd State Manipur State Level Sikpui Ruoi zatna om hi. Session masa ah Chief Guest in Lalbiakzuala, President, Central Young Mizo Association  pang a, Guests of Honour in Lalsangzuala Ngente, President, Mizo Zirlai Pawl, GHQ leh Verieyo Shatsang, Gen. Secy, All Tribal Students’ Union Manipur (ATSUM) pang uh a, Functional President in Joseph Lalrothang, President, Hmar Inpui, GHQ banah Sikpui Pa’ in Hmar Inpui President masapen H.K. Joute pang hi. 

Chief Guest in khawvel khantouh tawh kituak in i-pupa tawndan leh ngeina dante’ uh mangngilh ding hilou chi a, ngeina leh tawndan pen khangtou leh laisiam man a mangngilh theih vual hilou hi’n gen hi. Zosuan mun tuamtuam a omte’n mahni tawndan chiat kepbit ding ahi chi a, huai dia panthak la din leng ngen hi.

Programme ahihleh Rev. Rohminglien Pakhuongte, Chairman, Hmar Christian Leaders‘ Forum (HCLF) in thumna tawh ahonkhiak hi a,  hun zatsungin Sikpui Lam Cultural Troupe leh Group YMA, Manipur te’n nam lam lahna aneih ban uah, 1000 Voices Choir leh lasiam tuamtuam te’n la sa uhi.  Nitak in session 2na nei nawn uh a, Chief Guest in Laltlansang Hmar, E/M, North  Cachar Hills  Autonomous Council, Assam pang  a, Guest of Honour in Dr. Seilen Haokip (Spokesperson, KNO) leh Calvin H (Convenor, JMG-UPF) ban ah Functional President in  L.T Hmar (Working Chairman HPC-D) in pang hi. Miss Sikpui Ruoi telna leh Musical Concert leng nei uhi.

M/E ading generator thak hongtung

Lamka, Dec-13: Manipur Express Print na Web-Offset Colour machine kizat hun a electric pailouh chiang a zat ding in a gin ngaihlou (Silent) Generator (KV 125) Manipur leh Nagaland gamgi Mao Gate ah nitam kuam tak a koltang nungin Imphal-Jiribam lampi tawn in hongpai thak in tuni’n hongtung hi. Company a mechanic-te hongzin nailouh ziak in kizang pah nailou ding a, Company akipan mechanic te’n installation hongbawl zawh hunhun ua zat theih ding hi’n gen uhi.

Awja Paupu Lenlai hongkhe ding

Lamka, Dec-13: Zotal Film Company in ZYO GHQ Ambulance project sepsuahna dia abawl 'Awja Paupu Lenlai' kichi Dec. 18, 2016 sun dak 12:00 in Zouveng a Zougal Memorial hall ah honkhiakna om ding hi. Huai hun ah Chief Guest in Paokholal Haokip, social worker pang ding a, Guest of Honour in  Paukhansuan Khuptong, intending MLA candidate 58-CCpur A/C pang ding a, Functional President in T. Goukhomang, ZEO/CCpur  leh Chief Host in Chinlunthang, President UZO pang ding hi. Huai hun lasiam tuamtuam in uap ding uhi.

Nu-le-Pa te tawh KSO/CCpur te’n genkhawm  

Lamka, Dec-13: B. Vengnuom Community hall ah tuni zinglam in Kuki Students Organization (KSO)CCpur makaih in nu-le-pa te tawh siamsin naupangte maban ding genkhawmna om hi. Nu-le-pa te’n tate’ school fee, admission fee, study camp ah sum leh pai ziaka haksatna tuak in KSO/CCpur kiang ah mi 100 val in complain leh suggestion pemahleh tuni’n mi tamlou kia tel uhi. KSO lam in  compulsory study camp, students’ discipline, admission & tuition fee leh thil dangdang propose agenda koih mahleh nu-le-pa lam atawm ziak un thupukna taktak bawl haksa hi’n gen uhi.

Behiang ah PYF Golden Jubilee zat hiding

Lamka, Dec-13: Behiang khua a Presbyterian Church ah Dec 17-18, 2016 sung ‘Khanglai Mangpa Lungdamna’ chih thupi zang in ZTP/ZPCS, Tuivai Dist. Presbyterian Youth Fellowship kum 50 chin Golden Jubilee zat hidng hi. Huai sung in Rev Khamminlian, Bial Pastor; Rev. Tualzachin, Sr. Executive Secy. ZPCS leh Rev. Stephen Chinzathang, Executive Secy. i.c Youth in Pathian thugen ding hi. Dec.18, 2016 zing biakna hun ah Rev. Khamminlian, Bial Pastor in Jubilee suang hong in Pathian kiang ah thumna in landing a, ZPYF; PYF Zotang Dist,; PYF Singngat Dist.; Zoutang Presbytery; Tuivai Dist. ZTP leh PWF Tuivai Dist. te’n Jubilee greetings nei ding uhi.

Singngat khua ah kithuah khawmna nei uh

Lamka, Dec-13: Singngat a YPA Hall ah tuni zinglam in Young Paite Assn. (YPA) GHQ makaih in YPA Singngat Block makai-te leh Unit te tawh kithuah khawmna om a, Pastor Thangkhanmuan, Local Pastor, PCI (R) Singngat in thumna in hong hi. Chin Ngaih Pau, Chairman, CEC, YPA GHQ hawh theihlouh ziakin amah tang in  V. Khankhup Guite, Member CEC in thu gen a, P. Vungzadong, President, YPA Singngat Block; S. Manlian, President, YPA New Lamka Block; President/Secy. YPA Zion Veng Unit; President/Secy.YPA Station Veng Unit; President/Secy. YPA Bethel Veng Unit leh President/Secy. YPA Mission Veng Unit te’n thugenna nei uhi.

Thugentute’n YPA motto pibawl ding, maban election hun ah YPA mi-le-sa-te sum-le-pai a kizuak louh ding, diktat leh ginom taka mahni deihchiat vote ding chihte gen uhi. YPA GHQ in YPA Singngat block panpihna in antang bag 8 pia uhi. Singngat ah kithuah khawmna ah YPA New Lamka block, YPA Khominthang Unit, YPA Dorcas Veng Unit leh YPA Vengnuam South Unit apan makai-te tel uhi. Program tawpna ding in atelteng in YPA lapi sakhawm leh lamkhawm uh a, huai zawh in Pastor H. Chinkhanlian, Local Pastor, EBCC Singngat in thumna in hunkhak hi.

General Secretary, EBC in Training Centre extension ground breaking 

Lamka, Dec-13: Rev S. Vung Minthang, General Secy. EBC in tuzing in New Lamka a Priscilla Home ah Training Centre extension ground breaking nei in suangphum zawhin Pathian kiang ah thumna in lan hi. Aman agenna ah Priscilla Home paitang theihna ding a inn nupite’n sun-le-zan atai in buaipih ban uah kuaman govt. apan work pelou in aneitu tuam leng omkei mahleh aneitu taktak Pathian hizaw hi’n gen hi. Thil hoihsep kichi midangte ading in kisem manlou zel a, Priscilla Home bel na hoihsepna mun poimawh tak, agah a tehthawh ding hileh mihing ngaih in lawhching lou bangmahleh mihing bawlhoihna munpi ahihziakin lawhchin leh lawhchinlouh Pathian in bukkak zaw ding hi’n gen hi. Midangte adia na hoih isep athawn hilou in itna tawh na isep leh Pathian kipak in hon vualzawl ding chi hi. Khamtheih hihte kepna leh bawlhoihna ah 99% lawhsam bang mahleh Pathian in mihing bawlhoihna poimawh ngaih hi’n gen hi. Priscilla Home ah amau leh amau kibawlhoih thei nawnlou-te bawlhoih theizel ding leh gah (fruit) tampi suang ding in deihsakthu gen hi.

      Priscilla Home bel 2001 in Zenhang Lamka ah kipankhia in CCpur Christian Women Fellowship te’n enkai uh a, Missionary Cindy L. Perry in New Lamka a Priscilla Centre ah gam leh leitang Rs. 8 lakh a leikhia in 2003 in Zenhang Lamka apan New Lamka ah kisuan uhi. Tulel in Priscilla Home ah staff 6 om a, huai lak ah full staff 3 leh part-time staff 3 banah inmate 10 om hi. Guwahati pansan Tata Trust te’n Priscilla Home a inmate-te’ zatding puankhuina khawl (swing machine)10 piaksawm uh a, huai-te koihna leh kizilna ding ground breaking kinei hi’n gen uhi. January 15, 2017 in inmate te’n training course pan ding uh a, January 2017 apan inmate 10 lakbeh hiding a, avek un mi 20 phading uh hi’n kigen hi. Priscilla Home bel numei haksatna tuamtuam neite etkolna, siam-gat leh puankhuina mun hi’n kigen a, tuni a ground breaking kibawl leng sum leh pai neihsa omlou a, Pathian muanna ziaka kipan dek ahihziakin mimal, pawlpi, organisation, saptuam kuapeuh in panpihna piak theihgige hi’n kigen hi.

Vending station thak honkhiat kal ngaklah uh

Lamka, Dec-13: Electricity Deptt/MSPDCL, Manipur nuai a Muster Roll leh Work Charge te’n regularized ding phutna in All Manipur Electric Employee Union te’n Dec. 6, 2016 apan ‘Cease Work Strike’ pan uh a, Electricity Deptt./MSPDCL, CCpur Divn. te’n leng zom in Electric Pre-paid Recharge na Vending store leng khak himahleh ni bangzahhiam nung in electric pre-paid top-up ding khualna in hong nawn uh a, mi tamthei mahmah hi. Police Station campus a electric pre-paid recharge na ding Vending store bawlzawh himahleh Cease Work Strike ziak in honkhiat hinailou a, New Lamka a Vending Station ah mi atamtheih luat ziak in Police Station campus a electric pre-paid top-up nang Vending station honkhiat kal ngaklah thu mi tamtak in gen uhi.

AMCOS in tuni’n annual shareholder conference nei

Lamka, Dec-13: Agape Missions Co-operative Credit Society (AMCOS) Ltd. in tuni’n GBC campus a Upa H. Jelshyam chapel ah Annual Shareholder Conference 2016 nei uhi. Huai hun ah shareholder 189 om lak ah mi 90 val kihel uh a, annual report tawh kisai houlimna ban ah, Audit Note velna leh pomna aneih ban uah kum nawn budget leh year plan ding genkhawm uh a, shareholder paikhawm te’n kum nawn budget din Rs. 9.17 crores kiguang pom uhi. 

Pumkhogin Guite, Secretary in annual report pia a, Rev. V. Nenglian, Board of Directors, AMCOS in hunkhak hi. AMCOS Ltd. ahihleh EBC Worker te’n midang haksa diakte panpih kawm in mahni kitoudelh theihna om ding tupna in 2005 kum a kipankhia hi a, nominal member 4000 val om ban ah shareholder 189, staff 7 leh agent 10 om a,  tukum akipan core banking leng panta uh a, National Co-operative Union of India a member ahih banah Manipur adia Multi State Co-operative Society Ltd. nuaia member omsun hi’n leng kigen hi.

Phula-Len Festival ah mi 75 thilpiak pia

Lamka, Dec-13: Good Samaritan Foundation in tuni’n DHQ Tuibuang a CFC campus ah advent Christmas tawh kithuah in Phula-len Fest 2016 nei uh a, mun tuamtuam a naupang tagah-genthei leh liangvaite’ kiang ah Christmas thilpiak (gift) mi 75 kiang ah pia uhi. Good Samaritan Foundation in 2009 akipan kum tengin Christmas ding kuan chiangin  naupang haksa diakte’n lawm-le-vualte englou a hondampa Jesus Christ pian lungsim nuamtak a azat ding uh tupna in Phula-Len Festival  minvuah in nei zel uhi.  Thangjalun Haokip, Convenor, Phula-len Fest 2016 in Phula-len Fest zatna tawh kisai pulak a, Rev. Dr. N. Lhungdim, Literature Secretary, KCCA in Christmas message gen hi. Lunkholien, Secretary, Good Samaritan Foundation leh Lhingvei makaih in naupangte kiang ah thilpiak pia uhi.

North East Idol 1st Runners up vaidawnna om

Lamka, Dec-13: North East Idol kidemna a 1st Runners-up la Jenny Zawnthianhoih Thomte tuni’n Lamka hongtung a, Kangvai khua ah Zogam Artistes Assn. (ZAA) makaih in deihsaktu leh ngainatute’n vaidawn uhi. Jenny bel nitaklam dak 4:00 in Lamka hongtung a, ZAA makaih in khawpi sung fankualpih nung in Hiangtam Lamka a YPA GHQ ah reception program leh kipahpihna program om hi. Huai ah ZAA tel in mi tuamtuam te’n kipahpihna thil piak leh pakkhi pia uhi. Jenny in kipahman in Rs. 1 lakh leh certificate ngah hi. Jenny in hiai bang lawhchinna a ngah SSPP Jt. HQ: Lamka in kipahpihthu puang in, pan alaknate etton tak ahihdan taklang uhi.

Ni 3 nung in bank ah mi tam

Lamka, Dec-13: Second Saturday, Sunday leh Monday a bank kikhak ziak in tuni’n Bank-te ah sum lakhe ding mi tam mahmah a, SBI/CCpur branch mai ah mi dingdim in Tedim road akimkhat phial luahdim uh a, traffic leng buaiban hial in Police duty leh traffic Police-te tawl mahmah uh hi’n kigen hi. Bank ah mipi’ deihzah sum kidaih zoulou hi’n kigen a, bank tuamtuam apan mi tamtak in sum lakhe manlou uh hi’n kigen hi.

MPA in kaisang lopsak

Lamka, Dec-13: Manipur Pharmacists Association (MPA) in tuni sunnung in CMO conference hall ah a seppih uh MPA President lenlel T. Sumzamang a dinmun akipan kaisang lopsak uhi. T. Sumzamang in ahihleh kum 30 val Pharmacist na asep nungin Medical Store Officer dia kaisang in join pah ding hi’n kigen hi.

New Lamka Meet 2016 om ding

New Lamka Youth Club in Dec. 17, 2016 in PT Sports Complex ah New Lamka Meet 2016 nei ding uh a, kisakkholhna dan in tuni’n JCB zangin ground leveling bawl uhi. Nidang a New Lamka League a theih a om tun New Lamka Meet bel New Lamka huapsung veng tuamtuam a football lunglut-te leh talent neite zonsuahna dia kum tamtak paita akipan himahleh, kum bangzah hiam khawlsan ahihnung in hinsak a om hi’n kigen hi. Dec. 17, 2016 in New Lamka (East) MDC M. Gouzamang Guite, EM/ADCC in hongkhe ding a, atel nuamte’n Dec. 14 tan in Entry fee Rs. 500 leh Security deposit Rs. 200 piak theih lai dinga, Dec. 15, 2016 in manager’s meeting leh fixture draw hiding in kigen hi.

SUUNNA:

Nujawn (101) m/o S. Lallungmuana of Zion cottage Hmuai Veng, tunitak dak 7:15 velin teknat in si a, Dec. 14 in Lamka hanmual ah kivui ding hi. Nujawn bel Dr Zuii’ nu ahi.

T. Gouzapau (74) f/o T. Khamminlun @ K.G Tungnung of Bible Hill, Rengkai tuni nitaklam dak 4:55 velin cancer in si a, Dec 14, 2016 in Tuibul hanmual ah kivui ding hi.

Tinzadawng @ Dawngvawm (72) f/o Khamlianthang, Chief of B Munpi, Mualnuam Sub-Divn. tuni nitaklam dak 4:30 velin zunkhum in si a, Dec 14, 2016 in B. Munpi hanmual ah kivui ding hi.

Thongkhozam @ Zazam Samte (40) s/o (late) Chindal Samte of Zoumunnuam tunitak dak 8:40 in Dist Hospital ah si a, Dec 14, 2016 in kivui ding hi.

STATE THUTHANG:

Government nasem te’n lawh la baih ding

Imphal, Dec-13: Hongtung ding Christmas 2016 ziakin Gazatted officer-te telin Manipur government nuai a sem employee teng in Dec 14, 2016 akipan in December 2016 kha lawh leh allowance tuamtuam la thei ding in Manipur Secretariat a Finance Dept. (Expenditure section ) in tuni’n order suah hi. Huai banah Manipur Government in appointment a bawl (approve) work charged/casual leh Muster roll te’n leng December 2016 kha  lawh la thei ding uh chih hi a, himahleh DP leh Finance Department thusuak kalh a appointment kibawl adhoc/substitute/officiating/contract/casual leh Muster roll-te bel huamkha lou hi’n Vineet Joshi, Commissioner (Finance) in order suah hi.

Keirao ah election campaign subuai

Imphal, Dec-13: Keirao Langdum ah tuni zingsang in Social Development Committee, (SDC) Keirao Kendra te’n BJP intending candidate khat in election campaign a bawl sawm hun ah subuai uh hi’n kigen hi. Akigendan in BJP intending candidate Rameshor of Kyamgei leh BJP worker te’n Keirao Langdum ah election ding tawh kisai a house campaign  pat a sawm hun uah thakhat in SDC volunteer te’n campaign kipat ding dal uh a, huaiziak in pawl 2-te kalah kisualna piang a, Irilbung police-te tun nung a kham daih in om uhi. Thiltung tawh kisai in SDC Convenor Salam Hemba in media-te tawh kimuhna hun ah SDC te’n tuma a camera meeting, campaign bawl lou dia zuih ding a bawl uh kalh ahihziak a volunteer te’n campaign subuai uh chi a, Keirao Kendra suahlam a candidate 4 leh Keirao Kendra tumlam a candidate 5-te BJP ticket kituh ziak in kinakna om a, SDC te’n tuma a BJP ticket tang-te gup ding leh mimal a election campaign sai ding kham uh chi hi. BJP intending candidate Rameshor in intending candidate dangte tawh poll campaign bawl hileh subuai lou ding a, SDC te’n Rameshor saina nuai a campaign 2 vei a sukbuai na uh hi’n gen hi.  SDC te’n candidate mi diktak telkhiak ding sawm uh a, maban election ding ziak a Rameshor in sum tamtak seng a street lamps, ground leveling leh camera meeting banah grand feast a sai in committee in zuihding a bawl kalhna hi a, huchibang candidate te’n election a telching nung in mipi hamphatna ding a nasem lou ding uh hi’n gen hi.

Thau kap khumna ah handyman leh driver liam

Imphal, Dec-13: Security vengbitna in Jiribam apan van tuamtuam pua gari 3000 val ding  zan in Imphal-Jiribam (NH-37) tawn in Imphal zuan uh a, Tamenglong district ah Awangkhul leh Langkhong kikal ah zan nitak 10:30 velin meltheihlouh galvan tawi te’n security omlouhna mun ah Tata Tipper (No. MN01AA-0164) bangzah vei hiam thau kapkhum uh a, huai ah thautang in Driver Khullem Ibochou lenuai taklam kha mahleh Noney tan gari hektung a, Police te’n healthcare centre khat a pawlut in huai apan Imphal ah etkol din pawkhia uh a, Truck mailam ah thautang khakna ma hunkhop muhtheih hi nom hi. 

Huailou in Tamenglong district ah nitak dak 11:00 velin Tupul area ah meltheihlouh galvan tawi te’n Truck (No. MN01A-0169) thau a kapkhumna uah Handyman Salou Rahman of Usoipokpi liam zek a, windshield nunglam kitam in driver nunglak leng thautang in kha a, huai truck in BSF-te a ding van pua hi’n leng gen uhi. NH-37 in a tawtkhak Khumbong area ah zan nitak a thiltung tawh kisai in counter blockade  khauhtak kipan a, Tamenglong district zuan ding gari-te van puak kaihkhiaksak in om hi.

IBSD leh University of Puerto Rico te’n MoU kai 

Imphal, Dec-13: National Institute of  Department of Biotechnology nuai a Institute of Bio-resources and Sustainable Development (IBSD) leh US a Inter American University of Puerto Rico (IAUPR) te’n Imphal ah tuni’n International Memorandum of Understanding (MoU) suai kai uhi. Huai MoU ah Indian delegation apan Prof. Dinabandhu Sahoo, Director, IBSD leh US delegation apan Prof. Juan A. Negron-Berrios, Chancellor, Inter-American University of Puerto Rico te’n suaikai uh a, hiai hun Prof. Alok Arun, Institute of Sustainable Biotechnology, IAUPR leh Prof. Ira A. Levine, University of Southern Maine, USA banah IBSD a chair te’n uap uhi. Prof. Dinabandhu Sahoo in a genna ah MoU in sustainable utilization of bioresources  a dia science & technology development leh joint research huam a, IBSD leh IAUPR pangkhawm in research and development (R&D) banah researcher banah scientist leh student-te exchange leng huamkha hi’n taklang hi.

BJP convener in Delhi zuan 

Imphal, Dec-13: BJP Manipur Pradesh a Election Management Committee a Convener Th. Chaoba in Manipur BJP sungthu a sehkhenna om tawh kisai a adinmun theitelsak ding in New Delhi zuan in zinkhia a, BJP Manipur in-charge hihna apan Prahlad Singh Patel lakkhiak ahih keileh BJP khawlsan ding in gen hi. BJP Manipur Pradesh a President Ksh. Bhabananda leh a langkhat ah Th. Chaoba makaihna in kisehkhen na om hi’n gen uh a, BJP a National leader, MP leh state leader te’n Patsoi leh Heingang a public meeting hun ah ava tellouh ziak un BJP state unit office luhsawm thu tawh kisai leng Patsoi A/C a BJP intending candidate S. Kunjakishore leh Heingang A/C a P. Sharatchandra worker leh supporter-te hi uhi. Patsoi A/C a BJP chief lui tapa khat in leng election tuh sawm a, kha 2 paisa a Congress apan kitawpna pia Congress Veteran Leader N. Biren in Heingang A/C ah election tuh sawm a, Th. Chaoba in Kunjakishore leh Sharatchandra-te gum a, BJP party ah a om lai ding leh BJP Manipur in-charge len Prahlad Patel (MP) paikhiak ding leh Manipur a BJP sukhatna dia panla intending candidate-te party ticket a piak ding uh chi’n gen hi. 

KRA hidia gintak-te thah sawm suakta

Imphal, Dec-13: Senapati district a Taphou Kuki village ah Dec 7, 2016 nitak a KRA hidia gintak te’n Awang Sekmai apan mi 1 a thah sawm uh taikhia in A/R patrolling paite ziak a suakta hi’n gen uhi. Huai tawh kisai in tuni’n Imphal ah press conference om a, huai ah Amon Joseph (28) s/o A. Nitai Singh of Awang Sekmai in thiltung tawh kisai Senapati Police Station ah FIR khia a, dan enkaitute’n mawhna neite gawtna dia panlak a neih kei ua leh kiphinna pat hiding in gen hi. Aman thiltung tawh kisai a genna ah Dcc 7, 2016 nitak in Konibo Lianmai (50) tawh Tabudi apan jeep sia khat gari dang in Sekmai ah apa workshop ah bawl ding in kai uh a, Taphou gate gei a Taphou Kuki village ah nitak dak 10:00 velin mualtung apan KRA cadre hidia gintak khat makaih in mi 3 te’n thagum in mualtung ah pitou uhi. 

Amau pimang-te kiangah bangmah lawhlou ding leh a van a deih-te uh laksak zaw ding in ngen uh a, himahleh mun tuam ah 2vei pikhiak nung in KRA cadre dia gintak in bangmah genlou in thil giktak zang in thah tum in vuak tawh thuah hi. Huai hun in amau lam manawh in A/R patrolling paite ziakin mi 3-te a kihemmang uh a, huai nung a taikhia in A/R-te kiangah panpihna va ngen in Taphou Outpost ah zan giak hi. Dec 8, 2016 zingsang in inntung a, a lawm Konibo Lianmai (50) ahihleh Naga-te ahihziak a mi 3 te’n bangmah lawh lou uh chi a, mi 3-te makaitu Nanao @ Stephen, KRA jail bird banah Taphou Kuki area ah Sameinthang kichi a, aman Manipuri siangtak a pau thei chi’n leng taklang hi.

Counter blockade supporter hidia gintak te’n Tata Sumo mei in hal

Imphal, Dec-13: Counter blockade supporter dia gintak te’n tunitaklam in Noney zuan a tai Tata Sumo khat kham khawl in meh telin van kipua-te lak khiak nung a mei a halsak uh hi’n kigen hi. Thusuak in Khumbong bazar ah counter blockade supporter te’n gari a singtanggam a puaklut ding van tuamtuam kaih khiaksak uh a, huai hun ah Tata sumo khat in Ngairangbam road tawn in counter blockade supporter-te omna mun pelh sawm mahleh blockade supporter te’n sumo nungdelh in tuni nitaklam dak 4:10 velin Noney police station in a huamkhak Ngairangbam mun ah delhpha uh a, passenger leh van kipua teng lakkhiak nung a halsiat sak uh hi’n kigen hi.

Education policy thak deihlou

Imphal, Dec-13: Centre a National Education Policy 2016 deih lou latsakna in NSUI te’n campaign pan uhi. Huai tawh kisai in Hotel Imphal ah tuni’n press conference om a, huai ah Amrita Dhawan, President, NSUI in India gamsung pumpi ah draft policy thak tawh kisa in consultation programme sai uh a, Manipur a ah Dec 14, 2016 in om ding hi. Congress a affiliated student body NSUI te’n Centre-te National Education Policy 2016 deihlouhna in kiphinna tuamtuam pan ding uh a, privatization tupna leh student gentheite a dia haksatna tun ding a, hiai tungtang ah stakeholder-te thuzak louh banah RSS apan copy leh paste document ahi chi hi. Aman a genzelna ah huai policy ziakin student organization te’n educational institution campus pansan thei nawn lou ding uh a, TSR Subramanian Committee te’n draft policy document tawh kisai a recommendation a bawl uh ‘fascist’ ahih banah student welfare dalna hi a, India gamsung a student-te hasot lou ding policy hoihlou ding chi hi.

CC Meet:

FC Zalen-te vualzou in quarter-final lut

AMFA saina a Imphal Mapal Kangjeibung a 60th Sir Churachand Singh, KCSI, CBE, memorial Football Tournament pailel ah tuni in pre-quarter final match kimawlna FC Zalen, Sadar Hills leh KLASA, Keinou ten nei ua, tua ah FC Zalen in 3-2 a zou in quarter-final lut uhi. Hiai match ah minute 5 paipan in KLASA in Nabachandra Singh tungtawn in goal khum pah ua, ahihziakin FC Zalen in Paolenlal Khongsai tungtawn in minute 7 in din kik ngal uhi.  Half tan in 1-1 in kidraw uhi. Half zawh minute 56 in FC Zalen in Seikhohao Tuboi goal n 2-1 in makai ua, tua zawh minute 86 in Lalminlian Vaiphei in khat khum in 3-1 in makai uhi.  Injurytime in KLASA in Lamminthang Touthang goal in consolation goal khat khum ua, FC Zalen in 3-2 a zou in quarter-final lut uhi. FC Zalen in quarter-final ah Baarhoongka AC Kokrajhar te Dec. 16, 2016 in kimawlpih ding uh a, NISA leh ARC Shillong te Dec. 17 in kimawl ding ua, a zou penpen in semi-final ah SSU kimawlpih ding hi. Quarter-final match dang ah NEROCA leh DM Rao te kimawl ding uhi.

Transfer & Posting

(IPS/MCS Officers)

1. Krishna Kumar, IAS, SDO/BDO, Ukhrul and SDO/BDO, LM Block in addition as SDO/BDO, Ukhrul.

2. Pawan Yadav, IAS, OSD (Tourism) as SDO/BDO, LM Block, Ukhrul District.

3. Ravinder Singh, IAS, OSD (Tourism) as AC to DC, Senapati.

4. Sona Khaikhopau Ngaihte, MCS, AO (Horti.) as AC to ADC/ Moreh.

5. Ng. Jogendra Khumancha, MCS, AO/Vety as AC to ADC/ Jiribam & SDO, Borobekra.

TUNI THUPI:

“Nou zaw ka tungah thil gilou hih lungsim in na pu ua; himahleh Pathian in tuni bangin, mi tampi hing leh dama humbitna dinga, thil hoih a suahsak a lungsim put ahi zaw ngala.” - Genesis 50:20

EDITORIAL:

Development leh Manipur

Union Minister (Road, Transport, Highways & Shipping) Nitin Gadkari in Dec 11, 2016 in Imphal leh Jiribam hongpha in Rs. 1,152 crore bei a lampi leh lei kibawl ding project tuamtuam 17 nasep patna ding in suangphum hi. Gadkari thugente etkikna kawm in, Centre government leh Manipur Government kikal leng hoihtak kizopna a om  poimawh mahmah dingin kilang a, Centre government in Manipur state pen special status pia hi’n Gadkari in puang hi. Gadkari thugen hoihtak a a tangtun leh nasepkhiak ding project tuamtuam 17te tu apan kum 3/4 sungin zawh vek ahih gintak huai hi.

Nitin Gadkari bel BJP adia leader poimawh mahmah ahih centre government ah leng thulut mahmah hi a, tua kia hilou in amah mimal leng diktat taka nasem mi ahi chi’n minlawh khak in om hi. Manipur state ading a lampi leh lei bawlna ding project tuamtuam 17 zawhsiang hunah lampi teng a saudan kilometer 493 hiding a, huai nasepna ah Rs. 1152 crore bei ding chih Union Minister in a puankhiak ahi hi. Project-te laka khenkhat National Highway Infrastructure Development Corporation Limited (NHIDCL) in bawl ding a, Project dangte Manipur government a Public Work Department in sem ding uh chi hi. Ahitakin, PWD sang mahin leng NHIDCL-te a muanhuaizaw diam chih bang leng hon ngaihtuah sak hi. NHIDCL-te a corrupt kei uh i chihna hi tuanlou in, PWD sangmah in leng a muanhuai zaw ding uhiam chi ut i hizaw hi.

NHIDCL in project a sepkhiak dingte uh ahihleh i theihchiatsa himahleh genthak nawn lehang, Barak leh Makru lei (bridge), Ukhrl-Toloi-Tadubi kikal lampi km 115 a bawlding, CCpur-Singngat-Singngat-Tuivai km 162 a sau puahphat ding chih hi a, tualou in Tamenglong akipan Khongsang kikal km 40 a sau abawl ding ban uah, PWD tungtawn in Mao gate akipan Imphal kikal km 90, Tipaimukh-Imphal-Ukhrul-Jessami leh Khambong-Nambol-Mayang Imphal-Kakching-Lamkhai section bawl ding uh chih ahi hi. Huaitte Developmental project thupitak ahihman in kipahhuai mahmah a, ahihziakin, a sepkhiakna tawh kisai (execution) lam bang hong chidiam chihthu hizaw hi.

Mihingte’ adingin kikawmna lampi poimawh mahmah a, kikawmna banah damtheihna leh education banah tuinek kiching poimawh hi. Tuni in mihingte’ poimawh tuamtuamte taklat veksawm ihi kei a, government in sum crore tamtak bei a lampi leh lei (bridge) a puah sawm tungtang gen ut i hi hi. Centre government in bangziak taka tuhun a project lian taktak state ah hong luanglut sak uh ahi diam?

Manipur ah kumthak 2017 a February velin assembly election  om ding in kigen a, huai mitsuan kawm a centre a vaihawm BJP in special status hong minvuah zual uh ahi diam? Manipur state govt bawl Congress in development tawh kisai Minister in a puante a kipahpih kawm un, election etna ahihdan leng thei mahmah uh hihtuak hi. Bangteng hileh, Manipur mipi’ adi’n kipahhuai a, state govt inleng mipi khualna in hiai project-te ahi ding banga a sepkhiak uh deihhuai hi. Election bel election ahi mai a, himahleh mipi’ haksatna state govt in a ngaih poimawh  a, PWD-te leng nidang PWD a batsak nawnlouh uh poimawh hi. Kumthak assembly election zawh a govt bawl ding Congress hia ahihkeileh BJP chih bel bangmah gentheih hinailou a, himahleh, Chief Minister (?)lenkha pen adingin ‘Time for Action’ chih  poimawh mahmah ding hi.

Tulel in Manipur in UNC-te ziakin economic blockade khauh mahmah tuaklel a, blockade omlou hileleng Imphal-Jiribam road pen a ngaihna omlou a, tuma in Transport Union in lampi puah ahihma gari taisak nawnlouh ding chih tanpha thusuah bawl uhi. Khawvel paidan kilamdangta a, nidang in lampi bawl a kizang Pioneer /BRO/ BRTF-te i phat mahmah uh a, himahleh, tuni chiangin amau leng corrupt mahmahta uh chih ahi a, hiai tungtang ah local labourer tam alak ziakuh hia ahihkeileh heutu tuamtuam leh a mipi mahmah in leng fuihse gawp ihi hiam chih ut-huai hi.

BRTF driver hunkhop in gari part leh thautui tanpha black in zuak uh a, aheutu lam ahihkeileh Mohori tanpha inleng cement zuakthei om uh hi’n kigen hi. Ei laka dingin Tipaimukh Road leh Khawzawl road (Dialkhai- Sinzawl) enkai deuh uh a, a phat huaikei uh ichi kei a, himahleh, i ngak lah luat ziak ahidiam a nasep uh a khenchiang in zekai leh duhthusam chinglou bang hi. Tamenglong district ah leng BRO-te om lel uh a, amau leng hiai lifeline/ National highway a puah uh lungtunhuai lou hi. Tua kia hilou in Ukhrul leh Jessami kikal lampi ah leng ki-camp uh a, ni dangin lampi mam in lungtunhuai mahmah a, tuni chiangin a nasepdan uh iplah huai sim abatna ton om hi. Tuaziakin Manipur ah hithei hileh Union Ministry of Road Transport and Highways leh state a Transport Department bang pangkhawmin etkaina na tanpha nei le uh chih huai  hi.

Lampi hoihna mun ah tuahsia (accident) tamdiak chih thudik ahi a, tua ziakin mipi adingin leng ‘Road safety’ tawh kisai pilvanna ding tamtak om hi. Lampi hoih chih ziak a del zen a gari taihat a hetlouh deihhuai hi. Road safety tawh kisai in eilak ah leng awareness  poimawh a, Auto pute lah utna munmun a khawl guihguih mai, mipite’n lah ut dandan a lampi kan zualzual, zukham-ankhamte lah ut dandan a gari a taite ihi uh a, akimawhsa tuam ding om kei, banghiam kisinsakna i poimawh chiat hi.