Manipur Express | December 18, 2016

HEADLINES:

‘Demonetization’ in hun sawt la nawnlou ding’: Arun Jaitley

Pradhan Mantri Garib Kalyan Yojana (PMGKY) zat-theih ding in tuni’n kipan

New Delhi, Dec-17: Union Finance Minister Arun Jaitley in sum note thak bawlna ‘demonetization process’ paizom touzel in hun sawt lut nawnlou ding hi’n tuni’n gen a, huai tawh kisai in Reserve Bank of India (RBI) in theihtawp suah in panla touzel chi hi. New Delhi a tuni a ‘Annual General meeting of Federation of Indian Chambers of Commerce & Industry’ ah Jaitley in sum note sihsakna leh Goods & Services Tax (GST) bill tawh kisai in thupukna khauhtak lak a om ahi chi hi. Demonetization pe’n zawhsiang ahih chiangin India a di’n zangkhai deuhta ding ahi chi a, India a mizawng leh gentheite mah khualna ahih manin thil sautak en kawm a panlakna ah hun tomchik sung i buai uh kuapeuh in chil-lum tawh valh in dawhzou photni chi hi. Leitung pumpi ah economy tawh kisai in kitaitehna nasatak in pailel a, nidang lai in India pen economy thil ah a niampen lam in pang mahleh tuni chiangin ‘fastest growing economy’ lak ah telpha hi’n Jaitley in gen a, Goods & Services Tax (GST) leng April 1, 2017 apan zat hiding a lam-et ahihdan gen hi.   

Tuabang kalah, demonetization ziak a haksatna omte hihkiamna ding in tuni apan in Pradhan Mantri Garib Kalyan Yojana (PMGKY) kichi (black money-te white money suahsak theihna) zat theih ding in patkhiak hita hi. Hiai PMGKY tungtawn in bank a sum ki-deposit lou khempeuh zalen tak in puankhiak theih hita ding a, ahih ziakin April 1, 2017 tan hiding in kigen hi. PMKGY in bank a sum lutkha loute’ tung ah 50 per cent tax & surcharge kichi la ding a, sum selgu kha kuahiam a om leleng tax (siah) lak a, thilveng mai ding ahi hi. 

Revenue Secretary Hasmukh Adhia in a genna ah, income tawh kisai puangkhe khalou leh bank/post office-te a sum koih khaloute a dia hiai hunsung hon a om hi a, tax cut khiak a omte hiai PMGKY scheme thak  adia zat hiding hi’n taklang hi. ‘New black money disclosure scheme’ tungtawn a sum pelut-te min leh hihna puankhiak hilou ding a, thuguk (confidential) a koih hiding hi’n leng  taklang hi. Tua ziak in sum tam huntawk kemkha kuapeuh in e-mail ID- blackmoneyinfo @incometax.gov.in ah thuzak ding in leng Revenue Secretary in ngen hi. Tuni tanin gold leh sum note lui kigawm in Rs. Core 393 vel  matkhiak a omta hi’n leng taklang hi.

TUALSUNG:

33rd GA-cum-Mission Conference pailel kipan

Lamka, Dec-17: Rayburn Presbyterian Church , New Lamka a Presbyterian Church in India (Reformed) 33rd General Assembly-cum-Joint Mission Conference pailel ah ‘Christ Itna In A Sawl Teitei Gingtu’ (2 Korinth 5:14) thupi zangin Rev. S. Nengzakhup, Executive Director, NECTAR, Shillong in Pathian thugen hi. Aman agenna ah, leitung ah Saptuam tawh kisai pawl tuamtuam gen leh sak omchiang in nuamsalou ahihdan gen a, Van-gam a Pathian kiang ah mi tengteng ki-it, kingai vekding hi’n gen hi. PCI (R) ah pau tuamtuam zang a Pathian phatna lapawl omte ziaka nuamsa hi’n leng a, Manipur a tengkhawm-te, akhenchiang in kituaklou bangmah le hang, gamdang (foreign) ah u-le-nau bang a ki entuah leh nuamsa taka omkhawm hi’n gen hi. Khawmpi sunga devotion hunte Pastor K.Khaikhanpau, Bangalore PC, Rev.Chin Thiansong, Coordinator (Ministries) leh Rev G.Suanzalam, Coordinator (Institutions) in makaih uhi.

‘Youth on Leadership and Life Skills training’ om

Lamka, Dec-17: Diocesan Social Society DSSS/Peace Initiative in North Eastern India (PINEI) saina in Zouveng a Zogal Memorial hall ah tuni’n college student-te adi’n ‘Youth on Leadership and Life Skills’ tungtang training om a, college tuamtuam akipan student 100 vel kihel uhi. Huai hun ah Leadership  chih thupi pansan in Vevian Zou, Peace Activist, CCpur in sinsak a, ‘life skills’ tawh kisai Ginsuanlian, Counsellor, Rayburn College in asinsak banah Dr. Johnny Lalbiaklian in ‘motivation’ tungtang sinsak hi. 

     College student-te exam naihziak a, lungsim gim leh tawl ban ah ngaihtuahna paikhial omthei chih ziakin huaite apan amaute kepbit a,  puakgik aneihte uh dawn zangkhai leh tawldam taka hinkhua azat theihna ding uleh, mite etton leh makaihtu ahih ding uh tupna a Training neih a om hi’n kigen hi.

Pawl 4 in  thupuan bawl

Lamka, Dec-17: Mi tamtakin noptalna dingaazat uh Mata bialsung leh Khuga Dam area ah zu leh khamtheih thil tuamtuam puaklut khaam bikbek ahi chi’n Mata apan YPA unit, YVA unit, ZYA unit leh Village Authority te’n tuni in thupuan bawl uhi. Tua kia hilou in puakthei chi tuamtuam leh mivantang lungphawngsak thei thilging tuamtuam leng khaam ahi chi ua, nitak dak 7 nunga thil poimawh hihding neiloupi pawlam mi valut leh pawt kham ahi chi uhi.   Thusuakin ataklatzelna ah, Saptuamte’ theihpihna lou a mid-night program kuaman neitheilou ding a, mipi’ hihbuai teitei te’n mawh kipuak ding chi uhi. Huai kawmkawm in gari speed himhim leng a hat tawp a 49 Kmph a taiding in theihsakna khauhtak bawl uhi. Mata/Khuga Dam area ahihleh ‘Accident Prone Area’ hi’n leng muhtheiha, noptalna ziakin tuailai hunkhopin huaimun ah sihlawhta uhi.

Special Summary Revision ah form tamtak ngah

Lamka, Dec-17: Special Summary Revision 2017 sung in CCpur District a Assembly Constituency 6 apan DC office te’n form tamtak ngah uh a, huaite CEO/Manipur ah forward vek uhi. Form-6 zang in online pansan in mi 306 banah BLO tungtawn a form zang in mi 19965 in apply uhi. Form-7 (min diklou, double leh kipaikhia) mi 2228 pha a, Form 8 (correction) tungtawn in mi 5465 in apply uhi. Form 8 (A) ah Constituency khat apan Constituency dang a kisuankhual mi 1392 pha a, January 2017 a Final Draft suahkhiak ahihma in CCpur Dist. a voter kibehlap leh paihkhiak zah banah constituency khat apan constituency dang a kisuankual zah theihchet hinailou chihthu om hi.

Pherzawl a hohte hongtung uh

Lamka, Dec-17: Pherzawl District thak honkhiakna ah Thangkhanlal Guite, IPS, IPG makaih in Security personel tamtak kuante leh Lunminthang Haokip, IAS, DC/CCpur makaih a official kuante zannitak dak 9:00-10:00 sung in Lamka hongtung uhi. DC/CCpur leh SP/CCpur in tuni’n office kai in nasep sunzom nawn uhi.

Helmet khulou leh document kimlou 38 mankhia

Lamka, Dec-17: Rakesh Balwal, IPS, SP/CCpur thupiak bang in Traffic Police te’n tuni zinglam in Lamka Police Station mai, Tedim road ah special drive nei in2-wheeler taituahte Police Station campus ah sawllut zel uhi. Helmet khulou leh gari document kimlou banah driving licence tawilou mi 38 matkhiak in om a, huaite apan TR-5 receipt cut huna amuhkhiak uh Rs.3800/- tuni mah in Dist. Transport office ah submit uhi.

ST. Paul’s Institute in award sang ding

Lamka, Dec 17: Central Board of Secondary Education (CBSE), Guwahati Region nuai a  Atal Tinkering Lab (ATL) grant-in-aid kipahman sang ding kidemna ah New Lamka (G) a om St. Paul’s Institute telkhiak in om hi. Apaisa Nov. 5, 2016 in CBSE Guwahati Region kidemna ah Manipur apat school tuamtuam pang uh a, St. Paul’s Institute apan Ms. Baby Vungbiaklun leh Ms. Rapunga in, Meiphu a tuilawng kualsak a tuilum bawlkhiak dingdan leh Sound tawh kisai abawlkhiat-te uh kidemna ah valak khia uhi. ATL ahihleh Atal Tinkering Mission, NITI Aayog, Govt. of India panlakna nuai a kibawl hi a, singtang gam ah Science, Technology, Engineering leh Mathematics (STEM) masawn semnading a laboratory bawl ding tupna a kibawl ahi hi. Huai Award sumtang (cash) a piak hilou ding a, himahleh Rs.20 lakhs vel man laboratory bawlkhiat hiding in thusuak kingah hi. Manipur ah hiai bang Award sang omsun St. Paul’s Institute hi’n thusuak kingah hi.

Public meeting leh open discussion om

Lamka, Dec-17: Vengnuam United Soccer (VENUS) saina in PT Sports Complex, New Lamka ah tunitak dak 5:30 in kumnawn MLA election a 58-CCpur A/C apan Intending candidate-te tawh Public Meeting leh Open Discussion neih in om hi. Huai ah Lalmuanlian Phaipi, President, VENUS in vaidawnnathugen a, Jamsuanlian, Anchor in open discussion hun makaih hi. Intending candidate te’n thugenna ban ah dotna tuamtuam omte dawng uh a, Pastor T Songkhanthang, Local Pastor, EBC Vengnuam in Pathian kiang Intending candidate-te’thumsak hi.

Biakinn honna leh Saptuam kum 100 chin lopna 

Lamka, Dec-17: Paite Namsung a Pathian thu lutmasakna leh Siamsinna (Education) kipat masakna a chiamteh a om,Thanlon Sub-Divna Phaitong khua ah Biakinn thak honna leh Biakinn dinkhiak kum 100 (Centenary) chin lopna, Dece.18-19, 2016  sung omding hi. Dec. 18, 2016 zinglam dak 10:30 in Rev. S. Vung Minthang, Gen. Secy. EBC in Biakinn thak honna leh latna neiding hi. Huai hun ah Upa M. Thangkhansiam, Chairman, TBSUC in vaidawn thugen ding a, EBCC Phaitong leh EBC Central Choir te’n phatna lapawl sa in Rev. S. Vung Minthang, General Secretary, EBC in Pathian thugen ding hi. Nitak kikhop hun ah, Upa G. Thangchinlian in Pathianthugen ding a, Dec.19, 2016 zing kikhop hun ah Rev. L. Khaikhansong,Divnl.Supdt. EBC Thanlon Divn. in Pathian thugen ding hi. Nitak kihop hun ah Rev. S. Vung Minthang, Gen. Secy, EBC in Pathian thu gen in Pastor Khaikhuphang,Area Pastor in Centenary Program hunkhak ding hi.

  Phaitong khua ah kum 1914 velinEvan Thangvang Guite tungtawn in Manipur a Paite Nam lak ah Pathian thu hong lut a, kum 2014 in Gospel hongtun nung kum 100 chinna thupitak a lop in om hi. Phaitong khua ah Gospel Centenary lopzawh in Centenary Biakinn Pucca Building a bawl in om a, Biakinn dinkhiak nung kum 100 chinna lopna a program kibawl hi’n kigen hi.

Biak-inn thak kihong 

Lamka, Dec-17: C.Munkot khua ah tuni’n Presbyterian Church, Eastern Manipur Presbyterian (EMP) biakinn thak honkhiak in om hi. Rev. Donald Alun Baite, Exe. Secretary, EMP in biakinn thak hong in Pathian kiang ah lan a, ‘Seek ye first the kingdom of God’ thupi pansan in thugenna nei hi. Thil dangteng sangin Pathian gam zon masak poimawh ahihdan gen a, huai dia kuapeuh kisa ding in chial hi. Huai hun ah  T. Thongkhopao Haokip, Chief of B. Aijalon leh Rominglian, Chief of Saidan telin khaw hausa tuamtuam ban ah Father George Ginsei Baite leh ngainatu tamkhop paikhawm uhi. Programe sungin Gospel singer minthang Jeff Akai leh Gracy te’n la sa uh a, saptuam makai thak ding telkhiakna leng  nei ngal uhi.

Music Video Album hon hiding

Lamka, Dec-17: Baptist Dorcas Fellowship, Zenhang Lamka in abawl uh Gospel Music Video Album thak, Dec18, 2016 sunnung dak 1:00 in BCD Learning Centre, Zenhang Lamka ah Rev. Paukhanmang Guite, Director (Ministries) EBC in hongkhia in Pathian kiang ah thumna in landing hi.

Society for Fast Justice makaih in consultative meeting

Lamka, Dec-17: Society for Fast Justice/CCpur makaih in Dec. 21, 2016 sunnung dak 1:00 in Tuibong a DTC Hall ah consultative meeting omding a, CCpur Dist. sung a makai (leader-te), Executive head-te, Association tuamtuam a member-te, NGO-te banah Civil Society Organisation tuamtuam a makai-te telding in chial uhi. Huai hun ah maban a MLA election ding tawh kisai, Christmas leh New Year Festival ding tawh kisai, adoption of recommendation leh adangdang genkhawm ding uhi.

Annual prize giving day zang

Lamka,  Dec-17: Bungmual a Lalpuithluaii Foundation School (LFS) ah tuni'n Annual Prize Giving Day 2016 zatna om a, student  leh nu-le-pa tamtak banah LFS a kailui Rev. Lian Benson Khuptong, Exe.Secretary, Eastern Evangelical Lutherian Church leh Niangbiaklun, Pastor Chinkhengoupau, EBCC, Kimtanching leh Ham Seonghee, Busan City, South Korea te'n Guest of Honour hihna tawh uap uhi. Academic Session 2016 bullam apan thiltuam tuam a hihhoih tungtuante banah teacher kai kim te leh nikhat lel absent-te kiangah kipahman piak in om hi. School Award hawmna ah Joycee Chinremsing d/o Ngulthang Khaute in 73.33% mu in (late) TC Thiankham Award sang a, Chingmalsawm of Class X in Foundian Girl leh H. Rouzam of Class X in Foundian Boy award sang uhi. Subject tuamtuam a hihhoih teacher -te kiang ah leng incentive pia uhi. LFS in ahihleh Dec 21, 2016 in Annual Assessment Result suahkhe ding uh a, Feb 8, 2017 in Session thak pan ding uhi.

BYF, EBCC Vengnuam Phalbi Khawmpi

Lamka, Dec-17: Baptist Youth Fellowship, EBCC Vengnuam, New Lamka te’n Dec.19-22, 2016 sung “Tuailai thutak leh diktatna a kibulphuh thakna” Paunakte 14:34 chih thupi zang in Phalbi Khawmpi, 2016 neiding uhi. Huai hunsung in Pastor T. Songkhanthang, Adviser, BYF Vengnuam in Pathian thugen ding a, Dec.19, 2016 nitak in Upa G. Paukhamang, Local Chairman in khawmpi hongding hi. Khawmpi hunah Indoor leh outdoor kidemna omding a, individualitem 11 leh group item16 ah kidemna tuamtuam neiding uhi.

Imphal apan mi 70 val hongtung

Lamka, Dec-17: Imphal a Numei pawlin Bandh a bawl ziakun tunitakin Lamka manawh mi 70 vel koltang uh a, nitak dak 7:00 vela Bandh bei nung in Lamka hon zuan thei uh chihthu kiza hi. Thutut kingahdan in Tulihal Airport ah leng mi 40 vel koltang uh a, Guwahati apan Bus a hongpaite lakah mi 6 vel Lamka lutsuak dingte leng buai uhi. Ccpur Police in amaute kianga security piak dingdan ngaihtuah in Bishnupur a Nambol Police-te thuzak uh a, lamkal a buaina atuah uleh panpih dia ngen in, Ccpur district a buaina atuah uleh Dist. Police te’n delh ding in kisa uhi.  Tuni a buaina tuakte SSPP GHQ inleng buaipih in lampi ngaihtuah sak uh hi’n kigen hi.

Sielmat EFCI KTP in Home 2 ah panpihna pia

Lamka, Dec-17: Sielmat  EFCI KTP te’n Tuailai Khawmpi 2016 a1stPrize leh Saikawt PKTP sports a overall performance1stPrize alakte uh,Pathian nasepna ding in Happiness Home (HIV infected and affected) leh Amazing Grace ( Abandoned Babies Home), Bungmual te kiang ah pia uhi. Huai hun ah prize alakte uh kia hilou in anntang, silh-le-ten, zanpuan, sum, school supplies leh adangdang leng pia uhi.

‘Awja Paupu Lenlai’hong ding

Lamka, Dec-17: Zotal Film Company in ZYO GHQ Ambulance project sepsuahna dingaabawl uh ‘Awja Paupu Lenlai’ kichi Dec.18, 2016 sun dak 12:00 in Zogal Memorial Hall Complex, Zoveng ah honkhiak hiding hi. Huai hunzatna ah Chief Guest in Paokholal Haokip, Social Worker pang ding a, Guest of Honour in  Paukhansuan Khuptong, Intending MLA candidate (58-CCpur A/C), Functional President in T.Goukhomang, ZEO/CCpur leh Chief Host in Chinlunthang, President UZO pang ding a, lasiam tuamtuam 10 val in uap ding uhi.

Report leh Ordination tawh kisai suahkhelh

PCI (Reformed) 33 veina General Assembly-cum-Joint Mission Conference tungtang zan issue a kisuah ah Rev. Khen P. Tombing, Chief Coordinator in Report, Ordination service leh Commissioning sai chi in kisuah kha mahleh thuchianzaw kingah thak dan in December 15, 2016 nitak dak 5:00 a khawmpi honna leh Ordination kithuah a, Khen P. Tombing in report leh Ordination sai hi. December 18, 2016 (Pathianni) nitaklam dak 5:00 a biakna kikhop ah Ordination tangte Rev. Kham T Valte in nna gotna (commissioning) neiding hizaw hi.

STATE THUTHANG:

DC/IW in mobile data khawlsak din thupia

Imphal, Dec-17: Robert Singh Kshetrimayum, DC/Imphal West in Imphal West area telin Manipur dinmun sousang tawh kisai a social media – facebook, whatsapp, hike, messenger leh viber etc. zang in mobile data tungtawn a zuau thuthang in khawtang buaina a tawk thou theih kham daihna dia mobile data service khawlsak ding in theihsakna bawl a, huai tawh kiton in Imphal West district a telecom operator teng in thuthak om masiah mobile data service khawlsak ding leh compliance report pelut ding a theisak hi’n gen uhi.

Kiselna ziakin MBC Church a glass hih sia

Imphal, Dec-17: Chingmeirong area ah tuni’n bandh supporter te’n lampi khak in gari banah cycle tai ding kham uh a, huai nung in bandh supporter leh bandh kalh-te kalah kiselna om ziak in bandh supporter te’n suang zang in MBC Church a glass hunkhop deng sia uh hi’n kigen hi. Huai nung sawtlou in Police-te tung uh a, sousang thei dia a kilat ziak in bandh supporter-te kham daihna din tear gas  kapna ah nupi 4 liam uhi. A liam-te Pukhrambam Thoi (33) w/o P Shyam, Ahanthem Thoi (32) w/o A Bijoy, Akoijam Santi (28 ) w/o Ak. Ghannashyam leh Arus (45) w/o Inaoton hi un kigen hi.

Bandh in hindan nawngkaisak

Imphal, Dec-17: Khwairamband Keithel 3 a nupi pawl te’n zan nitak dak 7:00 apan helpawl te’n state security personnel-te a thah uh mawhpaihna leh Manipur apan NSCN-IM-te nulsiang ding phutna in Manipur pumpi ah dakkal 24 sung bandh a bawl un hindan nawngkai sak a, Imphal khawpi ah dawr, dukan, sumsinna leh educational institution teng  kikhak a, govt. office-te ah akai tamlou a, Inter-state leh inter district passenger service teng leng dinkhawl vek uhi. Bandh supporter te’n zan nitak apan Khwairamband, Paona leh Thangal bazar lutna lampite khak uh a, mun tuamtuam ah bandh supporter te’n lampi khak uh hi’n kigen hi. Bandh supporter te’n National Highway ah Army Convoy-te kham in kik sak uh a, Imphal-Churachandpur lampi ah Congress MLA escort te’n bandh supporter-te hawlna dia thau  khah uh hi’n kigen hi. 

Thusuak in Phungzathang Tonsing, MLA escort a personnel 2 in bandh supporter te vauna in tunglam ah thau 10 vel kap mahle uh bandh supporter-te kikhen zak lou in thaukap-te mat ding in delh uh a, MLA resident ah tailut uh a, himahleh mipi thangpai te’n Gypsy a tuang Personal security officer (PSO) khat man in khahkhe nuamlou uhi. Huai nung in Police-te va tung uh a, mipi thangpai-te kiangah security personnel 2-te ngaihdam ngen sak uh a, huai nung a PSO khahkhiak banah personnel 2-te huai mun apan pawkhia uhi. Keishampat area ah bandh supporter te’n NSCN-IM Gen. Secy. Th. Muivah, UNC President Gaidon Kamei leh Pub. & Info. Secy. Stephen Lamkang-te lim mi muh din koih uh a, Nitaklam in milim-te mei in hal uh a, police te’n thagum zang in bandh supporter-te hawlzak uhi. Nupi pawl te’n gua, sing leh suangtum banah tyre hal in lampi khak uh a, mun khenkhat ngial ah lampi lai tu uhi.  Huai banah bandh ziak in mun tuamtuam apan hong pai-te Imphal Tulihal International Airport ah tang uh a, khenkhat-te zinglam apan bandh bei ding ngak in Airport sung ah om uh hi’n kigen hi

Security personnel-te thau 9 suhsak

Imphal, Dec-17: Galvan hoihtak tawh kithuam NSCN-IM hidia gintak te’n Noney district a Nungkao a 7th IRB post apan thau 9 suhsak uh hi’n kigen hi. Police thusuak in NSCN-IM dia gintak cadre 70 vel te’n tuni zinglam dak 11:30 velin 7th IRB post gei a foot patrolling a pai 7th IRB leh 6th Manipur Rifles-te thautawi 9 (6th MR-te thau 5 leh IRB-te thau 4)– AK-series rifles 4, SLR 4 leh Insas rifle 1 suhsak uh a, huai post ah personnel tamzaw-te NH-37 a van tuamtuam pua gari-te vengbit ding a zat ahih ziak un thiltung hun in IRB post ah mi 10 vel om uh a, thau khat vei leng kap lou uhi. Thangkam Lupheng, ADC Member in a thugenna ah tulai in student scholarship telin   transaction teng banking system a piak hita a, Saikul mipi’n Vijaya Bank a neih uh hampha uh a, himahleh huhamtak a gamtatna leh thiltung tawh kisai Saikul area-te a ding in vangsiat huai a, sum gukna a kigolhte matkhiak leh huai bang a gamtang-te  gawt khauhtak piak hiding chi hi. Seikhomang Lupho, President, Kuki Inpi Saikul Gamkai in thiltung in Saikul area-te thangpaisak a, mimal ahihlouh leh pawlpi kigolh khate tungah mawhpaih thupuang a, thiltung ni akipan Saikul Hill Town a bank omsun a kikhak ziak in mipite a ding in haksatna lianpi tun chi hi. Kuki Inpi, KSO leh Women Union te’n Christmas leh New Year a naih tak ziak in mipi haksatna leh lungkhamna-te ngaihtuahna in bank thuneite’n mipite khualna in a kintheipen a bank hong nawn din ngetna bawl uhi.

Sum laksakna tawh kisai in kiphinna nei

Kangpokpi, Dec-16: Meltheihlouh maituam mi 2 in Dec 15, 2016 zinglam dak 11:00 vel in Saikul a Vijaya Bank staff-te apan Vijaya bank a sum ding Rs. 6 lakh a laksak uh mawhpaih in KSO leh Women Union Saikul Gamkai telin Kuki Inpi Saikul Gamkai makaihna in tuni’n Saikul mipi leh bank customer-te Saikul Vijaya Bank mai ah kingak khawm in huai apan Saikul SDO Complex ah kiphinna nei uh hi’n kigen hi. Huai hun ah placard “We condemn act of  robbery”, “Bank robbery means robbery of people’s rights”, “The solution to arms robbery is a dead robbery on the spot”, Stop bank dacoity”, “Stop robbery culture in Saikul area”, “Mind your own business”, “Seek to understand others”, “We want free zone in Saikul Hill Town” chihte tawi uh a, Tonglet Chongloi, Chairman, Saikul Hill Town in sum laksakna a kigolh te’n a sum lak uh businessman leh contractor-te sum hilou in mipi sum ahihdan a theih uh ngai a, akisaikhakpih thuneite leh Government in sum gute matkhiak a dan tawh kituak a gawtna a piak ding uh chi hi.

UNC-te terrorist a puang din memorandum pia

Imphal, Dec-17:  Socialist Students’ Union of Manipur (SSUM) te’n Prime Minister N. Modi kiangah United Naga Council (UNC) te’n Manipur a nam tuamtuam kalah kituah louhna tun leh economic blockade a bawl uh tungtawn a kial tungsak a ngawhna bawl in Terrorist group a puang dia ngetna in tuni’n memorandum pia uhi. SSUM te’n kha 1 paisa apan economic blockade ziak in niteng vanzat tuamtuam haksa a, van man naktak in khang a, nam tawh kisai a kihuatna tun a, singtang leh phaizang bial a mipi adia haksatna gen vual louh tun hi’n gen uhi. Manipur a hibang a thil a khatveina  hi nawnlou a, kum 2011 in leng economic blockade ni 100 val  om a, tua ziakin mipi’ n haksatna lianpi tuak in mipi tungah haksatna tun a, UNC te’n nam tuamtuam kalah kihuatna gu tuh uh a, kum 1990s a Thadou community tung a ethnic genocide hun ah leng UNC-te vanzat hi’n ngawh uh a, UNC te’n 1993 in Thadou-te kiangah ‘Quit notice’ pia in numei leh naupang telin a sang a sim that in khua tamtak haltum sak uh a, hiai tungtang ah government kitheih mawh bawl in migiloute gawtna piak hilou uh a, UNC te’n tulel a khawtang buaina banah sisan suahna, nam tawh kisai a ki huatna leh ki sat tuahna tamtak tun beh lai ding uh hi’n leng taklang uhi.

NE a state capital 3 ah Clean Air Scorecard Tool (CAST) 

Imphal, Dec-17: International NGO Clean Air Asia (CAA) te’n kum 2001 apan Asia ah air quality hoihna ding leh khawpi-te tenna tak ahih theih nang in panla uh a, India a khawpi 27 leh North East a state capital 3 ah Clean Air Scorecard Tool (CAST) zang ding uh hi’n kigen hi. Clean Air Asia te’n Clean Air Management programs nuai a CAST tawh kisai kum 3 sung lut ding a, NE state capital telkhiakte Agartala, Guwahati leh Imphal ahi. Prarthana Borah, India Director CAA in CAST zatna ding munte Aurangabad, Mumbai, Nagpur, Nashik, Varanasi, Pune, Surat, Vadodara, Ahmedabad, Jallandhar, Dehradun, Varanasi, Allahabad, Kanpur, Jaipur, Lucknow, Kolkata, Bhubhaneshwar, Cuttack,Patna, Noida, Gwalior, Bhopal, Raipur, Bangalore, Hyderabad, Chennai, Gurgaon, Faridabad leh Ghaziabad hi a, khawpite ah pollution sang ziak in damtheihna lam sukha a, CAST in air quality dinmun theisak in research bawl nung a khawpi a te’n huihsiang  hoih zaw a muhtheihna ding ua core solution bawlkhia chi hi. India in 10 real time monitoring station 10 telin 342 air pollution monitoring station nei hi’n gen a, China ah air pollution data muhtheih in om a, real time monitoring data banah facilities khenkhat leng  dakkal a muhtheih hi’n gen hi.

KRA te’n assault case tawh kisai hilhchian

Kangpokpi, Dec-16: Kuki Revolutionary Army (KRA) te’n Taphou Village ah Dec 7, 2016 in Awang Sekmai Laipat Leikai apan Amom Joseph soisakna tawh kisai in hilhchetna bawl uh hi’n kigen hi. Huai tawh kisai a T. Simte, Info. & Pub., Secy., KRA in thusuah a bawlna ah Joseph soisakna tawh kisai a Stephen ngawh in om a, thiltung hun in Taphou village ah a omlou ziak in thuzuau leh pansan bei hi’n gen a, Stephen in zan a Taphou village a tunkik nawn hun ah thiltung theikha pan chi hi. Joseph in amah soisakna ah Stephen leh organization khenkhat tungah ngawhna a bawl nial kawm in Stephen leh KRA sukminsiat tupna hiding in gen a, pawlpi leh cadre-te sukmin siat tupna tawh kisai miteng in tawpsan ding in leng ngetna bawl uhi.

Bomb puak tawh kisai in MNRF-te kipuang 

Imphal, Dec-17: Imphal a Fairyland leh Nagaram ah zan nitak a bomb puak tawh kisai in Manipur Naga People’s Front (MNRF)-te kipuang uh hi’n kigen hi. Huai tawh kisai a Thomas Numai, Asst. Publ. Secy., MNRF in bomb puakna inn-te a neitu Ukhrul district a Somdal village-te hi a, NSCN-IM tawh kizopna nei a ngawh bawl uhi. Akigendan in zan nitak dak 7:40 velin ISBT mai a Fairyland a Special Contractor Shangreihan Muivah (90) tenna inn ah bomb puak a, amah ahihleh Th. Muivah, Gen. Secy., NSCN(IM) sanggampa ahi hi. Huai zawh minute 20 nung in Fairyland mah ah Mingyao Ruivanao (58) tenna inn ah bomb puak nawn a, huai nung in RB. Leisinsham (85), SO (retd.) tenna inn ah bomb puak nawn a,  si leh liam omlou hi’n gen uhi.

TUNI THUPI:

“Dangka sum deihtak zaw gilou chiteng bul ahi ngal a; huaituh khenkhatten a eng ua, ginna a pai mangsan ua, amau leh amau lungkhamna tampiin a kisunlet tektok uhi.” 

– I Timothi 6:10

EDITORIAL:

Nu’ tamtak khitui luanna:

Lamka leh Gambling

Gambling i chih chiangin kimawlna chikhat himahleh, ahoihlam sangin ahoihlou lam nawkkha zaw ut mahmah a, mi tamtakin haipih ua, inn-gam lawh uhi. Hiai gambling kimawlna kichi a lunglut leh a kha in matkhak ngal dawm nek lou in a-sun-a zan chih omlou in a ngaihtuahna tengteng uh luahdim mai a, zanhak zenzen a kimawl mi tampi petmah ki-om hi. Gambling in ahuap tamtak om a, India a dingin dan in aphallouh hi a, huchi kawm kalah, state lottery leh horse racing kichite bel phalin om hi. State lottery ahihleh kua hiam zawnna ding a bawl hilou in revenue circulation om theihna dinga bawl hi a, eilawi in nidang a lottery i bawl ua, nikhat a 2/3 vei i draw-te tawh kibang thahah lou hi. 

Supreme Court thupiak bangin gambling kichi ‘crime, corruption leh money laundering’ ahi chi ua, nakpitakin kham uhi. State lottery-te tanpha kham dingin leng activist hunkhop in Court ah ngetna leh chouna ana bawl uhi. Dan (Legality) tak a gen in a kisaipih state-te’n gambling tawh kisai a etkai ding uh chih hi a, a enkaitu ding District magistrate leh police-te ahi. Central law khat enzual le hang, Public Gambling Act of 1867 kichi om a, huai in public gaming house himhim daal hi. Hiai dan bawhsete’ tungah sum liausak theih ahihban ah kha 3 tan jail bang zut theihna leng ahi hi. India danbupi in agenna ah, hiai kimawlna ahihleh category nihin khentheih a, ‘game of skill’ leh ‘game of chance’ chih ahi. 

Kimawlna siangthou leh siangthoulou a om chih i thei, ahih ziakin a haipih ngialte a dingin amau tempaina leh kimawlna siangthou vekding in ngaihsun uhi. Lamka khawpi sung dinmun enzualta leng, mun tamtak ah zan khawvak leh sunni tumtum a laiden/laikap (playing cards) kimawlna mun tampitak om hi. Playing cards kimawlna tungtawn a kisual lawh, in-gam lawh mi bangzah i omta ding ua? Eilak a i thansak mahmah uh, Rummy, ‘three-card’ leh adangdang tungtawn a In bandha mi hunkhop a om lam i haih kei hi. Card kimawl kichi thil nuampi hi a, a kha in leng hon man baih mahmah a, ahih ziakin inkuan adia siatna tawpkhawk hi a, zi leh tate’ khitui nulna ahihdan theih poimawh hi. Inn-le-lou tanpha chanta mi tampi i om ua, tua ziakin pilvan poimawh mahmah a, huchi kawm kalah, card kimawlna ah laizial pet veuvau a nupi/ nuthawi chih theihbut louh khop a tam a kimawl leng om tham ua, lungkhamhuai mahmah hi. Zu-le-sa a kibual ahihkeileh khamtheih (drugs) a kibualte’ sang a khawkzaw gambling in a matkhakte hikha maithei lai hi. Laithai/laiden kimawlna i chih mi tamtakin khuaknouhna ahih keileh pansan tuamtuam nei in a kisiam tanthu uh paukam zang mahle uh India dan in a kham hi a, sum board a kimawlna leh in-gam theih ahihdan a mukholh mahmah ziak uh ahi.

Eilak ah gambling kimawlna chi tampi a om, zan khawvak a Ludo sing leh carom kap peih leh a sianglou kimawlna hunkhop gending om a, tu ngialin Lagao kimawlna hong kipan nawn in New Bazar bus parking ah sun nitum in mi a lomlom in om mai uhi. Kuang 10 phial ah kilui in mite’n a sum neihte uh va-board ua, kintak leh baihlam tak a sumpung muhsawmna (easy money) ahi. Nidang hunin i gamah Chetak lottery in naktak in i society hon sukha ua, naupangte’ a dingin guktak kipatna leng hong hi hi. Rs 5 a i cut a i mat leh Rs 50 mat ding, LTD (Last three digit) ngial i mat leh Rs 150 mat ding chih khawng hi a, mi tamtak lunglutna leng hi a, dau etna leh baihlamtak a sum muhna leng a na hi ngut hi. Hiai hunin mi tamtakte hiai lottery kha in man in inn-le-lou chanlawh zenin pang ua, apu (mahajon)-te a lawk pe’n himai uhi. I lak a lottery kithanlai in nupa bangzah a kikhen lawh ding ua, mi bangzahin a sihlawh ding ua chihte study tak mahmah a, pasalte’ sangmah a leng uangzaw leh risk sang taktak la ngam nupi hunkhop leng om lai hi.

Bangziak a hichi tel lawmlawm a gambling lunglut i hia chih ngaihtuahtham chinga, Pathian in i gam hon hamsiat ut chiang a hibang thil hong omsek a diam chih uthuai hi. Tua kia ahikei, Lamka khawpi sung ah kum bangzahhiam paisa apan gamdangte’ hihdan copy kineih in ak kisualsakna leng om a, tunitan in leng a omlai ding…! Tua hunah sum a sing-a sing a sim ki-bet ua, hiai in animal rights naktakin sukha hi. Ak a zoulou zawpe’n ngial sisan kai niuniau in om a, akhente’n sihlawh hit-het uhi. Hiai leng ‘easy money’ thupitak ahi a, kimawlna sapsap dingin leng thil mulkimhuai ahi hi.

Mi gam tawh eigam tehtheih vual ahikei chih kuapeuh in i thei uhi. Vaigam-te ah mi kimawl le uleng a high class deuh leh sumneite’ kimawlna leh a lunglutna uh tuam a, eilawi i lompai mahmah uh i puksiatna uh hinak hi. Playing card kimawlna hun ah mite’n a lakh a sim a poimawh leh zankhat in pawkhe ziahziah ua, a bank account ua om a sum neihzah uh a theih ziak ua hangsan uh ahi. Eilawi a zawng leh gentheite’ adia hiai game kimawlna board sangte ah vatel vual hilou a, i neih sunsun tawh kuante i hihman un pilvanhuai mahmah a, pungta leng hiai zah phading chih ngaihsutna i neih ziakin hon pihai pahpah khasek hi. 

Kimawlna siangthou mahmah bel, Christmas kuanchiang in saptuam tuamtuam a tuailai pawlte’ makaih khawngin indoor games/outdoor games kimawlna leh kipolhlimna tuamtuam omsek a, hiai pe’n thil kipahhuai mahmah ahi. Tuabang mahin Yaoshang hun dek chiangin ‘Games & Sports’ tuamtuam neihin om sek a, tua in tuailai leh khangthakte hih thathou mahmah a, hibangte kimawlna siangthou ahi. Tu in Lamka khawpi sungah Lagao kimawlna nasatak om a,sum pung etlahna ziak a vakimawl (passenger/customer) a za a simte niteng in sum tampi petmah mangchiat ding ua, a pu (mahajon) te’ a dingin nuamten ven chih theihin om hi. I tenna mun Christian gam ahi a, kuate hiam in a festival hun ua Lagao kimawl a chindante uh eilak ah apply sak ding leng hi khollou maithei hi. Bangteng hileh mimal ah kinga ahi.