HEADLINES:
District thak 7 bawlkhiak a omte te lak ah 5 honkhiak hita:
Chief Minister Ibobi Singh in Helicopter a tuang in tuni’n Pherzawl leh Noney district hong
Lamka,Dec-16: Pherzawl a Deputy Commissioner Complex ah tuni’n Pherzawl district honna om a, huai ah programme tuamtuam hunkhop leng om hi. Huai hun ah Dy. CM Gaikhangam, Revenue Minister I. Hemochandra, Hill Area Committee Chairman Dr. Chaltonlien Amo banah Manipur government a Civil leh Police Top official-te tel uhi. CM in huai nung zek in Noney district thak leng hong hi. Noney Part 3 a Longmai Ground ah Chief Minister O. Ibobi in security khauhtak vengbitna nuai ah Noney district hong a, huai tawh kisai Tamenglong a thupesawntu Agui Kamei in a gendan in Chief Minister, Dy. CM leh Minister tuamtuam-te Helicopter a tuang in sunnung dak 2:00 in Noney mun tung uhi. Tuni a district piching a kihong 2 telin Manipur Government in district thak 7 a puante lakah full-fledged revenue district ding in district 5 hon hita chihthu om hi.
Manipur Chief Minister O. Ibobi Singh in tuni a Pherzawl district honna hun ah district thak honkhiak tawh kiton in government in administration thil a etkai phaklouhte leng etkai hita ding in lamethuai chi hi. Pherzawl district kibawlkhe thak pen community khat kankuahna ziak a thilhih hilou in Manipur a community tuamtuam omte grassroot level a khantouhna kilualtak a om ding deihna ziak hizaw in gen hi. District honkhiak thak a omte ah manpower leng koih hipah ding hi’n Chief Minister in gen hi. Deputy CM Gaikhangam in government in khantouhna ding thilhih leh sep-le-bawl a neihte mipite’n a hamphatpih theihna ding in District in poimawhna liantak nei ahihdan gen a, khantouhna dia nungzang guh bangmai in district in poimawhna nei chi hi. Singtang leh Phaizang bial a sep-le-bawl leh thilhih omte khempeuh khantouhna dia sepkhiak ahi chi hi. Huai banah state pumpi kipumkhatna thil poimawhtak hi a, a diakin district thak bawlkhiak a omte ah leng kipumkhatna naktak in poimawh chi hi.
Pherzawl district honkhiak zawh in Chief Minister leh a team-te Helicopter a tuang in sunnung dak 2.00 in Noney mun tung uhi. Noney district thak honna hun ah Chief Minister O. Ibobi Singh in community kichiziatna a kibulphuh district bawlkhiak ding tup leh lunggulh chihte nuse ding in mipite ngen a, vaihawmna lemtangzaw ding ngimna a district thak bawlkhiak a om ahih zawk dan leng gen hi. District thak kibawlkhiate amah makaih government panlakna nuai hi a, chi-le-nam khentuamna hilou in, state sung mun tuamtuam a khantouhna kikimlou tak a om ding deih louhna ziak hizaw chi hi.
Manipur state cabinet in district 9 omsate apan district thak 7 a bawlkhiak thakte lak a tuni a official a honkhiak a om Pherzawl district pen Churachandpur district apan leh Noney district pen Tamenglong district apan khenkhiak a om hi a, district thak 7 lak ah official a honkhiak 5 phata hi. District honkhiak nailouh 2-te ahihleh Ukhrul district apan khenkhiat a om Kamjong district leh Thoubal district apan khenkhiak a om Kakching district ahi hi.
TUALSUNG:
PTC Gen Hqtrs in Press-te kimuhpih
Lamka, Dec-16: Hiangtam Lamka a PTC GHQ office ah tuni sunnnung in PTC GHQ te’n Press te kimuhpih a, PTC GHQ Executive Committee meeting Dec 16, 2016 thupukna bang in Manipur govt. in Dec 8, 2016 nitak in zankhat thu a hilhkhawlna leh kizaksakna bangmah om lou a, district thak 7 abawl khiakna tung ah PTC GHQ in mohpaihna sangpen puang uhi.
Manipur a Congress govt. in District thak 7 a bawlkhiak guih pen Manipur singtangmite a dia khantouhna (Development) chi khat himahleh, akisaipih MLA, HAC, ADC leh Civil Society (Stake Holder) kuamah donglou a, zankhat thu a Gazette order asuahkhiak lamdang sa in mawhpaih uhi. District 7 bawlkhiatna in Manipur Singtangmite khenzakna, khendalhna leh bawl gentheih tupna ahihman in PTC GHQ in theihsiam haksa sa in pomsiam theilou hi’n taklang uhi. CCpur District khenzak a Pherzawl ADC omsa full fledge district a bawl khiak kipahpihhuai mahleh, Thanlon Sub-Division pen Pherzawl District ah alut poisa in CCpur district mah ah aom ding deih uh hi’n taklang uh a, hiai tawh kisai a Thanlon Area Chief Association-te’ panlakna kipahpih thu puang uhi. Dec 11, 2016 a PTC GHQ Conference hall ah Paite Intellectual Consultative meeting a member paikhawm atamzawte deihna leh PTC GHQ Executive Committee meeting thupuk dungzui in tulel ADC/CCpur-te’ panlakna, Lamka leh Tuibong District bawlkhiak ding a thupukna a lak uh kipahpih mahmah kawm in PTC GHQ in naktak in gupthu puang ua, apoimawh bangkim a panpih dia mansa hi’n taklang uhi.
Tuni mah in Chairman, ADC/CCpur ah lai pia uh a, ADC/CCpur member te’n CCpur District sung ah Lamka leh Tuibong District bawlkhiat ding a thupukna alak uh PTC GHQ in kipahpih thu leh huai bawlsuahna ding a naktak a pang ding hi’n taklang uhi.
Manipur govt in December 8, 2016 nitak in District thak 7- Jiribam, Kangpokpi, Kakching, Kamjong, Tengnoupal, Pherzawl leh Noney te Full Fledge District ding in thupukna bawl a, Manipur CM in official in atamzaw hongkhe ta hi.
DSSS in networking meeting nei
Lamka, Dec- 16: Diocesan Social Society DSSS/Peace Initiative in North Eastern India (PINEI) saina in tuni sunma dak 11 in Apollo Veng ah gamsung muanna, bitna leh gamsung siat gawpna tawh kisai in networking meeting nei uhi. Meeting hun ah District sung a pawl tuamtuam, NGO’s, Community Based Organisation, Farmer Based Organisation, Civil Society Leader ban ah Opinion Leaders apan makaite paikhawm ua, Vincent Community Mobiliser in meeting makaih in, Vevian Zou Coordinator Peace Activist DSSS in networking meeting neihna ziak gen in, paikhawm palai ten houlim khawmna nei uhi. Hiai hun ah khamtheih chi tuamtuam ziak a gamsung ah siatna uang mahmah a, adiak in high school leh college student te lak ah khamtheih luahhuai WY kithang mahmah ahihdan musuah ua, tunung a gamsung enkoltu ding student naupangte khamtheih sal atang uh poisak thu genkhawm uhi.
PCI (R) 33rd GA-cum-Mission Conference kipan
Lamka, Dec-16: New Lamka a Rayburn Presbyterian Church ah zan nitak in Presbyterian Church in India (Reformed) 33rd General Assembly-cum-Joint Mission Conference kipan a, Elder Langkhanpau Guite, Moderator GA in hongkhia hi. Rev. Khen P. Tombing, Chief Coordinator in Pastor 4- H. Thiankhanmuan, TK Shyam Valte, S. Kamdoumang Ngaihte leh Kh. Johan Singh ordination pia hi.
Tuni zinglam apan General Assembly nei uh a, agenda tuamtuam genkhawm uhi. Huai lak ah A. Ministry: Pastor Post 1 create in abaihthei pen a sepsuah ding in thupuk uhi. B. General Administration: Saptuam pawl dangte tawh kikalhluat louhna ding in Coordinators & Presbytery Superintendent a telching a omte’n term bei nung in allowances hamphatpih den uh hen chihthu ah Planning & Administrative Committee (PAC) in a etkai zom ding in thupuk uhi. Coordinator Post a kizom a term 2 ban letzom phal hinawn kei henla, term khat khawl nung a candidate theih hizel zawta hen chih thupuk uhi. Sa leh kha a khanzawk semding ngimna in Lanva, Tangnuam leh Gangpimual a om Saptuamte’ a ding in Biakinn/Saptuam khat phuhkhiat ding leh population kikim deuh ding in Lamka Presbytery leh South Lamka Presbytery kikhendan etthak ding chihthu ah PAC in plan bawl a, GAWC tawh a etkai ding in thupuk uhi. Saptuam’ Vehicle Project 2016 pen 2017 Project a suantouh ding in thupuk uhi.
C. Missions: PCI ( R) in kum 2017 ah Misson Field thak honkhiat ding in thupuk uhi.
D. Institutions: Singngat Rayburn High School GA 2016 in approval bawl ding in thupuk uhi.
E. Finance: 2nd Half Yearly Audit (Period: April 1, 2016 to Sept.30, 2016) ding in pawm uh a, kum 2017 Saptuam budget propose draft Rs. 9,50,57,196/-enkhawm in pawm uhi. Upa Emiritus, sigalna leh PCI (R) worker-te lawh 20% in pungsak uhi.
F. Election hun ah: Chief Coordinator ding in Rev Khen P.Tombing telching uh a, Coordinators ah Rev H. Chinthiansong, Rev M. Khamlianmang, Pastor T. Liankholal telching uh a, portfolio kihawm nailou hi. Superintendent ding in mi 4- Pastor M. Thangkhanmuan,Pastor K. Zamkhansuan, Pastor Goukhansiam Guite leh Pastor G. Kamchinthang telching uhi.General Assembly (GA) 2017 makai ding in Moderator in Elder Langkhanpau Guite,
Vice Moderator- Rev TS Thangta, Secretary- Elder V Nunlian leh Asst. Secretary- Pastor H. Thiankhanmuan telching uhi.
General Assemby Working Committee (GAWC) 2017 a Moderator ding in Elder N. Thangzamawi telching uh a, Vice Moderator- Elder T. Khupzadou, Secretary- Rev Khen P. Tombing, Chief Coordinator leh Asst. Secretary- Senior most Coordinator hiding hi.
Tuni a Vaihawmna hun ah election a telching thak teng December 18, 2016 nitak biakna hun ah Rev Khen P. Tombing, Chief Coordinator in Commissioning peding hi.
Khawmpi sung in ‘Christ itna in a sawl teitei gingtu’(2 Korinth 5:14) chih thupi zangin Rev. S. Nengzakhup, Executive Director, NECTAR, Shillong in Pathian thugen a, December 17 & 18, 2016 zing leh nitak in mipi biakna program om ding a, December 18, 2016 nitak biakna zawh in Rev (retd) TS Thangta, Vice Moderator, GA in Khawmpi khak ding hi.
Dec 21 tan Police custody ah om ding
Lamka, Dec-16: Police te’n tuni’n Special Judge, Narcotic Drugs and Psychotropic Sustances (ND & PS) kiang ah Christopher Thanglenlal(21) s/o (late)Tongkholun of Sharon Veng, Moreh Ward No.8, tulel a Tuibuong Bazar om pawkhia uh a, Judge in Dec 21, 2016 tan Police custody ah omding in phalsak hi. Christopher Thanglenlal bel Dec 7, 2016 sunnung in Tuibuong bazar ah CCpur Police Deptt. nuai a Drug Cell leh Police te’n khamtheih WY tang 137 tawh mankhia in FIR No. 61 (12) 2016 CCP-PS U/S 22 ND & PS Act. registered uhi.
Lampi toukuak ding te’n phalna lalou
Lamka, Dec-16: Lamka khawpi sung leh veng tuamtuam a lampi kantan ding tuilawng (pipe), phumding a lampi toukuak te’n govt ah phalna (permission) lalou uh hi’n T.Jangkhongam Haokip, EE/PWD, CCpur apan kiza hi. Aman agenna ah Tedim road ah tuilawng (pipe) phumding te’n National Highway-III office Imphal ah phalna (permission) lak ngai a, Tipaimukh road ah tuilawng (pipe) phumding ten BRGF-te’ kiang ah phalna lakngai hi’n gen hi. Sugnu road ban ah khawpi sung veng tuamtuam a lampi kantan ding tuilawng phumding te’n PWD/CCpur ah phalna lak ngai a, lampi lai kitoukuak teng abawl hoihding ban uah black topping toukuak te’n black topping mah a bawl hoih vek ding chih govt order himahleh lampi toukuak ding te phalna (permission) la omlou hi’n EE, PWD/CCpur in gen hi.
Advent Christmas-cum-Coffee Nite
Lamka, Dec-16: EFCI, KTP, Saikawt Presbytery te’n tunitak dak 5:30 apan EFCI Campus, Saikot ah Advent Christmas-cum-Coffee Nite nei uh a, Chief Host in Lawm Pudaite Sr. Administrative Officer, Sielmat Christian Hospital & Research Centre, Sielmat pang hi. Huai hun ah Blessed Choir tel in Lasiam tuamtuam te’n Pathian phatna la sa uh a, Lienhmingthang Hangluah Manager, Kim-Joe Gas Service in refreshment sponsored hi.
Training of TI-NGO on Hepatitis B & C and Overdose Management
Lamka, Dec- 16: Project Sunrise FHI360-Shalom saina in HL Daka Memorial Hall, HSA campus Rengkai ah December 16 leh 17 2016 sung daih ding Training of TI-NGO on Hepatitis B & C and Overdose Management kichi tuni in kipan hi. Hiai hun ah Shalom, LRRC leh PPO apan Peer Educator (PE) te tel ua, sunma dak 10:30 in traning pan uhi. Training hun sung in Nengkhozam Advocacy officer, Shalom, Vungngaihkim Nurse, Shalom, Chinghauniang, Nurse, Shalom, Dr. V. Ralte, Esther PM Shalom, Baby Saithangpui, leh Paukhansang District Mentor, Project Sunrise te’n Hepatitis B leh C tawh kisai ban ah khamtheih adiak a kikap te tawh overdose hun ua hutkhiak ding dan leh etkol ding dan sinsak ding uhi. Two Days Training of TI NGO on Hepatitis B & C and Overdose Management in atup pipen ahihleh Churachandpur district sung a khamtheih kikap tawh People With injecting Drug ten baihsam tak a Hepatitis B leh C screening muhtheih ding ban ah overdose hun a ektol ding chih ahi.
RMNCH+A thu ah meeting omding
Lamka, Dec-16: Reproductive Maternal Newborn Child Health and Adolescent (RMNCH +A) tawh kisai December 20, 2016 zinglam dak 11:00 in CMO Mini Conference Hall ah meeting omding hi. Huai ah DFWO/DIO, CCpur, Med Supdt. Dist. Hospital, Dist Nodal officer of RMSMA & RBSK, CHC/PHCs a MO i/c teng, Block Program Management Unit staff-te leh Block Progrm Manager-te telding uh a, State RMNCH+A Co-ordinator in meeting makaih ding hi.
Gari tai masa ding kituh ziakin traffic jam
Lamka, Dec-16: Tuni nitaklam dak 5:00 velin IB road leh Nehru Marg Junction lak ah gari taimasa ding kituh ziak in khawpi sung ah hun sawttak traffic jam hi. Traffic jam hun ah SBI/CCpur Branch apan EBCC Central Lamka kikal, Tedim road ah gari dim in hun sawttak gari taituah-te buai mahmah hi. Khawpi sung ah zing, sun leh nitaklam traffic duty te zawh nung in gari ataimasa ding kituh lou hileh hichi zen a traffic jam leh buai omlou ding hi’n kigen hi.
STATE THUTHANG:
Pathianni in dawr-te kihong ding
Imphal, Dec-16: Christmas festival Dec 25, 2016 a kizang ding tawh kisai in Imphal Municipality huamsung a om dukan leh sum dawnna mun (business firm and establishment) om teng hongtung ding Pathianni (Dec 18, 2016) in kihong ding hi. Hiai tawh kisai in Manipur Government nuai a Labour and Employment Dept. in tuni’n thusuah bawl hi.
Works Minister Biren in bailey bridge 2 hongkhia
Imphal, Dec-16: Works Minister Ksh. Biren in Imphal West a Sekmaijin area a mun tuam tuak ah Manipur river tungah tuni’n bailey bridge 2 hongkhia hi. Huai tawh kisai a Komlakhong Ireima Compound a program hun ah Works Minister in a thugenna ah Manipur a lam tuamtuam ah all-round development om theihna ding in Government in panla a, Imphal-Mayang road leng National Highway 137(A) ding a upgrade hi a, gari te’n huai lampi tawn in Moreh town tung thei ding uh chi hi. Manipur ah kum 15 paisa sungin Power, Health, education telin sector teng ah kikhekna om a, Mayang Imphal Road leh Sekmaijin-Khordak lampi kekletna dia ni tamlou sung a nasep pat hiding chi hi. Thagum suahna in thubuai khatpeuh suveng lou ding a, kihou khawmna a thubuai sukveng hiding chi hi. Tuni a bailey bridge 2- Sekmaijin Thongbam Bailey bridge leh Komlakhong bailey bridge-te Special Plan Assistance (SPA) nuai a kum 2010-11 leh 2012-13 a sum Rs. 9,31,16,000 bei in nasep kipan a, huai hun E. Dwijamani Singh, MLA, N. Loken, Chief Engineer (PWD), Temba, Addl. Chief Engineer (PWD) banah official tuamtuam te’n uap uhi.
Tunitak dak 7:00 apan Manipur pumpi ah bandh puang
Imphal, Dec-16: Manipur khangthu a masapen ding in helpawl te’n state security personnel-te a thah uh mawhpaihna in Khwairamband Keithel 3 a nupi pawl te’n tunitak dak 7:00 apan Manipur pumpi ah bandh puang uh hi’n kigen hi. Huai thu tawh kisai in tuni sunnung dak 1:00 velin Bir Tikendrajit Flyover bridge gei ah Khwairamband Keithel 3 apan nupi pawl te’n a dawr/dukan-te uh khak in nupi 1000 val kipun khawm uh a, huai apan rally pai uhi. Rally ahihleh Kangla Western ah kipan in Raj Bhavan, Keishampat, Wahengbam Leikai tawh in Samumakhong tan pai uh a, huai hun ah banner tuamtuam tawi in India Government in dan kalh a sualna bawl dia NSCN-IMte zang lou ding in vauna bawl uh hi’n kigen hi. Media-te tawh kimuhna hun ah nupi pawl te’n Manipur ah dan kalh a NSCN-IM-te gamtatna tamtak omte khawp gawpta chi’n gen uh a, Th. Mangi, Vice President, Sinpham Amadi Saktam Kanba Ema Keithel in Khwairamband keithel a “Ema Panthoibi Sana Keithel”, “Phouiobi Ema Keithel”, “Ema Leimarel Sidabi Keithel” leh “Sindam Amadi Saktam Kanba Ema Keithel”-te saina a rally banah bandh puang uh chi a, state thuneite’n Manipur leitang apan NSCN-IM-te anulsiang ding uh banah Manipur kipumkhatna suksiat sawm te tungah agu om ding chi’n leng vauna bawl hi.
Economic blockade ah mail van khahkol din ngen
Imphal, Dec-16: Postal Department te’n economic blockade leh counter blockade hun ah Civil society organisation te’n Manipur a mun tuamtuam adia dak/laikhak pua Mail van khahkol ding a ngetna bawl uh hi’n kigen hi. Huai tawh kisia a Superintendent of Post Office, Manipur Postal Division in thusuah a bawlna ah Dec 13, 2016 in Khumbong ah Counter blockade supporter te’n Imphal apan Noney a ding dak/laikhak pua Mail Van taisuak ding dal uh a, van sung a postal article-te suksiat hi keimahleh van in document leh parcel poimawh tak banah student-te maban ding kingakna exam material a puak ziak in lampi khak a kiphinna hun khatpeuh ah Mail van huamsak lou ding in ngetna bawl hi’n taklang uhi.
SHDP beisak in Congress party ah kigawm
Kangpokpi, Dec-16: Manipur government in full-fledged district dia Sadar Hills a puangkhiak louh uh mawhpaihna a ADC Sadar Hills a Congress Councillor te’n a lom in Congress party apan kitawpna a piak zawh nung un Sadar Hills Democratic Party (SHDP) a bawl khiak uh tuni a beisak in Congress party ah kigawm nawn uh hi’n kigen hi. Sadar Hills Congress Councillor te’n akisakhakpih Block Congress Committee-te tawh Kangpokpi DHQ a District Council Complex a member lounge mun ah tuni a joint meeting hun ah zan a CM in full-fledged revenue district dia Sadar Hills a honkhiat nung in SHDP phiat ding leh Congress party a kigawm ding in thutanna bawl uhi. Huai tawh kisai a Sadar Hills ADC Vice Chairman banah District Congress Committee Sadar Hills a President Thangjakam Misao in media-te tawh kimuhna hun ah Congress Councillor 20 te’n phutluihna ziak in Congress party apan Nov 18, 2016 in kitawp uh a, huai nungin Councillor te’n Congress tawh kizopna tatsak in kalhtu omlou in SHDP bawlkhia uh a, akisaipih block Congress Committee leh Mahila Congress a leader leh worker te’n leng Congress party akipan kitawp uhi. Himahleh kum 40 paisa apan Sadar Hills mipi kinepna Kangpokpi district bawlkhiak banah CM O. Ibobi in Dec 15, 2016 ni in a hongkhiat tawh kiton in tangtung a, huaiziak in SHDP phiat leh Indian National Congress ah lut nawn dia thupukna bawl uh hi’n gen hi.
Manipur government in Sadar Hills tua Kangpokpi district telin district thak 7 a bawlkhiak uh tawh kisai Sadar Hills ADC te’n Chief Minister O. Ibobi leh a government tungah kipahthu gen uh a, Kangpokpi district apan– IFCD Minister Ngamthang Haokip, Kangpokpi A/C MLA Nemcha Kipgen leh Saikul A/C MLA Yamthong Haokip te’n hun sawtpek apan mipi lam etna tangtun sakna dia a panlakna uh tawh kisai in leng kipahthu puang uhi. Aman a genzelna ah state govt. tungah kipahna laksatna in Kangpokpi district mipi tang in Chief Minister kiangah ‘Dakpi’ pia in CM leh Dy. CM-te ‘Saipikhup’ silh sak uhi. Huailou in Councillor te’n Muslim Council Manipur (MCM) a Working President MA Malik in Chief Minister kiangah Kangpokpi district zukkik dia ngetna a bawl tawh kisai mawhpaih thu puang uh a, Lunthang Haokip, Executive Member, Sadar Hills ADC in Sadar Hills ADC a nasemte lakah Muslim Community tamtak om uh a, huai in Sadar Hills ADC te’n khentuam neilou ahihdan taklang a, MCM President in district thak 7 lakah bang tupna ziak a Kangpokpi district zukkik ding a ngetna bawl hiam chih dotna bawl a, MCM President in kal 1 sung a hilhchetna bawl din taklang hi.
Manipur a health sector in masawn
Imphal, Dec-16: Manipur a Health Department te’n kum 20 paisa sungin thil tuamtuam semkhia uh a, Manipur in kum 3 kizom (2012-13, 2013-14, 2014-15) in India a state teng lakah Infant Mortality Rate (IMR) niamsakna ah 1na luah ziak in 13th Finance Commission apan grant tam mu pen a, Rs. 1057.01 crore tung hi’n gen uhi. State-owned medical college (2010) dia JNIMS bawlkhiak ahih tawh kiton in B.Sc. Nursing College, lupna 50 om theihna State Ayush Hospital phutkhiak ahi hi. Thoubal, Bishnupur, Senapati, Ccpur leh Ukhrul ah district hospital bawl banah RIMS telin Trauma Centre 4 dinkhiak hi a, Imphal East leh Imphal West tellou in district 7 ah GNM school 1 chiat dinkhiak dia lemsakna om a, huai banah CHCs 9, PHCs 14, PHSCs 155 leh district hospital 5 banah SDH 1 ah lupna koih behna dia keklet ding hi’n gen uhi.
Medical Directorate leh Ccpur, Bishnupur, Thoubal, Senapati, Tamenglong, Chandel leh Ukhrul district hospital-te adia building thak bikhiah hi a, CCpur district hospital a lupna 100 koih behna ding leh Chandel, Senapati, Tamenglong, Ukhrul banah Moreh sub-district hospital ah lupna 50 koih behna dia keklet hi’n gen uhi. Government in post thak hunkhop bawlkhia in semtu hunkhop lak beh uh a, February 2016 tan in public sector a doctor 1705 in khangtou hi, GNM leh ANM registered nurse-te 6508 leh 3385 tung hi’n taklang uhi.
Tuailai te’n mawhpuakna lianpi nei : BJP Vice President
Imphal, Dec-16: BJP Patsoi Mandal a Bharatiya Yuva Morcha Unit-te saina in Tera Keithel ah tuni’n ‘Youth Convention’ om hi’n gen uhi. Huai hun ah BJP Manipur Pradesh Vice President Shamurailatpam Premananda in a thugenna ah Manipur ah government siangthou banah nekguk-leh-takguk na ah kigolh lou ding government tun ding na dia tuailai te’n leng mawhpuakna lianp nei uh a, Manipur a maban election hun ah BJP in vaihawmna a let leh transparent leh pro-developmental government hiding a, huai ziak in tuailai-te khut ah kingah chi hi. Congress government in kum 15 sung in Manipur ah nekguk-leh-takgukna, recruitment ah ki deihsak tuamna tun uh a, government machineries-te zat theihlouh suak uhi. Sh. Shantikumar, ex-President, BJP Manipur Pradesh in Chief Minister O. Ibobi makaihna a Congress government khekkhe dia mawh pawthei ding government tung ding na dia Patsoi A/C a tuailai te’n panla ding in ngetna bawl a, Manipur leh Centre kikal ah kizawpna hoihtak om theihna dia Manipur ah BJP government poimawh chi’n gen hi. Hiai hun Thingom Rajen, President, BJP Patsoi Mandal; Konjengbam Kedernath Singh, President, BJYM, Patsoi Mandal; Premananda Meitei, General Secretary, BJP Manipur Pradesh; S. Nabachandra Sharma, Cultural in-charge, BJP Manipur Pradesh, BJP workers leh tuailai tamtak te’n uap uh hi’n kigen hi.
Assam Rifles te’n Lokchao ambush tawh kisai hilhchian
Imphal, Dec-16: Assam Rifles te’n Dec 16, 2016 ni a newspaper khenkhat ah Assam Rifles te’n NH-102 vengbit lou leh Police personnel-te sapna dawnglou chi’n thu kisuah tawh kisai thuzuau hi’n gen uh a, NH-102 a ambushna mun Laochao COB apan km 3 leh Khongkhan COB apan km 8 vel a gamla banah Tengnoupal-Moreh kikal ah Dec 15, 2016 in Road Opening Operation ding tawh kisai plan omlou a, Road Opening leh convoy protection-te specialised operation a hihziakin a poimawh dungzui a bawl hi’n gen uhi. Ambush ahihleh minute 3-5 sung in bei a, Assam Rifles Quick Reaction Team (QRT)-te minute 15-20 nung in ambush na mun tung uh a, akipat khiakna mun uh a gamlat tawh teh in tung baih uh a, ambush na mun um kual in operation a bawl banuah police personnel liam-te Ambulance in pawkhia uh a, Imphal ah puak ahih ma un Tengnoupal COB ah first aid pia uh chi’n gen uhi. Assam Rifles te’n state administration banah Manipur Police-te kithuah in panla uh a, tuabang a zuau phuahtawm pen nawngkaina om ding deihna hi a, security force leh police te’n Manipur ah muanna leh bitna omna dia gim leh tawl khawksalou a panla uh chi’n leng taklang uhi.
SVEEP tawh kisai in football match sai ding
Imphal, Dec-16: District Election Officer, Imphal West te’n SVEEP Activity Calendar pailel tawh kizawi tawn in ‘Free, Fair & Peaceful Football for Free, Fair & Peaceful Poll’ chih thupi zang in Imphal West Assembly Constituency tuamtuam a ding in football match sai ding uh hi’n kigen hi. Huai tawh kisai in Dec 17, 2016 in 18-Konthoujam A/C leh Patsoi A/C-te Patsoi Part-4 football round ah kimawl ding uh a, Dec 19, 2016 in United Progressive Indigenous (UPI) Lamdeng Khunou playground ah 16-Sekmai (SC) A/C leh 17-Lamsang A/C-te kimawl ding uhi. Huai hun in Public Health Camp leh Biometric Enrolment Camp leng om ding a, Patsoi leh Lamsang sub-division-te ah free medical check-up, khua-leh-tui hihna neite adia biometric enrolment leh domicile/income/OBC certificate hawmkhiak hiding in gen uhi.
TUNI THUPI:
“Himahleh khovel lungkhamnate, thil dang duhgawlnate a honglut chiangin, thu a dep a, gah louin a om nak.”
– Marka 4:19
EDITORIAL:
Festive session ah pilvanhuai!
Christmas session ahih tawh kitonin mihing sah mahmah a, sum haksatna omlou hilai leh mi tamzawsem ding ahihdan kilang hi. Christmas ding ni 8 lel khawngin samta a, bazar ah leikawm apan phulun pawt tawh kibang khopin bazar kai mipi om vengvungta hi. Hiai kawmkalah, bazar kai mipi, van zuak (dawr neite) leh civil society tuamtuam a heutute’ adingin pilvanna ding tam mahmah in i thei hi.
Amasapen in singtangbial mun tuamtuam apan zi leh tate/tute’ adia Christmas leh Kumthak (New Year) van ding hong lei mi tam mahmah hi. Tulai ngialin singtanglam zuana tai gari service tuamtuamte lun in leet zen in passenger-te gari tung leh nuai ah ki sedim mai uhi. A tangpi in Sumo leh pick-up 207, 407 ahihkeileh Camper gari-te passenger puakna dingin ki hahzat mahmah a, apaidan tak hileh hiaite pe’n passenger gari dia service theih hilou maithei hi. Himahleh, i lampite un a zir mahmah louh ziakin alou theilou a zat mai hong poimawh hi. Huai kawmkalah, gari-pu (Mahajon) te leh driver te’ adia theih dinga poimawh mahmah ahihleh, dan (rule/law) tawh kisai hi a, a gari capacity bangzah hi a, gari tung leh nuai a modify in mi tampi puaktheihna di hisapna ziaka a kan aval passenger i puak leh ‘Duhse lua akta kilawhkhup’ kichi i paunak ua om hong tungthei hi.
Festive session himhim a bangbang sahkhua hitaleh accident tamna hun ahi. Diwali hunchiang in Hindu sahkhua zuite tuahsiatna tuamtuam ziakin tampi si sek ua, tuaban ah Muslim-te leng Id festival leh Saudi Arabia khawpi a pathian ava biak uh ‘Haj Pilgrimage’ hunah vangtahna tuamtuam ziakin a lomlom in si om sek hi. Christian-te’ adingin Jesu pianchampha (Christmas) leh New Year lopna hunah accident bangleng om munse bang hi. Innkuante’n Christmas innkuan kim a lop ding chih a kinep mahmah lai in, a iit mahmah uh kuahiam bangin sihna tuak ut kholdiak se abatna leng om hi. Tua igennop bel, hiai thilte eilak ah leng tungmun law mahmahta a, accident kichi thil omthei mah ahi a, accident rate pe’n igam a isukkiam theihna dingin transport department leh traffic police te’n leng pan honlak thak uh deihhuai hi.
Diesel Auto telin passenger gari tuamtuamte’n anen-aham a passenger aluah chiangun accident om mun a, a gari man sangun leng siluang man ah tamzaw seng theigige uh ahihdan angaihsut uh poimawh a, aliam abai om leleng akepdet uh ngai thouthou hi. Huchih lai in, a gari uh niteng a se hulhul mai ahihdan uh leng aphawk uh deihhuai hi. Amaute chauh hilou in, tuailai nou khenkhat sun leh nitak hunin two wheeler tuamtuam a mithum khawng a kipua a, hattak a tai, kikou leh kidelh tuah vengvung muh ding tamtak omta a, huai in lampi kianga pai adiakin mi upa lamte’ adingin patauhna tunsek uhi. Maban ah election hong omlai dinga, gari neu leh liante’ speed control dingdan ngaihtuah hun hita hi.
Pilvanna dinga poimawh nawn mahmah khat ahihleh, a chik achikin guktakna i khawpi sungah uanga, himahleh, Christmas session hunte in khamtheih hihte leng ki saan diakin guta laang nawn ding a gintak ahi. A poimawh pe’n bel mah ni inn chiat venbit ding chih himai a, pawt tam louh a hoihpen ahi hi. Moukhakna/ kitenna/hansuang honna leh adangdang program tam hun mah ahi a, alou theilou a innkuan a pawtkhiak angaih leleng innvengte’ kiangah inn hon na etkaisak un chi a genpe’n pilhuai mahmah kha ding hi. Pasal khamtheih hihte chauh guta ahikei chih leng itheih uh poimawh hi. Manipur Express in tuni a thuguk khat azakdan in, Christmas hun chiang in Kwakta lam apan numei hunkhop hongpai tou in bazaar ah second hand khedap leh adangdang ‘SALE’ a omte hong gusek uh chi ua, tuni mahmah in khedap gu numei nih om ahihdan theihsuah in om a, adang leng mi bangzahhiam om dingun gintak huai hi. Tua ziakin dawr kaite’ adingin leng pilvanna ding tampi om a, hichibang hunte ah dawr ngaktu ding leng kidaihzai deuh a a om uh hoih ding hi. Sum note Rs 2,000 leh Rs 500 note thakte Lamka zangah duplicate (fake) hongtung naikei ding kua a chi ngam?
Mipite’ lam adia pilvanna nawnna dia deihhuai khat ahihleh, dawr kaite mahin hichih hunchiang in a customer-te uh akhemna chance uh leng himai hi. Blockade ziaka van rate zaw genban khang, himahleh, adiakin vai-te ngialin singtanglam apan hongpaite’ mel-le-puam, gamtat khawhei (movement) te man law mahmah un khem chihtakin khemsek uhi. Vaite teng adiktat kei ichi kei a, amau lak ah kamsiam kawmtak a hichih huna singtanglam te’n a sum neih sunsunte uh ana suhsak vaite tampi a om!
Nidang hunin civil society tuamtuamte’n Christmas kuan chiangin ‘help centre’ kichi hongkhe sek ua, tukum in muh ahikei. Mi kuahiam in van asuk mang leh hiai mun ah va koih ding leh a sumang te’n va kan ding chih khawng hi a, volunteer tanpha mun tuamtuam ah koih uhi. Mi thil sukmangte kikep mang mai mi tamtak i omlai in mi diktat leh chitak leng hunkhop ki om ahi chih haihlouh ding ahi. Abiktakin singtanglamte khualna ziakin LATSEA hia? CCC hia, ahihkeileh JPO te’n ni tamlou chik ineihsung un pan hon la zual lai le uh hong phatuam mahmah dingin gintakhuai hi.
No comments:
Post a Comment